တၢ်ကဲထီၣ်သးအကလုာ်

တၢ်မၤပယွဲသွံၣ်ထံးမုၣ်ခွါဂ့ၢ်ဝီထီဒါ ဖိသၣ် (၂) ဂၤ  (ပှၤမၤကမၣ်တၢ်မ့ၢ် KNU/KNLA တၢ်မုာ် တၢ်ခုၣ်ကီၣ်ကးကရၢ (KNU/KNLA-PC) သုးဖိတဂၤ)

တၢ်ကဲထီၣ်သးမုၢ်နံၤမုၢ်သီ

လါအ့ဖြ့ၣ် ၂၄ သီ, ၂၀၂၃ နံၣ် ဒီး လါစဲးပထ့ဘၢၣ် ၉ သီ, ၂၀၂၃ နံၣ်

တၢ်ကဲထီၣ်သးတၢ်လီၢ်တၢ်ကျဲ (သဝီ, ကရူၢ်, ကီၢ်ဆၣ်, ကီၢ်ရ့ၣ်)

ဆ---သဝီ, မဲၢ်သဲးကရူၢ်, ကြုၢ်တုကီၢ်ဆၣ်, ဒူပျာ်ယာ်ကီၢ်ရ့ၣ်

ၦၤလၢအတူၢ်ဘၣ်တၢ်တဂၤအဂ့ၢ်အကျိၤ

မံၤ

နီၢ်ဘ---

နီၢ်အ---

သးနံၣ်

(၁၆) နံၣ်

(၁၆) နံၣ်

မုၣ်/ ခွါ

မုၣ်

မုၣ်

ကလုာ်

ကညီ

ကညီ

ထီၣ်ပှၢ် / သဘျ့  

ထီၣ်ပှၢ်

သဘျ့

တၢ်ဖံးတၢ်မၤ

(မုၢ်ဆ့ၣ်မုၢ်ဂီၤပှၤမၤတၢ်ဖိ)

(မုၢ်ဆ့ၣ်မုၢ်ဂီၤပှၤမၤတၢ်ဖိ)

တၢ်ဘူၣ်တၢ်ဘါ

ဘူးဒး

ဘူးဒး

တၢ်ဟံးမူဒါ/ လီၢ်လၤ

သဝီဖိ

သဝီဖိ

အိၣ်ဆိးဒူသဝီ

ဆ---သဝီ, မဲၢ်သဲးကရူၢ်

ဆ---သဝီ, မဲၢ်သဲးကရူၢ်

ၦၤလၢအမၤအၢပယွဲတၢ်တဂၤအဂ့ၢ်အကျိၤ

မံၤ                    

လီၢ်လၤ

သုးကျိၤ/ သုးရ့ၣ် / သုးတြိၤ

အိၣ်သူၣ်လီၤသးလီၢ်ကျဲ /သုးကလၢၤ

အခိၣ်အမံၤဒီးလီၢ်လၤ

စီၤသါစိ

သုးဖိ

KNU/KNLA-PC သုးရ့ၣ် နီၣ်ဂံၢ် (၇၇၆)

လၣ်အ့းသၢးသဝီ, ဂီၤခံတုၢ်ကရူၢ်, ကြုၢ်တုကီၢ်ဆၣ်, ဒူပျာ်ယာ်ကီၢ်ရ့ၣ်

သုးရ့ၣ်ခိၣ် စၤတံၣ်မၤ

၁. ၡဲပၠးၦၤနဟံးန့ၢ်တၢ်ကဲထီၣ်သးတခါအံၤ တဆီဘၣ်တဆီတက့ၢ်.

