တၢ်ကဲထီၣ်သးအကလုာ်

SAC ခးသဝီဖိတဂၤ

တၢ်ကဲထီၣ်သးမုၢ်နံၤမုၢ်သီ

လါစဲးပထ့ဘၢၣ် ၂ သီ, ၂၀၂၃ နံၣ်

တၢ်ကဲထီၣ်သးတၢ်လီၢ်တၢ်ကျဲ (သဝီ, ကရူၢ်, ကီၢ်ဆၣ်, ကီၢ်ရ့ၣ်)

က--- သဝီ, မဲၢ်ကျီကရူၢ်, ဘုသိၣ်ကီၢ်ဆၣ်, မုၢ်တြီၢ်ကီၢ်ရ့ၣ်

ၦၤလၢအတူၢ်ဘၣ်တၢ်တဂၤအဂ့ၢ်အကျိၤ

မံၤ

င ---

သးနံၣ်

၅၁ နံၣ်

မုၣ်/ ခွါ

ခွါ

ကလုာ်

ယိၤဒိၣ်

ထီၣ်ပှၢ်/သဘျ့

သဘျ့

တၢ်ဖံးတၢ်မၤ

ပှၤထူစံာ်ဖိ

တၢ်ဘူၣ်တၢ်ဘါ

ဘါသီခါ

တၢ်ဟံမူဒါ/ လီၢ်လၤ

သဝီဖိ

အိၣ်ဆိးဒူသဝီ

က--- သဝီ, မဲၢ်ကျီကရူၢ်, ဘုသိၣ်ကီၢ်ဆၣ်, မုၢ်တြီၢ်ကီၢ်ရ့ၣ်

ၦၤလၢအမၤအၢပယွဲတၢ်တဂၤအဂ့ၢ်အကျိၤ

မံၤ                    

လီၢ်လၤ

သုးကျိၤ/ သုးရ့ၣ် / သုးတြိၤ

အိၣ်သူၣ်လီၤသးလီၢ်ကျဲ /သုးကလၢၤ

အခိၣ်အမံၤဒီးလီၢ်လၤ

တသ့ၣ်ညါ

သုးဖိ

ခီၣ်ချ့သုးရ့ၣ် (LIB) နီၣ်ဂံၢ် (၃၄၁)

ဖၣ်ပူၣ်

တသ့ၣ်ညါ(ဒုးယၤခိၣ်မံၤ)

၁. ၡဲပၠးၦၤနဟံးန့ၢ်တၢ်ကဲထီၣ်သးတခါအံၤ တဆီဘၣ်တဆီတက့ၢ်.

ဖဲလါစဲးပထ့ဘၢၣ် ၃သီ, ၂၀၂၃ နံၣ် ဟါခီအဆၢကတီၢ် ကညီဂ့ၢ်ဝီခွဲးယာ်ကရူၢ် (KHRG) ပျီပူၤပှၤမၤတၢ်ဖိတဂၤ ဒိးန့ၢ်ဘၣ်တၢ်ဂ့ၢ်တၢ်ကျိၤလၢ လီၢ်ပျံၤလၢ လီၢ်ကဝီၤခိၣ်နၢ်တဂၤဆှၢဝဲဘၣ်ဃး ထံကီၢ်တၢ်ပၢတၢ်ပြးကီၣ်ကးကရၢ (SAC) သုးဖိတဂၤလၢ ခီၣ်ချ့ သုးရ့ၣ် (LIB) နီၣ်ဂံၢ် (၃၁၄) အိၣ်ဝ့ၤစၤသဝီ ခးသဝီဖိတဂၤလၢ အမံၤမ့ၢ် င--- အိၣ်ဖဲ က--- သဝီန့ၣ်လီၤ. ဖဲလါစဲးပထ့ဘၢၣ် ၂၆ သီ, ၂၀၂၃ နံၣ်န့ၣ် KHRG ပျီပူၤပှၤမၤတၢ်ဖိ ထံၣ်လိာ်သးဒီး င--- အကၠီ ဝ--- ဒီး မၤတၢ်ထံၣ်လိာ်သံကွၢ်ဒီးအီၤန့ၣ်လီၤ.

၂. ကွဲးနီၣ်ၦၤလၢဟ့ၣ်တၢ်ဂ့ၢ်အံၤတဂၤစုာ်စုာ်သ့ၣ်ညါ တၢ်ဂ့ၢ်အံၤအမ့ၢ်အတီလၢကျဲဒ်လဲၣ်.

ပှၤလၢအဟ့ၣ်တၢ်ဂ့ၢ်တၢ်ကျိၤအံၤမ့ၢ်ဝဲ င--- အကၠီ ဒီး ပှၤတဲဘၣ်အီၤတၢ်ကဲထီၣ်သးအဂ့ၢ်ဝံၤ အလဲၤဆှၢအဒ့ဖိလၢ တၢ်ဆါဟံၣ် န့ၣ်လီၤ.

ပာ်ဖျါတၢ်ကဲထီၣ်သးအဂ့ၢ်အကျိၤလၢလၢပှဲၤပှဲၤတက့ၢ်.

