တၢ်ပာ်ဖျါအဖုၣ်တဘ့ၣ်အံၤပာ်ဖျါဝဲတၢ်ကဲထီၣ်သးဖဲကီးတရံးကီၢ်ဆၣ်, ဒူပျာ်ယာ်ကီၢ်ရ့ၣ်အပူၤန့ၣ်လီၤ. ဖဲလါအီးကထိဘၢၣ် ၂၉ သီ, ၂၀၂၄ နံၣ်န့ၣ် ထံကီၢ်တၢ်ပၢတၢ်ပြးကီၣ်ကးကရၢ (SAC) အီၤစ့ၤယၣ်သုးကျိၤခးလီၤဝဲကျိဖးဒိၣ်တဖျၢၣ်ဖဲ ဃ--- သဝီ, နိၣ်ဖိ ကရူၢ်, ကီးတရံးကီၢ်ဆၣ်, ဒူပျာ်ယာ်ကီၢ်ရ့ၣ်ဒီးဘၣ်ဒိဝဲသဝီဖိလၢအသးနံၣ်အိၣ်ဝဲ(၂၅) နံၣ်တဂၤအအခီၣ်ဒီးဘၣ်ဟးဂီၤဝဲအဟံၣ် န့ၣ်လီၤ. ကျိဖးဒိၣ်အံၤဘၣ်သံစ့ၢ်ကီးကျီၢ်တဒုဒီးဘၣ်ဒိတဒုန့ၣ်လီၤ. SAC သုးဖိဒီးကညီဒီကလုာ်တၢ်ထူၣ်ဖျဲးသုးမုၢ်ဒိၣ် (KNLA) သုးဖိတဖၣ်ဒုးလိာ်အသးယံာ်ထီၣ်ဘးလၢ (၈) လါဖဲတၢ်လီၢ်လၢအဘူးဒီးအ့ၤရှၢၣ်ကျဲမုၢ်ဖးဒိၣ်န့ၣ်လီၤ. ဖဲ ဃ--- သဝီပူၤန့ၣ်သုးဖိ တအိၣ်ဘၣ်သနာ်က့တၢ်ဒုးကဲထီၣ်ဝဲကိးမုၢ်နံၤဒဲးလၢ SAC အီၤစ့ၤယၣ်သုးကျိၤဒီး KNLA သုးဖိတဖၣ်ဖဲအ့ၤရှၢၣ်ကျဲမုၢ်ခိၣ်န့ၣ်လီၤ. သဝီဖိသ့ၣ်တဖၣ်မၤနီၣ်ဝဲတၢ်အံၤမ့ၢ်တၢ်လၢအမၤဘၣ်ဒိပှၤဟီၣ်ခိၣ်ဖိခွဲးယာ်န့ၣ်လီၤ.[1]
ဖဲအပူၤကွံာ်လါအီးကထိဘၢၣ် ၂၀၂၄ နံၣ်န့ၣ်, တၢ်ဒုးတၢ်ယၤကဲထီၣ်ဝဲလၢ ထံကီၢ်တၢ်ပၢတၢ်ပြးကီၣ်ကးကရၢ (SAC) အီၤစ့ၤယၣ် သုးကျိၤဒီးကညီဒီကလုၥ်တၢ်ထူၣ်ဖျဲးသုးမုၢ်ဒိၣ် (KNLA) ခီပရၤသုးကျိၤအဘၢၣ်စၢၤဖဲအဘူးဒီးအ့ၤရှၢၣ်ကျဲမုၢ်, ရၤမတံ, မၠးဝဒံၣ် ဝ့ၢ်, ဒီးကီးတရံးဝ့ၢ်အဘၢၣ်စၢၤ, ဒူပျၥ်ယၥ်ကီၢ်ရ့ၣ်အပူၤန့ၣ်လီၤ. လၢ (၈) လါအတီၢ်ပူၤန့ၣ်, သဝီဖိလၢအအိၣ်ဘူးဖဲအ့ၤရှၢၣ်ကျဲမုၢ် တဖၣ်နၢ်ဟူဝဲဒၣ်သုးသ့ၣ်တဖၣ်အတၢ်ဟူးတၢ်ဂဲၤဒ်အမ့ၢ်, ကျိသီၣ်မ့ၢ်ဂ့ၤ, တၢ်ခးလီၤကျိဖးဒိၣ်မ့ၢ်ဂ့ၤဒီးကဘီယူၤဟဲခးလီၤတၢ်မ့ၢ် ဂ့ၤကိးမုၢ်နွံဒဲးန့ၣ်လီၤ.
