English
ကညီကျိာ်
မြန်မာတၢ်ဂီၤတၢ်ကစီၣ်တဘ့ၣ်အံၤ ပာ်ဖျါထီၣ်ဝဲ တၢ်ဂီၤအတၢ်အုၣ်သးတဖၣ် လၢ ထံကီၢ်တၢ်ပၢတၢ်ပြးကီၣ်ကးကရၢ (SAC) အတၢ်ခးလီၤကျိဖးဒိၣ် တဖၣ်ဆူ ထံဖိကီၢ်ဖိကမျၢၢ်တဖၣ်အတၢ်အိၣ်ဆိးလီၢ်, ပှၤတဝၢပူၤ ဒီး တၢ်သူၣ်အီၣ်ဖျးအီၣ်တၢ်ဖံးတၢ်မၤလီၢ်တဖၣ် စးထီၣ် လါယနူၤအါရံၤ ၂၀၂၃ နံၣ် တုၤ လါဖ့ၤဘြူၤအါရံၤ ၂၀၂၄ နံၣ်အတီၢ်ပူၤန့ၣ်လီၤ. ဖဲတၢ်ကွဲးလံာ်တၢ်ပာ်ဖျါအံၤအဆၢကတီၢ်, KHRG ဒိးန့ၢ်ဘၣ်ဝဲတၢ်ဂ့ၢ်တၢ်ကျိၤ အါအါဂီၢ်ဂီၢ် လၢအဘၣ်ထွဲဘၣ်ဃးဝဲဒၣ်ဒီး ခးကျိဖးဒိၣ် ဒီး အတၢ်ဘၣ်ဒိဘၣ်ထံးတၢ်ပိာ်ထွဲထီၣ်အခံတဖၣ် ဒီး မ့ၢ်တၢ်အအါကတၢၢ်တမံၤစး ထီၣ်လၢ ၂၀၂၁ နံၣ်သုးဟံးန့ၢ်ဆူၣ်ထံကီၢ်တၢ်စိတၢ်ကမီၤအခါလံၤလံၤလံန့ၣ်လီၤ. KHRG ဒိးန့ၢ်ဘၣ်ဝဲတၢ်ဂီၤသ့ၣ်တဖၣ်လၢအအါန့ၢ်ဒံး ၂,၇၀၈ ခါလၢအပာ်ဖျါထီၣ်ဝဲတၢ်ဟးဂူာ်ဟးဂီၤ ဒီးတၢ်ဘၣ်ဒိဘၣ်ထံးလၢအကဲထီၣ်သး ခီဖျိလၢခးကျိဖးဒိၣ်တဖၣ်အဃိ ဖဲဒူသထူၣ်, တီအူ, ချၢၣ်လွံၢ်ထူၣ်, ဘျံး-ဝဲၢ်, မုၢ်တြီၢ် ဒီး ဒူပျာ်ယာ်ကီၢ်ရ့ၣ်တဖၣ်အပူၤန့ၣ်လီၤ. SAC သုးဖိတဖၣ် ခးဝဲကျိဖးဒိၣ်ဖဲအသုးကလၢၤတဖၣ်အခိၣ်အဃၢၤ ကိးနံၤဒဲးဃၣ်ဃၣ်, လီၤလီၤဆီဆီဖဲဟီၣ်ကဝီၤလၢစုကဝဲၤတၢ်သဘံၣ် သဘုၣ်အိၣ်ဝဲအလီၢ်တဖၣ်န့ၣ်လီၤ. ကျိဖးဒိၣ်ချံအါအါဂီၢ်ဂီၢ်လီၤ တဲာ်ပိၢ်ဖးထီၣ်ဝဲလၢ ဒူသဝီပူၤ, စံာ်ပှဲာ်, ခုး ဒီး တၢ်ဖံးအီၣ်မၤအီၣ်လီၢ်, ကျဲလၢပှၤကမျၢၢ်သူဝဲတဖၣ်, ဒီး တၢ်ကူစါယျါဘျါလီၢ်ကျဲ, တၢ်ဆါဟံၣ်, သရိာ်, ဒီး ကၠိသ့ၣ်တဖၣ် အကရၢၢ်ပူၤန့ၣ်လီၤ.
တၢ်အံၤဟဲပိာ်ထွဲထီၣ်က့ၤအခံလၢ တၢ်ခးလီၤကျိဖးဒိၣ်အံၤဘၣ်သံ ဒီး ဘၣ်ဒိဝဲဒူသဝီဖိတဖၣ်, မၤဟးဂီၤဝဲကမျၢၢ်ဟံၣ်ဃီ, တၢ်သူၣ်ထီၣ်, တၢ်ဖံၤအီၣ်မၤအီၣ်လီၢ် ဒီး ဒုးအိၣ်ထီၣ်ဝဲတၢ်ဃ့ၢ်မှံဟးဖျိးလၢအဒိၣ်အမုၢ်န့ၣ်လီၤ. တၢ်မၤထီဒါအံၤဒုးအိၣ်ထီၣ်ဝဲတၢ်ပျံၤတၢ်ဖုး, တၢ်မၤတံာ်တာ်လၢတၢ်ဒိးန့ၢ်ဘၣ်တၢ်ကူၣ်ဘၣ်ကူၣ်သ့, တၢ်အိၣ်ဆူၣ်အိၣ်ချ့ ဒီး ကဲထီၣ်ဝဲတၢ်လီၤဘၣ်ယိၣ်အလီၢ်လၢအပှဲၤဝဲဒၣ်ဒီး ကျိချံမျိာ်သၣ်လၢအတပိၢ်ဖးထီၣ်ဒံးဘၣ်တဖၣ် (UXOs) န့ၣ်လီၤ. ဒူသဝီဖိသ့ၣ်တဖၣ်ဖံးအီၣ်မၤအီၣ်က့ၤတၢ်လၢအစံာ်အခုးပူၤ ဒီးအကျီးပူၤလၢအဝဲသ့ၣ်တၢ်လုၢ်အီၣ်နီၢ်ခိသးသမူအဂီၢ်တဘူၣ်ဝဲဒၣ်လၢၤဘၣ်န့ၣ်လီၤ. သဝီဖိသ့ၣ်တဖၣ် ဘၣ်ဃ့ၢ်အိၣ်ခူသူၣ်လၢမှံၤခိၣ် ပှၢ်လၢ်ကျါ, လ့ပူၤ ဒီး သီခါဖၠၣ်တဖၣ်အပူၤ မ့ၢ်လၢ SAC သုးဖိတဖၣ်ပညိၣ်ခးဝဲကျိဖးဒိၣ်တဖၣ်ဆူ သဝီပူၤ ဒီး ဒူဖိသဝီဖိတဖၣ်အဟံၣ် အဃီအဃိန့ၣ်လီၤ. ဘၣ်ဆၣ်သနာ်က့, လၢတၢ်ကဲထီၣ်သးအါမးအကျါစ့ၢ်ကီး SAC သုးဖိတဖၣ်အံၤ ခးလီၤဝဲကျိဖးဒိၣ်တဖၣ်ဆူ သီခါဖၠၣ်ကရၢၢ်ပူၤ ဒီး သီခါဖၠၣ်ခိၣ်ဃၢၤတဖၣ်အါမးန့ၣ်လီၤ. တၢ်ပူၤဖျဲးလီၢ်တအိၣ်ဝဲဒၣ်နီၤတတီၤလၢသဝီဖိတဖၣ်ဖဲကီၢ်ပယီၤမုၢ်ထီၣ် ကလံၤထံးပူၤအံၤဘၣ်န့ၣ်လီၤ.
တၢ်ဂီၤတၢ်ကစီၣ် - SAC သုးခးလီၤကျိဖးဒိၣ်ဖဲကီၢ်ပယီၤမုၢ်ထီၣ်ကလံၤထံးပူၤ ဒီးတၢ်ဘၣ်ဒိဘၣ်ထံးလၢ ဒူသဝီဖိ တဖၣ်, လါယနူၤအါရံၤ ၂၀၂၃ နံၣ် တုၤ လါဖ့ၤဘြူၤအါရံၤ ၂၀၂၄ နံၣ်
တၢ်ဂီၤ (၂,၇၀၈) ဘ့ၣ်လၢအပာ်ဖျါထီၣ်ဝဲ တၢ်ဘၣ်ဒိဘၣ်ထံးလၢတၢ်ခးလီၤကျိဖးဒိၣ်တဖၣ်အံၤန့ၣ် တၢ်ဒိးန့ၢ်ဘၣ်ဝဲစးထီၣ် လါယနူၤအါရံၤ ၂၀၂၃ နံၣ် တုၤ လါဖ့ၤဘြူၤအါရံၤ ၂၀၂၄ နံၣ်အတီၢ်ပူၤဒီး လၢတနီၤအကျါဘၣ်တၢ်ဒိန့ၢ်အီၤလၢလီၢ်ကဝီၤသဝီဖိ တဖၣ် ဒီးအဂၤတဖၣ်န့ၢ်တၢ်ဒိန့ၢ်အီၤလၢ KHRG ပျီပူၤပှၤမၤတၢ်ဖိ လၢအမ့ၢ်ဝဲလီၢ်ကဝီၤဖိလၢတၢ်သိၣ်လိအဝဲသ့ၣ်လၢကမၤနီၣ် မၤဃါဝဲတၢ်မၤ ဘၣ်ဒိဝဲပှၤဟီၣ်ခိၣ်ဖိခွဲးယာ်လၢအဟဲကဲထီၣ်အသးလၢအလီၢ်ကဝီၤပူၤတဖၣ်န့ၣ်လီၤ. လၢတၢ်ဂီၤသ့ၣ်တဖၣ်အံၤ အကျါ တၢ်ဂီၤ (၆၁) ဘ့ၣ်အံၤပာ်ဖျါထီၣ်ဝဲတၢ်ကဲထီၣ်သးလၢ ကီၢ်ရ့ၣ် (၆) ဘ့ၣ်ဖဲကညီကီၢ်စဲၣ်ပူၤန့ၣ်လီၤ. တၢ်ဂီၤသ့ၣ်တဖၣ်အံၤ မ့ၢ်ဝဲတၢ်အုၣ်ကီၤသးတခါ လၢအပာ်ဖျါထီၣ်ဝဲတၢ်ကဲထီၣ်သးကိၢ်ကိၢ်လၢၤလၢၤဖဲလၢဒူသဝီဖိတဖၣ်ဘၣ်ကွၢ်ဆၢၣ်မဲာ်ဝဲဒၣ်ဒီး SAC သုးတဖၣ်ခးလီၤဝဲကျိဖးဒိၣ်ဆူ ကမျၢၢ်ထံဖိကီၢ်ဖိတဖၣ်အတၢ်အိၣ်ဆိးလီၢ်ကျဲပူၤအခါန့ၣ်လီၤ.
