English
ကညီကျိာ်
မြန်မာ
Print:တၢ်ပာ်ဖျါအဖုၣ်တဘ့ၣ်အံၤပာ်ဖျါဝဲတၢ်ကဲထီၣ်အသးဖဲကၠဲၣ်ထိၤ(ကျိုက်ထို) ကီၢ်ဆၣ်, ဒူသထူၣ် (သထုံ) ကီၢ်ရ့ၣ်ပူၤဖဲလါယူၤ ၂၀၂၄ နံၣ်န့ၣ်လီၤ. ဖဲလါယူၤ ၂ , ၁၁ , ဒီး ၁၂ သီ, ၂၀၂၄ နံၣ်အနံၤန့ၣ်ထံကီၢ်တၢ်ပၢတၢ်ပြးကီၣ်ကးကရၢ (SAC) စုကဝဲၤဒိၣ် (အမတ) (နီၣ်ဂံၢ်-၃၁၀) လၢအအိၣ်ဖဲခီၣ်ချ့သုးတြိၤ (LID) (နီၣ်ဂံ-၄၄) တၢ်ပၢဖီလာ်ဒီးအိၣ်ဆီလီၤအသးဖဲသ့းစရဲး (သိမ်ဇရက်)ကီၢ်ဆၣ်ဒီး SAC သုးဖိလၢအအိၣ်ဖဲလဲၣ်ပးဒီးအညၣ်ဆူးသဝီ, ဝီၢ်ကီၢ်ဆၣ်ဟီၣ်ကဝီၤသ့ၣ်တဖၣ်ခးလီၤဝဲကျိဖးဒိၣ် (၁၂၀ မမ) အါန့ၢ်ဒံး (၆၃) ဘျီဆူသဝီလၢအအိၣ်ဖဲကၠဲၣ်ထိၤကီၢ်ဆၣ်အပူၤန့ၣ်လီၤ. လၢတၢ်ခးလီၤကျိဖးဒိၣ်အံၤအဃိဟံၣ် အါန့ၢ်ဒံး (၁၉) ဖျၢၣ် ဘၣ်ဟးဂီၤဝဲ ဒီးသဝီ (၁၉) ဖျၢၣ်ဖဲကၠဲၣ်ထိၤကီၢ်ဆၣ်အပူၤပှၤသဝီဖိ ၁၁,၀၀၀ ဂၤဃၣ်ဃၣ်ဘၣ်သုးလီၢ်သုး ကျဲဆူပှၢ်ပူၤဒီးဒူသဝီလၢအဘူးလိာ်သးသ့ၣ်တဖၣ်န့ၣ်လီၤ. သဝီဖိလၢအဃ့ၢ်မှံဟးဖျိးသ့ၣ်တဖၣ်လိၣ်ဘၣ်ဝဲတၢ်အီၣ်တၢ်အီဒီးက သံၣ်ကသီန့ၣ်လီၤ. အါန့ၢ်အန့ၣ်, ခီဖျိလၢ SAC ခးလီၤကျိဖးဒိၣ်ဒီးမၤဃံးထီၣ်ဝဲတၢ်လဲၤတၢ်က့ၤလၢပှၤကဟးထီၣ်ဟးလီၤလၢ မုၢ်နၤခီအဃိမၤဘၣ်ဒိဝဲသဝီဖိလၢအမၤအီၤညၣ်သ့ၣ်တဖၣ်ဒီးကဲထီၣ်ဝဲတၢ်တၤတၢ်လၢဒူသဝီဖိအဂီၢ်လၢတၢ်လုၢ်အီၢ်နီၢ်ခိသးသ မူအဂီၢ်န့ၣ်လီၤ.[1]
SAC ခးလီၤကျိဖးဒိၣ်ဖဲကၠဲၣ်ထိၤကီၢ်ဆၣ်
