တၢ်ကဲထီၣ်သးအကလုာ်

တၢ်မၤပယွဲထီဒါဒီးတၢ်မၤဒၢၣ်မၤလိာ်

တၢ်ကဲထီၣ်သးမုၢ်နံၤမုၢ်သီ

လါယနူၤအါရံၤ ၂ သီ, ၂ဝ၂ဝ နံၣ် 

တၢ်ကဲထီၣ်သးတၢ်လီၢ်တၢ်ကျဲ (သဝီႇ ကရူၢ်ႇ ကီၢ်ဆၣ်ႇ ကီၢ်ရ့ၣ်)

အ--- သဝီႇ   လ့ဖိထၣ်ကရူၢ်ႇ  ဒွဲၣ်လိကီၢ်ဆၣ်ႇ  မုၢ်တြီၢ်ကီၢ်ရ့ၣ်

ၦၤလၢအတူၢ်ဘၣ်တၢ်တဂၤအဂ့ၢ်အကျိၤ

မံၤ

စီၤယ ---

သးနံၣ်

၃၂ နံၣ်

မုၣ်ခွါ 

ခွါ

ကလုာ်

ကညီ

ဟံၣ်ဖိဃီဖိ အိၣ် / တအိၣ်

အိၣ်

 တၢ်ဖံးတၢ်မၤ

ပှၤထူစံာ်ဖိ

တၢ်ဘူၣ်တၢ်ဘါ

ဘါသီခါ

တၢ်ဟံမူဒါ / လီၢ်လၤ

သ၀ီဖိ

အိၣ်ဆိးဒူသဝီ 

အ---သဝီ

ၦၤလၢအမၤအၢပယွဲတၢ်တဂၤအဂ့ၢ်အကျိၤ

မံၤ        

လီၢ်လၤ

သုးကျိၤ / သုးရ့ၣ် / 
သုးတြိၤ

အိၣ်သူၣ်လီၤသးလီၢ်ကျဲ / သုးကလၢၤ 

အခိၣ်အမံၤဒီးလီၢ်လၤ

နီၤထိ

သုးခိၣ်ဒိၣ်ဖိ

သုးဟူးဂဲၤဝဲၤလီၢ်ခိၣ်သ့ၣ် နီၢ်ဂံၢ် (၈), ခီၣ်ချ့သုးရ့ၣ်  နီၢ်ဂံၢ်(၄ဝ၈)

မီလိာ်ကျိသုးကလၢၤႇ ကမးမိၣ်သုးဟူးဂဲၤဝဲၤ လီၢ်ခိၣ်သ့ၣ် သုးကလၢၤနီၢ်ဂံၢ် (၁)

သုးခိၣ်ဒိၣ်ဂီၢ်ဂ့ၢ် အီၤနဲၤထိဒီး  သုးခိၣ်ဒိၣ်စိအီၣ်အီၣ်

၁. ၡဲပၠးၦၤနဟံးန့ၢ်တၢ်ကဲထီၣ်သးတခါအံၤ တဆီဘၣ်တဆီတက့ၢ်.

