ကရင်ပြည်နယ် ကေအန်ယူ တပ်မဟာ(၆) ထိန်းချုပ် နယ်မြေအတွင်းမှာ စစ်ကောင်စီတပ်တွေနဲ့ ကရင်အမျိုးသား လွတ်မြောက်ရေးတပ် KNLA၊ ပြည်သူ့ကာကွယ်ရေးတပ် PDF ပူးပေါင်းတပ်ဖွဲတွေကြား နေ့စဉ်နီးပါး တိုက်ပွဲဖြစ်နေတဲ့ အတွက် စစ်ဘေးရှောင်ဒုက္ခသည် ၃၀,၀၀၀ နီးပါးထိ ရှိလာပြီး ဒီရက်ပိုင်းအတွင်းမှာပဲ ထိုင်းဘက်ကို ထွက်ပြေးရတဲ့ စစ်ဘေးရှောင် ၂,၀၀၀ လောက်ရှိပါတယ်။ ဒီသတင်းကို ဗွီအိုအေ သတင်းထောက် မအေးအေးမာက သတင်းပေးပို့ ထားပါတယ်။

ကရင်ပြည်နယ် ကေအန်ယူ တပ်မဟာ (၆) ထိန်းချုပ်ရာ နယ်မြေအတွင်းမှာ စစ်ကောင်စီတပ်တွေနဲ့ ကရင်အမျိုးသား လွတ်မြောက်ရေးတပ် KNLA၊ ပြည်သူ့ကာကွယ်ရေးတပ် PDF ပူးပေါင်းတပ်ဖွဲတွေကြား နှစ်ဖက်တိုက်ပွဲတွေ ပြင်းထန်နေသလို စစ်ကောင်စီဘက်က ပစ်တဲ့ လက်နက်ကြီးတွေ ကလည်း စစ်ဘေးရှောင်ဒုက္ခသည်တွေရှိတဲ့ နေရာနား အထိ ကျရောက်တာတွေလည်း ရှိနေတာပါ။ အခုဆိုရင် တပ်မဟာ(၆)နယ်မြေအတွင်းမှာ စစ်ဘေးရှောင်သူ လူဦးရေ ၃၀,၀၀၀ လောက်ထိ ရှိလာပြီလို့ ကရင်လူ့အခွင့်ရေးအဖွဲ့KHRG က ပြောရေးဆိုခွင့်ရှိသူ စောနန္ဒဆူးက အခုလိုပြောပါတယ်။

“ စစ်ဘေးရှောင်တဲ့ ပြည်သူတွေက များသထက်များလာတယ်။ အခုက ၃၀,၀၀၀ ဝန်းကျင်လောက် ရောက်လာပြီလို့ ခန့်မှန်းရတယ်။ ခုတလောက တပ်မဟာ (၆) နယ်မြေမှာက စစ်ရေး လှုပ်ရှားမှုတွေက များတယ်။ လက်နက်ကြီးတွေ ပစ်ခတ်တာတွေ ရှိတယ်။ သူတို့က ရမ်းသမ်း ပစ်ခတ်တာတွေလည်း ရှိတယ်။ ပစ်မှတ်ထားပြီး ပစ်တာလည်း ပါတယ်။ တိုက်ပွဲ ဖြစ်တိုင်းမှာ ပြည်သူတွေက ကြောက်နေရတယ်။ အခုက IDP တွေ ရှိတဲ့ နေရာနားထိ လက်နက်ကြီးတွေ ကျနေတာကြောင့် သူတို့မှာ အမြဲတမ်း စိုးရိမ်နေရတယ်။ ကြောက်ရွံ့နေရတယ်။ ”

ကရင်ပြည်နယ်ဘက်မှာ စစ်ရေးလှုပ်ရှားမှုတွေ ပြင်းထန်လာခဲ့သလို လက်နက်ကြီး ကျည်ဆံတွေဟာ စစ်ဘေးရှောင်တဲ့ နေရာတွေရဲ့ အနီးနားထိ ကျတဲ့ အတွက်ကြောင့် ပြီးခဲ့တဲ့ ရက်ကဘဲ ထိုင်းဘက်ခြမ်းကို စစ်ဘေးရှောင် ၂,၀၀၀ လောက် တကြော့ပြန် ထွက်ပြေးလာကြတယ်လို့ စစ်ဘေးရှောင်သူတွေကို အကူအညီ ပေးနေသူတွေက ပြောပါတယ်။

“ ပထမ စဖြစ်တဲ့ နေ့ကတော့ ညဘက်ကို ထိုင်းဘက်ကို ကူးလာတယ်။ ထိုင်းဘက် မဲ့ကိုကင်း ကျေးရွာဘက်မှာဘဲ လူဦးရေ ၂,၀၀၀ လောက်ရှိတယ်။ ထိုင်းဘက် တညပဲ လက်ခံပေးတယ်။ နောက်ရက်ကျတော့ မြန်မာဘက်ကို ထိုင်းဘက်က ပြန်သွားခိုင်းတယ်။ ထိုင်းဘက်မှာ နေလို့ မရဘူးပေါ့။ အဲဒီတော့ မြန်မာဘက်ကမ်း သောင်ရင်းမြစ်ကမ်း တလျှောက်မှာဘဲ အခြေအနေ ကြည့်ပြီး နေရတယ်။ လက်နက်ကြီး ကျတဲ့ နေရာတွေက ဒုက္ခသည်တွေနဲ့ သိပ်မဝေးဘူး။ တိုက်ပွဲတွေက ဖလူး - ဝေါလေ - သေဘောဘိုး အဲဒီဘက်မှာ တောက်လျောက် ဖြစ်နေတယ်။ ဒုက္ခသည်တွေက ထိုင်းဘက်ကမ်းကိုလည်း တက်လို့ မရဘူး။ တိုက်ပွဲတွေ ဖြစ်နေတော့။ သူတို့ စစ်ရှောင် စခန်းတွေရဲ့ ကမ်းစပ်နားမှာဘဲ နေနေရတယ်။ စားသောက်ရေးကလည်း အခက်အခဲတွေ ရှိနေတယ်။ ”

စစ်ကောင်စီ ဘက်ကတော့ ကရင်ပြည်နယ်တွင်းက လက်ရှိ တိုက်ပွဲတွေနဲ့ ပတ်သက်လို့ လတ်တလော သတင်းထုတ်ပြန်တာတွေ မရှိသေးပါဘူး။ အခုဆိုရင် ကရင်ပြည်နယ် အတွင်း စစ်ဘေးရှောင် ဒုက္ခသည် ၃၀,၀၀၀ လောက်ဟာ သောင်ရင်းမြစ် တလျှောက် အပါအဝင် တောတောင်တွေထဲမှာ နေရတာ ၃ လကျော်လောက် ရှိပြီ ဖြစ်ပါတယ်။ တပ်မဟာ ၆ နယ်မြေတွင်းမှာ တိုက်ပွဲတွေ ဆက်တိုက် ပြန်ဖြစ်လာတာကြောင့်ရော၊ လက်နက်ကြီးကျည်တွေ ကျရောက်တာကြောင့်ပါ ဒေသခံ အရပ်သား ပြည်သူတွေ ထိခိုက်ဒဏ်ရာ ရတာတွေ၊ သေဆုံးတာတွေ ရှိနေပါတယ်။