တၢ်ဂီၤတဘ့ၣ်အံၤဘၣ်တၢ်ဒိန့ၢ်အီၤဖဲ လါယနူၤအါရံၣ် ၂ သီ ၂၀၂၃ နံၣ် ဖဲ က---သဝီ, ဃီဖိပျဲၢ်ကရူၢ်, ဘံလ့ကီၢ်ဆၣ်, ဒူသထူၣ်ကီၢ်ရ့ၣ်အပူၤန့ၣ်လီၤ. တၢ်ဂီၤဝဲအံၤ ပာ်ဖျါထီၣ်ဝဲ တၢ်ဘၣ်ဒိဟးဂီၤ ခီဖျိပယီၤသုးမီၤစိရိၤ အသုး အတၢ်ခးလီၤဝဲ ကျိဖးဒိၣ် ၁၂၂ မမ သ့ၣ်တဖၣ် ဖဲလါယနူၤအါရံၣ် ၁ သီ ဒီး ၂ သီ အနံၤန့ၣ်လီၤ. ကျိဖးဒိၣ်သ့ၣ်တဖၣ်အံၤ ဘၣ်တၢ်ခးလီၤအီၤလၢ ပယီၤသုးမီၤစိရိၤအသုးသ့ၣ်တဖၣ် လၢအအိၣ်ဖဲသၣ်ဂီၤပျ့ၤသုးကလၢၤန့ၣ်လီၤ. ကျိဖးဒိၣ်ချံလီၤတဲာ်နုာ်ဆူ က---သဝီပူၤ (၅) ဖျၢၣ် ဒီးမၤဘၣ်ဒိဟးဂီၤဝဲ သဝီဖိအဟံၣ်သ့ၣ်တဖၣ်, တၢ်ဘါယွၤသရိာ်, စံာ်ဒဲသ့ၣ်တဖၣ်, စံာ်ပျီ, ဒီးရီဘၢၣ်ထူၣ်သ့ၣ်တဖၣ်န့ၣ်လီၤ. ဖဲလါဖ့ၣ်ဘြူၤအါရံၣ် ၇ သီ ၂၀၂၃ နံၣ်န့ၣ်, ပယီၤသုးမီၤစိရိၤအသုးသ့ၣ်တဖၣ် ခးလီၤကဒီးကျိဖးဒိၣ် အဃိ သဝီဖိအဟံၣ် (၇) ဖျၢၣ် ဒီးတၢ်ဖိတၢ်လံၤလၢအအိၣ်လၢဟံၣ်ပူၤသ့ၣ်တဖၣ်ဘၣ်ဒိဟးဂီၤဝဲန့ၣ်လီၤ. (တၢ်ဂီၤ- KHRG)
တၢ်ဂီၤတဖၣ်အံၤဘၣ်တၢ်ဒိန့ၢ်အီၤဖဲလါဖ့ၣ်ဘြူၤအါရံၣ် ၁၂ သီ ၂၀၂၃ နံၣ်ဖဲ ခ--- သဝီ, ရွှ့ၣ်ယီၣ်ပၠးကရူၢ်, သထူၣ်ကီၢ်ဆၣ်, ဒူသထူၣ်ကီၢ်ရ့ၣ်အပူၤန့ၣ်လီၤ. တၢ်ဂီၤခံဘ့ၣ်အံၤ ပာ်ဖျါဝဲတၢ်ဘၣ်ဒိဟးဂီၤသ့ၣ်တဖၣ်လၢအကဲထီၣ်အသးခီဖျိ ပယီၤသုးမီၤစိရိၤ ခီၣ်ချ့သုးရ့ၣ် (၉) အသုးသ့ၣ်တဖၣ် အတၢ်ခးလီၤနါစိၤကျိဖးဒိၣ်လၢလီၢ်ကဝီၤပူၤအဃိန့ၣ်လီၤ. ဖဲလါဖ့ၣ်ဘြူၤအါရံၣ် ၁၁ သီ ဟါခီ ၈း၃၇ မံးနံးအဆၢကတီၢ်န့ၣ် ကျိဖးဒိၣ်ချံလၢတၢ်ခးလီၤအီၤသၢဖျၢၣ် လီၤတဲာ်နုာ်ဝဲဆူ ခ--- သဝီသီခၣ်ဖၠၣ်ကရၢၢ်ပူၤန့ၣ်လီၤ. ခီဖျိကျိဖးဒိၣ်ချံလီၤတဲာ်ပိၢ်ဖးလၢသီခၣ်ဖၠၣ်ကရၢၢ်ပူၤအဃိ သီခါဘၣ်ဒိဝဲသၢဂၤ ဒီးသီခၣ်ဖၠၣ်တၢ်သူၣ်ထီၣ်ဒီးတၢ်ဖိတၢ်လံၤသ့ၣ်တဖၣ် ဘၣ်ဒိဟးဂီၤစ့ၢ်ကီးဝဲန့ၣ်လီၤ. ပယီၤသုးမီၤစိရိၤ ခီၣ်ချ့သုးရ့ၣ် (၉) အံၤအိၣ်လၢ--------------- (၄၄) အဖီလာ်ဒီး အိၣ်ဆီလီၤအသးဖဲ ဝ့ပၣ်သုးကလၢၤပူၤန့ၣ်လီၤ. (တၢ်ဂီၤ- လီၢ်ကဝီၤသဝီဖိ)
တၢ်ဂီၤတဘ့ၣ်အံၤ ဘၣ်တၢ်ဒိန့ၢ်အီၤဖဲလါမးရှး ၂၀ သီ ၂၀၂၃ နံၣ် ဖဲဂ---သဝီ, အလူကရူၢ်, ကၠဲးထိၣ်ကီၢ်ဆၣ်, ဒူသထူၣ်ကီၢ်ရ့ၣ် အပူၤန့ၣ်လီၤ. တၢ်ဂီၤအံၤပာ်ဖျါဝဲ သဝီဖိတဂၤလၢအမံၤမ့ၢ် အူဃ--- လၢအဘၣ်သံဝဲဒၣ်လၢ ပယီၤသုးမီၤစိရိၤအသုးအတၢ် ခးလီၤကျိဖး ဒိၣ်န့ၣ်လီၤ. ဖဲနံၤအဝဲန့ၤန့ၣ် ပယီၤသုးမီၤစိရိၤ စုကဝဲၤဒိၣ်သုးရ့ၣ် (၆၀၂) လၢအအိၣ်လၢ ခီၣ်ချ့သုးတြိၤ (၄၄) အဖီလာ်န့ၣ် ခးလီၤဝဲကျိဖးဒိၣ် ၁၂၀ မမ သ့ၣ်တဖၣ်ဆူဂ--- သဝီပူၤ ဒီးကျိဖးဒိၣ်ချံအကျါတဖျၢၣ်န့ၣ် လီၤတဲာ်ဝဲဖဲ အူဃ---အဟံၣ်ကပၤန့ၣ်လီၤ. အူဃ--- အမါစ့ၢ်ကီးဘၣ်ဒိဝဲလၢကျိ ဖးဒိၣ် အက့တဆံးတက့ၢ်န့ၣ်လီၤ. (တၢ်ဂီၤ- KHRG)
တၢ်ဂီၤတဘ့ၣ်အံၤ ဘၣ်တၢ်ဒိန့ၢ်အီၤဖဲလါအီးကထိဘၢၣ် ၁၉ သီ ၂၀၂၃ နံၣ်ဖဲ င---သဝီ, ဆီသူၣ်ခံကရူၢ်, ကၠဲးထိၣ်ကီၢ်ဆၣ်, ဒူသထူၣ် ကီၢ်ရ့ၣ်အပူၤန့ၣ်လီၤ. ဖဲနံၤအဝဲန့ၤန့ၣ် ပယီၤသုးမီၤစိရိၤခီၣ်ချ့သုးရ့ၣ် (၂) အသုး လၢအအိၣ်ဟဲလၢသုးကလၢၤဖဲသထိၣ်အဝ့ၢ် ဒီးဆီလီၤအသး ဖဲလဲး ပါပ့သုးကလၢၤလၢအအိၣ်ဖဲ င--- န့ၣ် ခးလီၤဝဲကျိဖးဒိၣ်သ့ၣ်တဖၣ် န့ၣ်လီၤ. တၢ်ဂီၤအံၤပာ်ဖျါဝဲ သဝီဖိလၢအမံၤမ့ၢ် နီၢ်စ---လၢအခိၣ်သၣ် ဘၣ်ဒိဒီးကျိချံအက့ဖးနးညါ ဖဲတၢ်ခးလီၤကျိဖးဒိၣ်လၢ အသဝီပူၤအ ခါန့ၣ်လီၤ. (တၢ်ဂီၤ- လီၢ်ကဝီၤသဝီဖိ)
တၢ်ဂီၤတဘ့ၣ်အံၤ ဘၣ်တၢ်ဒိန့ၢ်အီၤဖဲလါနိၣ်ဝ့ဘၢၣ် ၁၆ သီ, ၂၀၂၃ နံၣ် ဖဲဆ---သဝီ, ဖၣ်အၣ်ကီၢ်ဆၣ်, ဒူသထူၣ်ကီၢ်ရ့ၣ်အပူၤန့ၣ်လီၤ. တၢ်ဂီၤအံၤပာ်ဖျါဝဲကျိဖးဒိၣ်ချံလီၤတဲာ်အပူၤန့ၣ်လီၤ. ကျိဖးဒိၣ်ချံအံၤ ပယီၤသုးမီၤစိရိၤအသုးခးလီၤဝဲ ဖဲလါနိၣ်ဝ့ဘၢၣ် ၁၅ သီ ၂၀၂၃ နံၣ် ဒီးလီၤတဲာ်ဝဲဘူးဒီးသဝီဖိတဂၤအဟံၣ်လၢအအိၣ်လၢစံာ်ပျီကပၤန့ၣ်လီၤ. ကျိဖးဒိၣ်ချံအက့ ဘၣ်ဟးဂီၤစ့ၢ်ကီးဝဲဟံၣ်တဖျၢၣ်, တၢ်ဖိတၢ်လံၤလၢအ အိၣ်လၢဟံၣ်ပူၤသ့ၣ်တဖၣ် ဒီးဘၣ်သံစ့ၢ်ကီးဝဲကျီၢ်ခံဒုန့ၣ်လီၤ. (တၢ်ဂီၤ- လီၢ်ကဝီၤသဝီဖိ)
တၢ်ဂီၤတဘ့ၣ်အံၤ ဘၣ်တၢ်ဒိန့ၢ်အီၤဖဲလါနိၣ်ဝ့ဘၢၣ် ၂၀ သီ, ၂၀၂၃ နံၣ် ဖဲရှ---သဝီ, ရွှ့ၣ်လီၣ်အ့ကရူၢ်, ဘံလ့ကီၢ်ဆၣ်, ဒူသထူၣ်ကီၢ်ရ့ၣ် အပူၤန့ၣ်လီၤ. တၢ်ဂီၤအံၤပာ်ဖျါဝဲ သဝီဖိလၢအဘၣ်ဒိဒီးပယီၤသုး မီၤစိရိၤ အသုး တၢ်ခးလီၤကျိဖးဒိၣ်တဂၤ လၢအလဲၤဒိးကူစါယါဘျါအသးဖဲ ရှ---တၢ်ဟ့ၣ်ကသံၣ်ဒၢးန့ၣ်လီၤ. သဝီဖိဝဲအံၤအမံၤမ့ၢ် နီၢ်ည--- ဒီးအသး နံၣ်အိၣ်ဝဲ ၁၇ နံၣ်န့ၣ်လီၤ. သဝီဖိအံၤဘၣ်ဒိဝဲ ဖဲပယီၤသုး မီၤစိရိၤခီၣ် ချ့သုးရ့ၣ် (၄၀၄) အသုးသ့ၣ်တဖၣ် ခးလီၤကျိဖးဒိၣ် ၆၀ မမ သ့ၣ်တဖၣ် ဆူရှ---လီၢ်ကဝီၤပူၤ လၢအအအိၣ်ဘူးဒီးအသုးကလၢၤ ဖဲလါနိၣ်ဝ့ဘၢၣ် ၂၀ သီ ၂၀၂၃ နံၣ်အဆၢကတီၢ်န့ၣ်လီၤ. ပယီၤသုးတၢ်ခး လီၤကျိဖးဒိၣ် တဘျီ အံၤ ဘၣ်ဒိစ့ၢ်ကီးသဝီဖိလၢအဂၤတဂၤ ဒီးဘၣ်ဟးဂီၤဝဲသဝီဖိအဟံၣ် အဃီဒီးအတၢ်ဖိတၢ်လံၤသ့ၣ်တဖၣ်န့ၣ်လီၤ. ပယီၤသုးမီၤစိရိၤခီၣ်ချ့သုး ရ့ၣ် (၄၀၄) အံၤအိၣ်ဝဲလၢ ခီၣ်ချ့သုးတြိၤ (၈) အဖီလာ်န့ၣ်လီၤ. (တၢ်ဂီၤ- လီၢ်ကဝီၤသဝီဖိ)
တၢ်ဂီၤတဘ့ၣ်အံၤ ဘၣ်တၢ်ဒိန့ၢ်အီၤဖဲလါဒံၣ်စဲဘၢၣ် ၇ သီ ၂၀၂၃ နံၣ် ဖဲတ---သဝီ, အံဟဲကရူၢ်, ဖၣ်အၣ်ကီၢ်ဆၣ်, ဒူသထူၣ်ကီၢ်ရ့ၣ်အပူၤန့ၣ်လီၤ. ဖဲလါဒံၣ်စဲဘၢၣ် ၅ သီ ၂၀၂၃ နံၣ်န့ၣ် ပယီၤသုးမီၤစိရိၤအသုးခးလီၤ ကျိဖးဒိၣ် ဒီးလီၤတဲာ်ဘၣ်ဒိဟးဂီၤဝဲ ဟံၣ်လၢအဖျါလၢတၢ်ဂီၤပူၤအံၤ အခိၣ်ဒုးန့ၣ်လီၤ. (တၢ်ဂီၤ- KHRG)
တၢ်ဂီၤတဘ့ၣ်အံၤ ဘၣ်တၢ်ဒိန့ၢ်အီၤဖဲလါယနူၤအါရံၣ် ၁၉ သီ ၂၀၂၄ နံၣ် ဖဲထ---သဝီ, ဒီယၣ်ကရူၢ်, သထူၣ်ကီၢ်ဆၣ်, ဒူသထူၣ်ကီၢ်ရ့ၣ် အပူၤ န့ၣ်လီၤ. ဖဲနံၤအဝဲန့ၤန့ၣ် ပယီၤသုးမီၤစိရိၤစုကဝဲၤဒိၣ်သုးရ့ၣ်နီၣ်ဂံၢ် (၃၁၄) အသုးခးလီၤဝဲကျိဖးဒိၣ်သ့ၣ်တဖၣ် ဒီးကျိဖးဒိၣ်ချံလၢ တၢ်ခးလီၤအီၤအ ကျါခံဖျၢၣ်န့ၣ် လီၤတဲာ်နုာ်ဝဲဆူ ထ--သဝီပူၤ ဒီးဘၣ်သံဝဲသ ဝီဖိပိာ်မုၣ် လွံၢ်ဂၤ ဒီးဘၣ်ဒိဝဲသဝီဖိအဂၤဃုဂၤန့ၣ်လီၤ. သဝီဖိလၢအဘၣ်ဒိအကျါ တဂၤန့ၣ် မ့ၢ်ဝဲဖိသၣ်ပိာ်ခွါဖိ လၢအသးနံၣ်အိၣ်ဒံးဒၣ် ထဲခံနံၣန့ၣ်လီၤ. တၢ်ခးလီၤတၢ်တဘျီအံၤ ဘၣ်ဟးဂီၤစ့ၢ်ကီးဝဲ သဝီဖိ အဟံၣ်ခံဖျၢၣ် ဒီးဘၣ်ဒိဝဲဟံၣ်အဂၤ ယဲၢ်ဖျၢၣ်, ကၠိတၢ်သူၣ်ထီၣ် ခံဖျၢၣ်, သီခါဖၠၣ် တၢ်သူၣ် ထီၣ်တဖျၢၣ် ဒီးထံခိၣ်သ့ၣ်လၢသဝီဖိဟံဝဲန့ၣ်လီၤ. (တၢ်ဂီၤ- လီၢ်ကဝီၤသဝီဖိ)