ကြုၢ်တုကီၢ်ဆၣ်ကညီပိာ်မုၣ်ကရၢ (KWO) ကရၢဖိဒုးသ့ၣ်ညါ KHRG ဘၣ်ဃးတၢ်ကဲထီၣ်သးအဂ့ၢ်တခါအံၤန့ၣ်လီၤ. ဖဲလါအီးကထိဘၢၣ် ၂၄ သီ, ၂၀၂၃ နံၣ်န့ၣ် (KHRG ပျီပူၤပှၤမၤနီၣ်မၤဃါပှၤဂ့ၢ်ဝီခွဲးယာ်တဂၤ) မၤတၢ်ထံၣ်လိာ်သံကွၢ်တၢ်ဒီး KWO ကရၢဖိတဂၤဒီး ထံၣ်လိာ်တဲသကိးဘၣ်စ့ၢ်ကီးတၢ်ဒီး ပှၤတူၢ်ဘၣ်တၢ် (၂) ဂၤလၢအမ့ၢ် နီၣ်ဘ--- (ဒီး နီၢ်အ--- အံၤဖဲတၢ်လီၢ် ဘံၣ်ဘၢတတီၤလၢ KWO သုးကျဲၤပာ်လီၤန့ၢ်အဝဲသ့ၣ်အလီၢ်န့ၣ်လီၤ. ဖဲလါအီကူး ၂၀၂၄ နံၣ်န့ၣ် KHRG ပျီပူၤပှၤမၤနီၣ်မၤဃါ ပှၤဂ့ၢ်ဝီခွဲးယာ်တဂၤအံၤ မၤတၢ်ထံၣ်လိာ်သံကွၢ်တၢ်အသီတဘျီဒီး KWO ကရၢဖိတဂၤလီၢ်လီၢ်ဝဲအံၤန့ၣ်လီၤ.)

၂. ကွဲးနီၣ်ၦၤလၢဟ့ၣ်တၢ်ဂ့ၢ်အံၤတဂၤစုာ်စုာ်သ့ၣ်ညါ တၢ်ဂ့ၢ်အံၤအမ့ၢ်အတီလၢကျဲဒ်လဲၣ်.

တၢ်ဂ့ၢ်တၢ်ကျိၤသ့ၣ်တဖၣ်အံၤ ဘၣ်တၢ်ဟ့ၣ်ခီဟ့ၣ်နီၤလီၤ (ဒီးမၤလီၤတံၢ်လီၤမံ) အီၤခီဖျိ နီၢ်ဘ--- ဒီး KWO ကရၢဖိလၢအဆီၣ်ထွဲ မၤစၢၤပှၤတူၢ်ဘၣ်တၢ်ဖိ (၂) ဂၤ အံၤဖဲတၢ်ကဲထီၣ်သးဝံၤအဆၢကတီၢ်န့ၣ်လီၤ.

ပာ်ဖျါတၢ်ကဲထီၣ်သးအဂ့ၢ်အကျိၤလၢလၢပှဲၤပှဲၤတက့ၢ်.

ဖဲလါစဲးပထ့ဘၢၣ် ၉ သီ, ၂၀၂၃ နံၣ် ကဘၣ်ဖဲ ဂီၤခီ ၁၂ နၣ်ရံၣ်အဆၢကတီၢ်န့ၣ် KNU/KNLA တၢ်မုာ်တၢ်ခုၣ်ကီၣ်ကးကရၢ (KNU/KNLA-PC) သုးဖိ စီၤသါစိတဂၤအံၤ ဖီၣ်ဆူၣ်မၤတရီတပါဝဲ ဖိသၣ်ပိာ်မုၣ်ဖိ နီၢ်ဘ--- လၢအသးနံၣ်အိၣ်ဒၣ်ထဲ (၁၆) နံၣ်ဧိၤတဂၤအံၤန့ၣ်လီၤ. နီၢ်ဘ--- ပာ်ဖျါထီၣ်တၢ်ကဲထီၣ်သးအဂ့ၢ်ဆူ KWO အအိၣ် ဘၣ်ဃးတၢ်ဖီၣ်ဆူၣ်မၤတရီတပါအီၤကဲထီၣ် သးအဂ့ၢ် ဖဲပှၤမၤကမၣ်တၢ်အဟံၣ်ပူၤ ဒီး အဝဲဂုာ်ကျဲၤစၢးလၢကပူၤဖျဲးထီၣ်ကွံာ်ဘၣ်ဆၣ် မၤဝဲတန့ၢ်ဘၣ်န့ၣ်လီၤ. (တၢ်ကဲထီၣ်သး ဖဲ လၢအဝဲလဲၤသူအ့ထၢၤနဲၣ် လၢပှၤမၤကမၣ်တၢ်အဟံၣ်ပူၤအဆၢကတီၢ်န့ၣ်လီၤ.)  ပှၤအဂၤတအိၣ်လၢဟံၣ်ပူၤနီတဂၤဘၣ်အဃိ ပှၤထံၣ်ထွဲတၢ်ကဲထီၣ်သးတအိၣ်ဘၣ်န့ၣ်လီၤ.