ဖဲလါအီးကထိဘၢၣ် ၉ သီ, ၂၀၂၄ နံၣ်န့ၣ်, တၢ်ဒုးတၢ်ယၤတကဲထီၣ်ဝဲလၢသုးဖီၣ်စုကဝဲၤခံဖုအံၤအဘၢၣ်စၢၤဘၣ်. ဘၣ်ဆၣ်ဖဲဂီၤခီ ၁၀:၀၀ နၣ်ရံၣ်အဆၢကတီၢ်န့ၣ်, ကျိဖးဒိၣ်တဖျၢၣ်ဘၣ်တၢ်ခးလီၤအီၤဖဲ ဃ--- သဝီ, နိၣ်ဖိကရူၢ်, ကီးတရံးကီၢ်ဆၣ်, ဒူပျာ်ယာ် ကီၢ်ရ့ၣ် အပူၤဒီးဘၣ်ဒိဝဲသဝီဖိ (၂၅) နံၣ်တဂၤလၢအမံၤမ့ၢ် စီၤဘ--- တဂၤအခီၣ်လၢအစ့ၣ်တကပၤ, ဘၣ်ဟးဂီၤဝဲအမိၢ်အပၢ်အ ဟံၣ်, ဘၣ်သံဝဲကျီၢ်တဒုဒီးဘၣ်ဒိဝဲတဒုန့ၣ်လီၤ. သဝီဖိတဖၣ်နာ်ဝဲလၢကျိဖးဒိၣ်အံၤဘၣ်တၢ်ခးလီၤအီၤလၢ SAC အီၤစ့ၤယၣ်သုး ကျိၤ ခီဖျိလၢသုးကျိၤအဂုာ်အဂၤဟူးဂဲၤလၢတၢ်လီၢ်ဖဲန့ၣ်တအိၣ်နီတဖုဘၣ်န့ၣ်လီၤ. ခီဖျိလၢတၢ်ဟ့ၣ်ပလီၢ်တအိၣ်နီတမံၤဘၣ်အ ဃိ ကျိဖးဒိၣ်အံၤလီၤတဲာ်ပိၢ်ဖးထီၣ်ဝဲဖဲသဝီဖိတဖၣ်တပလီၢ်သူၣ်ပလီၢ်သးဘၣ်အဆၢကတီၢ်န့ၣ်လီၤ.
သဝီဖိလၢအမံၤမ့ၢ် စီၤအ--- အံၤပာ်ဖျါထီၣ်ဝဲလၢ, ဖဲဂီၤခီ ၁၀း၀၀ နၣ်ရံၣ်, ဖဲအဝဲအီၣ်ဂီၤတၢ်အီၣ်ဒီးအဟံၣ်ဖိဃီဖိဝံၤအလီၢ်ခံ အဝဲ လဲၤလၢတၢ်ချၢလၢအတယံၤဒီးအဟံၣ်ဒ်သိးကလဲၤဘှီထီၣ်က့ၤဝဲအထံခိၣ်မီၣ်လၢအဟးဂီၤဖဲပူၤကွံာ်တသီန့ၣ်လီၤ. ဖဲတၢ်ခးလီၤ ကျိဖးဒိၣ်အဆၢကတီၢ် ဘၣ်ဝဲဖဲ စီၤအ--- အမါခွဲသိၣ်ခွဲပျီတၢ်ဖဲအဟံၣ်မဲာ်ညါ ဒီးအဖိခွါ စီၤဘ--- လၢအသးနံၣ်အိၣ်(၂၅) နံၣ်တ ဂၤမံနီၤလၢအဟံၣ်ဖီလာ်လၢကမၤမံအဖိမုၣ် နီၢ်ဆ--- လၢအသးနံၣ်အိၣ် (၂) နံၣ်တဂၤန့ၣ်လီၤ. အဖိမုၣ်တဘၣ်ဒိလၢကျိဖးဒိၣ် ဘၣ်ဆၣ် မ့မ့ၢ်လၢအပၢ် စီၤဘ--- တခီ အခီၣ်လၢအစ့ၣ်တပၤဘၣ်ဒိဝဲဒိၣ်ဒိၣ်မုၢ်မုၢ်န့ၣ်လီၤ.
အဆိကတၢၢ်န့ၣ်, ကညီဒီကလုၥ်တၢ်ထူၣ်ဖျဲးသုးမုၢ်ဒိၣ် (KNLA) သုးကသံၣ်သရၣ်ဖဲန့ၣ်တဖၣ်မၤစၢၤဝဲဂ့ၢ်ဂီၢ်အူတၢ်တိစၢၤမၤစၢၤ လၢ စီၤဘ--- အအိၣ် ဒီးလၢခံအဝဲဘၣ်တၢ်လဲၤဆှၢကဒီးအီၤဆူဒ--- တၢ်ဟ့ၣ်ကသံၣ်ဒၢးဖဲ တ--- ဝ့ၢ်, (တးကီၢ်ရ့ၣ်, ကီၢ်ကၠီၣ်တဲၣ် အပူၤ), ဒ်သိးဒီးကဒိးန့ၢ်ဘၣ်ဝဲတၢ်ကူစါယါဘျါန့ၣ်လီၤ. သဝီဖိအဂၤသ့ၣ်တဖၣ်မၤစၢၤဒီးလဲၤဆှၢဝဲအီၤဘၣ်ဆၣ်တၢ်တသ့ၣ်ညါလၢ မ့ၢ်မတဂၤဟ့ၣ်န့ၢ်အီၤတၢ်ကူစါယါဘျါအပှ့ၤဘၣ်န့ၣ်လီၤ. ကသံၣ်သရၣ်တဲဒုးသ့ၣ်ညါဝဲ စီၤအ--- လၢ စီၤဘ--- အခီၣ်န့ၣ်ဘၣ်ဒိဖး ဒိၣ်ညါန့ၣ်လီၤ. ဘၣ်ဆၣ်အဃံဒီးအသွံၣ်ကျိၤတဖၣ်န့ၣ် ဘၣ်လီၢ်ဘၣ်စးက့ၤဝဲ ဒီးအတၢ်ပူၤလီၢ်န့ၣ်တနးထဲသိးလၢအပူၤကွံၥ်ဘၣ် န့ၣ်လီၤ.
