တၢ်ကဲထီၣ်သးအကလုာ်

ဟီၣ်လာ်မ့ၣ်ပိၢ်တၢ်ဘၣ်ဒိဘၣ်ထံး

တၢ်ကဲထီၣ်သးမုၢ်နံၤမုၢ်သီ

လါယနူၤအါရံၤ ၉ သီ, ၂၀၂၅ နံၣ်

တၢ်ကဲထီၣ်သးတၢ်လီၢ်တၢ်ကျဲ (သဝီ, ကရူၢ်, ကီၢ်ဆၣ်, ကီၢ်ရ့ၣ်)

ဖဲတိၤတဘိလၢအအိၣ်ဖဲ အဘ--- သဝီ, မၠီၣ်ပၤကိကရူၢ်ဒီး အအ--- သဝီ, ပၠ့မၣ်ပ့ၤကရူၢ်အ ဘၢၣ်စၢၤ မူကီၢ်ဆၣ်, ချၢၣ်လွံၢ်ထူၣ်ကီၢ်ရ့ၣ်.

ၦၤလၢအတူၢ်ဘၣ်တၢ်တဂၤအဂ့ၢ်အကျိၤ

မံၤ

မီၤအ---

သးနံၣ်

၁၇ နံၣ်

မုၣ်/ ခွါ

ခွါ

ကလုာ်

ပယီၤ

ထီၣ်ပှၢ် / သဘျ့  

သဘျ့

တၢ်ဖံးတၢ်မၤ

ထီရီၤ

တၢ်ဘူၣ်တၢ်ဘါ

ဘူးဒး

တၢ်ဟံးမူဒါ/ လီၢ်လၤ

[သဝီဖိ]

အိၣ်ဆိးဒူသဝီ

အအ--- သဝီ, ပၠ့မၣ်ပ့ၤကရူၢ်, မူကီၢ်ဆၣ်, ချၢၣ်လွံၢ်ထူၣ်ကီၢ်ရ့ၣ်.

ၦၤလၢအမၤအၢပယွဲတၢ်တဂၤအဂ့ၢ်အကျိၤ

မံၤ                    

လီၢ်လၤ

သုးကျိၤ/ သုးရ့ၣ် / သုးတြိၤ

အိၣ်သူၣ်လီၤသးလီၢ်ကျဲ /သုးကလၢၤ

အခိၣ်အမံၤဒီးလီၢ်လၤ

[တသ့ၣ်ညါ]

[တသ့ၣ်ညါ]

PDF [ကမျၢၢ်တၢ်ဒီသဒၢ သုး] သုးဖိ

အဆ--- သဝီ, မူဟီၣ်က ဝီၤလီၤဆီ, မူကီၢ်ဆၣ်, ချၢၣ်လွံၢ်ထူၣ်ကီၢ်ရ့ၣ်.

[တသ့ၣ်ညါ]

၁. ၡဲပၠးၦၤနဟံးန့ၢ်တၢ်ကဲထီၣ်သးတခါအံၤ တဆီဘၣ်တဆီတက့ၢ်.

ယ [KHRG ပျီပူၤပှၤမၤတၢ်ဖိ] ဒိးန့ၢ်ဘၣ်တၢ်ဂ့ၢ်တၢ်ကျိၤအံၤဖဲယလဲၤဟးလၢ စီၤဘ--- လၢအမ့ၢ်လီၢ်ကဝီၤခိၣ်နၢ်တဂၤဖဲ အဃ--- ကရူၢ် [လၢတၢ်ဘံၣ်တၢ်ဘၢအဂီၢ်ဘၣ်တၢ်ပာ်ဘၢဃာ်အလီၢ်လၤ] န့ၣ်လီၤ. အဝဲဒုးသ့ၣ်ညါယၤ [KHRG ပျီပူၤပှၤမၤတၢ်ဖိ] လၢသဝီ ဖိလၢအဘၣ်ဒိဒီးဟီၣ်လာ်မ့ၣ်ပိၢ်အတၢ်ပိၢ်ဖးထီၣ်တဂၤအံၤအိၣ်လၢ အဒ--- တၢ်ဆါဟံၣ် (လၢအအိၣ်သူၣ်လီၤအသးဖဲ အဒ--- သဝီ, ကၠီးဖၠၢ်ကရူၢ်, မူကီၢ်ဆၣ်အပူၤ) န့ၣ်လီၤ. လၢတၢ်န့ၣ်အဃိယ [KHRG ပျီပူၤပှၤမၤတၢ်ဖိ] လဲၤဖဲန့ၣ်လၢယကမၤနီၣ်မၤဃါ တၢ်ဂ့ၢ်တၢ်ကျိၤအဂီၢ်န့ၣ်လီၤ.

