ဖဲလါယနူၤအါရံၤ ၂၀၂၃ နံၣ်- SAC ခးလီၤကျိဖးဒိၣ်အဃိ ကမျၢၢ်ဖိတဖၣ်တၢ်သံတၢ်ပှၢ် ဒီးတၢ်ဘၣ်ဒိဘၣ်ထံးအိၣ်ထီၣ်ဖဲ ကြုၢ်တု ကီၢ်ဆၣ်ပူၤ.

ဖဲလါယနူၤအါရံၤ ၂၁ သီ, ၂၀၂၃ နံၣ်, ကဘၣ်ဖဲဖးဖီမုၢ် ၁၂ နၣ်ရံၢ်အဆၢကတီၢ်,  ထံကီၢ်တၢ်ပၢတၢ်ပြးကီၣ်ကးကရၢ (SAC)  ခီၣ် သုးရ့ၣ်နီၣ်ဂံၢ်-(၉၇), ဒီး စုကဝဲၤဒိၣ် နီၣ်ဂံၢ်-(၃၂၁), အိၣ်လၢ သုးပၢဆှၢဝဲၤလီၢ်ခိၣ်သ့ၣ် (MOC)  နီၣ်ဂံၢ်-(၁၂) စုဒုၣ်တီၤဖီလာ်, သုးဖိ တဖၣ် ခးလီၤနါစိၤကျိဖးဒိၣ်တဖၣ်ဆူ ယ---သဝီပူၤ, ရီၢ်ကဲကရူၢ်, ကြုၢ်တုကီၢ်ဆၣ်ပူၤ ဒီးဘၣ်ဒိဝဲဒၣ်သဝီဖိ (၂)ဂၤန့ၣ်လီၤ. စီၤ ဆ---(၁၉ နံၣ်) အခီၣ်ဘၣ်ဒိဝဲ ဒီး အူ ဒ---(၈၇နံၣ်) စ့ၢ်ကီးအခီၣ်ဘၣ်ဒိဝဲဒၣ်န့ၣ်လီၤ. မ့ၢ်လၢ အူ အဘ---န့ၣ်အခီၣ်ဘၣ်ဒိဝဲ နးနးကလဲာ်လၢကျိဖးဒိၣ်က့အဃိ, ဘၣ်တၢ်လဲၤဆှၢအီၤဆူ အအ---တၢ်ဆါဟံၣ်, ဝၣ်ကးကရူၢ်, ကြုၢ်တုကီၢ်ဆၣ်ပူၤလၢတၢ်ကူ စါယါ ဘျါအီၤအဂီၢ်န့ၣ်လီၤ.

လါမးရှး ၂၀၂၃ နံၣ် - SAC ခးလီၤကျိဖးဒိၣ် ဒီး မၤသံမၤဝီတၢ်ဖဲကြုၢ်တုကီၢ်ဆၣ်ပူၤ.

ဖဲလါမးရှး ၂၅ သီ, ၂၀၂၃ နံၣ်န့ၣ်, ကညီဒီကလုာ်တၢ်ထူၣ်ဖျဲးသုးမုၢ်ဒိၣ် (KNLA) ဒီး ကမျၢၢ်တၢ်ဒီသဒၢသုးမုၢ်ဒိၣ် (PDF) သုးပာ်ဖှိၣ်ထီၣ်ခးဝဲ SAC ပၢၤကီၢ်ရူဖဲ ကြုၢ်တုဝ့ၢ်ပူၤ, ကြုၢ်တုကီၢ်ဆၣ်, ဒူပျာ်ယာ်ကီၢ်ရ့ၣ်ပူၤန့ၣ်လီၤ. ခီဖျိလၢတၢ်ဒုးကဲထီၣ်ဒ်အံၤ အဃိ ကမျၢၢ် ဖိတဖၣ်ဟးထီၣ်လၢတၢ်ချၢတဘူၣ်ဘၣ်ဒီး အိၣ်ကတာ်ထီဝဲလၢအဝဲသ့ၣ်ဟံၣ်ပူၤန့ၣ်လီၤ.

