တၢ်ကဲထီၣ်သးအကလုာ်

ပယီၤသုးဒြိခးလီၤတၢ်အဃိ ဘၣ်ဒိသဝီဖိ

တၢ်ကဲထီၣ်သးမုၢ်နံၤမုၢ်သီ

လါယနူၤအါရံၤ ၂၃ သီ, ၂၀၂၆ နံၣ်

တၢ်ကဲထီၣ်သးတၢ်လီၢ်တၢ်ကျဲ (သဝီ, ကရူၢ်, ကီၢ်ဆၣ်, ကီၢ်ရ့ၣ်)

အအ--- သဝီ, တခးကျိကရူၢ်, နိၣ်တကီကီၢ်ဆၣ်, ဒူပျာ်ယာ်ကီၢ်ရ့ၣ်

ၦၤလၢအတူၢ်ဘၣ်တၢ်တဂၤအဂ့ၢ်အကျိၤ

မံၤ

စီၤ ဘ---

စီၤ က---

သးနံၣ်

(၄၀) နံၣ်

(၄၃) နံၣ်

မုၣ်/ ခွါ

ခွါ

ခွါ

ကလုာ်

ကညီ

ကညီ

ထီၣ်ပှၢ် / သဘျ့  

ထီၣ်ပှၢ်

ထီၣ်ပှၢ်

တၢ်ဖံးတၢ်မၤ

မၤအီၣ်ကျီး

မၤအီၣ်ကျီး

တၢ်ဘူၣ်တၢ်ဘါ

ဘူးဒး

ဘူးဒး

တၢ်ဟံးမူဒါ/ လီၢ်လၤ

သဝီဖိ

သဝီဖိ

အိၣ်ဆိးဒူသဝီ

အအ--- သဝီ, တခးကျိကရူၢ်, နိၣ်တကီကီၢ်ဆၣ်, ဒူပျာ်ယာ်ကီၢ်ရ့ၣ်

အအ--- သဝီ, တခးကျိကရူၢ်, နိၣ်တကီကီၢ်ဆၣ်, ဒူပျာ်ယာ်ကီၢ်ရ့ၣ်

ၦၤလၢအမၤအၢပယွဲတၢ်တဂၤအဂ့ၢ်အကျိၤ

မံၤ                   

လီၢ်လၤ

သုးကျိၤ/ သုးရ့ၣ် / သုးတြိၤ

အိၣ်သူၣ်လီၤသးလီၢ်ကျဲ /သုးကလၢၤ

အခိၣ်အမံၤဒီးလီၢ်လၤ

တသ့ၣ်ညါ

တသ့ၣ်ညါ

ပယီၤသုးခီၣ်သုးရ့ၣ် (ခလရ) နီၣ်ဂံၢ် (၃၂)

နိၣ်တကီဝ့ၢ်, နိၣ်တကီကီၢ်ဆၣ်, ဒူပျာ်ယာ်ကီၢ်ရ့ၣ်

တသ့ၣ်ညါ

၁. ၡဲပၠးၦၤနဟံးန့ၢ်တၢ်ကဲထီၣ်သးတခါအံၤ တဆီဘၣ်တဆီတက့ၢ်.