၂. ကွဲးနီၣ်ၦၤလၢဟ့ၣ်တၢ်ဂ့ၢ်အံၤတဂၤစုာ်စုာ်သ့ၣ်ညါ တၢ်ဂ့ၢ်အံၤအမ့ၢ်အတီလၢကျဲဒ်လဲၣ်.

တၢ်ကဲထီၣ်သးတခါအံၤပာ်ဖျါထီၣ်ဝဲ ဒီၤဆ--- အဖိခွါ [မီၤအ---] လၢအဘၣ်ဒိဒီးဟီၣ်လာ်မ့ၣ်ပိၢ်အတၢ်ပိၢ်ဖးထီၣ်တဂၤအဂ့ၢ်န့ၣ် လီၤ. ဒီၤဆ--- ဟ့ၣ်ယၤ [KHRG ပျီပူၤပှၤမၤတၢ်ဖိ] တၢ်ဂ့ၢ်တၢ်ကျိၤအံၤလီၤ. အဝဲလဲၤဆှၢစ့ၢ်ကီးအဖိခွါဆူ [အဒ---] တၢ်ဆါဟံၣ် န့ၣ်လီၤ. အဝဲအိၣ်ခိးစ့ၢ်ကီးဒီးအဖိခွါဖဲတၢ်ဆါဟံၣ် [ဖဲအဖိခွါထီၣ်တၢ်ဆါဟံၣ်အဆၢကတီၢ်] န့ၣ်လီၤ. အဝဲသ့ၣ်ညါဝဲ [တၢ်ဂ့ၢ်တၢ် ကျိၤလၢအဖိခွါဘၣ်ဒိဘၣ်ထံးအဂ့ၢ်] ခဲလၢာ်ခဲဆ့န့ၣ်လီၤ.

ပာ်ဖျါတၢ်ကဲထီၣ်သးအဂ့ၢ်အကျိၤလၢလၢပှဲၤပှဲၤတက့ၢ်.

ဖဲလါယနူၤအါရံး ၉ သီ, ၂၀၂၅ နံၣ်အနံၤန့ၣ် မီၤအ--- လၢအအိၣ်ဖဲ အအ--- သဝီ, ပၠ့မၣ်ပ့ၤကရူၢ်, မူကီၢ်ဆၣ်, ချၢၣ်လွံၢ်ထူၣ်ကီၢ် ရ့ၣ်အပူၤတဂၤဒီးအသကိး (၂) ဂၤလဲၤတခွဲအီၣ်ညၣ်လၢထံကျိတဘိအပူၤလၢအအိၣ်ဖဲ အအ--- သဝီန့ၣ်လီၤ. အဝဲသ့ၣ်လဲၤပ တုာ်ဃာ်ဝဲအဝဲသ့ၣ်သိလ့ၣ်ယီၢ်ဖဲတိၤတဘိလၢအအိၣ်ဖဲ အအ--- သဝီဒီး အဘ--- သဝီအဘၢၣ်စၢၤ မၠီၣ်ပၤကိကရူၢ်, မူကီၢ်ဆၣ် အပူၤန့ၣ်လီၤ. ဖဲန့ၣ်ဝံၤအလီၢ်ခံအဝဲသ့ၣ်လဲၤပိာ်ထီၣ်ဝဲထံကျိလၢကတခွဲအီၣ်ညၣ်အဂီၢ်န့ၣ်လီၤ.

