အတင်းအဓမ္မဖမ်းဆီးချုပ်နှောင်ခြင်းနှင့် ညှဉ်းပမ်းနှိပ်စက်ခြင်း

၂၀၂၃ ခုနှစ်၊ နိုဝင်ဘာလ ၁၆ ရက်နေ့၌ နိုင်ငံတော်စီမံအုပ်ချုပ်ရေးကောင်စီ (SAC) ခြေမြန်တပ်ရင်း (ခမရ) အမှတ် (၅၅၉) နှင့် (၅၆၀) တို့မှ စစ်သားများသည် လယ်ကဆောမြို့နယ်၊ စတိန်ကျေးရွာအုပ်စု၊ က--- ကျေးရွာမှ ရွာသားတစ်ဦး ဖြစ်သူ ကိုဟ---အား (အသက်မသိရှိရ) ဖမ်းဆီး၍ စစ်ဆေးမေးမြန်းခဲ့သည်။ မျက်မြင်တွေ့ရှိသည့်အခြားရွာသားများ၏ ပြောပြချက်အရ ကိုဟ---သည် ဆိုးဆိုးရွားရွား ညှဉ်းပမ်းနှိပ်စက်ခံခဲ့ရသည်။

ထိုနေ့တွင် ကိုဟ---သည် ဈေးထွက်ဝယ်ယူရန်အတွက် က--- ကျေးရွာမှ ဇ--- ကျေးရွာသို့သွားခဲ့သည်။ ကိုဟ---သည် ဇ--- ကျေးရွာတွင် လိုအပ်သည့်အရာများဝယ်ယူပြီးနောက် က--- ရွာသို့ ပြန်လာခဲ့သည်။ ၎င်းပြန်လာသည့်လမ်းတွင် ဇ--- ကျေးရွာထိပ်တွင်ရှိသော ယာယီစစ်ဆေးရေးဂိတ်တစ်ခုတွင်ရှိသည့် SAC စစ်သားများသည် ၎င်းအား ခေါ်ယူရပ်ခိုင်းခဲ့ သည်။ အဆိုပါ SAC စစ်သားများသည် ခမရ (၅၅၉) နှင့်(၅၆၀) တပ်ရင်းများမှ စစ်သားများဖြစ်ကြသည်။ SAC စစ်သား များသည် ဆိုင်ကယ်စီးလာသည့်ကိုဟ---အား ရပ်ခိုင်းပြီးနောက် ၎င်းအား ဘယ်ကလာလဲ၊ ဘယ်သွားမှာလဲ၊ ဘာတွေ ဝယ်လာခဲ့လဲဟုဆို၍ စစ်ဆေးမေးမြန်းခဲ့သည်။ မျက်မြင်တွေ့ရှိသည့်ရွာသားများက ကိုဟ----၏တဝမ်းကွဲနှစ်ဦးသည် ပြည်သူ့ကာကွယ်ရေးတပ်မတော် (PDF) စစ်သားများဖြစ်ကြသောကြောင့်   SAC စစ်သားများမှ ၎င်းအား ခေါ်ယူစစ် ဆေးမေးမြန်းရခြင်းဖြစ်သည်ဟု ယူဆခဲ့သည်။ (SAC စစ်သားများသည် ကိုဟ---၏ဖုန်းကိုဖွင့်ကြည့်၍ ကိုဟ---နှင့် PDF ယူနီဖောင်းဝတ်စုံဝတ်ထားသော ၎င်း၏တဝမ်းကွဲနှစ်ဦးတို့၏ဓာတ်ပုံကို တွေ့ရှိခဲ့သည်။)

ကိုဟ---အား စစ်ဆေးမေးမြန်းသည့်အချိန်တွင် SAC စစ်သားများသည် ၎င်း၏ဆိုင်ကယ်ဖင်ထိုင်ခုံအဖုံးကိုဖွင့်ကြည့်၍ မြင်းဆေးအပြား (၂၀)နှင့် ဘိန်းနှစ်ထုပ်ကို တွေ့ရှိခဲ့သည်။ ထို့နောက် SAC စစ်သားများသည် ဘယ်သူက ဤမူးယစ် ဆေးဝါးများကို ဝယ်ခိုင်းလဲဟု ကိုဟ---အား မေးမြန်းခဲ့သည်။ ကိုဟ---ကလည်း သူအလုပ်လုပ်နိုင်ရန်အတွက် သုံးစွဲရန် မူးယစ်ဆေးဝါးကို ဝယ်ခဲ့သည်ဟု ပြန်လည်ဖြေကြားခဲ့သည်။ ကိုဟ---သည် ထိုကဲ့သို့ပြန်လည်ဖြေကြားပြီးနောက် SAC စစ်သားတစ်ဦးမှ ၎င်းလိမ်လည်ပြောဆိုပြီး ဤမူးယစ်ဆေးဝါးများကို PDF စစ်သားများအတွက် ဝယ်ပေးနေသည်ဟု ပြောကြားခဲ့သည်။ ထို့နောက် SAC စစ်သားတစ်ဦးသည် ကိုဟ--- အား လမ်းဘေးမှာ ဝါးတုတ်ဖြင့်ရိုက်နက်ခဲ့သည်။ ထို့အပြင် ၎င်း၏မျက်နှာနှင့်နောက်ကျောကိုလည်း ဓားဖြင့်ခုတ်ခြစ်ခဲ့သည်။ ထိုသို့ညှဉ်းပမ်းနှိပ်စက်မှုများပြုလုပ်ပြီး နောက် SAC ဗိုလ်ကြီးတစ်ဦးက ဤကိစ္စနှင့်ပတ်သက်ပြီး မည်သူ့ကိုမှ မပြောပြရန် ကိုဟ---အား ခြိမ်းခြောက်ခဲ့သည်။ ဤကိစ္စနှင့်ပတ်သက်ပြီး အကယ်၍လူမှုကွန်ယက်လိုင်းပေါ်မှာ သတင်းတွေ့ရှိမည်ဆိုလျှင် ကိုဟ---အား သတ်ပစ်မည်ဟု SAC စစ်သားများက ခြိမ်းခြောက်ခဲ့သည်။ ထို့နောက် SAC စစ်သားများသည် ၎င်းအား ပြန်လွတ်ပေးခဲ့သည်။

ကိုဟ---သည် အိမ်သို့ပြန်ရောက်လာပြီးနောက် အလွန်ကြောက်ရွံ့သွား၍ ရွာ၏အပြင်ဘက်သို့ ခရီးသွားလာခြင်းများ မရှိတော့ပေ။ ကိုဟ---သည် ညှဉ်းပမ်းနှိပ်စက်မှုဒဏ်မှ ရရှိခဲ့သည့်ဒဏ်ရာများကြောင့် ကြောက်ရွံ့သွားပြီး ယခုအချိန်ထိ (၂၀၂၃ ခုနှစ်၊ နိုဝင်ဘာလ)  ထမင်းစားမဝင်ဘူးဖြစ်နေသည်ဟု သိရှိရသည်။ ထို့အပြင် ကိုဟ---သည် ၎င်းဒဏ်ရာများ ကြောင့် နှစ်လခွဲကျော်အထိ အလုပ်မလုပ်နိုင်သေးဘဲရှိနေသည်။ ဤသို့ဖမ်းဆီးခံရပြီး ညှဉ်းပမ်းနှိပ်စက်မှုဖြစ်စဉ်ဖြစ်ပွား ပြီးနောက် ကိုဟ---၏ဇနီးဖြစ်သူက ၎င်းတို့မိသားစု၏လုံခြုံရေးအတွက် စိုးရိမ်ကြောက်ရွံ့နေရသည်ဟု ဒေသခံရွာသား များအား ပြောပြခဲ့သည်။

(၂၀၂၅ ခုနှစ်၊ ဇန်နဝါရီလအတွင်း KHRG လက်ခံရရှိသည့်သတင်းတစ်ခုအရ ကိုဟ---၏မိသားစုသည် လုံခြုံရေးအတွက် စိုးရိမ်နေရသောကြောင့် အခြားရွာတစ်ရွာသို့ ပြောင်းရွှေ့နေထိုင်ခဲ့ရကြောင်း သိရှိရသည်။ ကိုဟ---၏ဦးလေးဖြစ်သူ သည် သူ့အနေဖြင့် ဤဖြစ်စဉ်ကို လူအများသိစေချင်ပြီး SAC စစ်ဆေးရေးဂိတ်များသို့သွားလာလျှင် သတိထားကြပါဟု KHRG အား တင်ပြခဲ့သည်။)