ဖဲလါယူၤ ၂ သီ, ၂၀၂၄ နံၣ်အနံၤ, ဂီၤခီ ၇း၀၀ အဆၢကတီၢ်, ကရူၢ်ဘံၣ်ဘၢခိၣ်လၢအအိၣ်ဖဲကၠဲၣ်ထိၤကီၢ်ဆၣ်ဒီးကညီဒီကလုာ် တၢ်ထူၣ်ဖျဲးသုးမုၢ်ဒိၣ် (KNLA) သုးဖိလၢအအိၣ်ဆီလီၤအသးဖဲကၠဲၣ်ထိၤကီၢ်ဆၣ်သ့ၣ်တဖၣ်ထီၣ်ခးဝဲထံကီၢ်တၢ်ပၢတၢ်ပြးကီၣ် ကးကရၢ (SAC) တၢ်သမံသမိးလီၢ်လၢအဘၣ်တၢ်သ့ၣ်ညါစ့ၢ်ကီးအီၤဒ်အမ့ၢ်ကိကိၣ်ပ့ၣ်တၢ်သမံသမိးလီၢ်ဒီးဘၣ်တၢ်တီခိၣ်ရိၣ်မဲ အီၤလၢတ့ၤမီၤအ့ဖဲသ့းစရဲး(သိမ်ဇရက်) ဝ့ၢ်န့ၣ် လီၤ. ဘံၣ်ဘၢဒီး KNLA သုးဖိတဖၣ်ဘၣ်တၢ်ခးလီၤအီၤလၢကျိဖးဒိၣ် (၆၀ မမ) ဒီး (၄၀ မမ) ခံဖျၢၣ်ဖဲတၢ်သမံသမိးလီၢ်န့ၣ်လီၤ. ဖဲကရူၢ်ဘံၣ်ဘၢခိၣ်ဒီး KNLA ထီၣ်ခးဝဲ SAC တၢ်သမံသမိးလီၢ်တတီၤအံၤ အဆၢကတီၢ်တၢ်သူၣ်ထီၣ်လၢပှၤပာ်ကီၤဃာ်တၢ်တဖျၢၣ်အူအီၣ်ကွံာ်ဒီး SAC ပၢၤကီၢ်တနီၤဘၣ်ဒိဘၣ်ထံးဝဲန့ၣ်လီၤ. ဝံၤအလီၢ်ခံ SAC သုးဖိတဖၣ်ခးလီၤဝဲကျိဖးဒိၣ်ဆူဒူသဝီလၢအဘူးလၢတၢ်မၤကာ်က့ၤတၢ်အဂီၢ်န့ၣ်လီၤ. SAC သုးဖိတဖၣ်ခးလီၤဝဲကျိဖးဒိၣ် ကိးနံၤဒဲးဃၣ်ဃၣ်ဖဲလါယူၤတလါအတီၢ်ပူၤဖဲလၢသုးဖီၣ်စုကဝဲကရူၢ်သ့ၣ်တဖၣ်ထီၣ်ခးအီၤမ့ဂ့ၤတထီၣ်ခးအီၤဘၣ် မ့ၢ်ဂ့ၤန့ၣ်လီၤ.
လါယူၤ ၂ သီ, ၂၀၂၄ နံၣ်- SAC ခးလီၤကျိဖးဒိၣ်ဖဲခရွဲကရူၢ်
ဖဲလါယူၤ ၂ သီ, ၂၀၂၄ နံၣ်အနံၤ, ဂီၤခီ ၇း၃၀ အဆၢကတီၢ်, SAC စုကဝဲၤဒိၣ် (အမတ) (နီၣ်ဂံၢ်-၃၁၀) လၢအအိၣ်ဖဲခီၣ်ချ့သုး တြိၤ (LID-တမ) (နီၣ်ဂံၢ်-၄၄) တၢ်ပၢအဖီၣ်လာ်ဒီးအိၣ်ဆီလီၤအသးဖဲအညၣ်ဆူးသဝီ, ဝီၢ်ကီၢ်ဆၣ်, ပကိကီၢ်ခီတဖၣ်ခးလီၤဝဲ ကျိဖးဒိၣ် (၁၂၀ မမ) ဆူခရွဲကရူၢ်ပူၤဒီးဘၣ်ဒိဘၣ်ထံးဝဲသဝီဖိဟံၣ်ဃီသ့ၣ်တဖၣ်န့ၣ်လီၤ.
