English
ကညီကျိာ်
မြန်မာ
Print:တၢ်ဂီၤတၢ်ကစီၣ်တကတြူၢ်အံၤ ပာ်ဖျါထီၣ်ဝဲ တၢ်ဂီၤအတၢ်အုၣ်သးတဖၣ်လၢ အဘၣ်ဃးဒီး စုကဝဲၤတၢ်သဘံၣ်သဘုၣ်, သုးဖီၣ်စုကဝဲၤအတၢ်ဘၣ်ဂံာ်ဂူာ် ဒီး ခိၣ်ဃၢၤန့ဆၢၣ်အတၢ်ဂ့ၢ်ကီတဖၣ် ကဲထီၣ်သးအဃိ, ဒူသဝီဖိလၢ အအိၣ်လၢကီၢ်ပယီၤ မုၢ်ထီၣ်ကလံၤထံးသ့ၣ်တဖၣ် ဒ်သိးကအိၣ်ဒီး တၢ်လုၢ်အီၣ်နီၢ်ခိသးသမူ အလၢအပှဲၤအဂီၢ် ဘၣ်သဂၢၢ်ဝဲဒီး တၢ်ကီတၢ်ခဲတဖၣ် စးထီၣ်ဖဲလါဒံၣ်စဲဘၢၣ် ၂၀၂၃ နံၣ်,တုၤ လါဒံၣ်စဲဘၢၣ် ၂၀၂၄ နံၣ် အပူၤန့ၣ်လီၤ. တစူၤညါအံၤအတီၢ်အပူၤ, KHRG မၤန့ၢ်ဘၣ်ဝဲ တၢ်ဂ့ၢ်အါအါဂီၢ်ဂီၢ် လၢအိၣ်ဒီးတၢ်အုၣ်ကီၤတဖၣ်, လၢအဘၣ်ဃးဒီး တၢ်မၤဘၣ်ဒိပှၤဟီၣ်ခိၣ်ဖိခွဲးယာ်တဖၣ်လၢ သုးဖီၣ်စုကဝဲာ် မၤဝဲ ဒီး လီၤဆီဒၣ်တၢ် သုးကီၣ်ကး (SAC) အသုးဖိတဖၣ်မၤဝဲန့ၣ်, ပၣ်ဃုာ်ဒီး တၢ်မၤသံမၤဝီတၢ်, တၢ်ဖီၣ်ဒုးဃာ်လၢ အတဖိး သဲစးဘၣ်တဖၣ်, တၢ်မၤဒၢၣ်မၤလီၤတၢ်, တၢ်မၢဆူၣ်ဟးထီၣ်လၢအိၣ်ဆိးလီၢ်ကျဲဒီး တၢ်မၤဘၣ်ဒိ ဒူသဝီဖိအတၢ်လုၢ်အီၣ် နီၢ်ခိသးသမူထီရီၤသ့ၣ်တဖၣ်န့ၣ်လီၤ. ခီဖျိလၢ, တၢ်မၤနါစိၤသ့ၣ်တဖၣ်န့ၣ်အဃိ, လီၢ်ကဝီၤဒူသဝီဖိတဖၣ် ဘၣ်သဂၢၢ်ဒီးတၢ်သံ ဘၣ်ပှၢ်, ဒီး တၢ်ဘၣ်ဒိၣ်ဘၣ်ထံးတဖၣ်, တကးဒ်ဘၣ်, တၢ်ထူၣ်တၢ်ဘိ ဒီး တၢ်ချံတၢ်သၣ်တဖၣ်ဟးဂီၤ, ဆၣ်ဖိကီၢ်ဖိ ဘုၣ်အီၣ်တဖၣ်ဘၣ်ဒိသံကွံာ်, ဂံၢ်ခီၣ်ထံးတၢ်လုၢ်အီၣ်နီၢ်ခိသးသမူအပီးအလီ ဒီး စုလီၢ်ခီၣ်ခိၣ်သ့ၣ်တဖၣ်ဘၣ် ဟးဂီၤကွံာ် လၢန့ၣ်အမဲာ်ညါ, ဒုးအိၣ်ထီၣ်ဝဲ တၢ်သးဝံၤလီၤဒိသ့ၣ်တဖၣ်န့ၣ်လီၤ. သုးဖီၣ်စုကဝဲၤတၢ်ဘၣ်ဂံာ်ဂူာ် ဒီး (SAC) အသုးဖိတဖၣ် အတၢ်ဂဲၤလိာ်ဒီး မၤနါစိၤတၢ်တဖၣ်အဃိ, ဒုးအိၣ်ထီၣ်တၢ်ဂ့ၢ်ကီလၢ သဝီဖိတဖၣ် အတၢ်ဘံၣ်တၢ်ဘၢအဂီၢ်, တၢ်လုၢ်အိၣ်နီၢ်ခိသး သမူအဂီၢ်, ဒီး တၢ်လဲၤထီၣ်က့ၤလီၤသဘျ့သ့ၣ်တဖၣ်အဂီၢ် ဒီး တၢ်အီၣ်တၢ်အီတလၢတလီၣ်ဘၣ် အတၢ်ဂ့ၢ်ကီသ့ၣ်တဖၣ်န့ၣ် လီၤ. တကးဒ်ဘၣ်အမဲာ်ညါ, သဝီဖိသ့ၣ်တဖၣ် ဘၣ်သဂၢၢ်ဝဲဒီး ခိၣ်ဃၢၤန့ဆၢၣ်တၢ်တတၢၢ်တနါတဖၣ် ဒ်အမ့ၢ်, ထံဒိၣ်ဃိၣ်ယွၤ, ဒီး တၢ်ဖိလံၤဖိဃၢ်အတၢ်မၤဟးဂီၤဘုဟုတၢ်ထူၣ်တၢ်ဘိ သ့ၣ်တဖၣ်အဃိ, ဒုးနးဒိၣ်ထီၣ်ဝဲတၢ်အိၣ်သးလၢ လီၢ်ကဝီၤပှၤတဝၢ အါမးအပူၤန့ၣ်လီၤ. လၢတၢ်တၤတၢ်ဒီး တၢ်ဂ့ၢ်ကီသ့ၣ်တဖၣ်အံၤ အပူၤဒၣ်လဲာ်, ဒ်သိးကအိၣ်ဒီး တၢ်လုၢ်အီၣ်နီၢ်ခိသးသမူ အလၢအပှဲၤအဂီၢ်, ဒ်ကျဲဘှါရှဲတဘိအသိး, လီၢ်ကဝီၤဒူသဝီဖိတဖၣ် ကူဆါက့ၤ အတၢ်ဘုၣ်အီၣ် လၢအဘၣ်ဒိသ့ၣ်တဖၣ် ဒီး ဃ့ၢ်အိၣ်မှံကွံာ်ဝဲတစိၢ်တလီၢ် သ့ၣ်တဖၣ်န့ၣ်လီၤ.
တၢ်ဂီၤတၢ်ကစီၣ်, ခီဖျိလၢသုးအတၢ်ဂဲၤလိာ်တဖၣ်အဃိ, လီၢ်ကဝီၤကမျၢၢ်ဖိ ဖဲကီၢ်ပယီၤမုၢ်ထီၣ်ကလံၤထံးတဖၣ် အတၢ်လုၢ်အီၣ် နီၢ်ခိသးသမူ ဘၣ်ဟးဂုာ်ဟးဂီၤ (ဖဲလါဒံၣ်စဲဘၢၣ် ၂၀၂၃ နံၣ်, တုၤ လါဒံၣ်စဲဘၢၣ် ၂၀၂၄ နံၣ်)
ဖဲ ၂၀၂၄ နံၣ်အပူၤ, လီၢ်ကဝီၤဒူသဝီဖိသ့ၣ်တဖၣ်လၢ အအိၣ်လၢ (ကီၢ်ပယီၤ)မုၢ်ထီၣ်ကလံၤထံးတကပၤတဖၣ် ဒ်သိးအဝဲသ့ၣ်ကအိၣ်ဒီး တၢ်လုၢ်အီၣ်နီၢ်ခိသးသမူလၢ အလၢပှဲၤအဂီၢ် ဘၣ်ဂဲၤလိာ်ဝဲသပှၢ်ပှၢ်န့ၣ်လီၤ. ဖဲလါဒံၣ်စဲဘၢၣ် ၂၀၂၃ နံၣ်, တုၤ လါဒံၣ်စဲဘၢၣ် ၂၀၂၄ နံၣ်န့ၣ်, KHRG ဒိးန့ၢ်ဘၣ်ဝဲ တၢ်ဂီၤ (၁၇၄၃) ဘ့ၣ်, လၢအပၣ်ဃုာ်ဒီး တၢ်အုၣ်ကီၤတၢ်မၤနီၣ်မၤဃါ တဖၣ်, လၢအဘၣ်ဃးဒီး တၢ်ဂ့ၢ်ကီကဲထီၣ်သး ခီဖျိ, ထံကီၢ်တၢ်ပၢတၢ်ပြးကီၣ်ကးကရၢ (SAC) အတၢ်မၤပယွဲနါစိၤတၢ်, သုးဖီၣ်စုကဝဲၤ တၢ်သဘံၣ်သဘုၣ် ဒီး ခိၣ်ဃၢၤန့ဆၢၣ် တၢ်တတၢၢ်တနါကဲထီၣ်သး သ့ၣ်တဖၣ်အဃိန့ၣ်လီၤ. ပယီၤသုးမီၤစိရိၤ တဖၣ် စဲးမၤဒံးဝဲ သုးအတၢ်ဟူးတၢ်ဂဲၤလၢ အဆှုၣ်မဲာ်ကဲာ်မဲာ်သ့ၣ်တဖၣ် ဒ်အမ့ၢ် တၢ်ဟဲခးလီၤတၢ်ဒီးကဘီယူၤ, ဒီး တၢ်ခးလီၤနါစိၤကျိဖးဒိၣ်, လၢလီၢ်ကဝီၤကမျၢၢ်အိၣ်ဆိးလီၢ်ကျဲ, တကဒ်းဘၣ်, ပညိၣ်ခးဃုာ်ဒီး ဒူသဝီ, စံာ်ကျါခုးကျါ, တၢ်သူၣ်အီၣ်ဖျးအီၣ်လီၢ်, ပှၤတဝၢတၢ်ဃုအီၣ်ဃာ်အီၣ်လီၢ် ဒီး ကျဲမုၢ်ကျဲဘိ သ့ၣ်တဖၣ်န့ၣ်လီၤ. SAC ပယီၤသုးအတၢ်မၤ တတၢၢ်တနါတၢ်သ့ၣ်တဖၣ် ပၣ်ဃုာ်ဝဲဒီး တၢ်မၤအၢမၤနး ပှၤထူစံာ်ဖိတဖၣ်, တၢ်မၤတံာ်တာ်ကီခဲထီၣ်တၢ်လဲၤတၢ်က့ၤ ဒီး တၢ်ဟံန့ၢ်ဆူၣ်ဂုာ်န့ၢ်ဆူၣ်သဝီဖိတၢ် သ့ၣ်တဖၣ်န့ၣ်လီၤ. တၢ်ကဲထီၣ်သးအိၣ်စ့ၢ်ကီးဝဲဒၣ်စှၤခါလၢ ပှၤဖီၣ်စုကဝဲၤတဖၣ်မၤဝဲ ဒ်အမ့ၢ် ကီၢ်သူလ့ၤသုးမုၢ်ဒိၣ် (KTLA) သုးဖီၣ်စုကဝဲၤတဖၣ် မၤဝဲန့ၣ်လီၤ. တၢ်မၤတတၢၢ်တနါတၢ်သ့ၣ်တဖၣ်အံၤ ဒုးအိၣ်ထီၣ်ကမျၢၢ် တၢ်ဘၣ်သံဘၣ်ပှၢ်တဖၣ်, တကးဒ်ဘၣ် ကဲထီၣ်တၢ်ဟးဂုၤဟးဂီၤ တၢ်သူၣ်ထီၣ်ဘှီထီၣ်တဖၣ်, တၢ်လုၢ်အီၣ်နီၢ်ခိသးမူဂီၢ်ပီးလီ လၢလိၣ်ဘၣ်တဖၣ်, လၢန့ၣ်အမဲာ်ညါ, ဟံၣ်ဃီ, ဘုဖီ, ဟံၣ်ဃီပီးလီ, စ့, ဆၣ်ဖိကီၢ်ဖိတၢ်ဘုဒၢ, စံာ်ပျီ, တၢ်သူၣ်အီၣ်ဖျးအီၣ်လီၢ်, ဒီး ထူစံာ်ဂီၢ်ပီးလီ, တၢ်လဲၤတၢ်က့ၤဂီၢ်ပီးလီတဖၣ် ဒီး လီၢ်ကဝီၤမုၢ်ကျိၤဝဲၤကွာ် ဒီး တၢ်မၤလီၢ်သ့ၣ်တဖၣ်န့ၣ်လီၤ.[1] တၢ်ကီတၢ်ခဲအိၣ်ဝဲဒၣ်ဘၣ်ဆၣ်သနာ်က့, ဒူသဝီဖိတဖၣ် ဒ်သိးအဝဲသ့ၣ် တၢ်လုၢ်အီၣ်နီၢ်ခိသးမူ ကလၢကလီၣ်အဂီၢ် ကူဆါယါဘျါက့ၤ ဆၣ်ဖိကီၢ်ဖိအတၢ်ဘုၣ်ဒၢလၢ အဘၣ်ဒိတ့ၢ်သ့ၣ်တဖၣ်, လဲၤစိာ်က့ၤအတၢ်ဖိတၢ်လံၤ, တၢ်အီၣ်တၢ်အီ ဒီး တၢ်ပီးတၢ်လီသ့ၣ်တဖၣ်လၢ တၢ်ဃ့ၢ်အိၣ်မှံအလီၢ်, လဲၤဃ့ၢ်အိၣ် က့ၤလၢ အတၢ်ဖံးအီၣ်မၤအီၣ်လီၢ်, ဂုာ်ကွံာ်ဝဲဟံၣ်ဃီလၢ မ့ၣ်အူအီၣ်တဖၣ် ဒ်သိးကဒိးန့ၣ်ဘၣ်က့ၤ တၢ်ဖိတၢ်လံၤတနီၤနီၤအဂီၢ် ဒီး ထၢဖှိၣ်ပာ်ဖှိၣ်က့ၤတၢ်ဖိတၢ်လံၤလၢအတအူအီၣ်ဒီး အိၣ်တ့ၢ်က့ၤတဖၣ် လၢတၢ်လုၢ်အီၣ်နီၢ်ခိသးသမူ ခါဆူမဲာ်ညါအဂီၢ် န့ၣ်လီၤ. တၢ်ဂီၤတၢ်ကစီၣ်တကတြူၢ်အံၤ, တၢ်ဂီၤပၣ်ဃုာ်ခဲလၢာ် အဘ့ၣ် (၈၀) , လၢတၢ်ဃုရ့ထၢထီၣ်န့ၢ်ဝဲ ဖဲကညီကီၢ်စဲၣ်ပူၤ, လၢကီၢ်ရ့ၣ်နွံဘ့ၣ်လၢအမ့ၢ်, ဒူသထူၣ်, တီအူ, ချၢၣ်လွံၢ်ထူၣ်, ဘျံးဒဝဲၢ်, မုၢ်တြီၢ်, ဒူပျာ်ယာ် ဒီး ဖၣ်အၣ်ကီၢ်ရ့ၣ် သ့ၣ်တဖၣ်န့ၣ်လီၤ. တၢ်ဂီၤတနီၤအကျါန့ၣ်, ဘၣ်တၢ်ဒိန့ၢ်အီၤလၢ လီၢ်ကဝီၤသဝီဖိတဖၣ် ဒီးအဂၤတဖၣ်န့ၢ် တၢ်ဒိန့ၢ်အီၤလၢ KHRG ပျီပူၤပှၤမၤတၢ်ဖိ လၢအမ့ၢ်ဝဲလီၢ်ကဝီၤဖိတဖၣ်လၢ တၢ်သိၣ်လိဃာ်အဝဲသ့ၣ်လၢ ကမၤနီၣ်မၤဃါဝဲ တၢ်မၤဘၣ်ဒိဝဲပှၤဟီၣ်ခိၣ်ဖိခွဲးယာ်လၢ အဟဲကဲထီၣ်အသးလၢ အလီၢ်ကဝီၤအပူၤတဖၣ်န့ၣ်လီၤ. လၢအတၢ်ဘံၣ်တၢ်ဘၢအဂီၢ် ပှၤတူၢ်ဘၣ်တၢ်ဖိ အမံၤအသၣ်, အဂီၤ ဒီး အအိၣ်ဆိးလီၢ်ကျဲသ့ၣ်တဖၣ် ဘၣ်တၢ်မၤလီၤဘၢဃာ်အီၤန့ၣ်လီၤ. တၢ်ဂီၤတကတြူၢ်အံၤ ပာ်ဖျါထီၣ်ဝဲ တၢ်ဂ့ၢ်ကီလၢ အဟဲအိၣ်ထီၣ်လၢ ဒူဖိသဝီဖိ တၢ်လုၢ်အီၣ်နီၢ်ခိသးသမူအဂီၢ် လၢကတီၢ်ခဲအံၤအပူၤမ့ၢ်ဂ့ၤ ကတီၢ်ယံာ်အပူၤမ့ၢ်ဂ့ၤန့ၣ်လီၤ.