သဝီဖိလၢအအိၣ်ဖဲ ဃ--- သဝီတဂၤတဲဒုးသ့ၣ်ညါဝဲလၢ ဃ--- သဝီပူၤန့ၣ်, သဝီဖိအိၣ်ဒၣ်စှၤဒူၣ်ဒီးသုးဖိတအိၣ်နီတဂၤဘၣ်. တၢ်ခးလီၤကျိဖးဒိၣ်လၢတအိၣ်ဒီးတၢ်ဟ့ၣ်ပလီၢ်အံၤမ့ၢ်တၢ်လၢအမၤဘၣ်ဒိပှၤဟီၣ်ခိၣ်ဖိခွဲးယာ်န့ၣ်လီၤ.
တၢ်ဂ့ၢ်တၢ်ကျိၤအံၤမ့ၢ်တၢ်လၢအမ့ၢ်အတီခီဖျိစီၤအ--- လၢအမ့ၢ်ပှၤတူၢ်ဘၣ်တၢ်တဂၤအဟံၣ်ဟးဂီၤဝဲဒီးအဟံၣ်ဖိဃီဖိလၢအဘၣ်ဒိ တဂၤပာ်ဖျါထီၣ်တၢ်ကဲထီၣ်သးအံၤဆူ KHRG ပျီပူၤ ပှၤမၤတၢ်ဖိဒီးပျီပူၤပှၤမၤတၢ်ဖိအံၤလဲၤမၤဝဲတၢ်ထံၣ်လိာ်သံကွၢ်ဒီးအီၤန့ၣ်လီၤ. ပှၤလၢအတူၢ်ဘၣ်တၢ်အံၤဟ့ၣ်ပှၤအခွဲးလၢပကသူတၢ်ဂ့ၢ်တၢ်ကျိၤအံၤန့ၣ်လီၤ.
Footnotes:
[1] တၢ်ဂ့ၢ်တၢ်ကျိၤလၢ လံာ်ပာ်ဖျါတဘ့ၣ်အံၤအပူၤန့ၣ် တၢ်ဒိးန့ၢ်ဘၣ်အီၤဖဲ လါအီးကထိဘၢၣ် ၂၀၂၄ နံၣ် အပူၤန့ၣ်လီၤ. ဘၣ်တၢ်ဆှၢဟ့ၣ်ထီၣ်အီၤလၢလီၢ်ကဝီၤ ၦၤမၤသကိးတၢ်တဂၤဖဲဒူပျာ်ယာ်ကီၢ်ရ့ၣ်အပူၤလၢအဘၣ်တၢ်သိၣ်လိအီၤလၢကညီဂ့ၢ်ဝီခွဲးယာ်ကရူၢ် (KHRG) လၢကမၤနီၣ်မၤဃါတၢ်မၤဘၣ်ဒိၦၤဟီၣ်ခိၣ်ဖိ ခွဲးယာ်အတၢ်အိၣ်သးတဖၣ်ဖဲလီၢ်ကဝီၤပူၤန့ၣ်လီၤ. ၦၤတူၢ်ဘၣ်တၢ်တဖၣ်အမံၤ, တၢ်ဂီၤဒီးအိၣ်ဆိးလီၢ်ကျဲလီၤတံၢ်လီၤဆဲးတဖၣ်န့ၣ်တၢ်မၤလီၤဘၢအီၤလၢအ ဝဲနီၢ်ကစၢ်တၢ်ဘံၣ်တၢ်ဘၢအဂီၢ်န့ၣ်လီၤ. တၢ်ဂ့ၢ်တၢ်ကျိၤလၢတၢ်ကွဲးၡဲပၠးအါထီၣ်အီၤဖဲပနိကဝီၤအပူၤန့ၣ်မ့ၢ်ဝဲဒၣ် KHRG အတၢ်ကွဲးၡဲထီၣ်တၢ်ဂ့ၢ်တၢ်ကျိၤ န့ၣ်လီၤ.
Print:Print:
