တၢ်ကဲထီၣ်သးအကလုာ်

ဟီၣ်လာ်မ့ၣ်ပိၢ် ပိၢ်ဖးထီၣ်အဂ့ၢ်

တၢ်ကဲထီၣ်သးမုၢ်နံၤမုၢ်သီ

လါစဲးပထ့ဘၢၣ် ၂သီ, ၂၀၂၂နံၣ်

တၢ်ကဲထီၣ်သးတၢ်လီၢ်တၢ်ကျဲ (သဝီ, ကရူၢ်, ကီၢ်ဆၣ်, ကီၢ်ရ့ၣ်)

စ---သ၀ီ, မဲၢ်ကျီကရူၢ်, ဘုသိၣ် ကီၢ်ဆၣ်, မုၢ်တြီၢ်ကီၢ်ရ့ၣ်

ၦၤလၢအတူၢ်ဘၣ်တၢ်တဂၤအဂ့ၢ်အကျိၤ

မံၤ

စီၤအ---

သးနံၣ်

၂၈နံၣ်

မုၣ်/ ခွါ

ပိာ်ခွါ

ကလုာ်

ကညီ

ဟံၣ်ဖိဃီဖိ အိၣ် / တအိၣ်   

ထီၣ်ပှၢ်

တၢ်ဖံးတၢ်မၤ

ဖဲးခုး

တၢ်ဘူၣ်တၢ်ဘါ

မိၢ်လုၢ်ပၢ်လၢ်

တၢ်ဟံမူဒါ/ လီၢ်လၤ

ဂၢၤဒၢး (ဒူသ၀ီဘံၣ်ဘၢ)  

အိၣ်ဆိးဒူသဝီ

စ---သ၀ီ, မဲၢ်ကျီကရူၢ်, ဘုသိၣ်ကီၢ်ဆၣ်, မုၢ်တြီၢ်ကီၢ်ရ့ၣ်

ၦၤလၢအမၤအၢပယွဲတၢ်တဂၤအဂ့ၢ်အကျိၤ

မံၤ                   

လီၢ်လၤ

သုးကျိၤ/ သုးရ့ၣ် / သုးတြိၤ

အိၣ်သူၣ်လီၤသးလီၢ်ကျဲ /သုးကလၢၤ

အခိၣ်အမံၤဒီးလီၢ်လၤ

တသ့ၣ်ညါ

တသ့ၣ်ညါ

ဆိကမိၣ်တယာ်၀ဲလၢအမ့ၢ် SACပယီၤသုးဟူးဂဲၤ၀ဲၤလီၢ်ခိၣ်သ့ၣ် (စကခ-၈) , ခီၣ်ချ့သုးရ့ၣ် (၄၀၄)

ဘျံးဒ၀ဲၢ်ကီၢ်ရ့ၣ်

ခီၣ်ချ့သုးရ့ၣ် (၄၀၄) သုးရ့ၣ်ခိၣ် စိထိအူ ဒီး သုးရ့ၣ်ခိၣ်ခံ ယၤအီၤမၠိ

၁. ၡဲပၠးၦၤနဟံးန့ၢ်တၢ်ကဲထီၣ်သးတခါအံၤ တဆီဘၣ်တဆီတက့ၢ်.

KHRGပျီၤပူၤပှၤမၤတၢ်ဖိတဂၤ နၢ်ဟူတၢ်ကစီၣ်ဘၣ်ဃးဂၢၤဒၢး (ဒူသ၀ီဘံၣ်ဘၢ)ဖိတဂၤယီၢ်ဘၣ်ဟီၣ်လာ်မ့ၣ်ပိၢ်အဂ့ၢ်အံၤ လၢ KNLA တၢ်မဲာ်ညါသုးဖိတဖၣ်အအိၣ်န့ၣ်လီၤ. ၀ံၤအလီၢ်ခံ အ၀ဲမၤတၢ်ထံၣ်လိာ်သံကွၢ်တၢ်ဒီး ပှၤထံၣ်ထွဲတၢ်အကျါတဂၤ ဘၣ်ဃးတၢ်ကဲထီၣ်သးအဂ့ၢ်အံၤန့ၣ်လီၤ. အ၀ဲတဲသကိးစ့ၢ်ကီးတၢ်ဒီးပှၤလၢအတူၢ်ဘၣ်တၢ်တဂၤအံၤ အနီၢ်ကစၢ်ပာ်ဖျါထီၣ် တၢ်ဂ့ၢ်တၢ်ကျိၤဘၣ်ဃးအ၀ဲဘျါက့ၤ ၀ဲအဂ့ၢ်အကျိၤသ့ၣ်တဖၣ်န့ၣ်လီၤ.