ကဘၣ်ဖဲမုၢ်ဘူးကထူၣ်ဂီၤခီ ၁၁ နၣ်ရံၣ်အဆၢကတီၢ်အဝဲသ့ၣ်လီၤဘဲဝဲအဃိအဝဲသ့ၣ်က့ၤပိာ်လီၤဝဲထံကျိတဘိအံၤဒီးစးထီၣ် တခွဲဝဲညၣ်န့ၣ်လီၤ. အဝဲသ့ၣ်က့ၤလီၤဝဲအခိၣ်လိၤလၢတၢ်လီၢ်လၢအဝဲသ့ၣ်ပတုာ်ဃာ်သိလ့ၣ်ယီၢ်အလီၢ်ခီဖျိအဝဲသ့ၣ်ပာ်ဃာ်ဝဲအ မ့ၤဘိၣ်သ့ၣ်တဖၣ်လၢသိလ့ၣ်ယီၢ်အခံဆ့ၣ်နီၤအဒၢပူၤန့ၣ်လီၤ. အိၣ်တတီၤဖိဖဲအဝဲသ့ၣ်က့ၤတုၤဖဲတိၤတဘိလၢအဝဲသ့ၣ်ပတုာ် ဃာ်ဝဲအသိလ့ၣ်ယီၢ်သ့ၣ်တဖၣ်အဆၢကတီၢ် မီၤအ--- အသကိးခံဂၤထီၣ်ဝဲလၢကၢၢ်ခိၣ် [ဖဲ မီၤအ--- တခွဲဒံးညၣ်အဖၢမုာ်] န့ၣ်လီၤ.

လၢန့ၣ်ဝံၤအလီၢ်ခံဖဲဂီၤခီ ၁၁:၃၀ နၣ်ရံၣ်အဆၢကတီၢ် မီၤအ--- ဆၢထၢၣ်ဒီးက့ၤထီၣ်ဝဲဒၣ်လၢကၢၢ်ခိၣ်န့ၣ်လီၤ. ဖဲအဝဲက့ၤထီၣ်ဝဲ လၢကၢၢ်ခိၣ်ဝံၤအလီၢ်ခံလၢတၢ်သတူၢ်ကလာ်အပူၤအဝဲယီၢ်ဘၣ်ဝဲဟီၣ်လာ်မ့ၣ်ပိၢ်တဖျၢၣ်ဒီးဟီၣ်လာ်မ့ၣ်ပိၢ်တဖျၢၣ်န့ၣ်ပိၢ်ဖးထီၣ်ဝဲဒၣ်န့ၣ်လီၤ. အသကိးလၢအက့ၤထီၣ်ဆိလၢကၢၢ်ခိၣ်ဒီးဟးလၢတၢ်မဲာ်ညါတဂၤပူၤဖျဲးဝဲဒၣ်ဒီးဟီၣ်လာ်မ့ၣ်ပိၢ်အတၢ်ပိၢ်ဖးထီၣ်န့ၣ်လီၤ. မ့မ့ၢ်အသကိးလၢအဂၤတဂၤတခီဘၣ်ဒိဝဲဒီးဟီၣ်လာ်မ့ၣ်ပိၢ်အက့တဆံးတက့ၢ်န့ၣ်လီၤ. အသကိးလၢအဘၣ်ဒိတဆံးတ က့ၢ်တဂၤအံၤဒိးန့ၢ်ဘၣ်ဝဲတၢ်ကူစါယါဘျါလၢလီၢ်ကဝီၤ PDF သုးကသံၣ်သရၣ်တဂၤအအိၣ်န့ၣ်လီၤ. KHRG တမၤနီၣ်မၤဃါအါ ထီၣ်ဘၣ်ဃး မီၤအ--- အသကိးခံဂၤအဂ့ၢ်အကျိၤလီၤတံၢ်လီၤဆဲးလၢၤဘၣ်န့ၣ်လီၤ.