(ဖဲပယီၤသုးမီၤစိရိၤ) မၤတၢ်ဃုထၢ(ခံကူာ်တကူာ်ဖဲ ၂၀၂၆ နံၣ်အံၤ)အဆၢကတီၢ် SAC ပယီၤသုးဖိတဖၣ် ဟူးဂဲၤဟးဝ့ၤဝီၤဝဲဖဲ တၢ်မၤတၢ်ဃုထၢအလီၢ်လၢအဘူးဒီး (နိၣ်တကီဝ့ၢ်ပူၤ)န့ၣ်လီၤ. တၢ်မ့ကဲထီၣ်သးလၢဟီၣ်ကဝီၤပူၤအိၣ်တမံၤလၢ်လၢ်န့ၣ် ယၤ (ပျီပူၤပှၤမၤနီၣ်မၤဃါတၢ်မၤဘၣ်ဒိပှၤဂ့ၢ်ဝီခွဲးယာ်) တဲပာ် အအ--- သဝီသးပှၢ်လၢကဒုးသ့ၣ်ညါယၤန့ၣ်လီၤ. ယသ့ၣ်ညါဘၣ် တၢ်ကဲထီၣ်သးတခါအံၤ မ့ၢ်လၢသဝီသးပှၢ်ဒုးသ့ၣ်ညါယၤအဃိန့ၣ်လီၤ. (KHRG ပျီပူၤပှၤမၤနီၣ်မၤဃါတၢ်မၤဘၣ်ဒိပှၤဂ့ၢ်ဝီခွဲးယာ် မၤတၢ်ထံၣ်လိာ်သံကွၢ်တၢ်ဒီး ဒူသဝီဘံၣ်ဘၢပှၤဘၣ်မူဘၣ်ဒါ မီၤက---, ပှၤတူၢ်ဘၣ်တၢ်အမံၤပှၢ် နီၢ်စ--- ဒီး ပှၤတူၢ်ဘၣ်တၢ် အကျါတဂၤလၢအမ့ၢ် စီၤဘ--- န့ၣ်လီၤ.)

၂. ကွဲးနီၣ်ၦၤလၢဟ့ၣ်တၢ်ဂ့ၢ်အံၤတဂၤစုာ်စုာ်သ့ၣ်ညါ တၢ်ဂ့ၢ်အံၤအမ့ၢ်အတီလၢကျဲဒ်လဲၣ်.

(KHRGပျီပူၤပှၤမၤနီၣ်မၤဃါတၢ်မၤဘၣ်ဒိပှၤဂ့ၢ်ဝီခွဲးယာ်) မၤတၢ်ထံၣ်လိာ်သံကွၢ်တၢ်ဒီး ဒူသဝီဘံၣ်ဘၢပှၤဘၣ်မူဘၣ်ဒါ မီၤ က---, ပှၤတူၢ်ဘၣ်တၢ်အမံၤပှၢ် နီၢ် စ--- ဒီး ပှၤတူၢ်ဘၣ်တၢ်အကျါတဂၤလၢအမ့ၢ် စီၤ ဘ--- အဃိ တၢ်ဂ့ၢ်တၢ်ကျိၤသ့ၣ်တဖၣ်အံၤ မ့ၢ်တီ လီၤတံၢ်န့ၣ်လီၤ.

ပာ်ဖျါတၢ်ကဲထီၣ်သးအဂ့ၢ်အကျိၤလၢလၢပှဲၤပှဲၤတက့ၢ်.

နိၣ်တကီဝ့ၢ်ဟီၣ်ကဝီၤ, နိၣ်တကီကီၢ်ဆၣ်, ဒူပျာ်ယာ်ကီၢ်ရ့ၣ်ပူၤန့ၣ် အိၣ်လၢ SAC ပယီၤသုးပၢအဖီလာ် လၢအတမ့ၢ် (ကညီဒီ ကလုာ်စၢဖှိၣ်ကရၢ) KNU တၢ်ပၢဟီၣ်ကဝီၤဘၣ်န့ၣ်လီၤ. SAC ပယီၤသုးမီၤစိရိၤအိၣ်ဒီးတၢ်ရဲၣ်တၢ်ကျဲၤလၢ ကမၤတၢ်ဃုာ်ထၢ သၢကူာ်တကူာ်အံၤ ဖဲလါယနူၤအါရံၤ ၂၅ သီ, ၂၀၂၆ နံၣ်အံၤအဃိ စးထီၣ်ဖဲ လါယနူၤအါရံၤ ၂၀ သီ, ၂၀၂၆ နံၣ်န့ၣ် အဝဲသ့ၣ် ဆှၢအါထီၣ်အသုး ခီၣ်သုးရ့ၣ် (ခလရ) နီၣ်ဂံၢ် (၂၈၃, ၂၈၄ ဒီး ၃၂)သုးဖိသ့ၣ်တဖၣ် ဆူဟီၣ်ကဝီၤလၢအဘူးဒီး နိၣ်တကီဝ့ၢ် သ့ၣ်တဖၣ်န့ၣ်လီၤ. ဖဲလါယနူၤအါရံၤ ၂၀ သီ, ၂၀၂၆ နံၣ်န့ၣ် SAC ပယီၤသုးမီၤစိရိၤ (လၢအဆှၢအါထီၣ်သုးတဖုဃီအံၤ) အသုးဖိ သ့ၣ်တဖၣ် ခးသံသဝီဖိဖဲအမၤတၢ်လၢ အကီၣ်ကျိးပူၤတဂၤ ဖဲ အဘ--- သဝီ, တခးကျိကရူၢ်, နိၣ်တကီကီၢ်ဆၣ်, ဒူပျာ်ယာ် ကီၢ်ရ့ၣ်ဟီၣ်ကဝီၤပူၤန့ၣ်လီၤ.[2]