၂. ကွဲးနီၣ်ၦၤလၢဟ့ၣ်တၢ်ဂ့ၢ်အံၤတဂၤစုာ်စုာ်သ့ၣ်ညါ တၢ်ဂ့ၢ်အံၤအမ့ၢ်အတီလၢကျဲဒ်လဲၣ်.

ပှၤလၢအပာ်ဖျါထီၣ်တၢ်ဂ့ၢ်၀ဲအံၤန့ၣ် မ့ၢ်ပှၤလၢအဟးသကိးဒီး ပှၤတူၢ်ဘၣ်ဟီၣ်လာ်မ့ၣ်ပိၢ်ဖဲတၢ်ကဲထီၣ်သးခါအဃိ အ၀ဲထံၣ် ထွဲ၀ဲ ဟီၣ်လာ်မ့ၣ်ပိၢ် ပိၢ်ဖးထီၣ်အဂ့ၢ်၀ဲအံၤန့ၣ်လီၤ. ပှၤတူၢ်ဘၣ်တၢ်အနီၢ်ကစၢ်စ့ၢ်ကီး ပာ်ဖျါထီၣ်၀ဲတၢ်ဂ့ၢ်န့ၣ်လီၤ. ပှၤလၢအဟး သကိးဖဲတၢ်ကဲထီၣ်သးအခါအံၤအိၣ် (၃)ဂၤဘၣ်ဆၣ် ပှၤလၢအယီၢ်ဘၣ်ဟီၣ်လာ်မ့ၣ်ပိၢ်ဒီးဘၣ်ဒိ၀ဲန့ၣ်မ့ၢ်ထဲတဂၤန့ၣ်လီၤ.

ပာ်ဖျါတၢ်ကဲထီၣ်သးအဂ့ၢ်အကျိၤလၢလၢၦဲၤၦဲၤတက့ၢ်.

ဖဲလါစဲးပထ့ဘၢၣ် ၂သီ, ၂၀၂၂နံၣ် ဂီၤခီ ၈း၄၀နၣ်ရံၣ်န့ၣ် ဂၢၤဒၢး(ဒူသ၀ီဘံၣ်ဘၢ)ဖိတဂၤ ဒီးကညီဒီကလုာ်တၢ်ထူၣ်ဖျဲး သုးမုၢ်ဒိၣ် (KNLA) သုးရ့ၣ် (၁၀၂), သုးဒ့ (၁)အသုးဖိ(၂)ဂၤ  ဟး၀့ၤ၀ီၤလၢဒူသ၀ီတၢ်ဘံၣ်တၢ်ဘၢအဂီၢ် ဖဲယ---ကျဲမုၢ်လၢ အအိၣ်ဖဲ စ---သ၀ီ မုၢ်ထီၣ်ဟီၣ်က၀ီၤပူၤန့ၣ်လီၤ. (အ၀ဲသ့ၣ်ဟး၀့ၤ၀ီၤဆှၣ်ကွၢ် မ့ၢ်ထံကီၢ်တၢ်ပၢတၢ်ပြးကီၣ်ကးကရၢ (SAC)ပယီၤသုးတဖၣ်ဟဲဘၣ်ဖုး လၢဟီၣ်က၀ီၤပူၤအိၣ်တအိၣ်အဂ့ၢ်န့ၣ်လီၤ.)

