SAC ခးလီၤကျိဖးဒိၣ်, ဖီၣ်ဒုးဃာ်တၢ်လၢတဖိးသဲစး, မးဆါယွဲတၢ်ဖဲပရှီလိာ်ကရူၢ်, ဒီၣ်ဖါခိၣ်ကီၢ်ဆၣ်

• လါယနူၤအါရံၤ ၁၅ သီ, ၂၀၂၅ နံၣ်အနံၤ, SAC ခးလီၤကျိဖးဒိၣ်ဒီးဘၣ်သံဝဲသဝီဖိတဂၤဖဲအ---သဝီ, ပရှီလိာ်ကရူၢ်

ဖဲလါယနူၤအါရံၤ ၁၃ သီ, ဒီး ၁၄ သီ, ၂၀၂၅ နံၣ်အနံၤန့ၣ်ထံကီၢ်တၢ်ပၢတၢ်ပြးကီၣ်ကးကရၢ (SAC) သုးဖိအါန့ၢ် (၈၀) ဂၤဃၣ်ဃၣ်လၢတၢ်တသ့ၣ်ညါအသုးရ့ၣ်သ့ၣ်တဖၣ်ဟဲအိၣ်ဆိးဝဲတစိၢ်တလီၢ်ဖဲသီခါဖၠၢ် လၢအအိၣ်ဖဲအ---သဝီ, ပရှီလိာ်ကရူၢ်, ဒီၣ်ဖါခိၣ်ကီၢ်ဆၣ်, တီအူကီၢ်ရ့ၣ်န့ၣ်လီၤ.

ဖဲလါယနူၤအါရံၤ ၁၅ သီ, ၂၀၂၅ နံၣ်အနံၤ, ဂီၤခီ ၉း၄၅ အဆၢကတီၢ်, လီၢ်ကဝီၤသုးဖီၣ်စုကဝဲကရူၢ်ပာ်ဖှိၣ်ထီၣ်အသးဒီးကညီ ဒီကလုာ်တၢ်ထူၣ်ဖျဲးသုးမုၢ်ဒိၣ် (KNLA) ဒီးတၢ်ဒီသဒၢကမျၢၢ်သုး (PDF) လၢအိၣ်ဖဲ KNLA သုးရ့ၣ် (နီၣ်ဂံၢ်-၅) ဒီးအိၣ်ဖဲ တီအူကီၢ်ရ့ၣ်, လဲၤထီၣ်ဒုးဝဲ SAC သုးဖိလၢအအိၣ်ဖဲသီခါဖၠၣ်ဖဲသဝီပူၤဒီး သူဝဲစုကွံာ်မ့ၣ်ပိၢ်လၢအကလုၢ်သီၣ်ဆံးန့ၣ်လီၤ. လီၢ်က ဝီၤသုးဖီၣ်စုကဝဲကရူၢ်သ့ၣ်တဖၣ်နုာ်လီၤဝဲလၢသဝီပူၤဒီးခးဝဲ SAC သုးဖိဖဲသဝီပူၤန့ၣ်လီၤ. ဝံၤအလီၢ်ခံ SAC သုးဖိခးလီၤဝဲကျိ ဖးဒိၣ် (၄) ဖျၢၣ်ဆူသဝီပူၤဒီးသဝီကပိာ်ကပၤန့ၣ်လီၤ. တၢ်တသ့ၣ်ညါကျိဖးဒိၣ်အကလုာ်လၢ SAC ခးလီၤဝဲတဖၣ်ဘၣ်န့ၣ်လီၤ. ကျိဖးဒိၣ် (၂) ဖျၢၣ်လီၤတဲာ်ဖဲသဝီကျဲဖီခိၣ်ဒီးဘၣ်ဟးဂီၤဝဲလီမ့ၣ်အူပျံၤလၢအအိၣ်ဖဲကျဲကပၤန့ၣ်လီၤ.

ကျိဖးဒိၣ်အဂၤ (၂) ဖျၢၣ်လီၤတဲာ်ပိၢ်ဖးထီၣ်ဝဲဖဲသဝီချၢဖဲရီဘၢၣ်ကျီးပူၤန့ၣ်လီၤ. ကျိဖးဒိၣ်အက့ဘၣ်ဝဲသဝီဖိတဂၤအခိၣ်သၣ်ဃံ ဖဲအဝဲမံနီၤလၢတၢ်ပျီပူၤဖဲရီဘၢၣ်ကျီးပူၤဒ်သိးကဒီသဒၢအသးလၢကျိဖးဒိၣ်အဂီၢ်အဆၢကတီၢ်န့ၣ်လီၤ. အဝဲသံဝဲဖဲတၢ်ပျီပူၤန့ၣ် လီၤ. သဝီဖိလၢအသံတဂၤအံၤအမံၤမ့ၢ်ဝဲဃ---, အသးနံၣ်အိၣ် (၃၀) နံၣ် ဒီးအိၣ်ဝဲဖဲအ--- သဝီန့ၣ်လီၤ. အဝဲအကလုာ်န့ၣ်မ့ၢ်ဝဲ ကညီဒီးမ့ၢ်စ့ၢ်ကီးပယီၤကလုာ် (ကးပြါ) န့ၣ်လီၤ. အဝဲမ့ၢ်ပၢ်တဂၤလၢအိၣ်ဒီးဖိ (၃) ဂၤန့ၣ်လီၤ. ဆၢကတီၢ်ခဲအံၤအဖိ (၃) ဂၤအံၤဘၣ်အိၣ်လီၤတဲာ်တ့ၢ်က့ၤဒီးအမိၢ်ဖဲ အ--- သဝီပူၤန့ၣ်လီၤ. သဝီဖိသ့ၣ်တဖၣ်စံးဝဲလၢအဖိ (၃) ဂၤအံၤဒီးအမိၢ်န့ၣ်ဘၣ်ဂုာ် ကျဲးစၢးမၤတၢ်သပှၢ်ပှၢ်ဒ်သိးကဒိးန့ၢ်ဘၣ်တၢ်ဟဲနုာ်လၢတၢ်လုၢ်အီၣ်လီၤနီၢ်ကစၢ်သး ဒ်ဃ---လၢအမ့ၢ်တ့ၢ်ပၢ်တဂၤလၢအကျဲးစၢးဃု ကျိၣ်ဃုစ့လၢဟံၣ်ဖိဃီဖိအဂီၢ်အသိးန့ၣ်လီၤ. တချုးလၢအသံန့ၣ်အဝဲမၤတ့ၢ်တၢ်လၢရီဘၢၣ်ကျီးန့ၣ်လီၤ.

