ဖဲလါအ့ဖြ့ၣ် (၁)သီ, ၂၀၂၃နံၣ်, ဟါခီ ၈း၂၀ နၣ်ရံၣ်အဆၢကတီၢ်န့ၣ် SAC သုးလၢအအိၣ်လၢ မးထီသုးကလၢၤ လၢအအိၣ်သူၣ်လီၤအသးဖဲ မးထီကရူၢ်, ဒွဲၣ်လိကီၢ်ဆၣ်, မုၢ်တြီၢ်ကီၢ်ရ့ၣ် အပူၤန့ၣ် ခးလီၤ၀ဲကျိဖးဒိၣ် ၁၂၀ မမ ခံဖျၢၣ်ဆူ ဖှ့ထီရူၢ်သဝီ, ထံသဘျုၣ်ထၣ်ကရူၢ်, ဒွဲၣ်လိကီၢ်ဆၣ်, မုၢ်တြီၢ်ကီၢ်ရ့ၣ် အပူၤန့ၣ်လီၤ. ကျိဖးဒိၣ်ချံလၢတၢ်ခးလီၤအီၤအ ကျါတဖျၢၣ်န့ၣ် လီၤတဲာ်နုာ်၀ဲဆူသဝီပူၤဒီး ဘၣ်သံဝဲပှၤမုပှၢ်တဂၤလၢအသးနံၣ်အိၣ်၀ဲ (၇၂) နံၣ် ဒီးဘၣ်ဒိ၀ဲပှၤအဂၤ ၄ ဂၤန့ၣ်လီၤ. ပှၤလၢအသံဒီးဘၣ်ဒိသ့ၣ်တဖၣ်အံၤမ့ၢ်၀ဲဟံၣ်ဖိဃီဖိန့ၣ်လီၤ. ပှၤဘၣ်ဒိအကျါခံဂၤန့ၣ်မ့ၢ်၀ဲ ဖိသၣ်ဖိလၢအသးနံၣ် အိၣ်ဒံးဒၣ်ထဲ (၅) နံၣ်တဂၤဒီး  (၂)လါ တဂၤန့ၣ်လီၤ. ပှၤလၢအဘၣ်ဒိသ့ၣ်တဖၣ်အံၤ ဘၣ်တၢ်လဲၤဆှၢအီၤတဟါဃီဆူ လီၢ်ကဝီၤတၢ်ဆါဟံၣ်တဖျၢၣ် လၢကကူစါယါဘျါသးအဂီၢ်န့ၣ်လီၤ. အခဲအံၤန့ၣ် အ၀ဲသ့ၣ်အိၣ်ဆူၣ်ထီၣ်က့ၤလံ ဘၣ် ဆၣ်သနာ်က့ ခီဖျိလၢတၢ်အိၣ်သးတဘၣ်လီၢ်ဘၣ်စးဒ်ဘၣ်အဃိ အ၀ဲသ့ၣ်က့ၤအိၣ်ဝဲလၢသ၀ီပူၤတဘူၣ်ဒ်ဘၣ်န့ၣ်လီၤ.