တချုးလၢစီၤသါစိ ဖီၣ်ဆူၣ် နီၢ်ဘ---ဒံးဘၣ်န့ၣ် အဝဲမၤတရီတပါသွံၣ်ထံးမုၣ်ခွါတၢ်ဂ့ၢ် (ဒီး ဂုာ်ကျဲးစၢးဖီၣ်ဆူၣ်) စ့ၢ်ကီးနီၢ်ဘ---အသကိးမုၣ် နီၢ်အ--- လၢကျဲကပၤ တၢ်လီၢ်လၢအဘူးဒီးသဝီတတီၤ ဖဲလါအ့ဖြ့ၣ် ၂၄ သီ, ၂၀၂၃ နံၣ် ကဘၣ်ဖဲ ဟါခီ ၁၁ နၣ်ရံၣ်အဆၢကတီၢ်န့ၣ်လီၤ. စီၤသါစိဖီၣ်ဆူၣ်နီၣ်အ--- မ့ၢ်တချုးဘၣ်ဆၣ် ဖီၣ်အနုၢ် ဒီးနၢမူဝဲချုးန့ၣ်လီၤ. ခီဖျိလၢနီၢ်အ--- ပာ်ဖျါထီၣ်တၢ်ဂ့ၢ်တဘူၣ်ဘၣ်အဃိ (တချုးဒံးလၢ လါစဲးပထ့ဘၢၣ် ၁၃ သီ, ၂၀၂၃ နံၣ်ဘၣ်န့ၣ်) တၢ်ဂ့ၢ်အံၤတအိၣ်ဖျါထီၣ်ဘၣ် ဘၣ်န့ၣ်လီၤ. (ဖဲနီၢ်အ--- နၢ်ဟူလၢ ပှၤမၤကမၣ်တၢ်တဂၤဃီအံၤ ဖီၣ်ဆူၣ်မၤကမၣ်စ့ၢ်ကီး နီၢ်ဘ---အဃိ အဝဲတဲဖျါထီၣ်ဒုးသ့ၣ် ညါ နီၢ်ဘ--- ဘၣ်ဃးအတၢ်လဲၤခီဖျိအဂ့ၢ်န့ၣ်လီၤ.)