တၢ်ဂီၤသ့ၣ်တဖၣ်အံၤ တၢ်ဒိန့ၣ်အီၤဖဲ လါယနူၤအါရံၤ, ၂၀၂၄ နံၣ်, ဖဲ ဒ--- သဝီ, ဒ့လိာ်မုၢ်နုာ်ကရူၢ်, ထီတထူၣ်ကီၢ်ဆၣ်, တီအူကီၢ်ရ့ၣ် အပူၤန့ၣ်လီၤ. ဖဲလါယနူၤအါရံၤ ၈ သီ, ၂၀၂၄ နံၣ်, ဖဲဟါခီ ၆ နံၣ်ဃၣ်ဃၣ်ကတီၢ်, ကညီဒီကလုာ်တၢ်ထူၣ်ဖျဲးသုးမုၢ်ဒိၣ် (KNLA) ဒီး (PDF) ကမျၢၢ်သုးပာ်ဖှိၣ်အသုးဖိတဖၣ် လဲၤခးဝဲ ပယီၤသုး (SAC) အသုးကလၢၤ လၢအအိၣ်ဆီလီၤအသးဖဲ လွံၢ်မံးလာ် (၄-မံးလာ်) လၢမ့ၢ် (ခလရ) (နီၣ်ဂံၢ်-၃၉) အသုးကလၢၤန့ၣ်လီၤ. ဖဲလါယနူၤအါရံၤ အသီ ၁၀ န့ၣ်, ပယီၤသုး (ခလရ) (နီၣ်ဂံၢ်-၃၉) အသုးဖိတဖၣ် နုာ်လီၤဝဲလၢ ဒ---သဝီ, အပူၤဒီး ဒွဲၣ်အူကွံာ်ဝဲ ဒူသဝီဖိအဟံၣ်ဃီ (၁၇) ဖျၢၣ်န့ၣ်လီၤ. တၢ်ဂီၤလၢ စုစ့ၣ်တဘ့ၣ်အံၤ ပာ်ဖျါထီၣ်ဝဲ သဝီဖိဟံၣ်ဃီတဖျၢၣ်လၢ အအူအီၣ်ဟးဂီၤကွံာ်ဝဲ န့ၣ်လီၤ. ဟံၣ်ကစၢၢ် လၢအဟံၣ်အူအီၣ်ကွံာ်တဖၣ်မ့ၢ်ဝဲ ကၠီၤဃ---, စီၤခၠ---, ဂ---, ဟ---, ဧ---, သ---, က---, နီၢ်လ---, နီၢ်မ---, စီၤန---, ဝ---, ပ---, စီၤခ---, ကၠီၤရ---, စီၤစ---, စီၤတ---, ပၠ--- တဖၣ်န့ၣ် လီၤ. (တၢ်ဂီၤ- KHRG)
KHRG ဒိးန့ၣ်ဘၣ်ဝဲတၢ်ဂီၤတဘ့ၣ်အံၤဖဲ လါဖ့ၤဘြူၤအါရံၤ ၂၉ သီ, ၂၀၂၄ နံၣ်အပူၤန့ၣ်လီၤ. တၢ်ဂီၤအံၤ တၢ်ဒိန့ၣ်အီၤဖဲ အအ---သဝီ, ခ့ၣ်ကၠံဟီၣ်ကဝီၤလီၤဆီ, မူကီၢ်ဆၣ်, ချၢၣ်လွံၢ်ထူၣ်ကီၢ်ရ့ၣ်အပူၤ န့ၣ်လီၤ. တၢ်ဂီၤအံၤပာ်ဖျါထီၣ်ဝဲ ဖဲလါဖ့ၤဘြူၤအါရံၤ ၁၇ သီ, ၂၀၂၄ နံၣ်န့ၣ်, (SAC) သူဝဲဒြိဒီးတ့ၢ်လီၤမ့ၣ်ပိၢ်အဃိ ဘၣ်အူထီၣ်ဟးဂီၤ ကွံာ်ဝဲ သဝီဖိဟံၣ်ဃီတဖျၢၣ် ဃုာ်ဒီးတၢ်ပိးတၢ်လီလၢအပူၤတဖၣ် ခဲလၢာ်န့ၣ်လီၤ. (တၢ်ဂီၤ- လီၢ်ကဝီၤသဝီဖိ)
တၢ်ဂီၤသ့ၣ်တဖၣ်အံၤ တၢ်ဒိန့ၢ်အီၤ ဖဲလါမးရှး ၂၀၂၄ နံၣ်, ဖဲကီးတရံး ကီၢ်ဆၣ်, ဒူပျာ်ယာ်ကီၢ်ရ့ၣ် ဒီး တန့ဆါကီၢ်ဆၣ်, ဖၣ်အၣ်ကီၢ်ရ့ၣ် အဘၢၣ်စၢၤဖဲ မၠိသ့ၣ်ဝ့ၢ်န့ၣ်လီၤ. တၢ်ဂီၤအံၤပာ်ဖျါ ထီၣ်ဝဲ, ဖဲလါမးရှး ၅ သီ, ၂၀၂၄နံၣ်, တၢ်ဒုးကဲထီၣ်လၢ (SAC) သုးဖိတဖၣ်ဒီး သုးပာ်ဖှိၣ် (KNLA) ဒီး (PDF)အဘၢၣ်စၢၤအဃိ, (SAC) ပယီၤသုး ကဘီယူၤဟဲတ့ၢ်လီၤဝဲမ့ၣ်ပိၢ်အဃိ, သဝီဖိဟံၣ်ဃီတဖၣ်ဘၣ်ဟးဂုာ် ဟးဂီၤကွံာ်ဝဲ အဂီၤန့ၣ်လီၤ. (တၢ်ဂီၤ- KHRG)
တၢ်ဂီၤလၢအအိၣ်ဖျါဖဲစုစ့ၣ်တဘ့ၣ်အံၤ, ဘၣ်တၢ်ဒီန့ၣ်အီၤဖဲ အသ--- သဝီ, ဘီသ့ၣ်ထၣ်ကရူၢ်, လူၢ်သီကီၢ်ဆၣ်, မုၢ်တြီၢ်ကီၢ်ရ့ၣ်အပူၤ ဖဲလါမးရှး ၂၀၂၄ နံၣ် န့ၣ်လီၤ. စးထီၣ်ဖဲ ဖဲလါမးရှး ၁၉ သီ တုၤ ၁၅သီ, ၂၀၂၄ နံၣ်န့ၣ်, (SAC) ပယီၤသုးခးလီၤနါစိၤကျိဖးဒိၣ်ဒီး ဟဲခးလီၤတၢ်ဒီးကဘီယူၤလၢ ဘီသ့ၣ်ထၣ်ကရူၢ်, သဝီတဖၣ်အပူၤ, တၢ်ဖံးအီၣ်မၤအီၣ်လီၢ် ဒီး ကျဲမုၢ်ကျဲဘိတဖၣ်အပူၤအဃိ, သဝီဖိ တဖၣ် တူၢ်ဘၣ်ဝဲဒၣ်လၢ တၢ်ဘံၣ်တၢ်ဘၢတအိၣ်လၢ ကက့ၤအိၣ်လၢ အဒူသဝီပူၤဘၣ်, လၢန့ၢ်အမဲာ်ညါ, လၢတၢ်လုၢ်အီၣ်နီၢ်ခိသးသမူ အဂီၢ်စ့ၢ်ကီး ကဲထီၣ်ဝဲတံာ်တာ်တဖၣ်န့ၣ်လီၤ. တၢ်ဂီၤအံၤပာ်ဖျါထီၣ်ဝဲ ဖဲလါမးရှး ၂၁ သီ, ဖဲဖးဖီမုၢ်ကတီၢ်, (SAC) ကဘီယူၤဒုးသုးတဘ့ၣ် ဟဲတ့ၢ်လီၤမ့ၣ်ပိၢ်လၢ အသ--- သဝီပူၤဒီး ဘၣ်ဟးဂုာ်ဟးဂီၤ ဟံၣ်ဃီ ၄ ဖျၢၣ်အကျါ, ပာ်ဖျါထီၣ်ဝဲ ဟံၣ်တဖျၢၣ်လၢ အဘၣ်လီၤပှီၢ် ဟးဂီၤကွံာ်ဝဲ အဂီၤန့ၣ်လီၤ. ဟံၣ်ကစၢ်တဖၣ်အမံၤမ့ၢ်ဝဲ နီၢ်အက---, အလ---, အမ---ဒီး အန---တဖၣ်န့ၣ်လီၤ. (တၢ်ဂီၤ- KHRG)
တၢ်ဂီၤ ၂ ဘ့ၣ်အံၤဘၣ်တၢ်ဒိန့ၢ်ဖဲ လါမးရှး ၂၀၂၄ နံၣ်, ဖဲဝ့ၢ်ဖၣ်ပူၣ်, မုၢ်တြီၢ်ကီၢ်ရ့ၣ်အပူၤန့ၣ်လီၤ. ဖဲလါမးရှး ၂၄ သီ, ၂၀၂၄ နံၣ်န့ၣ်, တၢ်ဒုးကဲထီၣ်လၢ (SAC) ပယီၤသုးလၢၤ လၢအိၣ်ဖဲဝ့ၢ်ဖၣ်ပူၣ် ဒီး (KNLA) သုးပာ်ဖှိၣ်တဖၣ်အဘၢၣ်စၢၤအဃိ, (SAC) ကဘီယူၤဟဲခးလီၤ တၢ်လၢသဝီဖိဟံၣ်ဃီတဖၣ်ဒီး တၢ်ဆါတၢ်ကျး တၢ်သူၣ်ထီၣ်တဖၣ် ဖဲဝ့ၢ်ဖၣ်ပူၣန့ၣ်လီၤ. ဖဲတၢ်ကဲထီၣ်သးဝံၤအလီၢ်ခံ, တၢ်လဲၤဒိန့ၢ်ဝဲ တၢ်ဂီၤတဖၣ်အံၤန့ၣ်လီၤ. တၢ်ဂီၤတဖၣ်အံၤပာ်ဖျါထီၣ်ဝဲ သဝီဖိအဟံၣ်ဃီလၢအိၣ်လီၤတဲၤ ဟးဂုာ်ဟးဂီၤကွံာ်ဝဲသ့ၣ်တဖၣ်အဂီၤန့ၣ်လီၤ. (တၢ်ဂီၤ- KHRG)
တၢ်ဂီၤတဘ့ၣ်လၢအအိၣ်လၢ စုစ့ၣ်တကပာ်အံၤ တၢ်ဒိန့ၢ်အီၤဖဲ လါမးရှး ၂၀၂၄ နံၣ်, ဖဲဘ--- သဝီ, ဝီၢ်ရီကရူၢ်, သထူၣ်ကီၢ်ဆၣ်, ဒူသထူၣ်ကီၢ်ရ့ၣ်အပူၤန့ၣ်လီၤ. SAC ခီၣ်ချ့သုး (ခမရ) နီၣ်ဂံၢ် (၉) (အိၣ်ဆီလီၤသးဖဲ စွ့ၤယီၤပၠၤကရူၢ်, လၢအမ့ၢ် ပဝသုးကလၢၤ) အံၤ ခးလီၤဝဲကျိဖးဒိၣ် ၃ ဖျၢၣ်ဆူ ဘ--- သဝီအပူၤ ဖဲလါမးရှး ၂၀၂၅ နံၣ် အပူၤန့ၣ်လီၤ. တၢ်ဂီၤအံၤပာ်ဖျါထီၣ်ဝဲ သဝီဖိ နီၢ်ဆ--- တဂၤ အဟံၣ်ဃီ, တပၢၤဒီး သဘံၣ်လီခီတဖၣ် ဘၣ်ဟးဂုာ်ဟးဂီၤကွံာ်ဝဲ ခီဖျိ, ကျိဖးဒိၣ်အက့ဖျိးဘၣ်ဝဲန့ၣ်လီၤ. (တၢ်ဂီၤ- KHRG)
တၢ်တဘ့ၣ်အံၤဘၣ်တၢ်ဒိန့ၣ်အီၤ ဖဲလါမ့ၤ ၂၀၂၄ နံၣ်, ဖဲအပ--- သဝီ, မီမယွၤသ့ၣ်ကရူၢ်, ကီးတရံးကီၢ်ဆၣ်, ဒူပျာ်ယာ်ကီၢ်ရ့ၣ်အပူၤ န့ၣ်လီၤ. တၢ်ဂီၤအံၤ ပာ်ဖျါထီၣ်ဝဲ ဖဲလါမ့ၤ ၁၈ သီ, ၂၀၂၄ နံၣ်, SAC ပယီၤသုး ဟဲတ့ၢ်လီၤဝဲမ့ၣ်ပိၢ်လၢ အပ--- သဝီပူၤဒီး သဝီဖိတဂၤ အဟံၣ်, ဃုာ်ဒီး တၢ်အိၣ်လၢဟံၣ်ပူၤတဖၣ် ဒီး တၢ်လုၢ်အီၣ်နီၢ်ခိသး သမူအဂီၢ် တၢ်ပီးလီလၢ အလိၣ်ဘၣ်နီၢ်နီၢ်သ့ၣ်တဖၣ် ဘၣ်ဟးဂုၤဟးဂီၤကွံာ်ဝဲ ခဲလၢာ်စီပျီ အဂီၤန့ၣ်လီၤ. ဟံၣ်ဃီအါဖျၢၣ် ဘၣ်ဟးဂီၤ အိၣ်စ့ၢ်ကီးဝဲ ဖဲတၢ်ကဲထီၣ်သးအပူၤန့ၣ်လီၤ. (တၢ်ဂီၤ- KHRG)
KHRG ဒိးန့ၣ်ဘၣ်ဝဲတၢ်ဂီၤသ့ၣ်တဖၣ်အံၤ ဖဲလါစဲးပထ့ဘၢၣ် ၂၉ သီ, ၂၀၂၄ နံၣ်, ဖဲအခၠ--- သဝီ, ပလီဟီၣ်ကဝီၤ, လၢၢ်မုၢ်လါကီၢ်ဆၣ်, ဘျံးဒဝဲၢ်ကီၢ်ရ့ၣ်အပူၤန့ၣ်လီၤ. ဖဲလါစဲးပထ့ဘၢၣ် ၁၄ သီ, ၂၀၂၄ နံၣ်, SAC အသုးဖိ ၁၀၀ ဂၤဃၣ်ဃၣ်တဖၣ် လၢအမ့ၢ်ခီၣ်သုးရ့ၣ် (ခလရ) နီၣ်ဂံၢ် (၂၈၅) အံၤ စးထီၣ်ဟူးဂဲၤဝဲဖဲ ပလီဟီၣ်ကဝီၤဒီး အဝဲသ့ၣ် ဘၣ်သဂၢ်လိာ်အသးဒီး တၢ်ပၢၢ်ဆၢသုးဖိတဖၣ်အဃိ, တၢ်ဒုးကဲထီၣ်ဝဲ ဖဲန့ၣ်န့ၣ်လီၤ. တၢ်ဒုးကဲထီၣ်ဝံၤအလီၢ်ခံ, SAC အသုးဖိတဖၣ် နုာ်လီၤဒွဲၣ်အူကွံာ်ဝဲ သဝီဖိဟံၣ်ဃီ အဖျၢၣ် ၆၀ ဘျဲၣ်ဒီး သမံသမိးတၢ်, ဖီၣ်န့ၢ်ဆူၣ်တၢ်ဒီး မၤဒၢၣ်မၤလီၤတၢ် လၢသဝီ ပူၤစးထီၣ်လၢ လါစဲးပထ့ဘၢၣ် ၁၄ သီ, တုၤ ၂၀ သီ, ဖဲ ၂၀၂၄ နံၣ်အပူၤ န့ၣ်လီၤ. တၢ်ဂီၤတဖၣ်ပာ်ဖျါထီၣ်ဝဲ ဖဲလါစဲးပထ့ဘၢၣ် ၁၉ သီအနံၤ တၢ်ဒွဲၣ်အူကွံာ် အခၠ--- သဝီ, ဟံၣ်ဃီတဖၣ် အဂီၤန့ၣ်လီၤ. လၢတၢ်ကဲထီၣ်သးဒ်အံၤအဃိ, သဝီဖိတၢ်လုၢ်အီၣ်နီၢ်ခိသမူအဂီၢ် တၢ်လၢအလိၣ်ဘၣ်တဖၣ် ဒ်အမ့ၢ်, ကဟၣ်ပီးလီဒီး ပီးလီအဂုာ်ဂာ် ခဲလၢာ် အူအီၣ်ဟးဂီၤကွံာ်ဝဲန့ၣ်လီၤ. လၢတၢ်န့ၣ်အဃိ, လီၢ်ကဝီၤ ဒူသဝီဖိတဖၣ်လၢ ပလီဟီၣ်ကဝီၤအံၤ ခီဖျိလၢ, အဟံၣ်ဃီတဖၣ် ဘၣ်တၢ်ဒွဲၣ်အူကွံာ် တကးဒ်ဘၣ်, မ့ၣ်အူအီၣ်ဃုာ်ဒီး အဝဲသ့ၣ်ပီးလီ လၢ တၢ်လိၣ်ဘၣ်အီၤလၢ တၢ်လုၢ်အီၣ်နီၢ်ခိသးသမူတဖၣ်အဂီၢ် အဃိ, ဘၣ်သဂၢၢ်ဝဲဒီး တၢ်လုၢ်အီၣ်နီၢ်ခိသးသမူတၢ်ဂ့ၢ်ကီနးနးက လဲာ်န့ၣ်လီၤ. (တၢ်ဂီၤ- လီၢ်ကဝီၤသဝီဖိ)
တၢ်ဂီၤသ့ၣ်တဖၣ်အံၤ ဘၣ်တၢ်ဒိန့ၢ်အီၤဖဲ လါဒံၣ်စဲဘၢၣ် ၂၀၂၄ နံၣ်, ဖဲ ယ---သဝီ, ပရှီလိာ်ကရူၢ်, ဒီဖးခိၣ်ကီၢ်ဆၣ်, တီအူကီၢ်ရ့ၣ်အပူၤ န့ၣ်လီၤ. ဖဲလါဒံၣ်စဲဘၢၣ် ၁၂ သီ, ၂၀၂၄ နံၣ်, တၢ်ဒုးကဲထီၣ်သးတအိၣ်လၢ လီၢ်ကဝီၤပူၤဘၣ်ဆၣ်, SAC ပယီၤသုးဖိတဖၣ်လၢ အအိၣ်ဆီလီၤ အသးဖဲ တဆံဃုမံာ်လာ် (ယ့ၤပူၤစါ) သဝီတဖၣ်, ခးလီၤကျိဖးဒိၣ် ခံဖျၢၣ်ဆူ ယ---သဝီပူၤန့ၣ်လီၤ. ကျိဖးဒိၣ်ခံဖျၢၣ်အကျါ တဖျၢၣ်န့ၣ်လီၤ တဲာ်ပိၢ်ဖးထီၣ်ဝဲဒီး ဘၣ်ဟးဂုာ်ဟးဂီၤဝဲ သဝီဖိဟံၣ်ဃီသၢဖျၢၣ် ဃုာ်ဒီး တၢ်ပီးတၢ်လီလၢဟံၣ်ပူၤန့ၣ်လီၤ. တၢ်ဂီၤအံၤ ပာ်ဖျါထီၣ်ဝဲ အူရှ---, အဟံၣ်လၢဘၣ်ဒီးကျိဖးဒိၣ်ဒီး ဘၣ်ဟးဂီၤဃုာ်ဝဲ ဟံၣ်ဃီတၢ်ပီးတၢ်လီတဖၣ် ဒ်အမ့ၢ် လီမ့ၣ်အူကဟၣ်ထုးထီၣ်ထံတဖျၢၣ်, ကဟၣ်ဒုးချံၣ်ထံ တဖျၢၣ်, သပၢၤ, ခးဆ့ၣ်နီၤ, တၢ်ကူတၢ်သိး ဒီး တၢ်ပီးတၢ်လီအဂၤတဖၣ် ဘၣ်ဟးဂီၤကွံာ်ဝဲခဲလၢာ်န့ၣ်လီၤ.[2] (တၢ်ဂီၤ - KHRG)
