တၢ်ဂီၤသ့ၣ်တဖၣ်အံၤဘၣ်တၢ်ဒိန့ၢ်အီၤဖဲလါအ့ဖြ့ၣ် ၂၀၂၆ နံၣ်ဖဲအဆ---သဝီ, ပယၢ်ရီကရူၢ်, ဘံလ့ကီၢ်ဆၣ်, ဒူသထူၣ်ကီၢ်ရ့ၣ်န့ၣ်လီၤ. စးထီၣ်လၢလါအ့ဖြ့ၣ် ၂ သီ, တုၤလီၤလၢလါအ့ဖြ့ၣ် ၁၂ သီ, ၂၀၂၆ နံၣ်အနံၤ, KNLA ဒီးကမျၢၢ်တၢ်ဒီသဒၢသုး (PDF) ထီၣ်ခးဝဲလ့က့ၣ်ပယီၤသုးကလၢၤဒီးတၢ်ဒုးကဲထီၣ်ဝဲလၢ KNLA ဒီး PDF သုးပာ်ဖှိၣ်ဒီးပယီၤသုး ခမရ နီၣ်ဂံၢ်-၄၀၉ လၢအအိၣ်ဖဲ (စကခ) နီၣ်ဂံၢ်-၈ အစုဒုၣ်တီၤဖီလာ်တဖၣ်အဘၢၣ်စၢၤန့ၣ်လီၤ. ပယီၤသုးဟဲခး လီၤစ့ၢ်ကီးတၢ်လၢကဘီယူၤကိးမုၢ်နံၤဒဲးဖဲအဆ---သဝီန့ၣ်လီၤ. လၢတၢ်ခးလီၤတၢ်တဘျီအံၤ, ပယီၤသုးကဘီယူၤဒုးသုးဟဲတ့ၢ်လီၤဝဲမ့ၣ်ပိၢ် (၅၀၀-ပီၣ်) အိၣ်လၢ (၁၀) ဖျၢၣ်ဃၣ်ဃၣ်ဒီးကဘီယူၤဒုးသုး (Y-12) ဟဲတ့ၢ်လီၤစ့ၢ်ကီးဝဲကျိဖးဒိၣ်အါန့ၢ်ဒံး (၁၀၀) ဖျၢၣ်န့ၣ်လီၤ. လၢကဘီယူၤခးလီၤတၢ်အံၤအဃိ, ဟံၣ်အါန့ၢ်ဒံး (၅၀) ဖျၢၣ်ပၣ်ဃုာ်ဒီးကျးတဖျၢၣ်, သီခါဖၠၢ်တဖျၢၣ်, တၢ်အီၣ်သကိးမ့ၤအလီၢ်တဖျၢၣ်, တၢ်ဘါသကိးတၢ်အလီၢ်တဖျၢၣ်ဒီးကၠိတၢ်သူၣ်ထီၣ် တဖျၢၣ်ဘၣ်ဒိဟးဂီၤဝဲန့ၣ်လီၤ. ကဘီယူၤခးလီၤတၢ်ဒီးတၢ်ခးလီၤကျိဖးဒိၣ်အံၤဘၣ်ဟးဂီၤစ့ၢ်ကီးရီဘၢၣ်ကျီးအါမးန့ၣ်လီၤ. တၢ်ဂီၤလၢအဖီခိၣ်ခံဘ့ၣ်အံၤပာ် ဖျါထီၣ်ဝဲဟံၣ်တၢ်သူၣ်ထီၣ်ဘၣ်ဟးဂီၤဖဲအဆ---သဝီန့ၣ်လီၤ. တၢ်ဂီၤလၢအဖီလာ်အစ့ၣ်တဘ့ၣ်ပာ်ဖျါထီၣ်ဝဲသဝီဖိလၢအဆ---သဝီတဖၣ်ဃ့ၢ်မှံဟးဖျိးဒီး လဲၤအိၣ်ကဒုလၢလ့ပူၤန့ၣ်လီၤ.  တၢ်ဂီၤလၢအဖီလာ်အထွဲတဘ့ၣ်ပာ်ဖျါထီၣ်ဝဲကျိဖးဒိၣ်အက့အခီလၢအပိၢ်ဖးထီၣ်ဒီးတပိၢ်ဖးထီၣ်ဘၣ်သ့ၣ်တဖၣ်လၢအ ဟဲလီၤတဲာ်ဖဲအဆ---သဝီပူၤန့ၣ်လီၤ. တချုးလၢသုးပာ်ဖှိၣ်သ့ၣ်တဖၣ်ဟူးဂဲၤလၢကထီၣ်မၤန့ၢ်လ့က့ၣ်သုးကလၢၤဒံးဘၣ်န့ၣ်, သဝီဖိသ့ၣ်တဖၣ်လဲၤဃ့ၢ် အိၣ်ကဒုကွံာ်ဝဲဆူထံခံကွာ်စိး, ကစၢၢ်ကျါ, စံာ်ဒဲ, လ့ပူၤဒီးလၢအခုးဒဲခဲလၢာ်လံန့ၣ်လီၤ. သဝီဖိတနီၤနီၤစိာ်ဃုာ်ဟံၣ်တၢ်ပီးတၢ်လီဒ်အမ့ၢ်တၢ်အီၣ်တၢ် အီဒီးတၢ်ပီးတၢ်လီသ့ၣ်တဖၣ်တန့ၢ်နီတမံၤဘၣ်န့ၣ်လီၤ. လၢတၢ်န့ၣ်အဃိ, ဖဲတၢ်စူၤအဆၢကတီၢ်သဝီဖိလၢဃ့ၢ်မှံဟးဖျိးသ့ၣ်တဖၣ်ဘၣ်ကွၢ်ဆၢၣ်မဲာ်ဒီးတၢ် အိၣ်ကဒုအလီၢ်, တၢ်အီၣ်တၢ်အီဒီးကသံၣ်ကသီအတၢ်ဂ့ၢ်ကီသ့ၣ်တဖၣ်န့ၣ်လီၤ. ဖဲလါယူၤလံ ၂၀၂၆ နံၣ်အပူၤန့ၣ်သဝီဖိသ့ၣ်တဖၣ်ဘၣ်ဃ့ၢ်အိၣ်ဒံးလၢတၢ် ဃ့ၢ်မှံဟးဖျိးအဆၢကတီၢ်ဒီးအဝဲသ့ၣ် ဟဲက့ၤအိၣ်လၢသဝီပူၤတဘူၣ်ဒံးဘၣ်န့ၣ်လီၤ. (တၢ်ဂီၤ- KHRG)

တၢ်ဂီၤသ့ၣ်တဖၣ်အံၤဘၣ်တၢ်ဒိန့ၢ်အီၤဖဲလါအ့ဖြ့ၣ် ၂၀၂၆ နံၣ် တၢ်လီၢ်လၢအဘူးဒီးအဃ---သဝီ, နိၣ်မကွံၢ်ကရူၢ်, ဖၣ်အၣ်ကီၢ်ဆၣ်, ဒူသထူၣ်ကီၢ်ရ့ၣ်န့ၣ်လီၤ. ဖဲလါအ့ဖြ့ၣ် ၁၆ သီ, ၂၀၂၆ နံၣ်, ဟါခီ ၄း၅၀ အဆၢကတီၢ်ပယီၤသုးကဘီယူၤတဘ့ၣ်ဟဲခးလီၤတၢ်ဖဲအဃ---သဝီဒီးတ့ၢ်လီၤဝဲမ့ၣ်ပိၢ် (၆) ဖျၢၣ်ဖဲ သဝီပူၤန့ၣ်လီၤ. တၢ်ဂီၤလၢတၢ်ဖီခိၣ်အစ့ၣ်တဘ့ၣ်ပာ်ဖျါထီၣ်ဝဲမ့ၣ်ပိၢ်အခံမဲၢ်ကုလၢအပိၢ်ဖးထီၣ်ဒီးမ့မ့ၢ်တၢ်ဂီၤလၢအထွဲတဘ့ၣ်ပာ်ဖျါထီၣ်ဝဲမ့ၣ်ပိၢ်လၢအတ ပိၢ်ဖးထီၣ်ဘၣ်တဖျၢၣ်လၢအလီၤတဲာ်ဖဲအဃ---ရီဘၢၣ်ကျီးပူၤန့ၣ်လီၤ. ကဘီယူၤဟဲခးလီၤတၢ်တၢတဘျီတ့ၢ်လီၤဝဲမ့ၣ်ပိၢ် (၃) ဖျၢၣ်န့ၣ်လီၤ. မ့ၣ်ပိၢ်ခံဖျၢၣ်ပိၢ်ဖး ထီၣ်ဒီးဘၣ်ဒိဟးဂီၤဝဲသဝီဖိအတၢ်ပီးတၢ်လီဒီးတၢ်စုလီၢ်ခီၣ်ခိဒီးမ့မ့ၢ်လၢသၢဖျၢၣ်တဖျၢၣ်တပိၢ်ဖးထီၣ်ဘၣ်န့ၣ်လီၤ. ဖဲအဟဲခးလီၤတၢ်တၢတဘျီဝံၤအလီၢ်ခံ, ကဘီယူၤတ့ၢ်လီၤကဒီးမ့ၣ်ပိၢ် (၃) ဖျၢၣ်ဖဲအဃ---သဝီဒီးခးလီၤစ့ၢ်ကီးကျိစဲးလးန့ၣ်လီၤ. မ့ၣ်ပိၢ်အံၤလီၤတဲဖဲသဝီဖိအရီဘၢၣ်ကျီးပူၤဒီးဘၣ်ဒိဟးဂီၤဝဲရီ ဘၢၣ်ထူၣ်လၢအကယၤန့ၣ်လီၤ. ဖဲကဘီယူၤတ့ၢ်လီၤမ့ၣ်ပိၢ်စှၤမံးနံးဝံၤအလီၢ်ခံ, ခမရ (နီၣ်ဂံၢ်-၂၀၂) သုးဖိသ့ၣ်တဖၣ် ခးလီၤစ့ၢ်ကီးဝဲကျိဖးဒိၣ် (၁၂၂ မမ) (၇) ဖျၢၣ်ဖဲအဃ---သဝီပူၤဒီးဘၣ်ဒိအါထီၣ်ဟံၣ်ဃီတၢ်သူၣ်ထီၣ်ဒီးရီဘၢၣ်ကျီးသ့ၣ်တဖၣ်န့ၣ်လီၤ. လၢတၢ်ခးလီၤကျိ ဖးဒိၣ်ဒီးကဘီယူၤခးလီၤတၢ်အဃိ, အဃ---သဝီဖိခဲလၢာ်ဘၣ်ဃ့ၢ်မှံဟးဖျိးဝဲဒၣ်န့ၣ်လီၤ. သဝီဖိသ့ၣ်တဖၣ်သူၣ်ကိၢ်သးဂီၤဒံးဝဲလၢကဘီယူၤကဟဲခးလီၤတၢ်ဒီးတၢ်ခးလီၤကျိဖးဒိၣ်န့ၣ်လီၤ. အဝဲသ့ၣ်ဘၣ် ပျံၤဘၣ်ဖုးစ့ၢ်ကီးဝဲလၢပယီၤသုးသ့သတဖၣ်ကမၤဆူးမၤဆါအါထီၣ်အဝဲသ့ၣ်န့ၣ်လီၤ. (တၢ်ဂီၤ- KHRG)

တၢ်ဂီၤတဘ့ၣ်အံၤဘၣ်တၢ်ဒိန့ၢ်အီၤဖဲလါမးရှး ၂၀၂၆ နံၣ်ဖဲ အဂ---သဝီ, စယးကၠံတီၤခၠါကရူၢ်, ထီတထူၣ်ကီၢ်ဆၣ်, တီအူကီၢ်ရ့ၣ်န့ၣ်လီၤ. ဖဲလါ ဖ့ၤဘြူၤအါရံၤ ၉ သီ, ၂၀၂၆ နံၣ်အနံၤ, ဟါခီ၂း၃၀ အဆၢကတီၢ်, ပယီၤ သုးခီၣ်သုးရ့ၣ် ခလရ နီၢ်ဂံၢ်-၇၃, အိၣ်သူၣ်လီၤအသးဖဲစယးကၠံသုးက လၢၤအံၤခးလီၤဝဲကျိဖးဒိၣ် (၁၂၀ မမ) ခံဖျၢၣ်ဆူအဂ---သဝီန့ၣ်လီၤ. တၢ်ဂီၤအံၤပာ်ဖျါထီၣ်ဝဲဟံၣ်တဖျၢၣ်လၢအဘၣ်ဒိဒီးကျိဖးဒိၣ်န့ၣ်လီၤ. (တၢ်ဂီၤ- KHRG)

တၢ်ဂီၤတဘ့ၣ်အံၤဘၣ်တၢ်ဒိးန့ၢ်အီၤလၢလီၢ်ကဝီၤသဝီဖိလၢအအိၣ်ဖဲအဧ---သဝီ, ဒ့လိာ်ကရူၢ်, ထီတထူၣ်ကီၢ်ဆၣ်, တီအူကီၢ်ရ့ၣ်ဖဲလါမးရှး ၃ သီ, ၂၀၂၆ နံၣ်န့ၣ်လီၤ. တၢ်ဂီၤအံၤပာ်ဖျါထီၣ်ဝဲသဝီဖိအဟံၣ် (၃) ဖျၢၣ်လၢအ ဘၣ်တၢ်ဒွဲၣ်အူထီၣ်အီၤလၢပယီၤသုးဖိလၢအအိၣ်ဟဲလၢ ၁၃-မံးလာ်ဖဲ လါဖ့ၤဘြူၤအါရံၤ ၂၀၂၆ နံၣ်န့ၣ်လီၤ. ပယီၤသုးဒွဲၣ်အူထီၣ်သဝီဖိအ ဟံၣ်အံၤဖဲအဝဲသ့ၣ်ဘၣ်တၢ်ခးအီၤလၢ PDF ဖဲတၢ်လီၢ်လၢအဘူးဒီးတၢ် မၤလိကၠိဖဲအဝဲသ့ၣ်လဲၤဝဲဆူ ၇-မံးလာ်ဃုာ်ဒီးအဝဲသ့ၣ်အသိလ့ၣ်ဒီးသ ဝီဖိအသိလ့ၣ်အဆၢကတီၢ်န့ၣ်လီၤ. အူဂ---အဟံၣ်လၢအတ့ဝဲဒီးအူး ခဲတဖျၢၣ်တအူအီၣ်ဘၣ်အဃိသုးဖိသ့ၣ်တဖၣ်ဟံးန့ၢ်ဝဲအတၢ်ဖိတၢ်လံၤ လၢဟံၣ်ပူၤဒီးဒွဲၣ်အူကွံာ်ဝဲလၢတၢ်ချၢန့ၣ်လီၤ. ဝံၤအလီၢ်ခံ, ဖဲဟါခီ ၇ နၣ်ရံၣ်အဆၢကတီၢ်, ပယီၤသုးခးလီၤဝဲကျိဖးဒိၣ် (၇) ဖျၢၣ်ဆူအဧ---သဝီပူၤန့ၣ်လီၤ. ကျိဖးဒိၣ်ချံခဲလၢာ်လီၤတဲာ်ပိၢ်ဖးထီၣ်လၢသဝီချၢဒီးတၢ် ဘၣ်ဒိဘၣ်ထံးတအိၣ်နီတမံၤဘၣ်န့ၣ်လီၤ. ဒ်လဲၣ်ဂ့ၤဂ့ၤ, သဝီဖိသ့ၣ်တ ဖၣ်ဘၣ်ပျံၤဘၣ်ဖုးတၢ်န့ၣ်လီၤ. (တၢ်ဂီၤ- လီၢ်ကဝီၤသဝီဖိ)

တၢ်ဂီၤတဘ့ၣ်အံၤဘၣ်တၢ်ဒိန့ၢ်အီၤဖဲလါမးရှး ၂၀၂၆ နံၣ်ဖဲတၢ်ဆါဟံၣ် တဖျၢၣ်လၢအဘၣ်တၢ်တီခိၣ်ရိၣ်မဲအီၤလၢ ကညီဆူၣ်ချ့မၤစၢၤဝဲၤကျိၤ (KDHW) ဖဲအက---သဝီ, ပၢၤထံးကရူၢ်, ထီတထူၣ်ကီၢ်ဆၣ်, တီအူ ကီၢ်ရ့ၣ်န့ၣ်လီၤ. ဖဲလါမးရှး ၁၅ သီ, ၂၀၂၆ နံၣ်, ပယီၤသုးပျၢ်လီၤဝဲဒြိ တဘ့ၣ်ဟဲခးလီၤတၢ်ဖဲ(ထိက့း)တၢ်ထၢတၢ်ခိတၢ်သွဲအလီၢ်တတီၤန့ၣ်လီၤ. တၢ်ဂီၤအံၤပာ်ဖျါထီၣ်ဝဲအူက---သးနံၣ်အိၣ် (၆၅) နံၣ်တဂၤလၢအအိၣ် ဖဲအဧ---သဝီ, စယးကၠံတီၤခၠါကရူၢ်, ထီတထူၣ်ကီၢ်ဆၣ်အံၤဘၣ်ဒိဝဲဖဲအ ဝဲမၤတၢ်လၢ(ထိက့း)တြဲၤတၢ်ခိတၢ်သွဲအလီၢ်အဆၢကတီၢ်န့ၣ်လီၤ. အူက---အံၤဘၣ်ဒိဝဲနးမးဖဲအဟၢဖၢ ဒီးအဖံဘၣ်ခိၣ်လၢအထွဲတကပၤန့ၣ်လီၤ. အဆိကတၢၢ်အဝဲဘၣ်တၢ်ဆှၢအီၤလၢ ပယီၤသုးမီၤစိရိၤအတၢ်ဆါဟံၣ်လၢ တအိၣ်ဒီးကသံၣ်ကသီတၢ်ပီးတၢ်လီလၢလၢပှဲၤပှဲၤဘၣ်အဃိ, လၢခံအဝဲ ဒိးန့ၢ်ဘၣ်က့ၤဝဲတၢ်ကူစါယါဘျါဖဲအမ--- တၢ်ဆါဟံၣ်လၢဘၣ်တၢ်တီ ခိၣ်ရိၣ်မဲအီၤလၢ KDHW ဖဲအက---သဝီန့ၣ်လီၤ. ပှၤမၤတၢ်လၢတၢ်ထၢ တၢ်ခိတၢ်သွဲအလီၢ်အဂၤတဂၤလၢအမံၤမ့ၢ် အူလ---အံၤဘၣ်ဒိဝဲတဆံး တက့ၢ်လၢဒြိခးလီၤတၢ်ဘၣ်ဆၣ်အဝဲတလိၣ်လဲၤဒိးကူစါယါဘျါအသးလၢ တၢ်ဟ့ၣ်ကသံၣ်ဒၢးဘၣ်န့ၣ်လီၤ.[5] (တၢ်ဂီၤ- KHRG)

KHRG ဒိးန့ၢ်ဘၣ်တၢ်ဂီၤတဘ့ၣ်အံၤဖဲလါယနူၤအါရံၤ ၃ သီ, ၂၀၂၆ နံၣ် လၢသဝီဖိလၢအအိၣ်ဟဲလၢအဝ---သဝီ, ဝဲပၠ့ၤယ့ၤဒဲကရူၢ်, ဆီထံး ကီၢ်ဆၣ်, ချၢၣ်လွံၢ် ထူၣ်ကီၢ်ရ့ၣ်တဂၤအအိၣ်န့ၣ်လီၤ. ဖဲလါယနူၤအါရံၤ ၂ သီ, ၂၀၂၆ နံၣ်အနံၤ, ကဘၣ်ဖဲဟါလီၤခီ ၄း၃၀ အဆၢကတီၢ်, ပယီၤသုးဒြိဟဲခးလီၤ တၢ်ဖဲအဝ---သဝီဒီးဘၣ်သံဝဲဒီၤန---သးနံၣ်အိၣ် (၄၃) နံၣ်ဒီးမ့ၢ်မိၢ်တဂၤလၢ အိၣ်ဒီးအဖိခံဂၤန့ၣ်လီၤ. ဒီၤန---အံၤမ့ၣ်ပိၢ်က့ ဖျိးဘၣ်သံအီၤဖဲအဝဲဆ့ၣ်နီၤ လၢအူဝ---အဟံၣ်ချၢဒီးဆ့ၣ်နီၤဝဲဒီးပှၤလၢ အဂၤတဂၤဒီးမ့ၣ်ပိၢ်ပိၢ်ဖးထီၣ် အက့ဖျိးဘၣ်သံအီၤန့ၣ်လီၤ. တၢ်ဂီၤအံၤပာ်ဖျါထီၣ်ဝဲဒီၤန---အသံစိၣ်န့ၣ်လီၤ. အူဝ---သးနံၣ် (၆၂) နံၣ်အံၤဘၣ် ဒိစ့ၢ်ကီးဝဲဖဲအစုဒ့ကိာ်အစ့ၣ်တကပၤဒီး အခီၣ်စ့ၣ်တကပၤခီဖျိဒြိခးလီၤတၢ်အံၤအဃိန့ၣ်လီၤ. (တၢ်ဂီၤ- လီၢ်ကဝီၤ သဝီဖိ)

တၢ်ဂီၤသ့ၣ်တဖၣ်အံၤဘၣ်တၢ်ဒိန့ၢ်အီၤဖဲလါယနူၤအါရံၤ ၂၀၂၆ နံၣ်ဖဲတၢ်ဃ့ၢ်အိၣ်ကမှံအလီၢ်တတီၤဖဲမူဟီၣ်ကဝီၤလီၤဆီ, မူကီၢ်ဆၣ်, ချၢၣ်လွံၢ်ထူၣ်ကီၢ်ရ့ၣ် န့ၣ်လီၤ. ဖဲလါယနူၤအါရံၤ ၆ သီ, ၂၀၂၆ နံၣ်, ဂီၤခီ ၁၁း၃၀ အဆၢကတီၢ်, ပယီၤသုးဖိလၢအအိၣ်ဟဲလၢ ခမရ နီၣ်ဂံၢ်-၃၀၇ ဒီးအိၣ်ဆီလီၤအသးဖဲရွ့ၤဝၤသုး ကလၢၤသ့ၣ်တဖၣ်ခးလီၤနါစိၤဝဲကျိဖးဒိၣ်ဆူအခ---သဝီ, စလိးကရူၢ်, မူဟီၣ်ကဝီၤလီၤဆီန့ၣ်လီၤ. ကျိဖးဒိၣ်အက့ဘၣ်ဒိဝဲသီခါဖၠၢ်တၢ်ဒူၣ်ကပၤန့ၣ်လီၤ. အူပ---အံၤဘၣ်သံဝဲလၢကျိဖးဒိၣ်ပိၢ်ဖးထီၣ်အက့န့ၣ်လီၤ. ဝံၤအလီၢ်ခံစှၤသီဖဲလါယနူၤအါရံၤ ၈ သီ, ၂၀၂၆ နံၣ်, ဟါခီ ၁၀း၂၀ အဆၢကတီၢ်, ပယီၤကဘီယူၤ ဒုးသုးတဘ့ၣ်ဟဲတ့ၢ်လီၤမ့ၣ်ပိၢ်ခံဖျၢၣ်ဖဲအရ---သဝီ, လ့ၣ်ဒိကရူၢ်, မူဟီၣ်ကဝီၤလီၤဆီဒီးဘၣ်ဒိဝဲသဝီဖိအဟံၣ်တၢ်သူၣ်ထီၣ်ဒီးဘၣ်သံဝဲပှၤဟံၣ်ဖိဃီဖိ (၄) ဂၤန့ၣ်လီၤ. ဒီၤခ---သးနံၣ်အိၣ် (၇၆) နံၣ်, ဒီၤရ---သးနံၣ်အိၣ် (၇၉) နံၣ်, ဒီၤစ---သးနံၣ်အိၣ် (၄၈) နံၣ်ဒီးမီၤတ---သးနံၣ်အိၣ် (၁၂) နံၣ်န့ၣ်လီၤ. ဒီၤခ---, ဒီၤရ---ဒီးဒီၤစ---သံဝဲဖဲတၢ်ပျီပူၤန့ၣ်လီၤ. မီၤတ---ဘၣ်ဒိဝဲနးနးကလဲာ်ဖဲအခိၣ်သၣ်ဃံဒီးဘၣ်တၢ်ဆှၢအီၤဆူအစ---တၢ်ဆါဟံၣ်, ကၠီၤပၠၢ်ကရူၢ်ဘၣ်ဆၣ်အဝဲ သံဝဲခီဖျိတၢ်ဘၣ်ဒိအံၤနးမးအဃိန့ၣ်လီၤ. ကဘီယူၤခးလီၤတၢ်အံၤဘၣ်ဒိဝဲဒီၤခ---ဒီးဒီၤရ---အဟံၣ်ဒီးဘၣ်သံဝဲအူယဆ---အဆၣ်ဖိကီၢ်ဖိဘုၣ်ဒၢသ့ၣ် တဖၣ်န့ၣ်လီၤ. မ့ၣ်ပိၢ်အကျါတဖျၢၣ်တပိၢ်ဖးထီၣ်ဘၣ်န့ၣ်လီၤ. လၢတၢ်ကဲထီၣ်သးခံဘျီအံၤအဃိသဝီဖိ (၁၇,၉၀၉) ဂၤဃၣ်ဃၣ်လၢအအိၣ်ဟဲလၢသဝီ (၂၅) ဖျၢၣ်အပူၤဘၣ်ပာ်တ့ၢ်ကွံၢ်အဟံၣ်အဃီဒီးဃ့ၢ်မှံဟးဖျိးဝဲဒၣ်န့ၣ်လီၤ. ဖဲအဝဲသ့ၣ်ဃ့ၢ်အိၣ်ကဒုအဆၢကတီၢ်, အဝဲသ့ၣ်ဘၣ်ကွၢ်ဆၢၣ်မဲာ်ဝဲဒီးတၢ်တၤတၢ်ဒ်အမ့ၢ် တၢ်အီၣ်တၢ်အီဒီးတၢ်အိၣ်ကဒုအလီၢ်သ့ၣ်တဖၣ်န့ၣ်လီၤ. တၢ်ဂီၤလၢတၢ်ဖီခိၣ်အံၤပာ်ဖျါထီၣ်ဝဲသဝီဖိဃ့ၢ်အိၣ်ကဒုအလီၢ်လၢအအိၣ်ဟဲလၢအရ---သဝီ, လ့ၣ် ဒိကရူၢ်ဒီးအခ---သဝီ, စလိးကရူၢ်ခီဖျိလၢပယီၤသုးကဘီယူၤခးလီၤတၢ်အဃိန့ၣ်လီၤ. (တၢ်ဂီၤ- KHRG)

တၢ်ဂီၤအံၤဘၣ်တၢ်ဒိန့ၢ်အီၤဖဲလါမးရှး ၂၀၂၆ နံၣ်ဖဲနဘ--- သဝီ, ဝီၢ်က့ၣ် ကရူၢ်, ဆီထံးကီၢ်ဆၣ်, ချၢၣ်လွံၢ်ထူၣ်ကီၢ်ရ့ၣ်န့ၣ်လီၤ. ဖဲလါ ဖ့ၤဘြူၤအါရံၤ ၉ သဝီ, ၂၀၂၆ နံၣ်အနံၤ, ပယီၤသုးအသုးတြိၤ နီၣ်ဂံၢ်-၂၂ အသုးသ့ၣ် တဖၣ် ပာ်ဖှိၣ်ထီၣ်အသး, ဟူးဂဲၤဒီးဒွဲၣ်ထီၣ်ဝဲသဝီဖိအဟံၣ် ဖဲနဘ---သဝီပူၤန့ၣ်လီၤ. တၢ်ဂီၤတဘ့ၣ်အံၤပာ်ဖျါထီၣ်ဝဲသဝီဖိအဟံၣ် လၢအဘၣ် တၢ်ဒွဲၣ်အူဟးဂီၤကွံာ်အီၤန့ၣ်လီၤ. (တၢ်ဂီၤ- KHRG)

တၢ်ဂီၤတဘ့ၣ်အံၤဘၣ်တၢ်ဒိန့ၢ်အီၤဖဲလါမးရှး ၂၀၂၆ နံၣ်ဖဲအည---တၢ်ဟ့ၣ် ကသံၣ်ဒၢးလၢအအိၣ်သူၣ်လီၤအသးဖဲအည---သဝီ, ကၠီၤပၠၢ် ကရူၢ်, မူကီၢ် ဆၣ်, ချၢၣ်လွံၢ်ထူၣ်ကီၢ်ရ့ၣ်န့ၣ်လီၤ. တၢ်ဂီၤအံၤပာ် ဖျါထီၣ်ဝဲမီၤဖ---လၢအအိၣ်ဖဲအယ---သဝီ, လ့ၣ်ဒိကရူၢ်, မူကီၢ်ဆၣ်တ ဂၤဘျါက့ၤဝဲဖဲအည---တၢ်ဟ့ၣ်ကသံၣ်ဒၢးဖဲအခီၣ်လၢအစ့ၣ်တကပၤ ဘၣ်တၢ်ဒီၣ်တဲာ်ကွံာ်အီၤ ခီဖျိယီၢ်ဘၣ်ဝဲပယီၤသုးအမ့ၣ်ပိၢ်အဃိန့ၣ်လီၤ. မီၤဖ-လၢအမ့ၢ်ပှၤဃ့ၢ်အိၣ် ကမှံတဂၤအံၤခီဖျိပယီၤသုးကဘီယူၤခးလီၤ တၢ်ဒီးခးလီၤကျိဖးဒိၣ်အဃိ ဟဲက့ၤဆူအယ---သဝီဒ်သိးကဟဲက့ၤ ဟံးန့ၢ်က့ၤတၢ်ဖိတၢ်လံၤဒီးဖဲအဝဲ ဟဲက့ၤလၢကျဲအဆၢကတီၢ်ယီၢ်ဘၣ် ဝဲမ့ၣ်ပိၢ်ဖဲလါမးရှး ၄ သီ, ၂၀၂၆ နံၣ်အနံၤန့ၣ်လီၤ. မ့ၣ်ပိၢ်အံၤတၢ်နာ် ဝဲလၢကဘၣ်မ့ၢ်ပယီၤသုးဒိးလီၤဝဲခီဖျိ အပူၤကွံာ်ပယီၤသုးအိၣ်ဖဲအယ---သဝီပူၤန့ၣ်လီၤ. (တၢ်ဂီၤ- KHRG)

တၢ်ဂီၤသ့ၣ်တဖၣ်အံၤဘၣ်တၢ်ဒိးန့ၢ်ဘၣ်အီၤဖဲလါယူၤ ၂၅ သီ, ၂၀၂၆ နံၣ်အ နံၤလၢလီၢ်ကဝီၤတၢ်ဆီၣ်ထွဲမၤစၢၤတၢ်ကရၢကရိလၢအဟူးဂဲၤဖဲလီၢ်ကဝီၤ ပူၤတဂၤအအိၣ်န့ၣ်လီၤ. ဖဲလါယူၤ ၂၃ သီ, ၂၀၂၆ နံၣ်အနံၤ, ပယီၤသုးဖိ လၢအအိၣ်ဟဲလၢ ခမရ နီၣ်ဂံၢ်-၂၆၄, အိၣ်ဆီလီၤအသးဖဲပ့းစလိးဝ့ၢ်သ့ၣ်တ ဖၣ်ခးလီၤဝဲကျိဖးဒိၣ် (၁၂၀ မမ) ဒီးလီၤတဲာ်ပိၢ်ဖးထီၣ်ဖဲဘဒ---သဝီ, ကၠိကၠံကရူၢ်, လၢၢ်ဒိၣ်ကီၢ်ဆၣ်, ချၢၣ်လွံၢ်ထူၣ်ကီၢ်ရ့ၣ်န့ၣ်လီၤ. ကျိဖးဒိၣ်အံၤ ဘၣ်ဒိဝဲဒီၤထ---သးနံၣ် (၄၈) နံၣ်န့ၣ်လီၤ. တကးဒ်ဘၣ်, ကျိဖးဒိၣ်အံၤဘၣ် ဒိဟးဂီၤစ့ၢ်ကီးသဝီဖိအဟံၣ်တၢ်သူၣ်ထီၣ်သ့ၣ်တဖၣ်န့ၣ်လီၤ. ခီဖျိပယီၤသုး ခးလီၤကျိဖးဒိၣ်အံၤအဃိ, သဝီဖိလၢဘဒ---သဝီပူၤသ့ၣ်တဖၣ်ဘၣ်ဃ့ၢ် အိၣ်ကဒုဆူတၢ်လီၢ်လၢအပူၤဖျဲးန့ၣ်လီၤ. သဝီဖိတနီၤဃ့ၢ်ဆူပှၢ်ပူၤ, တနီၤ လဲၤဃ့ၢ်အိၣ်ဆူအစံာ်ပျီဒဲဒီးတနီၤဃ့ၢ်ဆူသဝီအဂၤသ့ၣ်တဖၣ်န့ၣ်လီၤ. ဖဲလါယူၤလံ ၂၀၂၆ နံၣ်, သဝီဖိသ့ၣ်တဖၣ်ဘၣ်ကိၢ်ဘၣ်ဂီၤအါထီၣ် ဝဲဒီးက့ၤဝဲဆူအဝဲသ့ၣ်အသဝီပူၤတဘူၣ်ဒံးဘၣ်ခီဖျိပယီၤသုးသ့ၣ်တဖၣ်နုာ် လီၤဆူအဝဲသ့ၣ်အသဝီပူၤဒီးဟံးန့ၢ်ဆူအဝဲသ့ၣ်တၢ်ဖိတၢ်လံၤန့ၣ်လီၤ. တၢ်ဂီၤ လၢအဖီခိၣ်အစ့ၣ်တဘ့ၣ်ဒီးအထွဲတဘ့ၣ်ပာ်ဖျါထီၣ်ဝဲတၢ်လီၢ်လၢကျိဖးဒိၣ် လီၤတဲာ်အလီၢ်ဒီးဘၣ်ဒိဟံၣ်တၢ်သူၣ်ထီၣ်သ့ၣ်တဖၣ်ဒီးမ့မ့ၢ်တၢ်ဂီၤလၢအဖီ လာ်တဘ့ၣ်ပာ်ဖျါထီၣ်ဝဲဒီၤထ---ဘၣ်ဒိဝဲဖဲအခိၣ်သၣ်ဃံန့ၣ်လီၤ. (တၢ်ဂီၤ-လီၢ်ကဝီၤသဝီဖိ)

တၢ်ဂီၤတဘ့ၣ်အံၤဘၣ်တၢ်ဒိန့ၢ်အီၤဖဲလါမ့ၤ ၂၀၂၆ နံၣ်ဖဲ ကလ--- ဝ့ၢ်, တနီသရံၣ်ကီၢ်ဆၣ်, ဘျံးဒဝဲၢ်ကီၢ်ရ့ၣ်န့ၣ်လီၤ. တၢ်ဂီၤအံၤပာ်ဖျါထီၣ် ဝဲသဝီဖိ လၢအအိၣ်ဖဲကလ--- ဝ့ၢ်သ့ၣ်တဖၣ်ဘၣ်လဲၤဃ့ၢ်အိၣ်လၢထံ ဆၢကီၢ်ဆၢ ဖဲလါမ့ၤ ၈ သီ, ၂၀၂၆ နံၣ်အနံၤခီဖျိပယီၤသုးပာ်ဖှိၣ်ထီၣ် အသးဒီးသုးရ့ၣ် (၁၁) ဘ့ၣ်ဒီးသုးဖိကအိၣ်လၢ (၁,၀၀၀) ဂၤဃၣ်ဃၣ်လဲၤထီၣ် ဝဲဆူ ကလ---ဝ့ၢ်န့ၣ်လီၤ. ဖဲပယီၤသုးသ့ၣ်တဖၣ်ဟဲတုၤလၢဝ့ၢ်ပူၤအဆၢကတီၢ်အဝဲသ့ၣ် ခးလီၤဝဲကျိဖးဒိၣ်, ခးလီၤတၢ်လၢဒြိဒီးခးလီၤတၢ်လၢကဘီယူၤ ဖဲကလ---ဝ့ၢ်ပူၤန့ၣ်လီၤ. အါန့ၢ်အန့ၣ်, တၢ်ဒုးကဲထီၣ်လၢ KNLA ဒီးပယီၤသုး ရ့ၣ် ၁၁ ဘ့ၣ်အဘၢၣ်စၢၤကိးမုၢ်နံၤဒဲးဃၣ်ဃၣ် န့ၣ်လီၤ. ဖဲလါမ့ၤ ၂၇ သီ, ၂၀၂၆ နံၣ်အနံၤဒၣ်လဲၣ်, သဝီဖိသ့ၣ်တဖၣ်ဘၣ်ဃ့ၢ်အိၣ်ကဒုဒံးဒၣ်လၢပှၢ်ပူၤဒီးကီၢ် ကၠီၣ်တဲၣ်ကီၢ်ဆၢန့ၣ်လီၤ. ခီဖျိလၢတၢ်စူၤခါအဆၢကတီၢ်အဃိ, သဝီဖိသ့ၣ် တဖၣ်ဘၣ်ကွၢ်ဆၢၣ်မဲာ်ဒီးတၢ်တၤတၢ်သ့ၣ်တဖၣ်ဒ်အမ့ၢ်တၢ်အိၣ်ကဒုအ လီၢ်, တၢ်အီၣ်တၢ်အီ, တၢ်ကူတၢ်သိးဒီးကသံၣ်ကသီတလၢတပှဲၤဘၣ်န့ၣ် လီၤ. (တၢ်ဂီၤ- KHRG)

တၢ်ဂီၤတဘ့ၣ်အံၤဘၣ်တၢ်ဒိန့ၢ်အီၤဖဲလါယနူၤအါရံၤ ၂၀၂၆ နံၣ်ဖဲဘဟ---တၢ်ဃ့ၢ်အိၣ်ကဒုအလီၢ်တတီၤဖဲမဲာ်ကျီကရူၢ်, ဘုသိၣ်ကီၢ်ဆၣ်, မုၢ်တြီၢ်ကီၢ် ရ့ၣ်န့ၣ်လီၤ. သဝီဖိလၢအအိၣ်ဟဲလၢဘဧ---သဝီ, မဲာ်ကျီကရူၢ်ပူၤသ့ၣ်တ ဖၣ်ဟဲဃ့ၢ်အိၣ်ကဒုဖဲတၢ်လီၢ်ဖဲအံၤခီဖျိအပူၤကွံာ်ပယီၤသုးဟဲခးလီၤတၢ်လၢ ကဘီယူၤဒီးခးလီၤကျိဖးဒိၣ်ဖဲဘဧ---သဝီအဃိန့ၣ် လီၤ. ဖဲလါယနူၤအါရံၤ ၁၅ သီ, ၂၀၂၆ နံၣ်အနံၤ, မုၢ်နၤခီအဆၢကတီၢ်, ပယီၤသုးဟဲခးလီၤတၢ်ဒီးဒြိ ဒီးတ့ၢ်လီၤဝဲမ့ၣ်ပိၢ်ခံဖျၢၣ်ဖဲဘဟ---တၢ်ဃ့ၢ် အိၣ်ကမှံအလီၢ်တတီၤန့ၣ်လီၤ. ခီဖျိလၢဒြိခးလီၤတၢ်အဃိ, သဝီဖိလၢ အမံၤမ့ၢ်စီၤည---တဂၤအံၤဘၣ်ဒိဝဲဖဲ အခီၣ်လၢအစ့ၣ်တကပၤန့ၣ်လီၤ. အဝဲ ဘၣ်တၢ်ဆှၢအီၤဆူဘသ---တၢ်ဟ့ၣ် ကသံၣ်ဒၢးတဖျၢၣ်ဖဲမဲာ်ကျီကရူၢ်လၢ အဘၣ်တၢ်တီခိၣ်ရိၣ်မဲအီၤလၢ KDHW န့ၣ်လီၤ. ခီဖျိလၢတၢ်ဟ့ၣ်ကသံၣ်ဒၢးတဖျၢၣ်အံၤကသံၣ်ကသီတလၢတပှဲၤ ဘၣ်အဃိဘၣ်တၢ်ဆှၢက့ၤအီၤဆူ KDHW တၢ်ဟ့ၣ်ကသံၣ်ဒၢးအဂၤတဖျၢၣ် ဖဲဘုသိၣ်ကီၢ်ဆၣ်အပူၤန့ၣ်လီၤ. ဖဲတၢ်ကဲထီၣ်သးဝံၤအလီၢ်ခံ, စီၤည---ဒီးအဟံၣ်ဖိဃီဖိဘၣ်ကွၢ်ဆၢမဲာ်ဝဲဒီးတၢ်လုၢ်အီၣ်နီၢ်ခိသးသမူတၢ်ဂ့ၢ်ကီဒီး ဒုးအိၣ်ထီၣ်တၢ်ကီၢ်တၢ်ခဲလၢဟံၣ်ဖိဃီဖိအဂီၢ်န့ၣ်လီၤ. တၢ်ဂီၤအံၤပာ်ဖျါထီၣ် ဝဲအပူၤကွံာ်တယံာ်တမီၢ်ဒံးဘၣ်န့ၣ်ဟံၣ်ဖိဃီဖိတဒူၣ်လၢအဘၣ်ဃ့ၢ်မှံ ဟးဖျိးအံၤတ့ထီၣ်န့ၢ်ဝဲဒဲဖိဖဲဘဟ---တၢ်ဃ့ၢ်အိၣ်ကမှံအလီၢ်ဖဲအဘူးဒီးတၢ် လီၢ်လၢပယီၤသုးဒြိဟဲခးလီၤတၢ် အလီၢ်န့ၣ်လီၤ. (တၢ်ဂီၤ- KHRG)

တၢ်ဂီၤအံၤဘၣ်တၢ်ဒိန့ၢ်အီၤဖဲလါဖ့ၤဘြူၤအါရံၤ ၂၀၂၆ နံၣ်ဖဲဘမ---သဝီ, ဖျးခိၣ်ကရူၢ်, လူၤသီကီၢ်ဆၣ်, မုၢ်တြီၢ်ကီၢ်ရ့ၣ်န့ၣ်လီၤ. ဖဲလါဖ့ၤ ဘြူၤအါရံၤ ၂၀၂၆ နံၣ်, ပယီၤသုးဟဲခးလီၤတၢ်လၢကဘီယူၤဒီးခးလီၤ ကျိဖးဒိၣ်အါမးဖဲ ဖျးခိၣ်ကရူၢ်ပူၤန့ၣ်လီၤ. တၢ်ဂီၤတဘ့ၣ်အံၤပာ်ဖျါထီၣ်ဝဲဟံၣ်ဖိဃီဖိတဒူၣ်လၢ အအိၣ်ဟဲလၢဘမ---သဝီ, ဖျးခိၣ်ကရူၢ်အံၤဘၣ်ဃ့ၢ်အိၣ်ကဒုဝဲဆူပှၢ်ပူၤဖဲ ဖျးခိၣ်ကရူၢ်ပူၤန့ၣ်လီၤ. သဝီဖိလၢဟးဃ့ၢ်မှံဟးဖျိးတဒူၣ်အံၤဘၣ်ကွၢ်ဆၢၣ် မဲာ်ဒီးတၢ်လုၢ်အီၣ်နီၢ်ခိသးသမူဒီးတၢ်အိၣ်ဆူၣ်အိၣ်ချ့အတၢ်ဂ့ၢ်ကီသ့ၣ်တ ဖၣ်န့ၣ်လီၤ. (တၢ်ဂီၤ- KHRG)

တၢ်ဂီၤတဘ့ၣ်အံၤဘၣ်တၢ်ဒိန့ၢ်အီၤဖဲလါမးရှး ၂၀၂၆ နံၣ်ဖဲ ဘဝ---သဝီ, တ့မုၢ်ဒၢကရူၢ်, လူၤသီကီၢ်ဆၣ်, မုၢ်တြီၢ်ကီၢ် ရ့ၣ်န့ၣ်လီၤ. ဖဲလါမးရှး ၉ သီ, ၂၀၂၆ နံၣ်အနံၤ, ဟါခီ ၁း၁၅ အဆၢကတီၢ်, ပယီၤသုးကဘီယူၤဒုး သုးတဘ့ၣ်ဟဲတ့ၢ်လီၤဝဲမ့ၣ်ပိၢ် (၅၀၀-ပီၣ်) တဖျၢၣ်ဖဲသဝီဖိအဟံၣ် ဖဲဘဝ---သဝီ ပူၤဒီးဘၣ်သံဝဲ (၃) ဂၤဒီးဘၣ်ဒိဝဲ (၅) ဂၤန့ၣ်လီၤ. သဝီဖိလၢအ သံသ့ၣ်တဖၣ်မ့ၢ်ဝဲ နီၢ်ရှဒ---သးနံၣ်အိၣ်ဝဲ (၇၀) နံၣ်, မ့ၣ် ပိၢ်က့ဘၣ်ဒိအီၤ ဖဲအသးနါပှၢ်ဒီးအခီၣ်လၢအထွဲတကပၤ, အလံၤမုၣ်နီၢ် ရှဃ---သးနံၣ်အိၣ်ဝဲ (၄) နံၣ်ဒီးကျိဖးဒိၣ်အက့ဘၣ်အီၤဖဲအစုလၢ အထွဲတပၤဒီးနီၢ် ရှလ--- သးနံၣ်အိၣ်ဝဲ (၅၇) နံၣ်, ဘၣ်ဒိဖဲအခိၣ် သၣ်ဃံန့ၣ်လီၤ. ဖဲ SRR ဆှၢနီၢ် ရှလ--- လၢတၢ်ကူစါယါ ဘျါသးအဂီၢ်အဆၢကတီၢ်အဝဲသံဝဲဖဲတချုး တုၤတၢ်ဆါဟံၣ်ဒီးပှၤဟဲက့ၤစိာ်က့ၤအစိၣ်လၢဘဝ---သဝီဒီးခူၣ်လီၤအီၤတ နၤဃီန့ၣ်လီၤ. ပှၤခံဂၤ လၢအမ့ၢ်နီၢ် ရှလ---အဖိမုၣ်နီၢ်ရှဂ---ဒီးနီၢ်ရှဟ--- သးနံၣ်အိၣ် (၂၁) နံၣ်လၢအမ့ၢ်ပှၢ်အိၣ်ဒီးဟုးသးအံၤဘၣ်ဒိစ့ၢ်ကီးဒီးနီၢ်ရှဂ---ဘၣ်ဒိဝဲဖဲ အခိၣ်ဒီးနီၢ်ရှဟ---တဂၤဘၣ်ဒိဖဲအသးနါပှၢ်န့ၣ်လီၤ. နီၢ်ရှလ---အဖိမုၣ် ဒီးစီၤရှဧ---အံၤဘၣ်ဒိဖဲအဟၢဖၢ, ဖံဘၣ်ခိၣ်ဒီးအကံၣ်ဒုၣ်န့ၣ်လီၤ. စီၤရှသ---သးနံၣ် အိၣ် (၇၂) နံၣ်တဂၤဘၣ်ဒိဖဲအခိၣ်သၣ်ဃံ, အချၢဃံ ဒီးအခီၣ် ဒ့န့ၣ်လီၤ. စီၤရှက---သးနံၣ်အိၣ် (၁၈) နံၣ်အံၤဘၣ်ဒိဝဲဖဲအ ကံၣ်ဒုၣ်န့ၣ်လီၤ. ကဘီယူၤခးလီၤတၢ်တဘျီအံၤဘၣ်ဒိဟးဂီၤဝဲသဝီဖိအ ဟံၣ် (၇) ဖျၢၣ်ဒီးဟံၣ်ကစၢ်န့ၣ်မ့ၢ်ဝဲနီၢ်ရှဒ---, နီၢ် ရှလ---, နီၢ်ရှဧ--- သးနံၣ်အိၣ် (၄၈) နံၣ်, စီၤရှသ---, နီၢ်ရှမ---သးနံၣ်အိၣ် (၃၈) နံၣ်, နီၢ်ရှန---သးနံၣ်အိၣ် (၅၂) နံၣ်ဒီးနီၢ်ရှဝ---သးနံၣ်အိၣ် (၄၃) နံၣ်န့ၣ်လီၤ. တၢ်ဖိတၢ်လံၤလၢပှၤဘုၣ်ဒၢသ့ၣ်တဖၣ်စ့ၢ်ကီးဘၣ်သံဝဲလၢကဘီယူၤခးလီၤ တၢ်အဃိန့ၣ်လီၤ. တၢ်ဂီၤအံၤပာ်ဖျါထီၣ်ဝဲသဝီဖိသ့ၣ်တဖၣ်ကတဲာ်ကတီၤ ထီၣ်နီၢ်ရှဒ---, နီၢ်ရှဧ---ဒီးနီၢ်ရှလ---အသံစိၣ်လၢ တၢ်ကခူၣ်လီၤကွံာ်ဝဲအဂီၢ် န့ၣ်လီၤ. (တၢ်ဂီၤ- KHRG)

တၢ်ဂီၤသ့ၣ်တဖၣ်အံၤဘၣ်တၢ်ဒိန့ၢ်အီၤဖဲလါမးရှး ၂၀၂၆ နံၣ်ဖဲ ဂတ---တၢ်ခူၣ်ထူအလီၢ်တတီၤဖဲဘရ---သဝီ, မးလ့လၢၢ်ကရူၢ်, ဒွဲၣ်လိကီၢ်ဆၣ်, မုၢ်တြီၢ်ကီၢ်ရ့ၣ်န့ၣ်လီၤ. ဖဲလါမးရှး ၁၁ သီ, ၂၀၂၆ နံၣ်အနံၤ, ဟါခီ ၃း၁၀ အဆၢကတီၢ်, ပယီၤသုးကဘီယူၤဒုးသုးတဘ့ၣ်ဟဲခးလီၤတၢ်ဒီးတ့ၢ်လီၤဝဲမ့ၣ်ပိၢ် (၃၀၀-ပီၣ်) ခံဖျၢၣ်ဖဲ ဂတ---တၢ်ခူၣ်ထူအလီၢ်န့ၣ်လီၤ. ကဘီယူၤခးလီၤတၢ်အံၤဘၣ်သံဝဲပှၤမၤတၢ်ဖိ (၂) ဂၤဖဲတၢ်ပျီပူၤန့ၣ်လီၤ. ကိၤရှထ--- သးနံၣ်အိၣ်ဝဲ (၁၆) နံၣ်ဒီးအိၣ်ဟဲလၢဘံလ့ကီၢ်ဆၣ်, ဒူသထူၣ်ကီၢ်ရ့ၣ်ဒီးအူရှည---သးနံၣ်အိၣ် (၅၂) နံၣ်အိၣ်ဟဲလၢအ့ၤရၤဝ့ၣ်ဒံၤဟီၣ်ကဝီၤန့ၣ်လီၤ. ပှၤမၤတၢ်ဖိ (၁၃) ဂၤဘၣ်ဒိဝဲန့ၣ်လီၤ. အူရှယ---, ဒီၤရှရှ---, မီၤယအ---, မၣ်ယဆ---, ဒီၤယစ---, ဒီၤယဒ---, ဒီၤယဃ---, မၣ် ယလ---, ယဂ---, ယဟ---, ယဧ---ဒီးယက---သ့ၣ်တဖၣ်န့ၣ်လီၤ. ကဘီၤယူၤခးလီၤဘၣ်ဟးဂီၤဝဲဒဲ (၄) ဖျၢၣ်, ထံစဲး (၄) ဖျၢၣ်, တၢ်ပာ်ကီၤသိဒၢဖးဒိၣ် (၂၀) ဖျၢၣ်ဒီးတၢ်ခူၣ်ထူစဲးဖီကဟၣ် သ့ၣ်တဖၣ်န့ၣ်လီၤ. တၢ်ဂီၤလၢစုစ့ၣ်တဘ့ၣ်ပာ်ဖျါထီၣ်ဝဲတၢ်ခူၣ်ထူအလီၢ်လၢကဘီယူၤခးလီၤဝဲန့ၣ်လီၤ. တၢ်ဂီၤလၢစုထွဲတဘ့ၣ်ပာ်ဖျါထီၣ်ဝဲပှၤမၤထူဖိ သ့ၣ်တဖၣ်ဘၣ်ဒိဒီးဘၣ်တၢ်ဆှၢအဝဲသ့ၣ်န့ၣ်လီၤ. (တၢ်ဂီၤလၢအစ့ၣ်- KHRG, တၢ်ဂီၤလၢအထွဲ- လီၢ်ကဝီၤသ ဝီဖိ)

တၢ်ဂီၤခံဘ့ၣ်အံၤဘၣ်တၢ်ဒိန့ၢ်အီၤဖဲလါအ့ဖြ့ၣ် ၂၀၂၆ နံၣ်, ဖဲဘတ---သဝီ, ဃဲပၤထၣ်ကရူၢ်, လူၤသီကီၢ်ဆၣ်, မုၢ်တြီၢ်ကီၢ်ရ့ၣ်န့ၣ်လီၤ. ဖဲလါအ့ဖြ့ၣ် ၁၅ သီ, ၂၀၂၆ နံၣ်အနံၤ, စးထီၣ်ဟါလီၤခီ ၄ နၣ်ရံၣ်တုၤ ၅း၃၀ အဆၢကတီၢ်, ပယီၤသုးဟဲခးလီၤတၢ်လၢကဘီယူၤဒုးသုး (Y-12) ဖဲဘတ---သဝီဒီးဘၣ်သံဝဲသဝီဖိ (၃) ဂၤဒီးဘၣ်ဒိဝဲ (၁၁) ဂၤန့ၣ်လီၤ. သဝီဖိ (၃) ဂၤလၢအဘၣ်သံသ့ၣ်တဖၣ်မ့ၢ်ဝဲစီၤယဧ--- သးနံၣ်အိၣ် (၆၃) နံၣ်, စီၤယမ--- သးနံၣ်အိၣ် (၂၈) နံၣ်ဒီးစီၤယန---သးနံၣ်အိၣ် (၄၃) နံၣ်န့ၣ်လီၤ. လီၢ်ကဝီၤသဝီဖိသ့ၣ်တဖၣ်စံးဝဲလၢ, ပယီၤသုးဟဲတ့ၢ်လီၤမ့ၣ်ပိၢ်ခဲလၢာ်ကအိၣ်လၢ (၁၁၀) ဖျၢၣ်ဖဲသ ဝီပူၤပၣ်ဃုာ်ဒီးမ့ၣ်ပိၢ်ဖးဒိၣ် (ချၢးစ်တၢၣ်) ဒီး (၅၀၀-ပီၣ်)ဒီး (၃၀၀-ပီၣ်) သ့ၣ်တဖၣ်န့ၣ်လီၤ. ကဘီယူၤခးလီၤဝဲကျိရီးကဲး, အီၤလံၤကၢၤဒီးကဘီယူၤဒုးသုး (Y-12) တဘ့ၣ်ဟဲခးလီၤဝဲကျိစဲးလးဖဲသဝီပူၤန့ၣ်လီၤ. ခီဖျိလၢကဘီယူၤခးလီၤတၢ်အဃိ, ကၠိ, တၢ်ဆါဟံၣ်ဒီးတၢ်ဘါယွၤသရိာ်တၢ်သူၣ်ထီၣ်သ့ၣ်တ ဖၣ်ဘၣ်ဟးဂီၤဝဲန့ၣ်လီၤ. သဝီဖိ အဟံၣ်တစှၤန့ၢ် (၂၀) ဖျၢၣ်ဘၣ်အူအီၣ်ကွံာ်ဝဲ, ဟံၣ်ခဲလၢာ်ဃၣ်ဃၣ်ဘၣ်ဒိဟးဂီၤဝဲ, သိလ့ၣ်, စဲးဖီကဟၣ်ဒီးတၢ်ပီးတၢ်လီ အါမးဘၣ်ဟးဂီၤဝဲန့ၣ်လီၤ. ဖဲကဘီယူၤဟဲခးလီၤတၢ်အဆၢကတီၢ်န့ၣ်တၢ်ဒုးတၢ်ယၤတကဲထီၣ်အသးလၢသဝီပူၤဒီးတၢ်လီၢ်လၢအဘူးဒီးသဝီတအိၣ်ဘၣ် န့ၣ်လီၤ. ဖဲလါအ့ဖြ့ၣ် ၁၆ သီ, ၂၀၂၆ နံၣ်အနံၤ, ပယီၤသုးဟဲခးလီၤကဒီးတၢ်လၢကဘီယူၤဖဲဘတ---သဝီဒီးဘၣ်ဒိဝဲသဝီဖိတဂၤလၢအမံၤမ့ၢ်စီၤယဝ---သးနံၣ်အိၣ် (၅၄) နံၣ်န့ၣ်လီၤ. ဖဲကဘီယူၤခးလီၤတၢ်ဝံၤအလီၢ်ခံသဝီဖိလၢသဝီပူၤမ့ၢ်ဂ့ၤဘူးဒီးသဝီမ့ၢ်ဂ့ၤလဲၤဃ့ၢ်အိၣ်လၢပှၢ်ပူၤဒီးစှၤဂၤဃ့ၢ်ကွံာ်ဆူယိၤကီၢ်တ ကပၤန့ၣ် လီၤ. သဝီဖိလၢဘၣ်ဃ့ၢ်အိၣ်ကဒုသ့ၣ်တဖၣ်ဘၣ်ကွၢ်ဆၢၣ်မဲာ်ဒီးတၢ်အီၣ်တၢ်အီ, တၢ်အိၣ်ကဒုအလီၢ်, တၢ်ကူၣ်ဘၣ်ကူၣ်သ့ဒီးတၢ်အိၣ် ဆူၣ်အိၣ်ချ့အတၢ်တၤတၢ်သ့ၣ်တဖၣ်န့ၣ်လီၤ. တၢ်ဂီၤလၢအစ့ၣ်တဘ့ၣ်ပာ်ဖျါထီၣ်ဝဲတၢ်ဟးဂူာ်ဟးဂီၤခီဖျိပယီၤသုးကဘီယူၤဟဲခးလီၤတၢ်ဖဲဘတ---သဝီပူၤ န့ၣ်လီၤ. တၢ်ဂီၤ လၢအထွဲတဘ့ၣ်အံၤပာ်ဖျါထီၣ်ဝဲမ့ၣ်ပိၢ်အကျါတ ဖျၢၣ်လီၤတဲာ်အိၣ်တီၢ်န့ၣ်လီၤ. [8](တၢ်ဂီၤ- KHRG)

KHRG ဒိးန့ၢ်ဘၣ်ဝဲတၢ်ဂီၤတဘ့ၣ်အံၤလၢလီၢ်ကဝီၤခိၣ်နၢ်တဂၤအအိၣ် ဖဲလါ ယနူၤအါရံၤ ၂၁ သီ, ၂၀၂၆ နံၣ်လၢအဘၣ်တၢ်ဒိန့ၢ်အီၤဖဲဘဖ---သဝီ, တခး ကျိကရူၢ်, နိၣ်တကီကီၢ်ဆၣ်, ဒူပျာ် ယာ်ကီၢ်ရ့ၣ်န့ၣ်လီၤ. တၢ်ဂီၤအံၤပာ်ဖျါ ထီၣ်ဝဲမၣ်ယပ---သးနံၣ်အိၣ် (၄၁) နံၣ်တဂၤအစိၣ်လၢအဘၣ်တၢ်ခးသံ အီၤလၢပယီၤသုးဖိလၢအအိၣ်ဟဲလၢ ခလရ နီၣ်ဂံၢ်-၂၈၄ ဖဲ လါယ နူၤအါရံၤ ၂၀ သီ, ၂၀၂၆ နံၣ်အနံၤဖဲအဝဲအိၣ်ဝဲဖဲအရီဘၢၣ်ကျီးပူၤဖဲဘဖ---သဝီန့ၣ် လီၤ. မၣ်ယပ---အံၤ ဘၣ်တၢ်ခးအီၤဖဲအနၢ်ကုလၢအစ့ၣ်တကပၤအဖီလာ် ဒီးသံဝဲတဘျီဃီန့ၣ်လီၤ. လၢတၢ်ကဲထီၣ်သးဒ်အံၤအဖီခိၣ်, သဝီဖိတနီၤလၢ ဘဖ---သဝီပူၤအံၤဘၣ်ပာ်တ့ၢ်ကွံာ်အဟံၣ်အဃီဒီးဃ့ၢ်ကွံာ်ဝဲန့ၣ်လီၤ.[10] (တၢ်ဂီၤ- လီၢ်ကဝီၤသဝီဖိ)

တၢ်ဂီၤတဘ့ၣ်အံၤဘၣ်တၢ်ဒိန့ၢ်အီၤဖဲလါမးရှး ၂၀၂၆ နံၣ်ဖဲဘည---သဝီ, လ့ဝၣ်ခးကရူၢ်, နိၣ်တကီကီၢ် ဆၣ်, ဒူပျာ်ယာ်ကီၢ်ရ့ၣ်န့ၣ်လီၤ. ဖဲ လါမးရှး ၂၀ သီ, ၂၀၂၆ နံၣ်အနံၤ, ဖဲဂီၤခီ ၁၀ နၣ်ရံၣ်အဆၢကတီၢ်, ပယီၤ သုးဖီၣ်ဒီးတီၢ်ဝဲပှၤသးစၢ် (၄) ဂၤနးမးဖဲတၢ်သမံသမိးလီၢ်တတီၤဖဲကၠၤ အ့စ့းကၠံဝ့ၢ်, နိၣ်တကီကီၢ်ဆၣ် န့ၣ်လီၤ. သဝီဖိလွံၢ်ဂၤအံၤမ့ၢ်ဝဲစီၤယခ---သးနံၣ် အိၣ် (၂၂) နံၣ်, စီၤယရ---သးနံၣ်အိၣ် (၁၈) နံၣ်, စီၤယစ---သးနံၣ်အိၣ် (၁၆) နံၣ်ဒီးစီၤယတ---သးနံၣ်အိၣ် (၁၉) နံၣ်ဘၣ်တၢ်ဖီၣ် အီၤလၢပယီၤသုးဒီးတၢ်ပာ်ကမၣ်အဝဲသ့ၣ်လၢအဘၣ်ထွဲဘၣ်ဃးဒီး သုးဖီၣ်စုကဝဲၤကရူၢ်န့ၣ်လီၤ. ပိာ်ခွါသးစၢ် (၄) ဂၤအံၤလဲၤဆှၢဝဲအသကိး မုၣ်ခံဂၤလၢကလဲၤဆူသဝီအဂၤတဖျၢၣ်ဖဲကၠၤအ့စ့းကၠံဝ့ၢ်န့ၣ်လီၤ. ပိာ်မုၣ် ခံဂၤအံၤတၢ်တဖီၣ်အဝဲသ့ၣ်ဘၣ်ဒီးအဝဲသ့ၣ်လဲၤဃ့တၢ်မၤစၢၤလၢ BGF အပှၤဘၣ်မူဘၣ်ဒါအအိၣ်ဒီးအဝဲသ့ၣ်တဲဘၣ်ပယီၤသုးလၢသဝီဖိလၢသုဖီၣ် ဃာ်လွံၢ်ဂၤအံၤတဘၣ်ထွဲဒီးသုးဖီၣ်စုကဝဲၤကရူၢ်နီတဖုဘၣ်န့ၣ် လီၤ. စှၤနၣ် ရံၣ်ဝံၤအလီၢ်ခံဖဲလါမးရှး ၂၀ သီ ၂၀၂၆ နံၣ်အနံၤန့ၣ်, ဘၣ်တၢ်ပျဲလီၤ က့ၤအဝဲသ့ၣ်န့ၣ်လီၤ. တၢ်ဂီၤတဘ့ၣ်အံၤပာ်ဖျါထီၣ်ဝဲ စီၤယခ---အ ပျိၢ်ဃံဖဲ ပယီၤသုးဖိတီၢ်အီၤဒီးနီၣ်က့ဝံၤအလီၢ်ခံန့ၣ်လီၤ.[11] (တၢ်ဂီၤ- KHRG)

တၢ်ဂီၤသ့ၣ်တဖၣ်အံၤဘၣ်တၢ်ဒိန့ၢ်အီၤဖဲလါမ့ၤ ၂၀၂၆ နံၣ်ဖဲဘရှ---သဝီ, နိၣ်တကီကရူၢ်, နိၣ်တကီကီၢ်ဆၣ်, ဒူပျာ်ယာ်ကီၢ်ရ့ၣ်န့ၣ်လီၤ. ဖဲလါမ့ၤ ၂၄ သီ, ၂၀၂၆ နံၣ်အနံၤ, ကဘၣ်ဖဲမုၢ်ထူၣ် ၁၂း၃၀ အဆၢ ကတီၢ်, ပယီၤသုးက ဘီယူၤဒုးသုးတဘ့ၣ်ဟဲတ့ၢ် လီၤမ့ၣ်ပိၢ် (၅၀၀-ပီၣ်) ခံဖျၢၣ်ဖဲဘရှ---သဝီန့ၣ်လီၤ. မ့ၣ်ပိၢ်တဖျၢၣ်လီၤတဲာ်ဖဲနီၢ်ယည---အဟံၣ်ဒီးတၢ်အီၣ်ကျးဖီ ခိၣ်ဒီးဘၣ်သံဝဲ (၃) ဂၤဒီးဘၣ်ဒိ (၂) ဂၤ န့ၣ်လီၤ. ကျးကစၢ်နီၢ်ယည---အပှၤမၤတၢ်ဖိသ့ၣ်တဖၣ်လၢအမ့ၢ်ယယ---သးနံၣ်အိၣ် (၃၉) နံၣ်ဒီးပှၤ ဟဲ ဟးတဂၤလၢအမံၤမ့ၢ်ယရှ---သးနံၣ်အိၣ် (၄၉) နံၣ်အံၤဘၣ်သံဝဲ လၢက ဘီယူၤခးလီၤတၢ်အဃိန့ၣ်လီၤ. ယယ---အဖိမုၣ်မၣ်ညအ---သးနံၣ်အိၣ် (၁၆) နံၣ်အံၤမၤစ့ၢ်ကီးတၢ်ဖဲတၢ်အီၣ်ကျးဒီးဘၣ်ဒိဝဲဖဲအခီၣ်လၢအထွဲတ ကပၤန့ၣ်လီၤ. တနံၤဝံၤအလီၢ်ခံဘၣ်တၢ်ဆှၢအီၤဆူဆဘ---တၢ်ဆါဟံၣ်ဖဲ ကီၢ်ကၠီၣ်တဲၣ်ခီဖျိအဝဲဘၣ်ဒိဝဲနးမးအဃိန့ၣ်လီၤ. သဝီဖိအဂၤတဂၤလၢအ မ့ၢ်အူညဘ---သးနံၣ်အိၣ်ဝဲ (၆၂) နံၣ်အံၤဘၣ်ဒိဝဲတဆံးတက့ၢ်ဖဲအခိၣ် သၣ်ဃံန့ၣ်လီၤ. ကဘီယူၤခးလီၤတၢ်အံၤဘၣ်ဟးဂီၤစ့ၢ်ကီးသဝီဖိအဟံၣ် သ့ၣ်တဖၣ်ဒီးသိလ့ၣ်န့ၣ်လီၤ. ခီဖျိကဘီယူၤခးလီၤတၢ်ဘူးဒီးတီၤခၢၣ်သးကၠိ တဖျၢၣ်လၢအဘၣ်တၢ်သူၣ်ထီၣ်အီၤလၢပှၤတဂၤဘၣ်တၢ်ပတုာ်ကွံာ်လၢတၢ် ပလီၢ်ဆိပာ်သးအဂီၢ်န့ၣ်လီၤ. ဖဲတၢ်ကဲထီၣ်သးဝံၤအလီၢ်ခံ, သဝီဖိတနီၤ ဃ့ၢ်အိၣ်ကဒုဒီးတနီၤဘၣ်ဟးဃ့ၢ်မံက့ၤဆူတၢ်လီၢ်လၢအပူၤဖျဲးန့ၣ်လီၤ. တၢ်ဂီၤလၢအဖီခိၣ်အစ့ၣ်တဘ့ၣ်ပာ်ဖျါထီၣ်ဝဲဒီၤယရှ---အစိၣ်ဒီးတၢ်ဂီၤလၢ အဖီခိၣ်အထွဲတဘ့ၣ်ဒီးတၢ်ဂီၤလၢတၢ်ဖီလာ်တဘ့ၣ်ပာ်ဖျါထီၣ်ဝဲဒီၤယည--- အဟံၣ်ဒီးအကျးလၢအဘၣ်ဟးဂီၤဝဲန့ၣ်လီၤ.(တၢ်ဂီၤ- KHRG)

တၢ်ဂီၤတဘ့ၣ်အံၤဘၣ်တၢ်ဒိန့ၢ်အီၤဖဲလါမးရှး ၂၀၂၆ နံၣ်ဖဲ စလ--- သဝီ, ထိၣ်ကီးကိကရူၢ်, တန့ခၠါကီၢ်ဆၣ်, ဖၣ်အၣ်ကီၢ်ရ့ၣ်န့ၣ်လီၤ. တၢ်ဂီၤတဘ့ၣ် အံၤပာ်ဖျါထီၣ်ဝဲသဝီဖိအဒူၣ် (၂၀) လၢအအိၣ်ဟဲလၢဆဂ---သဝီဒီး ဆဟ---သဝီသ့ၣ်တဖၣ်ဃ့ၢ်အိၣ်ဒုဒီးတ့ထီၣ်န့ၢ်ဝဲအဒဲဖဲ စလ--- သဝီန့ၣ်လီၤ. စးထီၣ်လၢလါယနူၤအါရံၤ ၂၀၂၆ နံၣ်တုၤလၢလါမးရှးလၢာ် ၂၀၂၆ နံၣ်န့ၣ်, သဝီဖိသ့ၣ်တဖၣ်ဘၣ်ဃ့ၢ်အိၣ်ကဒုဝဲဆူတၢ်လီၢ်အါတီၤခီဖျိပယီၤသုးကဘီ ယူၤခးလီၤတၢ်ဖဲအဝဲသ့ၣ်အသဝီပူၤအဃိန့ၣ်လီၤ. သဝီဖိတနီၤနီၤလဲၤဃ့ၢ် အိၣ်လၢပှၢ်ပူၤဒီးအါတက့ၢ်အဂၤသ့ၣ်တဖၣ်လဲၤဃ့ၢ်အိၣ်ဆူဆဧ---သဝီဒီး စလ--- သဝီသ့ၣ်တဖၣ်န့ၣ် လီၤ. (တၢ်ဂီၤ- KHRG)

တၢ်ဂီၤသ့ၣ်တဖၣ်အံၤဘၣ်တၢ်ဒိးန့ၢ်အီၤလၢလီၢ်ကဝီၤသဝီဖိလၢအအိၣ်ဖဲဆဂ---သဝီ, နိၣ်က့ၣ်ကရူၢ်, တန့ခၠါကီၢ်ဆၣ်, ဖၣ်အၣ်ကီၢ်ရ့ၣ်တဂၤအအိၣ်ဖဲလါ မးရှး ၂၇ သီ, ၂၀၂၆ နံၣ်အနံၤန့ၣ်လီၤ. တၢ်ဂီၤအံၤပာ်ဖျါ ထီၣ်ဝဲသီခါဖၠၢ်တၢ်သူၣ်ထီၣ်ဖဲဆဂ---သဝီလၢအဘၣ်ဟးဂီးလၢပယီၤသုးကဘီယူၤ ဒုးသုးဟဲ တ့ၢ်လီၤမ့ၣ်ပိၢ်ဖဲဆဂ---သဝီပူၤဖဲလါမးရှး ၂၀၂၆ နံၣ်အနံၤန့ၣ်လီၤ. မ့ၣ်ပိၢ်တၢတဖျၢၣ်ဘၣ်ဟးဂီၤဝဲသီခါဖၠၢ်ခံကထြၢဒီးသၢကထြၢတကထြၢန့ၣ်လီၤ. မ့မ့ၢ်လၢ တၢ်ဘၣ်ဒိဘၣ်ထံးန့ၣ်တအိၣ်နီတမံၤဘၣ်ခီဖျိသဝီဖိဒီးတၢ်ဘူၣ်တၢ်ဘါခိၣ်နၢ်သ့ၣ်တဖၣ်ပျံၤတၢ်ဒီးဃ့ၢ်ကွံာ်ချုးဆၢချုးကတီၢ်လံအဃိန့ၣ်လီၤ. ဝံၤအလီၢ်ခံ တစိၢ်ဖိ, ကဘီယူၤဟဲယူၤခီဃီၤဝဲဖဲတၢ်လီၢ်ဖဲန့ၣ်ဒီးတ့ၢ်လီၤဝဲမ့ၣ်ပိၢ်ဖဲကျဲမုၢ်ခိၣ်ဖဲဆဂ---သဝီဒီးဘၣ်အူအီၣ် ကွံာ်ဒဲတဖျၢၣ်ဒီးကျးတဖျၢၣ်န့ၣ်လီၤ. (တၢ်ဂီၤ- လီၢ်ကဝီၤသဝီဖိ)