ဖဲတၢ်ခးလီၤကျိဖးဒိၣ်ဒီးတၢ်ဒုးဝံၤအလီၢ်ခံ SAC သုးဖိသ့ၣ်တဖၣ်ဖီၣ်န့ၢ်ဝဲသဝီဖိ (၃) ဂၤဖဲ အ---သဝီပူၤန့ၣ်လီၤ. ဖဲန့ၣ်အဝဲသ့ၣ် သံဒိးသံကွၢ်ဒီးသမံသမိးဝဲသဝီဖိသ့ၣ်တဖၣ်အံၤန့ၣ်လီၤ. ဖဲအဝဲသ့ၣ်သမံသမိးဝဲဝံၤဒီးပျၢ်လီၤက့ၤဝဲန့ၣ်လီၤ. တချုးပျၢ်လီၤဝဲသဝီ ဖိသ့ၣ်တဖၣ်အံၤဒံးဘၣ်န့ၣ်အဝဲသ့ၣ်မၤပျံၤမၤဖုးဝဲန့ၣ်လီၤ. လီၢ်ကဝီၤသဝီဖိတဂၤပာ်ဖျါထီၣ်ဝဲဆူ KHRG လၢ “SAC သုးဖိတဲပှၤ လၢ ‘ဖဲပအိၣ်လၢသဝီပူၤအဆၢကတီၢ် လီၢ်ကဝီၤသုးဖီၣ်စုကဝဲၤကရူၢ်သ့ၣ်တဖၣ်တကြၢးခးပှၤဘၣ်. အဝဲသ့ၣ်မ့ၢ်အဲၣ်ဒိးခးပှၤ န့ၣ်ကဘၣ်လဲၤလၢသဝီချၢဒီးခးပှၤ. အဝဲသ့ၣ်ခးပှၤဖဲပအိၣ်လၢသဝီပူၤ. ပမ့ၢ်ခးဆၢက့ၤအဝဲသ့ၣ်န့ၣ်ကဘၣ်ဆါဒူသဝီဖိ. အဝဲ သ့ၣ်မ့ၢ်ခးပှၤအသီတဘျီဖဲသဝီပူၤန့ၣ် ပကဒွဲၣ်အူထီၣ်ကွံာ်သဝီဖိအဟံၣ်အဃီလီၤ. ”

ဖဲလါယနူၤအါရံၤ ၁၅ သီ, ၂၀၂၅ နံၣ်အနံၤတၢ်ကဲထီၣ်သးဝံၤအလီၢ်ခံသဝီဖိအါမးလဲၤဃ့ၢ်အိၣ်ကဒုက့ၤဝဲလၢပှၢ်ပူၤ လၢသဝီချၢ ဒီးလၢအဝဲသ့ၣ်အတၢ်ဖံးအီၣ်မၤအီၣ်အလီၢ်န့ၣ်လီၤ. ဖဲလါယနူၤအါရံၤ ၁၆ သီ, ၂၀၂၅ နံၣ်အနံၤ, ဟါလီၤခီအဆၢကတီၢ်သဝီဖိ လၢအနီၢ်ဒိၣ်ထီၣ်တနီၤဟဲက့ၤဆူအသဝီဒီး ကွၢ်ဝဲတၢ်အိၣ်သးအိၣ်ဒ်လဲၣ် ဘၣ်ဆၣ်သဝီဖိလၢအိၣ်ဒီးအဖိသ့ၣ်တဖၣ်ဘၣ်အိၣ်ဒံး လၢ အဝဲသ့ၣ်အတၢ်ဖံးအီၣ်မၤအီၣ်အလီၢ် န့ၣ်လီၤ.

• လါဖ့ၤဘြူၤအါရံၤ ၁၄ သီ, ၂၀၂၅ နံၣ်အနံၤ, SAC ဖီၣ်ဒုးဃာ်ဒီးတီၢ်ဝဲသဝီဖိတဂၤလၢအတဖိးသဲစးဖဲဘ---သဝီ, ပရှီလိာ်ကရူၢ် ဖဲတၢ်ဒုးဝံၤအလီၢ်ခံန့ၣ်လီၤ.

ဖဲလါဖ့ၤဘြူၤအါရံၤ ၁၂ သီ, ၂၀၂၅ နံၣ်အနံၤ SAC သုးဖိကအိၣ်လၢ (၁၀၀) ဂၤဃၣ်ဃၣ်လၢအအိၣ်ဖဲတီအူ (တောင်ငူ) ဝ့ၢ်သ့ၣ် တဖၣ်ဟဲခီဃီၤဝဲကျဲလၢအအိၣ်ဖဲတီအူဝ့ၢ်ဒီးတၣ်ပူၣ် (လိပ်သို) ဝ့ၢ်အဘၢၣ်စၢၤဖဲဒီၣ်ဖါခိၣ်ကီၢ်ဆၣ်န့ၣ်လီၤ. အဝဲသ့ၣ်ဖီၣ်ဝဲသဝီဖိ (၃) ဂၤဖဲအဝဲသ့ၣ်လဲၤတၢ်ဖဲ စယၣ်ကၠံ(ဇရပ်ကြီး)ဟီၣ်ကဝီၤအဆၢကတီၢ်န့ၣ်လီၤ. သဝီဖိ (၃) ဂၤအံၤအိၣ်ဟဲဖဲစယၣ်ကၠံ (ဇရပ်ကြီး)ဟီၣ်ကဝီၤ, ထီတထူၣ်ကီၢ်ဆၣ်, တီအူကီၢ်ရ့ၣ်န့ၣ်လီၤ. သဝီဖိ (၃) ဂၤအံၤမ့ၢ်ဝဲပိာ်ခွါဒီးမ့ၢ်ဝဲပအိၣ်ကလုာ်န့ၣ်လီၤ. ပှၤလၢတၢ်ဖီၣ်န့ၢ်အီၤအကျါတဂၤပာ်ဖျါထီၣ်ဝဲဆူ KHRG အအိၣ်လၢ SAC က့ၤကိးဝဲသဝီဖိသ့ၣ်တဖၣ်အံၤဖဲအဝဲသ့ၣ်က့ၤဝဲကျဲ လၢအအိၣ်ဖဲတီအူဝ့ၢ်ဒီးတၣ်ပူၣ် (လိပ်သို) ဝ့ၣ်အဘၢၣ်စၢၤန့ၣ်လီၤ. ဝံၤအလီၢ်ခံတသီ, သဝီဖိ (၃) ဂၤအံၤဃ့ၢ်ပူၤဖျဲးအသးပၣ် ဃုာ်ဒီး SAC သုးဖိတဂၤန့ၣ်လီၤ. SAC သုးဖိလၢဃ့ၢ်ဖျိးတဂၤအံၤမၤစၢၤဝဲသဝီဖိ (၃) ဂၤအံၤလၢကဃ့ၢ်ပူၤဖျဲးသးအဂီၢ်န့ၣ်လီၤ. SAC သုးဖိလၢအဃ့ၢ်ဖျိးတဂၤအံၤစိာ်ဃုာ်စ့ၢ်ကီးဒီးအကျိ ဖဲအဝဲဃ့ၢ်ပူၤဖျဲးအသးအဆၢကတီၢ်န့ၣ်လီၤ.

သဝီဖိလၢအဃ့ၢ်ပူၤဖျဲးအသး (၃) ဂၤန့ၣ်လဲၤဃ့ၢ်ဝဲဆူတၢ်ဒီသဒၢကမျၢၢ်သုး (PDF) သုးဖိလၢအအိၣ်ဆီလီၤအသးဖဲကါနံၣ် (ကမ်းနီ) ဟီၣ်ကဝီၤ, ဖဲဒီၣ်ဖါခိၣ်ကီၢ်ဆၣ်လၢအအိၣ်ဖဲ KNLA သုးရ့ၣ် (နီၣ်ဂံၢ်-၅), သုးက့ (နီၣ်ဂံၢ်-၂) တၢ်ပၢအဖီလာ်, တီအူ ကီၢ်ရ့ၣ်လၢကးဒိးန့ၢ်ဘၣ်ဝဲတၢ်ဒီသဒၢသးအဂီၢ်န့ၣ်လီၤ. သဝီဖိသ့ၣ်တဖၣ်အံၤဆဲးကျိးဒီးအမိၢ်အပၢ်န့ၢ်အဃိ သုးဖိလၢအအိၣ်ဖဲ ကါနံၣ် (ကမ်းနီ)တၢ်လီၢ်သ့ၣ်တဖၣ်ဆှၢက့ၤအဝဲသ့ၣ်ဆူအမိၢ်အပၢ်အိၣ်န့ၣ်လီၤ. ဖဲပှၤမၤစၢၤဝဲသဝီဖိ (၃) ဂၤအံၤဝံၤအလီၢ်ခံတၢ် တသ့ၣ်ညါဘၣ်လၢတၢ်မနုၤကဲထီၣ်အသးဒီး SAC သုးဖိလၢအဃ့ၢ်ပူၤဖျဲးအသးတဂၤန့ၣ်ဘၣ်န့ၣ်လီၤ. သုးဖိလၢအဃ့ၢ်ပူၤဖျဲးအ သးအကျါတဂၤစံးဘၣ်ဝဲ KHRG ဒ်အံၤ “SAC သုးဖိလၢအဃ့ၢ်ပူၤဖျဲးအသးတဂၤအံၤတဟဲဟ့ၣ်လီၤအသးလၢလီၢ်ကဝီၤသုး ဖီၣ်စုကဝဲၤအအိၣ်နီတဖုဘၣ်. ဖဲအဝဲဃ့ၢ်ပူၤဖျဲးအသးဝံၤအလီၢ်ခံပတသ့ၣ်ညါလၢအဝဲလဲၤဃ့ၢ်ဆူတၢ်လီၢ်ဖဲလဲၣ်ဘၣ်န့ၣ်လီၤ.”

ဖဲလါဖ့ၤဘြူၤအါရံၤ ၁၃ သီ, ၂၀၂၅ နံၣ်အနံၤ, ဂီၤခီ ၇း၃၀ အဆၢကတီၢ်, SAC သုးဖိ (၁၀၀) ဂၤဃၣ်ဃၣ်ဟဲတုၤဝဲဖဲကျဲလၢ အအိၣ်ဘူးဒီးလ့ဒူခၠီထံကျိလၢအဘူးဒီး စ--- သဝီ, ပရှီလိာ်ကရူၢ်န့ၣ်လီၤ. ဝံၤဒီးကါနံၣ် (ကမ်းနီ) တၢ်ဒီသဒၢသုးဖိခးအဝဲသ့ၣ် ဒီးတၢ်ဒုးကဲထီၣ်ဝဲန့ၣ်လီၤ. ဒ်ကညီဒီကလုာ်စၢဖှိၣ်ကရၢ (KNU) လီၢ်ကဝီၤခိၣ်နၢ်သ့ၣ်တဖၣ်ဒီးသဝီဖိလၢအအိၣ်ဖဲစ---သ့ၣ်တ ဖၣ်ပာ်ဖျါထီၣ်ဝဲအသိး, SAC သုးဖိ (၃) ဂၤသံဖဲတၢ်ဒုးကဲထီၣ်သးအဆၢကတီၢ်န့ၣ်လီၤ. မ့မ့ၢ် (ကမ်းနီ) သုးဖိသ့ၣ်တဖၣ်တ သံနီတဂၤဘၣ်န့ၣ်လီၤ. တၢ်ဒုးအံၤကဲထီၣ်အသးယံာ်န့ၢ်ဒံး (၁၀) မံးနံးန့ၣ်လီၤ. ဖဲတၢ်ဒုးကဲထီၣ်အဆၢကတီၢ်သဝီဖိတသံဒီး ဘၣ်ဒိနီတဂၤဘၣ်န့ၣ်လီၤ. သဝီဖိအတၢ်စုလီၢ်ခီၣ်ခိသ့ၣ်တဖၣ်စ့ၢ်ကီးတဘၣ်ဒိဟးဂီၤနီတမံၤဘၣ်န့ၣ်လီၤ.

ဖဲလါဖ့ၤဘြူၤအါရံၤ ၁၄ သီ, ၂၀၂၅ နံၣ်အနံၤန့ၣ်, SAC သုးဖိသ့ၣ်တဖၣ်လဲၤဝဲဆူ ဘ---သဝီ, ပရှီလိာ်ကရူၢ်ဒီးခးဝဲလီၢ်ကဝီၤ PDF ဒီး KNLA သုးဖိသ့ၣ်တဖၣ်လၢအအိၣ်ဖဲ KNLA သုးရ့ၣ် (နီၣ်ဂံၢ်-၅) တၢ်ပၢအဖီလာ်န့ၣ်လီၤ. တၢ်ဒုးအံၤကဲထီၣ်အသးဖဲဘ---သဝီဃၢၤန့ၣ်လီၤ. သဝီဖိလၢအအိၣ်ဖဲဘ---သဝီတဂၤပာ်ဖျါထီၣ်ဝဲလၢတၢ်ခးလိာ်သးတဘျီအံၤ PDF ဒီး KNLA သုးဖိသ့ၣ် တဖၣ်တသံနီတဂၤဘၣ်န့ၣ်လီၤ.

ဖဲ SAC သုးဖိသ့ၣ်တဖၣ်ခးဝဲ PDF ဒီး KNLA သုးဖိသ့ၣ်တဖၣ်အဆၢကတီၢ်န့ၣ်သဝီဖိ (၃) ဂၤမၤတၢ်ဖဲသယီကျီးလၢအဘူး ဒီးတၢ်ကဲထီၣ်သးအလီၢ်န့ၣ်လီၤ. ဖဲတၢ်ဒုးကဲထီၣ်သးဝံၤအလီၢ်ခံတနံၤန့ၣ် SAC ဖီၣ်န့ၢ်ဝဲသဝီဖိ (၃) ဂၤအံၤဒီး ဖီၣ်ဃာ်ဝဲဖဲဘ---သဝီပူၤန့ၣ်လီၤ. လီၢ်ကဝီၤသဝီဖိပာ်ဖျါထီၣ်ဝဲလၢ SAC ဆိကမိၣ်ဝဲလၢသဝီဖိသ့ၣ်တဖၣ်အံၤမၤသကိးတၢ်ဒီးလီၢ်ကဝီၤသုး ဖီၣ်စုကဝဲၤခီဖျိအဝဲသ့ၣ်ထံၣ်ဝဲသဝီဖိ (၃) ဂၤအံၤဖဲတၢ်လီၢ်လၢအဘူးဒီးတၢ်ဒုးကဲထီၣ်အလီၢ်န့ၣ်လီၤ. သဝီဖိ (၃) ဂၤအံၤအိၣ် ဆိးဝဲဖဲဒ---သဝီ, ပရှီလိာ်ကရူၢ်န့ၣ်လီၤ. သဝီဖိအကျါခံဂၤန့ၣ်မ့ၢ်ဝဲဖိသၣ်ပိာ်ခွါ (၁၂) နံၣ်ဒီးမ့မ့ၢ်အဝဲတဂၤန့ၣ်မ့ၢ်ဝဲပိာ်ခွါ (၃၀) နံၣ်တဂၤန့ၣ်လီၤ. ဒ်သဝီဖိအကျါ (၂) ဂၤမ့ၢ်ဝဲဖိသၣ်အသိး, သီခါတပါလၢအအိၣ်ဖဲ ဒ---သဝီအံၤလဲၤထံၣ်လိာ်ဒီး SAC သုးဖိ ဒီးဃ့ထီၣ်ဝဲလၢတၢ်ကပျၢ်လီၤက့ၤအီၤန့ၣ်လီၤ. SAC အၢၣ်လီၤအီၤဒီးပျၢ်လီၤက့ၤဝဲဖိသၣ်ခံဂၤအံၤန့ၣ်လီၤ. သီခါအံၤတသ့ၣ် ညါဝဲသဝီဖိလၢအသးနံၣ်အိၣ် (၃၀) တဂၤအံၤဘၣ်အဃိ, အဝဲဃ့ထီၣ်ဝဲထဲဖိသၣ်ခံဂၤအံၤလၢ SAC ကပျၢ်လီၤက့ၤအီၤန့ၣ်လီ. လၢတၢ်န့ၣ်အဃိသဝီဖိလၢအသးနံၣ်အိၣ်ဝဲ (၃၀) တဂၤအံၤတၢ်တပျၢ်လီၤအီၤဘၣ်န့ၣ်လီၤ.

သဝီဖိလၢအသးနံၣ်အိၣ် (၃၀) တဂၤအံၤအမံၤမ့ၢ်ဝဲ စီၤဂ---, ဒီးအဝဲမ့ၢ်ကညီကလုာ်န့ၣ်လီၤ. အဝဲမ့ၢ်ပှၤသဘျ့တဂၤန့ၣ်လီၤ. အဝဲမ့ၢ်ဒၣ်သဝီဖိတဂၤလၢအံးထွဲကွၢ်ထွဲဝဲအမိၢ်လၢအိၣ်မုၣ်ကမဲတဂၤန့ၣ်လီၤ. ဖဲအဝဲဖံးတၢ်မၤတၢ်လၢကျီးပူၤအဆၢကတီၢ် ဒိးဝဲဒီးသုးခီၣ်ဖံးဖျီၣ်ခီဖျိအဝဲလိၣ်ဘၣ်ဝဲလၢတၢ်ဖံးတၢ်မၤအပူၤန့ၣ်လီၤ. သဝီဖိသ့ၣ်တဖၣ်နာ်ဝဲလၢ SAC သုးဖိသ့ၣ်တဖၣ် ပာ်ကမၣ်အီၤလၢအမ့ၢ်လီၢ်ကဝီၤသုးဖီၣ်စုကဝဲၤကရူၢ်အပှၤ ခီဖျိအဝဲဒိးဝဲသုးခီၣ်ဖံးဖျီၣ်န့ၣ်လီၤ. သီခါတပါလၢအဃ့ထီၣ်ဝဲ SAC လၢကပျၢ်လီၤက့ၤဖိသၣ်အံၤပာ်ဖျါထီၣ်ဝဲဆူ KHRG အအိၣ်လၢဖိသၣ်လၢတၢ်ဖီၣ်န့ၢ်အီၤအကျါတဂၤထံၣ်ဝဲလၢ SAC တီၢ်ဝဲ စီၤဂ--- ဖဲအဝဲသ့ၣ်ဖီၣ်န့ၢ်ဝဲအဆၢကတီၢ်န့ၣ်လီၤ. လီၢ်ကဝီၤသဝီဖိသ့ၣ်တဖၣ်ပာ်ဖျါထီၣ်ဝဲလၢအဝဲသ့ၣ်နာ်ဝဲလၢ SAC သုးဖိသ့ၣ်တဖၣ် မၤသံကွံာ်ဝဲစီၤဂ--- ဖဲအဝဲသ့ၣ်က့ၤကိးထီၣ်ဝဲလၢဘ---သဝီ ဖဲလါဖ့ၤဘြူၤအါရံၤ ၂၀၂၅ နံၣ် ခီဖျိလၢ စီၤဂ---အံၤ တဟဲက့ၤလၢ သဝီပူၤ နီတဘျီလၢၤဘၣ်ဒီး ပှၤတနၢ်ဟူစ့ၢ်ကီးအဂ့ၢ်အကျိၤနီတမံၤဘၣ်န့ၣ်လီၤ.

အါန့ၢ်အန့ၣ် SAC သုးဖိသ့ၣ်တဖၣ်လဲၤဝဲဆူသဝီဖိသ့ၣ်တဖၣ်အအိၣ်ဒီးမၤပျံၤမၤဖုးဝဲလၢတၢ်ဒုးမ့ၢ်ကဲထီၣ်အသီတဘျီန့ၣ်အ ဝဲသ့ၣ်ကဒွဲၣ်အူထီၣ်ကွံာ်ဝဲဘ---သဝီန့ၣ်လီၤ. SAC သုးဖိသ့ၣ်တဖၣ်အံၤတၢ်တသ့ၣ်ညါဝဲအသုးရ့ၣ်အမံၤဒီးမ့ၢ်အအိၣ်ဟဲဖဲ သုးရ့ၣ်ဖဲလဲၣ်ဘၣ်န့ၣ်လီၤ.

• လါဖ့ၤဘြူၤအါရံၤ ၁ သီ, ဒီး ၂၀ သီ, ၂၀၂၅ နံၣ်, SAC ခးလီၤကျိဖးဒိၣ်ဒီးဘၣ်ဒိဝဲသဝီဖိ (၄) ဂၤဖဲဆ---သဝီ

ဖဲလါဖ့ၤဘြူၤအါရံၤ ၁ သီ, တုၤ ၁၉ သီ, ၂၀၂၅ နံၣ်အနံၤအတီၢ်ပူၤ SAC သုးလၢအအိၣ်ဖဲ (၇) မိုင် သုးကလၢၤဒီး (၁၃) မိုင် သုးကလၢၤသ့ၣ်တဖၣ်ခးလီၤဝဲကျိဖးဒိၣ် (၆၀ မမ) အဘျီအါမးဆူပရှီလိာ်ကရူၢ်, ဒီၣ်ဖါခိၣ်ကီၢ်ဆၣ်, တီအူကီၢ်ရ့ၣ်န့ၣ်လီၤ. (၇) မိုင်ဒီး(၁၃) မိုင်သုးကလၢၤအံၤအိၣ်သူၣ်လီၤအသးဘူးဒီးသၣ်တီၣ်ကၠံ (သံတောင်ကြီး) ဝ့ၢ်, ဒီၣ်ဖါခိၣ်ကီၢ်ဆၣ်န့ၣ်လီၤ.

ကျိဖးဒိၣ်အကျါ (၁) ဖျၢၣ်လီၤတဲာ်ပိာ်ဖးထီၣ်ဖဲဆ---သဝီ, ပရှီလိာ်ကရူၢ်ဒီးဘၣ်ဒိဝဲသဝီဖိ (၂) ဂၤဒီးကျိဖးဒိၣ်အံၤလီၤတဲာ်ပိၢ်ဖး ထီၣ်ဖဲလါဖ့ၤဘြူၤအါရံၤ ၁ သီ, ဒီး ၁၉ သီ, ၂၀၂၅ နံၣ်အနံၤအဘၢၣ်စၢၤဘၣ်ဆၣ်တၢ်တသ့ၣ်ညါလီၤတံၢ်မုၢ်နံၤမုၢ်သီဘၣ်န့ၣ်လီၤ. ဆ---သဝီဒီးအ---သဝီလၢ SAC သုးခးလိာ်သးဒီး PDF ဒီး KNLA သုးဖဲလါယနူၤအါရံၤ ၁၅ သီ, ၂၀၂၅ နံၣ်အနံၤအံၤတၢ်ဒ့ၣ်စၢၤ အိၣ်ဒၣ်ထဲသိလ့ၣ်ယီၣ် ၁၀ မံးနံးန့ၣ်လီၤ. ပှၤလၢအဘၣ်ဒိ (၂) ဂၤအံၤမ့ၢ်ဝဲပှၤဒီဖိပၢ်န့ၣ်လီၤ. အဖိခွါတဂၤအံၤသးနံၣ်အိၣ်ဝဲ (၅) နံၣ်ဒီးအကိာ်ဘိဘၣ်ဒိဝဲဒီးကျိဖးဒိၣ်အက့န့ၣ်လီၤ. မ့မ့ၢ်အပၢ်တဂၤတၢ်တသ့ၣ်ညါဝဲလၢမ့ၢ်အဘၣ်ဒိဆံးအါလဲၣ်ဘၣ်န့ၣ်လီၤ. အဝဲ သ့ၣ်အဟံၣ်ဘၣ်ဟးဂီၤစ့ၢ်ကီးလၢကျိဖးဒိၣ်န့ၣ်လီၤ. သဝီဖိလၢအဘၣ်ဒိ (၂) ဂၤအံၤအိၣ်ဝဲဖဲအဟံၣ်ဖဲကျိဖးဒိၣ်ဟဲလီၤတဲာ်လၢ သဝီပူၤအဆၢကတီၢ်န့ၣ်လီၤ.

ဖဲလါဖ့ၤဘြူၤအါရံၤ ၁၉ သီ, ၂၀၂၅ နံၣ်အနံၤန့ၣ်, SAC တြီတံာ်ဃာ်ကျဲဖဲတီအူ (တောင်ငူ)ဒီးသၤတီၤကၠံ (သံတောင်ကြီး) ဝ့ၢ်အဘၢၣ်စၢၤလၢတၢ်တသ့ၣ်ညါအဂ့ၢ်အကျိၤနီတမံၤဘၣ်န့ၣ်လီၤ. သိလ့ၣ် (မီၤတီၤကါ) ဒီးသိလ့ၣ်ယီၣ်သ့ၣ်တဖၣ် တၢ်တဟ့ၣ် အခွဲးလၢက လ့ၢ်ထီၣ်လ့ၢ်လိၤဖဲကျဲအဝဲန့ၣ်ဘၣ်န့ၣ်လီၤ. SAC အိးထီၣ်က့ၤကျဲအံၤဖဲလါဖ့ၤဘြူၤအါရံၤ ၂၀ သီ, ၂၀၂၅ နံၣ်အနံၤ န့ၣ်လီၤ.

ဖဲလါဖ့ၤဘြူၤအါရံၤ ၁၉ သီ, ၂၀၂၅ နံၣ်အနံၤ, KNLA ဒီး PDF သုးဖိလၢအအိၣ်ဖဲ သုးက့ (နီၣ်ဂံၢ်-၂) သ့ၣ်တဖၣ်လဲခးဝဲ SAC လၢတၢ်တသ့ၣ်ညါအသုးရ့ၣ်ဘၣ်တဖုဒီးသူဝဲချံးမ့ၣ်ပိၢ်ဖဲ SAC သုးဖိသ့ၣ်တဖၣ်ဟဲက့ၤဝဲဆူအသုးကလၢၤလၢအအိၣ်သူၣ်လီၤ အသးဖဲဧ---သဝီန့ၣ်လီၤ. တၢ်ဒုးအံၤကဲထီၣ်အသးဖဲကျဲမုၢ်ခိၣ်လၢအအိၣ်ဖဲဟ---သဝီဒီးဧ---သဝီအဘၢၣ်စၢၤဒီးသဝီခံဖျၢၣ်အံၤ အိၣ်ဖဲပရှီလိာ်ကရူၢ်ပူၤန့ၣ်လီၤ. လၢတၢ်န့ၣ်အဃိတၢ်ဒုးကဲထီၣ်ဝဲန့ၣ်လီၤ. တၢ်ဒုးအံၤကဲထီၣ်သးယံၤ တၢ်ဆၢကတီၢ်အါန့ၢ် ၁၀ မံးနံးန့ၣ်လီၤ. SAC သုးရ့ၣ်အံၤအိၣ်သူဆီလီၤအသးဖဲ ဧ---သဝီ, ပရှီလိာ်ကရူၢ်န့ၣ်လီၤ. ဒ်လီၢ်ကဝီၤသဝီဖိတဂၤပာ်ဖျါထီၣ်ဝဲ အသိး, ဖဲတၢ်ဒုးကဲထီၣ်အဆၢကတီၢ်န့ၣ်သဝီဖိတဘၣ်ဒိဘၣ်ထံးနီတဂၤဘၣ်, သဝီဖိဟံၣ်ဃီတၢ်စုလီၢ်ခီၣ်ခိသ့ၣ်တဖၣ်တဘၣ် ဟးဂီၤနီတမံၤဘၣ်န့ၣ်လီၤ.

ဖဲလါဖ့ၤဘြူၤအါရံၤ ၁၉ သီ, ၂၀၂၅ နံၣ်အနံၤန့ၣ်, SAC သုးဖိလၢအအိၣ်ဖဲဘယ့ၣ်နီၤ(ဘုရင့်နောင်) သုးကလၢၤလၢအအိၣ် ဖဲ(သံတောင်ကြီး) ဝ့ၢ်သ့ၣ်တဖၣ်ခးလီၤဝဲကျိဖးဒိၣ် (၁၂၀ မမ) တဖျၢၣ်န့ၣ်လီၤ. လၢခံတနံၤဖဲလါဖ့ၤဘြူၤအါရံၤ ၂၀ သီ, ၂၀၂၅ နံၣ်အနံၤဂီၤခီအဆၢကတီၢ်အဝဲသ့ၣ်ခးလီၤကဒီးကျိဖးဒိၣ် (၁၂၀ မမ) တဖျၢၣ်န့ၣ်လီၤ. ဖဲလါဖ့ၤဘြူၤအါရံၤ ၂၀ သီ, ၂၀၂၅ နံၣ်အ နံၤ, စးထီၣ်လၢဟါလီၤခီ ၉း၁၃ ဒီးတုၤလၢ ၉း၁၆ အဆၢကတီၢ်အဝဲသ့ၣ်ခးလီၤဝဲကျိဖးဒိၣ် (၁၂၀ မမ) (၆) ဖျၢၣ်န့ၣ်လီၤ. ဒ်လီၢ်ကဝီၤသဝီဖိတဂၤစံးဝဲ“SAC သုးဖိလၢအအိၣ်ဖဲဘယ့ၣ်နီၤ (ဘုရင့်နောင် သုးကလၢၤသ့ၣ်တဖၣ်ခးလီၤကျိဖဒိၣ်. ယနၢ်ဟူ ကျိဖးဒိၣ်အကလုၢ်ဖဲအဝဲသ့ၣ်ခးလီၤဝဲအဆၢကတီၢ်ဘၣ်ဆၣ်ယတနၢ်ဟူအကလုၢ်ဖဲအလီၢ်တဲာ်ပိၢ်ဖးထီၣ်အဆၢကတီၢ်ဘၣ်. ဝံၤ ယကိးသဝီဖိတဂၤလၢအအိၣ်ဖဲပရှီလိာ်ကရူၢ်အံၤလၢလီတဲစိလီၤ. အဝဲတဲဘၣ်ယၤလၢကျိဖးဒိၣ်လီၤတဲာ်ပိၢ်ဖးထီၣ်ဖဲပရှီလိာ် ကရူၢ်ပူၤလီၤ.” ကျိဖးဒိၣ် (၇) ဖျၢၣ်အံၤလီၤတဲာ်ပိၢ်ဖးထီၣ်ဖဲပရှီလိာ်ကရူၢ်ပူၤန့ၣ်လီၤ. တၢ်တသ့ၣ်ညါဝဲလၢမ့ၢ်ကမျၢၢ်တၢ်စုလီၢ် ခီၣ်ခိၣ်သ့ၣ်တဖၣ်ဘၣ်ဟးဂီၤဝဲလၢကျိဖးဒိၣ်ဘၣ်န့ၣ်လီၤ.

ဖဲလါဖ့ၤဘြူၤအါရံၤ ၂၀ သီ, ၂၀၂၅ နံၣ်အနံၤ, မုၢ်နၤခီအဆၢကတီၢ်, SAC လၢအအိၣ်ဖဲ (၇) မိုင်သုးကလၢၤသ့ၣ်တဖၣ်ခးလီၤဝဲ ကျိဖးဒိၣ် (၆၀ မမ) အါမးန့ၣ်လီၤ. ကျိဖးဒိၣ်အကျါတဖျၢၣ်လီၤတဲာ်ဘၣ်ဝဲထံပာ်ကီၤဒၢဖးဒိၣ်တဖျၢၣ်လၢအဘူးဒီးတၢ်ဘါယွၤ သရိာ်ဖဲဆ---သဝီဒီးဘၣ်ဒိဝဲသဝီဖိပိာ်မုၢ် (၂) ဂၤ, ဘၣ်ဟးဂီၤဝဲထံပာ်ကီၤဒၢဖးဒိၣ်တဖျၢၣ်ဒီးသဝီဖိဟံၣ် (၂) ဖျၢၣ်န့ၣ်လီၤ. ဖဲကျိဖးဒိၣ်ပိၢ်ဖးထီၣ်အဆၢကတီၢ်သဝီဖိလၢအဘၣ်ဒိ (၂) ဂၤအံၤအိၣ်ဝဲဘူးဒီးထံပာ်ကီၤဒၢဖး ဒိၣ်တဖျၢၣ်အံၤအကပၤဖဲတၢ် ဘါယွၤသရိာ်ကရၢၢ်ပူၤန့ၣ်လီၤ. ဒ်လီၢ်ကဝီၤသဝီဖိတဂၤစံးဝဲ “SAC သုးဖိလၢအအိၣ်ဖဲ (၇) မိုင်သုးကလၢၤသ့ၣ်တဖၣ်ခးလီၤဝဲ ကျိဖးဒိၣ်လီၤ. သဝီဖိတဂၤလၢအအိၣ်ဘူးဖဲ(၇) မိုင်သုးကလၢၤအံၤတဲယၤလၢအဝဲနၢ်ဟူဝဲ SAC ခးလီၤဝဲကျိဖးဒိၣ်ဒီးလီၤတဲာ်ပိၢ် ဖးထီၣ်သီၣ်အကလုၢ်န့ၣ်လီၤ.”

သဝီဖိလၢအဘၣ်ဒိ (၂) ဂၤအံၤအမံၤမ့ၢ်ဝဲနီၢ်သ---, သးနံၣ်အိၣ်ဝဲ (၅၂) နံၣ်ဒီး နီၢ်က---, သးနံၣ်အိၣ်ဝဲ (၃၉) နံၣ်န့ၣ်လီၤ. နီၢ်က---ဘၣ်ဒိဝဲဖဲအကံၣ်ဒုၣ်ဒီးအခိၣ်ဒီးနီၢ်သ---အံၤဘၣ်ဒိဝဲဖဲအပျိၢ်ဃံလၢကျိဖးဒိၣ်အက့န့ၣ်လီၤ. သဝီဖိ (၂) ဂၤအံၤဒိးန့ၢ်ဘၣ်ဝဲတၢ် ကူစါယါဘျါသးလၢသဝီဖိအအိၣ်ဖဲသဝီပူၤလၢအိၣ်ဒီးတၢ်သ့ၣ်ညါနၢ်ပၢၢ်ဘၣ်ဃးတၢ်ကူစါဝဲတၢ်ပူၤလီၢ်န့ၣ်လီၤ. တၢ်တသ့ၣ်ညါဝဲ လၢမ့ၢ်အဝဲသ့ၣ်ကဘၣ်ဟ့ၣ်ဝဲတၢ်ကူစါသးတၢ်လၢာ်ဘူၣ်လၢာ်စ့ၤဘၣ်န့ၣ်လီၤ. တုၤလၢလါယူၤ ၁၉ သီ, ၂၀၂၅ နံၣ်အနံၤဒၣ်လဲာ် န့ၣ်တၢ်တသ့ၣ်ညါစ့ၢ်ကီးလၢမ့ၢ်အဝဲသ့ၣ်အတၢ်ပူၤလီၢ်ဘျါက့ၤလံဧါ မ့တမ့ၢ်တဘျါက့ၤဒံးဘၣ်ဧါဘၣ်န့ၣ်လီၤ.

SAC ခးလီၤကျိဖးဒိၣ်အံၤဒုးအိၣ်ထီၣ်ဝဲတၢ်ပျံၤတၢ်ဖုးလၢလီၤကဝီၤသဝီဖိသ့ၣ်တဖၣ်အဂီၢ်ဒီးသဝီဖိတနီၤနီၤဘၣ်ဃ့ၢ်အိၣ်ကဒုက့ၤ ဆူအဝဲသ့ၣ်အတၢ်ဖံးအီၣ်မၤအီၣ်အလီၢ်န့ၣ်လီၤ.

• လါမးရှး ၂၀ သီ, ၂၀၂၅ နံၣ်, SAC ခးလီၤကျိဖးဒိၣ်ဒီးဘၣ်ဒိဝဲသဝီဖိတဂၤဒီးဘၣ်ဟးဂီၤဝဲသဝီဖိအဟံၣ် (၄) ဖျၢၣ်ဖဲဒ---သဝီ

ဖဲလါမးရှး ၂၀ သီ, ၂၀၂၅ နံၣ်အနံၤ, ဂီၤခီ ၁၁း၄၀ အဆၢကတီၢ်, SAC သုးဖိလၢအအိၣ်ဖဲသၤမိတီၤ (သံမိုးတောင်) သုးက လၢၤသ့ၣ်တဖၣ်ခးလီၤဝဲကျိဖးဒိၣ် (၆၀ မမ) တဖျၢၣ်ဆူဒ---သဝီ, ပရှီလိာ်ကရူၢ်န့ၣ်လီၤ. ကျိဖးဒိၣ်အံၤလီၤတဲာ်ဖဲတခီးထူၣ် ကျါလၢအဘူးဒီးမၣ်လ---အဟံၣ်ဖဲသဝီပူၤဒီးပိၢ်ဖးထီၣ်ဝဲန့ၣ်လီၤ. ကျိဖးဒိၣ်ပိၢ်ဖးထီၣ်ဒီးဘၣ်ဒိဝဲသဝီဖိဟံၣ် (၄) ဖျၢၣ်ပၣ်ဃုာ် ဒီးမၣ်လ---အဟံၣ်န့ၣ်လီၤ. ကျိဖးဒိၣ်အက့ဘၣ်ဒိစ့ၢ်ကီးဝဲမၣ်လ---အစုလၢအစ့ၣ်တကပၤန့ၣ်လီၤ. သၤမိတီၤ (သံမိုးတောင်) သုးကလၢၤအံၤအိၣ်သူၣ်လီၤအသးဖဲပရှီလိာ်ကရူၢ်ပူၤန့ၣ်လီၤ.

မၣ်လ---အံၤအိၣ်ဝဲဖဲအဟံၣ်ဖဲကျိဖးဒိၣ်လီၤတဲာ်ပိၢ်ဖးထီၣ်အဆၢကတီၢ်န့ၣ်လီၤ. ကျိဖးဒိၣ်အံၤပိၢ်ဖးထီၣ်ဒီးဘၣ်ဒိဝဲအဟံၣ်ခိၣ်ဒုး, တၢ်ဖီအီၣ်မ့ၤလီၢ်, မုၢ်ဂံၢ်သဟီၣ် (solar) ဒီးအဟံၣ်သ့ၣ်ဘၣ်န့ၣ်လီၤ. မ့မ့ၢ်ဟံၣ်လၢအဂၤ (၃) ဖျၢၣ်န့ၣ်ဘၣ်ဒိဝဲတဆံးတက့ၢ် န့ၣ်လီၤ. ဒ်လဲၣ်ဂ့ၤဂ့ၤလီၢ်ကဝီၤသဝီဖိသ့ၣ်တဖၣ်န့ၣ်ဘၣ်ကိၢ်ဘၣ်ဂီၤဝဲလၢ SAC ကခးလီၤကဒီးကျိဖးဒိၣ်အသီတဘျီန့ၣ်လီၤ.