KNLA  သုးရ့ၣ် နီၣ်ဂံၢ် (၁ဝ၂), သုးဒ့ နီၣ်ဂံၢ်(၃) သုးရ့ၣ်ခိၣ် စီၤဒ--- ဆဲးကျိးဝဲ ကညီဂ့ၢ်ဝီခွဲးယာ်ကရူၢ် (KHRG) ပျီပူၤၦၤမၤတၢ်ဖိဖဲတၢ်ကဲထီၣ်သးဝံၤလၢခံတဂီၤ ဒ်သိးကဒုးသ့ၣ်ညါဝဲတၢ်ဂ့ၢ်တၢ်ကျိၤတဖၣ်န့ၣ်လီၤ. KHRG ထံၣ်လိာ်သံကွၢ်ဝဲဒၣ် စီၤယ--- လၢ  လါယနူၤအါရံၤ ၆ သီႇ ၂ဝ၂ဝ နံၣ်န့ၣ်လီၤ. ၦၤတူၢ်ဘၣ်တၢ် တဂၤန့ၣ် တသ့ၣ်ညါဝဲဒၣ် ၦၤမၤကမၣ်တၢ်သ့ၣ်တဖၣ်ဘၣ် (ခီဖျိအဝဲသ့ၣ်တဖၣ် ညိၣ်ဃာ်ဝဲဒၣ်ကျိလၢအခိၣ် ဒီးတဒုးကွၢ် အီၤလၢအဝဲသ့ၣ်ဘၣ်). KHRG ပျီပူၤၦၤမၤတၢ်ဖိတဂၤအံၤ တဲသကိးတၢ်ဒီး KNLA  လၢကဒိး န့ၢ်ဝဲဒၣ် တၢ်ဂ့ၢ်တၢ်ကျိၤဘၣ်ဃးပယီၤသုးလၢ အပၣ်ဃုာ်ပၣ်ဂီၢ်ဝဲဒၣ်လၢ တၢ်ကဲထီၣ်သးအံၤနၣ်လီၤ.  KNLA သံကွၢ်သံဒိးစ့ၢ်ကီး အ---သဝီႇ သဝီသးၦၢ် စီၤဂ--- လၢ အအိိၣ်လၢသဝီပူၤ ဖဲတၢ်ကဲထီၣ်သး အဆၢကတီၢ် ဒီး ၦၤလၢအမၤစၢၤဝဲဒၣ် ၦၤတူၢ်ဘၣ်တၢ်တဂၤန့ၣ်လီၤ. JMC ၦၤမၤတၢ်ဖိ စီၤဟ---လၢ အမၤစၢၤဝဲဒၣ် ၦၤတူၢ်တၢ်ဖိဖဲတၢ်ကဲထီၣ်သးအမုၢ်နံၤဒီး သံကွၢ်သံဒိးအီၤလၢ လီတဲစိပူၤန့ၣ်လီၤ.

တၢ်ဂ့ၢ်ခီၣ်ထံးခီၣ်ဘိ လၢအမ့ၢ် စီၤယ---မ့ၢ်ၦၤလၢ အလဲၤခီဖျိဘၣ်ဝဲဒၣ် တၢ်ကဲထီၣ်သးအံၤလၢ အကစၢ် ဒၣ်ဝဲန့ၣ်လီၤ. စီၤ ဟ---မ့ၢ် JMC ၦၤမၤတၢ်ဖိ လၢဘၣ်တၢ်ကိးအီၤလၢသဝီပူၤ ဖဲတၢ်ကဲထီၣ်ဝံၤအလီၢ် ခံန့ၣ်လီၤ. အဝဲမၤစၢၤစ့ၢ်ကီး ၦၤတူၢ်ဘၣ်တၢ်ဖိတဂၤန့ၣ် ဒ်သိးကထူၣ်ဖျဲးထီၣ်လၢ ပယီၤသုးအတၢ်ဒုးဃာ် အပူၤန့ၣ်လီၤ. စီၤဂ---သဝီသးၦၢ်တဂၤန့ၣ် အိၣ်စ့ၢ်ကီးလၢသဝီပူၤ ဖဲတၢ်ဒုးကဲထီၣ်အခါဒီး ကိးဒုးသ့ၣ် ညါစ့ၢ်ကီး JMC ၦၤမၤ တၢ်ဖိလၢ စီၤယ---န့ၣ် ဘၣ်တၢ်ဒုးဃာ်အီၤဒီး ဘၣ်တၢ်မၤပယွဲမၤဒၢၣ်အီၤလၢ ပယီၤသုးသ့ၣ်တဖၣ်န့ၣ်လီၤ.  စီၤဒ---နၣ် မ့ၢ် KNLA  အသုးရ့ၣ်ခိၣ်လၢ အပၣ်ဃုာ်လၢ တၢ်ဒုးဒီးပယီၤ သုးသ့ၣ်တဖၣ်အခါ ဖဲတၢ်ကဲထီၣ်သးတနံၤန့ၣ်လီၤ.

ပာ်ဖျါတၢ်ကဲထီၣ်သးအဂ့ၢ်အကျိၤလၢလၢၦဲၤၦဲၤတက့ၢ်.

