မြန်မာပြည်ထဲ တိုက်ပွဲတွေကြောင့် ထိုင်းနိုင်ငံဘက် ထွက်ပြေးခိုလှုံလာတဲ့ ကရင်ကျောင်းသူကျောင်းသား ၁၀၃ ယောက်ကို ထိုင်းအာဏာပိုင်တွေက မြန်မာနိုင်ငံဘက်ခြမ်းဆီ ပြန်ပို့လိုက်ပါတယ်။ ကရင်ပြည်နယ်တွင်း တိုက်ပွဲတွေကြောင့် ဒူးပလာယာခရိုင်ကနေ ထိုင်းဘက်ထွက်ပြေးခဲ့တဲ့ ကရင်ကျောင်းသူ၊ ကျောင်းသားတွေကို မနေ့က ရေကြီးနေတဲ့ သောင်းရင်းမြစ်ကိုဖြတ်ပြီး ထိုင်းအာဏာပိုင်တွေကနေ အတင်းအကျပ် ပြန်ပို့ခဲ့တာလို့ KHRG ကရင်လူ့အခွင့်အရေးအဖွဲ့က ပြောပါတယ်။

ပြန်ပို့ခံရတဲ့ အခြေအနေနဲ့ ပတ်သက်လို့ KNU ကရင် အမျိုးသားအစည်းအရုံး အထွေထွေအတွင်းရေးမှုး ဖဒိုတာဒိုမူးက ဗွီအိုအေကို အခုလို ပြောပါတယ်။

"မြဝတီမြို့နယ်မှာရှိတဲ့ သေဘောဘိုးဘက်ကနေ ထွက်ပြေးခဲ့ရသူတွေကို တာ့ခ်ပြည်နယ် ဖုတ်ဖရမြို့ဘက်ကနေ မြန်မာနိုင်ငံဘက်ခြမ်း ပြန်ပို့ခဲ့တာမှာ လှေတစီးဆိုရင် နောက်လှေတစီးကို တိုက်မိပြီး မြုပ်ခါနီးပါးအထိကို အန္တရာယ်ကြုံခဲ့ရတယ်လို့ ကရင်လူ့အခွင့်အရေးအဖွဲ့ KHRG က အင်တာနက်စာမျက်မှာ ဖော်ပြထားပါတယ်။ အခုလို ပြန်ပို့ခံရသူတွေအနေနဲ့ ကရင်ပြည်နယ်တွင်း တိုက်ပွဲတွေ၊ လက်နက်ကြီးနဲ့ လေကြောင်းပစ်ခတ်မှုတွေကြောင့် အသက်အန္တရာယ် စိုးရိမ်နေရဆဲ ဖြစ်တဲ့အကြောင်းနဲ့ တချို့လည်း ပြန်အပို့ခံရပြီး အကြိမ်ကြိမ် ပြန်ပြေးလာခဲ့ကြတယ်လို့ KHRG အဖွဲ့က ပြောပါတယ်။

ထိုင်းစစ်တပ်ဘက်ကတော့ တိုက်ပွဲတွေ ပြန်ငြိမ်ပြီး အန္တရာယ်မရှိတော့ဘူး ယူဆချိန်မှာ အခုလို ပြန်ပို့လေ့ရှိတယ်လို့ ထိုင်းဒေသခံအရာရှိတွေက အရင်က ပြောထားခဲ့ဖူးပါတယ်။