English
ကညီကျိာ်
မြန်မာ
Print:တၢ်ဂီၤတၢ်ကစီၣ်တဘ့ၣ်အံၤပာ်ဖျါဝဲတၢ်ဂီၤတၢ်အုၣ်သးဘၣ်ဃးပယီၤသုးကဘီယူၤခးလီၤတၢ်လၢလီၢ်ကဝီၤပှၤတဝၢပူၤဖဲကီၢ်ပယီၤမုၢ်ထီၣ်ကလံၤထံးစးထီၣ်လၢလါယနူၤအါရံၤတုၤလါဒံၣ်စဲဘၢၣ် ၂၀၂၅ နံၣ်န့ၣ်လီၤ. KHRG ဒိးန့ၢ်ဘၣ်ဝဲတၢ်ဂီၤအါန့ၢ်ဒံး (၃,၆၀၀) ဘ့ၣ်လၢ အပာ်ဖျါထီၣ်တၢ်ဘၣ်ဒိဘၣ်ထံးလၢပယီၤသုးပညိၣ်ခးလီၤနါစိၤတၢ်လၢကဘီယူၤဖဲတၢ်ပာ်ဖျါထီၣ်တၢ်ဂ့ၢ်တၢ်ကျိၤအဆၢ ကတီၢ်န့ၣ်လီၤ. စးထီၣ်လၢ ၂၀၂၁နံၣ်, သုးဟံးန့ၢ်ဆူၣ်ထံကီၢ်တၢ်စိတၢ်ကမီၤဒီးတုၤဃီၤလၢ ၂၀၂၅ နံၣ်န့ၣ်, ကဘီယူၤခးလီၤ တၢ်အံၤဒုးအိၣ် ထီၣ်ဝဲတၢ်သံတၢ်ပှၢ်ဒီးတၢ်ဘၣ်ဒိဘၣ်ထံးလၢထံဖိကီၢ်ဖိကမျၢၢ်အကျါ, တၢ်သူၣ်ထီၣ်အါအါဂီၢ်ဂီၢ်လၢပှၤတဝၢပူၤ (ပၣ်ဃုာ်ဒီးကၠိ, သီခါဖၠၢ်, ဒီးတၢ်ဘါယွၤသရိၣ်) သ့ၣ်တဖၣ်ဘၣ်ဟးဂူာ်ဟးဂီၤ, တၢ်ဖံးအီၣ်မၤအီၣ်အလီၢ်ဒီးစံာ်ပျီသ့ၣ်တဖၣ် စ့ၢ်ကီးဘၣ်ဟးဂီၤ ဒီးဒုးအိၣ်ထီၣ်စ့ၢ်ကီးတၢ်ဃ့ၢ်မှံဟးဖျိးအါမးန့ၣ်လီၤ. ဖဲ ၂၀၂၅ နံၣ်အပူၤသဝီဖိအစှၤကတၢၢ် (၆၆) ဂၤ, ပၣ်ဃုာ်ဒီးဖိသၣ် (၁၈) ဂၤ ဘၣ်သံဝဲ, ဒီးသဝီဖိ (၁၇၆) ဂၤ, ပၣ်ဃုာ်ဒီးဖိသၣ် (၆၆) ဂၤဘၣ်ဒိဝဲလၢပယီၤသုးကဘီယူၤခးလီၤတၢ် ဖဲကီၢ်ပယီၤမုၢ်ထီၣ်ကလံၤထံးတကပၤန့ၣ်လီၤ. လၢတၢ်ခးလီၤတၢ်ဒံးအံၤအဖီခိၣ်, တၢ်ပျံၤတၢ်ဖုးလၢလီၢ်ကဝီၤသဝီဖိသ့ၣ် တဖၣ်အါထီၣ်ဝဲဒီးမၤစှၤလီၤဝဲ သဝီဖိသ့ၣ်တဖၣ်တၢ်ဘံၣ်တၢ်ဘၢဒီးမၤဘၣ်ဒိဝဲတၢ်လုၢ်အီၣ်နီၢ်ခိသသးသမူသ့ၣ်တဖၣ်န့ၣ်လီၤ. ကဘီယူၤခးလီၤတၢ်အံၤမ့ၢ်စ့ၢ်ကီး တၢ်ကီတၢ်ခဲဒိၣ်မးတခါလၢသဝီဖိသ့ၣ်တဖၣ်ကဒိးန့ၢ်ဘၣ်တၢ်အိၣ်ဆူၣ်အိၣ်ချ့, တၢ်ကူၣ်ဘၣ် ကူၣ်သ့, ဒီးတၢ်တိစၢၤမၤစၢၤအဂၤ သ့ၣ်တဖၣ်န့ၣ်လီၤ. သဝီဖိသ့ၣ်တဖၣ်ဘၣ်ပျံၤဘၣ်ဖုးဝဲလၢတၢ်ခးလီၤတၢ်လၢခါဆူမဲာ်ညါအံၤ မ့ၢ်တၢ်လီၤပျံၤလီၤဖုးလၢကဆဲးဖံးမၤတၢ်လၢစံာ်ပျီပူၤအဂီၢ်တသ့လၢၤဘၣ် ဒီးပှၤအါအါဂီၢ်ဂီၢ်ဃ့ၢ်အိၣ်ကဒုကွံာ်ဝဲဆူပှၢ်ပူၤဒီးဆူလ့ပူၤ လၢကထံၣ်န့ၢ်တၢ်အိၣ်ကဒုအလီၢ်န့ၣ်လီၤ.
တၢ်ဂီၤတၢ်ကစီၣ်- ပယီၤသုးခးလီၤတၢ်လၢကဘီယူၤအဃိဒုးအိၣ်ထီၣ်ဝဲတၢ်ဘၣ်ဒိဘၣ်ထံး, တၢ်ဟးဂူာ်ဟးဂီၤ, တၢ်ဃ့ၢ်မှံဟးဖျိး ဒီးတၢ်တတၢၤတနါသ့ၣ်တဖၣ်ဖဲ ၂၀၂၅ နံၣ်
စးထီၣ်လၢ ၂၀၂၁ နံၣ်, ပယီၤသုးမီၤစိရိၤသူအါထီၣ်ဝဲကဘီယူၤဒီးခးလီၤတၢ်ဖဲကီၢ်ပယီၤမုၢ်ထီၣ်ကလံၤထံးဒီးဒုးအိၣ်ထီၣ်တၢ်သံ တၢ်ပှၢ်ဒီးတၢ်ဘၣ်ဒိဘၣ်ထံး, တၢ်ဟးဂူာ်ဟးဂီၤဒီးတၢ်ဃ့ၢ်မှံဟးဖျိးလၢတၢ်လီၢ်အါတီၤန့ၣ်လီၤ. လၢ KHRG တၢ်မၤနီၣ်မၤဃါအ ဖီခိၣ်, ဖဲ ၂၀၂၅ နံၣ်န့ၣ်, ပယီၤသုးသူဝဲတၢ်စုကဝဲၤအကလုာ်လၢအလီၤဆီလိာ်အသး, ပၣ်ဃုာ်ဒီးကျိစဲးလး, ကျိဖးဒိၣ်ဒီးမ့ၣ်ပိၢ် အကလုာ်သ့ၣ်တဖၣ်ဖဲအဝဲသ့ၣ်ခးလီၤတၢ်လၢကဘီယူၤဖဲလီၢ်ကဝီၤသ့ၣ်တဖၣ်လၢအအိၣ်သူၣ်လီၤအသးဖဲသုးရ့ၣ်နွံဘ့ၣ်လၢအဘၣ်တၢ်နီၤဖးလီၤဒံးအမ့ၢ်ကညီကီၢ်စဲၣ်န့ၣ်လီၤ. ဒူသထူၣ် (သထုံ), တီအူ (တောင်ငူ), ချၢၣ်လွံၢ်ထူၣ် (ညောင်လေးပင်), ဘျံး ဒဝဲၢ်, မုၢ်တြီၢ် (ဖာပွန်), ဒူပျာ်ယာ်ဒီးဖၣ်အၣ်သ့ၣ်တဖၣ်န့ၣ်လီၤ. တၢ်ဒုးကဲထီၣ်သးမ့ၢ်ဂ့ၤတကဲထီၣ်ဘၣ်မ့ၢ်ဂ့ၤကဘီယူၤခး လီၤတၢ်လၢအဘူးဒီးသဝီသ့ၣ်တဖၣ်ဒီးတချုးတၢ်ကဲထီၣ်သးအဆၢကတီၢ်တၢ်ဟ့ၣ်ပလီၢ်ဒီးတၢ်ပူၤဖျဲးအလီၢ်တအိၣ်ဘၣ်န့ၣ်လီၤ. ညီနုၢ်ကဘီယူၤခးလီၤတၢ်ဖဲအဟဲဆှၣ်ကွၢ်တၢ်ဝံၤအလီၢ်ခံန့ၣ်လီၤ. ပှၤတဝၢတၢ်သူၣ်ထီၣ်လၢကဘီယူၤခးလီၤဘၣ်ဒိအနီၣ်ဂံၢ်အါ ကတၢၢ်န့ၣ်မ့ၢ်ဝဲ, ကၠိ, သီခါဖၠၢ်ကရၢၢ်ဒီးတၢ်ဘါယွၤသရိာ်ဒီးတၢ်သူၣ်ထီၣ်သ့ၣ်တဖၣ်အံၤမ့ၢ်တၢ်သူၣ်ထီၣ်လၢအဘၣ်တၢ်ထံၣ်အီၤ ညီလၢကလံၤကျါဒီးသဝီဖိအဟံၣ်, စံာ်ပျီဒီးတၢ်ဖံးအီၣ်မၤအီၣ်အလီၢ်သ့ၣ်တဖၣ်န့ၣ်လီၤ.
တၢ်ဂီၤတၢ်ကစီၣ်အံၤပၣ်ဃုာ်ဒီးတၢ်ဂီၤ (၈၃) ဘ့ၣ် (လၢအဘၣ်တၢ်ဃုထၢထီၣ်အီၤလၢတၢ်ဂီၤခဲလၢာ် (၃,၆၆၂) ဘ့ၣ်အကျါလၢ တၢ်ဒိးန့ၢ်အီၤဖဲ ၂၀၂၅ နံၣ်အပူၤ), ပာ်ဖျါထီၣ်ဝဲတၢ်အုၣ်ကီၤသးဘၣ်ဃးတၢ်ဘၣ်ဒိဘၣ်ထံးလၢလီၢ်ကဝီၤသဝီဖိသ့ၣ်တဖၣ်ဘၣ် ကွၢ်ဆၢၣ်မဲာ်ဝဲဖဲပယီၤသုးကဘီယူၤခးလီၤတၢ်လၢကီၢ်ပယီၤမုၢ်ထီၣ်ကလံၤထံးဝံၤအလီၢ်ခံန့ၣ်လီၤ. တၢ်ဂီၤ (၇၄) ဘ့ၣ်လၢအပၣ် ဃုာ်န့ၣ်ဘၣ်တၢ်ဒိန့ၢ်အီၤလၢလီၢ်ကဝီၤသဝီဖိလၢအဘၣ်တၢ်ဟံးစုနဲၣ်ကျဲအီၤလၢ KHRG ဒ်သိးကမၤနီၣ်မၤဃါတၢ်မၤဘၣ်ဒိပှၤ ဂ့ၢ်ဝီခွဲးယာ်လၢအဝဲသ့ၣ်အလီၤကဝီၤပူၤဒီးတၢ်ဂီၤ (၉) ဘ့ၣ်ဘၣ်တၢ်ဒိန့ၢ်အီၤလၢသဝီဖိဒီးပှၤဘၣ်မူဘၣ်ဒါန့ၣ်လီၤ. တၢ်ဂီၤသ့ၣ်တ ဖၣ်အံၤပာ်ဖျါထီၣ်ဝဲတၢ်ဘၣ်ဒိဘၣ်ထံး, တၢ်ဟးဂူာ်ဟးဂီၤ, တၢ်ဃ့ၢ်မှံဟးဖျိးဒီးတၢ်စုကဝဲၤအကလုာ်လၢအလီၤဆီလိာ်အသးလၢ ပယီၤသုးသူဝဲဖဲအခးလီၤတၢ်လၢကဘီယူၤအဆၢကတီၢ်န့ၣ်လီၤ. ပှၤတူၢ်ဘၣ်တၢ်အမံၤ, တၢ်ဂီၤဒီးတၢ်လီၢ်တၢ်ကျဲသ့ၣ်တဖၣ်ဘၣ် တၢ်ပာ်ဘၢဃာ်လၢတၢ်ဘံၣ်တၢ်ဘၢအဂီၢ်န့ၣ်လီၤ.
တၢ်ဂီၤခံဘ့ၣ်အံၤဘၣ်တၢ်ဒိန့ၢ်အီၤဖဲလါယနူၤအါရံၤ ၂၀၂၅ ဖဲဘဘ---သဝီ, မ့စီကရူၢ်, ဘံလ့ကီၢ်ဆၣ်, ဒူသထူၣ်ကီၢ်ရ့ၣ်န့ၣ်လီၤ. ဖဲလါယနူၤအါရံၤ ၁၆ သီ, ၂၀၂၅ နံၣ်အနံၤ, ထံကီၢ်တၢ်ပၢတၢ်ပြးကီၣ်ကးကရၢ (SAC) ဒြိ (ကၤမံၤကၤစံၣ်), ဘၣ်တၢ်သ့ၣ်ညါ စ့ၢ်ကီးလၢဒြိတူၢ်သံသးတဘ့ၣ်ဟဲတ့ၢ်လီၤတၢ်ဖဲကၠိလၢအ အိၣ်ဖဲဘဘ---သဝီ, ဒီးကၠိအံၤဘၣ်ဒိဝဲန့ၣ်လီၤ. ဒြိအံၤတ့ၢ်လီၤတၢ်ဖဲကၠိ ပျၢ်အဆၢကတီၢ်အဃိတဘၣ်ဒိဘၣ်ထံးပှၤနီတဂၤဘၣ်န့ၣ်လီၤ. ဖဲဒြိခးလီၤတၢ်ဝံၤအလီၢ်ခံကၠိဖိသ့ၣ်တဖၣ်ထီၣ်က့ၤကၠိတဘူၣ် ဘၣ်ခီဖျိသဝီဖိသ့ၣ်တဖၣ်ပျံၤတၢ်ဖုးတၢ်ဒိၣ်မးအဃိန့ၣ်လီၤ. တၢ်ကဲထီၣ်သးဒံးအံၤအဃိကၠိအံၤဘၣ်တၢ်ပတုာ်ကွံာ်ဝဲန့ၣ်လီၤ. စးထီၣ်လၢ ၂၀၂၁ နံၣ်, သုးဟံးဆူၣ်တၢ်စိတၢ်ကမီၤလံၤလံၤန့ၣ်ကၠိအံၤဘၣ်တၢ်ဆီၣ်ထွဲအီၤလၢကညီကူၣ်သ့ဆဲးလၤဝဲၤကျိၤ (KECD) န့ၣ်လီၤ. တၢ်ဂီၤလၢစုစ့ၣ်တဘ့ၣ်ပာ်ဖျါထီၣ်ဝဲကၠိခိၣ်ဒုးဒီး (စဲလ့) လၢအဘၣ်ဒိဟးဂီၤန့ၣ်လီၤ. တၢ်ဂီၤလၢစုထွဲတ ဘ့ၣ်န့ၣ်ပာ်ဖျါထီၣ်ဝဲကၠိပဲတြီဖိဒီး (စဲလ့) သ့ၣ်တဖၣ်ဘၣ်ဒိဝဲန့ၣ်လီၤ. (တၢ်ဂီၤ- KHRG)
တၢ်ဂီၤသ့ၣ်တဖၣ်အံၤဘၣ်တၢ်ဒိန့ၢ်အီၤဖဲလါယနူၤအါရံၤ ၂၀၂၅ နံၣ်ဖဲရီဘၢၣ်ကျီးလၢအအိၣ်ဘူးဖဲအအ---သဝီ, ဟးတရဲာ်ကရူာ်, ဖၣ်အၣ်ကီၢ်ဆၣ်, ဒူသထူၣ်ကီၢ်ရ့ၣ်န့ၣ်လီၤ. ဖဲလါယနူၤအရံၤ ၂၂ သီ, ၂၀၂၅ နံၣ်အနံၤန့ၣ်, SAC ကဘီယူၤဒုးသုးတဘ့ၣ် ဟဲတ့ၢ်လီၤဝဲမ့ၣ်ပိၢ် (၅၀၀-ပီၣ်) ခံဖျၢၣ်ဖဲအအ---ဟီၣ် ကဝီၤန့ၣ်လီၤ. မ့ၣ်ပိၢ်အံၤလီၤတဲာ်ပိၢ်ဖးထီၣ်ဖဲရီဘၢၣ်ကျီးပူၤလၢအဘူးဒီး အအ---သဝီ, ဘၣ်ဒိဘၣ်ထံးဝဲကျီးဒ်တၢ်ဂီးပာ်ဖျါထီၣ်ဝဲအသိးန့ၣ်လီၤ. တၢ်ဖံးအီၣ်မၤအီၣ်အလီၢ်အံၤမ့ၢ်ဝဲသဝီဖိလၢအအိၣ်ဖဲ အအ---တဂၤအတၢ်န့ၣ်လီၤ. (တၢ်ဂီၤ- KHRG)
တၢ်ဂီၤအံၤဘၣ်တၢ်ဒိန့ၢ်အီၤဖဲလါယနူၤအါရံၤ ၂၀၂၅ နံၣ်ဖဲဆဆ---သဝီ, တၤအုးခံကရူၢ်, ဘံလ့ကီၢ်ဆၣ်, ဒူသထူၣ်ကီၢ်ရ့ၣ် န့ၣ်လီၤ. ဖဲလါယနူၤအါရံၤ ၃၁ သီ, ၂၀၂၅ နံၣ်အနံၤန့ၣ်, SAC ဒြိ (ကၤမံၤကၤစံၣ်) (၆) ဘ့ၣ်ဟဲတ့ၢ်လီၤတၢ်ဖဲဆဆ--သဝီန့ၣ်လီၤ. ဒြိ (၃) ဘ့ၣ်ပိၢ်ဖးထီၣ်ဖဲသ ဝီပူၤဒီးဘၣ်ဒိဝဲသီခါဖၠၢ်တဖျၢၣ် န့ၣ်လီၤ. ဒြိအဂၤ (၃) ဘ့ၣ်လီၤတဲာ်ဖဲစံာ်ပျီပူၤ လၢအအိၣ်ဖဲသဝီချၢဒီးတပိၢ်ဖးထီၣ်ဘၣ်န့ၣ်လီၤ. ခီဖျိဒြိခးလီၤတၢ်ဒ်အံၤအဃိဒုးအိၣ်ထီၣ်ဝဲတၢ်ပျံၤတၢ်ဖုးလၢသဝီဖိသ့ၣ်တဖၣ် အကျါ, သဝီဖိတနီၤလဲၤဃ့ၢ်မံအိၣ်က့ၤဝဲဖဲဒဲလၢအအိၣ်ဖဲသဝီချၢဖဲမုၢ်နၤခါအဆၢကတီၢ်ဒီးဟဲက့ၤဝဲဖဲမုၢ်ဆါခါအဆၢကတီၢ် န့ၣ်လီၤ. တၢ်ဂီၤလၢစုစ့ၣ်တဘ့ၣ်ပာ်ဖျါထီၣ်ဝဲ (ကၤမံၤကၤစံၣ်) ဒြိခံဘ့ၣ်လၢအဘၣ်တၢ်ထံၣ်န့ၢ်အီၤလၢသဝီဖိန့ၣ်လီၤ. ဒြိတဘ့ၣ် လီၤတဲာ်ဖဲသဝီပူၤဒီးအဂၤသ့ၣ်တဖၣ်လီၤတဲာ်ဖဲသဝီချၢန့ၣ်လီၤ. တၢ်ဂီၤလၢစုထွဲတဘ့ၣ်ပာ်ဖျါထီၣ်ဝဲ SAC ဒြိတဘ့ၣ်လၢအပိၢ်ဖး ထီၣ်လၢသီခါဖၠၢ်တၢ်ပျီပူၤ လၢအဘူးဒီးကၠိန့ၣ်လီၤ. (တၢ်ဂီၤ- KHRG)
တၢ်ဂီၤအံၤဘၣ်တၢ်ဒိန့ၢ်အီၤဖဲလါဖ့ၤဘြူၤအါရံၤ ၂၀၂၅ နံၣ်ဖဲဒဒ---သဝီ, အစူးခၠီကရူၢ်, ဘံလ့ကီၢ်ဆၣ်, ဒူသထူၣ်ကီၢ်ရ့ၣ်န့ၣ်လီၤ. ဖဲလါဖ့ၤဘြူၤအရံၤ ၇ သီ, ၂၀၂၅ နံၣ်အနံၤ, SAC ကဘီယူၤဒုးသုးတဘ့ၣ်တ့ၢ်လီၤဝဲမ့ၣ်ပိၢ် (၇) ဖျၢၣ်ဖဲအၣ်စူးခၠီကရူၢၢ်ပူၤန့ၣ်လီၤ. မ့ၣ်ပိၢ်တဖျၢၣ်လီၤတဲာ်ပိၢ်ဖးထီၣ်ဖဲကၠိလၢအဘၣ်တၢ် ဆီၣ်ထွဲမၤစၢၤလၢ KECD တဖျၢၣ်အမဲာ်ညါဖဲဒဒ---သဝီဒီးဘၣ်ဒိဟးဂီၤဝဲ ကၠိသရၣ်ဟံၣ်ဒွဲတဖျၢၣ်ဒီးကၠိတဖျၢၣ်န့ၣ်လီၤ. မ့ၣ်ပိၢ်ခံဖျၢၣ်လီၤတဲာ်ဖဲသဝီပူၤဘၣ်ဆၣ်သဝီဖိတအိၣ်လၢသဝီပူၤနီတဂၤဘၣ်အ ဃိတၢ်ဘၣ်ဒိဘၣ်ထံးတအိၣ်ဘၣ်န့ၣ်လီၤ. မ့ၣ်ပိၢ်အဂၤ (၄) ဖျၢၣ်လီၤတဲာ်ဖဲဒဒ---သဝီချၢဘၣ်ဆၣ်တၢ်ဘၣ်ဒိဘၣ်ထံးဒီးတၢ်ဟး ဂူာ်ဟးဂီၤတအိၣ်နီတမံၤဘၣ်န့ၣ်လီၤ. တၢ်ဂီၤအံၤပာ်ဖျါထီၣ်ဝဲတၢ်ဘၣ်ဒိဘၣ်ထံးလၢမ့ၣ်ပိၢ်လၢအလီၢ်တဲာ်ဖဲကၠိလၢအအိၣ်ဖဲဒဒ---သဝီန့ၣ် လီၤ. (တၢ်ဂီၤ- KHRG)
တၢ်ဂီၤသ့ၣ်တဖၣ်အံၤဘၣ်တၢ်ဒိန့ၢ်အီၤဖဲလါဖ့ၤဘြူၤအါရံၤ ၂၀၂၅ နံၣ်ဖဲဘဘ---သဝီ, မ့စီကရူၢ်, ဘံလ့ကီၢ်ဆၣ်, ဒူသထူၣ်ကီၢ် ရ့ၣ်န့ၣ်လီၤ. ဖဲလါဖ့ၤဘြူၤ အါရံၤ ၉ သီ, ၂၀၂၅ နံၣ်အနံၤ, မုၢ်ထူၣ် ၁၂း၄၇ အဆၢကတီၢ်, SAC ကဘီယူၤဒုးသုးတဘ့ၣ်ဟဲတ့ၢ် လီၤဝဲမ့ၣ်ပိၢ် (၅၀၀-ပီၣ်) ခံဖျၢၣ်ဖဲဘဘ---သဝီ, ဘၣ်ဒိဟးဂီၤဝဲသီခါဖၠၢ်ဒိၣ် ဒိၣ်မုၢ်မုၢ်ဒီးဆှိထူၣ်တထူၣ်ဖဲသီခါဖၠၢ်ကရၢၢ်ပူၤ, ဘၣ်ဒိဝဲသီခါခံပါဒီးဘၣ်ဟးဂီၤဝဲသဝီဖိဟံၣ် (၅) ဖျၢၣ်န့ၣ်လီၤ. တၢ်ဂီၤလၢစုစ့ၣ်တဘ့ၣ်ပာ်ဖျါထီၣ်ဝဲသီခါဖၠၢ်တၢ်သူၣ်ထီၣ်လၢ အဘၣ်ဟးဂီၤဝဲဒိၣ်ဒိၣ်မုၢ်မုၢ်လၢမ့ၣ်ပိၢ်အဃိန့ၣ်လီၤ. တၢ်ဂီၤလၢစုထွဲတဘ့ၣ်ပာ်ဖျါထီၣ်ဝဲသဝီဖိဟံၣ်သ့ၣ်တဖၣ်လၢအဘၣ်ဒိ ဟးဂီၤလၢမ့ၣ်ပိၢ်အဃိန့ၣ်လီၤ. ပှၤတဘၣ်ဒိနီတဂၤဘၣ်ခီဖျိသဝီဖိခဲလၢာ်လၢအအိၣ်ဖဲဘဘ---သဝီပူၤအံၤဃ့ၢ်ကွံာ်ဝဲဖဲ SAC ဟဲခးလီၤတၢ်ဖဲလါယနူၤအါရံၤ ၂၀၂၅ နံၣ်ဝံၤအလီၢ်ခံလံန့ၣ်လီၤ. (တၢ်ဂီၤ- KHRG)
တၢ်ဂီၤခံဘ့ၣ်အံၤဘၣ်တၢ်ဒိန့ၢ်အီၤဖဲလါအ့ဖြ့ၣ် ၂၀၂၅ နံၣ်ဖဲ ဃဃ---သဝီ, ထံဖးဒိၣ်ထၣ်ကရူၢ်, ဘံလ့ကီၢ်ဆၣ်, ဒူသထူၣ် ကီၢ်ရ့ၣ်န့ၣ်လီၤ. ဖဲလါဖ့ၤဘြူၤအါရံၤ ၁၃ သီ, ၂၀၂၅ နံၣ်အနံၤ, SAC ကဘီယူၤဒုးသုးတဘ့ၣ်ဟဲတ့ၢ်လီၤဝဲမ့ၣ်ပိၢ် (၅၀၀-ပီၣ်) ခံဖျၢၣ်ဖဲဃဃ---သဝီ, ဘၣ်ဟးဂီၤဝဲတၢ်ဘါယွၤသရိၣ်တဖျၢၣ်ဒီး ဟံၣ် (၅) ဖျၢၣ်ဒီးဘၣ်ဒိဝဲသဝီဖိဟံၣ် (၂၂) ဖျၢၣ်န့ၣ်လီၤ. ဖဲမ့ၣ်ပိၢ်တၢတဖျၢၣ်လီၤတဲာ်ဖဲသရိၣ်ပူၤဝံၤအလီၢ်ခံသဝီဖိသ့ၣ်တဖၣ်ဃ့ၢ်ထီၣ်ကွံာ်ဝဲလၢသဝီပူၤန့ၣ်လီၤ. လၢတၢ်န့ၣ်အဃိသဝီဖိ တသံဒီးဘၣ်ဒိနီတဂၤဘၣ်န့ၣ်လီၤ. တၢ်ဂီၤလၢစုစ့ၣ်တဘ့ၣ်ပာ်ဖျါထီၣ်ဝဲတၢ်ဘါယွၤသရိၣ်လၢအဘၣ်ဟးဂီၤတဖျၢၣ်ဒီးတၢ်ဂီၤ လၢစုထွဲတဘ့ၣ်ပာ်ဖျါထီၣ်ဝဲသဝီဖိတဂၤအဟံၣ်ဟးဂီၤန့ၣ်လီၤ. (တၢ်ဂီၤ- KHRG)
တၢ်ဂီၤသ့ၣ်တဖၣ်အံၤဘၣ်တၢ်ဒိန့ၢ်အီၤဖဲလါအ့ဖြ့ၣ် ၂၀၂၅ နံၣ်ဖဲသီခါဖၠၢ်ကရၢၢ်ပူၤဖဲရှရှ---သဝီ, မ့စီကရူၢ်, ဘံလ့ကီၢ်ဆၣ်, ဒူသထူၣ်ကီၢ်ရ့ၣ်န့ၣ်လီၤ. ဖဲလါအ့ဖြ့ၣ် ၁၉ သီ, ၂၀၂၅ နံၣ်အနံၤ, ဖဲသီခါအိၣ်ဒီးမုၢ်ထူၣ်တၢ်အီၣ်အဆၢကတီၢ်, SAC ကဘီယူၤဒုးသုးတဘ့ၣ်ဟဲတ့ၢ်လီၢ်ဝဲ (၅၀၀-ပီၣ်) ခံဖျၢၣ်ဖဲရှရှ---သဝီ, သီခါဖၠၢ်ကရၢၢ်ပူၤ, ဘၣ်သံသီခါတပါဒီးသဝီဖိ (၂) ဂၤဒီးဘၣ်ဒိဝဲသီခါ (၆) ပါဒီးသဝီဖိ (၄) ဂၤန့ၣ်လီၤ. သီခါဖၠၢ်အံၤဘၣ်ဒိဟးဂီၤစ့ၢ်ကီးန့ၣ်လီၤ. တၢ်ဂီၤလၢစုစ့ၣ်တဘ့ၣ်ပာ်ဖျါ ထီၣ်ဝဲသီခါတပါလၢအဘၣ်သံလၢ SAC ကဘီယူၤခးလီၤတၢ်တဂၤဘၣ်တၢ်ကတီၤန့ၣ်အီၤအလီၢ်န့ၣ်လီၤ. တၢ်ဂီၤလၢစုထွဲတ ဘ့ၣ်ပာ်ဖျါထီၣ်ဝဲသီခါဖၠၢ်တၢ်သူၣ်ထီၣ်လၢအဘၣ်ဟးဂီၤဖဲရှရှ---သဝီပူၤန့ၣ်လီၤ. (တၢ်ဂီၤ- KHRG)
တၢ်ဂီၤသ့ၣ်တဖၣ်အံၤဘၣ်တၢ်ဒိန့ၢ်အီၤဖဲလါမ့ၤ ၂၀၂၅ နံၣ်ဖဲဂဂ---သဝီ, ဟးတရဲာ်ကရူၢ်, ဖၣ်အၣ်ကီၢ်ဆၣ်, ဒူသထူၣ်ကီၢ်ရ့ၣ် န့ၣ်လီၤ. ဖဲလါမ့ၤ ၄ သီ, ၂၀၂၅ နံၣ်အနံၤ, မုၢ်နၤခီအဆၢကတီၢ်န့ၣ်, SAC ကဘီယူၤဒုးသုးတဘ့ၣ်ဟဲတ့ၢ်လီၤဝဲမ့ၣ်ပိၢ် (၂) ဖျၢၣ်ဖဲဂဂ---သဝီ (ဘၣ်တၢ်သ့ၣ်ညါစ့ၢ်ကီးအီၤဒံးဟဟ---), ဘၣ်ဟးဂီၤဝဲတၢ်ဆါဟံၣ်လီၢ်မံတဖျၢၣ်န့ၣ်လီၤ. ဖဲ SAC ခးလီၤတၢ် ဒီးကဘီယူၤဖဲဂဂ---တၢ်ဆါဟံၣ်ဝံၤအလီၢ်ခံ, သဝီဖိလၢသဝီပူၤသ့ၣ်တဖၣ်လဲၤလၢတၢ်ဆါဟံၣ်တသ့လၢၤဘၣ်န့ၣ်လီၤ. တၢ်ဆါ ဟံၣ်အံၤဘၣ်တၢ်ပၢဆှၢရဲၣ်ကျဲၤအီၤလၢကညီဆူၣ်ချ့မၤစၢၤဝဲၤကျိၤ (KDHW) န့ၣ်လီၤ. တချုးတၢ်ကဲထီၣ်သးဒံးဘၣ်န့ၣ်, သဝီဖိဒီးဆူၣ်ချ့ပှၤမၤတၢ်ဖိသ့ၣ်တဖၣ်ဃ့ၢ်ကွံာ်ဝဲတစိၤတလီၢ်ခီဖျိအဝဲသ့ၣ်ဘၣ်တၢ်ဟ့ၣ်ပလီၢ်အီၤလၢ ကညီဒီကလုာ်စၢဖှိၣ်ကရၢ (KNU) ခိၣ်နၢ်တဖၣ်လၢ SAC ကဟဲခးလီၤတၢ်န့ၣ်လီၤ. လၢတၢ်န့ၣ်အဃိပှၤတဘၣ်ဒိဘၣ်ထံးနီတဂၤဘၣ်န့ၣ်လီၤ. တၢ်ဂီၤခံဘ့ၣ် အံၤပာ်ဖျါထီၣ်ဝဲတၢ်ဆါဟံၣ်တဖျၢၣ်လၢအဘၣ်ဟးဂီၤကွံာ်ဝဲဖဲ SAC ကဘီယူၤဒုးသုးခးလီၤတၢ်ဖဲဂဂ---သဝီပူၤဝံၤအလီၢ် ခံန့ၣ်လီၤ. (တၢ်ဂီၤ- KHRG)
တၢ်ဂီၤသ့ၣ်တဖၣ်အံၤဘၣ်တၢ်ဒိန့ၢ်အီၤဖဲလါမ့ၤ ၂၀၂၅ နံၣ်ဖဲ သသ---သဝီ, ဝ့ကဲၣ်ကရူၢ်, ကၠဲၤထိၣ်ကီၢ်ဆၣ်, ဒူသထူၣ်ကီၢ် ရ့ၣ်န့ၣ်လီၤ. ဖဲလါမ့ၤ ၁၀ သီ, ၂၀၂၅ နံၣ်အနံၤ, ဟါခီ ၄း၀၀ အဆၢကတီၢ်, SAC ကဘီယူၤဒုးသုး (Y-12) တဘ့ၣ်ဟဲတ့ၢ် လီၤဝဲမ့ၣ်ပိၢ် (၅) ဖျၢၣ်ဖဲသသ---သဝီန့ၣ်လီၤ. သဝီဖိအဟံၣ် (၄) ဖျၢၣ်ဘၣ်အူအီၣ်ကွံာ်ဝဲဒီး (၂) ဖျၢၣ်န့ၣ်ဘၣ်ဒိဝဲလၢ ကဘီယူၤခးလီၤတၢ်အဃိန့ၣ်လီၤ. လၢန့ၣ်အမဲာ်ညါသဝီဖိ လၢအမံၤမ့ၢ်စီၤအ---, သးနံၣ်အိၣ် ဝဲ (၁၈) နံၣ်ဒီးစီၤဘ---, သးနံၣ်အိၣ်ဝဲ (၃၁) နံၣ်ခံဂၤအံၤဘၣ်ဒိဝဲလၢမ့ၣ်ပိၢ်ပိၢ်ဖးထီၣ် အက့န့ၣ်လီၤ. ဖဲတၢ်ကဲထီၣ်သးဝံၤအလီၢ်ခံသဝီဖိလၢအအိၣ်ဖဲ သသ---သဝီမ့ၢ်ဂ့ၤသဝီအဂၤလၢအအိၣ်ဘူးမ့ၢ်ဂ့ၤဃ့ၢ်ကွံာ်ဝဲ န့ၣ်လီၤ. တၢ်ဂီၤသ့ၣ်တဖၣ်အံၤပာ်ဖျါထီၣ်ဝဲသဝီဖိအဟံၣ်ဖဲ သသ---သဝီပူၤလၢအဘၣ်ဒိဟးဂီၤကွံာ်လၢကဘီယူၤခးလီၤ တၢ်အဃိန့ၣ်လီၤ. (တၢ်ဂီၤ- KHRG)
တၢ်ဂီၤသ့ၣ်တဖၣ်အံၤဘၣ်တၢ်ဒိန့ၢ်အီၤဖဲလါအီးကထိဘၢၣ် ၂၀၂၅ နံၣ်ဖဲဧဧ---သဝီ, ယိၤကျါကရူၢ်, ဘံလ့ကီၢ်ဆၣ်, ဒူသထူၣ်ကီၢ် ရ့ၣ်န့ၣ်လီၤ. ဖဲလါအီးက ထိဘၢၣ် ၉ သီ, ၂၀၂၅ နံၣ်အနံၤ, ဟါခီ ၈း၀၀ အဆၢကတီၢ်, ပယီၤသုးကဘီယူၤတဘ့ၣ်ဟဲတ့ၢ် လီၤဝဲမ့ၣ်ပိၢ် (၅၀၀-ပီၣ်) (၂) ဖျၢၣ်ဖဲဧဧ---သဝီန့ၣ်လီၤ. မ့ၣ် ပိၢ်အကျါတဖျၢၣ်တပိၢ်ဖးထီၣ်ဘၣ်ဒီးအဂၤတဖျၢၣ်ပိၢ်ဖးထီၣ်ဒီး ဘၣ်သံဝဲဖိသၣ် (၅) ဂၤဒီးဘၣ်ဒိဝဲသဝီဖိ (၉) ဂၤပၣ်ဃုာ်ဒီးဖိသၣ် (၂) ဂၤန့ၣ်လီၤ. ပှၤတူၢ်ဘၣ်တၢ်သ့ၣ်တဖၣ်အံၤပာ် လီၤအသးလၢကက့ၤမံအိၣ်ဘှံးလၢအလီၢ်မံဒီးဖဲန့ၣ်ကဘီယူၤခးလီၤတၢ်န့ၣ်လီၤ. မ့ၣ်ပိၢ်ဘၣ်ဟးဂီၤဝဲသဝီဖိအဟံၣ် (၂) ဖျၢၣ် ဒီးဘၣ်ဒိဝဲ (၅) ဖျၢၣ်န့ၣ်လီၤ. လၢန့ၣ်အမဲာ်ညါဘၣ်ဒိသံကွံာ်စ့ၢ်ကီးဝဲလီၢ်ကဝီၤသဝီဖိအတၢ်ဖိတၢ်လံၤဒ်အမ့ၢ် ကျီၢ် (၂) ဒု, ထီး (၃) ဒု, သၣ်မံညီၤ (၂) ဒုဒီး ထွံၣ်တဒုဒီးကျီၢ်တဒုဘၣ်ဒိဝဲန့ၣ်လီၤ. တၢ်ဂီၤလၢစုစ့ၣ်တဘ့ၣ်ပာ်ဖျါထီၣ်ဝဲဖိသၣ်လၢအဘၣ်သံ လၢပယီၤသုးကဘီယူၤခးလီၤတၢ်န့ၣ်လီၤ. တၢ်ဂီၤလၢစုထွဲတဘ့ၣ်ပာ်ဖျါထီၣ်ဝဲကျီၢ်ခံဒုဒီးသၣ်မံညီၤခံဒုလၢအမ့ၢ်သဝီဖိလၢ အဘၣ်သံကွံာ်လၢပယီၤသုးကဘီယူၤခးလီၤတၢ်တဂၤအတၢ်န့ၣ်လီၤ. (တၢ်ဂီၤ- KHRG)
တၢ်ဂီၤသ့ၣ်တဖၣ်အံၤဘၣ်တၢ်ဒိန့ၢ်အီၤဖဲလါယနူၤအါရံၤ ၂၀၂၅ နံၣ်ဖဲသဝီဖိအစံာ်ပျီပူၤလၢအဘူးဒီးကက---သဝီ, ဒ့လိာ်ကရူၢ်, ထီတထူၣ်ကီၢ်ဆၣ်, တီအူကီၢ်ရ့ၣ်န့ၣ်လီၤ. စးထီၣ်လၢလါယနူၤအါရံၤ ၁၀ သီ, တုၤ ၁၂ သီ, ၂၀၂၅ နံၣ်အနံၤ, SAC သုးဖိလၢ အအိၣ်ဖဲခီၣ်သုးရ့ၣ် (ခလရ) နီၣ်ဂံၢ် ၃၉ သုးကလၢၤအံၤခးလီၤနါစိၤဝဲကျိဖးဒိၣ်အါအါဂီၢ်ဂီၢ်ဒီးခးလီၤတၢ်ဒီးဒြိဖဲဒ့လိာ် ကရူၢ်ပူၤန့ၣ်လီၤ. မ့ၣ်ပိၢ်ခံဖျၢၣ်လၢဒြိတ့ၢ်လီၤအံၤလီၤတဲာ်ပိၢ်ဖးထီၣ်ဖဲသဝီဖိတဂၤအဟံၣ်လၢ အအိၣ်ဘူးဒီးကက---သဝီန့ၣ်လီၤ. ဟံၣ်ကစၢ်မ့ၢ်ဝဲစီၤဆ---ဒီးအိၣ်သူလီၤအသးဖဲစံာ်ပျီပူၤဘူးဒီးသဝီန့ၣ်လီၤ. ဖဲ SAC ဒြိဟဲခးလီၤတၢ် အဆၢကတီၢ်န့ၣ်, စီၤဆ---, သးနံၣ် (၈၂) နံၣ်ဒီးအဖိခွါဒ---, သးနံၣ်အိၣ် (၄၂) နံၣ်ခံဂၤအံၤအိၣ်ဖဲအဟံၣ်ပူၤဒီးဘၣ်ဒိဝဲန့ၣ်လီၤ. စီၤဆ---ဘၣ်ဒိဝဲဖဲအစုထွဲ တပၤ, သးနါပှၢ် ဒီးအမဲာ်တူာ်ခိၣ်အဃံန့ၣ်လီၤ. ဒ---ဘၣ်ဒိဖဲအခိၣ်တိသၣ်, အခၣ်, အခီၣ်ဒီးအစုန့ၣ်လီၤ. အဟံၣ်တၢ် ပီးတၢ်လီဘၣ်ဒိဟးဂီၤအါမးန့ၣ်လီၤ. စီၤဆ---အံၤအ ဟံၣ်ဖိဃီဖိဆှၢအီၤဆူတီအူတၢ်ဆါဟံၣ်လၢအဘၣ်တၢ်တီခိၣ်ရိၣ်မဲအီၤလၢ SAC ဖဲ တီအူ (တောင်းငူ) ဝ့ၢ်, ဒီၣ်ဖါခိၣ်ကီၢ်ဆၣ်, တီအူကီၢ်ရ့ၣ်ဒ်သိးက ဒိးန့ၢ်ဘၣ်တၢ်ကူစါယါဘျါသးဒီးမ့မ့ၢ်ဒ---တဂၤဒိးန့ၢ်ဘၣ်ဝဲတၢ်ကူစါယါဘျါသးဖဲအဟံၣ်ဒီးဘျါက့ၤဝဲလံန့ၣ်လီၤ. စီၤဆ---စံာ်လီၤတၢ်ဆါဟံၣ်ဖဲလါဖ့ၤဘြူၤ အါရံၤ ၂၀၂၅ နံၣ်ဒီးအတၢ်ပူၤလီၢ်အံၤဘျါလံန့ၣ်လီၤ. အဟံၣ်ဖိဃီဖိကဘၣ်လီးဝဲကသံၣ်ပှ့ၤလၢတၢ်ကူစါယါဘျါသးအဂီၢ်န့ၣ်လီၤ. တၢ်ဂီၤလၢ စုစ့ၣ်တဘ့ၣ်ပာ်ဖျါထီၣ်ဝဲစီၤဆ---အဟံၣ်လၢအဘၣ်ဟးဂီၤလၢမ့ၣ်ပိၢ်အတၢ်ပိၢ်ဖးထီၣ်အဃိန့ၣ်လီၤ. တၢ်ဂီၤလၢစုထွဲတဘ့ၣ် ပာ်ဖျါထီၣ်ဝဲမ့ၣ်ပိၢ်က့လၢအလီၤတဲာ်ပိၢ်ဖး ထီၣ်ဖဲစီၤဆ---အဟံၣ်န့ၣ်လီၤ. (တၢ်ဂီၤ- KHRG)
တၢ်ဂီၤသ့ၣ်တဖၣ်အံၤဘၣ်တၢ်ဒိန့ၢ်အီၤဖဲလါမးရှး ၂၀၂၅ နံၣ်ဖဲရီဘၢၣ်ကျီးပူၤလၢအဘူးဒီးလဧ---သဝီ, ပရှီလိာ်ကရူၢ်, ဒီၣ်ဖါ ခိၣ်ကီၢ်ဆၣ်, တီအူကီၢ်ရ့ၣ်န့ၣ် လီၤ. ဖဲလါမးရှး ၁၃ သီ, ၂၀၂၅ နံၣ်အနံၤန့ၣ်, SAC ကဘီယူၤဒုးသုးတဘ့ၣ်ဟဲတ့ၢ် လီၤဝဲမ့ၣ်ပိၣ် (၂) ဖျၢၣ်ဖဲလီၢ်ကဝီၤသဝီဖိအရီဘၢၣ်ကျီးပူၤန့ၣ်လီၤ. မ့ၣ်ပိၢ်တဖျၢၣ်ပိၢ်ဖးထီၣ်ဒီးအဂၤတဖျၢၣ်တပိၢ်ဖးထီၣ်ဘၣ်န့ၣ်လီၤ. တၢ်ဂီၤ လၢစုစ့ၣ်တဘ့ၣ်ပာ်ဖျါထီၣ်ဝဲတၢ်ပူၤဖးဒိၣ်ဖဲရီဘၢၣ်ကျီးပူၤလၢမ့ၣ်ပိၢ်လၢအတပိၢ်ဖးထီၣ်ဘၣ်တဖျၢၣ်လီၤတဲာ်အလီၢ်န့ၣ်လီၤ. တၢ် ဂီၤလၢစုထွဲတဘ့ၣ်ပာ်ဖျါထီၣ်ဝဲရီဘၢၣ်ထူၣ်ဘၣ်ဒိလၢမ့ၣ်ပိၢ်ခံဖျၢၣ်တဖျၢၣ်ပိၢ်ဖးထီၣ်ဘၣ်အဃိန့ၣ်လီၤ. လီၢ်ကဝီၤသဝီဖိသ့ၣ်တ ဖၣ်နာ်ဝဲလၢမ့ၣ်ပိၢ်ခံဖျၢၣ်အံၤမ့ၢ်ဝဲ (၅၀၀-ပီၣ်) န့ၣ်လီၤ. ဒ်လီၢ်ကဝီၤသဝီဖိတဂၤလၢအထံၣ်ထွဲတၢ်ကဲထီၣ်သးအံၤပာ်ဖျါ ထီၣ်ဝဲအသိး, မ့ၣ်ပိၢ်အံၤတၢ်မ့ၢ်တ့ၢ်လီၤအီၤလၢသဝီပူၤန့ၣ်ပှၤလၢအိၣ်လၢဟံၣ်မ့ၢ်ဂ့ၤအိၣ်ခူသူၣ်လၢတၢ်ပူၤမ့ၢ်ဂ့ၤတပူၤဖျဲးနီတဂၤ ဘၣ်န့ၣ်လီၤ. လီၢ်ကဝီၤသဝီဖိသ့ၣ်တဖျၣ်ပျံၤ တၢ်ဖုးတၢ်ဒိၣ်မးန့ၣ်လီၤ. (တၢ်ဂီၤ- KHRG)
တၢ်ဂီၤတဘ့ၣ်အံၤဘၣ်တၢ်ဒိန့ၢ်အီၤဖဲလါမ့ၤ ၂၀၂၅ နံၣ်ဖဲကျ့ၤ ဝၣ်မုၢ် ထီၣ်ကရူၢ်, ဒီၣ်ဖါခိၣ်ကီၢ်ဆၣ်, တီအူကီၢ်ရ့ၣ် န့ၣ်လီၤ. ဖဲလါမ့ၤ ၁၈ သီ, ၂၀၂၅ နံၣ်အနံၤ, ဂီၤခီ ၁၁း၃၀ အဆၢကတီၢ်, SAC ကဘီ ယူၤဒုးသုးတဘ့ၣ်ဟဲတ့ၢ်လီၤဝဲမ့ၣ်ပိၢ် (၅၀၀-ပီၣ်) ခံဖျၢၣ်ဖဲမမ---တီၤထီကၠိကရၢၢ်ပူၤလၢအအိၣ်ဖဲကျ့ၤဝၣ်မုၢ်ထီၣ် ကရူၢ်န့ၣ်လီၤ. ကၠိအံၤဘၣ်တၢ်တီခိၣ်ရိၣ်မဲအီၤလၢ KECD န့ၣ်လီၤ. မ့ၣ်ပိၢ်ပိၢ်ဖးထီၣ်တဖျၢၣ်န့ၣ်လီၤ. မမ---တီၤထီကၠိ သရၣ်ကၠိခိၣ်စီၤဃ---ဘၣ်ဒိဝဲဒီးမ့ၣ်ပိၢ်အက့ဖဲအဖံဘၣ်ခိၣ်န့ၣ် လီၤ. သဝီဖိဟံၣ်ခံဖျၢၣ်, သ့ၣ်ထူၣ်တနီၤဒီးတၢ်ဟးလီၢ်သ့ၣ်တ ဖၣ်ဘၣ်ဒိဝဲန့ၣ်လီၤ. ဖဲတၢ်ကဲထီၣ်သးအဆၢကတီၢ်ပှၤအိၣ် လၢကၠိကရၢၢ်ပူၤပၣ်ဃုာ်ဒီးကၠိဖိ, လီၢ်ကဝီၤဆူၣ်ချ့ပှၤမၤတၢ်ဖိဒီး သရၣ်သ့ၣ်တဖၣ်ကအိၣ်လၢ (၂၀) ဂၤဒီးအဝဲသ့ၣ်ဃ့ၢ်ကွံာ်ဝဲ တဘျီဃီဆူထံကျိပူၤလၢကဒိးန့ၢ်ဘၣ်တၢ်ပူၤဖျဲးအလီၢ်န့ၣ် လီၤ. သရၣ်ကၠိခိၣ်လၢအဘၣ်ဒိတဂၤအံၤဒိးန့ၢ်ဘၣ်တၢ်ကူစါယါ ဘျါသးတနံၤဃီန့ၣ်လီၤ. ကၠိဖိသ့ၣ်တဖၣ်ပျံၤဒီးဘၣ်ကိၢ်ဘၣ် ဂီၤဝဲလၢကဘီယူၤဟဲခးလီၤတၢ်အသီတဘျီန့ၣ်လီၤ. တၢ်ဂီၤ အံၤပာ်ဖျါထီၣ်ဝဲလီၢ်ကဝီၤသဝီဖိလဲၤဆှၢစီၤဃ---ဒီးသိလ့ၣ်ဆူ တၢ်ဟ့ၣ်ကသံၣ်ဒၢးဖဲလါမ့ၤ ၁၈ သီ, ၂၀၂၅ နံၣ်အနံၤဖဲအဘၣ်ဒိလၢကဘီယူၤခးလီၤတၢ်ဝံၤအလီၢ်ခံန့ၣ်လီၤ. (တၢ်ဂီၤ- KHRG)
တၢ်ဂီၤတဘ့ၣ်အံၤတၢ်ဒိန့ၢ်အီၤဖဲလါယနူၤအါရံၤ ၂၀၂၅ နံၣ်, ဖဲ နန---သဝီ, ဃဲဒၢကရူၢ်, လၢၢ်ဒိၣ်ကီၢ်ဆၣ်, ချၢၣ်လွံၢ်ထူၣ် ကီၢ်ရ့ၣ်အပူၤန့ၣ်လီၤ. ဖဲလါယ နူၤအါရံၤ ၁ သီ, ၂၀၂၅ နံၣ်အနံၤ, ဟါခီ ၉ : ၃၀ အဆၢကတီၢ်, SAC ပယီၤသုးအ ကဘီယူၤဒုးသုးတဘ့ၣ်ဟဲတ့ၢ်လီၤမ့ၣ်ပိၢ် (၅၀၀-ပီၣ်) တ ဖျၢၣ်ဖဲနန---သဝီပူၤဒီးဘၣ်ဟးဂီၤကွံာ်ဝဲသဝီဖိတဂၤအဟံၣ် တဖျၢၣ်န့ၣ်လီၤ. တၢ်ကဲထီၣ်သးဝံၤအလီၢ်ခံ, သဝီဖိသ့ၣ် တ ဖၣ်ဘၣ်လဲၤဃ့ၢ်အိၣ်ကွံာ်ဝဲလၢပှၢ်ပူၤန့ၣ်လီၤ. တၢ်ဂီၤအံၤပာ် ဖျါထီၣ်ဝဲမ့ၣ်ပိၢ်လီၤဘၣ်တၢ်အလီၢ်ဒီးဟံၣ်တဖျၢၣ်လၢအဘၣ် ဟးဂီၤကွံာ်ဝဲန့ၣ်လီၤ. တချုးလၢတၢ်ကဲထီၣ်သးဒ်ဘၣ်အ ခါ, ဖဲလါဒံၣ်စဲဘၢၣ် ၃၁ သီ, ၂၀၂၅ နံၣ်အနံၤ, ကညီဒီကလုာ် ဂၢၤသးကရၢ (KNDO) ဒီးကညီဒီကလုာ်တၢ်ထူၣ် ဖျဲးသုး မုၢ်ဒိၣ် (KNLA) အသုး ပာ်ဖှိၣ်တဖၣ်လဲၤခးဝဲ (SAC) ပယီၤ သုးခိၣ်သ့ၣ်စိအသုးကလၢၤလၢအိၣ်ဆီလီၤအသးဖဲလၢၢ်ဒိၣ် ကီၢ်ဆၣ်အပူၤန့ၣ်လီၤ. (တၢ်ဂီၤ- KHRG)
KHRG ဒိးန့ၢ်ဘၣ်တၢ်ဂီၤတဘ့ၣ်အံၤဖဲလါယနူၤအါရံၤ ၂၉ သီ, ၂၀၂၅ နံၣ်, လၢလီၢ်ကဝီၤခိၣ်နၢ်တဂၤအအိၣ်န့ၣ်လီၤ. ဖဲလါယ နူၤအါရံၤ ၂၁ သီ, ၂၀၂၅ နံၣ်အနံၤ, SAC ပယီးသုးခီၣ်သုးရ့ၣ် (ခလရ) နီၣ်ဂံၢ် (၂၀) လၢအိၣ်ဆီလီၤအသးဖဲယ့ၤကၠံၤခၠီ သဝီ, အ့ဝဲကရူၢ်, ဆီထံးကီၢ်ဆၣ်, ချၢၣ်လွံၢ်ထူၣ်ကီၢ်ရ့ၣ်, သူဝဲ ဒြိဒီးလဲၤတ့ၢ်လီၤမ့ၣ်ပိၢ်လၢဝဝ--- သဝီဒီး ပပ--- သဝီ, ဖဲပၠ့ၣ်ယ့ၣ်ကရူၢ်, ဆီထံးကီၢ်ဆၣ်အပူၤန့ၣ်လီၤ. လၢဒြိဟဲတ့ၢ် လီၤမ့ၣ်ပိၢ်အကျါမ့ၣ်ပိၢ်တဖျၢၣ်လီၤဘၣ်ဝဲလၢပပ---သဝီသီ ခါဖၠၢ်န့ၣ်လီၤ. လၢတၢ်န့ၣ်အဃိ, ဘၣ်သံကွံာ်ဝဲသီခါတပါဒီး ဘၣ်ဒိစ့ၢ်ကီးသီခါအဂၤတပါဖဲအခီၣ်ကံၣ်ဒုၣ်န့ၣ်လီၤ. မ့ၣ်ပိၢ် လၢအဂၤတဖျၢၣ်လီၤဘၣ်ဝဲလၢဝဝ---သဝီဖိကိၤခၠ--- အဟံၣ် မဲာ်ညါန့ၣ်လီၤ. ကိၤခၠ---န့ၢ်ဘၣ်ဒိဝဲဒၣ်ဒီးမ့ၣ်ပိၢ်အက့တဖၣ်ဖဲ အစုဒုၣ်တီၤန့ၣ်လီၤ. သဝီဖိတဂၤစံးဝဲလၢတၢ်ဒီသဒၢကမျၢၢ် သုး (PDF) အသုးဖိတဖၣ်တဘျီတခီၣ်လ့ၢ်ထီၣ်လ့ၢ်လိၤအိၣ် ဝဲလၢသဝီခံဖျၢၣ်န့ၣ်အပူၤဒီးလၢတၢ်န့ၣ်အဃိဒူသဝီဖိတဖၣ် နာ်ဝဲလၢ SAC ပယီၤသုးတဖၣ်ကပညိၣ်ခးဝဲသဝီခံဖျၢၣ် အံၤန့ၣ်လီၤ. တၢ်ဂီၤတဘ့ၣ်အံၤပာ်ဖျါဝဲသီခါတပါလၢအဘၣ် ဒိဝဲဖဲတၢ်ဟဲတ့ၢ်လီၤတၢ်ဒီးမ့ၣ်ပိၢ်န့ၣ်လီၤ. (တၢ်ဂီၤ-လီၢ်ကဝီၤ ခိၣ်နၢ်)
KHRG ဒိးန့ၢ်ဘၣ်တၢ်ဂီၤသ့ၣ်တဖၣ်အံၤဖဲလါယနူၤအါရံၤ ၂၉ သီ, ၂၀၂၅ နံၣ်အနံၤ, လၢလီၢ်ကဝီၤဘၣ်မူဘၣ်ဒါတဂၤအ အိၣ်န့ၣ်လီၤ. ဖဲလါယနူၤအါရံၤ ၂၇ သီ, ၂၀၂၅ နံၣ်, SAC ပယီၤသုးအကဘီယူၤဒုးသုးတဘ့ၣ်ဟဲတ့ၢ်လီၤမ့ၣ်ပိၢ်လၢ ဝခ--- သဝီပူၤ, ညီၤပ့ၤကၠံကရူၢ်, ဆီထံးကီၢ်ဆၣ်, ချၢၣ်လွံၢ်ထူၣ်ကီၢ်ရ့ၣ်န့ၣ်လီၤ. လၢတၢ်န့ၢ်အဃိမ့ၣ်ပိၢ်လီၤဘၣ်ဝဲလၢ ရရ--- သီခါဖၠၢ်ဖဲ ဝခ---သဝီပူၤန့ၣ်လီၤ. မၤကဒီးတနံၤဖဲလါယနူၤအါရံၤ ၂၈ သီ, ၂၀၂၅ နံၣ်အနံၤ, SAC ကီၢ်ပ ယီၤသုးအကဘီယူၤဟဲတ့ၢ်လီၤ မ့ၣ်ပိၢ် (၅၀၀-ပီၣ်) ခံဖျၢၣ်လၢဝခ---သဝီပူၤအသီတဘျီဒီးမ့ၣ်ပိၢ်တဖျၢၣ်လီၤဘၣ်ကဒီးဝဲရရ---သီခါဖၠၢ်အသီ တဘျီန့ၣ်လီၤ. မ့မ့ၢ်မ့ၣ်ပိၢ်အဂၤတဖျၢၣ်လီၤဘၣ်ဝဲလၢသဝီဖိအူဂ---အဟံၣ်န့ၣ်လီၤ. ကဘီယူၤဟဲတ့ၢ်လီၤတၢ်ခံဘျီအံၤအဃိသီခါဖၠၢ်ဘၣ်ဟးဂီၤ ကွံာ်ဝဲဒိၣ်ဒိၣ်မုၢ်မုၢ်ဃုာ်ဒီးအခိၣ်ဒုး, အဒူၣ်, တၢ်လၢၢ်ဒီးဘူးဒးကစၢ်ကျီဂီၤတဖၣ်ခဲလၢာ်န့ၣ်လီၤ. လၢန့ၢ်အမဲာ်ညါဘၣ်ဟးဂီၤစ့ၢ် ကီးဝဲသဝီဖိအဟံၣ် (၅) ဖျၢၣ်န့ၣ်လီၤ. တၢ်ကဲထီၣ်သးဝံၤသ ဝီဖိသ့ၣ်တဖၣ်လဲၤဃ့ၢ်အိၣ်ကွံာ်ဝဲဆူပၠ့ၣ်ယ့ၣ်ကရူၢ်ဒီးသဲၣ်ကဲၤကိက ရူၢ်တဖၣ်အပူၤဖဲဆီထံးကီၢ်ဆၣ်န့ၣ်လီၤ. ဘၣ်ဆၣ်သဝီဖိတနီၤလဲၤအိၣ်က့ၤလၢဝ့ၢ်လၢအအိၣ်ဘူးဖဲန့ၣ်တဖျၢၣ်အပူၤန့ၣ်လီၤ. တချုးဒံးလၢတၢ်ကဲထီၣ်သးဒံးဘၣ်န့ၣ်တၢ်ဒီသဒၢကမျၢၢ်သုး PDF အသုးဖိတဖၣ်လဲၤခးဝဲ SAC ပယီၤသုးခီၣ်ချ့သုးရ့ၣ် (ခမရ) နီၣ်ဂံၢ် (၂၀) လၢအအိၣ်ဖဲညီၤပ့ၤကၠံကရူၢ်ပူၤန့ၢ်ဒီး SAC ပယီၤသုးတပၤအသုးဖိဘၣ်ဒိဘၣ်ထံးဒီးသံကွံာ်ဝဲတဖၣ်အိၣ်ဝဲဒၣ်န့ၣ် လီၤ. တၢ်ဂီၤတဘ့ၣ်အံၤပာ်ဖျါဝဲ ရရ--- သီခါဖၠၢ်လၢအအိၣ်ဖဲဝခ---သဝီန့ၣ်, ဘၣ်ဟးဂူာ်ဟးဂီၤကွံာ်ဝဲခီဖျိ SAC ပယီၤသုးအက ဘီယူၤဟဲတ့ၢ်လီၤမ့ၣ်ပိၢ်အဃိန့ၣ်လီၤ. (တၢ်ဂီၤ - လီၢ်ကဝီၤပှၤဘၣ်မူဘၣ်ဒါ)
တၢ်ဂီၤသ့ၣ်တဖၣ်အံၤဘၣ်တၢ်ဒိန့ၢ်အီၤဖဲလါဖ့ၤဘြူၤအါရံၤ ၂၀၂၅ နံၣ်, ဖဲ စစ---သဝီ, ကွ့ကိကရူၢ်, ဆီထံးကီၢ်ဆၣ်, ချၢၣ်လွံၢ် ထူၣ်ကီၢ်ရ့ၣ်အပူၤန့ၣ်လီၤ. ဖဲလါယနူၤအါရံၤ ၃၁ သီ, ၂၀၂၅ နံၣ်, ပယီၤသုးခီၣ်သုးရ့ၣ် (ခလရ) နီၣ်ဂံၢ် (၂၆၄) လၢအအိၣ်ဆီလီၤအသးဖဲပ့စလိးဝ့ၢ်, ချၢၣ်လွံၢ်ထူၣ်ကီၢ်ရ့ၣ်အံၤသူဝဲဒြိဒီးဟဲတ့ၢ်လီၤမ့ၣ်ပိၢ်လၢ စစ---သဝီပူၤဒီးဘၣ်ဟးဂီၤ ကွံာ်ဝဲစဲးဂံာ်ဘုတဖျၢၣ်ဒီးဟံၣ်တဖျၢၣ်လၢအမ့ၢ်စီၤဂ--- အတၢ်ဒီးဘၣ်ဟးဂီၤစ့ၢ်ကီးဟံၣ်အဂၤတဖျၢၣ်လၢ အမ့ၢ်အူဟ---အဟံၣ်န့ၣ်လီၤ. တချုးဒံးလၢတၢ်ကဲထီၣ်သးဒံးဘၣ်န့ၣ်တၢ်ဒီသဒၢကမျၢၢ်သုး PDF သုးဖိတဖၣ်ပာ်လီၤဝဲတၢ်သမံ သမိးတၢ်အလီၢ်တတီၤဖဲဒူသဝီခိၣ်ထီးကျဲနုာ်လီၤန့ၣ်လီၤ. တၢ်ဂီၤသ့ၣ်တဖၣ်အံၤပာ်ဖျါဝဲသဝီဖိအူဂ--- အစဲးဂံာ်ဘုတၢ်သူၣ်ထီၣ် သလၢအဘၣ်ဟးဂီၤ ကွံာ်ဝဲဖဲဒြိဟဲတ့ၢ်လီၤမ့ၣ်ပိၢ်အဆၢကတီၢ်န့ၣ်လီၤ. (တၢ်ဂီၤ- KHRG)
တၢ်ဂီၤတဘ့ၣ်အံၤတၢ်ဒိန့ၢ်အီၤဖဲလါဖ့ၤဘြူၤအါရံၤ ၂၀၂၅ နံၣ် အပူၤ ဖဲစစ---သဝီ, ကွ့ကိကရူၢ်, ဆီထံးကီၢ်ဆၣ်, ချၢၣ်လွံၢ် ထူၣ်ကီၢ်ရ့ၣ် အပူၤန့ၣ်လီၤ. ဖဲလါဖ့ၤဘြူၤအါရံၤ ၁၉ သီ, ၂၀၂၅ နံၣ်အ နံၤ, မုၢ်ဆါခီ ၁၂ : ၃၇ အဆၢ ကတီၢ်, SAC ပ ယီၤသုးအကဘီယူၤဒုးသုးတဘ့ၣ်ဟဲခးလီၤတၢ်လၢ စစ---သဝီပူၤဒီးဘၣ်ဒိဝဲသဝီဖိတဂၤလၢအမံၤမ့ၢ်နီၢ်ဧ--- လၢအသး နံၣ်အိၣ် (၁၈) နံၣ်တဂၤန့ၣ်လီၤ. အဝဲဘၣ်ဒိဝဲဖဲအခီၣ်လၢအ စ့ၣ်တကပၤန့ၣ်လီၤ. တကးဒ်ဘၣ်အမဲာ်ညါကဘီယူၤဟဲခး လီၤတၢ်အံၤဘၣ်ဟးဂီၤကွံာ်သဝီဖိအဟံၣ် (၂) ဖျၢၣ်, ဘၣ်ဒိသံ ကွံာ်ဝဲကျီၢ် (၂) ဒု ဒီး ဘၣ်ဒိဝဲကျီၢ်အဂၤ (၃) ဒုစ့ၢ်ကီး န့ၣ်လီၤ. တၢ်ဂီၤအံၤပာ်ဖျါဝဲကျီၢ်တဒုလၢအဘၣ်သံကွံာ်ဖဲကဘီယူၤဟဲ ခးလီၤတၢ်အဆၢကတီၢ်န့ၣ်လီၤ. (တၢ်ဂီၤ- KHRG)
တၢ်ဂီၤတဘ့ၣ်အံၤတၢ်ဒိန့ၣ်အီၤဖဲလါမးၡး ၂၀၂၅ နံၣ်ဖဲတတ---တၢ်လီၢ်တ တီၤလၢအအိၣ်ဘူးဒီး ခခ---သဝီ, ဃဲဒၢကရူၢ်, လၢၢ်ဒိၣ်ကီၢ်ဆၣ်, ချၢၣ်လွံၢ်ထူၣ်ကီၢ်ရ့ၣ်အပူၤန့ၣ်လီၤ. ဖဲလါမ ၡး ၂၅ သီ, ၂၀၂၅ နံၣ်အနံၤ, SAC ပယီၤ သုးအကဘီယူၤဒုး သုးတဘ့ၣ်ဟဲတ့ၢ်လီၤမ့ၣ်ပိၢ်လၢတတ--- တၢ်လီၢ်ဒီးသဝီဖိတ ဖၣ်နာ်ဝဲလၢတၢ်သူဝဲမ့ၣ်ပိၢ်မ့ၣ်အူ (မ့တမ့ၢ်) မ့ၣ်ပိၢ်လၢအလီၤ ဘၣ်တၢ်ဒီးဒုးအူထီၣ်တၢ်သ့န့ၣ်လီၤ. လၢတၢ်န့ၣ်အဃိ, သဝီဖိ တဂၤလၢအမံၤမ့ၢ်စီၤသ--- အကျးတဖျၢၣ်ဒီးဟံၣ်တဖျၢၣ်ဘၣ် အူထီၣ်ကွံာ်ဝဲခဲလၢာ်န့ၣ်လီၤ. သဝီဖိစီၤသ--- စံးဝဲလၢအကျး တဖျၢၣ်အံၤအလုၢ်အပှ့ၤကအိၣ်ဝဲ (၄၀,၀၀၀,၀၀၀) ကၠးန့ၣ် လီၤ. မ့မ့ၢ်တၢ်ဘၣ်ဒိဘၣ်ထံးတခီတအိၣ်ဝဲဘၣ်န့ၣ်လီၤ. တချုးဒံးလၢတၢ်ကဲထီၣ်ဒံးအသးဘၣ်, ဖဲလါမးၡး ၂၄ သီ, ၂၀၂၅ နံၣ်အနံၤ, SAC ပယီၤသုးအဒြိတဘ့ၣ်ဟးဆှၣ် ဝ့ၤဝီၤတၢ်ဖဲတတ--- တၢ်လီၤတတီၤန့ၣ်လီၤ. တၢ်ဂီၤအံၤပာ်ဖျါ ထီဝဲသဝီဖိတဖၣ်ဂုာ်ကျဲးစၢၤမၤလီၤပံာ်ကွံာ် မ့ၣ်အူလၢအအူအီၣ်ထီၣ်တၢ်ဆါတၢ်အကျးတဖျၢၣ်န့ၣ်လီၤ. (တၢ်ဂီၤ- KHRG)
တၢ်ဂီၤတဖၣ်အံၤတၢ်ဒိန့ၢ်အီၤဖဲလါမ့ၤ ၂၀၂၅ နံၣ်, ဖဲ ဖဖ---သဝီ, ပၠ့ၣ်ယ့ၣ်ကရူၢ်, ဆီထံးကီၢ်ဆၣ်, ချၢၣ်လွံၢ်ထူၣ်ကီၢ်ရ့ၣ်အပူၤန့ၣ် လီၤ. ဖဲလါမ့ၤ ၁၁ သီ, ၂၀၂၅ နံၣ်, ဂီၤခီ ၇း၂၀ အဆၢကတီၢ်, SAC ကီၢ်ပယီၤသုးအကဘီယူၤဒုးသုးတဘ့ၣ်ဟဲဆှၣ်ဝ့ၤ ဝီၤတၢ်သၢဘျီဖဲ ဖဖ--- သဝီပူၤန့ၣ်လီၤ. သဝီဖိတဖၣ်နာ်ဝဲလၢ ကဘီယူၤန့ၣ်ဟးထီၣ်ဝဲလၢတီအူဝ့ၢ်, တီအူကီၢ်ရ့ၣ်အပူၤန့ၣ်လီၤ. ဖဲလၢအဟဲယူၤဃီၤသၢဘျီတဘျီန့ၢ်, တ့ၢ်လီၤဝဲမ့ၣ်ပိၢ် (၅၀၀-ပီၣ်) တဖျၢၣ်ဒီးလီၤတဲာ်ပိၢ်ဖးထီၣ်ဝဲဖဲဖဖ---တီၤထီကၠိလီၢ်ခံလၢ ကၠိကရၢၢ်ပူၤဒီးဘၣ်ဟးဂီၤဝဲကၠိအတၢ်သူၣ်ထီၣ်န့ၣ်လီၤ. တီၤထီကၠိတဖျၢၣ်န့ၣ်ကညီကူၣ်သ့ဆဲးလၤဝဲၤကျိၤ KECD ပၢဆှၢ ဝဲန့ၣ်လီၤ. မ့ၣ်ပိၢ်လီၤတဲာ်ပိၢ်ဖးထီၣ်ဒီးအက့အခီတဖၣ်ဖျိးဘၣ်ဝဲသဝီဖိလၢအသးနံၣ်အိၣ် (၃၈) နံၣ်တဂၤလၢအမံၤမ့ၢ်ကိၤ က---လၢအအိၣ်ဘူးဒီးကၠိကရၢၢ်န့ၣ်ဒီးတၢ်ဖျိးဘၣ်အီၤဖဲအယီၢ်ဒ့ဒီးအဖံဘၣ်ခိၣ်လၢအလီၢ်ခံတကပၤအဃိတၢ်ဘၣ်ဒိဝဲအီၤတဆံးတ က့ၢ်န့ၣ်လီၤ. အဟံၣ်စ့ၢ်ကီးဘၣ်ဟးဂီၤဝဲန့ၣ်လီၤ. တၢ်ဂီၤလၢစုစ့ၣ်တဘ့ၣ်အံၤပာ်ဖျါထီၣ်ဝဲကၠိအတၢ်သူၣ်ထီၣ်အဒူၣ်ဒီးအတြဲၤဖိ တဖၣ်ဘၣ်ဟးဂီၤကွံာ်ဝဲန့ၣ်လီၤ. တၢ်ဂီၤလၢစုထွဲတဘ့ၣ်ပာ်ဖျါဝဲကၠိတၢ်သူၣ်ထီၣ်အခိၣ်ဒုးဖျိတဖၣ်ဒီးတၢ်ခိၣ်ဒုးတဖၣ်ဘၣ်ဟး ဂီၤကွံာ်ဝဲဖဲကဘီယူၤဟဲတ့ၢ်လီၤမ့ၣ်ပိၢ်န့ၣ်လီၤ. (တၢ်ဂီၤ- KHRG)
တၢ်ဂီၤတဘ့ၣ်အံၤတၢ်ဒိန့ၢ်အီၤဖဲလါယူၤ ၂၀၂၅ နံၣ်ဖဲစံာ်ပျီတ ဘ့ၣ်လၢထထ---သဝီဃၢၤ, ဟ့သဝဲကရူၢ်, လၢၢ်ဒိၣ်ကီၢ်ဆၣ်, ချၢၣ်လွံၢ်ထူၣ်ကီၢ်ရ့ၣ် အပူၤန့ၣ်လီၤ. ဖဲလါယူၤ ၂၈ သီ, ၂၀၂၅ နံၣ်အနံၤ, ဖဲဟါလီၤခီ ၂း၀၀ အဆၢကတီၢ်, SAC ပယီၤသုး အကဘီယူၤဒုးသုးတဘ့ၣ်ဟဲတ့ၢ်လီၤဝဲမ့ၣ်ပိၢ် (၅၀၀-ပီၣ်) ခံဖျၢၣ်ဖဲစံာ်ပျီတဘ့ၣ်အပူၤဖဲအဘူးဒီးထထ--- သဝီ န့ၣ်လီၤ. မ့ၣ်ပိၢ်ခံဖျၢၣ်အံၤလီၤဘၣ်ဝဲဖဲစံာ်ပျီပူၤဒီးဘၣ်ဟးဂီၤဝဲဘုတဖၣ် ဃုာ်ဒီးစံာ်ပျီန့ၣ်လီၤ. စံာ်ပျီလၢမ့ၣ်ပိၢ်လီၤဘၣ်အီၤတဘ့ၣ်အံၤ ဒီးသဝီဖိအဟံၣ်အဃီတဖၣ်န့ၣ်တၢ်ဒ့စၢၤအိၣ်စီၤစုၤယံၤက အိၣ်ဝဲအပျၢ် (၄၀) ဃၣ် ဃၣ်န့ၣ်လီၤ. လၢန့ၣ်အမဲာ်ညါသဝီ ဖိခံဂၤ (စီၤလ--- ဒီးနီၢ်မ---) ဘၣ်ဒိဝဲဖဲ တၢ်ကဲထီၣ်သးန့ၣ် လီၤ. ဟံၣ် (၈) ဖျၢၣ်ဘၣ်ဟးဂီၤကွံာ်ဝဲစ့ၢ်ကီးန့ၣ်လီၤ. ဒူသဝီဖိ လၢအဘၣ်ဒိခံဂၤအံၤဘၣ်တၢ်ဆှၢအဝဲသ့ၣ်ဆူညည--- တၢ် ဆါဟံၣ်လၢတၢ်ပၢဆှၢအီၤလၢကညီဆူၣ်ချ့မၤစၢၤဝဲၤကျိၤ KDHW ဖဲလၢၢ်ဒိၣ်ကီၢ်ဆၣ်အပူၤန့ၣ်လီၤ. တၢ်ဂီၤတဘ့ၣ်အံၤ ပာ်ဖျါဝဲစံာ်ပျီတဘ့ၣ်လၢအဘၣ်ဟးဂီၤကွံာ်ဝဲဖဲပယီၤသုးဟဲ ခးလီၤတၢ်ဒီးကဘီယူၤဖဲလါယူၤ ၂၈ သီ, ၂၀၂၅ နံၣ်အနံၤ န့ၣ်လီၤ. (တၢ်ဂီၤ- KHRG)
တၢ်ဂီၤတဘ့ၣ်အံၤတၢ်ဒိန့ၢ်အီၤဖဲလါယူၤလံ ၂၀၂၅ နံၣ်ဖဲက သံၣ်ဒၢးတဖျၢၣ်ဖဲလၢၢ်ဒိၣ်ကီၢ်ဆၣ်, ချၢၣ်လွံၢ်ထူၣ်ကီၢ်ရ့ၣ်အပူၤ န့ၣ်လီၤ. ဖဲလါယူၤလံ ၅ သီ, ၂၀၂၅ န့ၣ်, ဖဲဟါခီ ၅း၅၀ အ ဆၢကတီၢ်ပယီၤသုးတဖၣ်သူဝဲဒြိဒီးဟဲတ့ၢ်လီၤမ့ၣ်ပိၢ်ခံဖျၢၣ်ဖဲ ယယ--- သဝီ, တီကၠီၤပီၣ်ကရူၢ်, လၢၢ်ဒိၣ်ကီၢ်ဆၣ်အပူၤန့ၣ် လီၤ. မ့ၣ်ပိၢ်တၢတဖျၢၣ်လီၤတဲာ်ဝဲလၢကၠိကရၢၢ်ပူၤန့ၣ်လီၤ. လၢ တၢ်န့ၢ်အဃိသဝီဖိလွံၢ်ဂၤဘၣ်သံကွံာ်ဝဲတကတီၢ်ဃီဒီးသဝီဖိ အဂၤလွံၢ်ဂၤလၢအပၣ်ဃုာ်ဒီးဖိသၣ်ခံဂၤဒီးမိၢ်ဒၢတဂၤဘၣ်ဒိဝဲ နးနးကလဲာ်န့ၣ်လီၤ. အဝဲသ့ၣ်မ့ၢ်ပှၤသ့ၣ်တဖၣ်လၢအဟဲဃ့ၢ် အိၣ်ကဒုန့ၢ်လၢဝါပ့ၤဆူၣ်ကရူၢ်, မူကီၢ်ဆၣ်, ချၢၣ်လွံၢ်ထူၣ်ကီၢ် ရ့ၣ်အပူၤန့ၣ်လီၤ. ဖိသၣ်ဖိလၢအဘၣ်ဒိအကျါတဂၤသံကွံာ်ဝဲ လၢကျဲတီၤဖဲတၢ်လဲၤဆှၢအီၤလၢတၢ်ဆါဟံၣ်အဆၢကတီၢ်ဒီး အဂၤတဂၤသံကွံာ်ဝဲစ့ၢ်ကီးဖဲအတုၤလၢတၢ်ဆါဟံၣ်န့ၣ်လီၤ. ပှၤဘၣ်ဒိလွံၢ်ဂၤအကျါအိၣ်လီၤတဲာ်က့ၤထဲဒၣ်ခံဂၤန့ၣ်လီၤ. ကၠိ တၢ်သူၣ်ထီၣ်တဖျၢၣ်စ့ၢ်ကီးဘၣ်ဟးဂီၤကွံာ်ဝဲဖဲတၢ်ကဲထီၣ်သး ဆၢကတီၢ်န့ၣ်လီၤ. မ့ၣ်ပိၢ်ခံဖျၢၣ်တဖျၢၣ်လီၤတဲာ်ဝဲလၢတၢ်လီၢ် အဂၤတတီၤဒီးတပိၢ်ဖးထီၣ်ဘၣ်န့ၣ်လီၤ. တၢ်ကဲထီၣ်သးဝံၤ အလီၢ်ခံ, ကၠိဖဲသဝီပူၤဒီးကၠိလၢသဝီအဂၤတဖျၢၣ်စ့ၢ်ကီးတၢ် ပာ်ပတုာ်ကွံာ်ဝဲခီဖျိတၢ်ဘၣ်ယိၣ်ဘၣ်ဘှီအိၣ်ဝဲလၢတၢ်ဘံၣ် တၢ်ဘၢအဂီၢ်အဃိန့ၣ်လီၤ. တၢ်ဂီၤတဘ့ၣ်အံၤပာ်ဖျါဝဲသဝီဖိ လၢအဘၣ်ဒိတဂၤလဲၤဒိးကူစါယါဘျါအသးဖဲကညီဆူၣ်ချ့မၤ စၢၤဝဲၤကျိၤ KDHW အကသံၣ်ဒၢးန့ၣ်လီၤ. (တၢ်ဂီၤ- KHRG)
တၢ်ဂီၤသ့ၣ်တဖၣ်အံၤတၢ်ဒိန့ၢ်အီၤဖဲလါဒံၣ်စဲဘၢၣ် ၂၀၂၅ နံၣ်, ဖဲ ၡၡ--- သဝီ, အ့ဒဲကိကရူၢ်, လၢၢ်ဒိၣ်ကီၢ်ဆၣ်, ချၢၣ်လွံၢ်ထူၣ် ကီၢ်ရ့ၣ်အပူၤန့ၣ်လီၤ. ဖဲလါဒံၣ် စဲဘၢၣ် ၁၀ သီ, ၂၀၂၅ နံၣ်, ဖဲမုၢ်ဟါလီၤ ၈း၀၀ အဆၢကတီၢ်ပယီၤသုးအကဘီယူၤဒုး သုးတဘ့ၣ်ဟဲတ့ၢ်လီၤမ့ၣ်ပိၢ် (၅၀၀-ပီၣ်) တဖျၢၣ်ဖဲ ၡၡ--- သဝီပူၤ န့ၣ်လီၤ. မ့ၣ်ပိၢ်လီၤတဲာ်ပိၢ်ဖးထီၣ်ဒီးဘၣ်သံဝဲသဝီဖိသးနံၣ် (၄၆) နံၣ်တဂၤန့ၣ်လီၤ. လၢန့ၢ်အမဲာ်ညါသဝီဖိအဟံၣ် (၅) ဖျၢၣ်ဒီးသိလ့ၣ်ယီၢ်တခိၣ်ဘၣ်ဟးဂီၤကွံာ်ဝဲစ့ၢ်ကီးန့ၣ်လီၤ. သဝီဖိ တဂၤအကျီၢ် (၅) ဒုအံၤဘၣ်သံကွံာ်ဝဲဒီးဘၣ်ဒိဝဲတဒုစ့ၢ်ကီးန့ၣ်လီၤ. တၢ်ဂီၤလၢစုစ့ၣ်တဘ့ၣ်အံၤဒုးနဲၣ်ဖျါဝဲသဝီဖိဟံၣ်ဃီတ ဖျၢၣ်လၢအဘၣ်ဟးဂီၤကွံာ်ဝဲဖဲပယီၤသုးအကဘီယူၤဟဲတ့ၢ်လီၤမ့ၣ်ပိၢ်န့ၣ်လီၤ. တၢ်ဂီၤလၢစုထွဲတဘ့ၣ်န့ၣ်ပာ်ဖျါဝဲသိလ့ၣ်ယီၢ် တခိၣ်လၢအဘၣ်ဟးဂီၤကွံာ် ဝဲဖဲကဘီယူၤဟဲတ့ၢ်လီၤတၢ်အဆၢကတီၢ်န့ၣ်လီၤ. (တၢ်ဂီၤ- KHRG)
KHRG ဒိးန့ၢ်ဘၣ်တၢ်ဂီၤတဖၣ်အံၤလၢလီၢ်ကဝီၤပှၤဘၣ်မူဘၣ်ဒါတဂၤအအိၣ်ဖဲလါယနူၤအါရံၤ ၈ သီ, ၂၀၂၅ နံၣ်အနံၤန့ၣ်လီၤ. ဖဲလါယနူၤအါရံၤ ၇ သီ, ၂၀၂၅ နံၣ်အနံၤ, ဖဲမုၢ်ဘူးကထူၣ်ထီၣ် ၁၁း၃၀ အဆၢကတီၢ်, SAC ကီၢ်ပယီးသုးအကဘီယူၤဒုးသုး လၢအအိၣ်ဟဲလၢဘျံးဝ့ၢ်တဘ့ၣ်ဟဲခးလီၤတၢ်ဖဲ အဘ--- သဝီ, ဖဲပီချိဟီၣ်ကဝီၤ, ကစၢၢ်ဒိၣ်ကီၢ်ဆၣ်, ဘျံးဒဝဲၢ်ကီၢ်ရ့ၣ်အပူၤန့ၣ် လီၤ. ဖဲလါဒံၣ်စဲဘၢၣ် ၃၀ သီ, ၂၀၂၅ နံၣ်အနံၤ, လီၢ်ကဝီၤအပူၤတၢ်မၤဝဲ ကညီနံၣ်ထီၣ်သီဝံၤအလီၢ်ခံကဘီယူၤအတၢ်ဟဲခးလီၤ တၢ်အံၤကဲထီၣ်အသးန့ၣ်လီၤ. ကဘီယူၤတ့ၢ်လီၤဝဲမ့ၣ်ပိၢ်သၢဖျၢၣ်ဒီးတကးဒံးဘၣ်အမဲာ်ညါ ခးလီၤတၢ်လၢကျိစဲးစ့ၢ်ကီးန့ၣ်လီၤ. လၢတၢ်န့ၢ်အဃိသဝီဖိခံဂၤ စီၤန--- (သးနံၣ် ၃၄ နံၣ်) ဒီး နီၢ်ဝ--- (သးနံၣ် ၃၃ နံၣ်), ဘၣ်ဒိဝဲနးနးကလဲာ်န့ၣ်လီၤ. စီၤန--- တ ဂၤဘၣ်ဒိဝဲဖဲအခီၣ်, အစုဒီးအသးနါပှၢ်သ့ၣ်တဖၣ်န့ၣ်လီၤ. နီၢ်ဝ--- တခီ ဘၣ်ဒိဝဲဖဲအခီၣ်, အစုဒီးအနီၢ်ခိလၢအဂၤတဖၣ်န့ၣ်လီၤ. တၢ်ကဲထီၣ်သးဝံၤအလီၢ်ခံအဝဲသ့ၣ်ခံဂၤလၢာ်ဘၣ်တၢ်လဲၤဆှၢအဝဲသ့ၣ်လၢကညီဆူၣ်ချ့မၤစၢၤဝဲၤကျိၤ KDHW အကသံၣ်ဒၢးတ ဖျၢၣ်လၢအအိၣ်ဖဲအဆ--- သဝီ, ပီချိဟီၣ်ကဝီၤန့ၣ်လီၤ. တၢ်ဂီၤခံဘ့ၣ်န့ၣ်ပာ်ဖျါဝဲသဝီဖိခံဂၤလၢအဒိးတၢ်ကူဆါယါဘျါအသးဖဲ ကသံၣ်ဒၢးန့ၣ်လီၤ. အဝဲသ့ၣ်ခံဂၤလၢာ်အတၢ်ပူၤလီၢ်နးဒိၣ်မးအဃိဘၣ်တၢ်ဆှၢကဒါက့ၤအဝဲသ့ၣ်ဆူတၢ်ဆါဟံၣ်တဖျၢၣ်လၢအ အိၣ်ဖဲအဒ---ဝ့ၢ်, ကးခၠနၣ်ပူၤရံၤဖဲကီၢ်ကၠီၣ်တဲၣ်ပူၤန့ၣ်လီၤ. ကဘီယူၤဟဲခးလီၤတၢ်အံၤ ဘၣ်ဟးဂူာ်ဟးဂီၤဝဲသဝီဖိသိလ့ၣ်ယီၢ်တ ခိၣ်, ဟံၣ်ခံဖျၢၣ်, တၢ်သူၣ်အီၣ်ဖျးအီၣ်လီၢ်တဖၣ်ဒီးဘၣ်ဒိဘၣ်ထံးစ့ၢ်ကီးတၢ်ဘုၣ်ဒၢတဖၣ်အိၣ်ဝဲန့ၣ်လီၤ. သဝီဖိတဖၣ်စံးဝဲလၢ ကဘီယူၤဟဲခးလီၤတၢ်အံၤမ့ၢ်တၢ်အဆိကတၢၢ်တဘျီလၢအကဲထီၣ်သးဖဲအဝဲသ့ၣ်ဟီၣ်ကဝီၤပူၤန့ၣ်လီၤ. သဝီဖိသ့ၣ်တဖၣ်ဘၣ် ကိၢ်ဘၣ်ဂီၤတၢ်လၢအဝဲသ့ၣ်အတၢ်ဘံၣ်တၢ်ဘၢအဂီၢ်ဒီးဘၣ်ယိၣ်စ့ၢ်ကီးဝဲလၢတၢ်ကဟဲခးလီၤကဒီးတၢ်လၢကဘီယူၤန့ၣ်လီၤ. (တၢ်ဂီၤ - လီၢ်ကဝီၤပှၤဘၣ်မူဘၣ်ဒါ)
တၢ်ဂီၤတဖၣ်အံၤတၢ်ဒိန့ၢ်အီၤဖဲလါယူၤလံ ၂၀၂၅ နံၣ်, ဖဲ အဟ--- သဝီ, မီဒိၣ်ကရူၢ်, တနီသရံးကီၢ်ဆၣ်, ဘျံးဒဝဲၢ်ကီၢ်ရ့ၣ်အပူၤ န့ၣ်လီၤ. ဖဲလါယူၤလံ ၁၀ သီ, ၂၀၂၅ နံၣ်, ပယီၤသုးအကဘီယူၤဒုးသုးဟဲတ့ၢ်လီၤမ့ၣ်ပိၢ်လၢအဟ--- သဝီပူၤန့ၣ်လီၤ. ဖဲကဘီ ယူၤဟဲခးလီၤတၢ်အအဆၢကတီၢ်, တၢ်ဒုးတၢ်ယၤကဲ ထီၣ်သးတအိၣ်ဝဲနီတမံၤဘၣ်န့ၣ်လီၤ. ကဘီယူၤဟဲခးလီၤတၢ်အံၤမ့ၢ်ဝဲတၢ် အဆိကတၢၢ်တဘျီစ့ၢ်ကီးလၢသဝီပူၤန့ၣ်လီၤ. လၢကဘီယူၤဟဲခးလီၤတၢ်အဃိ, သဝီဖိဟံၣ်ဃီခံဖျၢၣ်, သဲးထူၣ်ဒီးထံကမျၢတ ဖျၢၣ်ဘၣ်ဟးဂီၤကွံာ်ဝဲဒၣ်န့ၣ်လီၤ. တၢ်ဂီၤလၢစုစ့ၣ်တဘ့ၣ်အံၤပာ်ဖျါဝဲသဝီဖိတဂၤအဟံၣ်ဟါဂီၤကွံာ်ဝဲဒီးမ့မ့ၢ်တၢ်ဂီၤလၢစုထွဲတ ဘ့ၣ်န့ၣ်ပာ်ဖျါဝဲမ့ၣ်ပိၢ်လီၤတဲာ်ဖဲအဟ--- သဝီပူၤဒီးအက့အခီဖိလၢအအိၣ်လီၤတဲာ်တ့ၢ်တဖၣ်န့ၣ်လီၤ. ဖဲကဘီယူၤဟဲခးလီၤတၢ် အဆၢကတီၢ်ဖိဒံဖိသၣ်သ့ၣ်တဖၣ်မၤလိတၢ်လၢကၠိပူၤန့ၣ်လီၤ. တၢ်ကဲထီၣ်သးဝံၤအလီၢ်ခံကၠိစ့ၢ်ကီးတၢ်ဘၣ်ပာ်ပတုာ်ကွံာ်ဝဲန့ၣ် လီၤ. (တၢ်ဂီၤ- KHRG)
တၢ်ဂီၤတဖၣ်အံၤတၢ်ဒိန့ၢ်အီၤဖဲလါယူၤလံ ၂၀၂၅ နံၣ်, ဖဲ အဃ---တၢ်လီၢ်ဖဲလ့ၤညၤထးခီဟီၣ်ကဝီၤ, လၢၢ်ကဆီကီၢ်ဆၣ်, ဘျံးဒ ဝဲၢ်ကီၢ်ရ့ၣ်အပူၤန့ၣ်လီၤ. ဖဲလါယူၤလံ ၁၆ သီ, ၂၀၂၅ နံၣ်, ဖဲမုၢ်ဃ့ၢ်လီၤ ၁း၄၅ အဆၢကတီၢ်, ပယီၤသုးအကဘီယူၤဟဲတ့ၢ်လီၤ မ့ၣ်ပိၢ်ဖဲ အဃ---တၢ်လီၢ်တတီၤန့ၣ်လီၤ. လၢတၢ်န့ၢ် အဃိ, သဝီဖိလွံၢ်ဂၤဃုာ်ဒီးဖိသၣ်ခံဂၤဘၣ်ဒိဝဲဒၣ်ဒီးသဝီဖိအဟံၣ်တဖျၢၣ်အူ ထီၣ်ကွံာ်ဝဲဒၣ်န့ၣ်လီၤ. ကမျၢၢ်တၢ်ဒီသဒၢသုး PDF ကသံၣ်သရၣ်ဒီးကညီဆူၣ် ချ့မၤစၢၤဝဲၤကျိၤ KDHW အပှၤမၤတၢ်ဖိတဖၣ် ကွၢ်ထွဲမၤစၢၤက့ၤဝဲပှၤလၢအဘၣ်ဒိသ့ၣ်တဖၣ်န့ၣ်လီၤ. တၢ်ဟဲခးလီၤတၢ်အဃိသဝီဖိတဖၣ်ပျံၤတၢ်ဒိၣ်မးန့ၣ်လီၤ. လၢတၢ်ကဲ ထီၣ်သးဒ်အံၤအဃိ, ကၠိလၢ အခ--- ဒီး အဂ--- သဝီ, ဖဲလ့ၤညၤထးခီဟီၣ်ကဝီၤတဖၣ်ဘၣ်ပတုာ်ကွံာ်ဝဲဒၣ်န့ၣ်လီၤ. တၢ်ဂီၤလၢ အစ့ၣ်တဘ့ၣ်ပာ်ဖျါဝဲသဝီဖိလၢအဘၣ်ဒိတဂၤဒိးန့ၢ်ဝဲတၢ်ဆါယါဘျါလၢပှၢ်ပူၤဖဲဘၣ်ဃ့ၢ်ဝဲအဆၢကတီၢ်န့ၣ်လီၤ. တၢ်ဂီၤလၢစုထွဲ တဘ့ၣ်ပာ်ဖျါဝဲသဝီဖိသ့ၣ်တဖၣ်ဘၣ် ဃ့ၢ်ထီၣ်လၢပှၢ်ပူၤန့ၣ်လီၤ. (တၢ်ဂီၤ- KHRG)
တၢ်ဂီၤတဖၣ်အံၤတၢ်ဒိန့ၢ်အီၤဖဲ လါအီကူး ၂၀၂၅ နံၣ်, ဖဲ အဧ---သဝီ, ကစၢၢ်ဒိၣ်ကီၢ်ဆၣ်, ဘျံးဒဝဲၢ်ကီၢ်ရ့ၣ်အပူၤန့ၣ်လီၤ. ဖဲလါ အီကူး ၂၅ သီ, ၂၀၂၅ နံၣ် အနံၤ, ပယီၤသုးခီၣ်ချ့သုးရ့ၣ် (ခမရ) နီၢ်ဂံၢ် (၄၀၄) လၢအအိၣ်ဆီလီၤအသးဖဲသယဲၣ်ခၠီဝ့ၢ်, ဘျံးဒ ဝဲၢ်ကီၢ်ရ့ၣ်, သုးဂံၢ်ဘါကအိၣ်ဝဲ (၁၀၀) ဂၤဃၣ်ဃၣ် ဟဲထီၣ်ဝဲလၢအသ--- သဝီဒီးအဧ---သဝီ, ဖဲကစၢၢ်ဒိၣ်ဟီၣ်ကဝီၤပူၤန့ၣ် လီၤ. ဖဲအဝဲသ့ၣ်ဟဲတုၤဝဲဖဲအသ---သဝီန့ၣ်ဒီး ကညီဒီကလုာ်တၢ်ထူၣ်ဖျဲးအသုးမုၢ် ဒိၣ်သုးဒ့နီၣ်ဂံၢ် (၁) လၢအအိၣ်လၢသ့ၣ်ရ့ၣ် နီၣ်ဂံၢ် (၁၂) အဖီလာ်တဖၣ်ခးအဝဲသ့ၣ်န့ၣ်လီၤ. ဝံၤအလီၢ်ခံပယီၤသုးဖိတဖၣ်နုာ်လီၤဒွဲၣ်အူကွံာ်ဝဲသဝီဖိအဟံၣ် (၅၈) ဖျၢၣ်ဖဲ အသ--- သဝီပူၤန့ၣ်လီၤ. မၤကဒီးဖဲလါအီကူး ၂၆ သီ, ၂၀၂၅ နံၣ်အနံၤ, ကီၢ်ပယီၤသုးအသုးဖိတဖၣ်လဲၤဆှၣ်ကဒီးတၢ်ဖဲအဧ---သဝီန့ၣ်လီၤ. ဖဲအဝဲသ့ၣ်လဲၤတုၤဖဲအဧ--- သဝီဒီးကညီဒီကလုာ်တၢ်ထူၣ်ဖျဲးအသုးမုၢ်ဒိၣ်သုးဒ့နီၣ်ဂံၢ် (၁) ခးကဒီးအဝဲသ့ၣ်ဖဲန့ၣ် အသီတဘျီန့ၣ်လီၤ. တၢ်ခးအဝဲသ့ၣ် ဝံၤအလီၢ်ခံ, လဲၤနုာ်လၢသဝီပူၤဒီးဒွဲၣ်ကွံာ်သဝီဖိဟံၣ်အဖျၢၣ် (၂၀) ဖဲအဧ---သဝီပူၤန့ၣ် လီၤ. တၢ်ဒုးကဲထီၣ်တ့ၢ်အသးအဃိပယီၤသုးအကဘီယူၤဒုးသုး တဘ့ၣ်ဟဲခးလီၤကဒီးတၢ်လၢအဧ---သဝီပူၤဒီးဘၣ်ဟးဂူာ်ဟး ဂီၤဝဲသီခါဖၠၢ်ဒီးသဝီဖိတၢ်ထူၣ်တၢ်ဘိတဖၣ်န့ၣ်လီၤ. တၢ်ဂီၤခံဘ့ၣ်အံၤပာ်ဖျါဝဲသီခါဖၠၢ်အတၢ်သူၣ်ထီၣ်လၢအဘၣ်ဟးဂူာ်ဟးဂီၤ ကွံာ်ဝဲန့ၣ်လီၤ. (တၢ်ဂီၤ- KHRG)
တၢ်ဂီၤတဖၣ်အံၤဘၣ်တၢ်ဒိန့ၢ်အီၤဖဲလါယနူၤအါရံၤဒီးလါဖ့ၤဘြူၤအါရံၤ ၂၀၂၅ နံၣ်အပူၤဖဲကၠီပါကရူၢ်, ဘုသိၣ်ကီၢ်ဆၣ်, မုၢ်တြီၢ် ကီၢ်ရ့ၣ်အပူၤန့ၣ်လီၤ. ဖဲလါယနူၤအါရံၤ ၂၈ သီ, ၂၀၂၅ နံၣ်အနံၤန့ၣ် SAC ဟဲခးလီၤတၢ်ဒီးကဘီယူၤဖဲအက--- သဝီ, ကၠီပါက ရူၢ်အပူၤန့ၣ်လီၤ. တၢ်ခးလီၤတၢ်အံၤအဃိဒုးအိၣ်ထီၣ်ဝဲတၢ်သံတၢ်ပှၢ်တၢ်ဘၣ်ဒိဘၣ်ထံးဒ်အမ့ၢ်သဝီဖိလွံၢ်ဂၤ (ဃုာ်ဒီးဖိသၣ်တဂၤ) သံကွံာ်ဝဲဒီးသဝီဖိဃုဂၤ (ဃုာ်ဒီးဖိသၣ်ခံဂၤ) ဘၣ်ဒိဝဲဒၣ်န့ၣ်လီၤ. လၢန့ၣ်အမဲာ်ညါဟံၣ်ယဲၢ်ဖျၢၣ်အူအီၣ်ဟးဂီၤကွံာ်ဝဲခဲလၢာ်ခီဖျိ ကဘီယူၤအတၢ်ဟဲခးလီၤတၢ်အံၤအဃိန့ၣ်လီၤ. လၢတၢ်န့ၣ်အဃိပှၤလၢအအိၣ်ဖဲ အက--- သဝီပူၤသ့ၣ်တဖၣ်ခဲလၢာ်ဘၣ်ဃ့ၢ် ထီၣ်ကွံာ်ဝဲဒၣ်န့ၣ်လီၤ. သဝီဖိလၢအဃ့ၢ်မှံဟးဖျိးသ့ၣ်တဖၣ်အံၤလိၣ်ဘၣ်ဝဲတၢ်အီၣ်တၢ်အီ, တၢ်အိၣ်ကဒုလီၢ်, ဒီးဆူၣ်ချ့တၢ်ဆီၣ် ထွဲမၤစၢၤဖဲအဝဲသ့ၣ်အိၣ်ဖဲတၢ်အိၣ်ခူသူၣ်အလီၢ်ဖဲဘုသိၣ်ကီၢ်ဆၣ်အပူၤ (ဖဲလါယူၤ ၂၀၂၅ နံၣ်) န့ၣ်လီၤ. ဘၣ်ဆၣ်သနာ်က့အဝဲ သ့ၣ်ဒိးန့ၢ်ဘၣ်ဆိဝဲတၢ် ဆီၣ်ထွဲမၤစၢၤတနီၤလၢ ကညီပိာ်မုၣ်ကရၢ (KWO) အအိၣ်န့ၣ်လီၤ. ဖဲလါယနူၤအါရံၤ ၂၈ သီ, ၂၀၂၅ နံၣ်အနံၤန့ၣ် SAC ခးလီၤစ့ၢ်ကီးတၢ်ဒီးကဘီယူၤဖဲ အလ--- သဝီကပၤ, ကၠီပါကရူၢ်, အဃိသီခါဖၠၢ်တဖျၢၣ်ဒီးတၢ်သူၣ်ထီၣ်တ ဘျုးဖျၢၣ်ဘၣ်ဟးဂီၤလီၤပှီၢ်ကွံာ်ဝဲဒၣ်န့ၣ်လီၤ. လၢတၢ်န့ၣ်အဃိသဝီဖိလၢအအိၣ် ဖဲအလ--- သဝီပူၤတဖၣ်ဃ့ၢ်ကွံာ်ဝဲလၢပှၢ်ပူၤဒ် သိးကပူၤဖျဲးဒီးတၢ်ဟဲခးလီၤကဒီးတၢ်န့ၣ်လီၤ. တၢ်ဂီၤလၢအဖီခိၣ်အစ့ၣ်တဘ့ၣ်အံၤပာ်ဖျါထီၣ်ဝဲသဝီဖိအဟံၣ်တဖၣ်လၢအအူ အီၣ်ဟးဂီၤကွံာ်လၢ SAC ကဘီယူၤဟဲခးလီၤတၢ်ဖဲလါ ယနူၤအါရံၤ ၂၈ သီ, ၂၀၂၅ နံၣ်အနံၤဖဲ အက--- သဝီပူၤန့ၣ်လီၤ. တၢ်ဂီၤ လၢအဖီခိၣ်အထွဲတဘ့ၣ်အံၤပာ်ဖျါထီၣ်ဝဲအက--- သဝီဖိတဖၣ်ဘၣ်ဃ့ၢ်မှံဟးဖျိးခီဖျိ SAC ကဘီယူၤဟဲခးလီၤတၢ်အံၤအဃိန့ၣ် လီၤ. ဒ်တၢ်ဂီၤတဘ့ၣ်အံၤပာ်ဖျါထီၣ်ဝဲအသိးအဝဲသ့ၣ်အိၣ်ဝဲဖဲတၢ်တြီၤပူၤဖဲပှၢ်ပူၤလၢအအိၣ်ဘူးဒီး အက--- သဝီန့ၣ်လီၤ. တၢ်ဂီၤ လၢအဖီလာ်အစ့ၣ်တဘ့ၣ်အံၤပာ်ဖျါထီၣ်ဝဲသဝီဖိသ့ၣ်တဖၣ်ဂုာ်ကျဲးစၢၤထုးထီၣ်န့ၢ်ဝဲသဝီဖိအသံစိၣ်သ့ၣ်တဖၣ်လၢဟံၣ်လၢအအူ အီၣ်ဟးဂီၤတဖျၢၣ်အပူၤန့ၣ်လီၤ. တၢ်ဂီၤလၢအဖီလာ်အထွဲတဘ့ၣ်အံၤပာ်ဖျါထီၣ် ဝဲသီခါဖၠၢ်တဖျၢၣ်လၢအဘၣ်ဟးဂီၤလီၤပှီၢ်ကွံာ် လၢ SAC ကဘီယူၤဟဲခးလီၤတၢ်ဖဲ အလ--- သဝီပူၤန့ၣ်လီၤ. (တၢ်ဂီၤ- KHRG)
တၢ်ဂီၤတဖၣ်အံၤဘၣ်တၢ်ဒိန့ၢ်အီၤဖဲလါယနူၤအါရံၤ ၂၀၂၅ နံၣ် အပူၤဖဲ အမ--- သဝီ, ကတၢၢ်တံးကရူၢ်, ဒွဲၣ်လိကီၢ်ဆၣ်, မုၢ်တြီၢ်ကီၢ်ရ့ၣ်အပူၤန့ၣ်လီၤ. ဖဲ လါယနူၤအါရံၤ ၂၀၂၅ နံၣ်အ ပူၤန့ၣ် SAC ကဘီယူၤဒုးသုးတဘ့ၣ်ဟဲခးလီၤတၢ်ဖဲ အမ--- သဝီ ဖဲတၢ်ဒုးကဲထီၣ်လၢ SAC သုးဖိတဖၣ်ဒီး KNLA သုးဖိ တဖၣ်အဘၢၣ်စၢၤဖဲတၢ်လီၢ်လၢအဘူးဒီးသဝီတဖျၢၣ်အံၤအဆၢကတီၢ်န့ၣ်လီၤ. လၢတၢ်န့ၣ်အဃိသဝီဖိအါဒံအါဂၤအဟံၣ်ဘၣ် ဟးဂီၤလီၤပှီၢ်ကွံာ်ဝဲဒၣ်န့ၣ် လီၤ. (တၢ် ဂီၤ- KHRG)
တၢ်ဂီၤတဖၣ်အံၤဘၣ်တၢ်ဒိန့ၢ်အီၤဖဲလါမးရှး ၂၀၂၅ နံၣ်အပူၤဖဲအန--- သဝီ, မာ်ထီကရူၢ်, ဒွဲၣ်လိကီၢ်ဆၣ်, မုၢ်တြီၢ်ကီၢ်ရ့ၣ်အပူၤ န့ၣ်လီၤ. ဖဲလါမးရှး ၁၉ သီ, ၂၀၂၅ နံၣ်အနံၤ, ဂီၤခီ ၅း၀၀ အဆၢကတီၢ် SAC ကဘီယူၤဒုးသုးတဘ့ၣ်ဟဲတ့ၢ်လီၤဝဲမ့ၣ်ပိၢ် (၅၀၀ -ပီၣ်) တဖျၢၣ်ဖဲ အန--- သဝီပူၤန့ၣ်လီၤ. မ့ၣ်ပိၢ်တဖျၢၣ် အံၤလီၤတဲာ်ပိၢ်ဖးထီၣ်ဖဲတီၤဘျီကၠိတဖျၢၣ်အကရၢၢ်ပူၤလၢအအိၣ်ဖဲသဝီ ပူၤအဃိကၠိ (ဘၣ်တၢ်တီခိၣ်ရိၣ်မဲအီၤလၢ KECD) တၢ်သူၣ်ထီၣ်တဖၣ်ဒီးသဝီဖိအါဒံ အါဂၤအဟံၣ်လၢအအိၣ်ဘူးဒီးကၠိသ့ၣ်တ ဖၣ်ဘၣ်ဒိဟးဂီၤဝဲဒၣ်န့ၣ်လီၤ. တၢ်ဂီၤသ့ၣ်တဖၣ်အံၤပာ်ဖျါထီၣ်ဝဲကၠိအတၢ်သူၣ်ထီၣ်လၢအအိၣ်ဖဲ အန--- သဝီပူၤတဖၣ်ဟးဂီၤ လီၤပှီၢ်ဝဲဒၣ်န့ၣ်လီၤ. (တၢ် ဂီၤ- KHRG)
တၢ်ဂီၤတဖၣ်အံၤဘၣ်တၢ်ဒိန့ၢ်အီၤဖဲလါမ့ၤ ၂၀၂၅ နံၣ်အပူၤဖဲပှၢ်ပူၤလၢအအိၣ်ဘူးဒီး အဝ--- သဝီ, လၢၢ်မုၢ်ပျီကရူၢ်, လူၤသီကီၢ် ဆၣ်, မုၢ်တြီၢ်ကီၢ်ရ့ၣ်အပူၤန့ၣ်လီၤ. ဖဲလါအ့ဖြ့ၣ် ၂၁ သီ, ၂၀၂၅ နံၣ်အနံၤန့ၣ် SAC ဟဲခးလီၤတၢ်ဒီးကဘီယူၤဖဲ အဝ--- သဝီပူၤ အဃိသဝီဖိအဟံၣ်ဘၣ်ဒိဟးဂီၤဝဲယဲၢ်ဖျၢၣ်ဒီးဟးဂီၤလီၤပှီၢ်ကွံာ်ဝဲတဖျၢၣ်န့ၣ်လီၤ. တၢ်ကဲထီၣ်သးဝံၤအလီၢ်ခံလီၢ်ကဝီၤသဝီဖိ သ့ၣ်တဖၣ်ဃ့ၢ်ကွံာ်ဝဲဆူပှၢ်တဘ့ၣ်လၢအအိၣ်ဘူးဒီးသဝီလၢအဝဲသ့ၣ်တၢ်ဘံၣ်တၢ်ဘၢအဂီၢ်န့ၣ်လီၤ. တၢ်ဂီၤသ့ၣ်တဖၣ်အံၤပာ်ဖျါ ထီၣ်ဝဲသဝီဖိလၢအဃ့ၢ်မှံဟးဖျိးသ့ၣ်တဖၣ်အိၣ်ခူသူၣ်လၢပှၢ်ပူၤန့ၣ်လီၤ. သဝီဖိလၢအဃ့ၢ်အိၣ်ကမှံတနီၤဘၣ်ကွၢ်ဆၢၣ်မဲာ်ဝဲဒီး တၢ်အီၣ်တၢ်အီတလၢတလီၢ်ဒီးတၢ်အိၣ်ကဒုအလီၢ်အကျဲတအိၣ်ဘၣ်န့ၣ်လီၤ. တၢ်အံၤကဲထီၣ်ဝဲတၢ်ကီတၢ်ခဲဒိၣ်ဒိၣ်မုၢ်မုၢ်တခါ လၢအဝဲသ့ၣ်အဂီၢ်ဖဲတၢ်ဃ့ၢ်မှံဟးဖျိးအဆၢကတီၢ်န့ၣ်လီၤ. (တၢ် ဂီၤ- KHRG)
တၢ်ဂီၤတဘ့ၣ်အံၤဘၣ်တၢ်ဒိန့ၢ်အီၤဖဲလါယူၤလံ ၂၀၂၅ နံၣ်ဖဲ ပှၢ်ပူၤလၢအအိၣ် ဖဲပ့က့ကရူၢ်, လူၤသီကီၢ်ဆၣ်, မုၢ်တြီၢ်ကီၢ်ရ့ၣ် အပူၤန့ၣ်လီၤ. ဖဲလါယနူၤ အါရံၤ ၁၂ သီ, ၂၀၂၃ နံၣ်အနံၤန့ၣ် SAC ဟဲခးလီၤတၢ်ဒီးကဘီယူၤဖဲ အပ--- သဝီ, ပ့ၤက့ကရူၢ်ပူၤ အဃိဘၣ်ဒိဟးဂီၤဝဲသဝီတၢ် ဘါယွၤသရိာ်, သဝီကၠိ, ဒီးသဝီ ဖိအါဒံအါဂၤအဟံၣ်န့ၣ်လီၤ. ကဘီယူၤအတၢ်ဟဲခးလီၤတၢ် အံၤဘၣ်သံကွံာ်ဝဲသဝီဖိယဲၢ်ဂၤဒီးဘၣ်ဒိဝဲခံဂၤန့ၣ်လီၤ. တၢ်ကဲ ထီၣ်သးအံၤဝံၤအလီၢ်ခံသဝီဖိအါဒံအါဂၤဃုာ်ဒီးဖိဒံဖိသၣ်တ ဖၣ်ဃ့ၢ်ထီၣ်ကွံာ်လၢသဝီပူၤန့ၣ်လီၤ. ကၠိလၢအအိၣ်ဖဲသဝီပူၤ တဖျၢၣ်ဘၣ်တၢ်ပတုာ်အီၤတုၤလါဖ့ၤဘြူၤအါရံၤ ၂၀၂၆ နံၣ်အ ပူၤန့ၣ်လီၤ. တၢ်ဂီၤတဘ့ၣ်အံၤပာ်ဖျါထီၣ်ဝဲဖိသၣ်လၢအဃ့ၢ်မှံ ဟးဖျိးလၢ အပ--- သဝီသ့ၣ်တဖၣ်ဖံးလိမၤဒိးတၢ်လၢတၢ်ခူ သူၣ်အလီၢ်ဖဲပှၢ်ပူၤန့ၣ်လီၤ. (တၢ် ဂီၤ- KHRG)
တၢ်ဂီၤတဖၣ်အံၤဘၣ်တၢ်ဒိန့ၢ်အီၤဖဲလါဒံၣ်စဲဘၢၣ် ၂၀၂၅ နံၣ်ဖဲ အန--- သဝီ, မာ်ထီကရူၢ်, ဒွဲၣ်လိကီၢ်ဆၣ်, မုၢ်တြီၢ်ကီၢ် ရ့ၣ်အပူၤန့ၣ်လီၤ. ဖဲလါနီၣ်ဝ့ဘၢၣ် ၂၉ သီ, ၂၀၂၅ နံၣ်အနံၤ, ကဘၣ်ဖဲဂီၤခီ ၉း၀၀ အဆၢကတီၢ်ကီၢ်ပယီၤသုးအကဘီယူၤ Y-12 တဘ့ၣ်ဟဲတ့ၢ်လီၤမ့ၣ်ပိၢ်ခံဖျၢၣ်ဆူ အန--- သဝီပူၤန့ၣ်လီၤ. မ့ၣ်ပိၢ်အကျါတဖျၢၣ်လီၤတဲာ်ပိၢ်ဖးထီၣ်ဖဲသဝီဖိတဂၤအတၢ်သူၣ်အီၣ် ဖျးအီၣ်အလီၢ်ဖဲသဝီပူၤအဃိဘၣ်ဟးဂီၤဝဲသဝီဖိနီၢ်ပ--- အတၢ်လုၢ်လီၢ်တဖျၢၣ်ဒီးအသ့ၣ်ထူၣ်တနီၤန့ၣ်လီၤ. မ့မ့ၢ်မ့ၣ်ပိၢ်လၢအဂၤ တဖျၢၣ်တခီလီၤတဲာ်ပိၢ်ဖးထီၣ်ဖဲသဝီဖိအဂၤတဂၤအဟံၣ်ကပၤဖဲသဝီပူၤဘၣ်ဆၣ်ဒ်တၢ်ပာ်ဖျါအသိးတၢ်ဘၣ်ဒိဟးဂီၤတအိၣ်နီတ မံၤဘၣ်န့ၣ်လီၤ. ခီဖျိလၢတၢ်ကဲထီၣ်သးအဆၢကတီၢ်သဝီဖိသ့ၣ်တဖၣ်တအိၣ်ဖဲအဟံၣ်အဃီဒီးအတၢ်သူၣ်တၢ်ဖျးအလီၢ်ဘၣ်အ ဃိသဝီဖိတဘၣ်ဒိဒီးသံလၢတၢ်ပိၢ်ဖးထီၣ်အံၤနီတဂၤဘၣ်န့ၣ်လီၤ. တၢ်ဂီၤလၢအစ့ၣ်တဘ့ၣ်အံၤပာ်ဖျါထီၣ်ဝဲမ့ၣ်ပိၢ်လၢအလီၤတဲာ် ပိၢ်ဖးထီၣ်အမဲၢ်ခံကုတဖျၢၣ်ဖဲနီၢ်ပ--- အတၢ်သူၣ်တၢ်ဖျးလီၢ်တန့ၣ်လီၤ. တၢ်ဂီၤလၢအထွဲတဘ့ၣ်အံၤပာ်ဖျါထီၣ်ဝဲတၢ်လုၢ်လီၢ်တ ဖျၢၣ်လၢအဘၣ်ဟးဂီၤလီၤပှီၢ်ကွံာ်လၢမ့ၣ်ပိၢ်အတၢ်ပိၢ်ဖးထီၣ်န့ၣ်လီၤ. (တၢ်ဂီၤ- KHRG)
တၢ်ဂီၤတဖၣ်အံၤဘၣ်တၢ်ဒိန့ၢ်အီၤဖဲလါမးရှး ၂၀၂၅ နံၣ်ဖဲ အခ--- သဝီ, အကၠူၢ်ကရူၢ်, ကီးတရံးကီၢ်ဆၣ်, ဒူပျာ်ယာ်ကီၢ်ရ့ၣ်အ ပူၤန့ၣ်လီၤ. ဖဲလါမးရှး ၅ သီ, ၂၀၂၅ နံၣ်အနံၤန့ၣ် SAC ဟဲခးလီၤတၢ်ဒီးကဘီယူၤဖဲ အခ--- သဝီပူၤအဃိသဝီဖိဘၣ်ဒိခံဂၤဒီး ဟံၣ်ဘၣ်ဒိဟးဂီၤဝဲသၢဖျၢၣ်န့ၣ်လီၤ. သဝီဖိခံဂၤအံၤအ ခီၣ်ဘၣ်ဒိဝဲတဆံးတက့ၢ်န့ၣ်လီၤ. တၢ်ဂီၤသ့ၣ်တဖၣ်အံၤပာ်ဖျါထီၣ်ဝဲသဝီ ဖိသ့ၣ်တဖၣ်အဟံၣ်ဘၣ်ဒိဟးဂီၤန့ၣ်လီၤ. (တၢ်ဂီၤ- KHRG)
တၢ်ဂီၤတဖၣ်အံၤဘၣ်တၢ်ဒိန့ၢ်အီၤဖဲလါမးရှး ၂၀၂၅ နံၣ်ဖဲ အရ--- သဝီ, နိၣ်ဖိကရူၢ်, ကီးတရံၣ်ကီၢ်ဆၣ်, ဒူပျာ်ယာ်ကီၢ်ရ့ၣ်အပူၤ န့ၣ်လီၤ. ဖဲလါမးရှး ၁၉ သီ, ၂၀၂၅ နံၣ်အနံၤ, ကဘၣ်ဖဲဂီၤခီ ၁၁း၀၀ အဆၢကတီၢ်, SAC ကဘီယူၤဒုးသုးတဘ့ၣ်ဟဲခးလီၤတၢ် ဖဲ အရ--- သဝီပူၤန့ၣ်လီၤ. SAC ကဘီယူၤဒုးသုးတဘ့ၣ် အံၤဟဲတ့ၢ်လီၤဝဲမ့ၣ်ပိၢ်ခံဖျၢၣ်လၢသဝီပူၤဒီးမ့ၣ်ပိၢ်တဖၣ်လီၤတဲာ်ဘူးလၢ သဝီဖိတဂၤအဟံၣ်ဒီးဘၣ်သံဝဲသဝီဖိခံဂၤန့ၣ်လီၤ. သဝီဖိခံဂၤအကျါတဂၤဘၣ်ဒိဝဲဒိၣ်ဒိၣ်မုၢ်မုၢ်လၢမ့ၣ်ပိၢ်အက့တုၤတၢ်ကွၢ်နီၣ် အီၤဘူးတဘၣ်လၢၤဘၣ်န့ၣ်လီၤ. ပှၤတူၢ်ဘၣ်တၢ်ခံဂၤအံၤအိၣ်ဒီးအဖိနီၢ်ဆံးဒီးမ့ၢ်ပှၤလၢအလုၢ်အီၣ်အပှၤဟံၣ်ဖိဃီဖိသ့ၣ်တဖၣ်အ ဃိအဝဲသ့ၣ်တၢ်သံအံၤဒုးအိၣ်ထီၣ်ဝဲတၢ်ကီတၢ်ခဲဒီးတၢ်လုၢ်အီၣ်နီၢ်ခိသးသမူအတၢ်တၤတၢ်သ့ၣ်တဖၣ်န့ၣ်လီၤ. ဟံၣ်လၢမ့ၣ်ပိၢ် လီၤတဲာ်ဘူးဒီးအီၤတဖျၢၣ်အံၤမ့ၣ်အူအီၣ်ဟးဂီၤကွံာ်ဝဲဒီတဖျၢၣ်ဒီးဟံၣ်ကစၢ်သ့ၣ်တဖၣ်တဒိးန့ၢ်ဘၣ်က့ၤဝဲအဝဲသ့ၣ်အတၢ်ဖိတၢ် လံၤနီတမံၤဘၣ်န့ၣ်လီၤ. တၢ်သူၣ်ထီၣ်လၢအအိၣ်ဘူးဒီးဟံၣ်တဖျၢၣ်အံၤစ့ၢ်ကီးဘၣ်ဒိဟးဂီၤဝဲဖဲတၢ်ကဲထီၣ်သးအဆၢကတီၢ်န့ၣ် လီၤ. ဒ်သဝီဖိသ့ၣ်တဖၣ်ပာ်ဖျါထီၣ်ဝဲအသိး, SAC သ့ၣ်တဖၣ်ပညိၣ်ခးဝဲသ ဝီဖိသ့ၣ်တဖၣ်လိၤလိၤခီဖျိဖဲအဝဲသ့ၣ်ခးလီၤတၢ်အ ဆၢကတီၢ်သုးဖီၣ်စုကဝဲတအိၣ်ဖဲသဝီပူၤနီတဖုဘၣ်ဒီးတၢ်ဒုးတၢ်ယၤစ့ၢ်ကီးတကဲထီၣ်အသးဖဲလီၢ်ကဝီၤဖဲန့ၣ်ဘၣ်န့ၣ်လီၤ. တၢ် ခးလီၤတၢ်ဝံၤအလီၢ်ခံသဝီဖိသ့ၣ်တဖၣ်ဘၣ်ကိၢ်ဘၣ်ဂီၤဒီးဘၣ်ယိၣ်တၢ်လၢအဝဲသ့ၣ်အတၢ်ဘံၣ်တၢ်ဘၢအဂီၢ်န့ၣ်လီၤ. တၢ်ဂီၤလၢ အစ့ၣ်တဘ့ၣ်အံၤပာ်ဖျါထီၣ်ဝဲသဝီဖိအဟံၣ်တဖျၢၣ်လၢအအူအီၣ်ဟးဂီၤကွံာ်ခီဖျိ SAC ဟဲခးလီၤတၢ်ဒီးကဘီယူၤဒီးမ့ၣ်ပိၢ်အတၢ် ပိၢ်ဖးထီၣ်ဖဲလါမးရှး ၁၉ သီ, ၂၀၂၅ နံၣ်အနံၤန့ၣ်လီၤ. တၢ်ဂီၤလၢအထွဲတဘ့ၣ်အံၤပာ်ဖျါထီၣ်ဝဲတၢ်သူၣ်ထီၣ်လၢအဘၣ်ဒိဟးဂီၤ ဝဲတဖျၢၣ်လၢအအိၣ်ဘူးဒီးဟံၣ်လၢအဟးဂီၤကွံာ်ဝဲတဖျၢၣ်န့ၣ်န့ၣ်လီၤ. (တၢ်ဂီၤ- KHRG)
တၢ်ဂီၤတဖၣ်အံၤဘၣ်တၢ်ဒိန့ၢ်အီၤလၢ KHRG ပျီပူၤပှၤမၤတၢ်ဖိတဂၤဖဲလါမ့ၤ ၂၀၂၅ နံၣ်ဖဲ အစ--- သဝီ, ဝၣ်ကးကရူၢ်, ကြုၢ်တု ကီၢ်ဆၣ်, ဒူပျာ်ယာ်ကီၢ်ရ့ၣ်အပူၤန့ၣ်လီၤ. ဖဲလါအ့ဖြ့ၣ် ၂၃ သီ, ၂၀၂၅ နံၣ်အနံၤ, မုၢ်နၤခီ ၈း၀၆ အဆၢကတီၢ်, SAC ဟဲတ့ၢ်လီၤ ဝဲမ့ၣ်ပိၢ်သၢဖျၢၣ်ဆူ ဘခ--- သဝီပူၤအဃိဘၣ်ဒိဝဲသဝီဖိတဂၤန့ၣ်လီၤ. မ့ၣ်ပိၢ်အကျါခံၣ်ဖျၢၣ်န့ၣ်လီၤတဲာ်လၢကၠိဟီၣ်ဝီၤပူၤဘူးဒီး တၢ်သူၣ်ထီၣ်လၢကၠိသရၣ်/မုၣ်အိၣ်အလီၢ်န့ၣ်လီၤ. မ့ၣ်ပိၢ်ခံဖျၢၣ်အကျါတဖျၢၣ်န့ၣ်ပိၢ်ဖးထီၣ်ဝဲဒၣ်ဒီးမ့မ့ၢ်မ့ၣ်ပိၢ်အဂၤတဖျၢၣ်တခီ အိၣ်တ့ၢ်လၢကၠိဟီၣ်ကဝီၤပူၤဒီးတပိၢ်ဖးထီၣ်ဘၣ်န့ၣ်လီၤ. မ့ၣ်ပိၢ်လၢအပိၢ်ဖးထီၣ်တဖျၢၣ်အံၤမၤဟးဂီၤလီၤပှီၢ်ကွံာ်ဝဲကၠိ, တၢ်သူၣ် ထီၣ်လၢကၠိသရၣ်/မုၣ်အိၣ်အလီၢ်, ကၠိအတၢ်ဟးလီၢ်သ့ၣ်တဖၣ်, ဒီးကၠိအထံဒၢဖးဒိၣ်တဖျၢၣ်လၢတၢ်ပာ်ကီၤဃာ်ထံ, ဒီးမၤဘၣ်ဒိ ဟးဂီၤစ့ၢ်ကီးကၠိအတၢ်သူၣ်ထီၣ်ခံဖျၢၣ်ဒီးသဝီဖိတနီၤအဟံၣ်န့ၣ်လီၤ. အစ--- ကၠိတဖျၢၣ်အံၤအိၣ်လၢ SAC အတၢ်တီခိၣ်ရိၣ်မဲအ ဖီလာ်န့ၣ်လီၤ. သဝီဖိလၢအအိၣ်ဖဲ အစ--- သဝီသ့ၣ်တဖၣ်စံးဘၣ် KHRG လၢအဝဲသ့ၣ်တယာ်ဝဲလၢ SAC ပညိၣ်ခးဝဲတၢ်သူၣ် ထီၣ်သၢဖျၢၣ်ဖဲအဝဲသ့ၣ်ဟဲခးလီၤတၢ်ဒီးကဘီယူၤအဆၢကတီၢ်န့ၣ်လီၤ. တၢ်သူၣ်ထီၣ်တဖၣ်န့ၣ်မ့ၢ်ဝဲတၢ်သူၣ်ထီၣ်လၢကၠိသရၣ်/ မုၣ် အိၣ်အလီၢ်လၢအအိၣ်ဖဲကၠိဟီၣ်ကဝီၤပူၤ, KNU ဝဲၤဒၢးတဖျၢၣ်လၢအအိၣ်ဖဲသဝီပူၤ, ဒီး အစ--- တၢ် ဆါဟံၣ်လၢအအိၣ်ဖဲကၠိ အကပၤန့ၣ်လီၤ. တယံာ်တမီၢ်ဒံးဘၣ်န့ၣ်သဝီဖိလၢအဃ့ၢ်မှံဟးဖျိးတဒူၣ်ဟဲအိၣ်ဖဲကၠိအဟီၣ်ကဝီၤပူၤအံၤအဃိလီၢ်ကဝီၤသဝီဖိ သ့ၣ်တဖၣ်နာ်ဝဲလၢ SAC ကဆိကမိၣ်ကမၣ်ဝဲလၢအဝဲသ့ၣ်ဘၣ်ထွဲဘၣ်ဃးဒီးသုးဖီၣ်စုကဝဲကရူၢ်ကရၢသ့ၣ်တဖၣ်န့ၣ်လီၤ. သဝီ ဖိသ့ၣ်တဖၣ်နာ်စ့ၢ်ကီးဝဲလၢတၢ်ဆါဟံၣ်တဖျၢၣ်အံၤဘၣ်တၢ်ပညိၣ်ခးအီၤခီဖျိတၢ်ဒုးကဲထီၣ်တ့ၢ်အသးဘူးဒီးသဝီတဖျၢၣ်အံၤဒီး SAC သ့ၣ်တဖၣ်ကဆိကမိၣ်ဝဲလၢသုးဖီၣ်စုကဝဲကရူၢ်ကရၢအပှၤသုးဖိသ့ၣ်တဖၣ်ဘၣ်တၢ်ကူစါယါဘျါတ့ၢ်အဝဲသ့ၣ်ဖဲတၢ်ဆါ ဟံၣ်တဖျၢၣ်အံၤအပူၤန့ၣ်လီၤ. တၢ်ဟဲခးလီၤတၢ်ဝံၤအလီၢ်ခံတၢ်ပျံၤတၢ်ဖုးအိၣ်ထီၣ်ဝဲဒၣ်န့ၣ်လီၤ. တၢ်ဂီၤလၢအစ့ၣ်တဘ့ၣ်အံၤပာ် ဖျါထီၣ်ဝဲတၢ်သူၣ်ထီၣ်လၢကၠိသရၣ်/မုၣ်အိၣ်အလီၢ်ဒီးတၢ်ဂီၤလၢအထွဲတဘ့ၣ်အံၤပာ်ဖျါထီၣ်ဝဲကၠိအတၢ်ဟးဂူာ်ဟးဂီၤသ့ၣ်တဖၣ် န့ၣ်လီၤ. တၢ်သူၣ်ထီၣ်ခံဖျၢၣ်လၢာ်အံၤဟးဂီၤလီၤပှီၢ်ဝဲလၢ SAC အတၢ်ဟဲခးလီၤတၢ်ဒီးကဘီယူၤဖဲသဝီပူၤဖဲလါအ့ဖြ့ၣ် ၂၃ သီ, ၂၀၂၅ နံၣ်အနံၤန့ၣ်လီၤ. (တၢ်ဂီၤ- KHRG)
တၢ်ဂီၤတဖၣ်အံၤဘၣ်တၢ်ဒိန့ၢ်အီၤဖဲလါအ့ဖြ့ၣ် ၂၀၂၅ နံၣ်ဖဲ အတ--- သဝီ, နိၣ်ဆိးနဲၣ်ကရူၢ်, ဝီၢ်ရ့ၣ်ကီၢ်ဆၣ်, ဒူပျာ်ယာ်ကီၢ်ရ့ၣ် အပူၤန့ၣ်လီၤ. ဖဲလါမၤရှး ၂၅ သီ, ၂၀၂၅ နံၣ်အနံၤန့ၣ် SAC ကဘီယူၤဒုးသုးဟဲတ့ၢ်လီၤဝဲမ့ၣ်ပိၢ် (၅၀၀-ပီၣ်) ခံဖျၢၣ်လၢသခါဖၠၢ် တဖျၢအကရၢၢ်ပူၤလၢအအိၣ်ဖဲအတ--- သဝီဖဲတၢ်ဒုးတၢ်ယၤကဲထီၣ်လၢ SAC သုးဖိတဖၣ် ဒီး KNLA သုးဖိတဖၣ်အဘၢၣ်စၢၤ န့ၣ်လီၤ. ကဘီယူၤဟဲခးလီၤတၢ်တဘျီအံၤသီခါခံပါဒီးသဝီဖိဃုဂၤအကျါပၣ်ဃုာ်ဒီးဖိသၣ်တဂၤဘၣ်ဒိဘၣ်ထံးဝဲဒၣ်ဒီးသီခါဖၠၢ် အတၢ်သူၣ်ထီၣ်တဘျုးဖျၢၣ်ဟးဂီၤလီၤပှီၢ်ကွံာ်ဝဲဒၣ်န့ၣ်လီၤ. တၢ်ဂီၤသ့ၣ်တဖၣ်အံၤပာ်ဖျါထီၣ်ဝဲသဝီအသီခါဖၠၢ်တၢ်သူၣ်ထီၣ်ဒီးဘူး ဒးတၢ်ဂီၤစိာ်ပျၤတပါဘၣ်ဟးဂီၤလီၤပှီၢ်ကွံာ်ဝဲဒၣ်န့ၣ်လီၤ. တၢ်ကဲထီၣ်အံၤဝံၤအလီၢ်ခံသဝီဖိဒီးသီခါသ့ၣ်တဖၣ်ဃ့ၢ်ထီၣ်ကွံာ်ဝဲလၢ သဝီပူၤလၢအဝဲသ့ၣ်တၢ်ဘံၣ်တၢ်ဘၢအဂီၢ်န့ၣ်လီၤ. (တၢ်ဂီၤ- KHRG)
တၢ်ဂီၤတဖၣ်အံၤဘၣ်တၢ်ဒိဖဲလါမ့ၤ ၂၀၂၅ နံၣ်ဖဲအတ--- သဝီ, သ့ၣ်ဘီဘိကရူၢ်, ကီးတရံးကီၢ်ဆၣ်, ဒူပျာ်ယာ်ကီၢ်ရ့ၣ်အပူၤန့ၣ် လီၤ. ဖဲလါမ့ၤ ၂၉ သီ, ၂၀၂၅ နံၣ်အနံၤန့ၣ် SAC ကဘီယူၤဒုးသုးတဘ့ၣ်ဟဲတ့ၢ်လီၤမ့ၣ်ပိၢ်အါအါဂီၢ်ဂီၢ်ဒီးလၢအကျါန့ၣ်ပၣ်ဃုာ်ဒီး မ့ၣ်ပိၢ် (၂၀၀-ပီၣ်) အစှၤကတၢၢ်ခံဖျၢၣ်ဖဲ အတ--- သဝီပူၤဖဲ တၢ်ဒုးတၢ်ယၤကဲထီၣ်အသးလၢသဝီပူၤတအိၣ်ဘၣ်အဆၢကတီၢ်န့ၣ် လီၤ. မ့ၣ်ပိၢ်သ့ၣ်တဖၣ်လီၤတဲာ်ဖဲကၠိလၢအအိၣ်လၢသဝီပူၤတဖျၢၣ်အကရၢၢ်ပူၤဒီးမ့ၣ်ပိၢ်အကျါတဖျၢၣ်န့ၣ်တပိၢ်ဖးထီၣ်ဘၣ်န့ၣ် လီၤ. ကဘီယူၤဟဲခးလီၤတၢ်တဘျီအံၤမၤဘၣ်ဒိဟးဂီၤဝဲကၠိအတၢ်သူၣ်ထီၣ်န့ၣ်လီၤ. ကၠိတဖျၢၣ်အံၤဘၣ်တၢ်တီခိၣ်ရိၣ်မဲအီၤလၢ KECD န့ၣ်လီၤ. မ့ၣ်ပိၢ်အတၢ်ပိၢ်ဖးထီၣ်သ့ၣ်တဖၣ်အံၤမၤဘၣ်ဒိဟးဂီၤစ့ၢ်ကီးဟံၣ်လွံၢ်ဖျၢၣ်န့ၣ်လီၤ. တၢ်ဂီၤသ့ၣ်တဖၣ်အံၤပာ်ဖျါ ထီၣ်ဝဲမ့ၣ်ပိၢ်လၢအတပိၢ်ဖးထီၣ်ဘၣ်တဖျၢၣ်လၢအဘၣ်တၢ်တ့ၢ်လီၤအီၤလၢ SAC ကဘီယူၤဒုးသုးန့ၣ်လီၤ. (တၢ်ဂီၤ- KHRG)
တၢ်ဂီၤတဖၣ်အံၤဘၣ်တၢ်ဒိဖဲလါယူၤ ၂၀၂၅ နံၣ်ဖဲ အဖ--- သ ဝီ, ပဲၤယၣ်က ရူၢ်, ကြုတုၢ်ကီၢ်ဆၣ်, ဒူပျာ်ယာ်ကီၢ်ရ့ၣ်အပူၤန့ၣ် လီၤ. ဖဲလါယူၤ ၉ သီ, ၂၀၂၅ နံၣ်အနံၤ, ဖဲမုၢ်ဃ့ၢ်လီၤ ၁း၄၅ အ ဆၢကတီၢ် SAC ကဘီယူၤဒုးသုးဟဲတ့ၢ်လီၤဝဲမ့ၣ်ပိၢ် (၅၀၀-ပီၣ်) တဘျုးဖျၢၣ်ဒီးတ့ၢ်လီၤစ့ၢ်ကီးဝဲကျိဖးဒိၣ်ချံအဆံးအက လုာ်ကလုာ်ဖဲဟဲလံၤခီၤပထၢၣ်တဘ့ၣ်ဟဲခးလီၤတၢ်ဒီးကျိစဲးဖဲ အဖ--- သဝီပူၤအဆၢကတီၢ်န့ၣ်လီၤ. မ့ၣ်ပိၢ်အကျါတဖျၢၣ်န့ၣ် လီၤတဲာ်ပိၢ်ဖးထီၣ်ဖဲဟံၣ်တဖျၢၣ်လၢအအိၣ်ဖဲသဝီပူၤဒီးဘၣ်ဖဲ ကၠိဖိသ့ၣ်တဖၣ်မၤလိတၢ်ဖဲဟံၣ်တဖျၢၣ်န့ၣ်အပူၤအဆၢကတီၢ် အဃိဘၣ်သံဝဲကၠိဖိသၢဂၤ, သရၣ်မုၣ်တဂၤ, ဒီးသဝီဖိတဂၤန့ၣ် လီၤ. ဘၣ်ဒိဘၣ်ထံးစ့ၢ်ကီးဝဲပှၤကညီအစှၤကတၢၢ် (၂၉) ဂၤဒီး လၢအကျါန့ၣ်ပၣ်ဃုာ်ဒီးကၠိဖိ (၂၄) ဂၤ, ဖိသၣ်လွံၢ်နံၣ်တဂၤ, ဒီးသဝီဖိလွံၢ်ဂၤန့ၣ်လီၤ. ကဘီယူၤအတၢ်ဟဲခးလီၤတၢ်အံၤမၤ ဘၣ်ဒိဟးဂီၤဝဲသဝီဖိအဟံၣ်အစှၤ ကတၢၢ် (၁၂) ဖျၢၣ်န့ၣ်လီၤ. တၢ်ဟဲခးလီၤတၢ်အံၤဝံၤအလီၢ်ခံသဝီဖိလၢအဘၣ်ဒိနးသ့ၣ်တ ဖၣ်လဲၤဒိးကူစါယါဘျါအသးလၢဖၣ်အၣ်ဝ့ၢ်ဒီးမီၣ်လမၠဲၣ်ဝ့ၢ်ပူၤဒီး မ့မ့ၢ်ပှၤလၢဘၣ်ဒိတနးသ့ၣ်တဖၣ်တခီလဲၤဒိးကူစါယါဘျါအ သးလၢသဝီလၢအအိၣ်ဘူးသ့ၣ်တဖၣ်န့ၣ်လီၤ. တချုးဒံးလၢတၢ် ဟဲခးလီၤတၢ်ဒံးဘၣ်န့ၣ်လီၢ်ကဝီၤသဝီခိၣ်နၢ်သ့ၣ်တဖၣ်ဟ့ၣ်ပ လီၢ်ဝဲဘၣ်ဃးတၢ်ဘံၣ်တၢ်ဘၢတၢ်လီၤဘၣ်ယိၣ်အဂ့ၢ်အဃိတီၤ ခၢၣ်သးကၠိတဖျၢၣ်လၢပှၤကၠိဖိနီၢ်ဂံၢ်အိၣ် (၉၀) ဂၤဒီးဘၣ်တၢ်တီ ခိရိၣ်မဲအီၤလၢသဝီဖိအနီၢ်ကစၢ်ဒၣ်ဝဲတဖျၢၣ်အံၤဘၣ်တၢ်ပတုာ် ဃာ်အီၤန့ၣ်လီၤ. တချုးဒံးလၢတၢ်ဟဲခးလီၤတၢ်ဒံးဘၣ်န့ၣ်သ ရၣ်/မုၣ် သ့ၣ်တဖၣ်ဒီးကၠိဖိသ့ၣ်တဖၣ်ဘၣ်သိၣ်လိမၤလိလံာ် လၢတၢ်ခူသူၣ်အပူၤလၢသဝီဖိသ့ၣ်တဖၣ်အဟံၣ်ပူၤန့ၣ်လီၤ. တၢ်ဂီၤလၢအဖီခိၣ်ခံဘ့ၣ်အံၤပာ်ဖျါထီၣ်ဝဲသဝီဖိသ့ၣ်တဖၣ်အ ဟံၣ်လၢအဘၣ်ဒိဟးဂီၤကွံာ်လၢ SAC ကဘီယူၤဟဲခးလီၤတၢ် ဖဲအဖ--- သဝီဖဲလါယူၤ ၉ သီ, ၂၀၂၅ နံၣ်အနံၤန့ၣ်လီၤ. တၢ်ဂီၤ လၢအဖီလာ်အစ့ၣ်တဘ့ၣ်အံၤပာ်ဖျါထီၣ်ဝဲပှၤကၠိဖိအထံဒၢတဖျၢၣ်လၢအအိၣ်လီၤတဲာ်တ့ၢ်ဖဲတၢ်ကဲထီၣ်သးအလီၢ်န့ၣ်လီၤ. (တၢ်ဂီၤ- KHRG)
KHEG ဒိးန့ၢ်ဘၣ်ဝဲတၢ်ဂီၤတဖၣ်အံၤလၢလီၢ်ကဝီၤသဝီဖိတဂၤအအိၣ်ဖဲလါယူၤလံ ၂၀၂၅ နံၣ်အပူၤန့ၣ်လီၤ. ဖဲလါယူၤလံ ၅ သီ, ၂၀၂၅ နံၣ်အနံၤန့ၣ်ကီၢ်ပယီၤသုးဟဲခးလီၤတၢ်ဒီးကဘီယူၤဖဲ အထ--- သဝီ, မီခံကရူၢ်, ကီးတရံးကီၢ်ဆၣ်, ဒူပျာ်ယာ်ကီၢ်ရ့ၣ်အ ပူၤန့ၣ်လီၤ. ကဘီယူၤအတၢ်ဟဲခးလီၤတၢ်အံၤအဃိသဝီဖိလွံၢ်ဂၤဘၣ်ဒိဘၣ်ထံးဝဲဒိၣ်ဒိၣ်မုၢ်မုၢ်ဒီးလၢအကျါန့ၣ်ပၣ်ဃုာ်ဒီးဖိသၣ် တဂၤန့ၣ်လီၤ. ဘၣ်တၢ်ဆှၢအဝဲသ့ၣ်ဆူတၢ်ဆါဟံၣ်တဖျၢၣ်လၢအအိၣ်ဖဲ အည--- ဝ့ၢ်, ယိၤ ကီၢ်တးကီၢ်ရ့ၣ်အပူၤလၢကဒိးန့ၢ်ဘၣ် ဝဲကသံၣ်ကသီတၢ်ကူစါယါဘျါအဂီၢ်န့ၣ်လီၤ. လီၢ်ကဝီၤသဝီဖိတဂၤပာ်ဖျါထီၣ်ဝဲလၢဖဲကဘီယူၤဟဲခးလီၤတၢ်အဆၢကတီၢ်န့ၣ် တၢ်ဒုးတၢ်ယၤတကဲထီၣ်အသးဘူးဒီးသဝီတဖျၢၣ်အံၤဘၣ်. တၢ်ဂီၤသ့ၣ်တဖၣ်အံၤပာ်ဖျါထီၣ်ဝဲသဝီဖိလၢအဘၣ်ဒိလွံၢ်ဂၤဒိးန့ၢ် ဘၣ်ဝဲကသံၣ်ကသီတၢ်ကူစါယါဘျါဖဲ အည--- တၢ်ဆါဟံၣ်န့ၣ်လီၤ. (တၢ်ဂီၤ- လီၢ်ကဝီၤသဝီဖိ)
တၢ်ဂီၤတဘ့ၣ်အံၤဘၣ်တၢ်ဒိန့ၢ်အီၤဖဲလါဖ့ၤဘြူၤအါရံၤ ၂၀၂၅ နံၣ်ဖဲ အယ--- သဝီ, ယီၢ်ကုာ်ကရူၢ်, တန့ခၠါကီၢ်ဆၣ်, ဖၣ်အၣ် ကီၢ်ရ့ၣ်အပူၤန့ၣ်လီၤ. ဖဲလါဖ့ၤ ဘြူၤအါရံၤ ၃ သီ, ၂၀၂၅ နံၣ်အ နံၤန့ၣ် SAC ဒုးယၤဂ့ၢ်ဝီ (တမ) နီၣ်ဂံၢ်-၁၂ လၢအအိၣ်ဆီလီၤအ သးဖဲလဲၤဝၣ်စုကဝဲၤဒိၣ်သုးကလၢၤ, လဲၤဝၣ်ဟီၣ်ကဝီၤလၢအ အိၣ်ဘူးဒီးကီးတရံးဝ့ၢ်, ကီးတရံးကီၢ်ဆၣ်, ဒူပျာ်ယာ်ကီၢ်ရ့ၣ် ပူၤတဖၣ်သူဝဲဒြိတဘ့ၣ်ဒီးဟဲတ့ၢ်လီၤဝဲမ့ၣ်ပိၢ်တဖၣ်ဆူ အယ--- သဝီပူၤအဃိသဝီဖိအဟံၣ်ဘၣ်ဒိဝဲတဖျၢၣ်န့ၣ်လီၤ. တၢ်ဂီၤတ ဘ့ၣ်အံၤပာ်ဖျါထီၣ်ဝဲသဝီဖိတဂၤလၢအမံၤမ့ၢ် အူခ--- အဟံၣ် ဘၣ်ဒိဟးဂီၤကွံာ်ဝဲဒိၣ်ဒိၣ်မုၢ်မုၢ်န့ၣ်လီၤ. (တၢ်ဂီၤ- KHRG)
တၢ်ဂီၤတဖၣ်အံၤဘၣ်တၢ်ဒိန့ၢ်အီၤဖဲလါစဲးပထ့ဘၢၣ် ၂၀၂၅ နံၣ်ဖဲ အရှ--- သဝီ, ပံၢ်တခးကရူၢ်, တၢ်ကြဲၢ်ကီၢ်ဆၣ်, ဖၣ်အၣ်ကီၢ်ရ့ၣ် အပူၤန့ၣ်လီၤ. ဖဲလါစဲးပထ့ဘၢၣ် ၃ သီ, ၂၀၂၅ နံၣ်အနံၤ, ကဘၣ်ဖဲဂီၤခီ ၉း၅၂ အဆၢကတီၢ်ကီၢ်ပယီၤသုးသူဝဲကၤမံၤကၤစံၣ်ဒြိ တဘ့ၣ်ဒီးဟဲခးလီၤတၢ်ဖဲ အရှ--- တီၤခၢၣ်သးကၠိ လၢအအိၣ်ဖဲ အရှ--- သဝီပူၤန့ၣ်လီၤ. ကၠိတဖျၢၣ်အံၤဘၣ်တၢ်တီခိၣ်ရိၣ်မဲအီၤ လၢ KECD န့ၣ်လီၤ. ဒြိဟဲခးလီၤတၢ်တဘျီအံၤဘၣ်ဒိဝဲသရၣ်/မုၣ်ခံဂၤဒီးပှၤကၠိဖိ တဂၤဒီးဘၣ်ဒိဟးဂီၤဝဲကၠိတၢ်သူၣ်ထီၣ်တဖျၢၣ် န့ၣ်လီၤ. တၢ်ဂီၤလၢအစ့ၣ်တဘ့ၣ်အံၤပာ်ဖျါထီၣ်ဝဲကၠိဖိလၢအထီၣ်ကၠိလၢ ဘည--- ကၠိတဂၤအတၢ်ဘၣ်ဒိဘၣ်ထံးဒီးတၢ်ဂီၤလၢအ ထွဲတဘ့ၣ်အံၤပာ်ဖျါထီၣ်ဝဲကၠိအတၢ်သူၣ်ထီၣ်တဖျၢၣ်ဘၣ်ဒိဟးဂီၤဝဲဒၣ်န့ၣ်လီၤ. (တၢ်ဂီၤ- KHRG)
တၢ်ဂီၤတဘ့ၣ်အံၤဘၣ်တၢ်ဒိန့ၢ်အီၤဖဲလါစဲးပထ့ဘၢၣ် ၂၀၂၅ နံၣ်အနံၤဖဲစံာ်ပျီတဘ့ၣ်လၢအအိၣ်ဘူးဒီး ဘဆ--- သဝီ, ထံ ဝၣ်ဘျီကရူၢ်, တန့ခၠါကီၢ်ဆၣ်, ဖၣ်အၣ်ကီၢ်ရ့ၣ်အပူၤန့ၣ်လီၤ. ဖဲ လါစဲးပထ့ဘၢၣ် ၁၀ သီ, ၂၀၂၅ နံၣ်အနံၤန့ၣ်ပယီၤသုးကဘီ ယူၤတဘ့ၣ်ဟဲတ့ၢ်လီၤဝဲမ့ၣ်ပိၢ်တဖျၢၣ်ဖဲလီၢ်ကဝီၤသဝီဖိတဂၤ အစံာ်ပျီပူၤလၢအအိၣ်ဘူးဒီး ဘဆ--- သဝီန့ၣ်လီၤ. မ့ၣ်ပိၢ်အ တၢ်ပိၢ်ဖးထီၣ်အံၤဒုးအိၣ်ထီၣ်ဝဲတၢ်ဟးဂူာ်ဟးဂီၤလၢစံာ်ပျီတ ဘ့ၣ်အံၤအပူၤန့ၣ်လီၤ. စံာ်ပျီကစၢ်စံးဘၣ် KHRG လၢတၢ်ကဲ ထီၣ်သးလၢအစံာ်ပျီပူၤဒ်အံၤန့ၣ်အဝဲသးဟးဂီၤဒိၣ်မးန့ၣ်လီၤ. (တၢ်ဂီၤ- KHRG)