တၢ်ဂီၤလၢတၢ်ဖီခိၣ်တဘ့ၣ်အံၤ ဘၣ်တၢ်ဒိန့ၢ်အီၤဖဲလါ ယနူၤအါရံၣ် ၁၈ သီ ဒီးတၢ်ဂီၤလၢစုထွဲတကပၤတဘ့ၣ်တခီ ဘၣ်တၢ်ဒိန့ၢ်အီၤဖဲလါဖ့ၣ်ဘြူၤအါရံၣ် ၁ သီ ၂၀၂၄ နံၣ် ဖဲဒ---သဝီ, ကီၣ်လၢၢ်ကရူၢ်, သထူၣ်ကီၢ်ဆၣ်, ဒူသထူၣ်ကီၢ်ရ့ၣ်အပူၤန့ၣ်လီၤ. ဖဲလါယနူၤအါရံၣ် ၁၈ သီအနံၤန့ၣ် ပယီၤသုးမီၤစိရိၤခီၣ်ချ့သုးရ့ၣ် (၉) အသုးလၢ အအိၣ်ဆီလီၤအသးဖဲ ဝ့ပၣ် သုးကလၢၤဖဲသထိၣ်ဝ့ၢ်န့ၣ် ခးလီၤဝဲကျိဖးဒိၣ်ဆူ လီၢ်ကဝီၤ လၢအအိၣ်ဘူးဒီးအဝဲသ့ၣ်အသုးကလၢၤအပူၤန့ၣ်လီၤ. ကျိဖးဒိၣ်ချံလၢတၢ်ခးလီၤအီၤ အ ကျါတဖျၢၣ်န့ၣ် လီၤတဲာ်ပိၢ်ဖးဝဲလၢဒ---သဝီဒီးန---သဝီအဘၢၣ်စၢၤ ဒီးဘၣ်ဒိဝဲစီၤပ--- (၅၇ နံၣ်) ဒီးအမါ, နီၢ်ဖ--- (၅၅ နံၣ်) န့ၣ်လီၤ. ပှၤဒီမူဝၤခံဂၤအံၤ ဘၣ်ဒိဝဲဖဲအဝဲ သ့ၣ်လဲၤပှ့ၤတၢ်လၢတၢ်ဆါတၢ်ပှ့ၤအလီၢ် ဒီးဟဲက့ၤလၢကျဲ ဒ်သိးကက့ၤဆူအသဝီအ ခါန့ၣ်လီၤ. စီၤပ---အံၤအခီၣ်ဘၣ်ဒိဝဲဖးနးညါ ဒ်အဖျါလၢတၢ် ဂီၤလၢဖီခိၣ် အပူၤအ သိး ဒီးမ့မ့ၢ်အမါ နီၢ်ဖ---တခီအစုဘၣ်ဒိဝဲတဆံးတက့ၢ်န့ၣ်လီၤ. ဖဲလါဖ့ၣ်ဘြူၤအါရံၣ် ၁ သီ, ၂၀၂၄ နံၣ်န့ၣ် ပယီၤသုးမီၤစိရိၤ ခီၣ်ချ့သုးရ့ၣ် (၉) အသုးလၢအအိၣ် ဆီလီၤအသးဖဲဝ့ပၣ်သုးကလၢၤန့ၣ် ခးလီၤကဒီးဝဲကျိဖးဒိၣ်ခံဖျၢၣ် ဆူဒ---သဝီပူၤ ဒီးကျိဖးဒိၣ်ချံအက့သၢက့ ဘၣ်ဒိဝဲဖိသၣ်ပိာ်ခွါလၢအမံၤမ့ၢ် စီၤဘ--- ဒီးအသးနံၣ်အိၣ် ၉ နံၣ်တဂၤန့ၣ်လီၤ. ဖိသၣ်ပိာ်ခွါအံၤ အခီၣ်လၢအထွဲတကပၤကၢ်ဝဲ ဒ်အဖျါလၢတၢ်ဂီၤလၢ စုထွဲတပၤအပူၤအသိးန့ၣ်လီၤ. စီၤပ--- ဒီးစီၤဘ---အံၤ လဲၤဒိးကူစါယါဘျါအသးလၢ လီၢ်ကဝီၤကသံၣ်ပှၤမၤတၢ်ဖိအအိၣ် လၢသဝီပူၤန့ၣ်လီၤ. (တၢ်ဂီၤ- လီၢ်ကဝီၤသဝီဖိ)
တၢ်ဂီၤတဘ့ၣ်အံၤ ဘၣ်တၢ်ဒိန့ၢ်အီၤဖဲလါယူၤ ၁၄ သီ, ၂၀၂၃ နံၣ် လၢလီၢ်ကဝီၤတီၤထီကၠိတဖျၢၣ်အပူၤ ဖဲမ---သဝီ, ထီတထူၣ်ကီၢ်ဆၣ်, တီအူကီၢ်ရ့ၣ်အပူၤန့ၣ်လီၤ. ဖဲနံၤအဝဲန့ၤန့ၣ် ပယီၤသုးမီၤစိရိၤ အသုးသ့ၣ်တဖၣ် ခးလီၤနါစိၤဝဲကျိဖးဒိၣ်သ့ၣ်တဖၣ် ဒီးကျိချံလၢတၢ်ခး လီၤအီၤအကျါတဖျၢၣ်န့ၣ် လီၤတဲာ်ဘၣ်ဝဲကၠိဖိပိာ်မုၣ်ဟံၣ်ဒွဲလၢအအိၣ် လၢကၠိကတရၢၢ်ပူၤန့ၣ်လီၤ. ကျိချံအက့ဘၣ်ဒိဝဲ ကၠိဖိပိာ်မုၣ်သၢဂၤ လၢအမံၤမ့ၢ် နီၢ်ယ--- (၁၆ နံၣ်), နီၢ်ရ--- (၁၄ နံၣ်) ဒီးနီၢ်လ--- (၁၅ နံၣ်) န့ၣ်လီၤ. နီၢ်ယ---န့ၣ်ဘၣ်ဒိဝဲလၢအခိၣ်သၣ်, နီၢ်ရ---ဘၣ်ဒိလၢအခိၣ် တိသၣ် ဒီးနီၢ်လ---တခီဘၣ်ဒိဝဲလၢအစုစ့ၣ် ဒ်အဖျါလၢတၢ် ဂီၤပူၤအ သိးန့ၣ်လီၤ. ကၠိဖိသၢဂၤအံၤ ဘၣ်ဒိဝံၤတဘျီဃီ ဘၣ်တၢ်လဲၤ ဆှၢအီၤဆူ မ---တၢ်ဟ့ၣ်ကသံၣ်ဒၢးဒ်သိး ကဒိးကူစါယါဘျါအသးအဂီၢ်န့ၣ်လီၤ. တၢ်ခး လီၤကျိဖးဒိၣ်အံၤ ဘၣ်ဒိဟးဂီၤစ့ၢ်ကီးဝဲကၠိတၢ်သူၣ်ထီၣ်သ့ၣ်တဖၣ် ဒီးတၢ် ကဲထီၣ်သးဝံၤအလီၢ်ခံ ဘၣ်တၢ်ပတုာ်ဃာ်ကၠိတစိၢ်တလီၢ်န့ၣ်လီၤ. (တၢ်ဂီၤ- လီၢ်ကဝီၤသဝီဖိ)
တၢ်ဂီၤတဘ့ၣ်အံၤ ဘၣ်တၢ်ဒိန့ၢ်အီၤဖဲလါအီကူး ၂၆ သီ, ၂၀၂၃ နံၣ် ဖဲဝ---သဝီ, ဟီၣ်ကဝီၤလီၤဆီ, ထီတထူၣ်ကီၢ်ဆၣ်, တီအူကီၢ်ရ့ၣ်အပူၤန့ၣ်လီၤ. တၢ်ဂီၤအံၤပာ်ဖျါဝဲ သဝီဖိလၢအမံၤမ့ၢ် မးသ---လၢအသးနံၣ်အိၣ်ဝဲ ၄၈ ဒီး အိၣ်လၢဝ---သဝီတဂၤ ဘၣ်ဒိၣ်ဝဲဒီးပယီၤ သုးမီၤစိရိၤအသုးအ တၢ်ခးလီၤကျိဖးဒိၣ် လၢအလီၤတဲာ်နုာ်ဆူအ သဝီပူၤဒီး တၢ်လီၢ်ဖဲတၢ်က ပိာ်ကပၤသ့ၣ်တဖၣ်န့ၣ်လီၤ.[1] (တၢ်ဂီၤ- လီၢ်ကဝီၤသဝီဖိ)
တၢ်ဂီၤတဘ့ၣ်အံၤ ဘၣ်တၢ်ဒိန့ၢ်အီၤဖဲလါနိၣ်ဝ့ဘၢၣ် ၂၇ သီ, ၂၀၂၃ နံၣ်လၢသဝီတဖျၢၣ်အပူၤလၢအအိၣ်လၢ ဒ့လိာ်မုၢ်နုာ်ဟီၣ်ကဝီၤ, ထီတထူၣ် ကီၢ်ဆၣ်, တီအူကီၢ်ရ့ၣ်အပူၤန့ၣ်လီၤ. ဖဲနံၤအဝဲန့ၤန့ၣ် ပယီၤသုး မီၤစိရိၤအ သုး လၢအပာ်ဃုၣ်ဒီးခီၣ်သုးရ့ၣ် (၃၉) အသုးလၢအ အိၣ်ဆီလီၤအသးဖဲ လ့မဲၣ် ဒီးခုၣ်နၣ်မဲၣ် သုးကလၢၤသ့ၣ်တဖၣ် ခးလီၤနါစိၤဝဲကျိဖးဒိၣ်ဆူ ဒ့လိာ်မုၢ်နုာ်ဟီၣ်ကဝီၤ ဖဲဟါခီ ၉း၀၄ မံးနံးအခိၣ်အဃၢၤ အဆၢက တီၢ်န့ၣ်လီၤ. ကျိဖးဒိၣ်ချံလၢတၢ် ခးလီၤအီၤ အကျါတဖျၢၣ် လီၤတဲာ်နုာ်ဝဲဆူ သဝီဖိတဂၤအရီဘၢၣ်ကျီးပူၤ အဃိ ဘၣ်ဟးဂီၤဝဲရီဘၢၣ်ထူၣ်တနီၤ ဒီးဟံၣ်တဖျၢၣ်န့ၣ်လီၤ. သဝီဖိလၢအမံၤမ့ၢ် နီၢ်ဟ---စ့ၢ်ကီး အစုနၢၣ်ခံ ဘၣ်ဒိဝဲန့ၣ်လီၤ. (တၢ်ဂီၤ- လီၢ်ကဝီၤသဝီဖိ)
တၢ်ဂီၤတဘ့ၣ်အံၤ ဘၣ်တၢ်ဒိန့ၢ်အီၤဖဲလါနိၣ်ဝ့ဘၢၣ် ၁၇ သီ ၂၀၂၃ နံၣ် ဖဲအ---သဝီ, ဒ့လိာ်မုၢ်နုာ်ဟီၣ်ကဝီၤ, ထီတထူၣ်ကီၢ်ဆၣ်, တီအူကီၢ်ရ့ၣ် အပူၤန့ၣ်လီၤ. ဖဲနံၤအဝဲန့ၤန့ၣ် ပယီၤသုးမီၤစိရိၤအသုး ပာ်ဃုာ်ဒီး ခီၣ်သုး ရ့ၣ် (၃၉) အသုးသ့ၣ်တဖၣ်န့ၣ် ခးလီၤနါစိၤဝဲကျိဖးဒိၣ်ဆူ ဒ့လိာ်မုၢ်နုာ် ဟီၣ်ကဝီၤပူၤ ဒီးကျိဖးဒိၣ်ချံအကျါတဖျၢၣ်န့ၣ် လီၤတဲာ်ပိၢ်ထီၣ်ဝဲလၢစံၣ်ပျီ တဘ့ၣ်အပူၤလၢအအိၣ်ဘူးဒီးအ---သဝီန့ၣ်လီၤ. ကျိချံအက့သ့ၣ်တဖၣ် ဘၣ်သံဝဲသဝီဖိလၢအမံၤမ့ၢ် စီၤဧ---အကျီၢ်တဒုန့ၣ်လီၤ.[2] (တၢ်ဂီၤ- လီၢ်ကဝီၤသဝီဖိ)
တၢ်ဂီၤတဘ့ၣ်အံၤ ဘၣ်တၢ်ဒိန့ၢ်အီၤဖဲလါနိၣ်ဝ့ဘၢၣ် ၂၈ သီ, ၂၀၂၃ နံၣ် ဖဲ ကက---သဝီ, ဒ့လိာ်မုၢ်နုာ်ဟီၣ်ကဝီၤ, ထီတထူၣ်ကီၢ်ဆၣ်, တီအူကီၢ်ရ့ၣ် အပူၤန့ၣ်လီၤ. တၢ်ဂီၤအံၤ ပာ်ဖျါဝဲဟံၣ်တဖျၢၣ်လၢအခိၣ်ဒုး ဘၣ်ဒိလၢပ ယီၤသုးမီၤစိရိၤ ခီၣ်သုးရ့ၣ် (၃၉) အသုးအတၢ်ခးလီၤကျိဖးဒိၣ်လၢ ကက---သဝီပူၤ ဖဲလါနိၣ်ဝ့ဘၢၣ် ၁၉ သီန့ၣ်လီၤ. တၢ်ခးလီၤကျိဖးဒိၣ်အံၤ ဘၣ်ဒိ ဟး ဂီၤစ့ၢ်ကီးဝဲဟံၣ်လၢအဂၤသၢဖျၢၣ် လၢသဝီဝဲန့ၣ်အပူၤန့ၣ်လီၤ.[3] (တၢ်ဂီၤ- KHRG)
