ကဘီယူၤခးလီၤတၢ်ဖဲ ဧ--- သဝီ, ထံဒ့ကရူၢ်

ဖဲလါဖ့ၤဘြူၤအါရံၤ ၂၁ သီ, ၂၀၂၄ နံၣ်, ဟါလီၤခီ ၂ နၣ်ရံၣ် အဆၢကတီၢ်, SAC အဟဲၣ်လံၣ်ခီၣ်ပတၢၣ် လၢအအိၣ်လၢ တီအူက ဘီယူၤသန့ ဖဲ တ.ပ.ခ [တောင်ပိုင်းတိုင်းစစ်ဌာနချုပ် (တပခ) – (တောင်ငူ)], တီအူဝ့ၢ်, တဘ့ၣ်ဟဲကွံာ်လီၤဝဲမ့ၣ်ပိၢ်ဖဲ ဧ--- သဝီ, ကဝီၤဒ့ (၃), ဖဲ ထံဒ့ကဝီၤ, ဒီၣ်ဖါခိၣ်ကီၢ်ဆၣ်, တီအူကီၢ်ရ့ၣ်အပူၤန့ၣ်လီၤ. ဖဲလၢအပူၤကွံာ် ၂၀၂၃ နံၣ်, လၢတၢ်ကဲထီၣ်သး တၢတဘျီအခါလံၤလံၤန့ၣ်, တၢ်ဒုးတၢ်ယာ်ဒီးသုးဖီၣ်စုကဝဲၤအတၢ်ဟူးတၢ်ဂဲၤ တအိၣ်နီတမံၤဘၣ်. လၢကဘီယူၤတၢ်ဟဲခးလီၤ တၢ်အဃိ ဧ--- သဝီဖိ (၄)ဂၤ ဘၣ်ဒိ ဒီး မ့ၣ်ပိၢ်အက့, ဒီး ပိာ်မုၣ်သးပှၢ် သးနံၣ် (၈၅) နံၣ်လၢဘၣ်တၢ်ကိးအမံၤလၢ ဒီၤဖ--- လၢ အအိၣ်လၢ ဧ--- သဝီ, ကဝီၤဒ့-၃, တဂၤသံဝဲတဘျီဃီ မ့ၢ်လၢအဘၣ်ဒိ ဖဲအခိၣ်, အဟၢဖၢ, ဒီး အသးနါပှၢ်အဃိန့ၣ်လီၤ. အခိၣ် သၣ်ဃံသဲၣ်ဖး, ဒီးအပှံာ်ဖျိးထီၣ်န့ၣ်လီၤ. ပိာ်မုၣ်သးနံၣ် (၃၅)နံၣ် လၢအမံၤမ့ၢ် ဒီၤ ဂ--- ဘၣ်ဒိစ့ၢ်ကီးဖဲအခီၣ် ဒီးဘၣ်ဒီၣ်တူာ်ကွံာ် ဝဲအခီၣ်န့ၣ်လီၤ. ပှၤဘၣ်ဒိလၢအဝဲ (၃)ဂၤန့ၣ်မ့ၢ်ဝဲ  ဒီၤည---, သးနံၣ် (၃၅) နံၣ်, မၣ်လ---, သးနံၣ် (၁၂)နံၣ်, ဒီး ဖိသၣ်လၢ တၢ်တသ့ၣ်ညါအမံၤဘၣ်, သးနံၣ် (၁)နံၣ်ဘျဲၣ်တဂၤန့ၣ်လီၤ. အဝဲသ့ၣ်ကိးဂၤဒဲးအံၤ မ့ၢ်ဝဲပယီၤကလုာ် ဒီးမ့ၢ်ပှၤဘါသီခါဖိန့ၣ်လီၤ. ပှၤဘၣ်ဒိ (၄)ဂၤအံၤ ဘၣ်တၢ်လဲၤဆှၢအဝဲသ့ၣ်လၢသိလ့ၣ် ဆူတၢ်ဆါဟံၣ်လၢအအိၣ်ဖဲ ယ့ၤတၤရှ့ၤဝ့ၢ်, ပကိကီၢ်ခီတကပၤန့ၣ် လီၤ. တၢ်ဆါဟံၣ်လၢအအိၣ်ဖဲ ယ့ၤတၤရှ့ၤဝ့ၢ်တဖျၢၣ်အံၤ လၢတၢ်ကကူစါ ဒီၤဂ--- လၢအ အဘၣ်ဒီၣ်တူာ်အခီၣ်တဂၤအံၤအဂီၢ် တၢ်ပီးတၢ်လီတလၢပှဲၤဘၣ်အဃိ ဘၣ်တၢ်လဲၤဆှၢက့ၤအီၤဆူတၢ်ဆါဟံၣ် လၢအအိၣ် လၢ န့ၤပၠံၤဒီၤဝ့ၢ်, လၢကဘၣ်လဲၤတၢ်ဒ့ၣ်စၢၤ စီၤစုၤယံၤအိၣ် ၄ နၣ်ရံၣ် ဃၣ်ဃၣ်ကျဲန့ၣ်လီၤ. [ပှၤသဝီဖိလၢအဘၣ် ဒိသ့ၣ်တဖၣ်အံၤ တဒိးန့ၢ်ဘၣ်တၢ်ဆီၣ်ထွဲမၤစၢၤလၢ တၢ်ကူ စါယါဘျါအဂီၢ်လၢ ပှၤဂ့ၢ်ဝီတၢ်ကရၢကရိအအိၣ်နီတဖုဘၣ်].