ဖဲလါယနူၤအါရံၤ ၂ သီႇ ၂ဝ၂ဝ နံၣ် အနံၤႇ ကဘၣ်ဖဲ ဂီၤခီ (၁ဝ) နၣ်ရံၣ် ဃၣ်ဃၣ်န့ၣ် တၢ်ဒုးကဲထီၣ်ဝဲလၢ ကီၢ်ပယီၤ သုး လၢသုးရ့ၣ် နီၣ်ဂံၢ် (၄ဝ၈) ဒီး ကညီသုး (KNLA ) အသုးရ့ၣ်နီၣ်ဂံၢ် (၁ဝ၂), သုးဒ့ နီၣ်ဂံၢ်(၃) ဖဲအ---သဝီႇ လ့ဖိထၣ်ကရူၢ်ႇ ဒွဲၣ်လိကီၢ်ဆၣ်ႇ မုၢ်တြီၢ်ကီၢ်ရ့ၣ်န့ၣ်လီၤ. တၢ်ဒုးအံၤကဲထီၣ်သးခီဖျိ ပယီၤ သုးလၢ သုးရ့ၣ်နီၣ်ဂံၢ် (၄ဝ၈)တဖၣ်လဲၤတလၢကွံာ် တၢ်ပာ်ပနီၣ်အလီၢ်လၢ (KNU) အတၢ်ပၢအပူၤအါန့ၢ် အချံယဲၢ်ဆံအဃိန့ၣ်လီၤ. သဝီဖိတဖၣ်တဲဝဲလၢ ပယီၤသုးဟဲနုာ်လီၤဆူ (KNU) အတၢ်ပာ်ပနီၣ် ဟီၣ်ကဝီၤပူၤ ဃုာ်ဒီး သုးအတၢ်ပီးတၢ်လီတဖၣ်န့ၣ် တၢ်ဒုးသ့ၣ်ညါဆိဝဲ သဝီၦၤဘၣ်မူဘၣ်ဒါတဖၣ်တအိၣ်ဘၣ်န့ၣ်လီၤ. လၢတၢ်အံၤအဃိ အဝဲသ့ၣ်မၤဘၣ်ဒိဝဲ ထံကီၢ်ဒီဘ့ၣ်တၢ်ပတုာ်တၢ်ခး လံာ်တၢ်အၢၣ်လီၤအီလီၤ(NCA) တၢ်ဘျၢ ခိၣ်သ့ၣ်လၢ တၢ်ကဘၣ်လူၤ ပိာ်ထွဲမၤထွဲအီၤ တဖၣ်န့ၣ်လီၤ.

လီၢ်ကဝီၤသဝီဖိ လၢအမ့ၢ် စီၤယ--- တဂၤႇ ဃ့ၢ်ဆူ သဝီခံမ့ၢ်လၢအဝဲပျံၤတၢ် ခီဖျိအနၢ်ဟူတၢ်ဒုးအသီၣ် အဃိန့ၣ်လီၤ. စီၤယ--- အံၤတဲဝဲလၢ ဖဲအဝဲဃ့ၢ်အဆၢကတီၢ်ပယီၤသုးဖီၣ်အီၤကဘၣ်ဖဲ ဂီၤခီ (၁၁) နၣ်ရံၣ်အခါဒီးအဝဲသ့ၣ် ထိဝဲအမဲာ်သၣ်န့ၣ်လီၤ. ဝံၤဒီး ပယီၤသုးမၢအကြၤလီၤလၢဟီၣ်ခိၣ်လိၤ ဒီးညိၣ်ဝဲကျိ လၢ အခိၣ်ခံကပၤလၢာ်န့ၣ်လီၤ. အဝဲဘၣ်တၢ်ထူအီၤဒီး သုးအခီၣ်ဖံးခံထံၣ်ဒီး ဘၣ်တၢ်တီၢ်အီၤလၢ ကျိတ ထံၣ်န့ၣ်လီၤ. ဖဲန့ၣ်အဆၢကတီၢ် တၢ်တပျဲအီၤလၢကကိးဝဲသဝီသးၦၢ် လၢတၢ်မၤစၢၤအဂီၢ်စ့ၢ်ကီးဘၣ်. ကီၢ်ပယီၤ သုးတဟ့ၣ်ခွဲးလၢအဝဲကကတိၤတၢ်ဘၣ်န့ၣ်လီၤ.