တၢ်ကဲထီၣ်သးတခါအံၤဝံၤတစှၤသီဘၣ်အလီၢ်ခံ ဖဲလါယနူၤအါရံၤ ၂၃ သီ, ၂၀၂၆ နံၣ် ကဘၣ်ဖဲ ဟါလီၤခီ ၄း၀၀ နၣ်ရံၢ်န့ၣ် SAC ပယီၤသုးမီၤစိရိၤ ခီၣ်သုးရ့ၣ် (ခလရ) နီၣ်ဂံၢ် (၃၂) သုးဒြိလဲၤခးလီၤတၢ်ဖဲ ရီဘၢၣ်ကျီးတဘ့ၣ်အပူၤလၢအဘူးဒီး အအ--- သဝီ (ဘူးစ့ၢ်ကီးဒီးနိၣ်တကီၢ်ဝ့ၢ်)န့ၣ်လီၤ. ကျိဖးဒိၣ်ချံလီၤတဲာ်ပိၢ်ထီၣ်ဖဲသဝီဖိကီၣ်ကျိးဒဲမဲာ်ညါအဃိ ဘၣ်ဒိဝဲ အအ--- သဝီဖိ (၂) ဂၤန့ၣ်လီၤ. တၢ်ကဲထီၣ်သးအဆၢကတီၢ် ဘၣ်ဖဲ စီၤဘ--- (၄၀ နံၣ်) အိၣ်လၢဒဲပူၤ ဘှီထီၣ်ဒဲထူၣ် ဒီး မ့မ့ၢ်လၢ စီၤက--- (၄၃ နံၣ်) အိၣ်လၢ ဒဲဖီလာ်အဆၢကတီၢ်န့ၣ်လီၤ. စီၤဘ---အခီၣ်မုၢ်လၢအစ့ၣ်တခီဘၣ်ဒိ ဒီး မ့မ့ၢ်လၢ စီၤက--- တခီ အခံကိၢ်လၢအစ့ၣ် တကပၤ ဒီး အမဲသၣ်ဘၣ်ဒိဒိၣ်ဒိၣ်မုၢ်မုၢ် တုၤဒၣ်လဲာ် ကျိဖးဒိၣ်က့အိၣ်တီၢ်လၢအမဲာ်သၣ်န့ၣ်လီၤ. သဝီဖိခံဂၤအံၤ အဝဲသ့ၣ်မ့ၢ်ပှၤ ဒီခံနဲန့ၣ်လီၤ. စီၤဘ--- ဒုးသ့ၣ်ညါဘၣ် KHRG ဒ်အံၤ, “ပနၢ်ဟူပှၤတဲတၢ်အိၣ်သးတဂ့ၤဘၣ်. ပဆိမိၣ်ပာ်လၢ ပအီၣ်မ့ၤမ့ဝံၤန့ၣ် ပကက့ၤလၢသဝီပူၤလီၤ.  တချုးဒံးလၢ ပဟးထီၣ်ဒံးဘၣ်န့ၣ် ဒြိဟဲဖျါလၢပဖီခိၣ်. ပတဃ့ၢ်ဒံးဘၣ် ပပျံၤလၢကခးလီၤကျိဖးဒိၣ် လၢပဖီခိၣ်. ဝံၤကျိဖးဒိၣ်လီၤတဲာ်လၢ ပဒဲမဲာ်ညါ. တၢ်ကဲထီၣ်သးအခါ ယခံနဲအိၣ်လၢဒဲပူၤ. ပဘၣ်ဒိဝံၤတဘျီ ပဃုပှၤလၢအအိၣ် ဘူးဒီး တအိၣ်နီတဂၤဘၣ်. အဝဲ (စီၤအ---) ဘၣ်ဒိနးဒိၣ်မး. ယခီၣ်(မုၢ်)လၢအစ့ၣ်တကပၤဘၣ်ဒိဘၣ်ဆၣ် ယစိၤဃီၤအီၤလၢ သိလ့ၣ်ယီၢ်အဖီခိၣ် ဒီး ပက့ၤလၢသဝီပူၤ.” န့ၣ်လီၤ.

စီၤဘ---တခီ ဘၣ်ဒိတဆံးတက့ၢ်အဃိ အနီၢ်ကစၢ်က့ၤတီဝဲစီၤအ--- ဆူသဝီပူၤဒီးသိလ့ၣ်ယီၢ်န့ၣ်လီၤ. အဝဲသ့ၣ်က့ၤဝဲကဘှၢက ဘှၢအဃိ က့ၤတုၤလၢသဝီပူၤကဘၣ်ဖဲ ဟါလီၤခီ ၅း၀၀ နၣ်ရံၣ်န့ၣ်လီၤ. စီၤအ--- ဘၣ်ဒိနးနးကလဲာ်အဃိ (အဘူးအတံၢ်တဂၤ) လဲၤဆှၢအီၤဆူ ဃိၣ်သၢဖျၢၣ်တၢ်ဆါဟံၣ် (ဖဲဃိၣ်သၢဖျၢၣ်ဝ့ၢ် ဘူးဒီးကၤခၠၤနီၣ်ဘူၤရံၤယိၤကီၢ်ဆၢ)န့ၣ်လီၤ. မ့မ့ၢ် စီၤဘ--- တခီ အခီၣ်မုၢ်ဘၣ်ဒိအဃိတနၤဃီဃီန့ၣ် ဒိးန့ၢ်ဘၣ်ဝဲ တၢ်ကူဆါယါဘျါဖဲ အအ--- (ကညီဆူၣ်ချ့မၤစၢၤဝဲၤကျိၤ KDHW) တၢ်ဟ့ၣ် ကသံၣ်ဒၢးန့ၣ်လီၤ.

ပှၤတူၢ်ဘၣ်တၢ်အမံၤတပှၢ် နီၢ်စ--- ဒုးသ့ၣ်ညါဘၣ် KHRG ဒ်အံၤ, “ယနၢ်ဟူဘၣ်ဃးတၢ်ဃုထၢအဂ့ၢ် ဒီး ယပျံၤတၢ်. ပှၤတနီၤ ဃ့ၢ်ထီၣ်ကွံာ်လၢသဝီပူၤအိၣ်လံ. ယနၢ်ဟူလၢ ပယီၤသုးကမၤတၢ်ဃုထၢ ဒီး ဆှၢအါထီၣ်အသုး. (...) အဝဲ(ပှၤတူၢ်ဘၣ်တၢ်)သ့ၣ် တဖၣ် တဲကျၢယၤလၢလီတဲစိ ဒီး ယတဲအဝဲသ့ၣ်လၢကဟဲက့ၤလၢသဝီ (မ့ၢ်လၢပယီၤဆှၢအါထီၣ်အသုး). ပတဲတၢ်ဝံၤ တစိၢ်ဖိ ဒြိဟဲခးလီၤတၢ်လီၤ. ဝံၤတဘျီ အဝဲသ့ၣ်ကိးကဒီးယၤလီတဲစိ တဲယၤလၢအဝဲသ့ၣ်ဘၣ်ဒိလံ. အဝဲသ့ၣ်ကမၤတၢ်ဃုထၢအဂီၢ် အဝဲသ့ၣ်တလိၣ်မၤနးဒီးမၤသံ ကမျၢၢ်ဒ်အံၤဘၣ်. ပဘၣ်သးအိၣ်လၢတၢ်မုာ်တၢ်ခုၣ်လီၤ. ပယီၤသုးတဲလၢအဝဲသ့ၣ်ကမၤ တၢ်ဃု ထၢ, မ့ၢ် ဘၣ်ဆၣ် အဝဲသ့ၣ်ဟဲခးလီၤနါစိၤတၢ်ဒီးဒြိ.”