လၢန့ၣ်အမဲာ်ညါ, မ့ၣ်ပိၢ်အက့ဖျိးဘၣ်ဒိဝဲဟံၣ် (၂)ဖျၢၣ် လၢအမ့ၢ် အူထ--- ဒီး အူန--- (လၢတၢ်တသ့ၣ်ညါသးနံၣ်ဘၣ်) အဟံၣ် န့ၣ်လီၤ. ပှၤသဝီဖိခံဂၤအံၤမ့ၢ်ဝဲ ပှၤဘါသီခါဖိ ဒီး ပယီၤကလုာ်န့ၣ်လီၤ. ဆၣ်ဖိကီၢ်ဖိတၢ်ဘုၣ်ဒၢတနီၤဘၣ်ဒိ ဒီး ဘၣ်သံအိၣ်စ့ၢ်ကီး န့ၣ်လီၤ. ကျီၢ်မိၢ်ကနီ (၁) ဒု, ထွံၣ် (၁) ဒု, ဒီး ဆီတနီၤ သံဝဲ ဒီး ကျီၢ် (၃) ဒုဘၣ်ဒိ, ဒီး ထွံၣ် (၂) ဒုအခီၣ်တူာ်ကွံာ်န့ၣ်လီၤ. တၢ်မုၢ် တၢ်ဘိသ့ၣ်တဖၣ်စ့ၢ်ကီးဟးဂီၤကွံာ်ဝဲလၢမ့ၣ်ပိၢ်အတၢ်ပိၢ်ဖးထီၣ်ဒီးမ့ၣ်ပိၢ်အက့ဖျိးဘၣ်အဃိန့ၣ်လီၤ. လီၢ်ကဝီၤသဝီဖိပာ်ဖျါထီၣ် စ့ၢ်ကီး KHRG ပျီပူၤပှၤမၤတၢ်ဖိလၢ တၢ်ဘၣ်ကွၢ်ဆၢၣ်မဲာ်ကဘီယူၤတၢ်ခးလီၤတၢ်ဝဲအံၤ မၤစှၤလီၤသဝီဖိသ့ၣ်တဖၣ်အသးသဟီၣ် ဒီး တူၢ်ဘၣ်တၢ်တမုာ်တလၤဘၣ်န့ၣ်လီၤ.

ကဘီယူၤတၢ်ခးလီၤတၢ်ဖဲ အ--- သဝီ, ထံဒ့ကရူၢ်

ဖဲလါဖ့ၤဘြူၤအါရံၤ ၂၁သီ, ၂၀၂၄နံၣ်, ဟါလီၤခီ ၂း၂၄ မံးနံးအဆၢကတီၢ်, ဟဲၣ်လံၣ်ခီၣ်ပတၢၣ်လၢ တီအူကဘီယူၤသန့တဘ့ၣ် ဟဲကွံာ်လီၤကဒီးဝဲမ့ၣ်ပိၢ်ဆူ အ--- သဝီ,  ထံဒ့ကရူၢ်, ဒီၣ်ဖါခိၣ်ကီၢ်ဆၣ်အပူၤန့ၣ်လီၤ. မ့ၣ်ပိၢ်တဖျၢၣ်လီၤတဲာ်ဘၣ်ဝဲဖဲ သဝီဖိအ ဟံၣ်လၢအိၣ်ဒီးဟံၣ်ဖိဃီဖိ (၈)ဂၤတဖျၢၣ်အပူၤန့ၣ်လီၤ. ဟံၣ်ဖိဃီဖိအကျါ (၃)ဂၤသံဝဲ ဒီး လၢအအိၣ်တ့ၢ် (၅)ဂၤန့ၣ်တခီဘၣ်ဒိ ဝဲန့ၣ်လီၤ. သဝီဖိလၢအဘၣ်ဒိသ့ၣ်တဖၣ်အံၤ လဲၤဝဲဆူ ယ့ၤတၤရှ့ၤဝ့ၢ်, ပကိကီၢ်ခီ, လၢတၢ်ဒိးကူစါယါဘျါသးအဂီၢ်န့ၣ်လီၤ. အဝဲ သ့ၣ်တဒိးန့ၢ်ဘၣ်တၢ်ကူစါယါဘျါအဘူးအလဲလၢ ပှၤဂ့ၢ်ဝီတၢ်ကရၢကရိအအိၣ်နီတဖုဘၣ်. လၢန့ၣ်အမဲာ်ညါ ကျီၢ် (၃) ဒုဘၣ်သံ စ့ၢ်ကီးန့ၣ်လီၤ. အ--- သဝီဖိသ့ၣ်တဖၣ်ပာ်ဖျါထီၣ်စ့ၢ်ကီးအတၢ်တူၢ်ဘၣ်လၢဒိးန့ၢ်ဘၣ်ဝဲ တၢ်သးပျံၤတီၢ်တၢ် လၢအဝဲသ့ၣ်ဘၣ်လဲၤ ခီဖျိဘၣ်ဝဲကဘီယူၤတၢ်ခးလီၤတၢ်အံၤအဃိန့ၣ်လီၤ.

အ--- သဝီဖိလၢတူၢ်ဘၣ်ကဘီယူၤတၢ်ခးလီၤတၢ်တဖၣ်အဂ့ၢ်အကျိၤ