ဖဲလါယနူၤအါရံၣ် ၄ သီ, ၂၀၂၂ နံၣ် ဂီၤခီ ၁၀:၁၅ မံးနံးအဆၢကတီၢ်န့ၣ် SAC ခီၣ်ချ့သုးရ့ၣ် (၄၀၇) လၢအဘၣ်တၢ်တီ ခိၣ်ရိၣ်မဲအီၤလၢဒုးယၤခိၣ် သးပ့ၣ်ကၠီၣ် လၢအအိၣ်လၢမးထီသုးကလၢၤန့ၣ်ခးလီၤ၀ဲ ၈၁ မမ ကျိဖးဒိၣ်ဆူစံာ်ပျီတဘ့ၣ် လၢအအိၣ်လၢထံဖးဒိၣ်ထၣ်သ၀ီ, မဲၢ်ကျီကရူၢ်, ဘုသိကီၢ်ဆၣ်, မုၢ်တြီၢ်ကီၢ်ရ့ၣ်အပူၤန့ၣ်လီၤ. ဖဲလၢတၢ်ကဲထီၣ်သးအ ဆၢကတီၢ်န့ၣ်ဘၣ်၀ဲဒၣ်လၢသ၀ီဖိတဂၤလဲၤကွၢ်၀ဲအပနၢ်လၢစံာ်ပျီပူၤအဃိအသးနါပှၢ်, အကိာ်ဘိ, ဒီးအက့ၣ်ဒုၣ်ဘၣ် ဒိ၀ဲဒီးကျိဖးဒိၣ်ချံအက့ဒီးသံ၀ဲတဘျီဃီန့ၣ်လီၤ.  သ၀ီဖိလၢအသံအံၤပာ်လီၤတဲာ်၀ဲအမါဒီးအဖိဃိးဂၤန့ၣ်လီၤ. သ၀ီဖိ အံၤမၤအီၣ်စံၣ်ဒီးဘုၣ်၀ဲဆၣ်ဖိကီၢ်ဖိလၢကလုၢ်အီၣ်အဟံၣ်ဖိဃီဖိအဂီၢ် ဒီးခီဖျိလၢအသံအဃိအဟံၣ်ဖိဃီဖိဘၣ်ကွၢ် ဆၢၣ်မဲာ်၀ဲဒီးတၢ်လုၢ်အီၣ်နီၢ်ခိသးသမူအတၢ်ကီတၢ်ခဲန့ၣ်လီၤ.