တၢ်ဂီၤတဘ့ၣ်အံၤ ဘၣ်တၢ်ဒိန့ၢ်အီၤဖဲလါ ဒံၣ်စဲဘၢၣ် ၁၁ သီ ၂၀၂၃ နံၣ် ဖဲကခ---သဝီ, ဒ့လိာ်မုၢ်နုာ်ဟီၣ်ကဝီၤ, ထီတထူၣ်ကီၢ်ဆၣ်, တီအူကီၢ်ရ့ၣ်အပူၤန့ၣ်လီၤ. ဖဲလါနိၣ်ဝ့ဘၢၣ် ၁၈ သီ, ၂၀၂၃ နံၣ်န့ၣ် ကမျၢၢ်တၢ်ဒီသဒၢသုး (PDF) အပှၤ ၃ ဂၤ လၢအအိၣ်လၢကညီဒီကလုၣ်တၢ်ထူၣ်ဖျဲးသုးမုၢ်ဒိၣ် (KNLA) သုးရ့ၣ် (၅) အဖီလာ် လၢသုးက့ (၂) အပူၤန့ၣ် လဲၤခးဝဲပယီၤသုးမီၤစိရိၤခီၣ်သုးရ့ၣ် (၃၉) အသုးကလၢၤ လၢအအိၣ်လၢ လွံၢ်မံၤလာ်န့ၣ်လီၤ. PDF အသုးသ့ၣ်တဖၣ် အိၣ်လၢ ကခ--- သဝီဒီးခးစိဃီၤဝဲ ကျိဖးဒိၣ်ဆူသုးကလၢၤဝဲန့ၣ် သၢထံၣ်န့ၣ်လီၤ. ခီဖျိတၢ်ခးအဝဲသ့ၣ် အသုးကလၢၤအဃိ ပယီၤသုးမီၤစိရိၤအသုးသ့ၣ်တဖၣ် ခးလီၤကဒါဝဲ ကျိဖးဒိၣ်ဆူ ကခ---သဝီပူၤတဘျုးထံၣ် ဒီးသဝီဖိသ့ၣ်တဖၣ်ဘၣ်လဲၤဃ့ၢ် အိၣ်ကဒုဝဲလၢအတၢ်သူၣ်တၢ်ဖျးအလီၢ်, စံာ်ပျီပူၤ, လၢပှၢ်ပူၤ ဒီးအဘူး အတံၢ်လၢအအိၣ်လၢတၢ်လီၢ်အဂၤအအိၣ် လၢအဝဲသ့ၣ်တၢ်ဘံၣ်တၢ်ဘၢ အဂီၢ်န့ၣ်လီၤ. တၢ်ခးလီၤတၢ်တဘျီအံၤ ဘၣ်ဒိဟးဂီၤစ့ၢ်ကီးဝဲသဝီဖိစီၤ ကဂ---, စီၤကဃ--- ဒီးစီၤကင---အဟံၣ်န့ၣ်လီၤ.[4] (တၢ်ဂီၤ- KHRG)
တၢ်ဂီၤတဘ့ၣ်အံၤ ဘၣ်တၢ်ဒိန့ၢ်အီၤဖဲလါယနူၤအါရံၣ် ၂၀၂၄နံၣ် ဖဲကစ---သဝီ, ထံသးစီဟီၣ်ကဝီၤ, ဒီၣ်ဖါခိၣ်ကီၢ်ဆၣ်, တီအူကီၢ်ရ့ၣ်အပူၤန့ၣ်လီၤ. တၢ်ဂီၤအံၤပာ်ဖျါဝဲသဝီဖိအဟံၣ်တဖျၢၣ် လၢအဘၣ် ဒိဒီးပယီၤသုးမီၤစိရိၤအတၢ်ခးလီၤကျိဖးဒိၣ်ဖဲလါယနူၤအါရံၣ် ၁၉ သီ, ၂၀၂၄ နံၣ်န့ၣ်လီၤ. ဖဲလၢတၢ်ဒုးကဲထီၣ်လၢ လီၢ်ကဝီၤသုးဖီၣ်စုကဝဲၤသ့ၣ်တဖၣ် ဒီးပယီၤသုးမီၤစိရိၤ အသုးပာ်ဖှိၣ် လၢအမ့ၢ် ခီၣ်သုးရ့ၣ် (၂၆) လၢအဘၣ်တၢ်တီခိၣ်ရိၣ်မဲအီၤလၢ သုးရ့ၣ်ခိၣ် ယၣ်စၣ်ထိ ဒီးပယီၤ သုးမီၤစိရိၤအသုးလၢအအိၣ်လၢ ရွှ့ၣ်နၣ်ကလ့သုး ကလၢၤလၢအဘၣ် တၢ်တီခိၣ်ရိၣ်မဲအီၤလၢ ဟၣ်လ့အီၣ်အဘၢၣ်စၢၤအခါန့ၣ်, ပယီၤသုးမီၤစိရိၤအ သုးသ့ၣ်တဖၣ်ခးလီၤနါစိၤ ဝဲကျိဖးဒိၣ်ဆူလီၢ်ကဝီၤလၢ အိၣ်ဘူးအိၣ်တံၢ်ဒီး တၢ်ဒုးကဲထီၣ်အလီၢ်န့ၣ်လီၤ. ကျိဖးဒိၣ်ချံလၢတၢ်ခး လီၤအီၤတနီၤလီၤတဲာ် နုာ်ဝဲဆူသဝီပူၤ ဒီးမၤဘၣ်ဒိဟးဂီၤလီၤကလဲဝဲ သဝီဖိအဟံၣ် ၉ ဖျၢၣ် ဒီးဟံၣ်လၢအဂၤ အဖျၢၣ် ၉၀ စ့ၢ်ကီးဘၣ်ဒိ ဝဲတဆံးတက့ၢ်န့ၣ်လီၤ. တၢ်ဖိတၢ်လံၤလၢအအိၣ်လၢဟံၣ်ပူၤသ့ၣ်တဖၣ်ဘၣ်ဒိဟးဂီၤစ့ၢ်ကီးဝဲအါမးန့ၣ်လီၤ. တၢ်ခးလီၤကျိဖးဒိၣ်အံၤ ဘၣ်သံစ့ၢ်ကီးဝဲသဝီဖိတဂၤလၢအသးနံၣ်အိၣ်ဝဲ ၅၀ ဒီးတဃ့ၢ်ထီၣ်ကွံာ်လၢသဝီပူၤဘၣ် ဖဲလၢတၢ်ဒုးကဲထီၣ်အဆၢကတီၢ်န့ၣ်လီၤ. (တၢ်ဂီၤ- လီၢ်ကဝီၤသဝီဖိ)
တၢ်ဂီၤလၢအစ့ၣ်တဘ့ၣ်အံၤ ဘၣ်တၢ်ဒိန့ၢ်အီၤဖဲလါဖ့ၣ်ဘြူၤအါရံၣ် ၇ သီ ၂၀၂၃ နံၣ် ဒီးတၢ်ဂီၤလၢအထွဲတဘ့ၣ်တခီဘၣ်တၢ်ဒိန့ၢ်အီၤဖဲ လါဖ့ၣ်ဘြူၤအါရံၣ် ၁၃ သီ ၂၀၂၃ နံၣ်န့ၣ်လီၤ. တၢ်ဂီၤခံဘ့ၣ်လၢာ်အံၤ ဘၣ်တၢ်ဒိန့ၢ်အီၤဖဲကဆ---သဝီ, မူဟီၣ်ကဝီၤလီၤဆီ, မူကီၢ်ဆၣ်, ချၢၣ်လွံၢ်ထူၣ်ကီၢ်ရ့ၣ်အပူၤန့ၣ်လီၤ. ဖဲနံၤအဝဲန့ၤန့ၣ် ပယီၤသုးမီၤစိရိၤအသုးသ့ၣ်တဖၣ် လၢအပာ်ဃုာ်ဒီး ခီၣ်ချ့သုးရ့ၣ် (၄၃၉) အပှၤ လၢအအိၣ်ဆီလီၤအသးဖဲ နးသၣ်ကွ့သုးကလၢၤန့ၣ် ဟဲနုာ်လီၤဝဲဆူ ကညီဒီကလုၣ်စၢဖှိၣ်ကရၢ (KNU) တၢ်ပၢဟီၣ်ကဝီၤ ဒီးဘၣ်သဂၢၢ်လိာ်အသးဒီး ကညီဒီကလုၣ်တၢ်ထူၣ်ဖျဲးသုးမုၢ်ဒိၣ်အ သုးသ့ၣ် တဖၣ်လၢအအိၣ်ဖဲ ကရှ---သဝီဒီးကည---သဝီအဘၢၣ်စၢၤန့ၣ်လီၤ. ဖဲလၢတၢ်ဒုးကဲထီၣ်အဆၢကတီၢ်န့ၣ် ပယီၤသုးမီၤစိရိၤအသုးလၢ အအိၣ်ဘူးဒီးနးသၣ်ကွ့အသုးကလၢၤသ့ၣ်တဖၣ် ခးလီၤဝဲကျိဖးဒိၣ်ဆူ ကတ---ဟီၣ်ကဝီၤတကပၤ ကအိၣ်အဖျၢၣ် ၅၀ ဃၣ်ဃၣ်န့ၣ်လီၤ. ကျိဖးဒိၣ်ချံလၢတၢ်ခးလီၤအီၤတနီၤ လီၤတဲာ်နုာ်ဝဲဆူ ကည---သဝီပူၤ ဒီးဘၣ်သံဝဲသဝီဖိ လၢအမံၤမ့ၢ်စီၤကၠၣ်လူ လၢအသးနံၣ်အိၣ်၄၅ နံၣ် ဒီးဘၣ်ဒိ စ့ၢ်ကီးဝဲသဝီဖိအဂၤခံဂၤလၢအမံၤမ့ၢ် စီၤနၣ်ထူ (၃၆ နံၣ်) ဒီးစီၤခဲၣ်စၣ်အူ (၂၆ နံၣ်) န့ၣ်လီၤ. တၢ်ဂီၤလၢအစ့ၣ်တဘ့ၣ်အံၤ ပာ်ဖျါဝဲသဝီဖိလၢအဘၣ်သံလၢတၢ်ခးလီၤကျိဖးဒိၣ်အဂီၤန့ၣ်လီၤ. တၢ်ခးလီၤကျိဖးဒိၣ်တဘျီအံၤ ဘၣ်ဟးဂီၤစ့ၢ်ကီးဝဲ သဝီဖိအဟံၣ်အဖျၢၣ်တဆံ ပာ်ဃုာ်ဒီးဟံၣ် လၢအဖျါလၢတၢ်ဂီၤလၢစုထွဲတကပၤအပူၤန့ၣ်လီၤ. (တၢ်ဂီၤ- လီၢ်ကဝီၤသဝီဖိ ဒီး KHRG)
တၢ်ဂီၤတဘ့ၣ်အံၤ ဘၣ်တၢ်ဒိန့ၢ်အီၤဖဲလါဖ့ၣ်ဘြူၤအါရံၣ် ၂၇ သီ ၂၀၂၃ နံၣ် ဖဲကထ---သဝီ, မူကီၢ်ဆၣ်, ချၢၣ်လွံၢ်ထူၣ်ကီၢ်ရ့ၣ်အပူၤန့ၣ်လီၤ. တၢ်ဂီၤအံၤ ပာ်ဖျါဝဲ ကဒ---သဝီဖိသ့ၣ်တဖၣ် လၢအဘၣ်ဟးဃ့ၢ်အိၣ်ကဒု ခီဖျိပယီၤ သုးမီၤစိရိၤ အတၢ်ခးလီၤနါစိၤကျိဖးဒိၣ်လၢ ကထ---ဟီၣ်ကဝီၤပူၤ ဖဲလါဖ့ၣ် ဘြူၤအါရံၣ် ၂၄ သီ ၂၀၂၃ နံၣ်ပူၤအဃိန့ၣ်လီၤ. (တၢ်ဂီၤ- KHRG)
KHRG ဒိးန့ၢ်တၢ်ဂီၤခံဘ့ၣ်အံၤဖဲလါဖ့ၣ်ဘြူၤအါရံၣ် ၂၁ သီ ၂၀၂၃ နံၣ် လၢကန---သဝီ, မံထွ့ကရူၢ်, မူကီၢ်ဆၣ်, ချၢၣ်လွံၢ်ထူၣ်ကီၢ်ရ့ၣ်န့ၣ်လီၤ. ဖဲနံၤအဝဲန့ၤန့ၣ် ပယီၤသုးမီၤစိရိၤအသုးသ့ၣ်တဖၣ် ခးလီၤနါစိၤဝဲကျိဖးဒိၣ်ဆူ သဝီဖိအိၣ်ဆိးလီၢ်ကဝီၤအပူၤ ဒီးကျိဖးဒိၣ်ချံအကျါတဖျၢၣ် လီၤတဲာ်ဘၣ်ဝဲ ကပ ကဖ---အဟံၣ် လၢအအိၣ်လၢ ကန---သဝီန့ၣ်လီၤ. ကျိဖးဒိၣ်ချံလၢအလီၤတဲာ်ပိၢ်ဖးအံၤ ဘၣ်သံဝဲ ကပ ကဖ--- ဒီးဘၣ်ဒိဝဲအဖိခွါစီၤ ကဘ---အခီၣ်န့ၣ်လီၤ. စီၤကဘ---အံၤအသးနံၣ်အိၣ်ဒံးဒၣ်ထဲ ၅ နံၣ်န့ၣ်လီၤ. (တၢ်ဂီၤ- လီၢ်ကဝီၤသဝီဖိ)
တၢ်ဂီၤအံၤဘၣ်တၢ်ဒိန့ၢ်အီၤဖဲ လါဖ့ၣ်ဘြူၤအါရံၣ် ၂၂ သီ ၂၀၂၄နံၣ် ဖဲကမ---သဝီ, နိၤဘိခံကရူၢ်, မူကီၢ်ဆၣ်, ချၢၣ်လွံၢ်ထူၣ်ကီၢ်ရ့ၣ်အပူၤန့ၣ်လီၤ. ဖဲလါဖ့ၣ်ဘြူၤအါရံၣ် ၁၉ သီ ၂၀၂၄ နံၣ်န့ၣ် ပယီၤသုးမီၤစိရိၤ ရွှ့ၣ်ဝၣ်အသုးရ့ၣ်လၢအအိၣ်ဆီလီၤအသးဖဲသုးကလၢၤလၢအဘူးဒီးပဲနဲကိဝ့ၢ်န့ၣ် ခးလီၤနါစိၤဝဲကျိဖးဒိၣ်သ့ၣ်တဖၣ် ဒီးကျိဖးဒိၣ်ချံလၢတၢ်ခးလီၤအီၤအကျါသၢဖျၢၣ်န့ၣ် လီၤတဲာ်နုာ်ဝဲဆူ ကမ---သဝီပူၤ ဒီးဘၣ်သံဝဲသဝီဖိ စီၤ ကယ---လၢအသးနံၣ်အိၣ်၄၈ နံၣ် ဒီးဘၣ်ဒိဝဲသဝီဖိအဂၤ သၢဂၤန့ၣ်လီၤ. သဝီဖိလၢအဘၣ်ဒိသ့ၣ်တဖၣ်အံၤ ဘၣ်တၢ်လဲၤဆှၢအီၤဆူ KNU တၢ်ဟ့ၣ်ကသံၣ်တဖျၢၣ်လၢအအိၣ်လၢ ကရ--- သဝီ, ယ့ၣ်လဲကရူၢ်ပူၤန့ၣ်လီၤ. တၢ်ခးလီၤတၢ်အံၤ ဘၣ်ဟးဂီၤစ့ၢ်ကီးဝဲသဝီဖိအဟံၣ်သ့ၣ်တဖၣ်န့ၣ်လီၤ. (တၢ်ဂီၤ- KHRG)
