ဖဲလါဒံၣ်စဲဘၢၣ် ၁၁သီ, ၂၀၂၂နံၣ်ကဘၣ်ဖဲ ဂီၤခီ ၈း၃၀နၣ်ရံၣ်အဆၢကတီၢ်န့ၣ် ထံကီၢ်တၢ်ပၢတၢ်ပြးကီၣ်ကးကရၢ (SAC) ခီၣ်ချ့သုးရ့ၣ် (ခမရ-၆၀၄)သုးတဖၣ် ဟူးဂဲၤဟး၀့ၤ၀ီၤဆှၣ်တၢ်လၢသိလ့ၣ်ကျဲမုၢ်ခိၣ် [လၢတီအူဒီးသၣ်ဒီၣ် ၀့ၢ်အဘၢၣ်စၢၤ, ဒီၣ်ဖးခိၣ်ကီၢ်ဆၣ်ပူၤ] န့ၣ်လီၤ. SACသုးတဖၣ် ဘၣ်သဂၢၢ်လိာ်သးဒီး ကညီဒီကလုာ်တၢ်ထူၣ်ဖျဲး သုးမုၢ်ဒိၣ် (KNLA) သုးဒ့ (၃) လၢအအိၣ်လၢ သုးရ့ၣ် (၅) အဖီလာ်, သုးက့ (၂) ဟီၣ်က၀ီၤအပူၤတဖုအံၤန့ၣ်လီၤ.  လၢတၢ်န့ၣ်အဃိ တၢ်ဒုးကဲထီၣ်၀ဲလၢ SAC ခီၣ်ချ့သုးရ့ၣ် (ခမရ-၆၀၄)သုးဒီး KNLAသုးဒ့ (၃) အဘၢၣ်စၢၤ ကအိၣ် (၁၅) မံးနံး ဃၣ်ဃၣ်န့ၣ်လီၤ. SAC ခီၣ်ချ့သုးရ့ၣ် (ခမရ-၆၀၄) သုးသ့ၣ်တဖၣ်အံၤ အိၣ်ဆီလီၤအသးဖဲ စန့ၤကိသုးကလၢၤပူၤ ဒီးသုးကလၢၤ၀ဲအံၤ အိၣ်စီၤစုၤဒီး အ---သ၀ီ (ဘၣ်တၢ်သ့ၣ်ညါစ့ၢ်ကီးအီၤလၢအမ့ၢ် ဘ---သ၀ီ), ဒ့လီလီၢ်လံၤဟီၣ်က၀ီၤပူၤ, ဒီၣ်ဖးခိၣ်ကီၢ်ဆၣ်, တီအူကီၢ်ရ့ၣ် ကအိၣ် တမံးလာ်န့ၣ်လီၤ.  စန့ၤကိသုးကလၢၤ အံၤ မ့ၢ်တၢ်မဲာ်ညါတစိၢ်တလီၢ်သုးကလၢၤန့ၣ်လီၤ. တၢ်ကဲထီၣ်သးအလီၢ်အံၤ ကအိၣ်စီၤစုၤဒီး အ---သ၀ီ ကအိၣ် ယဲၢ်တၢၣ်န့ၣ်လီၤ. စန့ၤကိသုးကလၢၤအံၤ အိၣ်စီၤစုၤဒီး အ---သ၀ီတဆဲးဖိအဃိ တၢ်ဒုးကဲထီၣ်သးလၢ  SAC ခီၣ် ချ့သုးရ့ၣ် [ခမရ-၆၀၄]သုးဒီး [KNLA သုးဒ့-၃] အဘၢၣ်စၢၤအခါ သ၀ီဖိတဖၣ် တသ့ၣ်ညါထွဲ၀ဲဘၣ်န့ၣ်လီၤ.