သ၀ီဖိတဂၤအံၤမ့ၢ် စီၤအ---, အသးနံၣ်အိၣ်၂၈နံၣ် (ဖဲအဟးဒီးအသကိး KNLAသုးဖိ (၂)ဂၤအံၤအခါ) ယီၢ်ဘၣ်၀ဲဟီၣ်လာ် မ့ၣ်ပိၢ် ဖဲတချုးအလဲၤတုၤတၢ်လီၢ်လၢအ၀ဲသ့ၣ်တိာ်ပာ်လၢကလဲၤ၀ဲတတီၤဒံးဘၣ်အခါန့ၣ်လီၤ.  သုးလၢဒိးလီၤဟီၣ်လာ်မ့ၣ်ပိၢ် အံၤ မ့ၢ်သုးဖီၣ်စုက ၀ဲၤဖဲလဲၣ်တဖုလဲၣ်န့ၣ် တသ့ၣ်ညါ၀ဲဘၣ်ဆၣ် အ၀ဲသ့ၣ်ဆိကမိၣ်၀ဲလၢ ပှၤဒိးလီၤတၢ်ကဘၣ်မ့ၢ် SACပယီၤသုးန့ၣ်လီၤ.  တချုးတုၤလၢ လါစဲးပထ့ၣ်ဘၢၣ် ၂သီဒံးဘၣ် တသီခံသီအတီၢ်ပူၤန့ၣ် စီၤအ---လဲၤဟး၀့ၤ၀ီၤ၀ဲဖဲကျဲ ၀ဲအံၤန့ၣ်လီၤ. ပှၤယီၢ်ဘၣ်ဟီၣ်လာ်မ့ၣ်ပိၢ် ဒီးအသ ကိးသ့ၣ်တဖၣ် ဆိကမိၣ်၀ဲလၢ ပှၤဒိးလီၤဟီၣ်လာ်မ့ၣ်ပိၢ်မ့ၢ် SACပယီၤသုးတဖၣ် (မ့ၢ်လၢကျဲ၀ဲအံၤန့ၣ် KNLAသုးဟး၀့ၤ၀ီၤသူ၀ဲတပ ယူာ်ဃီအဃိ  KNLAသုးမ့ၢ်ဒိးလီၤဟီၣ်လာ်မ့ၣ်ပိၢ် န့ၣ် KNLAသုးဖိခံဂၤအံၤ ကသ့ၣ်ညါထွဲ၀ဲဒၣ်န့ၣ်လီၤ). အ၀ဲသ့ၣ်ပာ်ဖျါထီၣ်၀ဲဒ်အံၤ, “ပဟး၀့ၤ၀ီၤဖဲကျဲတဘိအံၤန့ၣ် တစှၤန့ၢ် ယဲၢ်ဘျီဘၣ်. အညီနုၢ်န့ၣ် ပဟးလၢကျဲတဘိအံၤအဃိ တဘျီအံၤဟီၣ်လာ်မ့ၣ်ပိၢ်အိၣ်န့ၣ် ပတ သ့ၣ်ညါဘၣ်.”အဂ့ၢ်န့ၣ်လီၤ.

အ၀ဲသ့ၣ်ဆိကမိၣ်တယာ်၀ဲလၢ SACပယီၤသုးတဖၣ် ဒိးလီၤဟီၣ်လာ်မ့ၣ်ပိၢ်အ၀ဲအံၤမ့ၢ်လၢ SACပယီၤသုးဟူးဂဲၤ၀ဲၤလီၢ် ခိၣ်သ့ၣ် (စကစ-၈), ခီၣ်ချ့သုးရ့ၣ်(၄၀၄) (လၢအအိၣ်ဟဲလၢဘျံးဒ၀ဲၢ်ကီၢ်ရ့ၣ်)တဖုအံၤန့ၣ် ဟူးဂဲၤဖဲ စ---သ၀ီဟီၣ်က၀ီၤပူၤ အိၣ်လံတဘျုးလါန့ၣ်လီၤ. အဃိ အ၀ဲသ့ၣ်ကဘၣ်သ့ၣ်ညါ၀ဲ KNLAသုးလၢအအိၣ်ဖဲဟီၣ်က၀ီၤဖဲအံၤသ့ၣ်တဖၣ် တၢ်အိၣ်သးဒီးဒိးလီၤ၀ဲဟီၣ်လာ်မ့ၣ်ပိၢ်အံၤန့ၣ်လီၤ. (ပှၤထံၣ်ထွဲတၢ်စ့ၢ်ကီးနာ်၀ဲလၢ) SACပယီၤသုးတဖၣ်ကထံၣ်၀ဲ KNLA သုးဟးခီၣ်လီၢ်ဖဲဟီၣ်က၀ီၤ၀ဲအံၤအဂ့ၢ်န့ၣ်လီၤ.