်ဂီၤသ့ၣ်ခံဘ့ၣ်အံၤဘၣ်တၢ်ဒိန့ၢ်အီၤဖဲ လါဖ့ၣ်ဘြူၤအါရံၣ် ၂၃ သီ, ၂၀၂၄ နံၣ် ဖဲ ကလ---သဝီ, ပၠ့ယ့ကရူၢ်, ဆီထံးကီၢ်ဆၣ်, ချၢၣ်လွံၢ်ထူၣ်ကီၢ်ရ့ၣ်အပူၤန့ၣ်လီၤ. ဖဲ လါဖ့ၣ်ဘြူၤအါရံၣ် ၂၃ သီန့ၣ် ပယီၤသုးမီၤစိရိၤခီၣ်ချ့သုးရ့ၣ် (၂၀) အသုးလၢအအိၣ်ဆီလီၤအသးဖဲ ပစိၣ်မီၣ်သုးကလၢၤန့ၣ် ပာ်ဖှိၣ်လိာ်အသးဒီး ခီၣ်ချ့သုးတြိၤ (၄၄, ၆၆, ဒီး ၇၇) အသုးသ့ၣ်တဖၣ် ဒီးခးလီၤဝဲကျိဖးဒိၣ်ဆူ သဝီသ့ၣ်တဖၣ်လၢအအိၣ်လၢပၠ့ယ့ကရူၢ်ပူၤန့ၣ်လီၤ. ကျိဖးဒိၣ်ချံလၢတၢ်ခးလီၤအီၤအကျါ ခံဖျၢၣ် လီၤတဲာ်ပိၢ်ဖးဝဲလၢ ကလ---သဝီပူၤ ဒီးသဝီဖိအဟံၣ်ခံဖျၢၣ် အူထီၣ်ကွံာ်ဝဲဃုာ်ဒီးတၢ်ဖိတၢ်လံၤလၢအအိၣ်လၢဟံၣ်ပူၤသ့ၣ်တဖၣ်န့ၣ်လီၤ. တၢ်ခးလီၤကျိဖးဒိၣ်တဘျီအံၤဘၣ်သံစ့ၢ်ကီးဝဲပှၤသဝီဖိပိာ်မုၣ်ခံဂၤ ဒီးဘၣ်ဒိဝဲသဝီဖိအဂၤခံဂၤန့ၣ်လီၤ. နီၢ်ကဝ--- (၆၆ နံၣ်) န့ၣ်အူသံအီၣ်ဝဲလၢမ့ၣ်အူကျါ ဒီးနီၢ်ကသ---(၃၅နံၣ်) န့ၣ် ဘၣ်သံဝဲလၢကျိဖးဒိၣ်ချံအက့ ဒီးအမိၢ်ပှၢ်ဘၣ်အူထီၣ်စ့ၢ်ကီးလၢမ့ၣ်အူန့ၣ်လီၤ. ပှၤသဝီဖိအဂၤတဂၤလၢအမံၤမ့ၢ် နီၢ်ကဟ--- န့ၣ်ဘၣ်ဒိဝဲဒီး ဘၣ်တၢ်လဲၤဆှၢအီၤဆူ တၢ်ဆါဟံၣ်လၢအအိၣ်လၢရွၣ်ကၠ့ၣ်ဝ့ၢ်လၢကဒိးန့ၢ်ကသံၣ်တၢ်ကူစါယါဘျါအဂီၢ်န့ၣ်လီၤ. စီၤကအ--- (၁၇နံၣ်) န့ၣ်အခိၣ်သၣ်, အခၣ် ဒီးအခီၣ်ဘၣ်ဒိဝဲဒ်အဖျါလၢတၢ်ဂီၤလၢစုစ့ၣ်အပူၤအသိး ဒီးဘၣ်တၢ်လဲၤဆှၢအီၤဆူလီၢ်ကဝီၤ KNU တၢ်ဟ့ၣ်ကသံၣ်ဒၢးတဖျၢၣ်န့ၣ်လီၤ. (တၢ်ဂီၤ- လီၢ်ကဝီၤသဝီဖိ)
တၢ်ဂီၤတဘ့ၣ်အံၤ ဘၣ်တၢ်ဒိန့ၢ်အီၤဖဲလါ မ့ၤ ၂၇ သီ ၂၀၂၃ နံၣ် ဖဲမွ့ထွ့ကရူၢ်, မူကီၢ်ဆၣ်, ချၢၣ်လွံၢ်ထူၣ်ကီၢ်ရ့ၣ်အပူၤန့ၣ်လီၤ. ဖဲလါမးရှး ၁၈ သီ ၂၀၂၃ နံၣ်န့ၣ် ပယီၤသုးမီၤစိရိၤခီၣ်ချ့သုးရ့ၣ် (၅၉၉) အသုးလၢအအိၣ်ဆီလီၤအသးဖဲတိတီသုးကလၢၤ ဒီးအသုးအဖုလၢအဂၤသ့ၣ်တဖၣ်န့ၣ်ခးလီၤဝဲကျိဖးဒိၣ်ဆူ ကဧ---ဒီးခက--. သဝီအပူၤန့ၣ်လီၤ. တၢ်ခးလီၤတၢ်အံၤ ဘၣ်ဒိဟးဂီၤဝဲသဝီဖိအဟံၣ်ခံဖျၢၣ် ဒီးသဝီသီခါဖၠၣ်န့ၣ်လီၤ. သဝီဖိသ့ၣ်တဖၣ်ဘၣ်ဃ့ၢ်အိၣ်ကဒုစ့ၢ်ကီးဆူ တၢ်လီၢ်အဂၤန့ၣ်လီၤ. (တၢ်ဂီၤ- KHRG)
တၢ်ဂီၤတဘ့ၣ်အံၤ ဘၣ်တၢ်ဒိန့ၢ်အီၤဖဲလါယူၤ ၁၃ သီ, ၂၀၂၃ နံၣ် ဖဲခခ---သဝီ, ဒီၣ်မူကရူၢ်, လၢၢ်ဒိၣ်ကီၢ်ဆၣ်, ချၢၣ်လွံၢ်ထူၣ်ကီၢ်ရ့ၣ်အပူၤန့ၣ်လီၤ. ဖဲလါယူၤ ၉ သီ ၂၀၂၃ နံၣ်န့ၣ် ပယီၤသုးမီၤစိရိၤအသုးသ့ၣ်တဖၣ် ခးလီၤကျိဖးဒိၣ်ဆူ ခခ---သဝီပူၤ ဒီးကျိချံလၢတၢ်ခးလီၤအီၤအကျါတဖျၢၣ် လီၤတဲာ်ဘၣ်ဝဲတၢ်ဟ့ၣ်ကသံၣ်ဒၢး ဒ်အဖျါလၢတၢ်ဂီၤပူၤအသိးန့ၣ်လီၤ. တၢ်ဟ့ၣ်ကသံၣ်ဒၢးအခိၣ်ဒုး ဒီးကသံၣ်ကသီအပီးအလီလၢ ကသံၣ်ဒၢးပူၤ တနီၤဘၣ်ဒိဟးဂီၤဝဲန့ၣ်လီၤ. (တၢ်ဂီၤ- KHRG)
တၢ်ဂီၤတဘ့ၣ်အံၤ ဘၣ်တၢ်ဒိန့ၢ်အီၤဖဲလါယူၤ ၂၄ သီ ၂၀၂၃ နံၣ် ဖဲခဂ---သဝီ, သဲးခဲၣ်ကိကရူၢ်, ဆီထံးကီၢ်ဆၣ်, ချၢၣ်လွံၢ်ထူၣ်ကီၢ်ရ့ၣ်အပူၤန့ၣ်လီၤ. နံၤအဝဲန့ၤ ကဘၣ်ဖဲဂီၤခီ ၉း၃၂ မံးနံးန့ၣ် ပယီၤသုးမီၤစိရိၤခီၣ်ချ့သုးရ့ၣ် (၂၀) အသုးလၢအအိၣ်ဆီလီၤအသးဖဲ အ့ဝဲၣ်သုးကလၢၤ လၢအအိၣ် လၢအ့ဝဲၣ် ကရူၢ်အပူၤန့ၣ် ခးလီၤဝဲကျိဖးဒိၣ် ၆၀ မမ သ့ၣ်တဖၣ်ဆူ ခဂ---သဝီပူၤ ဒီးကျိချံအက့ဘၣ်ဒိဝဲပှၤသဝီဖိပိာ်မုၣ်သၢဂၤန့ၣ်လီၤ. ဒီၢ် ခဃ--- (၇၅ နံၣ်)န့ၣ် အယီၢ်တဲာ်ခိၣ်ဒီးအဟၢဖၢဘၣ်ဒိဝဲဒီးကျိဖးဒိၣ်ချံအက့တက့ ဖဲအမံလၢအဟံၣ် ပူၤအ ဆၢကတီၢ်န့ၣ်လီၤ. မးခင--- (၄၄ နံၣ်)တ ခီအဖံဘၣ်ခိၣ်လၢ အစ့ၣ်ဒီးအခံကိၢ်ဘၣ်ဒိဝဲ ဒီးအဖိမုၣ် မးခစ--- (၁၀ နံၣ်) တခီအခံကိၢ်ဘၣ်ဒိဝဲန့ၣ်လီၤ. လီၢ်ကဝီၤဒူသဝီဖိသ့ၣ်တဖၣ်ပာ် ဖျါဝဲဒၣ်လၢ ပယီၤသုးမီၤစိရိၤအသုးခးလီၤဝဲကျိဖးဒိၣ်လၢသဝီပူၤ ခီဖျိအဝဲ သ့ၣ်န့ၢ်ဘၣ်တၢ်ကစီၣ်လၢ KNU အပှၤကမၤတၢ်အိၣ်ဖှိၣ်ဒီးပှၤသဝီဖိ လၢသ ဝီပူၤအဃိန့ၣ်လီၤ. (တၢ်ဂီၤ- လီၢ်ကဝီၤသဝီဖိ)
တၢ်ဂီၤတဘ့ၣ်အံၤ ဘၣ်တၢ်ဒိန့ၢ်အီၤဖဲလါယူၤလံ ၁၂ သီ ၂၀၂၃ နံၣ်ဖဲ ခဆ---သဝီ, မၠီၣ်ယိကၠံကရူၢ်, မူကီၢ်ဆၣ်, ချၢၣ်လွံၢ်ထူၣ်ကီၢ်ရ့ၣ်အပူၤန့ၣ်လီၤ. တၢ်ဂီၤအံၤပာ်ဖျါဝဲ သဝီဖိသ့ၣ်တဖၣ်လၢခရှ---သဝီဒီး ခည---သဝီလၢအဘၣ်ဃ့ၢ်ထီၣ်ကွံာ်လၢအ ဒူသဝီခီဖျိ ပယီၤသုးမီၤစိရိၤခီၣ်သုးရ့ၣ် (၅) အသုးသ့ၣ်တဖၣ် ဟဲနုာ်လီၤဆူအသဝီပူၤ ဒီးခးနါစိၤကျိဖးဒိၣ်သ့ၣ် တဖၣ် ဖဲနံၤအဝဲန့ၣ်အဃိန့ၣ်လီၤ. (တၢ်ဂီၤ- KHRG)
တၢ်ဂီၤခံဘ့ၣ်အံၤဘၣ်တၢ်ဒိန့ၢ်အီၤဖဲ လါအီကူး ၂၉ သီ, ၂၀၂၃ နံၣ် ဖဲ ခတ---သဝီ, ပၠ့ယ့ကရူၢ်, ဆီထံးကီၢ်ဆၣ်, ချၢၣ်လွံၢ်ထူၣ်ကီၢ်ရ့ၣ်အပူၤန့ၣ်လီၤ. ဖဲနံၤအဝဲန့ၤန့ၣ် ပယီၤသုးမီၤစိရိၤ ခီၣ်ချ့သုးရ့ၣ် (၂၆၄) အသုးခးလီၤနါစိၤဝဲကျိဖးဒိၣ် ၁၂၀ မမ သ့ၣ်တဖၣ် ဒီးကျိချံလၢတၢ်ခးလီၤအီၤအကျါသၢဖျၢၣ် လီၤတဲာ်ပိၢ်ထီၣ်ဝဲလၢ ခတ---သဝီပူၤ အဃိဘၣ်သံဝဲ ဖိသၣ်ပိာ်မုၣ်ဖိတဂၤ, ဘၣ်ဒိဝဲသဝီဖိအဂၤ ၄ ဂၤ ဒီးဘၣ်ဟးဂီၤဝဲဟံၣ် ၅ ဖျၢၣ်န့ၣ်လီၤ. တၢ်ဂီၤလၢတၢ်ဖီခိၣ်လၢအစ့ၣ်တဘ့ၣ်န့ၣ် ပာ်ဖျါဝဲဟံၣ်လၢအဟးဂီၤအကျါတဖျၢၣ်အဂီၤ ဒီးတၢ်ဂီၤလၢအထွဲတဘ့ၣ်တခီမ့ၢ်ဝဲဖိသၣ်မုၣ်ဖိလၢအသံတဂၤ အဂီၤတချုးတၢ်လဲၤခူၣ်လီၤအီၤအဆၢကတီၢ်န့ၣ်လီၤ. (တၢ်ဂီၤ- လီၢ်က၀ီၤသဝီဖိ)
တၢ်ဂီၤတဘ့ၣ်အံၤတၢ်ဒိန့ၢ်အီၤဖဲ လါအီးကထိဘၢၣ် ၁၈ သီ, ၂၀၂၃ နံၣ်အနံၤ ဖဲ အမ--- သဝီ, ဖၠူဟီၣ်ကဝီၤလီၤဆီ, မူကီၢ်ဆၣ်, ချၢၣ်လွံၢ်ထူၣ်ကီၢ်ရ့ၣ်အပူၤန့ၣ်လီၤ. တၢ်ဂီၤအံၤပာ်ဖျါထီၣ်ဝဲသဝီဖိလၢ အန--- သဝီ, ဖၠူဟီၣ်ကဝီၤလီၤဆီ လၢအဘၣ်ဒိ (၄) ဂၤအကျါ (၁) ဂၤအဂီၤ ဖဲအဝဲဒိးကူစါယါဘျါသးအခါန့ၣ်လီၤ. အဝဲဘၣ်ဒိဝဲဒၣ်ဒီး ကျိဖးဒိၣ် လၢ SAC သုး ခမရ (၃၀၇) ခးလီၤဆူ အမ--- သဝီပူၤ ဖဲလါအီးကထိဘၢၣ် ၁၇ သီ, ၂၀၂၃ နံၣ်အနံၤအခါန့ၣ်လီၤ. SAC သုး ခမရ (၃၀၇) အံၤအိၣ်ဆီလီၤအသးဖဲ စွ့ၤဝၣ်သုးကလၢၤန့ၣ်လီၤ. (တၢ်ဂီၤ - KHRG )
တၢ်ဂီၤတဘ့ၣ်အံၤတၢ်ဒိန့ၢ်အီၤဖဲ လါနိၣ်ဝ့ဘၢၣ် ၂၄ သီ, ၂၀၂၃ နံၣ်အနံၤ ဖဲ အဝ--- သဝီ, အ့ဘလၣ်ကရူၢ်, ဆီထံးကီၢ်ဆၣ်, ချၢၣ်လွံၢ်ထူၣ်ကီၢ်ရ့ၣ်အပူၤန့ၣ်လီၤ. တၢ်ဂီၤအံၤပာ်ဖျါထီၣ်ဝဲသဝီဖိလၢ အဖ--- သဝီ, ကွ့ကိကရူၢ်ပူၤ လၢအဘၣ်ဒိ (၆) ဂၤအကျါ (၁) ဂၤအဂီၤ ဖဲအဝဲဒိးန့ၢ်ဘၣ်ဝဲဒၣ် ဂ့ၢ်ဂီၢ်အူတၢ်ကူစါယါဘျါသး ဖဲအဝ--- တၢ်ဆါဟံၣ်လၢအအိၣ်ဝဲလၢ KNU တၢ်ပၢဆှၢရဲၣ်ကျဲၤအီၤတဖျၢၣ်အပူၤ အခါန့ၣ်လီၤ. သဝီဖိ (၆) ဂၤအံၤဘၣ်ဒိဝဲဒီးကျိဖးဒိၣ်အက့လၢ SAC သုး ခမရ (၂၀) လၢအအိၣ်ဆီလီၤသးလၢ ချၢၣ်လွံၢ်ထူၣ်ဝ့ၢ်သုးကလၢၤ တဖျၢၣ်အပူၤ ခးဝဲကျိဖးဒိၣ် ၁၂၀ မမ (၈) ဖျၢၣ် ဆူ အဖ--- သဝီပူၤ ဖဲလါနိၣ်ဝ့ဘၢၣ် ၂၄ သီ, ၂၀၂၃ နံၣ်အနံၤအခါန့ၣ်လီၤ. (တၢ်ဂီၤ - KHRG )