စီၤယ--- အံၤဘၣ်တၢ်ဖီၣ်တံၢ်ဃာ်အီၤသၢနၣ်ရံၣ်ဃၣ်ဃၣ်ညါန့ၣ်လီၤ. တၢ်သၢနၣ်ရံၣ်အတီၢ်ပူၤအံၤန့ၣ် အဝဲ ဘၣ်တၢ်တီၢ်အီၤအဘျီတဖၣ်အဘျီန့ၣ်လီၤ. ကီၢ်ပယီၤသုးတဖၣ်တီၢ်အီၤတုၤလၢ အခိၣ်မူၤဒီးဒိးန့ၢ်ဘၣ်ဝဲ တၢ် ပူၤလီၢ်လၢအခိၣ်သၣ်ဃံႇ အကိာ်ဘိဒီးအသးနါၦၢ်န့ၣ်လီၤ. အဝဲဘၣ်တၢ်ညိၣ်အီၤလၢကျိဒီတကတီၢ်ညါန့ၣ်လီၤ. စီၤယ--- တဲစ့ၢ်ကီးဝဲလၢ ''ဖဲသုးဖိလၢအမၤဒၢၣ်ယၤအကျါတဂၤ ၦၤကိးအီၤ လၢကလဲၤစိာ်ကျိဖးဒိၣ် အဆၢကတီၢ်  အဝဲတဂၤအိၣ်တ့ၢ်ဒီးယၤ ဒီးညိၣ်ဒံးဒၣ်ယၤလၢအကျိန့ၣ်လီၤ.''

တနံၤဃီဖဲ  မုၢ်ထူၣ် (၂)နၣ်ရံၣ်အဆၢကတီၢ်ႇ  စီၤဟ--- လၢအမၤတၢ်လၢ (JMC) တဂၤဟဲဆူ အ--- သဝီ လၢကလဲၤဆှၢဝဲဒၣ် ၦၤသဝီဖိခံဂၤလၢ ပယီၤသုးခးဘၣ်အီၤ ဒီးအဘၣ်ဒိန့ၣ်လီၤ.  အကတီၢ်ဖဲန့ၣ် လီၢ်ကဝီၤ သဝီသးၦၢ် စီၤဂ--- တဲဘၣ်စ့ၢ်ကီး စီၤဟ--- လၢၦၤအိၣ်ဒံးတဂၤ (စီၤယ---)လၢ ပယီၤသုး တီၢ်အီၤန့ၣ်လီၤ. စီၤဟ---လဲၤဃုသ့ၣ်ညါဝဲဒီး အထံၣ်ဝဲလၢ စီၤယ---အံၤ  အိၣ်ဒံးလၢ ပယီၤသုးအတၢ် ဖီၣ်ဃာ်အပူၤန့ၣ်လီၤ. အဝဲလဲၤတဲ ပယီၤသုးသ့ၣ်တဖၣ်လၢ စီၤယ---န့ၣ် မ့ၢ်ဒၣ်ၦၤသဝီဖိ ၦၤပတီၢ်မုၢ် တဂၤလီၤ. စီၤဟ--- တဲဘၣ်ဒ်န့ၣ်ဝံၤအလီၢ်ခံ အဝဲသ့ၣ် ပျၢ်လီၤ ကွံာ်စီၤယ---န့ၣ်လီၤ. 