KHRG ဒိးန့ၢ်ဘၣ် တၢ်ဂီၤသ့ၣ်တဖၣ်အံၤဖဲ လါဒံၣ်စဲဘၢၣ် ၂၀၂၄ နံၣ်အပူၤန့ၣ်လီၤ. တၢ်ဂီၤသ့ၣ်တဖၣ်အံၤ တၢ်ဒိန့ၢ်အီၤဖဲ ဘက--- သဝီ, အီၤပူၣ်ဟီၣ်ကဝီၤ, လၢၢ်မုၢ်လါကီၢ်ဆၣ်, ဘျံးဒဝဲၢ်ကီၢ်ရ့ၣ်အပူၤန့ၣ်လီၤ. ဖဲလါဒံၣ်စဲဘၢၣ် ၁၂ သီ, ၂၀၂၄ နံၣ်, SAC ပယီၤသုး (ခလရ) နီၣ်ဂံၢ် (၂၈၅) ခးဝဲကျိဖးဒိၣ် အဖျၢၣ် ၈၀ ဃၣ်ဃၣ်ဒီး လီၤတဲာ်ဘၣ်တၢ်လၢ ဒူသဝီဖိအတၢ်သူၣ်အီၣ်ဖျးအီၣ်လီၢ်တဖၣ်, တကးဒ်ဘၣ် (ဒ်တၢ်ဂီၤနဲၣ်ဖျါ အသိး) လီၤဘၣ်ဟးဂီၤအူထီၣ်ကွံာ်ဝဲ ဘုဖီတဖျၢၣ် ဃုာ်ဒီး သဝီဖိဟံၣ်ဃီ ၂ ဖျၢၣ်န့ၣ်လီၤ. တၢ်ဖိတၢ်လံၤလၢ လုၢ်ဒိၣ်ပှ့ၤဒိၣ်တဖၣ် ဃုာ်ဒီး တၢ်အဂုာ်အဂၤခဲလၢၢ် အူထီၣ်ဟးဂီၤကွံာ်ဝဲခဲလၢာ်ဒီး ဟံၣ်ကစၢၢ်တဖၣ်တဒိးန့ၢ်ဘၣ်က့ၤ တၢ်နီတမံၤလၢာ်ဘၣ်န့ၣ်လီၤ. SAC ပယီၤသုးတဖၣ် ခးလီၤနါစီၤကျိဖးဒိၣ်လၢ ဒူသဝီပူၤအိၣ်ဝဲအဃိ, သဝီဖိတဖၣ် တနီၤန့ၣ် ဘၣ်ဃ့ၢ်အိၣ်ကဒုကွံာ်ဒီး တနီၤန့ၣ် လဲၤဃ့ၢ်အိၣ်သဒၢကွံာ်အသးဆူ အကျီးတဖၣ်ပူၤ လၢအဆိမိၣ်ဝဲလၢ တၢ်ဘံၣ်တၢ်ဘၢကအိၣ်လၢအဝဲသ့ၣ်အဂီၢ် ဒီး တၢ်လီၢ်လၢအဂုာ်အဂၤသ့ၣ်တဖၣ်န့ၣ်လီၤ. (တၢ်ဂီၤ- လီၢ်ကဝီၤသဝီဖိ)
တၢ်ဂီၤတဘ့ၣ်အံၤ တၢ်ဒိးန့ၣ်ဘၣ် ဖဲလါမးရှး ၂၇ သီ, ၂၀၂၄ နံၣ်, ဖဲအခၠ--- သဝီ, ပလီဟီၣ်ကဝီၤ, လၢၢ်မုၢ်လါကီၢ်ဆၣ်, ဘျံးဒဝဲၢ်ကီၢ် ရ့ၣ်အပူၤန့ၣ်လီၤ. ဖဲ လါယနူၤအါရံၤ ၄ သီ, ၂၀၂၄ နံၣ်, SAC (ခလရ) နီၣ်ဂံၢ် (၂၈၅) လၢအအိၣ်ဆီလီၤသး ဖဲပလီဝ့ၢ်, အသုးဖိ တဖၣ်ခးလီၤနါစိၤဝဲကျိဖးဒိၣ် ၁၂၀ မမ ခံဖျၢၣ်ဆူ ဘခၠ--- သဝီပူၤန့ၣ် လီၤ. ကျိဖးဒိၣ်န့ၣ်လီၤဘၣ်ဝဲ သဝီဖိ တၢ်ဖံးအီၣ်မၤအီၣ်လီၢ်, ဒီး စံာ်တဖၣ်ပူၤဒီး ဘၣ်ဒိသံကွံာ်ဝဲ ဂီၤဖံးတဒု (ဒ်တၢ်ဂီၤပာ်ဖျါအသိး) ဒီး ဘၣ်ဟးဂီၤစ့ၢ်ကီး တၢ်သူၣ်အီၣ်ဖျးအီၣ်တဖၣ်န့ၣ်လီၤ. (တၢ်ဂီၤ- လီၢ်ကဝီၤသဝီဖိ)
တၢ်ဂီၤတဘ့ၣ်အံၤ ဘၣ်တၢ်ဒိန့ၢ်ဖဲလါမးရှး ၂၀၂၄ နံၣ်, ဘသ---သဝီ, ဘီသ့ၣ်ထၣ်ကရူၢ်, လူၢ်သီကီၢ်ဆၣ်, မုၢ်တြီၢ်ကီၢ်ရ့ၣ်အပူၤန့ၣ်လီၤ. တၢ်ဂီၤဝဲအံၤ ပာ်ဖျါထီၣ် SAC ပယီၤသုးဟဲခးလီၤတၢ်ဒီး ကဘီယူၤအဃိ, ဘၣ်ဟးဂီၤကွံာ်ဝဲ သဝီဖိတဂၤအဆီသုးတဖၣ် ဃုာ်ဒီး ဆီမံလီၢ်တၢ်သူၣ်ထီၣ်တဖျၢၣ် ဖဲဘသ---သဝီ အပူၤန့ၣ်လီၤ. ကဘီယူၤဟဲခးလီၤတၢ်အံၤ ဖဲလါမးရှး ၂၁ သီ, ၂၀၂၄ နံၣ်, ဖဲဖးဖီမုၢ် အဆၢကတီၢ်န့ၣ်လီၤ. သဝီဖိဟံၣ်ဃီလွံၢ်ဖျၢၣ်စ့ၢ်ကီး ဘၣ်ဟးဂီၤဝဲ ဖဲကဘီယူၤဟဲခးလီၤတၢ်တဘျီအံၤ အပူၤန့ၣ်လီၤ. (တၢ်ဂီၤ- KHRG)
တၢ်ဂီၤတဘ့ၣ်အံၤ တၢ်ဒိန့ၢ်အီၤ ဖဲလါမးရှး ၂၀၂၄ နံၣ်, ဖဲ ဘဂ---သဝီ, မဲးနူၤထၣ်ကရူၢ်, ဘုသိၣ်ကီၢ်ဆၣ်, မုၢ်တြီၢ်ကီၢ်ရ့ၣ်အပူၤန့ၣ်လီၤ. ဖဲလါမးရှး ၅ သီ, ၂၀၂၄ နံၣ်န့ၣ်, SAC ပယီၤသုး ဟဲတ့ၢ်လီၤမ့ၣ်ပိၢ် ဒီးကဘီယူၤ ဖဲဘဂ--- သဝီပူၤန့ၣ်လီၤ. လၢတၢ်န့ၣ်အဃိ, ဘၣ်ဟးဂီၤဝဲသဝီဖိ ဟံၣ်ဃီတၢ်ပီးတၢ်လီတဖၣ် ဒီးဘၣ်သံကွံာ်ဝဲ အတၢ်ဘုၣ်အီၣ်တဖၣ်န့ၣ်လီၤ. တၢ်ဂီၤအံၤပာ်ဖျါထီၣ်ဝဲ သဝီဖိ အူဘဟ--- အထိးသံကွံာ်ခံဒုအကျါတဒုအဂီၤန့ၣ်လီၤ. (တၢ်ဂီၤ- KHRG)
တၢ်ဂီၤတဘ့ၣ်အံၤ ဘၣ်တၢ်ဒိန့ၢ်အီၤ ဖဲလါမးရှး ၂၀၂၄ နံၣ်, ဖဲ ဘလ--- သဝီ, မးထီကရူၢ်, ဒွဲၣ်လိကီၢ်ဆၣ်, မုၢ်တြီၢ်ကီၢ်ရ့ၣ်အပူၤ န့ၣ်လီၤ. ဖဲလါမးရှး ၂၅ သီ, ၂၀၂၄ နံၣ်, ဖဲဂီၤခီအဆၢကတီၢ်န့ၣ်, SAC ပယီၤသုးသူဝဲဒြိဒီး ဟဲတ့ၢ်လီၤမ့ၣ်ပိၢ်ဖဲ ဘလ--- သဝီပူၤဒီး ဘၣ်ဟးဂီၤဝဲ သဝီဖိစီၤဘန--- အဟံၣ်ဒီး အဘုဖီန့ၣ်လီၤ. တၢ်ဂီၤအံၤပာ်ဖျါထီၣ်ဝဲဒၣ် သဝီဖိ စီၤ ဘန--- အဘုဖီလၢ အဘၣ်ဟးဂီၤကကွံာ်ဝဲ အဂီၤန့ၣ်လီၤ. (တၢ်ဂီၤ- KHRG)
တၢ်ဂီၤတဘ့ၣ်အံၤ ဘၣ်တၢ်ဒိန့ၢ်အီၤ ဖဲလါယူၤ ၂၀၂၄ နံၣ်, ဖဲ အယ--- သဝီ, မူဟီၣ်ကဝီၤလီၤဆီ, မူကီၢ်ဆၣ်, ချၢၣ်လွံၢ်ထူၣ်ကီၢ်ရ့ၣ်အပူၤ န့ၣ်လီၤ. SAC ပယီၤသုး (ခလရ) နီၣ်ဂံၢ် (၃၀၇) လၢအအိၣ်ဆီလီၤ သးဖဲ စွ့ၤဝသုးကလၢၤ ဖဲမူဟီၣ်ကဝီၤလီၤဆီအပူၤ, အသုးဖိတဖၣ် ဟဲဆီလီၤသုးလီၢ်အိၣ်တမှံၤဖဲ အရှ--- သဝီဒီး ဘအ--- သဝီသ့ၣ် တဖၣ် အပူၤ ဖဲမူဟီၣ်ကဝီၤလီၤဆီန့ၣ်လီၤ. ဖဲလါယူၤ ၁၉ သီ, ၂၀၂၄ နံၣ် အနံၤန့ၣ် ပယီၤသုးဖိလၢအဟဲအိၣ်တမှံၤဖဲတၢ်လီၢ်ဖဲန့ၣ်သ့ၣ် တဖၣ် ခးနါလီၤနါစိၤဝဲ ကျိဖးဒိၣ် ၁၂၀ မမ သၢဖျၢၣ်ဆူ အယ--- သဝီပူၤန့ၣ်လီၤ. တၢ်ခးလီၤကျိဖးဒိၣ်အဃိ, ကျိဖးဒိၣ်အကျါတဖျၢၣ် လီၤဘၣ်လၢသဝီဖိတဂၤအစံာ်ပျီပူၤဒီး ဘၣ်ဟးဂီၤဝဲအဘုတဖၣ် လၢန့ၣ်အမဲာ်ညါ, တၢ်လီၤဘၣ်ယိၣ်အိၣ်ထီၣ်ဝဲလၢ သဝီဖိသ့ၣ်တဖၣ် အဂီၢ် လၢကလဲၤက့ၤဖံးမၤတၢ်လၢ စံာ်ပျီပူၤအဂီၢ်န့ၣ်လီၤ. တၢ်ဂီၤအံၤ ပာ်ဖျါထီၣ်ဝဲ ကျိဖးဒိၣ်ချံတဖျၢၣ်လၢ အလီၤတဲာ်လၢစံာ်ပျီပူၤ အဂီၤန့ၣ်လီၤ. (တၢ်ဂီၤ- KHRG)
တၢ်ဂီၤတဘ့ၣ်အံၤ တၢ်ဒိန့ၢ်အီၤ ဖဲလါယူၤလံ ၂၁ သီ, ၂၀၂၄ နံၣ်, ဖဲ ဘဒ---သဝီ, ဒ့လိာ်မုၢ်နုာ်ကရူၢ်, ထီတထူၣ်ကီၢ်ဆၣ်, တီအူကီၢ်ရ့ၣ် ပူၤန့ၣ်လီၤ. ဖဲလါယူၤလံ ၂၁ သီ, ၂၀၂၄ နံၣ်, ဖဲဟါလီၤခီ ၄ နၣ်ရံၣ် ဃၣ်ဃၣ်ကတီၢ်, SAC ပယီၤသုး (ခလရ) နီၣ်ဂံၢ် (၃၉) အိၣ်ဆီလီၤ သးဖဲ လွံၢ်မံးလာ် (၄ မံးလာ်), သၣ်ဒီၣ်ကၠံကျဲမုၢ်ဃၢၤ, ဖဲဒီၣ်ဖါခိၣ်ကီၢ်ဆၣ်န့ၣ် ခးလီၤနါစိၤကျိဖးဒိၣ်လၢ ဘဒ---သဝီပူၤ န့ၣ်လီၤ. ကျိဖးဒိၣ်ချံတဖျၢၣ် လီၤတဲာ်ဝဲလၢ သဝီဖိတဂၤအစံာ်ပျီပူၤ ကျီၢ်အီၣ်ဆၣ်အလီၢ်တတီၤန့ၣ်လီၤ. ကျိဖးဒိၣ်အက့အခီတဖၣ် ဖျိးဘၣ်သံကွံာ်ဝဲ သဝီဖိစီၤ ဘဃ--- အဂီၤဖံးတဒု (ဒ်တၢ်ဂီၤပာ်ဖျါ အသိး) ဒီး ဘၣ်ဟးဂီၤစ့ၢ်ကီး ဘုထူၣ်တနီၤန့ၣ်လီၤ. (တၢ်ဂီၤ- လီၢ်ကဝီၤသဝီဖိ)
တၢ်ဂီၤတဘ့ၣ်အံၤ တၢ်ဒိန့ၢ်အီၤ ဖဲလါစဲးပထ့ဘၢၣ် ၂၀၂၄ နံၣ်, ဖဲဘဘ---သဝီဃၢၤ, တီၤတံကရူၢ်, ဝီၢ်ရ့ၣ်ကီၢ်ဆၣ်, ဒူပျာ်ယာ်ကီၢ်ရ့ၣ် အပူၤန့ၣ်လီၤ. ဖဲလါစဲးပထ့ဘၢၣ် ၉ သီ, ၂၀၂၄ နံၣ်, SAC ပယီၤသုး ဟဲခးလီၤဝဲကျိဖးဒိၣ်ဖဲ ကမျၢၢ်အိၣ်ဆိးလီၢ်ကျဲတဖၣ် ဖဲတီၤတံကရူၢ် ပူၤဒီး လၢန့ၢ်အမဲာ်ညါ, ခးလီၤစ့ၢ်ကီးတၢ်လၢ ဒူသဝီပူၤ, တၢ်သူၣ်အီၣ် လီၢ် ဒီး စံာ်ပျီ ဒီး ခုးကျါသ့ၣ်တဖၣ်န့ၣ်လီၤ. တၢ်ဂီၤတဘ့ၣ်အံၤပာ်ဖျါ ထီၣ်ဝဲ ကျိဖးဒိၣ်ချံလီၤတဲာ်ပိၢ်ဖးထီၣ် ဘၣ်ဟးဂီၤကွံာ်ဝဲ သဝီဖိတဂၤ အရီပၢၢ်ထူၣ်တဖၣ် အဂီၤန့ၣ်လီၤ. လၢတၢ်ကဲထီၣ်သးအပူၤ ဘၣ်ဒိ ဃုာ်ဒီး သဝီဖိအတဂၤလၢအမံၤမ့ၢ် ဘဆ--- တဂၤဒီး လၢန့ၣ်အမဲာ် ညါ, ဘၣ်ဟးဂုာ်ဟးဂီၤစ့ၢ်ကီး သဝီဖိအဟံၣ်ဃီတဖၣ် ဒီး တၢ်ထူၣ်တၢ်ဘိအဂုာ်အဂၤတဖၣ်န့ၣ်လီၤ. (တၢ်ဂီၤ- လီၢ်ကဝီၤသဝီဖိ)
တၢ်ဂီၤတဘ့ၣ်အံၤ တၢ်ဒိန့ၢ်ဖဲလါစဲးပထ့ဘၢၣ် ၂၀၂၄နံၣ်, ဖဲ အဖ---လီၢ်ကဝီၤတတီၤ လၢအအိၣ်စီၤစုၤ ဒီးအထ--- သဝီ, သၢမံးလာ်ဃၣ် ဃၣ်, ဖဲဒ့လိာ်မုၢ်နုာ်ကရူၢ်, ထီတထူၣ်ကီၢ်ဆၣ်, တီအူကီၢ်ရ့ၣ်အပူၤ န့ၣ်လီၤ. ဖဲလါစဲးပထ့ဘၢၣ်အသီ ၁၀, ၂၀၂၄ နံၣ်, ဖဲမုၢ်ထူၣ် ၁၂ နၣ်ရံၣ်ဃၣ်ဃၣ်ကတီၢ်, SAC သုးဖိတဖၣ်လၢ အအိၣ်လၢတဆံသၢ မံးလာ် (၁၃ မံးလာ်) သုးကလၢၤ (လၢသၣ်ဒီၣ်ကၠံဝ့ၢ်ဃၢၤ), အသုးဖိဖၣ် ခးလီၤနါစိၤဝဲ ကျိဖးဒိၣ်ခံဖျၢၣ်ဆူ အဖ--- လီၢ်ကဝီၤပူၤ န့ၣ်လီၤ. လၢတၢ်န့ၣ်အဃိ, ကျိဖးဒိၣ်အကျါတဖျၢၣ်လီၤတဲာ်ဝဲလၢ သဝီဖိ စီၤအည---တဂၤအစံာ်ပျီပူၤဒီး ဘၣ်ဟးဂုာ်ဟးဂီၤဝဲ အဘုတဖၣ်န့ၣ်လီၤ. သဝီဖိတဖၣ် တူၢ်ဘၣ်ဝဲလၢ တၢ်ဘံၣ်တၢ်ဘၢ တအိၣ်လၢအဝဲသ့ၣ်ဂီၢ် ဒ်သိးဒီး ကလဲၤဖံးအီၣ်မၤအီၣ် အစံာ်ပျီလၢ အအိၣ်ဘူးဒီး ပယီၤသုးအသုးကလၢၤတဖၣ်ဒီး လဲၤဖံးအီၣ်မၤအီၣ် က့ၤ ကျိးလၢအအိၣ်အယံၤဒီး တၢ်လီၤအဂၤတဖၣ်န့ၣ်လီၤ. (တၢ်ဂီၤ- KHRG)
တၢ်ဂီၤတဘ့ၣ်လၢ စုစ့ၣ်တပၤအံၤ တၢ်ဒိန့ၢ်အီၤဖဲ လါဒံၣ်စဲဘၢၣ် ၁၇ သီ, ၂၀၂၄ နံၣ်, ဖဲ ဘဧ--- သဝီ, သူကဘံကရူၢ်, လၢၢ်ဒိၣ်ကီၢ်ဆၣ်, ချၢၣ်လွံၢ်ထူၣ်ကီၢ်ရ့ၣ်အပူၤန့ၣ်လီၤ. တၢ်ဂီၤအံၤပာ်ဖျါထီၣ်ဝဲ ဖဲလါဒံၣ်စဲဘၢၣ် ၁၇ သီ, ၂၀၂၄ နံၣ်, SAC ပယီၤသုးကလၢၤလၢ အအိၣ်ဆီလီၤသး ဖဲနၣ်သးကွ့ဝ့ၢ်, အသုးဖိတဖၣ်ခးလီၤနါစိၤဝဲကျိဖးဒိၣ် ၁၂၂ မမ တဖျၢၣ် ဖဲ ဘဧ--- သဝီပူၤ ဒီး ဘၣ်သံကွံာ်ဝဲ သဝီဖိတဂၤအဆီတဖၣ် န့ၣ်လီၤ. ကျိဖးဒိၣ်ချံအဝဲန့ၣ် လီၤတဲာ်ပိၢ်ဖးဒီး ဘၣ်ဒိဘၣ်ထံးစ့ၢ်ကီး ပှၤဒူသဝီဖိဒီး ဘၣ်ဟးဂုာ်ဟးဂီၤစ့ၢ်ကီး အဝဲသ့ၣ်တၢ်ပီးတၢ်လီ သ့ၣ်တဖၣ်န့ၣ်လီၤ.[3] (တၢ်ဂီၤ- လီၢ်ကဝီၤသဝီဖိ)
တၢ်ဂီၤတဘ့ၣ်အံၤ တၢ်ဒိန့ၢ်အီၤ ဖဲလါမးရှး ၂၀၂၄ နံၣ်, ဖဲ ဘပ--- သဝီ, မူဟီၣ်ကဝီၤလီၤဆီ, မူကီၢ်ဆၣ်, ချၢၣ်လွံၢ်ထူၣ်ကီၢ်ရ့ၣ်အပူၤ န့ၣ်လီၤ. ဖဲလါမးရှး ၁ သီ, ၂၀၂၄ နံၣ်, SAC ခီၣ်ချ့သုးတြိၤ (တမ) နီၣ်ဂံၢ် (၇၇) အသုးဖိတဖၣ် စးထီၣ်ဟးထီၣ်ဝဲလၢ ဒခ--- သဝီ, ဖဲမူဟီၣ်ကဝီၤလီၤဆီ ဒီး လဲၤဝဲဆူလၢၢ်ဒိၣ်ဝ့ၢ်, ဖဲလၢၢ်ဒိၣ်ကီၢ်ဆၣ် အပူၤန့ၣ်လီၤ. ပယီၤသုးသ့ၣ်တဖၣ်န့ၣ် ဟဲခီပတာ်ဘၣ်ဝဲသဝီအါဖျၢၣ် လၢကျဲဒီဘိညါ အဃိဒီး, ဖဲလၢအဟဲလၢကျဲအခါ အဝဲသ့ၣ်နုာ်လီၤ ဒွဲၣ်အူကွံာ်ဝဲ ဟံၣ်ဃီအါအါဂီၢ် ဖဲ အဆ--- သဝီ, ဒီး ထီၣ်ဃိပှၤဟံၣ် ပှၤဃီဒီး ဟံန့ၢ်ဆူၣ်သဝီဖိတၢ်ပီးတၢ်လီတဖၣ် ဖဲဘပ---သဝီ, မူဟီၣ်ကဝီၤလီၤဆီအပူၤန့ၣ်လီၤ. တၢ်ဂီၤတဘ့ၣ်အံၤပာ်ဖျါထီၣ်ဝဲ တၢ်ဆါတၢ်ကျးတဖျၢၣ်လၢ SAC သုးဖိတဖၣ် နုာ်လီၤဃိတၢ်ဒီး ဟံန့ၢ်ဆူၣ်တၢ်တဖၣ်န့ၣ်လီၤ. (တၢ်ဂီၤ- KHRG)
တၢ်ဂီၤသ့ၣ်တဖၣ်အံၤ တၢ်ဒိန့ၢ်အီၤဖဲ ဘခ--- ဝ့ၢ်, နိၣ်ဖိကရူၢ်, ကီးတရံးကီၢ်ဆၣ်, ဒူပျာ်ယာ်ကီၢ်ရ့ၣ်အပူၤန့ၣ်လီၤ. စးထီၣ်ဖဲလါမးရှး ၇ သီ, တုၤလၢ ၁၈ သီ, ဖဲ ၂၀၂၄ နံၣ်န့ၣ်, တၢ်ဒုးကဲထီၣ်လၢ SAC ပယီၤသုး ဒီး KNLA အသုးပာ်ဖှိၣ်တဖၣ် အဘၢၣ်စၢၤန့ၣ်လီၤ. KNLA ခီပရၤသုးကျိၤ နီၣ်ဂံၢ် ၁ ဒီး ၂ ဖဲဒူပျာ်ယာ်ကီၢ်ရ့ၣ်ဒီး KNLA သုးရ့ၣ် နီၣ်ဂံၢ် ၁၀၁ ဖဲဖၣ်အၣ်ကီၢ်ရ့ၣ် ဒီး PDF သုးပာ်ဖှိၣ်တဖၣ် လဲၤခးဝဲ SAC ပယီၤသုး ဒုးယာ်ကရူၢ်ဖဲသ့ၤကါညံၤနီၤ လၢအပၣ်ဃုာ်ဒီး (ခလရ) နီၣ်ဂံၢ် (၃၅၅), (၃၅၆) ဒီး (၃၅၇) အသုးကလၢၤတဖၣ် န့ၣ်လီၤ. ဖဲတၢ်ဒုးကဲထီၣ်ကတီၢ်, SAC ပယီၤသုး ဟဲတ့ၢ်လီၤမ့ၣ်ပိၢ်ဒီး ကဘီယူၤ ကိးမုၢ်နံၤဒဲး, လၢကမျၢၢ်အိၣ်ဆိးလီၢ်ကျဲ ဖဲနိၣ်ဖိကရူၢ်ဒီး ထံဝၣ်ဘျီကရူၢ်တဖၣ်အပူၤ, တန့ဆါကီၢ်ဆၣ်, ဖၣ်အၣ်ကီၢ်ရ့ၣ်အပူၤ န့ၣ်လီၤ.[4] တၢ်ဂီၤတဘ့ၣ်ဖဲ စုစ့ၣ်အဖီလာ်တဘ့ၣ်အံၤ ဘၣ်တၢ်ဒိန့ၢ် အီၤဖဲလါမးရှး ၂၀၂၄ နံၣ်, ဒီး ပာ်ဖျါထီၣ်ဝဲဒၣ် SAC ပယီၤသုး အကဘီယူၤ ဟဲခးလီၤတၢ် ဒီး ဘၣ်ဟးဂီၤကွံာ်ဝဲ တၢ်ဆါသိလ့ၣ် အသိလီၢ်ကျးတဖျၢၣ်, ဖဲ ဘခ--- ဝ့ၢ်န့ၣ်လီၤ. တၢ်ဂီၤလၢ စုစ့ၣ်ဒီးစုထွဲ အဖီခိၣ်ခံဘ့ၣ်အံၤ ဘၣ်တၢ်ဒိန့ၢ်အီၤဖဲ လါအ့ဖြ့ၣ် ၂၀၂၄ နံၣ်န့ၣ်ဒီး တၢ်ဂီၤအံၤ ပာ်ဖျါထီၣ်ဝဲဟံၣ်ဃီတဖၣ် ဃုာ်ဒီးတၢ်ပီးတၢ်လီလၢအပူၤ, တၢ်လိၣ်ဘၣ်လၢ တၢ်လဲၤထီၣ်က့ၤလီၤဒီး တၢ်လိၣ်ဘၣ်လၢ တၢ်လုၢ်အီၣ်နီၢ်ခိသးသမူဂီၢ်တဖၣ် ဘၣ်ဟးဂုာ်ဟးဂီၤကွံာ်ဝဲ ခဲလၢာ်, ဖဲလၢတၢ်ဒုးကဲထီၣ်ကတီၢ်န့ၣ်လီၤ. (တၢ်ဂီၤ- KHRG)
တၢ်ဂီၤ (၄) ဘ့ၣ်အံၤ ဘၣ်တၢ်ဒိန့ၢ်အီၤဖဲ အခ--- သဝီ, ဝ့ၢ်ရှါကရူၢ်, တန့ဆါကီၢ်ဆၣ်, ဖၣ်အၣ်ကီၢ်ရ့ၣ်ဟီၣ်ကဝီၤပူၤန့ၣ်လီၤ. ဖဲလါမးရှး ၁၇ သီ, ၂၀၂၄ နံၣ်န့ၣ် SAC ပယီၤသုးဖိတဖၣ်လၢအအိၣ်ဖဲ ခီၣ်သုးရ့ၣ်နီၣ်ဂံၢ် (၂၇၅) သုးကလၢၤသ့ၣ်တဖၣ် ခးလီၤဝဲ (၁၂၀မမ) ကျိဖးဒိၣ်လၢ အခ--- သဝီပူၤန့ၣ်လီၤ. တၢ်ဂီၤ လၢအဖီခိၣ် (၂) ဘ့ၣ် လၢစုထွဲဒီးစုစ့ၣ်, တၢ်ဂီၤလၢ အဖီလာ် (၁) ဘ့ၣ် လၢစုစ့ၣ်တကပၤ တၢ်ဂီၤခဲလၢာ် (၃)ဘ့ၣ်အံၤ ဘၣ်တၢ်ဒိန့ၢ်အီၤဖဲ လါမးရှး ၁၈ သီ, ၂၀၂၄ နံၣ် န့ၣ်လီၤ. တၢ်ဂီၤလၢအဖီခိၣ်လၢစုစ့ၣ်တကပၤတဘ့ၣ်အံၤ ပာ်ဖျါထီၣ်ဝဲ သဝီဖိအဟံၣ် အူအီၣ်ကွံာ်ခဲလၢာ် ခီဖျိလၢ SAC ပယီၤသုး ခးလီၤကျိဖးဒိၣ်အဃိန့ၣ်လီၤ. တၢ်ဂီၤလၢအဖီခိၣ်လၢစုထွဲတကပၤတဘ့ၣ်အံၤ ပာ်ဖျါထီၣ်ဝဲ သဝီဖိအလီတဲစိကျး ဒီး တၢ်ဂီၤလၢ အဖီလာ်လၢစုစ့ၣ်တကပၤတဘ့ၣ်အံၤ ပာ်ဖျါထီၣ်ဝဲ သဝီဖိတၢ်ဘှီသိလ့ၣ်ယီၢ်ကျးန့ၣ်လီၤ. ကျး(၂)ဖျၢၣ် အံၤ အူအီၣ်ဟးဂီၤကွံာ်ခဲလၢာ် မ့ၢ်လၢ SAC ပယီၤသုးခးလီၤကျိဖးဒိၣ်အဃိန့ၣ်လီၤ. တၢ်ဂီၤလၢအဖီလာ်လၢစုထွဲတကပၤတဘ့ၣ် အံၤ ဘၣ်တၢ်ဒိန့ၢ်အီၤဖဲ လါမ့ၤ ၂၀၂၃ နံၣ် ဒီး ပာ်ဖျါထီၣ်ဝဲ အခ--- သဝီဖိ စီၤအရ--- အတၢ်စုလီၢ်ခီၣ်ခိၣ်တဖၣ်အံၤ အူအီၣ်ဟးဂီၤကွံာ် ခဲလၢာ် ခီဖျိလၢ SAC ပယီၤသုး ခးလီၤကျိဖးဒိၣ်အဃိန့ၣ်လီၤ. [5] (တၢ်ဂီၤ- KHRG/လီၢ်ကဝီၤသဝီဖိ)
တၢ်ဂီၤတဘ့ၣ်အံၤ ဘၣ်တၢ်ဒိန့ၢ်အီၤဖဲ ဘဝ---သဝီ, ကၠီၣ်ခံ ကရူၢ်, ကီးတရံးကီၢ်ဆၣ်, ဒူပျာ်ယာ်ကီၢ်ရ့ၣ်ဟီၣ်ကဝီၤပူၤ န့ၣ်လီၤ. ဖဲလါမးရှး ၁၈ သီ, ၂၀၂၄ နံၣ်န့ၣ် SAC ပယီၤသုး ကဘီယူၤတဘ့ၣ် ဟဲကွံာ်လီၤ (၅၀၀) ပီၢ်မ့ၣ်ပိၢ် (၂) ဖျၢၣ် လၢသဝီပူၤန့ၣ်လီၤ. မ့ၣ်ပိၢ်ဖးဒိၣ်ပိၢ်ဖးထီၣ်ဘၣ်သံသဝီဖိ (၂) ဂၤ ဒီး ဘၣ်ဒိဖိသၣ်မုၣ်ဖိ တဂၤအစု, ဘၣ်ဒိဟးဂီၤ စ့ၢ်ကီး သဝီဖိအဟံၣ် ဒီး ကျး တဘျုးဖျၢၣ် ညါန့ၣ်လီၤ. တၢ်ဂီၤတဘ့ၣ်အံၤပာ်ဖျါထီၣ်ဝဲ သဝီဖိအကျးဟးဂီၤ အကျါတဖျၢၣ် ဒီး တၢ်ဖိတၢ်လံၤလၢကျးပူၤ ဃုာ်ဒီးတၢ်အီၣ်တၢ် အီၣ်သ့ၣ်တဖၣ် ဟးဂီၤကွံာ်ခဲလၢာ်န့ၣ်လီၤ. (တၢ်ဂီၤ- KHRG)
တၢ်ဂီၤတဖၣ်အံၤ ဘၣ်တၢ်ဒိန့ၢ်အီၤဖဲ လါယူၤလံ ၂၀၂၄ နံၣ်ဖဲ မဲၣ်ခ်သိထူၣ်ခီပနံၣ်တၢ်လီၢ်, မနိရိၢ်ဟီၣ်ကဝီၤ, လၢၢ်ကဆီ ကီၢ်ဆၣ်, ဘျံးဒဝဲၢ်ကီၢ်ရ့ၣ်ပူၤန့ၣ်လီၤ. တၢ်ဂီၤတဖၣ်အံၤပာ်ဖျါထီၣ်ဝဲ မဲၣ်ခ်သိထူၣ်ခီပနံၣ်အတၢ်သူၣ်ထီၣ် ဒီး တၢ်ဖိတၢ်လံၤပီးလီ တၢ်ဘၣ်ဒိဘၣ်ထံး သ့ၣ်တဖၣ်န့ၣ်လီၤ. ဖဲ လါယူၤ ၂၀၂၄ နံၣ် အကတၢၢ်တနွံန့ၣ် သုးဖီၣ်စုကဝဲၤလၢတၢ်တသ့ၣ် ညါအမံၤဘၣ်တဖု နုာ်လီၤဟံဆူၣ်ဝဲ ခီသပနံၣ်အတၢ်ဖိတၢ်လံၤ ဃုာ်ဒီးတၢ်ပီးတၢ်လီလၢအရ့ဒိၣ် ဒ်အမ့ၢ် ရ့ၣ်နီၣ်သိ, သိအီၣ်, စဲးဖီကဟၣ်မိၢ်ပှၢ် ဒီး စဲးဖီကဟၣ်ပီးလီအဂၤသ့ၣ် တဖၣ်အါအါဂီၢ်ဂီၢ်န့ၣ်လီၤ. တၢ်ကဲထီၣ်သးဝဲအံၤ မၤဘၣ်ဒိဒူဖိသဝီဖိ ဒီး ခီပနံၣ်ပှၤမၤတၢ်ဖိသ့ၣ်တဖၣ် အတၢ်လုၢ်အီၣ်နီၢ်ခိသးသမူ မ့ၢ်လၢအဝဲသ့ၣ်ဟံၣ်ဖိဃီဖိတၢ်လုၢ်အီၣ်နီၢ်ခိသးသမူတၢ်ဖံး တၢ်မၤတၢ်ဟဲနုာ်တဖၣ် ဒိးသန့ၤထီၣ်အသးလၢ ခီၣ်ပနံၣ်တဖျၢၣ်အံၤအဃိန့ၣ်လီၤ. (တၢ်ဂီၤ- KHRG)
KHRG ဒိးန့ၢ်ဘၣ်တၢ်ဂီၤသ့ၣ်တဖၣ်အံၤဖဲ လါဒံၣ်စဲဘၢၣ် ၁၇ သီ, ၂၀၂၃ နံၣ်န့ၣ်လီၤ. တၢ်ဂီၤသ့ၣ်တဖၣ်အံၤ ဘၣ်တၢ် ဒိန့ၢ်အီၤဖဲ ရှရှ--- သဝီ, အီပူၤဟီၣ်ကဝီၤ, လၢၢ်မုၢ်လါ ကီၢ်ဆၣ်, ဘျံးဒဝဲၢ်ကီၢ်ရ့ၣ်ပူၤ န့ၣ်လီၤ. ဖဲလါဒံၣ်စဲဘၢၣ် ၁၂ သီ, ၂၀၂၃ နံၣ်န့ၣ် SAC ပယီၤသုး ခီၣ်သုးရ့ၣ်နီၣ်ဂံၢ် (၂၈၅) ပျီပူၤသုးဖိသ့ၣ်တဖၣ် နုာ်လီၤဆူ ရှရှ--- သဝီပူၤဒီး ဒွဲၣ်အူထီၣ်ကွံာ်သဝီဖိအဟံၣ်သ့ၣ်တဖၣ် (၁၁) ဖျၢၣ် ဃုာ်ဒီး ဟံၣ်ဃီတၢ်စုလီၢ်ခီၣ်ခိၣ်ပီးလီသ့ၣ်တဖၣ်ခဲလၢာ်န့ၣ်လီၤ. သဝီဖိသ့ၣ်တဖၣ် ဘၣ်ယိၣ်တၢ်လၢအနီၢ်ကစၢ် တၢ်ဘံၣ်တၢ်ဘၢဂီၢ် အဃိ တချုးဒံးလၢပယီၤသုးသ့ၣ်တဖၣ်အံၤဟဲတုၤဒံးဘၣ်န့ၣ် အဝဲသ့ၣ်တဖၣ် လဲၤဃ့ၢ်အိၣ်ကဒုဝဲဆူတၢ်လီၢ်လၢအဘံၣ်ဘၢ လီၢ်န့ၣ်လီၤ. ခီဖျိလၢပယီၤသုး ထီၣ်ဒုးကမျၢၢ်သ့ၣ်တဖၣ်ဒ်အံၤအဃိ သဝီဖိတနီၤ ဘၣ်လဲၤဃ့ၢ်အိၣ်ကဒုက့ၤလၢပှၤဃ့ၢ်မှံဟးဖျိးတၢ်အိၣ် ကဒုလီၢ်, တနီၤ လဲၤဃ့ၢ်အိၣ်ကဒုဆူ အဘူးတံၢ်ဒူသဝီအိၣ်တၢ်လီၢ် ဒီး တက့ၤဘၣ်ဒံးဆူအဒူသဝီဘၣ်န့ၣ်လီၤ. တၢ်ဂီၤသ့ၣ်တဖၣ် အံၤပာ်ဖျါထီၣ်တၢ်အုၣ်သးဘၣ်ဃး SAC ပယီၤသုးဖိတဖၣ် မၤဟးဂီၤသဝီဖိအဟံၣ်ဃီ ဒီး တၢ်လုၢ်အီၣ်နီၢ်ခိ သးသမူပီးလီသ့ၣ် တဖၣ်န့ၣ်လီၤ. (တၢ်ဂီၤ- လီၢ်ကဝီၤသဝီဖိ)
KHRG ဒိးန့ၢ်ဘၣ်တၢ်ဂီၤတဘ့ၣ်အံၤဖဲ လါဒံၣ်စဲဘၢၣ် ၂၂ သီ, ၂၀၂၃ နံၣ်န့ၣ်လီၤ. တၢ်ဂီၤတဘ့ၣ်အံၤန့ၣ် ဘၣ်တၢ်ဒိန့ၢ် အီၤဖဲ ဘယ--- သဝီ, အီပူၤဟီၣ်ကဝီၤ, လၢၢ်မုၢ်လါကီၢ်ဆၣ်, ဘျံးဒဝဲၢ်ကီၢ်ရ့ၣ်ပူၤန့ၣ်လီၤ. တၢ်ဒုးကဲထီၣ်မ့ၢ်ဂ့ၤတကဲထီၣ် ဘၣ်မ့ၢ်ဂ့ၤ SACပယီၤသုးဖိလၢ အအိၣ်ဖဲအီပူၤဟီၣ်ကဝီၤ သ့ၣ်တဖၣ် ခးလီၤကျိဖးဒိၣ်လၢကမျၢၢ် ဟီၣ်ကဝီၤပူၤအဃိ သဝီဖိသ့ၣ်တဖၣ် ဘၣ်ဃ့ၢ်မှံဟးဖျိးဆူတၢ်လီၢ်ဂၤ လၢအနီၢ် ကစၢ်တၢ်ဘံၣ်တၢ်ဘၢအဂီၢ်န့ၣ်လီၤ. သဝီဖိတနီၤ ဘၣ်လဲၤ ဃ့ၢ်အိၣ်ကဒုက့ၤလၢ ပှၤဃ့ၢ်မှံဟးဖျိးတၢ်အိၣ်ကဒုလီၢ်, တနီၤလဲၤဃ့ၢ် အိၣ်က့ၤဆူတၢ်လီၢ်လၢအဘံၣ်ဘၢဘူးဒီး အတၢ်ဖံးအီၣ်မၤအီၣ်လီၢ် လၢအမ့ၢ် စံာ်လီၢ် ဒီး ကျီးသ့ၣ် တဖၣ်န့ၣ်လီၤ. ဖဲလါဒံၣ်စဲဘၢၣ် ၂၁ သီ, ၂၀၂၃ နံၣ်န့ၣ် SAC ပယီၤသုး ခီၣ်သုးရ့ၣ် (၂၈၅) သုးဖိသ့ၣ် တဖၣ် ကွံာ်လီၤကျိဖးဒိၣ်ကအိၣ် (၈၀) ဖျၢၣ်ဆူ ဘယ---သဝီပူၤ ဒီး စံာ်ပှဲၤတၢ်ဖံးအီၣ်မၤအီၣ်အလီၢ်န့ၣ်လီၤ. SAC ပယီၤသုးခး လီၤကျိဖးဒိၣ်အါအါဂီၢ်ဂီၢ်ဒ်အံၤအဃိ ဘၣ်ဟးဂီၤကွံာ် သဝီဖိ အဟံၣ် (၂) ဖျၢၣ် ဒီး ဘုဖီ (၁) ဖျၢၣ် ဃုာ်ဒီး တၢ်စုလီၢ်ခီၣ်ခိၣ်ပီးလီ လုၢ်ဒိၣ်ပှ့ၤဒိၣ်အဂၤသ့ၣ်တဖၣ်ခဲလၢာ်, ဒီး ဘၣ်ဒိစ့ၢ်ကီးသဝီဖိတဂၤ အခိၣ်သၣ်ဃံန့ၣ်လီၤ. တၢ်ဂီၤတဘ့ၣ်အံၤပာ်ဖျါထီၣ်ဝဲ သဝီဖိအစဲး တဖျၢၣ်အံၤ အူအီၣ်ဟးဂီၤကွံာ်ဝဲဖဲ တၢ်ခးလီၤကျိဖးဒိၣ်ကဲထီၣ်သး အခါန့ၣ်လီၤ. (တၢ်ဂီၤ- လီၢ်ကဝီၤသဝီဖိ)
တၢ်ဂီၤတဘ့ၣ်အံၤ ဘၣ်တၢ်ဒိန့ၢ်အီၤဖဲ လါယနူၤအါရံၤ ၂၀၂၄ နံၣ် ဖဲ ဆဂ--- သဝီ, တီၤကၠးအ့ကရူၢ်, ကြုၢ်တုကီၢ် ဆၣ်, ဒူပျာ်ယာ်ကီၢ်ရ့ၣ် န့ၣ်လီၤ. ဖဲလါဒံၣ်စဲဘၢၣ် ၂၀၂၃ နံၣ်န့ၣ် SAC ပယီၤသုးဖိတဖၣ် လဲၤဆီလီၤအသုးကလၢၤ တစိၢ်တလီၢ်ဖဲ ဆဂ--- တီၤထီကၠိပူၤ န့ၣ်လီၤ. တီၤထီကၠိတ ဖျၢၣ်အံၤ အိၣ်လၢSAC ပယီၤသုးတၢ်တီခိၣ်ရိၢ် မဲအဖီလာ် န့ၣ်လီၤ. ဖဲလါဒံၣ်စဲဘၢၣ် ၂၈ သီ, ၂၀၂၃ နံၣ်န့ၣ် လီၢ်ကဝီၤ PDFသုးတဖၣ် နုာ်လီၤဟူးဂဲၤဝဲဖဲတီၤထီကၠိကရၢၢ်ဟီၣ်က ဝီၤပူၤအဃိ တၢ်ဒုးကဲထီၣ်ဝဲဒၣ်န့ၣ်လီၤ. လၢတၢ်ခီၣ်ဆၢဝဲ တၢ်ဒုးတဘျီအံၤအဂီၢ်န့ၣ် SAC ပယီၤသုး ကဘီယူၤဟဲ ခးလီၤတၢ်ဖဲ တၢ်ဒုးကဲထီၣ်ဟီၣ်ကဝီၤဝးဝးန့ၣ်လီၤ. မ့ၣ်ပိၢ်လီၤတဲာ်ပိၢ်ဖးထီၣ် အဃိ ဘၣ်ဒိအူအီၣ်ဟးဂီၤကွံာ် ကၠိတၢ်သူၣ်ထီၣ် (၂) ဖျၢၣ်, သဝီဖိဟံၣ် (၂၂) ဖျၢၣ် ဒီး တၢ်စုလီၢ်ခီၣ် ခိၣ်ပီးလီလၢဟံၣ်ပူၤတဖၣ် ခဲလၢာ်န့ၣ်လီၤ. တၢ်ဂီၤတဘ့ၣ်အံၤပာ်ဖျါထီၣ်ဝဲ တၢ်ထီၣ်ဒုးတဘျီ အံၤန့ၣ် မၤဟးဂီၤကွံာ် သဝီဖိအစဲးဖီကဟၣ် လၢအသူဝဲလၢတၢ်လုၢ် အီၣ်နီၢ်ခိသး သမူတၢ်ဖံးအီၣ်မၤအီၣ် တၢ်လဲၤတၢ်က့ၤ ဒီး တၢ်ထူစံာ် သ့ၣ်တဖၣ်အဂီၢ်န့ၣ်လီၤ.[6] (တၢ်ဂီၤ- KHRG)
တၢ်ဂီၤတဘ့ၣ်အံၤ ဘၣ်တၢ်ဒိန့ၢ်အီၤဖဲ ဘရှ--- သဝီ, ထံသဘျုၣ်ထၣ် ကရူၢ်, ဒွဲၣ်လိကီၢ်ဆၣ်, မုၢ်တြီၢ်ကီၢ်ရ့ၣ်န့ၣ် လီၤ. SAC ပယီၤသုးဖိလၢ အအိၣ်ဖဲ ထံသဘျုၣ်ထၣ်ကရူၢ် ကစၢၢ်သၢဖျၢၣ်သုးကလၢၤပူၤတဖၣ် ခးလီၤကျိဖးဒိၣ်ဆူ မးထီ, ထံသဘျုၣ်ထၣ်, ကတၢၢ်တံး ဒီး လ့ဖိထၣ်ကရူၢ် တဖၣ်ပူၤတလီၢ်လီၢ်န့ၣ်လီၤ. ခီဖျိလၢပယီၤသုး တဖၣ်ခး လီၤကျိဖးဒိၣ်ဒ်အံၤအဃိ ဘၣ်ဒိဘၣ်ထံးသဝီဖိ ဒီး ဆၣ်ဖိ ကီၢ်ဖိသ့ၣ်တဖၣ်, ဘၣ်ဟးဂီၤသဝီဖိဟံၣ်ဃီတၢ်စုလီၢ်ခီၣ် ခိၣ်တဖၣ် ဒီး ဒုးအါထီၣ်တၢ်လုၢ်အီၣ်နီၢ်ခိသးသမူတၢ်ဂ့ၢ်ကီ သ့ၣ်တဖၣ်န့ၣ်လီၤ. တၢ်ဂီၤတဘ့ၣ်အံၤ ဘၣ်တၢ်ဒိန့ၢ်အီၤဖဲ တၢ်ကဲထီၣ်သးကျါတခါဝံၤ အလီၢ်ခံဖဲ လါမးရှး ၁ သီ, ၂၀၂၄ နံၣ် ဖဲ ဘရှ---သဝီပူၤ ဒီး မၤဘၣ်ဒိ ဝဲ နီၢ်ဆအ--- အစဲးဂံာ်ဘု, အဟံၣ်, တၢ်စုလီၢ်ခီၣ်ခိၣ်အဂုၤအဂၤ တဖၣ် ဃုာ်ဒီးတၢ်ပာ်ဃာ်ဘုလီၢ်သ့ၣ်တဖၣ်န့ၣ်လီၤ. (တၢ်ဂီၤ- KHRG)
တၢ်ဂီၤသ့ၣ်တဖၣ်အံၤ ဘၣ်တၢ်ဒိန့ၢ်အီၤဖဲ လါမးရှး ၂၀၂၄ နံၣ်အတီၢ်ပူၤဖဲ ဘတ---သဝီ, မွ့ၤတွ့ကရူၢ်, မူကီၢ်ဆၣ်, ချၢၣ်လွံၢ်ထူၣ်ကီၢ်ရ့ၣ် န့ၣ်လီၤ. ဖဲလါမးရှး ၁၁ သီ, ၂၀၂၄ နံၣ်န့ၣ် SAC ပယီၤသုးခီၣ်ချ့သုးရ့ၣ်နီၣ်ဂံၢ် (၅၉၉) လၢအဘၣ် တၢ်သ့ၣ်ညါအီၤလၢ တိတီသုးရ့ၣ်တဖုအံၤ ဖဲအဝဲသ့ၣ်ဒွဲၣ်ပျီအသုးကလၢၤဃၢၤအခါ မ့ၣ်အူလဲးအီၣ်တၢ်လဲၤတုၤဆူ ဘတ--- ဒီး ဘပၠ--- သဝီတဖၣ်အဃိ မ့ၣ်အူအီၣ်ကွံာ် သဝီဖိအဟံၣ် (၄၂) ဖျၢၣ်န့ၣ်လီၤ. မ့ၣ်အူဟဲလဲးအီၣ်တၢ်အခါ ဘၣ်ဖဲသဝီဖိတဖၣ်ဘၣ်ဃ့ၢ်မှံဟးဖျိးဆူတၢ်လီၢ်အဂၤ အဝဲတအိၣ်လၢသဝီပူၤဘၣ်အဆၢကတီၢ် မ့ၢ်လၢSAC ပယီၤသုး တဖၣ်ခးလီၤကျိဖးဒိၣ်လၢသဝီပူၤ ဘၣ်သံ ဒီး ဘၣ်ဒိသဝီဖိတဖၣ်အဃိန့ၣ်လီၤ. ဆၢကတီၢ်လၢသဝီဖိလၢအအိၣ်ဖဲ တၢ်ဃ့ၢ်မှံဟးဖျိးလီၢ်သ့ၣ်တဖၣ် ထံၣ်မ့ၣ်အူပျုၢ်ထီၣ်လိၤလၢအသဝီအခါ အဝဲသ့ၣ်က့ၤကရီဆူသဝီလၢ ကမၤပံာ်မ့ၣ်အူ ဒီး ဒီသဒၢက့ၤအဟံၣ် ဃီတၢ်စုလီၢ်ခီၣ်ခိၣ်သ့ၣ်တဖၣ်အဂီၢ်န့ၣ်လီၤ. ဘၣ်ဆၣ်အဝဲသ့ၣ် ဒီသဒၢဝဲဟံၣ်ဃီတၢ်စုလီၢ်ခီၣ်ခိၣ် သ့ၣ်တဖၣ်ခဲလၢာ်တန့ၢ်ဘၣ်န့ၣ်လီၤ. တၢ်ဂီၤလၢစုစ့ၣ်တကပၤပာ်ဖျါထီၣ်ဝဲ သိလ့ၣ်ကဟၣ် (လိၣ်တဲၤ)အူအီၣ် ဒီး တၢ်ဂီၤ လၢစုထွဲတခီပာ်ဖျါထီၣ်ဝဲစဲးဖီကဟၣ်ပီးလီလၢတၢ်ထူစံာ် ထူပှဲၤတၢ်လုၢ်အီၣ်နီၢ်ခိသးသမူအဂီၢ်သ့ၣ်တဖၣ်အံၤ အူအီၣ် ဟးဂီၤကွံာ်ဝဲခဲလၢာ်န့ၣ်လီၤ. လၢတၢ်န့ၣ်အဃိ စံာ်ပှဲၤစဲးဖီကဟၣ်ဒီးပီးလီ သ့ၣ်တဖၣ်အံၤ အူအီၣ်ဟးဂီၤလီၤမၢ်ကွံာ်အိၣ် အါမးန့ၣ်လီၤ. (တၢ်ဂီၤ- KHRG)
တၢ်ဂီၤတဘ့ၣ်အံၤ ဘၣ်တၢ်ဒိန့ၢ်အီၤဖဲ လါမ့ၤ ၂၀၂၄ နံၣ် ဖဲ ဘရ--- သဝီ, ထံဒ့ဟီၣ်ကဝီၤ, ဒီၣ်ဖါခိၣ်ကီၢ်ဆၣ်, တီအူကီၢ်ရ့ၣ်န့ၣ်လီၤ. ဖဲလါမးရှး ၂၅ သီ, ၂၀၂၄ နံၣ် ဂီၤခီ ၁၀း၄၀ နၣ်ရံၣ်အဆၢကတီၢ်န့ၣ် တၢ်ဒုကဲထီၣ်သးလၢသဝီပူၤ ဒီး တၢ်လီၢ်လၢအဘူးဒီးသဝီတအိၣ် နီတမံၤ ဘၣ်ဆၣ် SAC ပယီၤသုးကဘီယူၤဟဲကွံာ်လီၤမ့ၣ်ပိၢ်ဖဲ ဘရ---သဝီပူၤန့ၣ်လီၤ. လၢတၢ်န့ၣ်အဃိ မ့ၣ်ပိၢ်ဘၣ်ဟးဂီၤကွံာ်သဝီဖိ အဟံၣ် (၂) ဖျၢၣ်, ကျီၢ်ကရၢတဖျၢၣ်, တခိးထူၣ်, ဃီၤထူၣ် ဒီး တၢ်ထူၣ်တၢ်မုၢ်တၢ်ဘိအဂၤလၢ သဝီဖိသူၣ်လီၤလၢအတၢ်လုၢ်အီၣ် နီၢ်ခိသးသမူဂီၢ်သ့ၣ်တဖၣ် န့ၣ်လီၤ. ဟံၣ် (၂)ဖျၢၣ် ဒီး ကျီၢ်ကရၢ တဖျၢၣ်အလုၢ်ပှ့ၤလီၤလၢစ့အကလီၢ် (၂၀၀) ကၠးန့ၣ်လီၤ. တၢ်ဂီၤတဘ့ၣ်အံၤပာ်ဖျါထီၣ်ဝဲ ဟံၣ်လၢအအူအီၣ်ဟးဂီၤကွံာ်အကျါတဖျၢၣ် ဃုာ်ဒီးစဲးဖီကဟၣ်ပီးလီလၢတၢ်လုၢ်အီၣ် နီၢ်ခိသးသမူအဂီၢ် ဒ်အမ့ၢ် စဲးဂံာ်ဘု, သဘ့ၤချံ (ပဲ), သဘ့ၤဟီၣ်လာ် ဒီး နံၣ်သိသ့ၣ်တဖၣ် န့ၣ်လီၤ. ဟံၣ် (၂) ဖျၢၣ်အံၤမ့ၢ် အူ ဒရ--- ဒီး အူ ဒစ--- အဟံၣ် ဒီး မ့မ့ၢ် ကျီၢ်ကရၢတဖျၢၣ်အံၤန့ၣ်မ့ၢ် အူ ဘစ--- အကျီၢ်ကရၢ န့ၣ်လီၤ. (တၢ်ဂီၤ- KHRG)
တၢ်ဂီၤတဘ့ၣ်အံၤ ဘၣ်တၢ်ဒိန့ၢ်အီၤဖဲ လါအီကူး ၂၀၂၄ နံၣ်ဖဲ ဘဖ--- သဝီ, အံဟဲကရူၢ်, ဖၣ်အၣ်ကီၢ်ဆၣ်, ဒူသထူၣ်ကီၢ်ရ့ၣ်န့ၣ်လီၤ. ဖဲလါအီကူး ၂၂ သီ, ၂၀၂၄ နံၣ် န့ၣ် SAC ပယီၤသုးပၢဆှၢဝဲၤလီၢ်ခိၣ် သ့ၣ် (စကခ) နီၣ်ဂံၢ် (၈) အိၣ်ဖဲ ပနွဲၢ်ကျါသုးကလၢၤ, မီၢ်လ့ကရူၢ်, ဘံလ့ ကီၢ်ဆၣ် သုးဖိတဖၣ်အံၤ ခးလီၤကျိဖးဒိၣ် (၂)ဖျၢၣ်ဆူ ဘဖ--- သဝီပူၤန့ၣ်လီၤ. ကျိဖးဒိၣ် (၁၂၀မမ)တဖျၢၣ် လီၤတဲာ်ပိၢ်ဖးထီၣ် ဘူးဒီးစီၤဘထ--- အဟံၣ်အဃိ ကျိဖးဒိၣ်က့ ဘၣ်ဒိအဟံၣ်ခိၣ် ဒီး အဂီၤပၤဒူၣ်န့ၣ်လီၤ. ကျိဖးဒိၣ်အဝဲတဖျၢၣ် လီၤတဲာ်ပိၢ်ဖးထီၣ်ဘူးဒီး စီၤဘည--- ဒဲအဃိ ကျိဖးဒိၣ်က့ဘၣ်ဟးဂီၤအစိၤလၤတဘ့ၣ် အိၣ်ဖျါဝဲလၢတၢ်ဂီၤပူၤန့ၣ်လီၤ. (တၢ်ဂီၤ- KHRG)
တၢ်ဂီၤသ့ၣ်တဖၣ်အံၤ ဘၣ်တၢ်ဒိန့ၢ်အီၤဖဲ လါနိၣ်ဝ့ဘၢၣ် ၂၀၂၄ နံၣ် ဖဲ ဆဘ--- သဝီ, ကတၢၢ်တံးကရူၢ်, ဒွဲၣ်လိကီၢ်ဆၣ်, မုၢ်တြီၢ်ကီၢ်ရ့ၣ် န့ၣ်လီၤ. ဖဲလါနိၣ်ဝ့ဘၢၣ် ၂၄ သီ, ၂၀၂၄ နံၣ် ဟါလီၤခီ ၃း၀၀ နၣ်ရံၣ်န့ၣ် SAC ပယီၤသုးဖိ လၢအအိၣ် ဖဲကစၢၢ်သၢဖျၢၣ်သုးကလၢၤတဖၣ် ခးလီၤကျိဖးဒိၣ်ဆူ ဆဘ--- သဝီပူၤန့ၣ်လီၤ. ကျိဖးဒိၣ်က့ ဘၣ်ဒိသဝီဖိ စီၤဆဆ--- အစဲးဂံာ်ဘုတဖျၢၣ် ဒီး တၢ်ဖိတၢ်လံၤအဂၤသ့ၣ်တဖၣ် အိၣ်ဖျါလၢတၢ်ဂီၤပူၤန့ၣ်လီၤ. ကျိဖးဒိၣ်ဘၣ်ဟးဂီၤစ့ၢ်ကီး နီၢ် စဒ--- အဟံၣ်တဖျၢၣ် ဒီး စီၤ စအ--- အဟံၣ်တဖျၢၣ်န့ၣ်လီၤ. (တၢ်ဂီၤ- KHRG)
တၢ်ဂီၤတဘ့ၣ်အံၤ ဘၣ်တၢ်ဒိန့ၢ်အီၤဖဲ လါမးရှး ၂၀၂၄ နံၣ် ဖဲ ဖၣ်ပူၣ်ဝ့ၢ်ပူၤ, မုၢ်တြီၢ်ကီၢ်ရ့ၣ်န့ၣ်လီၤ. တၢ်ဂီၤတဘ့ၣ်အံၤ ပာ်ဖျါထီၣ်ဝဲ SAC ပယီၤသုး ကဘီယူၤခးလီၤတၢ်လၢ ဖၣ်ပူၣ်ဝ့ၢ်ပူၤတၢ်ဟးဂုၤ ဟးဂီၤသ့ၣ်တဖၣ် ဒ်အမ့ၢ် သဝီဖိ ဟံၣ်ဃီ, ကျးဒီး သိလ့ၣ်န့ၣ်လီၤ. တၢ်စုလီၢ်ခီၣ်ခိၣ်ပီးလီ သ့ၣ်တဖၣ်အံၤ မ့ၢ်တၢ်အရ့ဒိၣ်လၢ အတၢ်လုၢ်အီၣ်နီၢ်ခိ သးသမူတၢ်ဖံးအီၣ်မၤအီၣ်အဂီၢ်ဒိၣ်မးန့ၣ်လီၤ. SAC ပယီၤသုးကဘီယူၤခးလီၤတၢ်ဖဲ တၢ်ဒုးကဲထီၣ်လၢ လီၢ်ကဝီၤ သုးပာ်ဖှိၣ် ဒီး SAC ပယီၤသုးအဘၢၣ်စၢၤ ဖဲ SAC ပယီၤသုး ဖၣ်ပူၣ်သုးကလၢၤလီၢ်န့ၣ်လီၤ. (တၢ်ဂီၤ- KHRG)
တၢ်ဂီၤသ့ၣ်တဖၣ်အံၤ ဘၣ်တၢ်ဒိန့ၢ်အီၤဖဲ လါအ့ဖြ့ၣ် ၂၀၂၄ နံၣ် ဖဲ အဘ--- သဝီ, မူဟီၣ်ကဝီၤလီၤဆီ, မူကီၢ်ဆၣ်, ချၢၣ်လွံၢ်ထူၣ်ကီၢ်ရ့ၣ်န့ၣ်လီၤ. ဖဲလါဖ့ၤဘြူၤအါရံၤ အကတၢၢ်တနွံ ၂၀၂၄ နံၣ်န့ၣ် SAC ပယီၤ ခီၣ်ချ့သုးရ့ၣ် နီၣ်ဂံၢ် (၄၃၉, ၆၀ ဒီး ၅၂၈)သုးဖိတဖၣ် လၢအအိၣ်ဖဲ စွ့ၤဝၤသုးကလၢၤ, မူဟီၣ်ကဝီၤလီၤဆီပူၤ နုာ်လီၤဟူးဂဲၤလၢဒူသဝီပူၤအခါ ဒိးလီၤမ့ၣ်ပိၢ်, ခးလီၤကျိဖးဒိၣ် ဒီး ဒွဲၣ်အူဒူသဝီဟံၣ်ဃီသ့ၣ်တဖၣ်န့ၣ်လီၤ. SAC ပယီၤသုးတဖၣ် ဒွဲၣ်အူအီၣ်ကွံာ် အဘ---, အဆ---, အဒ--- ဒီး အဃ--- သဝီဖိတဖၣ် အဟံၣ်ဃီအါအါဂီၢ်ဂီၢ်န့ၣ်လီၤ. သဝီဖိတဘၣ်က့ၤဟံတၢ်အီၣ်တၢ်အီ ဒီး ဂံၢ်ခီၣ်ထံးတၢ်လိၣ်ဘၣ်အဂၤတဖၣ် လၢဒူသဝီပူၤတဘူၣ်ဘၣ်န့ၣ်လီၤ. သဝီဖိသ့ၣ်တဖၣ်အံၤ လဲၤဃ့ၢ်အိၣ်ကဒုလၢ အယ--- သဝီ, မူဟီၣ်ကဝီၤလီၤဆီအပူၤန့ၣ်လီၤ. တၢ်ဂီၤသ့ၣ်တဖၣ်အံၤပာ်ဖျါထီၣ်ဝဲ SAC ပယီၤသုးဒွဲၣ်အူအီၣ်ကွံာ် အဘ--- သဝီဖိအဟံၣ်ဃီတၢ်စုလီၢ်ခီၣ်ခိၣ် ဃုာ်ဒီး သိလ့ၣ်ယီၢ် ဒီး စဲးဖီကဟၣ်ပီးလီသ့ၣ်တဖၣ် ဖဲလါဖ့ၤဘြူၤအါရံၤ ၂၀၂၄ နံၣ်အ ခါန့ၣ်လီၤ. အါန့ၢ်အန့ၣ် ဖဲလါအ့ဖြ့ၣ် ၁၂ သီန့ၣ်, အခ--- သဝီဖိတဂၤ ယီၢ်ဘၣ်ဟီၣ်လာ်မ့ၣ်ပိၢ် ဒီး ဘၣ်ဒိဝဲဖဲ အဘ--- သဝီ ပူၤ ဖဲအလဲၤတီဆှၢတၢ်ဖိတၢ်လံၤ ဒ်အမ့ၢ် ဘုသး, တၢ်အီၣ်တၢ်အီအဂၤ ဒီး တၢ်ဖိတၢ်လံၤအဂၤဒ်အမ့ၢ် ယၣ်လုး, သပၢၤနီၣ်ဒိ ဒီး သဘံၣ်လီခီသ့ၣ်တဖၣ်အခါန့ၣ်လီၤ. (တၢ်ဂီၤ- KHRG)
တၢ်ဂီၤတဘ့ၣ်အံၤ ဘၣ်တၢ်ဒိန့ၢ်အီၤဖဲ လါအီကူး ၂၀၂၄ နံၣ် ဖဲ ဆဟ--- သဝီ, ထူဝါစဲးကရူၢ်, လၢၢ်ဒိၣ်ကီၢ်ဆၣ်, ချၢၣ်လွံၢ် ထူၣ်ကီၢ်ရ့ၣ်န့ၣ်လီၤ. ဖဲလါအီကူး ၈ သီ, ၂၀၂၄ နံၣ်န့ၣ် SAC ပယီၤသုး ခီၣ်သုးရ့ၣ်နီၣ်ဂံၢ် (၂၆၄) သုးဖိတဖၣ် ခးလီၤကျိဖးဒိၣ် (၁၅၅မမ)လၢ ဆဟ--- သဝီပူၤန့ၣ်လီၤ. ကျိဖးဒိၣ်က့ မၤဟးဂီၤသဝီဖိတၢ်စုလီၢ်ခီၣ်ခိၣ် ဃုာ်ဒီး ဟံၣ် ဃီ, တၢ်လုၢ်အီၣ်နီၢ်ခိသးသမူပီးလီ ဒီး တၢ်လဲၤတၢ်က့ၤ ပီးလီဒ်အမ့ၢ် လ့ၢ်ယီၢ် ဒ်အအိၣ်ဖျါလၢတၢ်ဂီၤတဘ့ၣ်အံၤ အပူၤန့ၣ်လီၤ. (တၢ်ဂီၤ- KHRG)
တၢ်ဂီၤသ့ၣ်တဖၣ်အံၤ ဘၣ်တၢ်ဒိန့ၢ်အီၤဖဲ လါအီကူး ၂၀၂၄ နံၣ် ဖဲကျဲမုၢ်ခိၣ်တၢ်လီၢ်တတီၤလၢအဘူးဒီး ဆမ--- သဝီ, ပရှီလိာ်ဟီၣ်ကဝီၤ, ဒီၣ်ဖါခိၣ်ကီၢ်ဆၣ်, တီအူကီၢ်ရ့ၣ်န့ၣ်လီၤ. တၢ်ဂီၤတဖၣ်အံၤ ပာ်ဖျါထီၣ်ဝဲ မ့ၣ်ပိၢ် ပိၢ်ဖးထီၣ်ဒီးမၤဟး ဂီၤ ကမျၢၢ်တိၤတဘိအံၤ ဖဲလါအီကူး ၂၀ သီအနံၤန့ၣ်လီၤ. သုးလၢအမၤဟးဂီၤတိၤတဘိအံၤ မ့ၢ်သုးဖီၣ်စုကဝဲၤဖဲလဲၣ် တဖုလဲၣ်န့ၣ် လီၢ်ကဝီၤသဝီဖိသ့ၣ်တဖၣ် ဆိကမိၣ်တယးဝဲ တဘၣ်ဘၣ် မ့ၢ်လၢသုးဖီၣ်စုကဝဲၤဟူးဂဲၤဝဲဖဲဟီၣ်ကဝီၤအံၤ အပူၤအိၣ်တဘျုးဖုညါအဃိန့ၣ်လီၤ. ခီဖျိလၢတိၤဟးဂီၤဒ်အံၤအဃိ လီၢ်ကဝီၤသဝီဖိသ့ၣ်တဖၣ် ကွၢ်စၢၣ်မဲာ်ဘၣ်ဝဲ တၢ်လဲၤထီၣ်က့ၤလီၤတၢ်ဂ့ၢ်ကီအဃိ ကဲထီၣ်တၢ်ကီတၢ်ခဲဒိၣ်ဒိၣ်မုၢ်မုၢ်လၢကဝံစိာ်တီဆှၢဖံးမၤ တၢ်လၢအတၢ်လုၢ်အီၣ်နီၢ် ခိသးသမူအဂီၢ်ဒိၣ်ဒိၣ်မုၢ်မုၢ်န့ၣ်လီၤ. (တၢ်ဂီၤ- KHRG)
တၢ်ဂီၤတဘ့ၣ်အံၤ ဘၣ်တၢ်ဒိန့ၢ်အီၤဖဲ လါအီးကထိဘၢၣ် ၉ သီ, ၂၀၂၄ နံၣ်ဖဲ စံာ်ပျီပူၤတၢ်လီၢ်တတီၤလၢအဘူးဒီး ဆက--- သဝီ, ဒ့လိၤမုၢ်နုာ်ဟီၣ်ကဝီၤ, ထီတထူၣ်ကီၢ်ဆၣ်, တီအူ ကီၢ်ရ့ၣ်န့ၣ်လီၤ. ဖဲလါအီးကထိဘၢၣ် ၇ သီ, ၂၀၂၄ နံၣ် ဟါခီ ၆း၄၅ နၣ်ရံၣ်အဆၢကတီၢ်န့ၣ် SAC ပယီၤသုးခီၣ် သုးရ့ၣ်နီၣ်ဂံၢ် (၃၉) အိၣ်ဖဲ လ့မဲၤသုးကလၢၤ, သၤဒီၤကၠံဝ့ၢ် ပူၤသုးဖိတဖၣ် ခးလီၤကျိဖးဒိၣ် (၃) ဖျၢၣ်လၢကမျၢၢ်အိၣ် တၢ်လီၢ်ဟီၣ်ကဝီၤပူၤန့ၣ်လီၤ. ကျိဖးဒိၣ်အကျါတဖျၢၣ်လီၤ တဲာ်ပိၢ်ဖးထီၣ်ဝဲဖဲ သဝီဖိ စီၤ ဆလ--- (၄၇ နံၣ်) အသဲးကျိး ပူၤလၢအဘူးဒီး အဟံၣ်န့ၣ်လီၤ. ကျိဖးဒိၣ်က့ ဘၣ်ဒိစ့ၢ်ကီး သဝီဖိတဂၤ အမဲာ်တူၢ်ဃၢၤ, ဘၣ်ဒိ သဲးထူၣ်, တခိးထူၣ်, ဒဲတဖျၢၣ် ဒီး သိလ့ၣ်ယီၢ်တခိၣ် အိၣ်ဖျါလၢတၢ်ဂီၤတဘ့ၣ် အံၤပူၤန့ၣ်လီၤ. သိလ့ၣ်ယီၢ်တခိၣ်အံၤ အကစၢ်သူဝဲလၢ အတၢ်လဲၤက့ၤဖံးမၤတၢ်အဂီၢ်န့ၣ်လီၤ.[7] (တၢ်ဂီၤ- လီၢ်ကဝီၤသဝီဖိ)
တၢ်ဂီၤတဘ့ၣ်အံၤ ဘၣ်တၢ်ဒိန့ၢ်အီၤဖဲ လါအီးကထိဘၢၣ် ၂၀၂၄ နံၣ် ဖဲတၢ်လီၢ်လၢအဘူးဒီး ဆန--- သဝီ, စးတဲၤကရူၢ်, လၢၢ်ကဆီ ကီၢ်ဆၣ်, ဘျံးဒဝဲၢ်ကီၢ်ရ့ၣ်န့ၣ်လီၤ. ဖဲလါအီး ကထိဘၢၣ် ၉ သီ, ၂၀၂၄ နံၣ်န့ၣ် ကီၢ်သူလ့ၤသုးမုၢ်ဒိၣ် (KTLA)သုးဖိလၢအအိၣ်ဖဲ KTLA တၢ်သမံသမိးတြဲၤလၢအ အိၣ်ဘူးဒီး ဆန--- သဝီတဖျၢၣ်အံၤ သမံသမိးဝဲသိလ့ၣ် ဘၢးစ်တခိၣ်အံၤအခါ ထံၣ်ဝဲကျိချံအဘ့ၣ်အိ (၂) ဖျၢၣ် န့ၣ်လီၤ. အဃိ အဝဲသ့ၣ်မၢပှၤနီသိလ့ၣ်ဖိတဂၤ ဒီး ပှၤဒၢးသိ လ့ၣ်ဖိ (၆) ဂၤစံၣ်လီၤလၢသိလ့ၣ်ပူၤ, ဘ့ၣ်လီၤဆ့ကၤ ဒီး မံကြာ်လီၤ လၢသိလ့ၣ်ကျဲမုၢ်ခိၣ် လၢတၢ်စူၤကျါန့ၣ်လီၤ. KTLA သုးဖိတဖၣ်အံၤ တသံကွၢ်သံဒိးတၢ်နီတမံၤဘၣ် ဒီး တီၢ်ဝဲသဝီဖိတဖၣ်အံၤန့ၣ်လီၤ. အဝဲသ့ၣ်ဖီၣ်ဃာ်ဝဲသဝီဖိသ့ၣ်တဖၣ်အံၤ စးထီၣ်လၢ ဂီၤခီ ၈း၀၀ နၣ်ရံၣ် တုၤလၢ ဂီၤခီ ၁၁း၀၀ နၣ်ရံၣ် တုၤလၢ KTLAသုးရ့ၣ်ခိၣ် ဟဲတုၤလၢ တၢ်သမံသမိးတြဲၤလီၢ်န့ၣ်လီၤ. သုးရ့ၣ်ခိၣ်ဟ့ၣ်လီၤ သဝီဖိတဖၣ်အံၤ စ့အီၣ်လိး ၁၅၀,၀၀၀ ကၠး ဘၣ်ဆၣ် တဃ့ဝံသး စူၤတၢ်နီတမံၤဘၣ်န့ၣ်လီၤ. (တၢ်ဂီၤ- KHRG)
တၢ်ဂီၤတဘ့ၣ်အံၤ ဘၣ်တၢ်ဒိန့ၢ်အီၤဖဲ လါအီးကထိဘၢၣ် ၂၀၂၄ နံၣ် ဖဲ ဆထ--- သဝီ, မၠီၣ်ကၠးအ့ကရူၢ်, ကြုၢ်တုကီၢ်ဆၣ်, ဒူပျာ်ယာ် ကီၢ်ရ့ၣ်န့ၣ်လီၤ. ဖဲလါအီးကထီၣ်ဘၢၣ် ၁၈ သီန့ၣ် SAC ပယီၤသုး ပၢဆှၢဝဲၤလီၢ်ခိၣ်သ့ၣ် (စကခ) နီၣ်ဂံၢ် (၁၂) အဖီလာ် စုကဝဲၤဒိၣ် နီၣ်ဂံၢ် (၅၄၅) သုးဖိလၢအအိၣ်ဖဲ ကီးတရံးကီၢ်ဆၣ်ပူၤတဖၣ်အံၤ ခးလီၤကျိဖးဒိၣ် (၂) ဘျီ ခးလီၤကျိဖးဒိၣ်ချံ (၆) ဖျၢၣ်လၢ ဆထ--- သဝီပူၤန့ၣ်လီၤ. အဃိ ကျိဖးဒိၣ်က့ဘၣ်သံသဝီဖိတဂၤအမံၤမ့ၢ် အူ ဆည--- ဖဲအကွၢ်ကျီၢ်လၢပျီပူၤအခါ အိၣ်ဖျါလၢတၢ်ဂီၤပူၤန့ၣ်လီၤ.[8] (တၢ်ဂီၤ- KNU တၢ်ကစီၣ်ဂံၢ်ထံး)
|
တၢ်ဂီၤသ့ၣ်တဖၣ်အံၤ ဘၣ်တၢ်ဒိန့ၢ်အီၤဖဲ လါနိၣ်ဝ့ဘၢၣ် ၂၀၂၄ နံၣ် ဖဲကျိးပူၤတၢ်လီၢ်တတီၤလၢအအိၣ်ဖဲ ဆစ--- သဝီ ဒီး ဆတ---သဝီအဘၢၣ်စၢၤ, ကီၢ်သ့ဒၢ ရူၢ်, ထီတထူၣ်ကီၢ်ဆၣ်, တီအူကီၢ်ရ့ၣ်န့ၣ်လီၤ. ဖဲလါနိၣ်ဝ့ဘၢၣ် ၂၁ သီ, ၂၀၂၄ နံၣ်န့ၣ် SAC ပယီၤသုးပၢဆှၢ ဝဲၤလီၢ်ခိၣ်သ့ၣ် (စကခ) နီၣ်ဂံၢ် (၂၀)သုးကလၢၤ လၢအအိၣ်ဘူးဒီး ဆရ--- သဝီ, ကီၢ်သ့ဒၢ ကရူၢ်, ထီတထူၣ်ကီၢ်ဆၣ်သုးကလၢၤ, သ့ၣ်စ့ၤတီၤသုးကလၢၤ (ထီတတူၣ်ကီၢ်ဆၣ်) ဒီး ပၠီၤသိသုးကလၢၤ (ဒီၣ်ဖါခိၣ်ကီၢ်ဆၣ်)သုးသ့ၣ်တဖၣ် ခးလီၤကျိဖးဒိၣ် (၁၂၀မမ ဒီး ၆၀ မမ) (၁၀) ဖျၢၣ်လၢကမျၢၢ်ဟီၣ်ကဝီၤပူၤဃုာ်ဒီး ကျဲ ဒီး ကျီးတၢ်သူၣ်အီၣ်ဖျးအီၣ်လီၢ်သ့ၣ်တဖၣ်န့ၣ်လီၤ. ကျိဖးဒိၣ်ပိၢ်ဖးထီၣ်ဘၣ်သံ သဝီဖိတဂၤ အမံၤမ့ၢ် စီၤ ဆပၠ--- သးနံၣ်အိၣ် (၃၀) နံၣ် ဒီး ဘၣ်ဒိသဝီဖိတဂၤ အမံၤမ့ၢ် နီၢ် ဆဖ--- သနံၣ်အိၣ် (၅၅) နံၣ်န့ၣ်လီၤ. တၢ်ကဲထီၣ်သးအံၤဝံၤအ လီၢ်ခံ သဝီဖိစဲကျိး တီအူဝ့ၢ်ပှၤမုာ်သးမၤကလီကရူၢ်တဖုအသိလ့ၣ် လၢတၢ်လဲၤတၢ်က့ၤအဂီၢ်န့ၣ်လီၤ. သိလ့ၣ်အံၤ လဲၤဆှၢအဝဲသ့ၣ်ဆူတီအူဝ့ၢ် ကမျၢၢ်တၢ်ဆါဟံၣ် လၢတၢ်ကူဆါယါဘျါအဂီၢ်န့ၣ်လီၤ. တၢ်ဆါဟံၣ်အံၤ ဘၣ်တၢ်ပၢဆှၢ အီၤလၢ ကီၢ်ယီၤပဒိၣ်န့ၣ်လီၤ. တၢ်ဂီၤလၢစုစ့ၣ်တဘ့ၣ်အံၤန့ၣ် ပာ်ဖျါထီၣ်ဝဲ ပှၤတူၢ်ဘၣ်တၢ်အကျါတဂၤအခီၣ်ဖံးဖျီၣ်မီ တခိၣ်အံၤ အိၣ်တီၢ်ဖဲတၢ်ကဲထီၣ်သးအလီၢ်န့ၣ်လီၤ. တၢ်ဂီၤလၢအထွဲတခီပာ်ဖျါထီၣ်ဝဲ သဝီဖိ စီၤအပၠ--- အသဲးထူၣ် ဘၣ်ဒိဒီးကျိဖးဒိၣ်က့လၢအသဲးကျိးပူၤန့ၣ်လီၤ.[9] (တၢ်ဂီၤ- KHRG) |
တၢ်ဂီၤတဘ့ၣ်အံၤ ဘၣ်တၢ်ဒိန့ၢ်အီၤဖဲ လါနိၣ်ဝ့ဘၢၣ် ၂၅ သီ, ၂၀၂၄ နံၣ် ဖဲ ဒတ--- သဝီ, ဒီၣ်ဖါခိၣ်ကီၢ်ဆၣ်, တီအူကီၢ်ရ့ၣ်န့ၣ်လီၤ. တၢ်ဂီၤတဘ့ၣ်အံၤပာ်ဖျါထီၣ်ဝဲ သဝီဖိ ကိၤဆဝ--- (၃၃) နံၣ်တဂၤ အံၤ ဘၣ်ဒိအဂီၤ ဒီးအဝဲမ့ၢ်ပှၤနီဒိးလဲသိလ့ၣ် ဖိလၢအအိၣ်လၢ ဆပ--- ဟီၣ်ကဝီၤန့ၣ်လီၤ. ဖဲလါနိၣ်ဝ့ဘၢၣ် ၂၅ သီ, ၂၀၂၄ နံၣ်န့ၣ် ကိၤ ဆဝ--- လဲၤနီဝဲသိလ့ၣ် စးထီၣ်လၢတီအူဝ့ၢ် ဒီး လဲၤဝဲဆူကျ့ၤစိခံ တၢ်လီၢ်န့ၣ်လီၤ. ဖဲအဝဲ လဲၤတုၤဝဲဖဲ ဆခ--- ဟီၣ်ကဝီၤပူၤအခါ SAC ပယီၤသုးဖိလၢတကၤသုးကူကၤလၢပှဲၤဘၣ်အနီၣ်ဂံၢ်ကအိၣ် (၆) ဂၤ မၢအအိၣ်ပတုာ် ဒီး မၢအဟးထီၣ်လၢသိလ့ၣ်ပူၤန့ၣ်လီၤ. SAC ပယီၤသုးဖိတဖၣ် ထိးအီၤလၢကျိတပယူာ်ဃီန့ၣ်လီၤ. ဖဲကိၤ ဆဝ--- ဟးထီၣ်လၢသိလ့ၣ်ချၢတဘျီဃီ ပယီၤသုးဖိတဖၣ်အံၤ မၢမံၤနီၤလီၤ လၢဟီၣ်ခိၣ်လိၤ ဒီး တီၢ်အခိၣ်သၣ်ဃံ ဒီးကျိန့ၣ်လီၤ. သုးဖိတဖၣ် အံၤ ဟံးဆူၣ်ကွံာ်အလီတဲစိ ဒီး စ့ကအိၣ် ၁၅၀,၀၀၀ ကၠးန့ၣ်လီၤ. သုးဖိတဖၣ်အံၤ ထူတံၢ်စ့ၢ်ကီးဝဲ ပှၤနီသိလ့ၣ်ဖိအပျဲၢ်သးနံၣ်အိၣ် (၂၁) နံၣ်တဂၤအံၤ ဆူၣ်ဆူၣ်ကလဲၤအဃိ အဝဲလီၤရံးလၢသိလ့ၣ် ဖီလာ်န့ၣ်လီၤ. တၢ်ကဲထီၣ်သးကယံာ် (၃) မံးနံးဝံၤအလီၢ်ခံ တၢ်ပျဲကွံာ်အဝဲသ့ၣ်န့ၣ်လီၤ. ကိၤဆဝ--- အခိၣ်သၣ်ဃံဘၣ်ဒိအဃိ လဲၤဒိးကူဆါယါဘျါအသးလၢ ဆခ--- တၢ်ဟ့ၣ်ကသံၣ်ဒၢး ဒီး ကသံၣ်သရၣ်ဆးန့ၢ်အီၤ (၈) ထံၣ်န့ၣ်လီၤ. ကိၤဆဝ--- နီဒိးလဲသိလ့ၣ်ဖဲ ဆရ--- ဟီၣ်ကဝီၤပူၤလၢအတၢ်လုၢ်အီၣ်နီၢ် ခိသးသမူအဂီၢ်န့ၣ်လီၤ. တၢ်ကဲထီၣ်သးတနံၤဃီဃီန့ၣ် တၢ်ထီၣ်အီၣ်ဟုၣ်တၢ်လၢသဝီဖိအဟံၣ် ကအိၣ်(၅)ဖျၢၣ်ညါ န့ၣ်လီၤ. (တၢ်ဂီၤ- လီၢ်ကဝီၤသဝီဖိ)
တၢ်ဂီၤတဘ့ၣ်အံၤ ဘၣ်တၢ်ဒိန့ၢ်အီၤဖဲ လါယူၤလံ ၂၀၂၄ နံၣ် ဖဲ စံာ်ပျီပူၤလၢအဘူးဒီး ဒဖ--- သဝီ, နိခွံၤကရူၢ်, တၢ်ကြဲၢ်ကီၢ်ဆၣ်, ဖၣ်အၣ်ကီၢ်ရ့ၣ်န့ၣ်လီၤ. တၢ်ဂီၤတဘ့ၣ်အံၤပာ်ဖျါထီၣ်ဝဲ သဝီဖိအစံာ် ပျီလၢထံဒိၣ်မၤဟးဂီၤဘုအကျါတလီၢ် ဖဲလါ ယူၤလံ ၂၂ သီ ဒီး ၂၆ သီအခါန့ၣ်လီၤ. ထံဒိၣ်ဟးဂီၤစ့ၢ်ကီး နိခွံၤတိၤတဘိအံၤန့ၣ်လီၤ. (တၢ်ဂီၤ- KHRG)
တၢ်ဂီၤတဘ့ၣ်အံၤ ဘၣ်တၢ်ဒိန့ၢ်အီၤဖဲ လါယူၤလံ ၂၀၂၄ နံၣ် ဖဲ တၢ်လီၢ်လၢအဘူးဒီး ဒပၠ--- သဝီ, ကၠဲးတူရ့ကရူၢ်, တၢ်ကြဲၢ်ကီၢ်ဆၣ်, ဖၣ်အၣ်ကီၢ်ရ့ၣ်န့ၣ်လီၤ. တၢ်ဂီၤတဘ့ၣ် အံၤပာ်ဖျါထီၣ်ဝဲ ထံဒိၣ်မၤဟးဂီၤဝဲတိၤလၢ အအိၣ်ဘူးဒီး ဒပၠ--- သဝီတဘိအံၤဖဲ လါယူၤလံ ၂၂ သီ ဒီး ၂၆ သီ အခါန့ၣ်လီၤ. (တၢ်ဂီၤ- KHRG)
တၢ်ဂီၤတဘ့ၣ်အံၤ ဘၣ်တၢ်ဒိန့ၢ်အီၤဖဲ လါအီကူး ၂၀၂၄ နံၣ် ဖဲ ဆယ--- သဝီ, ထံသဘျုၣ်ထၣ်ကရူၢ်, ဒွဲၣ်လိကီၢ်ဆၣ်, မုၢ်တြီၢ်ကီၢ်ရ့ၣ် အပူၤန့ၣ်လီၤ. တၢ်ဂီၤတဘ့ၣ်အံၤ ပာ်ဖျါထီၣ်ဝဲ ဆယ--- သဝီဖိ အစံာ်ပျီအကျါတဘ့ၣ်လၢ ဘုထီၣ်ဂီၤလီၤဘီ ခီဖျိ တၢ်ဖိဃၢ်အီၣ်မၤဟးဂီၤ အဃိန့ၣ်လီၤ. ပှၤထူစံာ်ဖိကိးဂၤဒဲး ဃၣ်ဃၣ် ကွၢ်ဆၢာ်မဲာ်ဘၣ်ဝဲ တၢ်ဖိဃၢ်အီၣ်ဟးဂီၤဘုဒ်အံၤ အဃိ အဝဲသ့ၣ်ကွၢ်ဆၢၣ်မဲာ်ဘၣ်ဝဲ ဘုဟုတလၢလီၣ်ဘၣ် တၢ်ဂ့ၢ်ကီသ့ၣ်တဖၣ်န့ၣ် လီၤ. သဝီဖိသ့ၣ်တဖၣ် ဂုာ်ကျဲးစၢးပှ့ၤကသံၣ်ခးသံတၢ်ဃၢ် ဒီး ခးဝဲဘုသ့ၣ်တဖၣ်အံၤဒ်သိး ကဒီသဒၢမၤပတုာ်ကွံာ်တၢ်ဖိဃၢ် လၢအမၤဟးဂီၤဘုဟု တဖၣ်အံၤအဂီၢ် ဘၣ်ဆၣ် မၤဝဲတနၢၤဘၣ်ဘၣ် အဃိ ဘုသ့ၣ်တဖၣ်ဟးဂီၤအါအါ ဂီၢ်ဂီၢ်န့ၣ်လီၤ. အါန့ၢ်အန့ၣ် လီၢ်ကဝီၤသဝီဖိသ့ၣ်တဖၣ် ဘၣ်အိၣ်ဒံးဒၣ်လၢ SAC ပယီၤ သုးခးလီၤကျိဖးဒိၣ် ဒီးကဘီယူၤဟဲခးလီၤတၢ် တၢ်လီၢ်ဘၣ်ယိၣ်လီၢ်န့ၣ်လီၤ. အဃိ အဝဲသ့ၣ်ဘၣ်ယိၣ်တၢ်လၢ အတၢ်အီၣ်မိၢ်ပှၢ်လၢ ခါဆူညါနံၣ်လၢကဟဲအဂီၢ် ဒိၣ်ဒိၣ်မုၢ်မုၢ်န့ၣ်လီၤ. (တၢ်ဂီၤ- KHRG)
တၢ်ဂီၤတဘ့ၣ်အံၤ ဘၣ်တၢ်ဒိန့ၢ်အီၤဖဲ လါအီကူး ၂၀၂၄ နံၣ် ဖဲ ဒထ--- သဝီ, ယွၤတၤရှ့ၤကရူၢ်, ကီးတရံးကီၢ်ဆၣ်, ဒူပျာ်ယာ်ကီၢ်ရ့ၣ် န့ၣ်လီၤ. တၢ်ဂီၤတဘ့ၣ်အံၤပာ်ဖျါထီၣ်ဝဲ သဝီဖိအစံာ်လီၢ်တဖၣ်ဖဲ ယွၤတၤရှ့ၤကရူၢ်ဟီၣ်ကဝီၤပူၤ ဘၣ်ဃး ထံဒိၣ်ဟးဂီၤဘုဖဲ လါအီကူး ၂၀၂၄ နံၣ်အဆၢကတီၢ် ဒီး ထံဒိၣ်ဟးဂီၤစ့ၢ်ကီးဘုလၢ ကရူၢ်အဂၤ အါဘ့ၣ်အပူၤ ဒ်အမ့ၢ် အီဖး, ကီးနွဲၢ်, ကၠးကဝး, တရံးတကွီၢ် ဒီး ကရူၢ်အဂၤသ့ၣ်တဖၣ်န့ၣ်လီၤ.[10] (တၢ်ဂီၤ- KHRG)
တၢ်ဂီၤတဘ့ၣ်အံၤ ဘၣ်တၢ်ဒိန့ၢ်အီၤဖဲ လါစဲးပထ့ဘၢၣ် ၂၀၂၄ နံၣ်ဖဲ စံာ်ပျီပူၤလၢအဘူးဒီး ဒည--- သဝီ, တးအုးခံကရူၢ်, ဘံလ့ကီၢ်ဆၣ်, ဒူသထူၣ်ကီၢ်ရ့ၣ်န့ၣ်လီၤ. တၢ်ဂီၤတဘ့ၣ်အံၤပာ်ဖျါထီၣ်ဝဲ ထံဒိၣ် မၤဟးဂီၤသဝီဖိအဘုလၢ ဒည--- သဝီ ဖဲလါအီကူး ၂၀၂၄ နံၣ်အခါန့ၣ်လီၤ. ဝံၤအလီၢ်ခံ ဘုၣ်လၢအအိၣ်တ့ၢ်သ့ၣ်တဖၣ် တၢ်ဖိဃၢ်အီၣ် ထီၣ်ဂီၤလီၤဘီ ဒီး သံကွံာ်ဝဲဒၣ်န့ၣ်လီၤ. (တၢ်ဂီၤ- KHRG)
တၢ်ဂီၤသ့ၣ်တဖၣ်အံၤ ဘၣ်တၢ်ဒိန့ၢ်အီၤဖဲ လါဒံၣ်စဲဘၢၣ် ၂၀၂၃ နံၣ်ဖဲ အ--- သဝီ, တၤပီကရူၢ်, ဘံလ့ကီၢ်ဆၣ်, ဒူသထူၣ်ကီၢ်ရ့ၣ်န့ၣ်လီၤ. ဖဲလါဒံၣ်စဲဘၢၣ် ၂၃ သီ, ၂၀၂၃ နံၣ်န့ၣ် ကညီဒီကလုာ်ဂၢၤသးကရၢ (KNDO) သုးရ့ၣ်နီၣ်ဂံၢ် (၂) ထီၣ်ဒုးဝဲ SAC ပယီၤသုးပၢဆှၢဝဲၤလီၢ် ခိၣ်သ့ၣ် (စကခ) နီၣ်ဂံၢ် (၆) အဖီလာ် ခီၣ်ချ့သုးရ့ၣ်နီၣ်ဂံၢ် (၄၁၀) လၢအအိၣ် ဖဲအ--- သုးကလၢၤအံၤန့ၣ်လီၤ. ဖဲတၢ်ဒုးကဲထီၣ်အခါ SAC ပယီၤသုးခီၣ်ချ့သုးရ့ၣ် (ခမရ) နီၣ်ဂံၢ် (၉) ဒီး (၃) လၢအ အိၣ်ဖဲ ကမးမိၣ်ဝ့ၢ်ပူၤတဖၣ် ခးလီၤ (၆၀မမ, ၇၉မမ ဒီး ၁၂၀မမ) ကျိဖးဒိၣ်တဖၣ်ဆူ အ---သဝီပူၤဒီနံၤဒီနၤန့ၣ်လီၤ. ကျိဖးဒိၣ်လီၤတဲာ်ပိၢ်ဖးထီၣ် ဘၣ်ဟးဂီၤဟံၣ် (၂) ဖျၢၣ် လၢအမ့ၢ် စီၤ ဖ--- (၂၁ နံၣ်) ဒီး စီၤ ထ--- (၄၀ နံၣ်) အဟံၣ်န့ၣ်လီၤ. ဖဲလါဒံၣ်စဲဘၢၣ် ၂၆ သီ, ၂၀၂၃ နံၣ်န့ၣ် SAC ပယီၤသုးလၢအအိၣ်ဖဲ အ--- သုးကလၢၤတဖၣ် ခးလီၤ (၆၀မမ)ကျိဖးဒိၣ် တဖၣ်ဆူ အ---သဝီပူၤန့ၣ်လီၤ. ကျိဖးဒိၣ်လီၤတဲာ်ပိၢ်ဖးအူအီၣ်ထီၣ်ကွံာ် စီၤ ည--- အဟံၣ်န့ၣ်လီၤ. တၢ်ဂီၤတဘ့ၣ်အံၤ ပာ်ဖျါထီၣ်ဝဲ စီၤ ည--- အဟံၣ်အူအီၣ်ကွံာ်ခဲလၢၤလံန့ၣ်လီၤ. တၢ်ဂီၤလၢစုထွဲတခီပာ်ဖျါထီၣ်ဝဲ SAC ပယီၤသုးကဘီယူၤ ဟဲခးလီၤတၢ်ဖဲ လါဒံၣ်စဲဘၢၣ် ၂၃ သီ, ၂၀၂၃ နံၣ်အနံၤန့ၣ် သဝီဖိတဖၣ်ဘၣ်ဃ့ၢ်မှံဟးဖျိးန့ၣ်လီၤ. သဝီဖိအကျါတဂၤ ဟဲက့ၤလၢဟံၣ် ဒီး တသ့ဖဲအသ့ ဂုာ်ကျဲးစၢးမၤပံာ်မ့ၣ်အူ ဒ်သိးကဒီသဒၢ အဟံၣ်ဃီတၢ်စုလီၢ်ခီၣ်ခိၣ် ဒီး မ့ၣ်အူသုတလဲး အီၣ်ဃုာ် ဟံၣ်အဂၤသ့ၣ်တဖၣ်တဂ့ၤအဂီၢ်န့ၣ်လီၤ. တၢ်ကဲထီၣ်သးအံၤပထံၣ်န့ၢ်အီၤသ့လၢတၢ်ဂီၤတဘ့ၣ်အံၤအပူၤန့ၣ် လီၤ. (တၢ်ဂီၤ- လီၢ်ကဝီၤသဝီဖိ)
