(၂၀၂၄ ခုနှစ်၊ အောက်တိုဘာလ မတိုင်မီ) ဒူးပလာယာခရိုင်ရှိ မြဝတီမြို့မှ ကော်တရီမြို့သို့ ဆက်သွယ်ထားသော အာရှလမ်းမအနီးဝန်းကျင်တွင် နိုင်ငံတော်စီမံအုပ်ချုပ်ရေးကောင်စီ (SAC) အောင်ဇေယျစစ်ကြောင်းနှင့် ကရင်အမျိုး သားလွတ်မြောက်ရေးတပ်မတော် (KNLA) ကော်ပရာစစ်ကြောင်းတို့နှစ်ဖွဲ့ကြား တိုက်ပွဲဖြစ်ပွားခဲ့သည်မှာ (၈)လခန့် ကြာမြင့် ခဲ့ပြီးဖြစ်သည်။ အာရှလမ်းမအနီးတွင် နေထိုင်ကြသောရွာသားများသည် သေနတ်ပစ်ခတ်မှု၊ လက်နက်ကြီးပစ် ခတ်မှုနှင့်လေကြောင်းတိုက်ခိုက်မှုစသည့်တိုက်ပွဲသံများကို အပတ်တိုင်းလိုလို ကြားခဲ့ရသည်။

၂၀၂၄ ခုနှစ်၊ အောက်တိုဘာလ ၉ ရက်နေ့တွင် SAC နှင့် KNLA တပ်ဖွဲ့များကြား တိုက်ပွဲဖြစ်ပွားခြင်းမရှိခဲ့ပါ။ သို့သော် လည်း မနက် (၁၀) နာရီဝန်းကျင်၌ ဒူးပလာယာခရိုင်၊ ကော်တရီမြို့နယ်၊ နို့ဖိုးကျေးရွာအုပ်စု၊ ဃ--- ကျေးရွာအတွင်း လက်နက်ကြီးတစ်လုံးကျရောက်ပေါက်ကွဲခဲ့သည်။ ထိုလက်နက်ကြီးပေါက်ကွဲမှုတွင် အသက် (၂၅) နှစ်အရွယ်ရှိသော ရွာသားတစ်ဦးဖြစ်သူ စောဘ--- အားထိမှန်၍ ၎င်းခြေထောက်တွင် ဒဏ်ရာရရှိခဲ့ပြီး ၎င်း၏မိဘနေအိမ်တစ်လုံးလည်း ထိခိုက်ပျက်စီးခဲ့သည်။ ထို့အပြင် ၎င်းတို့နွားတစ်ကောင်ထိမှန်သေဆုံး၍ အခြားနွားတစ်ကောင်လည်း ဒဏ်ရာရရှိခဲ့ သည်။ အဆိုပါလက်နက်ကြီးတစ်လုံးကို ပစ်ခတ်သူမှာ SAC အောင်ဇေယျစစ်ကြောင်းဖြစ်သည်ဟု ရွာသားများက ယုံ ကြည်ကြသည်။ အကြောင်းမှာ ထိုဒေသတစ်ဝိုက်တွင် အောင်ဇေယျစစ်ကြောင်းမှလွဲ၍ အခြားစစ်ကြောင်းများ သွားလာ လှုပ်ရှားခြင်းမရှိခဲ့ပါ။ ရွာသားများသတိမထားမိသည့်အချိန်တွင် (ကြိုတင်သတိပေးမှုများမရှိပါ) ရွာထဲတွင် လက်နက် ကြီးတစ်လုံးကျရောက်ပေါက်ကွဲခဲ့သည်။