ဖဲဂီၤခီ ၇း၃၀ မံးနံး အခိၣ်အဃၢၤဆၢကတီၢ်, SAC ခီၣ်ချ့သုးရ့ၣ် နီၣ်ဂံၢ်-(၅၄၆), အိၣ်လၢ သုးပၢဆှၢဝဲၤလီၢ်ခိၣ်သ့ၣ် (MOC)  နီၣ် ဂံၢ် -(၁၂) စုဒုၣ်တီၤဖီလာ်, အသုးဖိလၢအိၣ်ဖဲ ကၠိကလ့သုးကလၢာ်တဖၣ် ခးလီၤနါစီၤကျိဖးဒိၣ် (၁၂၀ မမ) ဆူသဝီပူၤ ဒီးကျိဖး ဒိၣ်ချံတနီၤလီၤတဲာ်ဝဲလၢ ရှ---သဝီ, ကီးဝၣ်လဲၤကရူၢ်, ကြုၢ်တုကီၢ်ဆၣ်ပူၤန့ၣ်လီၤ. လၢတၢ်ခးလီၤကျိဖးဒိၣ်တဘျီအံၤ, ဖိသၣ်ပိာ် ခွါ (၁၅) နံၣ်, လၢအမံၤမ့ၢ်ဝဲ စီၤ ဃ---အကိာ်ဘိဘၣ်ဒိဝဲဒီးကျိဖးဒိၣ်က့ဒီးအဝဲသံဝဲဒၣ်တဘျီဃီန့ၣ်လီၤ.

ဖဲဂီၤခီ ၈း၃၀ မံးနံး ဆၢကတီၢ်, ကမျၢၢ်ဖိလၢအမံၤမ့ၢ်ဝဲ စီၤ အ---(၂၃နံၣ်), လၢတၢ်သူၣ်အိၣ်သးအိၣ်မၤစၢၤတၢ်အပူၤ အဝဲလဲၤဟ့ၣ် နီၤ လီၤဝဲထံအီဆူကမျၢၢ်ဖိလၢအအိၣ်ကတာ်ထီလၢအဝဲသ့ၣ်ဟံၣ်ပူၤတဖၣ်ဖဲဝ့ၢ်ပူၤန့ၣ်လီၤ. ဖဲအဝဲလဲၤဟ့ၣ်နီၤလီၤထံအီဆူကမျၢၢ် ဖိလၢအအိၣ်ကတာ်ထီလၢအဝဲသ့ၣ်ဟံၣ်ပူၤတဖၣ်အဆၢကတီၢ်, SAC သုးဖိတဂၤ ခးအီၤဒီးအဝဲသံဝဲဒၣ်တဘျီဃီန့ၣ်လီၤ.

ခီဖျိလၢပှၤထီၣ်ခးဝဲ SAC ပၢၤကီၢ်ရူၢ်အဃိ, SAC ခီၣ်ချ့သုးရ့ၣ် နီၣ်ဂံၢ်-(၅၄၆), အိၣ်လၢ သုးပၢဆှၢဝဲၤလီၢ်ခိၣ်သ့ၣ် (MOC)  နီၣ်ဂံၢ်-(၁၂) စုဒုၣ်တီၤဖီလာ်, အသုးဖိလၢအိၣ်ဖဲ ကၠိကလ့သုးကလၢာ်တဖၣ်, ခးစၢၤန့ၢ်ဝဲကျိဖးဒိၣ်တဖၣ်ဆူကြုၢ်တုကီၢ်ဆၣ်ပူၤ ဒ်သိးက ခီၣ်ဆၢထီဒါဝဲ KNLA ဒီး PDF သုးဖိတဖၣ်န့ၣ်လီၤ. လၢတၢ်ခးလီၤကျိဖးဒိၣ်တဘျီအံၤ, ကမျၢၢ်ဖိဟံၣ်ဟးဂီၤ (၃၉) ဖျၢၣ်, ဒီးက မျၢၢ်ဖိအိၣ်လၢဝ့ၢ်ပူၤတဖၣ် ဘၣ်ဒိဝဲဒီးကျိဖးဒိၣ်က့တဘျုးဂၤန့ၣ်လီၤ.