ဖဲဟီၣ်လာ်မ့ၣ်ပိၢ်ပိၢ်ဖးထီၣ်ဒီး မီၤအ--- ဘၣ်ဒိဝံၤအလီၢ်ခံအဝဲဟီၣ်ဒီးဃ့တၢ်မၤစၢၤဘၣ်ဆၣ်ခီဖျိအသကိးခံဂၤအံၤဖုးဘၣ်အသးဒီး ပျံၤတၢ်အဃိအဝဲသ့ၣ်တလဲၤကွၢ်အီၤဘၣ်ဒီးဃ့ၢ်ကွံာ်ဝဲလၢတၢ်လီၢ်လၢအယံၤဒီးတၢ်ကဲထီၣ်သးအလီၢ်န့ၣ်လီၤ. မီၤအ--- ဂုာ်ကျဲးစၢၤ ဘျိၣ်ဃီၤဝဲလၢအသိလ့ၣ်ယီၢ်အအိၣ်ဘၣ်ဆၣ်အဝဲဘျိၣ်ဝဲတတုၤလၢအသိလ့ၣ်ယီၢ်အအိၣ်ဘၣ်န့ၣ်လီၤ. လၢန့ၣ်ဝံၤအလီၢ်ခံသဝီဖိ လၢတၢ်တသ့ၣ်ညါအီၤ [တဒူၣ်] ဟဲဃီၤလၢအအိၣ် [ဘၣ်ဖဲအဝဲသ့ၣ်လ့ၢ်ထီၣ်လ့ၢ်လိၤဖဲကျဲပူၤအဆၢကတီၢ်] န့ၣ်လီၤ. သဝီဖိလၢ တၢ်တသ့ၣ်ညါအီၤတဖၣ်မၤစၢၤအီၤဒီးက့ၤစိာ်အီၤဆူအဟံၣ်ဒီးသိလ့ၣ်ယီၢ်န့ၣ်လီၤ.

မီၤအ--- အမိၢ် ဒီၤဆ--- လၢအိၣ်လၢ အအ--- သဝီဒီးအသးနံၣ်အိၣ် ၅၀ နံၣ်တဂၤတဲဘၣ်ဝဲတၢ်ဂ့ၢ်တၢ်ကျိၤလၢအဖိခွါဘၣ်ဒိဘၣ် ထံးအဂ့ၢ်ဒ်အံၤ “တၢ်ကဲထီၣ်သးအလီၢ်ဒီးယဟံၣ်န့ၣ်ပမ့ၢ်လဲၤဒီးသိလ့ၣ်ယီၢ်န့ၣ်ကအိၣ်ဝဲ ၃၀ မံးနံးန့ၣ်လီၤ. ဖဲအဝဲ [အဖိခွါ] ဟဲက့ၤတုၤလၢ ဟံၣ်အဆၢကတီၢ်အသွံၣ်လီၤအါမးအဃိပတဲကျၢတၢ်ဂ့ၢ်တၢ်ကျိၤအံၤဆူ [PDF] အတြဲၤ [တၢ်သမံသမိးတြဲၤ] အအိၣ် လီၤ. လၢန့ၣ်ဝံၤအလီၢ်ခံ [PDF] အသုးကသံၣ်သရၣ်ဟဲဒီးဟ့ၣ်န့ၢ်အီၤဂ့ၢ်ဂီၢ်အူတၢ်ကူစါယါဘျါလီၤ. […] ဝံၤအလီၢ်ခံဘၣ်တၢ်ဆှၢ အီၤဒီးချံဆူတၢ်လီၢ်တတီၤလီၤ. […] ဖဲအဝဲလဲၤဒိးဝဲချံဝံၤအလီၢ်ခံအဝဲဘၣ်ဒိးထီၣ်ကဒီးဝဲသိလ့ၣ်လီၤ. တၢ်လဲၤတၢ်က့ၤလၢပက လဲၤဆူတၢ်ဆါဟံၣ်လၢအအိၣ်ဖဲ [အဒ--- သဝီပူၤ] တဖျၢၣ်အံၤအဂီၢ်ပဘၣ်လဲၤဝဲသၢပတီၢ် [ဒ်အမ့ၢ်သိလ့ၣ်ယီၢ်, ချံ, ဒီးသိလ့ၣ်] န့ၣ်လီၤ. အဝဲဘၣ်ဒိအဆၢကတီၢ်န့ၣ်ကဘၣ်ဖဲဂီၤခီ ၁၁:၃၀ နၣ်ရံၣ် ဒီးဖဲပဟဲတုၤဖဲအံၤန့ၣ် [အဒ--- တၢ်ဆါဟံၣ်] ကဘၣ်ဖဲဟါခီ ၅ နၣ်ရံၣ်လီၤ.” [အဒ--- တၢ်ဆါဟံၣ်အံၤဘၣ်တၢ်ပၢဆှၢအီၤလၢ ကညီဆူၣ် ချ့မၤစၢၤဝဲၤကျိၤ (KDHW) န့ၣ်လီၤ.]