တၢ်ဂီၤတဘ့ၣ်အံၤ ဘၣ်တၢ်ဒိန့ၢ်အီၤဖဲ လါယနူၤအါရံၤ ၂၀၂၄ နံၣ် ဖဲ ဒသ--- သဝီ, မူဟီၣ်ကဝီၤလီၤဆီ, မူကီၢ်ဆၣ်, ချၢၣ်လွံၢ်ထူၣ်ကီၢ်ရ့ၣ် န့ၣ်လီၤ. ဖဲလါယနူၤအါရံၤ ၂၃ သီ, ၂၀၂၄ နံၣ်န့ၣ် SAC ပယီၤသုး ခီၣ်ချ့သုးရ့ၣ်နီၣ်ဂံၢ် (၄၃၉) လၢအအိၣ်ဖဲ စွ့ၤဝၤသုးကလၢၤပူၤ သ့ၣ်တဖၣ် ခးလီၤကျိဖး ဒိၣ်ဆူ ဒသ--- သဝီပူၤန့ၣ်လီၤ. အဃိ ကျိဖးဒိၣ်လီၤတဲာ်ပိၢ် ဖးဘၣ်ဟးဂီၤသဝီဖိအဟံၣ်တဖၣ်, ဘၣ်သံ သဝီဖိအကျီၢ် မိၢ်တဒု ဒီး ဘၣ်ဒိကျီၢ်ဖါတဒုန့ၣ်လီၤ. တၢ်ဂီၤတဘ့ၣ် အံၤပာ်ဖျါထီၣ်ဝဲ အူ ဒက--- ဒီး ဒီၤ ဒလ--- အကျီၢ်ဖါတဒုအံၤအစု ဘၣ်ဒိဒီးကျိဖးဒိၣ်က့န့ၣ်လီၤ. သဝီဖိဂုာ်ကျဲးစၢးမၤဘျါက့ၤ ကျီၢ်တဒု အံၤအစု လၢတၢ်ဒီသဒၢအတၢ်လုၢ်အီၣ်နီၢ်ခိသးသမူလၢခါဆူညါ အဂီၢ်န့ၣ်လီၤ. (တၢ်ဂီၤ- KHRG)
တၢ်ဂီၤတဘ့ၣ်အံၤ ဘၣ်တၢ်ဒိန့ၢ်အီၤဖဲ လါဖ့ၤဘြူၤအါရံၤ ၂၀၂၄ နံၣ် ဖဲရီဘၢၣ်ကျီးဖဲ ဒန--- သဝီ, မဲၢ်နီၢ်အးကရူၢ်, ကီးတရံးကီၢ်ဆၣ်, ဒူပျာ်ယာ်ကီၢ်ရ့ၣ်န့ၣ်လီၤ. တၢ်ဂီၤတဘ့ၣ်အံၤပာ်ဖျါထီၣ်ဝဲ ဖဲလါယနူၤ အါရံၤ ၂၆ သီ ဒီး ၂၉ သီန့ၣ် SAC ပယီၤသုးတဖၣ် ခးလီၤကျိဖးဒိၣ် ဒီး ကဘီယူၤဟဲခးလီၤတၢ်ဖဲ သဝီဖိအိၣ်တၢ်ဟီၣ်ကဝီၤပူၤ ဖဲကၠဲး ဒိဝ့ၢ်တၢ်လီၢ် လၢအဘူးဒီးမဲၢ်နီၢ်အးကရူၢ်အဃိ သဝီဖိသ့ၣ် တဖၣ် ဘၣ်ဃ့ၢ်မှံဟးဖျိးအခါ အဝဲသ့ၣ် ဃ့ၢ်စိာ်ဃုာ်သဘ့ဟီၣ်လာ်ဆူ တၢ်လီၢ်လၢအဘံၣ်ဘၢလီၢ် ဒီး ဒ့လီၤသကိးသဘ့ဟီၣ်လာ်ချံ လၢအတၢ်လုၢ်အီၣ်နီၢ်ခိသးသမူအဂီၢ်န့ၣ်လီၤ. (တၢ်ဂီၤ- KHRG)
တၢ်ဂီၤတဘ့ၣ်အံၤ ဘၣ်တၢ်ဒိန့ၢ်အီၤဖဲ လါဖ့ဘြူၤအါရံၤ ၂၀၂၄ နံၣ်ဖဲ မဲၢ်ကးသးကရူၢ်, ကြုၢ်တုကီၢ်ဆၣ်, ဒူပျာ်ယာ်ကီၢ်ရ့ၣ်န့ၣ်လီၤ. တၢ်ဂီၤတဘ့ၣ်အံၤပာ်ဖျါထီၣ်ဝဲ ဒူဖိသဝီဖိလၢသဝီအါဖျၢၣ် ဃုာ်ဒီး ဒပ---သဝီဖိသ့ၣ်တဖၣ် ဘၣ်ဃ့ၢ်မှံဟးဖျိး ဒီး လဲၤဃ့ၢ်အိၣ်ကဒုဘူးဒီး အစံာ်ပျီ ဖဲဆၢကတီၢ်ဘူးထီၣ်လၢကဘၣ်ကူးဘုလံအခါန့ၣ်လီၤ. သဝီဖိသ့ၣ်တဖၣ် ဘၣ်ဃ့ၢ်မှံဟးဖျိး မ့ၢ်လၢ စးထီၣ်လၢတၢ်ဒုးကဲထီၣ်ဖဲ လါနိၣ်ဝ့ဘၢၣ် ၁၁ သီ, ၂၀၂၃ နံၣ်န့ၣ် SAC ပယီၤသုးတဖၣ် ခးလီၤကျိဖးဒိၣ်လၢသဝီတဖၣ်ပူၤအဃိ ကဲထီၣ်တၢ်ဘံၣ်တၢ်ဘၢ တၢ်လီၤဘၣ်ယိၣ်လၢလီၢ်ကဝီၤသဝီ ဖိသ့ၣ်တဖၣ်အဂီၢ် န့ၣ်လီၤ. သဝီဖိလၢအဃ့ၢ်မှံဟးဖျိးတနီၤ ပာ်ဖျါထီၣ်လၢKHRGအိၣ်ဘၣ်ဃး SAC ပယီၤသုးဒွဲၣ်အူထီၣ်ကွံာ် အဟံၣ်ဃီသ့ၣ်တဖၣ်အိၣ်န့ၣ်လီၤ. (တၢ်ဂီၤ- KHRG)
တၢ်ဂီၤသ့ၣ်တဖၣ်အံၤ ဘၣ်တၢ်ဒိန့ၢ်အီၤဖဲ လါမးရှး ၁၆ သီ, ၂၀၂၄ နံၣ် ဖဲ ဆရှ--- သဝီ, စယဲၣ်ကၠံတီၤခၠါကရူၢ်, ထီတထူၣ်ကီၢ်ဆၣ်, ချၢၣ်လွံၢ်ထူၣ်ကီၢ်ရ့ၣ်န့ၣ်လီၤ. ဖဲ လါမးရှး ၁၆ သီ, ၂၀၂၄ နံၣ် ဟါခီ ၇း၀၀ နၣ်ရံၣ်အဆၢ ကတီၢ်န့ၣ် SAC ပယီၤသုးခီၣ်သုးရ့ၣ်နီၣ်ဂံၢ် (၇၃) အသုးဖိတဖၣ် ခးလီၤကျိဖးဒိၣ်တဖၣ်ဆူ ဆဧ--- သဝီပူၤန့ၣ် လီၤ. ကျိဖးဒိၣ်လီၤတဲာ်ပိၢ်ဖးထီၣ်အဃိ အူအီၣ်ကွံာ်သဝီဖိအဟံၣ် (၉) ဖျၢၣ်န့ၣ်လီၤ. ဟံၣ်(၉) ဖျၢၣ်အံၤမ့ၢ် အူ ဒအ---, အူ ဒဘ---, အူ ဒဆ---, အူ ဒဒ---, အူ ဒဃ---, ဒီၤ ဒပၠ---, အူ ဒဂ---, အူ ဒဟ--- ဒီး အူ ဒဧ--- သ့ၣ်တဖၣ်န့ၣ်လီၤ. တၢ်ဂီၤသ့ၣ်တဖၣ်အံၤပာ်ဖျါထီၣ်ဝဲ သဝီဖိသ့ၣ်တဖၣ် ဂုာ်ကျဲးစၢးမၤပံာ်ကွံာ်မ့ၣ်အူန့ၣ်လီၤ. (တၢ်ဂီၤ- လီၢ်ကဝီၤသဝီဖိ)
တၢ်ဂီၤတဘ့ၣ်အံၤ ဘၣ်တၢ်ဒိန့ၢ်အီၤဖဲ လါအ့ဖြ့ၣ်၂၀၂၄ နံၣ်ဖဲ လ့ပူၤတၢ်လီၢ်တတီၤ လၢသဝီဖိသ့ၣ်တဖၣ် လဲၤဃ့ၢ်အိၣ်ကဒုအလီၢ်ဖဲ နိၣ်ခၠိးနဲၢ်ကရူၢ်, ဝီၢ်ရ့ၣ်ကီၢ်ဆၣ်, ဒူပျာ်ယာ်ကီၢ်ရ့ၣ်န့ၣ်လီၤ. SAC ပယီၤသုးကဘီယူၤ ဟဲခးလီၤတၢ်ဖဲ နိၣ်ဘၢၣ်ဘီကရူၢ်, ဝီၢ်ရီကီၢ်ဆၣ်ပူၤဖဲ လါမးရှး ၁၂ သီ, ၂၀၂၄ နံၣ်ဝံၤအလီၢ်ခံ လီၢ်ကဝီၤသဝီဖိ သ့ၣ်တဖၣ်အံၤ ဘၣ်ဃ့ၢ်မှံဟးဖျိးဝဲဒၣ်န့ၣ်လီၤ. တၢ်ဂီၤလၢစုစ့ၣ်တကပၤ ပာ်ဖျါထီၣ်ဝဲ သဝီဖိသ့ၣ်တဖၣ် လဲၤဃ့ၢ်စိာ် အကျးဖိ တၢ်ဆါတၢ်ပှ့ၤပီးလီသ့ၣ်တဖၣ်လၢတၢ်ဃ့ၢ်အိၣ်ကဒုလီၢ် ဒီး ဆါတၢ်တဆံးတက့ၢ် လၢအတၢ်လုၢ်အီၣ်နီၢ်ခိ သးသမူအဂီၢ်န့ၣ်လီၤ. တၢ်ဂီၤလၢစုထွဲတခီ ပာ်ဖျါထီၣ်ဝဲ သဝီဖိသ့ၣ်တဖၣ် လဲၤဃ့ၢ်စိာ်အသဲးသၣ်သ့ၣ်တဖၣ်ဆူ တၢ်ဃ့ၢ်အိၣ်ကဒုလီၢ်ဒီး ကျီကွံာ်သဲးဘ့ၣ်သ့ၣ်တဖၣ်အံၤ လၢအတၢ်လုၢ်အီၣ် နီၢ်ခိသးသမူတၢ်လိၣ်ဘၣ်အဂီၢ်စ့ၢ်ကီး န့ၣ်လီၤ. (တၢ်ဂီၤ- KHRG)
တၢ်ဂီၤတဖၣ်အံၤ ဘၣ်တၢ်ဒိန့ၢ်အီၤဖဲ လါမ့ၤ ၂၀၂၄ နံၣ် ဖဲ ဆပၠ--- သဝီ, အီဖးဖးဒိၣ်ကရူၢ်, ကီးတရံးကီၢ်ဆၣ်, ဒူပျာ်ယာ်ကီၢ်ရ့ၣ် န့ၣ်လီၤ. ဖဲလါအ့ဖြ့ၣ် ၁၄ သီ, ၂၀၂၄ နံၣ်န့ၣ် SAC ပယီၤသုးတဖၣ် ခးလီၤကျိဖးဒိၣ်ဆူ ဆပၠ--- သဝီပူၤတဘျုးဖျၢၣ်ညါအဃိ ဘၣ်ဟးဂီၤ ကွံာ်သဝီဖိအ ဟံၣ်ဃီ, တၢ်စုလီၢ်ခီၣ်ခိၣ် ဒီး တၢ်လုၢ်ဒိၣ်ပှ့ၤဒိၣ်သ့ၣ် တဖၣ် လၢအပၣ်ဃုာ်ဒီး စဲးဖီကဟၣ် ဒီး စဲးဖီကဟၣ်ပီးလီတဖၣ် လၢတၢ်သူစူးကါအီၤ လၢတၢ်လုၢ်အီၣ်နီၢ်ခိသးသမူဂီၢ် ဒ်အမ့ၢ် စဲးထဲၣ်တၢ်, တၢ်လဲၤတၢ်က့ၤစဲးဖီကဟၣ်ပီးလီ ဒ်အမ့ၢ် သိလ့ၣ်ယီၢ်, ဟံၣ်ဃီလၢတၢ်အိၣ်ကဒုအဂီၢ် ဒီး နီၢ်ကစၢ်သူစူးကါတၢ်ဖိတၢ်လံၤ အဂုၤအဂၤ ဒ်အမ့ၢ် ကျိၣ်စ့ ဒီး ထူဖိလွဲဖိသ့ၣ်တဖၣ်န့ၣ်လီၤ. တၢ်ခးလီၤကျိဖးဒိၣ်အံၤ ဘၣ်သံစ့ၢ်ကီးသဝီဖိအဆၣ်ဖိကီၢ်ဖိတဖၣ် န့ၣ်လီၤ. တၢ်ဂီၤ လၢတၢ်ဖီခိၣ်(၂) ဘ့ၣ်, ဒီး တၢ်ဂီၤလၢအခၢၣ်သး တကျိၤ လၢစုစ့ၣ်တကပာ်အံၤန့ၣ် ပာ်ဖျါထီၣ်ဝဲ စဲးထဲၣ်တၢ် (လိၣ်ထဲၤ) ဒီး တၢ်ထူစံာ်ပီးလီတဖၣ် ဟးဂီၤကွံာ်ခဲလၢာ် န့ၣ်လီၤ. တၢ်ဂီၤလၢအခၢၣ်သးတကျိၤစုထွဲတကပာ်န့ၣ် ပာ်ဖျါထီၣ်ဝဲ သဝီဖိ အသိလ့ၣ်ယီၢ်ဟးဂီၤကွံာ်ခဲလၢၤစ့ၢ်ကီးန့ၣ်လီၤ. တၢ်ဂီၤလၢအဖီလာ် တကျိၤ စုစ့ၣ်တကပာ်န့ၣ် ပၤဖျါထီၣ်ဝဲ သဝီဖိပိာ်မုၣ်တဂၤ ဂုာ်ကျဲးစၢးဃုထၢဖှိၣ်က့ၤ တၢ်စုလီၢ်ခီၣ်ခိၣ်လၢအအိၣ်လီၤတဲာ်တနီၤ လၢကမၤစၢၤ က့ၤအဟံၣ်ဖိဃီဖိတၢ်လုၢ်အီၣ်နီၢ်ခိ သးသမူတၢ်လိၣ်ဘၣ် တနီၤကသ့အဂီၢ်န့ၣ်လီၤ. (တၢ်ဂီၤ- KHRG)
Footnotes:
[1] See also: KHRG, Defying Hunger : State Administration Council (SAC)’s systematic destruction of civilian livelihoods and food systems in Southeast Burma (January - December 2024), May 2025.
[2] KHRG, “Taw Oo District Short Update: SAC indiscriminate shelling killed one villager and injured six, including children, and destroyed villagers’ property in Daw Hpah Hkoh and Htaw Ta Htoo Townships (October and December 2024)”, February 2025.
[3] KHRG, “Kler Lwee Htoo District Short Update: SAC drone strikes and indiscriminate shelling caused casualties, destruction, and livelihood and education challenges in Ler Doh Township (November to December 2024)”, March 2025.
[4] KHRG, “Dooplaya District Situation Update: SAC air strikes and shelling caused death, injury, damage, and displacement in Kaw T’Ree Township (December 2023 to March 2024)”, March 2025.
[6] KHRG, “Dooplaya District Short Update: SAC shelling and air strikes resulted in civilian casualties, property destruction and displacement, in Kruh Tuh Township, December 2023.”, August 2024.
[7] KHRG, “Taw Oo District Short Update: SAC indiscriminate shelling killed one villager and injured six, including children, and destroyed villagers’ property in Daw Hpah Hkoh and Htaw Ta Htoo Townships (October and December 2024)”, February 2025.
[8] KHRG, “Dooplaya District Incident Report: SAC shelling killed a villager in Kruh Tuh Township, October 2024”, April 2025.