က---လၢအမ့ၢ် KNLAသုးရ့ၣ် (၁၀၂), သုးဒ့ (၁)အသုးဖိတဂၤ ထံၣ်ထွဲ၀ဲ စီၤအ---ယီၢ်ဘၣ်ဟီၣ်လာ်မ့ၣ်ပိၢ်အဂ့ၢ်အံၤန့ၣ်လီၤ. တၢ်ကဲထီၣ် သး၀ံၤတဘျီဃီ ပှၤတူၢ်ဘၣ်တၢ်တဂၤအံၤ အသကိးလဲၤပုအီၤလၢချၢဃံ ဒီးလဲၤယိးအီၤလၢစုာ်ပူၤ ဆူရ---တၢ်လီၢ် (လၢကခီဃီၤဆူ ကီၢ်ကၠီၣ်တဲၣ်ပူၤသ့အလီၢ်)န့ၣ်လီၤ. ဖဲလါစဲးပထ့ဘၢၣ် ၃သီ, ၂၀၂၂နံၣ်န့ၣ် ပှၤလဲၤဆှၢအီၤလၢသိလ့ၣ် စးထီၣ်လၢ ရ---တၢ်လီၢ်ဒီးဆူတၢ်ဆါ ဟံၣ်လၢကီၢ်ကၠီၣ်တဲၣ်အပူၤန့ၣ်လီၤ.

ပှၤလၢအယီၢ်ဘၣ်ဟီၣ်လာ်မ့ၣ်ပိၢ်တဂၤအံၤ ဖဲအ၀ဲယီၢ်ဘၣ်မ့ၣ်ပိၢ်အနံၤန့ၣ် အမါတသ့ၣ်ညါထွဲ၀ဲဘၣ်န့ၣ်လီၤ. သ၀ီသးပှၢ် ဒီး ကရူၢ်ခိၣ် လဲၤဒုးသ့ၣ်ညါက့ၤအမါဘၣ်ဃးဟီၣ်လာ်မ့ၣ်ပိၢ်ကဲထီၣ်သးအဂ့ၢ်အံၤ လၢခံတသီန့ၣ်လီၤ.

သ၀ီဖိ, ကသံၣ်သရၣ်ပှၤမၤတၢ်ဖိ ဒီး KNLAသုးတဖၣ် လဲၤဆှၢ၀ဲ စီၤစ---အံၤ ဆူရ---တၢ်လီၢ်ဘၣ်ဆၣ် အ၀ဲသ့ၣ်လဲၤပိာ် စီၤစ---အခံဆူကီၢ်ကၠီၣ်တဲၣ်ပူၤတန့ၢ်ဘၣ်န့ၣ်လီၤ. တၢ်ဟ့ၣ်သးကညီၤတၢ်ကရၢပှၤမၤတၢ်ဖိတဖၣ်  (မၤစၢၤပှၤဘၣ်ဒိဘၣ်ထံး ဒီးပှၤဆိက့ဆါဘီဒိၣ်ဒိၣ်မုၢ်မုၢ်သ့ၣ်တဖၣ်လၢကဒိးန့ၢ်ဘၣ်တၢ်ကူဆါယါဘျါလၢကီၢ်ကၠီၣ်တဲၣ်ပူၤအဂီၢ်)တဖုအံၤ ဟံးန့ၢ်အီၤမူဒါ (ရဲၣ်ကျဲၤန့ၢ်၀ဲလၢကခီကီၢ်ဆၢ ဒီးမၤစၢၤအီၤဖဲလၢအ၀ဲအိၣ်လၢကီၢ်ကၠီၣ်တဲၣ်တၢ်ဆါဟံၣ်အခါ)န့ၣ်လီၤ. အ၀ဲဘၣ်ဒီၣ်တဲာ်ကွံာ် အခီၣ်လၢ အစ့ၣ်ဘၣ်ဒိဒီးဟီၣ်လာ်မ့ၣ်ပိၢ်တကပၤအံၤလၢတၢ်ဆါဟံၣ်န့ၣ်လီၤ. အခီၣ်ထွဲတကပၤစ့ၢ်ကီး ဘၣ်ဒိဖးနးညါန့ၣ် လီၤ.