တၢ်ဂီၤတဘ့ၣ်အံၤတၢ်ဒိန့ၢ်အီၤဖဲ လါဒံၣ်စဲဘၢၣ် ၂၄ သီ, ၂၀၂၃ နံၣ်အနံၤ ဖဲ အခဝ--- သဝီ, ဆီထံးကီၢ်ဆၣ်, ချၢၣ်လွံၢ်ထူၣ်ကီၢ်ရ့ၣ်အပူၤန့ၣ်လီၤ. တၢ်ဂီၤအံၤပာ်ဖျါထီၣ်ဝဲသီခါဖၠၢ်တဖျၢၣ် အခိၣ်ဒုးဘၣ်ဟးဂီၤဝဲဒီး ကျိဖးဒိၣ်ချံ ၁၂၀ မမ လၢ SAC သုး ခမရ (၂၀) လၢအအိၣ်လၢသုးကလၢၤဖဲ ချၢၣ်လွံၢ်ထူၣ်ဝ့ၢ်တဖုခးလီၤဝဲ ဖဲ လါဒံၣ်စဲဘၢၣ် ၁၂ သီ, ၂၀၂၃ နံၣ် ဂီၤခီ အနၣ်ရံၣ် ၁၀ - ၄၀ မံးနံးအဆၢကတီၢ်န့ၣ်လီၤ. SAC သုးအံၤ ခးဝဲကျိဖးဒိၣ်ချံ (၃) ဖျၢၣ်ဆူ အခဝ--- သဝီဒီး ကျိဖးဒိၣ်ချံ (၂) ဖျၢၣ်န့ၣ်လီၤတဲာ်ပိၢ်ဖးထီၣ်ဝဲဖဲ အခဝ--- သဝီဃၢၤဒီး ကျိဖးဒိၣ်ချံအဂၤ (၁) ဖျၢၣ်န့ၣ်လီၤတဲာ်ပိၢ်ဖးထီၣ်ဝဲဖဲ အခဝ---သီခါဖၠၢ်တၢ်သူၣ်ထီၣ်အလီၢ်တဖျၢၣ် ဘၣ်ဒိဟးဂီၤဝဲ တၢ်သူၣ်ထီၣ်အခိၣ်ဒုး ဒီးဘူးဒးတၢ်ဘါအဂီၤတခါန့ၣ်လီၤ. (တၢ်ဂီၤ - KHRG )
တၢ်ဂီၤတဘ့ၣ်အံၤတၢ်ဒိန့ၢ်အီၤဖဲ လါမးရှး ၂၀၂၃ နံၣ်အပူၤ ဖဲအရ---သဝီ, အီပူၤဟီၣ်ကဝီၤ, လၢၢ်မုၢ်လါကီၢ်ဆၣ်, ဘျံး-ဒဝဲၢ်ကီၢ်ရ့ၣ်ပူၤန့ၣ်လီၤ. ဖဲတၢ်တသီန့ၣ်, SAC သုး ခလရ (၂၈၅) အိၣ်ဆီလီၤအသးဖဲ ကလီကိအီပူၤသုးကလၢၤတဖု ခးလီၤဝဲကျိဖးဒိၣ် ၁၂၀ မမ ဆူ အရ--- သဝီပူၤ ဒီးဘၣ်ဒိဝဲ သဝီဖိ (၄) ဂၤန့ၣ်လီၤ. သဝီဖိလၢအဘၣ်ဒိ (၄) ဂၤန့ၣ်မ့ၢ်ဝဲ စီၤအစ--- (၃၈) နံၣ်, ဘၣ်ဒိဝဲဖဲအယီၢ်ဒ့ဒီးအစု, စီၤအထ--- (၃၀) နံၣ်, ဘၣ်ဒိဖဲအသးနါပှၢ်, စီၤအအု--- (၂၅) နံၣ်, ဘၣ်ဒိဖဲအယီၢ်ဒ့, စီၤအဗ--- (၇) နံၣ်, ဘၣ်ဒိဖဲအကိာ်ဘိန့ၣ်လီၤ. စီၤအစ--- တဂၤဘၣ်တၢ်လဲၤဆှၢအီၤဆူအဝ--- တၢ်ဆါဟံၣ်, ပလီဟီၣ်ကဝီၤ, ဒီးတၢ်ဆဲးလဲၤဆှၢကဒါအီၤဆူပလီဝ့ၢ်လၢတၢ်ဒိးကူစါယါဘျါသးအဂီၢ်န့ၣ်လီၤ. (တၢ်ဂီၤ - လီၢ်ကဝီၤသဝီဖိ)
တၢ်ဂီၤတဘ့ၣ်အံၤတၢ်ဒိန့ၢ်အီၤဖဲ လါယူၤ ၂၆ သီ, ၂၀၂၃ နံၣ်အပူၤ ဖဲအဧ--- သီခါဖၠၢ်, အယ---သဝီ, ကမိၤသွ့ဟီၣ်ကဝီၤ, လၢၢ်ဒိၣ်စိကီၢ်ဆၣ်, ဘျံး-ဒဝဲၢ်ကီၢ်ရ့ၣ်ပူၤန့ၣ်လီၤ. ဖဲတၢ်တသီန့ၣ်, သုးဖီၣ်စုကဝဲလၢတၢ်တသ့ၣ်ညါအီၤဘၣ်တဖုခးလီၤဝဲကျိဖးဒိၣ်ဆူသဝီပူၤဒီးဘၣ်ဒိဝဲသဝီဖိ (၂) ဂၤန့ၣ်လီၤ. သဝီဖိလၢအဘၣ်ဒိ (၂) ဂၤန့ၣ်မ့ၢ်ဝဲ ဒီၤဘင--- (၆၅) နံၣ်, ဒီး အဖိမုၣ် ဒီၤဘဒ--- (၄၅) နံၣ်, ဘၣ်ဒိဝဲဒၣ်ဒီးကျိဖးဒိၣ်ချံအက့ဖဲအစု ဖဲအဧ--- သီခါဖၠၢ်ကရၢၢ်ပူၤန့ၣ်လီၤ. ပှၤဘၣ်ဒိ (၂) ဂၤအံၤဘၣ်တၢ်လဲဆှၢအီၤဆူ ဘဃ--- တၢ်ဆါဟံၣ် လၢအယ--- သဝီ ဒီးဖဲန့ၣ်တၢ်ဆဲးလဲၤဆှၢကဒါအီၤဆူ ခၠါမၠ့ၣ်တၢ်ဆါဟံၣ် လၢဒဝဲၢ်ဝ့ၢ် လၢတၢ်ဒိးကူစါယါဘျါသးအဂီၢ်န့ၣ်လီၤ. (တၢ်ဂီၤ - လီၢ်ကဝီၤသဝီဖိ)
တၢ်ဂီၤတဘ့ၣ်အံၤတၢ်ဒိန့ၢ်အီၤဖဲ လါအီကူး ၁၉ သီ, ၂၀၂၃ နံၣ်အပူၤ ဖဲဘဟ---သဝီ, ပလီဟီၣ်ကဝီၤ, လၢၢ်မုၢ်လါကီၢ်ဆၣ်, ဘျံး-ဒဝဲၢ်ကီၢ်ရ့ၣ်ပူၤန့ၣ်လီၤ. ဖဲ လါအီကူး ၁၉ သီအနံၤန့ၣ် SAC သုး ခလရ (၂၈၅) လၢအအိၣ်ဆီလီၤအသးဖဲ ပလီအဝ့ၢ်တဖု ခးဝဲကျိဖးဒိၣ်ဆူ ဘဟ--- သဝီပူၤဒီးဘၣ်သံပှၤမုၢ်ပှၢ် (၁) ဂၤ ဒီးဘၣ်ဒိဝဲအဖိခွါ (၁) ဂၤန့ၣ်လီၤ. SAC သုးတဖၣ်ခးဝဲကျိးဖးဒိၣ်လၢလီၢ်ကဝီၤပူၤတပယူာ်ဃီန့ၣ်လီၤ. (တၢ်ဂီၤ - လီၢ်ကဝီၤသဝီဖိ)
တၢ်ဂီၤတဘ့ၣ်အံၤတၢ်ဒိန့ၢ်အီၤဖဲ လါစဲးပထံဘၢၣ် ၂၀၂၃ နံၣ်အပူၤ ဖဲပလီဟီၣ်ကဝီၤ, လၢၢ်မုၢ်လါကီၢ်ဆၣ်, ဘျံး-ဒဝဲၢ်ကီၢ်ရ့ၣ်ပူၤန့ၣ်လီၤ. တၢ်ဂီၤအံၤပာ်ဖျါထီၣ်ဝဲပှၤဖိသၣ် လၢအဘၣ်ဃ့ၢ်မှံဟးဖျိးတဖၣ် မၤလိသကိးတၢ်ဖဲ တၢ်ဃ့ၢ်အိၣ်ကမှံလီၢ်တတီၤန့ၣ်လီၤ. ပှၤဃ့ၢ်မှံဟးဖျိး ဖိအိၣ်ဝဲ (၁,၆၉၁) ဂၤ လၢသဝီ (၄၅) ဖျၢၣ်လၢ ဘၣ်ဃ့ၢ်အိၣ်ကမှံဝဲဖဲ လၢၢ်မုၢ်လါကီၢ်ဆၣ်အပူၤန့ၣ်လီၤ. သဝီဖိလၢသဝီ (၄၅) ဖျၢၣ်အံၤဘၣ်ဃ့ၢ်အိၣ်ကမှံမ့ၢ်လၢ SAC သုးခးကျိဖးဒိၣ် ဒီး မၤဝဲအသုးတၢ်ဟူးတၢ်ဂဲၤအဂၤတဖၣ်အဃိန့ၣ်လီၤ. ပှၤဃ့ၢ်အိၣ်ကမှံတဖၣ်အံၤဒိးန့ၢ်ဘၣ်ဝဲပှၤဂ့ၢ်ဝီတၢ်လိၣ်ဘၣ်တၢ်ဆီၣ်ထွဲမၤစၢၤလၢလီၢ်ကဝီၤပှၤတဝၢတၢ်ကရၢကရိ (CBOs/CSOs) တနီၤအအိၣ်န့ၣ်လီၤ. (တၢ်ဂီၤ - KHRG)
တၢ်ဂီၤတဘ့ၣ်အံၤတၢ်ဒိန့ၢ်အီၤဖဲ လါစဲးပထံဘၢၣ် ၂၀၂၃ နံၣ်အပူၤ ဖဲဘခ---သဝီ, ကျဲမုၢ်ထံးဟီၣ်ကဝီၤ, ကစၢၢ်ဒိၣ်ကီၢ်ဆၣ်, ဘျံး-ဒဝဲၢ်ကီၢ်ရ့ၣ်ပူၤန့ၣ်လီၤ. တၢ်ဂီၤအံၤပာ်ဖျါထီၣ်ဝဲ ကျိဖးဒိၣ်ချံလၢအတ ပိၢ်ဖးထီၣ်ဒံးဘၣ်တဖျၢၣ် (UXO) အဂီၤ လၢ SAC သုးခးဝဲဖဲ လါစဲးပထံဘၢၣ် ၂၃ သီ, ၂၀၂၃ နံၣ်ဖဲတၢ်ဒုးကဲထီၣ်ဝဲဒၣ်ဒီး PDF သုးအဘၢၣ်စၢၤအခါန့ၣ်လီၤ. ဒူသဝီခိၣ်နၢ်တဖၣ် ဒုးသ့ၣ်ညါဝဲ လီၢ်ကဝီၤ KNU ပှၤဘၣ်မူဘၣ်ဒါတဖၣ် ဒီး မၢဝဲအတၢ်လဲၤမၤပျီကွံာ် UXO တဖျၢၣ်အံၤန့ၣ်လီၤ. ဒူဖိသဝီဖိသ့ၣ်တဖၣ်တူၢ်ဘၣ်ဝဲဒၣ်လၢ တၢ်ဘံၣ်တၢ်ဘၢတအိၣ်ဝဲဒၣ်လၢအဝဲသ့ၣ်အဂီၢ်လၢကလဲၤဖံးမၤတၢ်လၢအစံာ်ပှဲၤပူၤ ဒီးကျီးပူၤဘၣ် မ့ၢ်လၢ ဖးဒိၣ်ချံလၢအတပိၢ်ဖးထီၣ် ဒံးဘၣ်တဖၣ်အိၣ်ဝဲအါထီၣ်လၢလီၢ်ကဝီၤပူၤအဃိန့ၣ်လီၤ. (တၢ်ဂီၤ - လီၢ်ကဝီၤသဝီဖိ)
တၢ်ဂီၤတဘ့ၣ်အံၤတၢ်ဒိန့ၢ်အီၤဖဲ လါနိၣ်ဝ့ဘၢၣ် ၂၅ သီ, ၂၀၂၃ နံၣ်အပူၤ ဖဲဘလ---သဝီ, ပလီဟီၣ်ကဝီၤ, လၢၢ်မုၢ်လါကီၢ်ဆၣ်, ဘျံး-ဒဝဲၢ်ကီၢ်ရ့ၣ်ပူၤန့ၣ်လီၤ. တၢ်ဂီၤအံၤပာ်ဖျါထီၣ်ဝဲဟံၣ် (၂) ဖျၢၣ်အကျါဟံၣ်တဖျၢၣ်အဂီၤ လၢအဟးဂီၤကွံာ်ဝဲ ခီဖျိလၢ SAC သုး ခလရ (၂၈၆) ခးလီၤဝဲကျိဖး ဒိၣ်ဆူသဝီပူၤအခါ န့ၣ်လီၤ. လၢကျိဖးဒိၣ်လီၤတဲာ်ပိၢ် ဖးထီၣ်အဘျီဝဲအံၤန့ၣ်ဘၣ်ဒိ ဝဲသဝီဖိတဂၤန့ၣ်လီၤ. သဝီဖိခဲလၢာ်ဃ့ၢ်ထီၣ်ကွံာ်ဝဲလၢကပူၤဖျဲးဒီးတၢ်လီၤဘၣ်ယိၣ်န့ၣ်လီၤ. SAC သုး ခလရ (၂၈၆) အံၤအိၣ်ဆီလီၤအသးဖဲ ပလီအဝ့ၢ်န့ၣ်လီၤ. (တၢ်ဂီၤ - လီၢ်ကဝီၤသဝီဖိ)
