တၢ်ခးလိာ်သးကဲထီၣ်ဖဲ ကီးတရံးကီၢ်ဆၣ်ဝံၤအလီၢ်ခံ SAC ခးလီၤကျိဖးဒိၣ်

ဖဲလါနိၣ်ဝ့ဘၢၣ် ၂ သီ, ၂၀၂၃ နံၣ် ဂီၤခီ (၇း၂၀) အဆၢကတီၢ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ် (KNLA) သုးရ့ၣ် နီၣ်ဂံၢ် (၂၀၁) ပာ်ဖှိၣ်လိာ်သးဒီး ကီၢ်သူလ့ၤသုးမုၢ်ဒိၣ် (KTLA) ဝံၤ လဲၤတ့ၢ်လီၤ ကျိဖးဒိၣ်ချံသၢဖျၢၣ်ဒီးဒြိဖဲ ထံကီၢ်တၢ်ပၢတၢ်ပြးကီၣ်ကးကရၢ (SAC) ခီၣ်သုးရ့ၣ် (IB) နီၣ်ဂံၢ် (၃၂) သုးကလၢၤလၢ အအိၣ်ဘူးဒီး က--- သဝီ, မီခံကရူၢ်, ကီးတရံးကီၢ်ဆၣ်, ဒူပျာ်ယာ် ကီၢ်ရ့ၣ်န့ၣ်လီၤ. ခီၣ်သုးရ့ၣ်နီၣ်ဂံၢ် (၃၂) သုးရ့ၣ်ခိၣ်န့ၣ်မ့ၢ်ဝဲ ကၠီၤစ့ၤအူန့ၣ်လီၤ. ဝံၤအလီၢ်ခံ တၢ်ခးလိာ်သးကဲထီၣ်ဝဲဒီး ပတုာ် ကွံာ်သးဖဲ ဂီၤခီ (၁၀း၄၀) အဆၢကတီၢ်န့ၣ်လီၤ. တၢ်ခးလီၤသး ပတုာ်လံသနာ်က့ SAC သုးဖိတဖၣ် ခးလီၤကျိဖးဒိၣ်ချံလၢ အမ့ၢ် (၁၂၀) မမ, (၆၀) မမ ဒီး RPG7 တဖၣ်လၢ က--- သဝီဒီး တၢ်သူၣ်တၢ်ဖျးလီၢ်လၢ အအိၣ်တၢ်ခိၣ်တၢ်ဃၢၤတဖၣ် ဒီတနံၤ ကျၢၤန့ၣ်လီၤ. လၢတၢ်န့ၣ်အဃိ မ့ၢ်အကတီၢ်ဘၣ်လၢ ကကူးတၢ်ထူၣ်တၢ်ဘိအဆၢကတီၢ်ဘၣ်ဆၣ် ကျိဖးဒိၣ်ချံတဖၣ်လီၤတဲာ် လၢ စံာ်ပျီပူၤဒီးပဲလါကျီးပူၤတဖၣ်ဒီး သဝီဖိတဖၣ်ပျံၤတၢ်လၢ ကလဲၤဘိးဘုခ့ဒီးကူးပဲလါ လၢကျီးပူၤန့ၣ်လီၤ. (တၢ်ခးလီၤကျိဖး ဒိၣ်ချံအဃိ သဝီဖိတဘၣ်ဒိနီတဂၤဘၣ်သနာ်က့ တၢ်သူၣ်ထီၣ်တနီၤလၢ အမ့ၢ် တၢ်ဘါယွၤသရိာ်တဖျၢၣ်, ကၠိတဖျၢၣ်ဒီး ဟံၣ်တ ဖျၢၣ်ဟးဂီၤဝဲန့ၣ်လီၤ.)

လီၢ်ကဝီၤသဝီဖိတဂၤပာ်ဖျါထီၣ် ကညီဂ့ၢ်ဝီခွဲးယာ်ကရူၢ် (KHRG) လၢ က--- သဝီဖိတဖၣ်အိၣ်လၢအဝဲသ့ၣ်သဝီပူၤတဘူၣ်လၢၤ ဘၣ်အဃိ လဲၤဃ့ၢ်အိၣ်ကမှံလၢ ခ--- ဟီၣ်ကဝီၤ (IDP အိၣ်တၢ်လီၢ်လၢ ယိၤကီၢ်-ကီၢ်ပယီၤ ကီၢ်ဆၢန့ၣ်လီၤ.) သဝီဖိတဖၣ်လၢ အအိၣ် (သဝီအခိၣ်အဃၢၤ) ဒ်အမ့ၢ် ဂ--- သဝီ, ဃ--- သဝီ, မီခံကရူၢ်စ့ၢ်ကီး အိၣ်လၢတၢ်ပျံၤတၢ်ဖုးအပူၤန့ၣ်လီၤ. တၢ်ခးလီၤ ကျိဖးဒိၣ်ချံကဲထီၣ်သးဒ်အံၤအဃိ သဝီဖိတဖၣ်တူၢ်ဘၣ်ဝဲလၢ ဖဲအဝဲသ့ၣ်ဟးထီၣ်က့ၤလီၤလၢသဝီပူၤအဆၢကတီၢ်, မၤတၢ်လၢ တၢ်သူၣ်တၢ်ဖျးလီၢ်အဆၢကတီၢ်, မ့တမ့ၢ် လဲၤထီၣ်ကၠိအဆၢကတီၢ် ကဘၣ်ပလီၢ်သးထီဘိန့ၣ်လီၤ. အဝဲသ့ၣ်တူၢ်ဘၣ်စ့ၢ်ကီးလၢ အအိၣ်ကတာ်သးလၢသဝီပူၤ ခီဖျိအအိၣ်ဒီးတၢ်ပျံၤတၢ်ဖုးလၢ ကဟးထီၣ်က့ၤလီၤအဃိန့ၣ်လီၤ.