ဒ်လီၢ်ကဝီၤသဝီဖိတဖၣ်ပာ်ဖျါထီၣ်ဝဲအသိးမ့ၣ်ပိၢ်တဖျၢၣ်အံၤဘၣ်တၢ်ဒိးလီၤပာ်အီၤလၢ PDF လၢအအိၣ်ဆီလီၤအသးဖဲ အဘ--- သဝီဒီး အဆ--- သဝီန့ၣ်လီၤ. အဝဲသ့ၣ် [PDF] ဒိးလီၤပာ်ဝဲဟီၣ်လာ်မ့ၣ်ပိၢ်တဖျၢၣ်အံၤဖဲကျဲတဘိလၢ ထံကီၢ်တၢ်ပၢတၢ်ပြးကီၣ် ကးကရၢ (SAC) သုးသ့ၣ်တဖၣ်ဟးထီၣ်က့ၤလီၤညီနုၢ်အလီၢ်ဒ်သိးအဝဲသ့ၣ်ကဒီသဒၢလီၤအသးဖဲ SAC သုးသ့ၣ်တဖၣ်အတၢ် ဟဲထီၣ်ဒီးသုးဘူးထီၣ်အသးလၢအဝဲသ့ၣ် [PDF] သုးကလၢၤအဂီၢ်န့ၣ်လီၤ. လၢတၢ်န့ၣ်အဃိသဝီဖိသ့ၣ်တဖၣ်အံၤ [မီၤအ--- ဒီး အသကိး] ဖဲအလဲၤတုၤလၢ အဘ--- တိၤဒီးလဲၤတခွဲအီၣ်ညၣ်အဆၢကတီၢ်အဝဲသ့ၣ်တသ့ၣ်ညါဝဲလၢမ့ၣ်ပိၢ်အံၤဘၣ်တၢ်ဒိးလီၤ ဃာ်အီၤလၢကျဲၤပူၤလၢအဘူးဒီးတိၤအံၤဘၣ်န့ၣ်လီၤ. လၢတၢ်ဂ့ၢ်ဒ်အံၤအဃိ မီၤအ--- အခီၣ်ဘၣ်ဒိဝဲနးနးကလဲာ်ဒီးဘၣ်တၢ်လဲၤ ဆှၢအီၤဆူ အဒ--- တၢ်ဆါဟံၣ်န့ၣ်လီၤ. မီၤအ--- အခီၣ်အံၤဘၣ်တၢ်ဒီၣ်တူာ်ကွံာ်ဝဲခီဖျိလၢအတၢ်ဘၣ်ဒိဝဲနးနးကလဲာ်အဃိန့ၣ် လီၤ. တၢ်ဆါဟံၣ်တဖျၢၣ်အံၤတဃ့ဝဲတၢ်ကူစါယါဘျါအပှ့ၤဘၣ်. ဘၣ်ဆၣ်ဟ့ၣ်ဂံၢ်ဟ့ၣ်ဘါဝဲဟံၣ်ဖိဃီဖိလၢကဟ့ၣ်ဝဲတၢ်ကူစါ ယါဘျါအပှ့ၤထဲဒၣ်အဝဲသ့ၣ်ဟ့ၣ်ဝဲန့ၢ်အသိးန့ၣ်လီၤ.

မီၤအ--- အမိၢ် ဒီၤဆ--- စံးစ့ၢ်ကီးဝဲလၢ “အဝဲသ့ၣ် [PDF] ပျံၤဝဲလၢအဒုၣ်အဒါ [SAC သုးဖိ] ကဟဲထီၣ်ဒုးအဝဲသ့ၣ်အဃိအဝဲသ့ၣ်ဒိးလီၤ ပာ်ဝဲ [ဟီၣ်လာ်မ့ၣ်ပိၢ်] အံၤလၢကဒီသဒၢလီၤအဝဲသ့ၣ်အသးလီၤ. တၢ်တဟ့ၣ်ပလီၢ်ပှၤဘၣ်ဃးဒီးတၢ်ဂ့ၢ်အဝဲန့ၣ်ဘၣ်. တၢ်လီၢ်ဝဲအံၤအိၣ်ယံၤဒီး ပသဝီအဃိပတသ့ၣ်ညါလၢတၢ်ဒိးလီၤပာ်ဝဲဟီၣ်လာ်မ့ၣ်ပိၢ်သ့ၣ်တဖၣ်အံၤအဂ့ၢ်ဘၣ်. […] ပဖိပလံၤ [သဝီဖိသးစၢ်] သ့ၣ်တဖၣ်လဲၤခီဂာ်ဝဲတၢ် လီၢ်အံၤ [နုာ်လီၤဆူဟီၣ်ကဝီၤလၢ PDF သ့ၣ်တဖၣ်ဟူးဂဲၤအလီၢ်] အဃိတၢ်ကဲထီၣ်အ သးဒ်လီၤ.” ဘၣ်ဃးဒီးအဖိခွါဘၣ်ကွဲးကူစါယါ ဘျါသးအဂ့ၢ်အံၤ ဒီၤဆ--- စံးဝဲ [ဖဲလါယနူၤအါရံၤ ၁၁ သီ, ၂၀၂၅ နံၣ်အနံၤ] လၢ “အဝဲ [မီၤအ---] အခီၣ်အံၤတၢ်ကဘၣ်ဒီၣ်တူာ်ကွံာ် အီၤန့ၣ်လီၤ. ကသံၣ်သရၣ်တဂၤဆိကမိၣ်ဝဲလၢအဝဲကဒီၣ်ကွံာ်ဝဲဖဲမနၤ [ဖဲလါ ယနူၤအါရံၤ ၁၀ သီ, ၂၀၂၅] ဘၣ်ဆၣ်အဝဲစံးဝဲလၢ [ဖဲမနၤ န့ၣ်] ထးလၢပှၤကဆးတံၢ်ဝဲတၢ်လၢအိၣ်လၢအဒွဲပူၤဒ်အမ့ၢ်သွံၣ်ကျိၤသ့ၣ်တဖၣ်အဂီၢ်တအိၣ်ဘၣ်လီၤ. ဖဲတၢ်တဂီၤအံၤ [လါယနူၤအါရံၤ ၁၁ သီ, ၂၀၂၅ နံၣ်အနံၤ] န့ၣ်အဝဲသ့ၣ်စံးဘၣ်ယၤလၢအဝဲ သ့ၣ်ကဒီၣ်တူာ်ကွံာ်ဝဲ [ယဖိခွါအခီၣ်] အဃိအဝဲသ့ၣ်တဲယၤလၢတဘၣ်ဒုးအီၣ် [အဝဲ] တၢ် နီတမံၤဘၣ်လီၤ. အခဲအံၤကသံၣ်သ ရၣ်ကွၢ်ပှၤဆါတဂၤဟဲဒီးတဲဘၣ်ယၤလၢကသံၣ်သရၣ်တပၢၢ်ထီၣ်ဒံးဘၣ်လီၤ. လၢတၢ်န့ၣ်အဃိဒ်သိးဒီး တၢ်ဒီၣ်တဲာ်ကူစါယါအ ခီၣ်ကလဲၤသးဘၣ်ဂ့ၢ်ဘၣ်ဝီအဂီၢ်ယမ့ၢ်အဲၣ်ဒိးဟ့ၣ်အီၣ်ယဖိခွါတၢ်အီၣ်တၢ်အီန့ၣ်ယဟ့ၣ်အီၣ်အီၤသ့ [ကမၤစၢၤအီၤဒ် သိးကအိၣ်ဒီးဂံၢ်ဘါလၢလဲၤခီဖျိဝဲကန့ၢ်အဂီၢ်] န့ၣ်လီၤ. အဝဲအညါဘီၣ်ဒံးလီၤ. အသးနံၣ် ၁၈ နံၣ်တပှဲၤဒံးဘၣ်လီၤ.”