စီၤသါစိဖီၣ်ဆူၣ်မၤတရီတပါ နီၢ်ဘ---ဝံၤအလီၢ်ခံ (ဒီးအဝဲသ့ၣ်ညါစ့ၢ်ကီးဝဲလၢ ပှၤတဂၤအံၤဂုာ်ကျဲးစၢးလၢကဖီၣ်ဆူၣ်နီၢ်အ---အဃိ) နီၢ်ဘ--- တဘၣ်သးဟ့ၣ်အဃၣ် ဒီးဘၣ်သးဃုထံၣ်န့ၢ်တၢ်တီတၢ်တြၢ်န့ၣ်လီၤ. ဖဲလါစဲးပထ့ဘၢၣ် ၁၀ သီ, ၂၀၂၃ နံၣ်န့ၣ်) နီၢ်ဘ--- ဂုာ်ကျဲးစၢးပာ်ဖျါထီၣ်တၢ်ဂ့ၢ်ဆူ KNU/KNLA-PC သုးရ့ၣ် (နီၣ်ဂံၢ် ၇၇၆) သုးရ့ၣ်ခိၣ် စၤတံၣ်မၤအအိၣ်ဘၣ်ဆၣ် အဝဲတအိၣ်လၢ အတၢ်လီၢ်ဘၣ်န့ၣ်လီၤ. ဖဲလါစဲးပထ့ဘၢၣ် ၁၃ သီ, ၂၀၂၃ နံၣ်န့ၣ် ပှၤတူၢ်ဘၣ်တၢ်ခံဂၤလၢာ် လဲၤပာ်ဖျါထီၣ် တၢ်ဂ့ၢ်ဆူ KWO အိၣ် ဒီးလဲၤပာ်ဖျါထီၣ်ဝဲတၢ်ဂ့ၢ်အံၤဆူ ကြုၢ်တုကီၢ်ဆၣ် ကညီဒီကလုာ်ပၢၤကီၢ်သုး (KNPF) အအိၣ်န့ၣ်လီၤ.

လီၢ်ကဝီၤ KWO ကရၢဖိ နီၢ်ဃ--- လၢအအိၣ်ဖဲ ဒ---သဝီ, ထံဂုၢ်သီကရူၢ်, ကြုၢ်တုကီၢ်ဆၣ် ပာ်ဖျါထီၣ်ဝဲဒ်အံၤ, “အခီၣ်ထံးန့ၣ် ပၢၤကီၢ် (KNPF) ကလဲၤဖီၣ်ပှၤမၤကမၣ်တၢ်စီၤသါစိတဂၤအံၤ ဘၣ်ဆၣ် (KNU/KNLA-PC) အသုးရ့ၣ်ခိၣ်  စၤတံၣ်မၤ တဲဝဲလၢ ‘အကဲယပှၤသုးဖိ’ အဃိ (ပၢၤကီၢ်တဖီၣ်အီၤလၢၤဘၣ်) ဒီး ဟဲက့ၤကဒါ. တဲစ့ၢ်ကီးဝဲလၢပှၤတဂၤအံၤမ့ၢ်အပှၤ. ဝံၤအလီၢ်ခံ ပ (KWO ဒီးပှၤတူၢ်ဘၣ်တၢ်) အိၣ်ခိးကနၣ်တၢ်ကစီၣ် ဘၣ်ဆၣ် (စၤတံၣ်မၤ) တတဲကဒါပှၤတၢ်ဂ့ၢ်နီတမံၤဘၣ်. ပှၤမ့ၢ်သံကွၢ်အီၤ (ဘၣ်ဃးပှၤမၤကမၣ်တၢ်တဂၤအံၤအဂ့ၢ်) ဘၣ်ဆၣ် အဝဲတတဲဆၢတၢ်နီတမံၤဘၣ်. ဝံၤအလီၢ်ခံ ပှၤမၤကမၣ်တၢ်တဂၤအံၤလီၤမၢ်. ဖဲပဟးသံကွၢ်ဘၣ်ဃးပှၤတူၢ်ဘၣ်တၢ်တဂၤအံၤအခါ ပနၢ်ဟူလၢအလဲၤဃ့ၢ်ထီၣ်လၢယိၤကီၢ်လံ.” KWO ကရၢဖိဒီးပှၤတူၢ်ဘၣ်တၢ် အဟံၣ်ဖိဃီဖိသ့ၣ်တဖၣ်ဆိကမိၣ်ဝဲလၢ ကြုၢ်တုၢ်ကီၢ်ဆၣ် KNPF ပၢၤကီၢ်တဖၣ် ဖီၣ်စီၤသါစိတဘူၣ်ဘၣ် မ့ၢ်လၢအမ့ၢ်သုးအဂၤ တဖု KNU/KNLA-PC သုးဖိ (တအိၣ်လၢ KNU တၢ်ပၢဆှၢဟီၣ်ကဝီၤပူၤဘၣ်) အဃိန့ၣ်လီၤ. KNPF ပၢၤကီၢ်မ့ၢ်မၤနီၣ်မၤဃါ တၢ်ဂ့ၢ်ဘၣ်ဆၣ် တၢ်ဟံးထီၣ်ဂ့ၢ်ဝီဆူညါတအိၣ်နီတမံၤဘၣ်န့ၣ်လီၤ.

ဖဲတၢ်ကဲထီၣ်သးအခါ စီၤသါစိၤအံၤ တဲပျံၤတဲဖုးပှၤတူၢ်ဘၣ်တၢ်ခံဂၤအံၤလၢ မ့ပာ်ဖျါထီၣ်တၢ်ဂ့ၢ်န့ၣ် ကမၤသံဝဲန့ၣ်လီၤ. ဖိသၣ်ပိာ် မုၣ်ဖိခံဂၤအံၤ (ပာ်ဖျါထီၣ်တၢ်ဂ့ၢ်လၢပၢၤကီၢ်အိၣ် ဒီး ပှၤမၤကမၣ်တၢ်အိၣ်ဘူးဒီးအဝဲသ့ၣ်အိၣ်တၢ်လီၢ်) ဝံၤအလီၢ်ခံ အဝဲသ့ၣ်ပျံၤ တၢ် ဒီးအိၣ်လၢဟံၣ်တဘူၣ်လၢၤဘၣ်န့ၣ်လီၤ. အဃိ လၢတၢ်ဘံၣ်တၢ်ဘၢအဂီၢ် KWO ဆီၣ်ထွဲမၤစၢၤဒီးကတဲၤကတီၤန့ၢ် တၢ်လီၢ်လၢ ပှၤတူၢ်ဘၣ်တၢ်အဂီၢ် ဖဲ KWO ဟံၣ်ကဒုလီၢ်တတီၤန့ၣ်လီၤ.

စးထီၣ်လၢပှၤတဖီၣ်ပှၤမၤကမၣ်တၢ်တဂၤအံၤဘၣ်အဃိ ပှၤတူၢ်ဘၣ်တၢ် (ဒီးအဟံၣ်ဖိဃီဖိ)တဖၣ် ဘၣ်ဘၣ်ယိၣ်တၢ်လၢအတၢ် ဘံၣ်တၢ်ဘၢအဂီၢ်န့ၣ်လီၤ. KWO ကရၢဖိဘၣ်သးလၢ လီၢ်ကဝီၤပှၤန့ၢ်စိန့ၢ်ကမီၤသ့ၣ်တဖၣ် ကဟံးထီၣ်ဂ့ၢ်ဝီပှၤမၤကမၣ်တၢ်တဂၤ အံၤန့ၣ်လီၤ.

ဒိးန့ၢ်အါထီၣ်တၢ်ဂ့ၢ်တၢ်ကျိၤဖဲ လါအီကူး ၂၀၂၄ နံၣ်

ဖဲလါအီကူး ၆ သီ, ၂၀၂၄ နံၣ်န့ၣ် KWO ကရၢဖိတဂၤ ဒုးသ့ၣ်ညါဘၣ် KHRG လၢ ပှၤမၤကမၣ်တၢ်တဂၤအံၤ လဲၤဃ့ၢ်ထီၣ်လၢ ယိၤကီၢ်လံအဃိ KNPF ပၢၤကီၢ်ဟံးထီၣ်ဂ့ၢ်ဝီဆူညါတသ့နီတမံၤလၢၤဘၣ်န့ၣ်လီၤ. (လဲၤထီၣ်ယိၤကီၢ်မုၢ်နံၤမုၢ်သီဖဲလဲၣ်န့ၣ် တသ့ၣ်ညါဘၣ်န့ၣ်လီၤ.) တချုးလၢပှၤတူၢ်ဘၣ်တၢ်လဲၤအိၣ်လၢအဘူးအတံၢ်လၢသဝီအဂၤတတီၤဒံးဘၣ်န့ၣ် အဝဲသ့ၣ်အိၣ်လၢ KWO ဟံၣ်ကဒုခံလါသၢလါန့ၣ်လီၤ. KWO ကရၢဖိ နီၢ်ဃ--- တဂၤအံၤအနီၢ်ကစၢ်ဒၣ်ဝဲ ဟ့ၣ်မၤစၢၤတၢ်အီၣ်တၢ်အီလၢ ပှၤတူၢ်ဘၣ်တၢ်ခံဂၤအံၤအဂီၢ် ဒီးအဝဲဃ့ထီၣ်ခိၣ်နၢ်သ့ၣ်တဖၣ်လၢ ကဟ့ၣ်မၤစၢၤပှၤတူၢ်ဘၣ်တၢ်ခံဂၤအံၤလၢအတၢ်အိၣ်မူအိၣ်ဂဲၤ တၢ်လိၣ်ဘၣ်သ့ၣ်တဖၣ်အဂီၢ်န့ၣ်လီၤ.  ပှၤတူၢ်ဘၣ်တၢ်တဖၣ် ဒိးန့ၢ်ဘၣ်တၢ်မၤစၢၤထဲလၢ KWO ကရၢဖိတဂၤအံၤအနီၢ်ကစၢ် တၢ်ဟ့ၣ်မၤစၢၤအအိၣ်ဒီး ဒိးန့ၢ်ဘၣ်တၢ်ဆီၣ်ထွဲမၤစၢၤလီၤလီၤဆီဆီလၢတၢ်လီၢ်ဂၤတအိၣ်နီတမံၤဘၣ်န့ၣ်လီၤ. နီၢ်အ--- အိၣ်ဒီး ခိၣ်နူာ်တဘၣ်လီၢ်ဘၣ်စးဘၣ် စးထီၣ်လၢအအိၣ်ဖျဲၣ်ထီၣ်လံၤလံၤလံန့ၣ်လီၤ. ပှၤတူၢ်ဘၣ်တၢ်ခံဂၤလၢာ် ဖံးအီၣ်မၤအီၣ်တၢ်မုၢ်ဆ့ၣ် မုၢ်ဂီၤ လၢတၢ်လုၢ်အီၣ်နီၢ်ခိသးသမူတနံၤဘၣ်တနံၤဂီၢ်န့ၣ်လီၤ.

မ့ၢ်ၦၤလၢအတူၢ်ဘၣ်တၢ်တဖၣ် ဟ့ၣ်ၦၤတၢ်ခွဲးတၢ်ယာ်လၢပကသူတၢ်ဂ့ၢ်တၢ်ကျိၤတခါအံၤဧါ, ဟ့ၣ်ၦၤတၢ်ခွဲးတၢ်ယာ်လၢ ပကသူ တၢ်ဂ့ၢ်အံၤလၢကျဲဒ်လဲၣ်.

KWO ကရၢဖိဟ့ၣ်ခီဟ့ၣ်နီၤလီၤတၢ်ဂ့ၢ်တၢ်ကျိၤသ့ၣ်တဖၣ်အံၤ ဒီးဟ့ၣ်စ့ၢ်ကီးတၢ်ပျဲလၢ KHRG ကသူတၢ်ဂ့ၢ်တၢ်ကျိၤသ့ၣ်တဖၣ် အံၤန့ၣ်လီၤ. (KHRG ပျီပူၤပှၤမၤနီၣ်မၤဃါပှၤဂ့ၢ်ဝီခွဲးယာ်တဲသကိးစ့ၢ်ကီးတၢ်ဒီး ပှၤတူၢ်ဘၣ်တၢ်ဖိတဖၣ်ဒီး ဒုးသ့ၣ်ညါအဝဲသ့ၣ် လၢတၢ်ကရၤလီၤတၢ်ဂ့ၢ်တၢ်ကျိၤသ့ၣ်တဖၣ်အံၤန့ၣ်လီၤ.)