ဖဲ(လါယနူၤအါရံၤ ၂၆ သီ, ၂၀၂၆ နံၣ်) လံာ်တၢ်ပာ်ဖျါအဆၢကတီၢ် စီၤအ--- တစံၣ်လီၤဘၣ်လၢတၢ်ဆါဟံၣ်ဒံးဘၣ်န့ၣ်လီၤ. ကသံၣ်သရၣ်ထုးထီၣ်န့ၢ်အီၤ ကျိဖးဒိၣ်က့လၢအမဲာ်သၣ်တဘူၣ်ဘၣ် မ့ၢ်လၢအမၤဘၣ်ဒိက့ၤအမဲာ်ချံသ့အဃိန့ၣ်လီၤ. ကသံၣ် သရၣ် ကဘၣ်ကွဲးကါကဒီးန့ၢ်အီၤတၢ်ပူၤလီၢ်အသီတဘျီလၢ ကထုးထီၣ်ကွံာ်ကျိဖးဒိၣ်က့ဝဲအံၤအဂီၢ်န့ၣ်လီၤ. လၢတၢ်ကူဆါယါ ဘျါအဂီၢ် အဝဲကဘၣ်ဟ့ၣ်ဝဲ ၃,၀၀၀ ဘးန့ၣ်လီၤ. ပှၤတူၢ်ဘၣ်တၢ်အနီၢ်ကစၢ်တဒိးန့ၢ်ဘၣ်ကျိၣ်စ့တၢ်ဆီၣ်ထွဲ မၤစၢၤနီတမံၤဘၣ် အဃိ တၢ်ကူဆါယါဘျါ တၢ်လၢၤဘူၣ်လၢၤစ့အဂီၢ်  အဟံၣ်ဖိဃီဖိဘၣ်ဃ့လိၢ်စ့လၢအဘူးအတံၢ်သ့ၣ်တဖၣ်အအိၣ်န့ၣ်လီၤ.

ဖဲလါယနူၤအါရံၤ ၂၆ သီ, ၂၀၂၆ နံၣ်န့ၣ် အအ--- သဝီဖိလၢအဃ့ၢ်အိၣ်ကမှံတနီၤ တဟဲက့ၤအိၣ်လၢသဝီပူၤဒံးဘၣ်န့ၣ်လီၤ.

မ့ၢ်ၦၤလၢအတူၢ်ဘၣ်တၢ်တဖၣ် ဟ့ၣ်ၦၤတၢ်ခွဲးတၢ်ယာ်လၢပကသူတၢ်ဂ့ၢ်တၢ်ကျိၤတခါအံၤဧါ, ဟ့ၣ်ၦၤတၢ်ခွဲးတၢ်ယာ်လၢ ပကသူ တၢ်ဂ့ၢ်အံၤလၢကျဲဒ်လဲၣ်.

တၢ်သူစူးကါတၢ်ဂ့ၢ်တၢ်ကျိၤသ့ၣ်တဖၣ်အံၤသ့န့ၣ်လီၤ. (ပှၤတူၢ်ဘၣ်တၢ်အမံၤပှၢ်ပိာ်မုၣ် ဒီး စီၤ ဘ--- လၢအမ့ၢ်ပှၤတူၢ်ဘၣ်တၢ် အကျါတဂၤ ဟ့ၣ် KHRG တၢ်ပျဲလၢကသူတၢ်ဂ့ၢ်တၢ်ကျိၤသ့ၣ်တဖၣ်အံၤန့ၣ်လီၤ.)