တၢ်ဒုးကဲထီၣ်၀ံၤအလီၢ်ခံ ကဘၣ်ဖဲ [လါဒံၣ်စဲဘၢၣ် ၁၁သီ, ၂၀၂၂နံၣ်] ဂီၤခီ ၉နၣ်ရံၣ်အဆၢကတီၢ်န့ၣ် လၢတၢ်ခီၣ် ဆၢတၢ်ဒုးအဘျီ၀ဲအံၤအဂီၢ် SAC ခီၣ်ချ့သုးရ့ၣ် [ခမရ-၆၀၄]သုးတဖၣ် ခးလီၤ၀ဲကျိဖးဒိၣ်အံၤဆူ အ---သ၀ီပူၤ န့ၣ်လီၤ. [လၢအပူၤကွံာ် SAC ခီၣ်ချ့သုးရ့ၣ် (ခမရ-၆၀၄) သုးရ့ၣ်ခိၣ် ဟ့စၤထိဟ့ၣ်ပလီၢ်သ၀ီဖိတဖၣ်လၢ KNLA သုးတဖၣ်မ့ထီၣ်ဒုးအ၀ဲသ့ၣ်န့ၣ် အ၀ဲသ့ၣ်ကထီၣ်ဒုးထီဒါ၀ဲသ၀ီန့ၣ်လီၤ.] ကျိဖးဒိၣ်တၢတဖျၢၣ်လီၤတဲာ် ဒီးပိၢ်ဖး ထီၣ်၀ဲဖဲ တၢ်လူၢ်ခိၣ်တတီၤလၢအဘူးဒီးသ၀ီအဃိ သ၀ီဖိတဘၣ်ဒိနီတဂၤဘၣ်န့ၣ်လီၤ. မ့မ့ၢ်ကျိဖးဒိၣ် ခံဖျၢၣ်တ ဖျၢၣ်န့ၣ် လီၤတဲာ်ပိၢ်ဖးထီၣ်ဘၣ်လၢ စီၤစ--- အဟံၣ်ခိၣ် ဒီးဖဲန့ၣ် ဘၣ်လၢသ၀ီဖိလၢအမ့ၢ် စီၤဒ--- သးနံၣ်အိၣ် (၅၀) နံၣ်တဂၤအံၤအိၣ်ဘူးဒီးစီၤစ--- ဟံၣ်အဃိ အစုစ့ၣ်အဒုၣ်ဖီခိၣ် ဘၣ်ဒိဒီးကျိဖးဒိၣ်က့တဆံးတက့ၢ်န့ၣ်လီၤ. [မ့မ့ၢ်စီၤစ--- အနီၢ်ကစၢ်တခီ ဖဲတၢ်ကဲထီၣ်သးအခါ အ၀ဲအိၣ်လၢတၢ်ဘါယွၤသရိၤပူၤအဃိ အ၀ဲတဘၣ်ဒိနီတစဲး ဘၣ်န့ၣ်လီၤ.] တၢ်ခးလီၤကျိဖးဒိၣ်၀ံၤအလီၢ်ခံ လီၢ်က၀ီၤသ၀ီဖိတဖၣ် ဟးထီၣ်လၢသ၀ီချၢတဘူၣ်လၢၤ ဘၣ်အဃိ ဘၣ်အိၣ်ခူသူၣ်ဒၣ်လၢသ၀ီအပူၤဒ်အံၤန့ၣ်လီၤ. မ့မ့ၢ်သ၀ီဖိလၢအဘၣ်ဒိတဂၤန့ၣ် ဒိးန့ၢ်ဘၣ်ဆၢ်ကူစါယါဘျါလၢ အ--- သ၀ီဖိကသံၣ်သရၣ်မုၣ်တဂၤအအိၣ်တနံၤဃီဃီန့ၣ်လီၤ. ကသံၣ်သရၣ်မုၣ်တဂၤအံၤ လၢအပူၤကွံာ်န့ၣ် ထီၣ် ဘၣ်၀ဲ ကသံၣ်တၢ်မၤလိလၢသ၀ီပူၤအဃိန့ၣ်လီၤ. [ပှၤဘၣ်ဒိတဂၤအံၤအတၢ်ပူၤလီၢ်ဘျါကွံာ်၀ဲဒၣ်လံန့ၣ်လီၤ.]

[တၢ်ဒုးကဲထီၣ်ဖဲ လါဒံၣ်စဲဘၢၣ် ၁၁သီ, ၂၀၂၂နံၣ် ၀ံၤအလီၢ်ခံ] SAC ခီၣ်ချ့သုးရ့ၣ် [ခမရ-၆၀၄] သုးတဖၣ် ခးထီၣ် ကြီကျိဖိဆူမူခိၣ် ကအိၣ် (၃၀)ထံၣ်ဃၣ်ဃၣ် ဖဲသၣ်ဒီၣ်မၠိၣ်သ့ၣ်၀့ၢ်ပူၤအံၤန့ၣ်လီၤ. [လီၢ်က၀ီၤသ၀ီဖိတဖၣ် နာ်၀ဲလၢ တၢ်ခးကြီကျိဒ်အံၤန့ၣ် မ့ၢ်တၢ်သးတမုာ်တၢ်ဟူးတၢ်ဂဲၤလၢအမၤကၣ်သ၀ီဖိ ဒ်သုးရ့ၣ်ခိၣ်ဟ့စၤထိ ဟ့ၣ်လီၤတၢ် ကလုၢ် ဒီးမၢအသုးဖိတဖၣ်လၢ KNLAသုးတဖၣ်မ့ခးအ၀ဲသ့ၣ်န့ၣ် ကဘၣ်မၤပျံၤမၤဖုးကဒါလၢသ၀ီဖိန့ၣ်လီၤ.]  ပယီၤသုးတဖၣ် ခးကြီကျိအဃိ Telenor လီတဲစိပှၤမၤတၢ်ဖိလၢအအိၣ်ဖဲတီအူ၀့ၢ်တဂၤအဟၢဖၢဘၣ်ဒိတဆဲး န့ၣ်လီၤ. [ပှၤတူၢ်ဘၣ်တၢ်တဂၤအံၤက့ၤကဒါဆူတီအူ၀့ၢ်ပူၤ ဒီးဖဲလါယနူၤအါရံၤ ၂၀၂၃နံၣ်န့ၣ် ပှၤတူၢ်ဘၣ်တၢ်တဂၤ အံၤအိၣ်တၢ်လီၢ်ဖဲလဲၣ်ခီလဲၣ်န့ၣ် တၢ်တသ့ၣ်ညါ၀ဲဒံးဘၣ်န့ၣ်လီၤ.]

သုးရ့ၣ်ခိၣ် ဟ့စၤထိမ့ၢ်၀ဲ SACခီၣ်ချ့သုးရ့ၣ် (ခမရ-၆၀၄)ခိၣ်ဒီးအသုးလၢအဟူးဂဲၤလၢ သၣ်ဒီၣ်မၠိၣ်သုးကလၢၤ လၢအအိၣ်ဖဲသၣ်ဒီၣ်မၠိၣ်သ့ၣ်၀့ၢ်ပူၤအိၣ်စ့ၢ်ကီးန့ၣ်လီၤ.  SAC သုးကလၢၤ သၢဖျၢၣ် လၢအအိၣ်ဆီလီၤအသး ဖဲသၣ် ဒီၣ်၀့ၢ်ဒီးတီအူ၀့ၢ်အဘၢၣ်စၢၤကျဲမုၢ်ကပၤတဖၣ်အံၤမ့ၢ်၀ဲ တဆံဃုမံးလာ်သုးကလၢၤ, စန့ၤကိ သုးကလၢၤ ဒီးတီၤ ပၠၤကၠံသုးကလၢၤသ့ၣ်တဖၣ်န့ၣ်လီၤ. သုးရ့ၣ်ခိၣ် ဟ့စၤထိအံၤ အိၣ်ဆီလီၤအသးဖဲ သၣ်ဒီၣ်မၠိၣ်သ့ၣ်သုးကလၢၤပူၤ အံၤန့ၣ်လီၤ.

[တနံၤဃီဃီ ဖဲလါဒံၣ်စဲဘၢၣ် ၁၁သီ, ၂၀၂၂နံၣ်န့ၣ် ဖဲသၣ်ဒီၣ်၀့ၢ်ပူၤန့ၣ်] SACသုးဖိတဖၣ် ကိးပတုာ်သ၀ီဖိ လၢအဟဲ က့ၤလီၤလၢတၢ်ဘါယွၤသရိၤလၢကျဲမုၢ်ခိၣ်အခါတဖၣ်ဒီး သံကွၢ်သ၀ီဖိတဖၣ်အံၤ [မ့ၢ်အပၣ်ဃုာ်ပၣ်ဂီၢ်လၢတၢ် ထီၣ်ဒုးအံၤဧါအဂ့ၢ်န့ၣ်လီၤ.] သုးတဖၣ်အံၤ ဃုဃိတၢ်လၢသ၀ီဖိအလိၤဒီး ဟးဃုစုက၀ဲၤဒ်အမ့ၢ်ကျိသ့ၣ်တဖၣ်န့ၣ် လီၤ. အါန့ၢ်အန့ၣ် သုးတဖၣ်အံၤ တြီတံၢ်ဃာ်သ၀ီဖိတၢ်လဲၤထီၣ်က့ၤလီၤ [စးထီၣ်လၢသၣ်ဒီၣ်၀့ၢ် ဒီးတုၤလၢတီအူ ၀့ၢ်အဘၢၣ်စၢၤတၢ်လီၢ်သ့ၣ်တဖၣ်အံၤန့ၣ်လီၤ.] လၢတၢ်ဂ့ၢ်ဒ်အံၤအဃိ လီၢ်က၀ီၤသ၀ီဖိလၢ သၣ်ဒီၣ်မၠိၣ်သ့ၣ်၀့ၢ်တ ဖၣ် ပျံၤတၢ်ဒီး အိၣ်က့ၤလၢအဟံၣ်ဃီတဘူၣ်လၢၤဘၣ်န့ၣ်လီၤ. အဃိသ၀ီဖိသ့ၣ်တဖၣ်အံၤ လဲၤဃ့ၢ်အိၣ်ခူသူၣ်က့ၤ လၢ အကီၣ်ကျိးဒီးသဲးကျိးသ့ၣ်တဖၣ်အပူၤန့ၣ်လီၤ.

[စးထီၣ်လၢ လါဒံၣ်စဲဘၢၣ်ထီၣ်သီ ၂၀၂၂နံၣ်န့ၣ်], SAC ခီၣ်ချ့သုးရ့ၣ် (ခမရ-၆၀၄) သုးတဖၣ် ဟူးဂဲၤဟး၀့ၤ၀ီၤဆှၣ် ကွၢ်တၢ်လၢမုၢ်နၤခီ ဖဲသၣ်ဒီၣ်မၠိၣ်သ့ၣ်၀့ၢ်ဟီၣ်က၀ီၤသ့ၣ်တဖၣ်အပူၤန့ၣ်လီၤ. မ့မ့ၢ်လၢမုၢ်ဆါခီအဆၢကတီၢ်အ၀ဲသ့ၣ် ကွၢ်စူၣ်သ၀ီဖိတၢ်ဟူးတၢ်ဂဲၤသ့ၣ်တဖၣ်န့ၣ်လီၤ. တၢ်ဒုးကဲထီၣ်၀ံၤအလီၢ်ခံ အ၀ဲသ့ၣ်ကိးပတုာ်ဒီးသံကွၢ်သံဒိး သ၀ီဖိ လၢအဟးထီၣ်က့ၤလီၤလၢဟီၣ်က၀ီၤပူၤ လီၤဆီဒၣ်တၢ်ပှၤလၢအ၀ဲသ့ၣ်ဆိကမိၣ်တယး၀ဲလၢအအိၣ် ဒီးတၢ်ဆဲး ကျိးဆဲးကျၢဒီးလီၢ်က၀ီၤ KNLAသုးသ့ၣ်တဖၣ်န့ၣ်လီၤ. ခီဖျိလၢသုးတၢ်ဟူးတၢ်ဂဲၤဒ်အံၤသ့ၣ်တဖၣ်အဃိ လီၢ်က ၀ီၤသ၀ီဖိတဖၣ် တူၢ်ဘၣ်၀ဲလၢ တၢ်ဘံၣ်တၢ်ဘၢလၢအ၀ဲသ့ၣ်ဂီၢ်တအိၣ်ဘၣ်န့ၣ်လီၤ.