ဤဖြစ်စဉ်နှင့်ပတ်သက်၍ ရွာသားတစ်ဦးဖြစ်သူ စောအ---က ရှင်းပြသည်။ မနက် (၁၀) နာရီဝန်းကျင်တွင် စောအ---နှင့် ၎င်းမိသားစုသည် မနက်စာစားပြီးနောက် စောအ---သည် အိမ်နှင့်အနည်းငယ်ဝေးသည့်တစ်နေရာတွင်ရှိသော ယခင်က ပျက်စီးသွားသည့်ရေပိုက်ကို ပြုပြင်ရန်အတွက် အပြင်သို့ထွက်လာခဲ့သည်။ စောအ---၏ဇနီးသည် အိမ်ရှေ့တွင် တံမြက်စည်းလှဲ၍ သန့်ရှင်းရေးလုပ်နေခဲ့သည်။ အသက် (၂၅) နှစ်အရွယ်ရှိသော စောဘ---သည် လက်နက်ကြီးပစ်ခတ် သည့်အချိန်တွင် အိမ်အောက်တွင်နေ၍ အသက် (၂)နှစ်အရွယ်ရှိသော သူ၏သမီးကို အိပ်ပျော် အောင် ချော့သိပ်နေခဲ့ သည်။ ၎င်းသမီး၏နာမည်မှာ နော်ဆ---ဖြစ်သည်။ ထိုလက်နက်ကြီးပစ်ခတ်မှုတွင် နော်ဆ---ဒဏ်ရာရရှိခြင်းမရှိခဲ့ သော်လည်း စောဘ--- ၏ဘယ်ဖက်ခြေထောက်တွင် ဒဏ်ရာပြင်းထန်စွာ ရရှိခဲ့သည်။

အစပိုင်းတွင် ထိုဒေသတွင်ရှိသော KNLA ဆေးတပ်သားများသည် စောဘ---အား ဆေးကုသမှုပေးခဲ့သည်။ ထို့နောက် စောဘ---ကို ဆေးကုသမှုကောင်းမွန်စွာရရှိစေရန်အတွက် ထိုင်းနိုင်ငံ၊ တာ့ခ်ခရိုင်၊ ဖ--- မြို့ရှိ ဒ---ဆေးခန်းသို့ လွှဲပြောင်း ပို့ဆောင်ခဲ့သည်။ အခြားရွာသားများသည် စောဘ---အား ကူညီ၍ ဆေးခန်းသို့ ပို့ဆောင်ပေးခဲ့သည်။ (စောဘ---၏ ဆေးကုသမှုကုန်ကျစရိတ်ကို မည်သူက ပေးဆောင်ခဲ့သည်ကို မသိရှိရပါ။) စောဘ---၏ခြေထောက်ဒဏ်ရာသည် ပြင်း ထန်သော်လည်း အရိုးနှင့်သွေးကြောများ အကောင်းရှိနေသေးသည်ဆို၍ ဆရာဝန်က စောအ---အား ရှင်းပြခဲ့သည်။ (ဆိုလိုသည်မှာ ၎င်းဒဏ်ရာသည် ပြင်းထန်သော်လည်း စိုးရိမ်ရသည့်အထိ မရှိခဲ့ပါ။)

ဃ--- ကျေးရွာတွင် ရွာသားအနည်းငယ်သာနေထိုင်ကြပြီး မည်သည့်စစ်သားမှမရှိကြောင်း ဃ--- ရွာမှ ရွာသားတစ်ဦးက ရှင်းပြခဲ့သည်။ ဤလုပ်ရပ်သည် (ရွာသားများအား ကြိုတင်သတိပေးခြင်းမရှိဘဲ ရွာထဲသို့လက်နက်ကြီးပစ်ခတ်ခြင်း) လူ့အခွင့်အရေးချိုးဖောက်မှုတစ်ခုဖြစ်သည်။         

ဤသတင်းအကြောင်းအရာများကို KHRG ကွင်းဆင်းလုပ်သားတစ်ဦးအား ပြောပြခဲ့သောသူများမှာ စောအ--- (ပျက်စီး သွားသောအိမ်၏ပိုင်ရှင်) နှင့် ဒဏ်ရာရရှိခဲ့သည့်ရွာသား၏မိသားစုတို့ဖြစ်ကြသည်။ KHRG ကွင်းဆင်းလုပ်သားသည် ၎င်းအား အင်တာဗျူးခဲ့သည်။ သတင်းအချက်အလက်များကို အသုံးပြု၍ ရေးသားဖြန့်ဝေရန် ထိခိုက်နစ်နာသူကိုယ်တိုင် ခွင့်ပြုချက်ပေးခဲ့ပါသည်။