စးထီၣ်ဖဲ SAC ဟံးန့ၢ်ဆူၣ်တၢ်စိတၢ်ကမီၤ [ဖဲ ၂၀၂၁ နံၣ်သုးဟံးန့ၢ်တၢ်စိတၢ်ကမီၤ] လံၤလံၤန့ၣ်ထံဖိကီၢ်ဖိကမျၢၢ် [လၢအအိၣ်ဖဲ ကီၢ်ပယီၢ်မုၢ်ထီၣ်ကလံၤထံး] တဖၣ်ဘၣ်ကွၢ်ဆၢၣ်မဲာ်ဒီး SAC အတၢ်မၤပယွဲသ့ၣ်တဖၣ်ဒ်အမ့ၢ်တၢ်ခးလီၤကျိဖးဒိၣ်, ကဘီယူၤဟဲ ခးလီၤတၢ်, ဟီၣ်လာ်မ့ၣ်ပိၢ်တၢ်ကဲထီၣ်သး, တၢ်မၤဆါမၤပယွဲ, ဒီးတၢ်ဖီၣ်ဒုးဃာ်န့ၢ်ဆူၣ်သ့ၣ်တဖၣ်န့ၣ်လီၤ. လၢန့ၣ်အမဲာ်ညါခီဖျိ SAC သ့ၣ်တဖၣ်အတၢ်ဒိၣ်စိဒီးဖီၣ်န့ၢ်ဆူၣ်မၤဆါမၤပယွဲထံဖိကီၢ်ဖိကမျၢၢ်သ့ၣ်တဖၣ်ဒီးတၢ်ပၢၢ်ဆၢသုး [သုးကရူၢ်လၢအထီဒါပ ယီၤသုး] သ့ၣ်တဖၣ်စ့ၢ်ကီးဟူးဂဲၤဝဲဒၣ်အဃိထံဖိကီၢ်ဖိကမျၢၢ်သ့ၣ်တဖၣ်ဘၣ်ကွၢ်ဆၢၣ်မဲာ်ဒီးတၢ်ဘၣ်ဒိဘၣ်ထံးတၢ်သံတၢ်ပှၢ်သ့ၣ် တဖၣ်န့ၣ်လီၤ.

မ့ၢ်ၦၤလၢအတူၢ်ဘၣ်တၢ်တဖၣ် ဟ့ၣ်ၦၤတၢ်ခွဲးတၢ်ယာ်လၢပကသူတၢ်ဂ့ၢ်တၢ်ကျိၤတခါအံၤဧါ, ဟ့ၣ်ၦၤတၢ်ခွဲးတၢ်ယာ်လၢ ပကသူ တၢ်ဂ့ၢ်အံၤလၢကျဲဒ်လဲၣ်.

ပှၤတူၢ်ဘၣ်တၢ်အဟံၣ်ဖိဃီဖိ [အမိၢ်] ဟ့ၣ် KHRG အခွဲးလၢကထုးထီၣ်ရၤလီၤဝဲတၢ်ဂ့ၢ်တၢ်ကျိၤအံၤန့ၣ်လီၤ.