ဤဓာတ်ပုံများကို ၂၀၂၃ ခုနှစ်၊ ဒီဇင်ဘာလ (၃) ရက်နေ့၌ ဘိတ်-ထားဝယ်ခရိုင်၊ လယ်ကဆောမြို့နယ်၊ စတင်နယ်မြေ၊ ခဒ--- ကျေးရွာတွင် ရိုက်ယူခဲ့သည်။ အထက်ပါဘယ်ဘက်ခြမ်းရှိပုံသည် ဒီဇင်ဘာလ (၁) ရက်နေ့၌ SAC နှင့် ဒေသခံ PDF တို့ကြားတိုက်ပွဲ ဖြစ်ပွားပြီးနောက် SAC ခြေလျင်တပ်ရင်း (ခလရ) အမှတ် (၃၅၈) နှင့် ခြေမြန်တပ်ရင်း (ခမရ) အမှတ် (၂၂၄) တို့၏ ယမ်းသမ်းပစ်ခတ်မှုကြောင့် ပျက်စီးသွားသောဘုရားကျောင်းတစ်လုံး၏ပုံဖြစ်ပါသည်။ ထို့အပြင် အိမ်နှစ်လုံးလည်းပျက်စီးခဲ့သည်။ ညာဘက်ခြမ်းရှိပုံသည် သေနတ်ကျည်ဆံအခွံများဖြစ်ပါသည်။ (ဓာတ်ပုံ - KHRG)
တၢ်ဂီၤတဘ့ၣ်အံၤတၢ်ဒိန့ၢ်အီၤဖဲ လါဒံၣ်စဲဘၢၣ် ၆ သီ, ၂၀၂၃ နံၣ်အပူၤ ဖဲဘန---သဝီ, ဝါယ့ၣ်ဟီၣ်ကဝီၤ, တနီသရံၣ်ကီၢ်ဆၣ်, ဘျံး-ဒဝဲၢ်ကီၢ်ရ့ၣ်ပူၤန့ၣ်လီၤ. တၢ်ဂီၤ အံၤပာ်ဖျါထီၣ်ဝဲ ဘဖ---သဝီဖိတဖၣ်အဘၣ် ဃ့ၢ်ထီၣ်ကွံာ်လၢအသဝီပူၤ မ့ၢ်လၢ SAC သုး ခးလီၤဝဲကျိးဒိၣ်ဆူအသဝီပူၤ ဖဲလါဒံၣ်စဲဘၢၣ် ၆ သီအနံၤန့ၣ်လီၤ. ဖဲအဝဲသ့ၣ်ဃ့ၢ်အိၣ်ကဒုဝဲအခါ ဘၣ်ကွၢ်ဆၢၣ်မဲာ်ဝဲဒၣ်ဒီး တၢ်လုၢ်အီၣ်နီၢ်ခိသးမူတၢ်ဂ့ၢ်ကီ မ့ၢ်လၢတၢ်တြီမၤတံာ်တာ်လၢတၢ်လဲၤထီၣ်က့ၤလီၤ ဒီး တၢ်ဘၣ်ဂံာ်ဂုာ်ကဲထီၣ်ဒံးဝဲအသးအဖၢမုၢ်အဃိန့ၣ်လီၤ. အဝဲသ့ၣ်တဒိးန့ၢ်ဘၣ် တၢ်ဒိးကူစါယါဘျါသး ဒီး အဖိသ့ၣ်တဖၣ်စ့ၢ်ကီးတမၤလိဘၣ်တၢ်ဘၣ်န့ၣ်လီၤ. (တၢ်ဂီၤ - လီၢ်ကဝီၤသဝီဖိ)
တၢ်ဂီၤတဘ့ၣ်အံၤတၢ်ဒိန့ၢ်အီၤဖဲ လါဒံၣ်စဲဘၢၣ် ၂၁ သီ, ၂၀၂၃ နံၣ်အပူၤ ဖဲဘခယ---သဝီ, အီပူၤဟီၣ်ကဝီၤ, လၢၢ်မုၢ်လါကီၢ်ဆၣ်, ဘျံး-ဒဝဲၢ်ကီၢ်ရ့ၣ်ပူၤန့ၣ်လီၤ. ဖဲတၢ်တသီအံၤန့ၣ် SAC သုး ခလရ (၂၈၅) ခးလီၤဝဲကျိဖးဒိၣ် အဖျၢၣ် (၈၀) ဃၣ်ဃၣ်ဆူ ဘခယ--- သဝီပူၤအဃိ ဘၣ်ဟးဂီၤဝဲ သဝီဖိအဘုဖီ (၁) ဖျၢၣ် ဒီး ဟံၣ် (၂) ဖျၢၣ်န့ၣ်လီၤ. ဟံၣ် (၂) ဖျၢၣ်အံၤအူအီၣ်ကွံာ်ဝဲအဃိ တၢ်ဖိတၢ်လံၤလၢအအိၣ်လၢဟံၣ်ပူၤ တဖၣ်ဟးဂီၤကွံာ်ဝဲခဲလၢာ်န့ၣ်လီၤ. ကျိဖးဒိၣ်က့အချ့ ဘၣ်ဝဲသဝီဖိတဂၤ အခိၣ်သၣ်ဃံ ဒီး ဘၣ်တၢ်လဲၤဆှၢအီၤဆူ ဘရ--- တၢ်ဆါဟံၣ်, ဖဲပလီဟီၣ်ကဝီၤ, လၢၢ်မုၢ်လါကီၢ်ဆၣ်ပူၤန့ၣ်လီၤ. သဝီဖိလၢအဘၣ်ဒိတဂၤအံၤ တၢ်ဆဲးလဲၤဆှၢအီၤဆူတၢ်ဆါဟံၣ် တဖျၢၣ်လၢ ယိၤကီၢ်ပူၤန့ၣ်လီၤ. (တၢ်ဂီၤ - လီၢ်ကဝီၤသဝီဖိ)
တၢ်ဂီၤတဘ့ၣ်အံၤတၢ်ဒိန့ၢ်အီၤဖဲ လါယနူၤအါရံၤ ၂၀ သီ, ၂၀၂၄ နံၣ်အပူၤ ဖဲဘစ---သဝီ, ကၠးအ့ခၠီကရူၢ်, တနီသရံၣ်ကီၢ်ဆၣ်, ဘျံး-ဒဝဲၢ်ကီၢ်ရ့ၣ်ပူၤန့ၣ်လီၤ. တၢ်ဂီၤအံၤပာ်ဖျါထီၣ်ဝဲ သဝီဖိတဂၤဘၣ်သံဖဲကျိဖးဒိၣ်ချံလီၢ်လံၤတဖျၢၣ်ပိၢ်ဖးထီၣ်ဝဲအခါန့ၣ်လီၤ. ကျိဖးဒိၣ်ချံအံၤဘၣ်တၢ်ခးအီၤလၢ SAC သုးတဖု ဒီးဖဲတၢ်ခးအီၤအခါန့ၣ်တပိၢ်ထီၣ်ဝဲဘၣ်န့ၣ်လီၤ. သဝီဖိအံၤ ကျီဘၣ်ဝဲကျိဖးဒိၣ်ချံအံၤလၢတၢ်တပှီၤကျါ ဖဲအဝဲမၤပျီအကျီးဒီးကျီပျီဝဲနီၣ်တဖၣ်အခါန့ၣ်လီၤ. (တၢ်ဂီၤ - လီၢ်ကဝီၤသဝီဖိ)
တၢ်ဂီၤတဘ့ၣ်အံၤတၢ်ဒိန့ၢ်အီၤဖဲ လါအီကူး ၁၆ သီ, ၂၀၂၃ နံၣ်အပူၤ ဖဲ ဘဖ--- သဝီ, မဲးကျီကရူၢ်, ဘုသိၣ်ကီၢ်ဆၣ်, မုၢ်တြီၢ်ကီၢ်ရ့ၣ်အပူၤ န့ၣ်လီၤ. တၢ်ဂီၤအံၤပာ်ဖျါထီၣ်ဝဲ ဘဖ--- သဝီဖိ အူဘဧ--- (၅၃ နံၣ်) လၢအဘၣ်သံဒီး SAC ကျိဖးဒိၣ်ချံ ဖဲလါအီကူး ၁၅ သီ, ၂၀၂၃ န့ၣ်အနံၤ ဖဲလၢ SAC သုးခးဝဲကျိဖးဒိၣ်ဖဲအဘၣ်သဂၢၢ်ခးလိာ်သးဒီး KNLA သုးအခါန့ၣ်လီၤ. အူဘဧ--- အံၤဘၣ်ဝဲဒီး ကျိဖးဒိၣ်ချံအက့ ဖဲအဝဲမၤတၢ်လၢအစံာ်ပူၤအခါန့ၣ်လီၤ. ဖဲတဟါဃီဒီးတၢ်ကဲထီၣ်သး ဝံၤန့ၣ် မ့ၢ်လၢ အူဘဧ--- အံၤတဟဲက့ၤလၢဟံၣ်ဘၣ်အဃိ, အဟံၣ်ဖိဃီဖိတဖၣ်လဲၤဃုအီၤဒီး ထံၣ်က့ၤဝဲအူဧ--- အသံစိၣ်လၢ မုၢ်ဆ့ၣ်ထီၣ်တနံၤမၣ်န့ၣ်လီၤ. သဝီဖိသ့ၣ်တဖၣ်ခူၣ်လီၤကွံာ်အီၤတနံၤ ဃီန့ၣ်လီၤ. (တၢ်ဂီၤ- လီၢ်ကဝီၤသဝီဖိ)
တၢ်ဂီၤတဘ့ၣ်အံၤတၢ်ဒိန့ၢ်အီၤဖဲ လါအ့ဖြ့ၣ် ၄ သီ, ၂၀၂၃ နံၣ်အပူၤ ဖဲ စီၤမုၢ်ပျီကရူၢ်, လူၤသီကီၢ်ဆၣ်, မုၢ်တြီၢ်ကီၢ်ရ့ၣ်အပူၤန့ၣ်လီၤ. တၢ်ဂီၤအံၤ ပာ်ဖျါထီၣ်ဝဲ ဘတ--- သဝီဖိတဖၣ်လၢဃ့ၢ်အိၣ်ကဒုဝဲ ခီဖျိလၢ SAC သုးလၢအအိၣ်ဆီလီၤသးဖဲ ပီၤဃ့ခိၣ်သုးကလၢၤတဒူၣ် ခးလီၤဝဲကျိဖး ဒိၣ် ၁၂၀ မမ လၢသဝီပူၤအဃိန့ၣ်လီၤ. သဝီဖိသ့ၣ်တဖၣ်ဘၣ် ဃ့ၢ်ထီၣ်အိၣ်ကဒုဝဲလၢ ပှၢ်ပူၤလၢအသးသမူတၢ်ပူၤဖျဲးအဂီၢ်န့ၣ်လီၤ. (တၢ်ဂီၤ- လီၢ်ကဝီၤသဝီဖိ)
တၢ်ဂီၤတဘ့ၣ်အံၤတၢ်ဒိန့ၢ်အီၤဖဲ လါအီးကထိဘၢၣ် ၂၄ သီ, ၂၀၂၃ နံၣ်အပူၤ ဖဲ ဘည--- သဝီ, မးထီကရူၢ်, ဒွဲၣ်လိကီၢ်ဆၣ်, မုၢ်တြီၢ်ကီၢ် ရ့ၣ်အပူၤန့ၣ်လီၤ. ဖဲ လါအီးကထိဘၢၣ် ၁၈ သီ, ၂၀၂၃ နံၣ်အနံၤ န့ၣ် SAC သုးဖိလၢအအိၣ်လၢမးထီသုးကလၢၤပူၤတဖၣ် နုာ်လီၤခီ ဂာ်ဝဲဆူ KNU တၢ်ပၢဟီၣ်ကဝီၤပူၤ လၢအကလဲၤဟံးန့ၢ် အသုးတၢ် အီၣ် ဒီးသုးတၢ်စုကဝဲၤပီးလီတဖၣ်အခါ, အဝဲသ့ၣ်ခးဝဲကျိဖးဒိၣ် တဖၣ်ဖဲလၢ အဘၣ်သဂၢၢ်ခးလိာ်သးဒီး KNLA သုးအခါန့ၣ်လီၤ. ကျိဖးဒိၣ်ချံတဖျၢၣ်လီၤတဲာ်ပိၢ်ဖးထီၣ်ဝဲဖဲ ဘည--- ကၠိကရၢၢ်ပူၤ အဃိ ပှၤကၠိဖိသ့ၣ်တဖၣ်ပျံၤတၢ်ဖုးတၢ် ဒီး လဲၤထီၣ်က့ၤကၠိတဘူၣ် လၢၤဘၣ်န့ၣ်လီၤ. SAC သုးလၢအအိၣ်ညီနုၢ်ဖဲ မးထီသုးကလၢၤပူၤ တဖၣ်မ့ၢ်ဝဲဒၣ် ခမရ (၄၀၁, ၄၀၂, ၄၀၄, ၄၀၇ ဒီး ၄၁၀) တဖၣ်န့ၣ်လီၤ. ဖဲ ၂၀၂၃ နံၣ် ဒီတနံၣ်ကျၢၤအပူၤ SAC သုးသ့ၣ်တဖၣ်အံၤ ခးဝဲကျိဖးဒိၣ်တဖၣ်ဆူ ကရူၢ်လွံၢ်ဘ့ၣ်အပူၤလၢ အအိၣ်ဘူးဒီးအသုးကလၢၤခိၣ်ဃၢၤန့ၣ်လီၤ. (တၢ်ဂီၤ - KHRG)
တၢ်ဂီၤတဘ့ၣ်အံၤတၢ်ဒိးန့ၢ်ဘၣ်အီၤဖဲ လါနိၣ်ဝ့ဘၢၣ် ၂၇ သီ, ၂၀၂၃ နံၣ်အပူၤ ဒီး တၢ်ဒိန့ၢ်အီၤလၢ ဘယ--- သဝီ, မးထီကရူၢ်, ဒွဲၣ်လိကီၢ်ဆၣ်, မုၢ်တြီၢ်ကီၢ်ရ့ၣ်အပူၤန့ၣ်လီၤ. တၢ်ဂီၤအံၤပာ်ဖျါထီၣ်ဝဲ ကျိဖးဒိၣ်ချံအခံပၣ်တဖၣ် လၢ SAC သုးခးဝဲ ဒီး ပိၢ်ဖးထီၣ်ဝဲတဖၣ်န့ၣ်လီၤ. သဝီဖိသ့ၣ်တဖၣ်ထၢပာ်ဖှိၣ် ဃာ်ဝဲ ဖးဒိၣ်ချံအခံပၣ်တဖၣ်အံၤန့ၣ်လီၤ. (တၢ်ဂီၤ - လီၢ်ကဝီၤသဝီဖိ)