ဖဲအ၀ဲအိၣ်လၢတၢ်ဆါဟံၣ်အခါ တၢ်လၢာ်ဘူၣ်လၢာ်စ့ၤသ့ၣ်တဖၣ် တၢ်ကရၢကရိမၤစၢၤအီၤဘၣ်ဆၣ် မ့ၢ်အဒိးန့ၢ်ဘၣ်၀ဲလၢ ကျိၣ်စ့ မ့တမ့ၢ် တဒိးန့ၢ်ဘၣ်၀ဲဘၣ်ဧါန့ၣ်တၢ်တသ့ၣ်ညါအီၤဆှဲဆှဲဘၣ်န့ၣ်လီၤ. (ဖဲလါဒံၣ်စဲဘၢၣ် ၂၀၂၂နံၣ်န့ၣ်) စီၤအ---အိၣ်ဒံး လၢတၢ်ဆါဟံၣ်ပူၤဒီးကသံၣ်သရၣ်တဒုးစံၣ်လီၤအီၤတၢ်ဆါဟံၣ်ဒံးဘၣ်န့ၣ်လီၤ. အ၀ဲကဘၣ်အိၣ်ဒံးလၢတၢ်ဆါဟံၣ်ပှဲၤသီဒံး လဲၣ်န့ၣ် တသ့ၣ်ညါဘၣ် မ့ၢ်လၢတၢ်အံၤဒိးသန့ၤထီၣ်အသးလၢတၢ်ပူၤလီၢ်အတၢ်အိၣ်သးအဃိန့ၣ်လီၤ.

ပှၤယီၢ်ဘၣ်ဟီၣ်လာ်မ့ၣ်ပိၢ်တဂၤအံၤ အဖိအိၣ် (၄)ဂၤန့ၣ်လီၤ. အဖိအဒိၣ်ကတၢၢ်တဂၤအသးနံၣ်အိၣ် (၅)နံၣ် ဒီးအဖိအဆံး ကတၢၢ်တဂၤအိၣ် ၂လါန့ၣ်လီၤ. ခီဖျိလၢအ၀ဲခီၣ်တူာ်ကွံာ်တခီအဃိ ကွၢ်ဆၢၣ်မဲာ်ဘၣ်၀ဲ တၢ်ကီတၢ်ခဲသ့ၣ်တဖၣ်လၢကဘၣ် ဆီၣ်ထွဲအဖိတၢ်အိၣ်ဆူၣ်အိၣ်ချ့ဒီး တၢ်ကူၣ်ဘၣ်ကူၣ်သ့တၢ်လိၣ်ဘၣ်သ့ၣ်တဖၣ် ဒီးလၢနီၢ်ခိဒီးနီၢ်သးတၢ်လိၣ်ဘၣ်သ့ၣ်တဖၣ် န့ၣ်လီၤ.