လၢကဝီဒ့နီၣ်ဂံၢ်-(၂), ကြုၢ်တုဝ့ၢ်, ကြုၢ်တုကီၢ်ဆၣ်ပူၤ, ကမျၢၢ်ဖိဘၣ်ဒိဝဲလၢကျိဖးဒိၣ်က့တဖၣ်အိၣ်ဝဲ (၆) ဂၤန့ၣ်လီၤ.

လၢကဝီဒ့နီၣ်ဂံၢ်-(၃), ကြုၢ်တုဝ့ၢ်, ကြုၢ်တုကီၢ်ဆၣ်ပူၤ, ကမျၢၢ်ဖိဘၣ်ဒိဝဲလၢကျိဖးဒိၣ်က့တဖၣ်အိၣ်ဝဲ (၁) ဂၤန့ၣ်လီၤ.

လၢကဝီဒ့နီၣ်ဂံၢ်-(၄), ကြုၢ်တုဝ့ၢ်, ကြုၢ်တုကီၢ်ဆၣ်ပူၤ, ကမျၢၢ်ဖိဘၣ်ဒိဝဲလၢကျိဖးဒိၣ်က့တဖၣ်အိၣ်ဝဲ (၉) ဂၤန့ၣ်လီၤ.

ဖဲလါမးရှး ၂၆ သီ, ၂၀၂၃ နံၣ်, ကဘၣ်ဖဲ ဂီၤခီ ၁၀နၣ်ရံၣ်ဆၢကတီၢ်, , SAC ခီၣ်ချ့သုးရ့ၣ် နီၣ်ဂံၢ်-(၅၄၆), အိၣ်လၢသုးပၢဆှၢဝဲၤ လီၢ်ခိၣ်သ့ၣ် (MOC)  နီၣ်ဂံၢ်-(၁၂) စုဒုၣ်တီၤဖီလာ်, အသုးဖိလၢအိၣ်ဖဲ ကၠိကလ့သုးကလၢာ်တဖၣ် ခးလီၤနါစိၤကျိဖးဒိၣ် (၁၂၀ မမ) ဆူ ကြုၢ်တုဝ့ၢ်ပူၤ, ဒီးဘၣ်ဒိဝဲ ဒီၤ ဘ---(၆၇နံၣ်)တဂၤန့ၣ်လီၤ. ဖဲအဝဲဘၣ်ဒိဒီးကျိဖးဒိၣ်က့ဝံၤအလီၢ်ခံ ပှၤလဲၤဆှၢအီၤဆူ ကြုၢ်တုတၢ်ဆါဟံၣ်လၢတၢ်ကူစါယါဘျါအဂီၢ်တဘျီဃီန့ၣ်လီၤ. ဘၣ်ဆၣ်သနာ်က့, မ့ၢ်လၢ ဒီၤ ဘ--- အံၤအိၣ်ဒီးသးတၢ်ဆါ ဒီးအ ဝဲဘၣ်ဒိနး အဃိအဝဲသံဝဲဒၣ်ဖဲတၢ်ဆါဟ့ၣ်ပူၤန့ၣ်လီၤ.

စးထီၣ်လါမးရှး ၂၅သီ တုၤ ၂၆ သီ, ၂၀၂၃ နံၣ်န့ၣ်, SAC ခးလီၤကျိဖးဒိၣ်အဃိ, ကမျၢၢ်ဖိဘၣ်ဒိဝဲ ခဲလၢာ် (၁၆) ဂၤ, သံဝဲ (၂) ဂၤ ဖဲကြုၢ်တုကီၢ်ဆၣ်ပူၤ, ဒီး SAC ခးသံဝဲစ့ၢ်ကီးဝဲ သဝီဖိ (၁) ဂၤ ဖဲကြုၢ်တုၢ်ကီၢ်ဆၣ်ပူၤန့ၣ်လီၤ.