SAC စုကဝဲဒိၣ် (အမတ) (နီၣ်ဂံၢ်-၃၁၀) ခးလီၤဝဲကျိဖးဒိၣ်ကအိၣ်လၢ (၃၀) ဖျၢၣ်ဃၣ်ဃၣ်န့ၣ်လီၤ. ကျိဖးဒိၣ်လၢတၢ်ခးလီၤ အီၤခဲလၢာ်ပာ်ဖှိၣ်အိၣ်ဝဲ (၄၀) ဖျၢၣ်ပာ်ဃုာ်ဒီးကျိဖးဒိၣ်အဂၤ (၁၀) ဖျၢၣ်လၢအဘၣ်တၢ်ခးလီၤအီၤလၢ SAC သုးဖိလၢအအိၣ်ဖဲ လဲၣ်ပးသဝီန့ၣ်လီၤ. ကျိဖးဒိၣ်လၢ SAC ခးလီၤအံၤ, တနီၤလီၤတဲာ်ဆူ အအ--- သဝီ, အဘ--- သဝီ, အဆ--- သဝီ, အဒ--- သဝီ, အဃ--- သဝီ, အရှ--- သဝီ, ဒီးအဂ---သဝီ, ခရွဲကရူၢ်, ကၠဲၣ်ထိၤကီၢ်ဆၣ်န့ၣ်လီၤ.
ကျိဖးဒိၣ်တဖျၢၣ်လီၤတဲာ်ဘၣ်ဟးဂီၤဝဲသဝီဖိလၢအမံၤမ့ၢ်အူအ---တဂၤအဟံၣ် ဖဲအအ---သဝီန့ၣ်လီၤ. အူအ---ဒီးအမါအံၤဃ့ၢ် နုာ်ဝဲဆူတၢ်ပူၤတချုးလၢကျိဖးဒိၣ်ဟဲလီၤတဲာ်ဒံးဘၣ်အဃိ အဝဲသ့ၣ်ပူၤဖျဲးဝဲန့ၣ်လီၤ. အဝဲသ့ၣ်သ့ၣ်ညါဝဲလၢကဘၣ်ဃ့ၢ်အိၣ်ခူ သူၣ် ခီဖျိနၢ်ဟူဆိပာ်ဝဲကျိဖးဒိၣ်အဂၤတဖျၢၣ်လီၤတဲာ်ပိၢ်ဖးထီၣ်သီၣ်အဃိန့ၣ်လီၤ.
ဝံၤအလီၢ်ခံကျိဖးဒိၣ် (၆) ဖျၢၣ်ဟဲလီၤတဲာ်ဖဲအအ---သဝီ, ခရွဲကရူၢ်န့ၣ်လီၤ. ဖဲအူအ---အဟံၣ်ကပၤန့ၣ်ကျိဖးဒိၣ် (၁၂၀ မမ) တဖျၢၣ်လီၤတဲာ်ဝဲဖဲဒီၤဘ---ဒီးကိၤဆ---အဟံၣ်မဲာ်ညါန့ၣ်လီၤ. ကျိဖးဒိၣ်အံၤပိၢ်ဖးထီၣ်ဒီးဘၣ်ဟးဂီၤဝဲဟံၣ်ခဲလၢာ်(၆) ဖျၢၣ်ပၣ် ဃုာ်ဒီးကိၤဆ---, ကိၤဒ---, ကိၤဃ---, ကိၤခ--- အဟံၣ်သ့ၣ်တဖၣ်ဒီးဟံၣ်အဂၤ(၂) ဖျၢၣ်လၢတၢ်တသ့ၣ်ညါဟံၣ်ကစၢ်ဘၣ်န့ၣ် လီၤ.
တချုးတၢ်ကဲထီၣ်သးဒံးဘၣ်န့ၣ်, ဖဲအပူၤကွံာ်စှၤသီလၢတၢ်တသ့ၣ်ညါလီၤတံၢ်မုၢ်နံၤမုၢ်သီဘၣ်, ကျိဖးဒိၣ် (၆၀ မမ) (၂) ဖျၢၣ်ဟဲ လီၤတဲာ်ဝဲဖဲကိၤဆ---အဟံၣ်ကရၢၢ်ပူၤန့ၣ်လီၤ. ဒီးတဘျီအံၤဖဲလါယူၤ ၂ သီ, ၂၀၂၄ နံၣ်အနံၤန့ၣ်ကျိဖးဒိၣ် (၁၂၀ မမ) တဖျၢၣ် ဟဲလီၤတဲာ်ကဒီးဖဲအဟံၣ်ကရၢၢ်ပူၤန့ၣ်လီၤ.
