ဖဲလါမးရှး ၁၉ သီ ၂၀၂၃ နံၣ်န့ၣ် , SAC ခီၣ်ချ့သုးတြိၤ (၇၇) ဒီးခီၣ်ချ့သုးရ့ၣ် (၂၈၈) အသုးပာ်ဖှိၣ်သ့ၣ်တဖၣ်နုာ်လီၤ၀ဲ ဆူအိပ့ၣ်စူးဒီးအိရှံးကိသ၀ီလၢအအိၣ်လၢမူဟီၣ်က၀ီၤလီၤဆီ, မူကီၢ်ဆၣ်, ချၢၣ်လွံၢ်ထူၣ်ကီၢ်ရ့ၣ်အပူၤ ဒီးအ၀ဲသ့ၣ်အိၣ် ၀ဲလၢသ၀ီပူၤတုၤလၢလါမးရှး ၂၄ သီအနံၤန့ၣ်လီၤ. ဖဲလၢအ၀ဲသ့ၣ်နုာ်လီၤအိၣ်လၢသ၀ီပူၤအကတီၢ်န့ၣ်, အ၀ဲသ့ၣ်နုာ် လီၤဆူသ၀ီဖိတဖၣ်အဟံၣ်ပူၤဒီးမၤဟးဂီၤ၀ဲသ၀ီဖိသ့ၣ်တဖၣ်အတၢ်အီၣ်တၢ်အီ ဒီးတၢ်ဖိတၢ်လံၤအဂုၤအဂၤသ့ၣ်တဖၣ် န့ၣ်လီၤ.

တချုးလၢအ၀ဲသ့ၣ်ဟဲနုာ်လီၤဆူသ၀ီပူၤန့ၣ် SAC အသုးလၢအအိၣ်လၢနးသၣ်ကွ့အတိၤလၢအအိၣ်လၢနးသၣ်ကွ့သ၀ီ, မူကီၢ်ဆၣ်အပူၤ ဒီးအသုးလၢအအိၣ်လၢချၢၣ်ခိၣ်, အ့နဲးကရူၢ်, လၢၢ်ဒိၣ်ကီၢ်ဆၣ်အပူၤသ့ၣ်တဖၣ်စ့ၢ်ကီးခးလီၤ၀ဲကျိဖး ဒိၣ်သ့ၣ်တဖၣ်ဆူအိပ့ၣ်စူးဒီးအိရှံးကိသ၀ီပူၤန့ၣ်လီၤ. ခီဖျိလၢတၢ်ခးလီၤကျိဖးဒိၣ်သ့ၣ်တဖၣ်အဃိ သ၀ီဖိအဟံၣ်အဃီ တနီၤဘၣ်ဒိဟးဂီၤ၀ဲဒီးသ၀ီဖိအကျီၢ်ဘၣ်ဒိအိၣ်စ့ၢ်ကီး၀ဲန့ၣ်လီၤ.