ဟီၣ်လာ်မ့ၣ်ပိၢ်တၢ်ကဲထီၣ်သးဒ်အံၤန့ၣ် ကဲထီၣ်စ့ၢ်ကီးအသးဖဲလၢ လါမးရှးဒီးလါမ့ၤ ၂၀၂၂နံၣ်အဘၢၣ်စၢၤ (ဘၣ်ဆၣ်တဒိးန့ၢ် ဘၣ်တၢ်ဂ့ၢ်အလၢအပှဲၤနီတမံၤဒံးဘၣ်)န့ၣ်လီၤ.

စ---သ၀ီဖိသ့ၣ်တဖၣ် တထီၣ်ဘၣ်ဟီၣ်လာ်မ့ၣ်ပိၢ်တၢ်လီၤဘၣ်ယိၣ်(MRE)တၢ်မၤလိနီတဘျီဒံးဘၣ်န့ၣ်လီၤ.  အဃိ ပှၤတူၢ် ဘၣ်တၢ်အနီၢ်ကစၢ်ဒၣ်၀ဲဘၣ်သး၀ဲလၢ ကရၢသဘျ့ ဒီးလီၢ်က၀ီၤတၢ်ကရၢကရိသ့ၣ်တဖၣ် ကသ့ၣ်ညါထွဲ အီၤဒီးပှၤတူၢ်ဘၣ် တၢ်အဂၤသ့ၣ်တဖၣ် တၢ်ကီတၢ်ကဲလၢအ၀ဲသ့ၣ်ကကွၢ်ဆၢၣ်မဲာ်ဘၣ်၀ဲဆူညါသ့ၣ်တဖၣ်အဂီၢ်န့ၣ်လီၤ. ထံလီၢ်ကီၢ်ပူၤတၢ် သဘျ့မ့ၢ်တအိၣ်ဘၣ် (တၢ်မ့ၢ်တပတုာ်ကွံာ်တၢ်ဒိးလီၤဟီၣ်လာ်မ့ၣ်ပိၢ်ဘၣ်)န့ၣ် တၢ်ကီတၢ်ခဲဒ်အံၤသ့ၣ်တဖၣ်အံၤ လီၤမၢ်ကွံာ် ၀ဲတသ့ဘၣ်န့ၣ်လီၤ. စးထီၣ်လၢ ၂၀၂၂နံၣ် (ဖဲတၢ်သဘံၣ်သဘုၣ်က့ၤစးထီၣ်ကဒါအသး)ဒီးနံၣ်လၢအဟဲတဖၣ် ခါဆူညါ တၢ်ဆီတလဲ မ့ၢ်တအိၣ်ထီၣ်ဘၣ်န့ၣ် တၢ်လုၢ်အီၣ်နီၢ်ခိသးသမူကကီခဲ၀ဲလၢလီၢ်က၀ီၤသ၀ီဖိသ့ၣ်တဖၣ်အဂီၢ်န့ၣ်လီၤ. ဟီၣ်လာ်မ့ၣ်ပိၢ်သ့ၣ်တဖၣ်အိၣ်အဃိတြီတံၢ်ဃာ်သ၀ီဖိသ့ၣ်တဖၣ်အကျဲလၢ ကလဲၤဖံးလဲၤမၤလၢစံာ်ပှဲၤကျိးခုးသံၣ်ပူၤအဂီၢ် န့ၣ်လီၤ.

မ့ၢ်ၦၤလၢအတူၢ်ဘၣ်တၢ်တဖၣ် ဟ့ၣ်ၦၤတၢ်ခွဲးတၢ်ယာ်လၢပကသူတၢ်ဂ့ၢ်တၢ်ကျိၤတခါအံၤဧါ, ဟ့ၣ်ၦၤတၢ်ခွဲးတၢ်ယာ်လၢ ပက သူတၢ်ဂ့ၢ်အံၤလၢကျဲဒ်လဲၣ်.

ပှၤထံၣ်ထွဲတၢ်ဒီး ပှၤတူၢ်ဘၣ်တၢ် ဟ့ၣ်KHRGအခွဲးလၢကသူတၢ်ဂ့ၢ်တၢ်ကျိၤလၢအ၀ဲသ့ၣ်ပာ်ဖျါထီၣ်၀ဲတဖၣ်အံၤန့ၣ်လီၤ.