စီၤယ--- တသ့ၣ်ညါဝဲလၢမတၤတီၢ်အီၤဘၣ်န့ၣ်လီၤ. အဝဲသ့ၣ်ညါဒၣ်ထဲ ၦၤမၤဒၢၣ်အီၤမ့ၢ်ပယီၤသုးန့ၣ်လီၤ.  အဝဲနာ်ဝဲလၢ စီၤဟ--- လၢ အမၤတၢ်လၢ (JMC) တဂၤအံၤ ကသ့ၣ်ညါဝဲမတၤတီၢ်အီၤလဲၣ်န့ၣ်လီၤ. KNLA  သုးရ့ၣ် (၁ဝ၂), သုးဒ့ (၃) သုးဒ့ခိၣ် စီၤဒ--- တဲဘၣ် KHRG လၢ ပယီၤသုးသ့ၣ်တဖၣ်န့ၣ် အိၣ်လၢ ခီၣ်ချ့သုးရ့ၣ် (၄ဝ၈) လၢအအိၣ်သူၣ်လီၤအသးဖဲ မီလိာ်ကျိသုးကလၢၤန့ၣ်လီၤ. နီၤထိမ့ၢ် သုးရ့ၣ်ခိၣ်ခံလၢ အမူဒါလီၤဖဲ အ--- သဝီ (ဒီးဒ်သိးကဟံးန့ၢ်ဂ့ၢ်ဝီလၢ တၢ်ကဲထီၣ်သးလၢ ခီၣ်ချ့သုးရ့ၣ် (၄ဝ၈) မၤဝဲအဂီၢ်န့ၣ်လီၤ). 

ဖဲတၢ်ကဲထီၣ်သးဝံၤ လွံၢ်သီပူၤကွံာ်ဒၣ်လဲာ် စီၤယ---အမဲာ်သၣ်လၢ ဘၣ်တၢ်မၤဒၢၣ်တီၢ်အီၤန့ၣ် ညိးဒံးဒၣ် အဖၢမုၢ်န့ၣ်လီၤ. အဝဲအစ့တအိၣ်လၢလၢလီၢ်လီၢ်လၢ ကလဲၤဒိးပၠးအတၢ်ပူၤလီၢ် လၢတၢ်ဆါဟံၣ်အဂီၢ်ဘၣ်န့ၣ်လီၤ. 

ဆၢကတီၢ်ခဲအံၤန့ၣ် ဒူသဝီတၢ်မၤစံးဆၢတၢ်သ့တၢ်ဘၣ် လၢကမၤစၢၤလီၢ်ကဝီၤဒူဖိသဝီဖိသ့ၣ်တဖၣ် လၢတၢ် ကဲ ထီၣ်သးဒ်အံၤသ့ၣ်တဖၣ် တအိၣ်ဒံးဘၣ်. သဝီသးၦၢ် စီၤဂ--- တဂၤ ခီဖျိလၢ အဝဲဘၣ်ယိၣ်တၢ်အဃိ အဝဲတဲဝဲ မ့ၢ်အဝဲကဘၣ်စံၣ်ဖျိးလၢ တၢ်လီၢ်အဂၤဧါမ့တမ့ၢ် ကဘၣ်ဟးထီၣ် မ့တမ့ၢ် အိၣ်ဘှံးကွံာ်လၢ အမူဒါ အလီၢ်လၤဧါန့ၣ်လီၤ. အဝဲပျံၤတၢ်မ့ၢ်လၢ တၢ်ကဲထီၣ်တ့ၢ်အသးဖဲ ၂ဝ၁၇ တဘျီစ့ၢ်ကီး မ့ၢ်ဒ်အံၤလီၤ.  အဝဲတဲစ့ၢ်ကီးဝဲ ၦၤခိၣ်ၦၤနၢ်လၢ အဖီခိၣ်သ့ၣ်တဖၣ် မ့ၢ်တမၤတၢ်နီတမံၤလၢ ကဘှါၡဲဝဲတၢ်ဂ့ၢ်ဝဲအံၤဘၣ်န့ၣ်,  အဝဲတဟံးန့ၢ် သဝီသးၦၢ်မူဒါလၢၤဘၣ်န့ၣ်လီၤ.

ၦၤတူၢ်ဘၣ်တၢ်တဂၤန့ၣ် ဟ့ၣ်ခွဲးလၢတၢ်သူဝဲတၢ်ဂ့ၢ်တၢ်ကျိၤအံၤသ့န့ၣ်လီၤ.