တၢ်ဂီၤခံဘ့ၣ်အံၤဘၣ်တၢ်ဒိန့ၢ်အီၤဖဲ လါမးရှး ၂ သီ, ၂၀၂၃ နံၣ်ပူၤန့ၣ်လီၤ. တၢ်ဂီၤလၢအစ့ၣ်တဘ့ၣ်အံၤတၢ်ဒိန့ၢ်အီၤ ဖဲ ဘဆ--- သဝီ ဒီးတၢ်ဂီၤလၢအဖီခိၣ်တဘ့ၣ်အံၤတၢ်ဒိန့ၢ်အီၤဖဲ စဒ--- သဝီ, ပနွဲၢ်ကျါကရူၢ်, ကီးတရံးကီၢ်ဆၣ်, ဒူပျာ်ယာ်ကီၢ်ရ့ၣ်ပူၤန့ၣ်လီၤ. တၢ်ဂီၤလၢအစ့ၣ်တဘ့ၣ်အံၤပာ်ဖျါဝဲ ဘဆ--- သီခါဖၠၢ်လၢအဟးဂီၤ တဖျၢၣ်အဂီၤ ဒီး မ့မ့ၢ်တၢ်ဂီၤလၢအဖီခိၣ်တဘ့ၣ် အံၤတခီ ပာ်ဖျါဝဲ စဒ--- သဝီဖိတဂၤအကျီၢ်ဖိတဒုလၢအဘၣ်ဒိသံဝဲ အဂီၤန့ၣ်လီၤ. တၢ်ကဲထီၣ်သးလၢတၢ်ဂီၤခံဘ့ၣ်လၢာ်အံၤအပူၤန့ၣ် မ့ၢ်ဝဲ SAC သုးဖိတဖၣ်ခးဝဲကျိဖးဒိၣ်တဖၣ် ဖဲတၢ်ဒုးကဲထီၣ်ဒီး KNLA, PDF သုးပာ်ဖှိၣ်အဆၢကတီၢ်အခါ ဖဲလါမးရှး ၂ သီ, ၂၀၂၃ နံၣ်အနံၤန့ၣ်လီၤ. (တၢ်ဂီၤ - လီၢ်ကဝီၤသဝီဖိ)
တၢ်ဂီၤလၢအဖီခိၣ်အံၤ တၢ်ဒိန့ၢ်အီၤဖဲ ဖဲလါမ့ၤ ၁၆ သီ, ဖဲ ငဃ--- သဝီ, ရီၢ်ကဲကရူၢ်, ကြုၢ်တုကီၢ်ဆၣ်, ဒူပျာ်ယာ်ကီၢ်ရ့ၣ်အပူၤန့ၣ်လီၤ. တၢ်ဂီၤအံၤ ပာ်ဖျါဝဲ အူငဧ---အဟံၣ်လၢအဟးဂီၤတဖျၢၣ်အဂီၤန့ၣ်လီၤ. ဟံၣ်ဃီတၢ်ပီးတၢ်လီတဖၣ်ဟးဂီၤကွံာ်ဝဲ ခီဖျိလၢ SAC သုး ခလရ (၉၇) ခးလီၤဝဲကျိဖးဒိၣ် ၁၂၀ မမ ဆူ ငဃ---သဝီပူၤ ဖဲလါမ့ၤ ၁၄ သီ, ၂၀၂၃ န့ၣ်အနံၤအခါန့ၣ်လီၤ. SAC သုး ခလရ (၉၇) သုးရ့ၣ်အံၤ အိၣ်ဆီလီၤအသးလၢ လဲၤဝၣ်သုးကလၢၤပ ဖဲကီးတရံးကီၢ်ဆၣ်ပူၤန့ၣ်လီၤ. (တၢ်ဂီၤ - KHRG)
တၢ်ဂီၤတဘ့ၣ်အံၤဘၣ်တၢ်ဒိန့ၢ်အီၤဖဲ လါမ့ၤ ၂၀၂၃ နံၣ်ပူၤ ဖဲ Cf--- သဝီ, ယွၤကလ့ကရူၢ်, ကြုၢ်တုကီၢ်ဆၣ်, ဒူပျာ်ယာ်ကီၢ်ရ့ၣ်ပူၤန့ၣ်လီၤ. တၢ်ဂီၤအံၤပာ်ဖျါထီၣ်ဝဲ သဝီဖိတဂၤအဟံၣ် လၢအဘၣ်ဟးဂီၤဝဲဒီးကျိဖိးဒိၣ် လၢ SAC ခမရ (၅၄၆) ခးလီၤဝဲ ဖဲလါမ့ၤ ၂၈ သီ, ၂၀၂၃ နံၣ်အနံၤန့ၣ်လီၤ. လၢတၢ်ခးလီၤကျိဖးဒိၣ်အဘျီဝဲအံၤ ဘၣ်ဒိစ့ၢ်ကီးဝဲ ဖိသၣ် (၁) ဂၤန့ၣ်လီၤ. SAC သုး ခမရ (၅၄၆) အံၤဘၣ်တၢ်တီခိၣ်ရိၣ်မဲအီၤလၢ သုးရ့ၣ်ခိၣ် အိၣ်ခၣ်မ့ န့ၣ်လီၤ. (တၢ်ဂီၤ - KHRG)
တၢ်ဂီၤတဘ့ၣ်အံၤဘၣ်တၢ်ဒိန့ၢ်အီၤဖဲ လါယူၤ ၇ သီ, ၂၀၂၃ နံၣ်ပူၤ ဖဲ ငဖ--- သဝီ, ဃိၣ်သၢဆံကရူၢ်, ကီးတရံးကီၢ်ဆၣ်, ဒူပျာ်ယာ်ကီၢ်ရ့ၣ်ပူၤန့ၣ်လီၤ. ဖဲတၢ်တသီန့ၣ် SAC သုး ခမရ (၂၀၂) လၢအအိၣ်လၢ တမ (၂၂) တၢ်ပၢအဖီလာ်တဖုခးလီၤဝဲကျိဖးဒိၣ် ၁၂၀ မမ ဆူ ငဖ--- သဝီပူၤ ဒီးဘၣ်သံဝဲဖိသၣ်ဖိတဂၤ ဒီးဘၣ်ဒိဃုာ်စ့ၢ်ကီးဝဲ ပှၤအဂၤ (၂) ဂၤလၢဟံၣ်ဖိဃီဖိတဒူၣ်ဃီအပူၤန့ၣ်လီၤ. နီၢ်ငဝ--- (၄၃) နံၣ် ဒီး အဖိခွါဆံး ငရ--- (၄ နံၣ်) အံၤဘၣ်ဒိဝဲ ဒီးမ့မ့ၢ်အဖိခွါဒိၣ် ငစ--- (၁၂) နံၣ်တဂၤတခီ သံကွံာ်ဝဲတဘျီဃီဖဲအဘၣ်ဒီးကျိဖးဒိၣ်ချံက့အခါန့ၣ်လီၤ. (တၢ်ဂီၤ - လီၢ်ကဝီၤသဝီဖိ)
တၢ်ဂီၤတဘ့ၣ်အံၤဘၣ်တၢ်ဒိန့ၢ်အီၤဖဲ လါမ့ၤ ၂၃ သီ, ၂၀၂၃ နံၣ်ပူၤ ဖဲ ငက--- ဝ့ၢ်ပူၤ, ကြုၢ်တုကီၢ်ဆၣ်, ဒူပျာ်ယာ်ကီၢ်ရ့ၣ်ပူၤန့ၣ်လီၤ. တၢ်ဂီၤအံၤပာ်ဖျါဝဲ မီၤ ငမ--- လၢအသးနံၣ်အိၣ် ၁၄ နံၣ်တဂၤ လၢအဘၣ်ဒိ ဒီးသံကွံာ်ဝဲခီဖျိလၢ SAC ခးလီၤကျိဖးဒိၣ်လၢဝ့ၢ်ပူၤ အဃိန့ၣ်လီၤ. ကျိဖးဒိၣ်ချံလၢတၢ်ခးလီၤအီၤ ဒီးပိၢ်ဖးထီၣ်အံၤ ဘၣ်ဒိစ့ၢ်ကီးဝဲ မီၤငမ--- လၢအသးနံၣ်အိၣ် (၇) နံၣ်တဂၤ ဒီး ဘၣ်ဟးဂီၤစ့ၢ်ကီးဝဲ သဝီဖိအဟံၣ်တနီၤန့ၣ်လီၤ. (တၢ်ဂီၤ - လီၢ်ကဝီၤသဝီဖိ)
တၢ်ဂီၤတဘ့ၣ်အံၤဘၣ်တၢ်ဒိန့ၢ်အီၤဖဲ လါယူၤ ၂၀၂၃ နံၣ်ပူၤ ဖဲ ငထ--- သဝီ, တကူၢ်တဲၢ် ကရူၢ်, ဝီၢ်ရ့ၣ်ကီၢ်ဆၣ်, ဒူပျာ်ယာ်ကီၢ်ရ့ၣ်ပူၤန့ၣ်လီၤ. တၢ်ဂီၤအံၤပာ်ဖျါထီၣ်ဝဲ သဝီဖိတဂၤအဟံၣ် လၢအဘၣ် ဟးဂီၤဝဲဒီးကျိဖး ဒိၣ် လၢ SAC စုကဝဲၤဒိၣ်သုး (၃၁၈) ခးလီၤဝဲ ဖဲလါယူၤ ၁၇ သီ, ၂၀၂၃ နံၣ်အနံၤန့ၣ်လီၤ. ဟံၣ်ဃီအါဖျၢၣ်ဘၣ်ဒိဟးဂီၤဝဲဒီးကျိဖးဒိၣ်လၢတၢ်ကဲထီၣ် သးအဘျီဝဲအံၤန့ၣ်လီၤ. SAC စုကဝဲၤဒိၣ်သုးတဖုဃီအံၤ ခးလီၤကဒီးဝဲကျိဖးဒိၣ်အသီတဘျီဆူသဝီပူၤအံၤ ဖဲလါယူၤ ၁၉ သီ အနံၤ ဒီး ဘၣ်ဒိဝဲ သဝီဖိ (၂) ဂၤန့ၣ်လီၤ. (တၢ်ဂီၤ - KHRG)
တၢ်ဂီၤလၢအစ့ၣ်တဘ့ၣ်အံၤဘၣ်တၢ်ဒိန့ၢ်အီၤ ဖဲလါယနူၤအါရံၤ ၁၀ သီ, ၂၀၂၄ နံၣ် ဖဲ ငဝ--- သဝီ ဒီး တၢ်ဂီၤလၢအဖီခိၣ်အံၤ တၢ်ဒိန့ၢ်အီၤဖဲ ဖဲလါယနူၤအါရံၤ ၁၁ သီ, ဖဲ ငဃ--- သဝီ, ရီၢ်ကဲကရူၢ်, ကြုၢ်တုကီၢ်ဆၣ်, ဒူပျာ်ယာ်ကီၢ်ရ့ၣ်အပူၤန့ၣ်လီၤ. တၢ်ဂီၤလၢအစ့ၣ်တဘ့ၣ်အံၤ ပာ်ဖျါဝဲ ငဝ--- သဝီသီခါဖၠၢ် ဒီး တၢ်ဂီၤလၢအထွဲတခီမ့ၢ်ဝဲ ငဃ--- သဝီဖိ, ဒီၤငယ--- အဟံၣ်အဂီၤ လၢအဘၣ်ဟးဂီၤဝဲဒီး ကျိဖးဒိၣ် ၁၂၀ မမ လၢ SAC သုးဖိတဖၣ်ခးလီၤဝဲဆူသဝီပူၤ ဖဲလါဒံၣ်စဲဘၢၣ် ၂၈ သီ, ၂၀၂၃ နံၣ်အနံၤန့ၣ်လီၤ. လၢတၢ်ခးလီၤကျိဖးဒိၣ်အဘျီဝဲအံၤဘၣ်သံဝဲဖိသၣ် (၁) ဂၤ ဒီး ဘၣ်ဒိစ့ၢ်ကီးဝဲ ဖိသၣ်အဂၤ (၂) ဂၤန့ၣ်လီၤ. (တၢ်ဂီၤ - KHRG)
တၢ်ဂီၤတဘ့ၣ်အံၤဘၣ်တၢ်ဒိန့ၢ်အီၤဖဲ လါဒံၣ်စဲဘၢၣ် ၂၀ သီ, ၂၀၂၃ နံၣ် ဖဲကျီးပူၤတၢ်လီၢ်တတီၤ လၢအအိၣ်ဘူးဝဲဒီး စလ--- သဝီ, ကီးနွဲၢ်ကရူၢ်, ကီးတရံးကီၢ်ဆၣ်, ဒူပျာ်ယာ်ကီၢ်ရ့ၣ်ပူၤန့ၣ်လီၤ. တၢ်ဂီၤအံၤပာ်ဖျါထီၣ်ဝဲ သဝီဖိတဖၣ်လၢ အဘၣ်ဃ့ၢ်ထီၣ်အိၣ်ကဒုလၢ အစံာ်ဒဲလီၢ် ဒီးပှၢ်ပူၤ ခီဖျိလၢ SAC သုးခးလီၤဝဲကျိဖးဒိၣ်ဆူသဝီပူၤဖဲ လါနိၣ်ဝ့ဘၢၣ် ၂၉ သီ, ၂၀၂၃ နံၣ် အနံၤန့ၣ်လီၤ. (တၢ်ဂီၤ - KHRG)
Footnotes:
[1] KHRG, “တီအူကီၢ်ရ့ၣ် တၢ်ကဲထီၣ်သးတၢ်ပာ်ဖျါ- ဒီၣ်ဖးခိၣ်ကီၢ်ဆၣ်အပူၤ SAC ခးလီၤနါစိၤကျိဖးဒိၣ်ချံအဃိ သဝီဖိသံတဂၤဒီး ဟံၣ်တဖၣ်ဟးဂူာ်ဟးဂီၤ (လါအီကူး ၂၀၂၃ နံၣ်)”, လါဖ့ၤဘြူၤအါရံၤ ၂၀၂၄ နံၣ်.
[2] KHRG, “တီအူကီၢ်ရ့ၣ် တၢ်ပာ်ဖျါအဖုၣ်- ပယီၤသုးဒွဲၣ်အူဟံၣ်ဃီ, ခးလီၤနါစိၤကျိဖးဒိၣ် ဒီး ခးလီၤတၢ်လၢကဘီယူၤ ဖဲထီတထူၣ်ကီၢ်ဆၣ် (လါစဲးပထ့ဘၢၣ် တုၤ လါနိၣ်ဝ့ဘၢၣ်, ၂၀၂၃နံၣ်)”, လါမးရှး ၂၀၂၄ နံၣ်.
[3] KHRG, “တီအူကီၢ်ရ့ၣ် တၢ်ပာ်ဖျါအဖုၣ်- ပယီၤသုးဒွဲၣ်အူဟံၣ်ဃီ, ခးလီၤနါစိၤကျိဖးဒိၣ် ဒီး ခးလီၤတၢ်လၢကဘီယူၤ ဖဲထီတထူၣ်ကီၢ်ဆၣ် (လါစဲးပထ့ဘၢၣ် တုၤ လါနိၣ်ဝ့ဘၢၣ်, ၂၀၂၃နံၣ်)”, လါမးရှး ၂၀၂၄ နံၣ်.
[4] KHRG, “တီအူကီၢ်ရ့ၣ် တၢ်ပာ်ဖျါအဖုၣ်- တၢ်ခးလီၤကျိဖးဒိၣ်ချံ, ကဘီယူၤခးလီၤတၢ် ဒီး SAC သုးတဖၣ်ဒွဲၣ်အူထီၣ်ဟံၣ်, PDF သုးဖိတဖၣ် မၢဆူၣ်သဝီဖိလၢကဒုးနဲၣ်ကျဲ ဖဲထီတထူၣ်ကီၢ်ဆၣ်ပူၤ (လါနိၣ်ဝ့ဘၢၣ် တုၤလၢ လါဒံၤစဲဘၢၣ် ၂ဝ၂၃ နံၣ်) ”, လါအ့ဖြ့ၣ် ၂၀၂၄ နံၣ်.
Print: