ဖဲလါအ့ဖြ့ၣ် ၄ သီ ၂၀၂၃ နံၣ်, ဟါခီ ၅:၄၅ နၣ်ရံၣ်အခိၣ်အဃၢၤအဆၢကတီၢ်န့ၣ်, တၢ်ဒုးကဲထီၣ်၀ဲလၢထံကီၢ်တၢ်ပၢ တၢ်ပြးကီၣ်ကးကရၢ (SAC) အခီၣ်ချ့သုးရ့ၣ် (၂၇၅) ဒီးသုးခိးကီၢ်ဆၢ (BGF) အသုးရ့ၣ် (၁၀၂၂) အသုးပာ်ဖှိၣ်ဒီးကညီ ဒီကလုာ်တၢ်ထူၣ်ဖျဲးသုးမုၢ်ဒိၣ် (KNLA) ဒီးကမျၢၢ်တၢ်ဒီသဒၢသုး (PDF)အသုးပာ်ဖှိၣ်အဘၢၣ်စၢၤဖဲတၢ်လီၢ်တတီၤ လၢနိၣ်ဖိကရူၢ်, ကီးတရံးကီၢ်ဆၣ်, ဒူပျာ်ယာ်ကီၢ်ရ့ၣ်အပူၤန့ၣ်လီၤ.

တၢ်ဒုးကဲထီၣ်၀ံၤအလီၢ်ခံ, SAC အခီၣ်ချ့သုးရ့ၣ် (၂၇၅) ဒီး BGF အသုးရ့ၣ် (၁၀၂၂) အသုးပာ်ဖှိၣ်သ့ၣ်တဖၣ် နုာ်လီၤ၀ဲ ဆူသ၀ီတဖျၢၣ်အပူၤလၢအအိၣ်ဘူးဒီးတၢ်ဒုးကဲထီၣ်အလီၢ်န့ၣ်လီၤ. ဖဲလၢအ၀ဲသ့ၣ်နုာ်လီၤဆူသ၀ီ၀ဲန့ၣ်အပူၤအခါန့ၣ် ပှၤသ၀ီဖိအိၣ်တ့ၢ်ဒၣ်လၢသ၀ီပူၤစှၤဂၤန့ၣ်လီၤ. သ၀ီဖိလၢအအိၣ်တ့ၢ်လၢသ၀ီပူၤသ့ၣ်တဖၣ်ပျံၤတၢ်ဒီးကျဲးစၢၤ၀ဲဒ်သိး ကလဲၤအိၣ်ကဒုလၢသီခါဖၠၣ်ဘၣ်ဆၣ် SAC ဒီး BGF အသုးသ့ၣ်တဖၣ်တပျဲလဲၤအ၀ဲသ့ၣ်ဘၣ်. လၢလီၢ်ခံတနံၤမး SAC ဒီး BGF အသုးသ့ၣ်တဖၣ်ဟ့ၣ်၀ဲသ၀ီဖိအခွဲးလၢကဟးထီၣ်ဘၣ်ဆၣ်သ၀ီဖိသ့ၣ်တဖၣ်ကသူ၀ဲသိလ့ၣ်ယီၢ် ဒီးစဲးထူစံာ်န့ၣ်အ၀ဲသ့ၣ်တဟ့ၣ်၀ဲအခွဲးဘၣ်. သ၀ီဖိတနီၤလဲၤအိၣ်ကဒု၀ဲလၢသ၀ီအသီခါဖၠၣ်ဒီးတနီၤန့ၣ်လဲၤဃ့ၢ်အိၣ်က ဒု၀ဲလၢတၢ်လီၢ်အဂၤန့ၣ်လီၤ. 

ဖဲလါအ့ဖြ့ၣ် ၅ သီ ၂၀၂၃ နံၣ်, ဂီၤခီ ၁၁း၃၀ နၣ်ရံၣ်အဆၢကတီၢ်န့ၣ် KNLA ဒီး PDF အသုးပာ်ဖှိၣ်သ့ၣ်တဖၣ်နုာ်လီၤခး၀ဲ SAC ဒီး BGF အသုးလၢအလဲၤနုာ်လီၤအိၣ်လၢသ၀ီပူၤသ့ၣ်တဖၣ်အဃိ SAC ဒီး BGF အသုးသ့ၣ်တဖၣ်ဘၣ်ဟး ထီၣ်ကွံာ်လၢသ၀ီ၀ဲန့ၣ်အပူၤဒီးဂုၤက့ၤအခံန့ၣ်လီၤ. ဒ်လဲၣ်ဂ့ၤဂ့ၤ, တချုးလၢအ၀ဲသ့ၣ်ဟးထီၣ်ဘၣ်န့ၣ် အ၀ဲသ့ၣ်ဒွဲၣ်အူ ထီၣ်၀ဲသ၀ီဖိအဟံၣ်လၢသ၀ီပူၤသၢဖျၢၣ်န့ၣ်လီၤ. ဖဲနံၤအ၀ဲန့ၣ် ၁၂:၀၀ နၣ်ရံၣ်အဆၢကတီၢ်န့ၣ်, SAC အကဘီယူၤ helicopter တဘ့ၣ်ဟဲခးလီၤစ့ၢ်ကီးတၢ်လၢသ၀ီ၀ဲန့ၣ်အပူၤဒီးဟဲခးလီၤစ့ၢ်ကီးတၢ်လၢတၢ်လီၢ်အဂၤတတီၤလၢအအိၣ် ဘူးဒီးသ၀ီအ၀ဲန့ၣ်လီၤ.

အခဲအံၤန့ၣ်, ဒူဖိသ၀ီဖိသ့ၣ်တဖၣ်ဘၣ်ဃ့ၢ်အိၣ်ကဒုလၢတၢ်လီၢ်အဂၤဒီးဘၣ်ကွၢ်ဆၢၣ်မဲာ်၀ဲဒီးတၢ်ကီတၢ်ခဲအကလုာ်က လုာ်န့ၣ်လီၤ.