ကရင်အမျိုးသားအစည်းအရုံး KNU တပ်မဟာ(၆)နယ်မြေ ဒူးပလာခရိုင် လေးကေ့ကော်ဒေသ နဲ့ ကော့ကရိပ်မြို့တောင်ပိုင်းတွေမှာ စစ်ကောင်စီတပ်တွေ တပ်စွဲနေရာယူထားတာကြောင့် စစ်ဘေးရှောင်တွေဟာ ၃လကြာတဲ့အထိ သူတို့နေအိမ်တွေကိုမပြန်နိုင်ကြသေးပါဘူး။ အဲဒီအတွက် စစ်ကောင်စီတပ်တွေ အဲဒီနယ်မြေကနေ ၃ ရက်အတွင်း ဖယ်ရှားပေးဖို့ ကရင်အမျိုးသားအစည်းအရုံးKNU ဒူးပလာခရိုင် အတွင်းရေးမှူး စောလစ္စတန်က အရှေ့တောင်တိုင်းစစ်ဌာနချုပ်ကတိုင်းမှူးထံကို အသိပေးချက်ထုတ်ပြန်ခဲ့ပါတယ်။ ဒီသတင်းကို ဗွီအိုအေ သတင်းထောက် မအေးအေးမာ သတင်းပေးပို့ထားပါတယ်။

ကရင်အမျိုးသားအစည်းအရုံး KNU တပ်မဟာ(၆)နယ်မြေဖြစ်တဲ့ ဒူးပလာခရိုင် လေးကေ့ကော်ဒေသ နဲ့ ကော့ကရိပ်မြို့တောင်ပိုင်းတွေမှာ စစ်ကောင်စီတပ်တွေ တပ်စွဲနေရာယူထားပြီးမကြာခန တိုက်ပွဲတွေဖြစ်နေပါတယ်။ အဲဒီအတွက် လက်နက်ကြီး ကျည်ဆံတွေ ကျေးရွာတွေထဲကျတဲ့အတွက် ဒေသခံတွေ သေဆုံးဒဏ်ရာရကြတာရှိသလို နေအိမ်တွေကိုလည် းစွန့်ခွါပြီးထွက်ပြေးနေရပါတယ်။ ဒီအတွက် KNU တပ်မဟာ(၆)က ဒေသခံတွေအတွက် ကာကွယ်ရေး နဲ့ လုံခြုံရေးအတွက် စာထုတ်ပြီး စစ်ကောင်စီတပ်တွေအနေနဲ့ မတ်လ ၇ ရက်နေ့ကစပြီး ၃ရက်အတွင်းဖယ်ရှားဖို့ စာထုတ်ခဲ့တာဖြစ်ကြောင်း KNU ကရင်အမျိုးသားအစည်းအရုံး နိုင်ငံခြားရေးဌာနပြောရေးဆိုခွင့်ရှိသူ ဖဒိုစောတောနီး က အခုလိုပြောပြပါတယ်။

"ဒူးပလာခရိုင်တပ်မဟာ(၆) က အတွင်းရေးမှူးလက်မှတ် နဲ့ ထုတ်တဲ့စာဖြစ်တယ်။ အထူးသဖြင့် ဒူးပလာခရိုင် တပ်မဟာ(၆) အဲဒီဒေသလုံခြုံရေးအတွက် သူတို့မှာတာဝန်ရှိတဲ့အပေါ်မှာ သက်ဆိုင်ရာကိုထုတ်တာဖြစ်တယ်။အထူးသဖြင့်ပြည်သူလူထုရဲ့အသက်အိုးအိမ်ကာကွယ်ရေးကိစ္စအပေါ်မှာ တာဝန်ရှိတဲ့အပေါ်မှာ ထုတ်ပြန်တာဖြစ်တယ်။ အဲဒီစာမှာပါတဲ့အကြောင်းအရာက စစ်ဘေးရှောင်တွေ ထွက်ပြေးလာတာ ၃လရှိပြီ။ သူတို့အိမ်မှာကျန်ခဲ့တဲ့ပစ္စည်းတွေကပျက်လိုပျက်ဆီးဖြစ်နေကြတော့ သူတု့ိက ဒီအတိုင်းတော့ တခုခုလုပ်သင့်ပြီဆိုပြီး လုပ်နေကြတာလို့ယူဆတယ်။ အခုက ပြန်လို့ကိုမရတော့တာ ၃လရှိပြီ။ အခုက မိုးတွေကလည်းရွာတယ်။ တလောကလည်း ဒုက္ခတွေအတော်ရောက်တယ်။ တောထဲမှာလည်း ယာယီနေကြရတယ်ဆိုတော့"

ဒေသခံတွေရဲ့နေအိမ်တွေမှာ စစ်ကောင်စီတပ်တွေက တပ်စွဲနေရာယူထားတဲ့အပြင် ရွာသားပိုင်ပစ္စည်းတွေကိုလည်း ယူဆောင်သွားတာတွေရှိတယ်လို့ ကရင်လူအခွင့်ရေးအဖွဲ့KHRG က ပြောရေးဆိုခွင့်ရှိသူစောနန္ဒဆူးကလည်းအခုလိုပြောပါတယ်။

" စစ်ကောင်စီတပ်ဖွဲဝင်တွေက ကော့ကရိတ်မြို့နယ်ထဲက တပ်ဖွဲ့ဝင်တွေ ထွက်ပြေးတိမ်းရှောင်နေတဲ့ ဒေသခံတွေရဲ့အိမ်တွေက ပစ္စည်းတွေကို လု့ယူခိုးယူနေတာတွေလည်းရှိတယ်။ အိမ်တွင်းကပစ္စည်းတွေ ကောင်းတဲ့အဝတ်အစားတွေယူတယ်။ အဖိုးတန်ပစ္စည်းပိုက်ဆံတွေကိုလည်းယူတာရှိတယ်။ အိမ်မွေးတိရစာန်တွေကို ကြက်ဝက်တွေကိုသတ်ဖြတ်ချက်စားတာတွေလည်းရှိတယ်။ ရွာသားတွေရဲ့အိမ်တွေကို နေထိုင်စရာယာယီလုပ်ပြီး အိုးခွက်ပန်ကန်တွေကိုသုံးယူနေတာတွေလည်းရှိတယ်"

အခုလိုစာထုတ်ထားပေမယ့် စစ်ကောင်စီဘက်က တုံပြန်ချက်တွေတော့မရသေးဘူးလို့လည်းဖဒိုစောတောနီးကပြောပါတယ် ။

"ဘာမှတုံပြန်ချက်မှတော့ ကျနော်တို့မကြားသေးဘူး ။ငြိမ်းချမ်းရေးနဲ့ အပစ်အခတ်ရပ်စဲရေး စကားတွေကိုတလျောက်လုံးပြောနေပေမယ့် တကယ်တမ်းကျတော့ အဲဒါနဲ့ဆန့်ကျင်ပြီးလုပ်တယ်။ ငြိမ်းချမ်းရေးနဲ့ အပစ်ရပ်ရေးကို မလိုလားဆုံးက ဘယ်သူလဲဆိုတာ ထင်ရှားတယ်။ ကျနော်နားလည်တာက တပ်မဟာ(၆)က သူတို့လုပ်သင့်ကိုလုပ်နေတာပဲ။ တဖက်ကလည်း အပစ်အခတ်ရပ်စဲရေးခေါ်ပြီး တဖက်က တိုက်ပွဲတွေနေ့တိုင်းဖြစ်တော့လည်း ယုံကြည်မူ့ကတည်ဆောက်လို့မရတော့ဒီလိုပဲသွားနေရတာပေါ့"

ကရင်ပြည်နယ် လေးကေ့ကော်ဒေသမှာ ပြီးခဲတဲ့နှစ် ဒီဇင်ဘာလ၁၅ရက်နေ့ကစပြီး တိုက်ပွဲတွေဖြစ်ခဲ့သလို ကော့ကရိတ်မြိုနယ်ထဲမှာလည်း တိုက်ပွဲတွေဖြစ်နေတာပါ။ တိုက်ပွဲတွေအတွင်း လက်နက်ကြီးတွေနဲ့ပစ်ခတ်မူ့လေယာဉ်နဲ့ဗုံးကြဲတိုက်ခိုက်မူတွေကြောင့် ကျေးရွာတွေက ဒေသခံသောင်းနဲ့ချီပြီး အိုးအိမ်ပစ်ပြီး နေရပ်စွန့်ခွါ ထွက်ပြေးနေရဆဲဖြစ်ပါတယ်။