ဖဲအအ---သဝီဒီးအဃ--- သဝီအဘၢၣ်စၢၤန့ၣ်ကျဲအိၣ်ထဲတဘိဒီးသဝီခံဖျၢၣ်အံၤအိၣ်ဘူးလိာ်သးအဃိကျိဖးဒိၣ် (၆၀ မမ) တဖျၢၣ်ဘၣ်တၢ်ခးလီၤအီၤဖဲအအ---သဝီဒီးလီၤတဲာ်ဝဲဖဲအဃ---သဝီန့ၣ်လီၤ. ကျိဖးဒိၣ်အံၤလီၤတဲာ်ဖဲသဝီဖိလၢအမံၤမ့ၢ် မၣ် ဂ---တဂၤအဟံၣ်ကရၢၢ်ပူၤဒီး ဘၣ်ဒိဝဲသ့ၣ်ထူၣ်တခိၣ်န့ၣ်လီၤ. ကျိဖးဒိၣ်အက့ဘၣ်ဒိစ့ၢ်ကီးသဝီဖိလၢအမံၤမ့ၢ် ကိၤဟ---တဂၤ အဟံၣ်ခိၣ်ဒုးန့ၣ်လီၤ.
ပှၤသဝီဖိခဲလၢာ်ပာ်ဖှိၣ် ၁၁,၇၃၉ ဂၤလၢအအိၣ်ဟဲဖဲအဟ--- သဝီ ဒီးအရ--- သဝီ, ဝ့ၢ်ကျီကရူၢ် ဒီး အဧ---သဝီ, အသ---သဝီ, အက--- သဝီ, အလ--- သဝီ, ဒီးအမ--- သဝီ, ပၠ့ကဒိကရူၢ်ဒီး အန--- သဝီ, အဝ---သဝီလၢအအိၣ်ဖဲကဝီၤဒ့ဘအ---, ဒီး အဝ--- သဝီ လၢအအိၣ်ဖဲကဝီဒ့ဘဘ---, စံပၠီသကရူၢ်ဒီးအအ--- သဝီ, အပ---သဝီ, အဘ--- သဝီ, အရှ--- သဝီ, အဃ--- သဝီ, အဂ--- သဝီဒီးအခ--- သဝီ, ခရွဲကရူၢ်သ့ၣ်တဖၣ်ကဘၣ်ဃ့ၢ်ထီၣ်ကွံာ်ဝဲခီဖျိတၢ်ခးလီၤကျိဖးဒိၣ်အဃိန့ၣ်လီၤ. အအ---သဝီဖိလၢအဃ့ၢ်အိၣ်ကဒုသ့ၣ်တဖၣ်တုၤလၢလါယူၤ ၂၀၂၄ နံၣ်အပူၤဒၣ်လဲၣ်ဟဲက့ၤဆူဒူသဝီတဘူၣ်ဘၣ်န့ၣ်လီၤ. သဝီဖိလၢအ ဃ့ၢ်အိၣ်ကဒုအဂၤသ့ၣ်တဖၣ်ဘၣ်ပာ်တ့ၢ်ကွံာ်အဟံၣ်အဃီခီဖျိတၢ်ခးလီၤကျိဖးဒိၣ်အံၤကဲထီၣ်ဒံးအသးန့ၣ်လီၤ.
ဖဲလါယူၤ ၂ သီ, ၂၀၂၄ နံၣ်အနံၤန့ၣ်, ဟံၣ်ခဲလၢာ် (၁၃) ဖျၢၣ်လၢအအိၣ်ဖဲခရွဲကရူၢ်ပူၤအံၤဘၣ်ဟးဂီၤဝဲလၢ SAC ခးလီၤကျိဖး ဒိၣ်အဃိန့ၣ်လီၤ.
လါယူၤ ၁၁ သီ, ၂၀၂၄ နံၣ်- SAC ခးလီၤကျိဖးဒိၣ်ဆူခရွဲကရူၢ်
ဖဲလါယူၤ ၁၁ သီ, ၂၀၂၄ နံၣ်အနံၤ, ဟါလီၤခီ ၉း၃၆ အဆၢကတီၢ်, SAC ခးလီၤဝဲကျိဖးဒိၣ်ဆူ အရှ---သဝီ, ခရွဲကရူၢ်ဒီးဘၣ် ဟးဂီၤဝဲဖံန---, သးနံၣ်အိၣ်ဝဲ (၈၃) နံၣ်ဒီးဖံဝ---ခံဂၤအံၤအဟံၣ်န့ၣ်လီၤ. ကျိဖးဒိၣ်တဖျၢၣ်လီၤတဲဖဲဖံဝ---ကရၢၢ်ပူၤဒီး ဘၣ်ဟးဂိၤဝဲသိလ့ၢ်ယီၣ်တခိၣ်န့ၣ်လီၤ.
လါယူၤ ၁၂ သီ, ၂၀၂၄ နံၣ်- SAC ခးလီၤကျိဖးဒိၣ်ဆူစံပၠီကရူၢ်ဒီးခရွဲကရူၢ်
ဖဲလါယူၤ ၁၂ သီ, ၂၀၂၄ နံၣ်အနံၤ, ဂီၤခီ ၁၀း၁၅ အဆၢကတီၢ်, SAC (အမတ) (နီၣ်ဂံၢ်-၃၁၀) လၢအအိၣ်ဖဲ (တမ - ၄၄) တၢ်ပၢဖီလာ်ဒီးအိၣ်ဆီလီၤအသးဖဲသ့းစရဲး(သိမ်ဇရက်)ဝ့ၢ်တဖၣ်ခးလီၤဝဲကျိဖးဒိၣ် (၁၂၀ မမ) ခဲလၢာ် (၂၂) ဘျီဆူသဝီသ့ၣ်တ ဖၣ်အပူၤန့ၣ်လီၤ. ကျိဖးဒိၣ်နီၣ်ဂံၢ်နီၣ်ဒွးအံၤဘၣ်တၢ်မၤနီၣ်ဃာ်အီၤလၢသဝီဖိဖဲအဝဲသ့ၣ်နၢ်ဟူဝဲတၢ်ခးလီၤကျိဖးဒိၣ်အကလုၢ်သီၣ် အဆၢကတီၢ်န့ၣ်လီၤ.
ဖဲတၢ်တနံၤန့ၣ် SAC (အမတ) (နီၣ်ဂံၢ်-၃၁၀) ခးလီၤဝဲကျိဖးဒိၣ် (၁၂၀ မမ) တၢတဘျီ (၄) ဖျၢၣ်ဖဲဂီၤခီ ၉း၃၅ အဆၢကတီၢ်န့ၣ် လီၤ. ကျိဖးဒိၣ် (၂) ဖျၢၣ်လီၤတဲာ်ဖဲ အစ--- သဝီ, စံပၠီကရူၢ်ဒီးအဂၤ (၂) ဖျၢၣ်လီၤတဲာ်ဖဲ အက---သဝီ, ပၠ့ကဒိကိကရူၢ်န့ၣ်လီၤ.
တုၤဃီၤဖဲဂီၤခီ ၁၀း၀၀ အဆၢကတီၢ်, ကျိဖးဒိၣ်တဖျၢၣ်လီၤတဲာ်ဘၣ်ဝဲကိၤဧ---ဒီးမၣ်သ---အဟံၣ်ဖဲအအ---သဝီ, ခရွဲကရူၢ်န့ၣ် လီၤ. ဟံၣ်လၢအအိၣ်ဘူးဒ်အမ့ၢ်ကိၤက---, ကိၤလ---, ဒီးအူမ--- အဟံၣ်သ့ၣ်တဖၣ်ဘၣ်ဒိစ့ၢ်ကီးလၢကျိဖးဒိၣ်ပိၢ်ဖးထီၣ်အက့ န့ၣ်လီၤ. ပှၤဘၣ်ဒိဘၣ်ထံးတအိၣ်ဘၣ်သနာ်က့ဒူသဝီဖိသ့ၣ်တဖၣ်ဘၣ်ဃ့ၢ်ထီၣ်ကွံာ်ဝဲခီဖျိအဝဲသ့ၣ်ပျံၤဝဲတၢ်ခးလီၤကျိဖးဒိၣ်အံၤ န့ၣ်လီၤ. ဖဲဂီၤခီ ၁၀း၀၀ အဆၢကတီၢ် SAC (အမတ) (နီၣ်ဂံၢ်-၃၁၀) ခးလီၤကဒီးဝဲကျိဖးဒိၣ် (၁၂၀ မမ) (၂) ဖျၢၣ်ဒီးလီၤတဲာ် ဝဲဖဲအရှ--- သဝီ, ခရွဲကရူၢ်ဘၣ်ဆၣ်တဒုးအိၣ်ထီၣ်တၢ်ဘၣ်ဒိဘၣ်ထံးနီတမံၤဘၣ်န့ၣ်လီၤ.
တုၤဃီၤဖဲဟါလီၤခီ ၆း၀၀ အဆၢကတီၢ်, SAC (အမတ) (နီၣ်ဂံၢ်-၃၁၀) ခးလီၤကဒီးကျိဖးဒိၣ် (၁၂၀ မမ) (၂) ဖျၢၣ်ဆူအဂ---သဝီမုၢ်ထီၣ်တကပၤ, ခရွဲကရူၢ်ဘၣ်ဆၣ်တဒုးအိၣ်ထီၣ်တၢ်ဘၣ်ဒိဘၣ်ထံးနီတမံၤဘၣ်န့ၣ်လီၤ. ခီဖျိတၢ်လီၤဘၣ်ယိၣ်လၢတၢ်ဘံၣ် တၢ်ဘၢအဂီၢ်အဃိပျီပူၤပှၤမၤတၢ်ဖိလဲၤလၢတၢ်ကဲထီၣ်သးအလီၢ်လၢကဒိးန့ၢ်ဘၣ်အါထီၣ်တၢ်မၤနီၣ်မၤဃါအဂီၢ်တသ့ဘၣ်န့ၣ်လီၤ.
SAC သုးတၢ်ဟူးတၢ်ဂဲၤလၢအမၤဘၣ်ဒိတၢ်အဂၤသ့ၣ်တဖၣ်
SAC (အမတ) (နီၣ်ဂံၢ်-၃၁၀) လၢအအိၣ်ဖဲ (တမ - ၄၄) တၢ်ပၢဖီလာ်တဖၣ်ပညိၣ်ခးလီၤဝဲကျိဖးဒိၣ်လိၤလိၤဆူသဝီလၢအအိၣ် ဖဲခရွဲ ကရူၢ်သ့ၣ်တဖၣ်ဒီးသဝီအါဖျၢၣ်လၢအအိၣ်ဖဲထံကျိကၢၢ်နံၤန့ၣ်လီၤ. ဒူသဝီဖိသ့ၣ်တဖၣ်အိးဆိးဝဲလၢသဝီပူၤတဘူၣ်လၢၤ ဘၣ်ဒီး အဝဲသ့ၣ်ဘၣ်ဃ့ၢ်ထီၣ်ကွံာ်ဝဲဒၣ်န့ၣ်လီၤ. သဝီဖိတနီၤနီၤလဲၤဃ့ၢ်အိၣ်ကဒုဖဲအဘူးအတံၢ်အအိၣ်ဒီး တနီၤလဲၤဃ့ၢ်အိၣ်ဝဲ လၢသဝီလၢအဘူးသ့ၣ်တဖၣ်န့ၣ်လီၤ. သဝီဖိလၢအဃ့ၢ်အိၣ်ကမှံသ့ၣ်တဖၣ်လိၣ်ဘၣ်ဝဲတၢ်အီၣ်တၢ်အီဒီးကသံကသီန့ၣ်လီၤ.
ဖဲခရွဲကရူၢ်ပူၤအံၤအါတက့ၢ်သဝီသ့ၣ်တဖၣ်အိၣ်သူၣ်လီၤအသးဘူးဒီးအတ---ထံကျိဒီး အါတက့ၢ်သဝီဖိသ့ၣ်တဖၣ်ဒိးသန့ၤထီၣ် အသးလၢတၢ်မၤအီၣ်ညၣ်လၢတၢ်လုၢ်အီၣ်နီၢ်ခိသးသမူအဂီၢ်န့ၣ်လီၤ. ခီဖျိလၢ SAC ခးလီၤကျိဖးဒိၣ်ဒီးမၤဃံးထီၣ်ဝဲတၢ်လဲၤတၢ် က့ၤလၢတၢ်ကမၤအီၣ်ညၣ်အဂီၢ်အဃိသဝီဖိသ့ၣ်တဖၣ်ဟးထီၣ်က့ၤလီၤမၤအီၣ်ညၣ်လၢမုၢ်နၤခီအဆၢကတီၢ်တသ့လၢၤဘၣ်ဒီးကဲထီၣ်က့ၤတၢ်တၤတၢ်လၢအဝဲသ့ၣ်အဂီၢ်လၢတၢ်လုၢ်အီၣ်နီၢ်ခိသးသမူအဂီၢ်န့ၣ်လီၤ.
သဝီဖိခဲလၢာ် ၁၀,၀၀၀ ဂၤလၢအအိၣ်ဟဲလၢသဝီ (၁၉) ဖျၢၣ်လၢအအိၣ်ဖဲခရွဲကရူၢ်ပူၤသ့ၣ်တဖၣ်ဘၣ်ဃ့ၢ်မှံဟးဖျိးခီဖျိ SAC ခးလီၤကျိဖးဒိၣ်အဃိန့ၣ်လီၤ.
ဖဲအပူၤကွံာ်လါယူၤ, လါယူၤလံဒီး လါမ့ၤ ၂၀၂၄ နံၣ်အလၢာ်န့ၣ်, SAC (အမတ) (နီၣ်ဂံၢ်-၃၁၀) ခးလီၤစ့ၢ်ကီးကျိဖးဒိၣ်ဖဲ သဝီသ့ၣ်တဖၣ်လၢအအိၣ်ဖဲခရွဲကရူၢ် ဒီးစံပၠီကရူၢ်ပူၤန့ၣ်လီၤ.
Footnotes:
[1] တၢ်ဂ့ၢ်တၢ်ကျိၤလၢလံာ်ပာ်ဖျါတဘ့ၣ်အံၤအပူၤန့ၣ်တၢ်ဒိးန့ၢ်ဘၣ်အီၤဖဲ လါယူၤ ၂၀၂၄ နံၣ်အပူၤန့ၣ်လီၤ. ဘၣ်တၢ်ဆှၢဟ့ၣ်ထီၣ်အီၤလၢလီၢ်ကဝီၤၦၤမၤသကိး တၢ်တဂၤဖဲဒူသထူ (သထုံ) ကီၢ်ရ့ၣ်အပူၤလၢအဘၣ်တၢ်သိၣ်လိအီၤလၢကညီဂ့ၢ်ဝီခွဲးယာ်ကရူၢ် (KHRG) လၢကမၤနီၣ်မၤဃါတၢ်မၤဘၣ်ဒိၦၤဟီၣ်ခိၣ်ဖိခွဲး ယာ်အတၢ်အိၣ်သးတဖၣ်ဖဲလီၢ်ကဝီၤပူၤန့ၣ်လီၤ. ၦၤတူၢ်ဘၣ်တၢ်တဖၣ်အမံၤ, တၢ်ဂီၤဒီးအိၣ်ဆိးလီၢ်ကျဲလီၤတံၢ်လီၤဆဲးတဖၣ်န့ၣ်တၢ်မၤလီၤဘၢအီၤလၢအဝဲ နီၢ်ကစၢ်တၢ်ဘံၣ်တၢ်ဘၢအဂီၢ်န့ၣ်လီၤ. တၢ်ဂ့ၢ်တၢ်ကျိၤလၢ တၢ်ကွဲးၡဲပၠးအါထီၣ်အီၤဖဲပနိကဝီၤအပူၤန့ၣ်မ့ၢ်ဝဲဒၣ် KHRG အတၢ်ကွဲးၡဲထီၣ်တၢ်ဂ့ၢ်တၢ်ကျိၤန့ၣ်လီၤ.