ဖဲလါစဲးပထ့ဘၢၣ် ၂ သီ, ၂၀၂၃ နံၣ် ဟါခီ (၂း၃၀) အဆၢကတီၢ်ဃၣ်ဃၣ်န့ၣ် SAC သုးဖိတဖၣ် ခး င--- သးနံၣ်အိၣ် (၅၁)နံၣ် အအိၣ်ဖဲ က--- သဝီ, မဲၢ်ကျီကရူၢ်, ဘုသိၣ်ကီၢ်ဆၣ်, မုၢ်တြီၢ်ကီၢ်ရ့ၣ်အပူၤန့ၣ်လီၤ. တၢ်ကဲထီၣ်သးဖဲ အဝဲလဲၤဖီၣ်န့ၢ်က့ၤအကျီလၢအအီၣ်ဆၣ်ဖဲတၢ်ပျီလၢ အအိၣ်ဝ့ၤစၤသဝီပူၤ ဟဲက့ၤအဆၢကတီၢ်န့ၣ်လီၤ. SAC LIB နီၣ်ဂံၢ် (၃၄၁) အံၤအိၣ်သူၣ်လီၤသးဖဲ ဝ့ၤစၤသဝီသီခါဖၠၢ်နုာ်လီၤမုၢ်ထီၣ်တကပၤဒီး SAC သုးအဂၤတဖၣ်စ့ၢ်ကီး အိၣ်သူၣ်လီၤသးဖဲ သဝီတၢ်ဘိသိလီၢ်န့ၣ်လီၤ.

ဖဲတၢ်ကဲထီၣ်သးအနံၤလၢ င--- ဒီး အသကိးလဲၤလၢပျီပူၤန့ၣ် အဝဲသ့ၣ်ဘၣ်လဲၤခီ SAC သုးဖိတဖၣ်လၢ အအိၣ်ခိးတၢ်ဖဲဟီၣ်ကဝီၤဖဲန့ၣ်လီၤ. မ့ၢ်လၢ င--- အသကိးသ့ၣ်ညါ SAC သုးဖိတနီၤအဃိ အဝဲသံကွၢ် အသကိးလၢ ကလဲၤပိာ်အခံန့ၣ်လီၤ. ဖဲအဝဲသ့ၣ် လဲၤတုၤလၢ တၢ်ဘိသိလီၢ်အဆၢကတီၢ် အဝဲသ့ၣ်သံကွၢ် သုးဖိအိၣ် ဖဲန့ၣ်တဖၣ် ကဒုးသ့ၣ်ညါ SAC သုးဖိတဖၣ်လၢ အအိၣ်သူၣ် လီၤသးစီၤစုၤယံၤတဖၣ်လၢ အဝဲသ့ၣ်ကလဲၤဖီၣ်န့ၣ် အကျီၢ်တဖၣ်န့ၣ်လီၤ. သုးဖိအိၣ်ဖဲန့ၣ်တဖၣ် စံးဆၢဘၣ်အဝဲသ့ၣ်လၢ အက ဒုးသ့ၣ်ညါဘၣ် သုးဖိလၢအအိၣ်သူၣ်လီၤသးစီၤစုၤယံၤတဖၣ်န့ၣ်လီၤ. ဝံၤအလီၢ်ခံ င--- လဲၤဟံန့ၢ်က့ၤအကျီၢ်တဖၣ်န့ၣ်လီၤ. ဖဲအလဲၤဟံန့ၢ်ကျီၢ်ဟဲက့ၤအဆၢကတီၢ် SAC သုးဖိအိၣ်ဘူးဖဲသီခါဖၠၢ်နုာ်လီၤ ခးအီၤဒီး K-3 ကျိဒီး ကျိချံဘၣ်ဖျိသဂၢၢ် င--- အဖံ ဘၣ်ခိၣ်အဆ့ၣ်တကပၤန့ၣ်လီၤ. အဘၣ်ဒိဒီးကျိချံဝံၤ SAC ကသံၣ်သရၣ် ကွၢ်ထွဲအတၢ်ပူၤလီၢ်န့ၣ်လီၤ.

တၢ်ကွၢ်ထွဲအတၢ်ပူၤလီၢ်ဝံၤအလီၢ်ခံ ပှၤက့ၤဆှၢအီၤလၢ အသဝီန့ၣ်လီၤ. င--- အိၣ်လၢအသဝီဒီး ဝ--- အဖိမုၣ် (င--- အဖိဒိၣ်မုၣ်)လဲၤဆှၢအီၤလၢ SAC ဒုးယၤတၢ်ဆါဟံၣ် ဒီး သိလ့ၣ်ယီၢ်န့ၣ်လီၤ. င--- မ့ၢ်ပှၤသဘျ့အဃိ အကၠီဒီး အဖိဒိၣ်မုၣ်တဖၣ် ကွၢ်ထွဲအီၤ ဖဲအလဲၤထီၣ်တၢ်ဆါဟံၣ်အဆၢကတီၢ်န့ၣ်လီၤ. အဝဲဘၣ်ထီၣ်တၢ်ဆါဟံၣ် (၂၃) သီ ဒီး စံၣ်လီၤဘၣ်ဖဲ လါစဲးပထ့ဘၢၣ် ၂၅ သီ, ၂၀၂၃ နံၣ်န့ၣ်လီၤ. သနာ်က့, အဝဲဘၣ်လဲဒုးနဲၣ် အတၢ်ပူၤလီၢ်တနွံတဘျီဖဲတၢ်ဆါဟံၣ်န့ၣ်လီၤ.

အခီၣ်ထံးန့ၣ် SAC သုးဖိတဖၣ် ဂ့ၢ်လိာ်ဝဲလၢ အဝဲသ့ၣ်တခး င--- ဘၣ်ဒီး တီၣ်ထီၣ်တၢ်ကမၣ်လၢ ကညီဒီကလုာ်တၢ်ထူၣ်ဖျဲးသုးမုၢ်ဒိၣ် (KNLA) သုးဖိတဖၣ်အလိၤန့ၣ်လီၤ. သနာ်က့ င--- အသကိးလၢ အလဲၤပိာ်အခံ တဲလီၤတံၢ်ဝဲလၢ SAC သုးဖိတဖၣ် ခး င--- န့ၣ်လီၤ. လၢခံ SAC သုးဖိတဖၣ်အံၤ ကပာ်ဘံၣ်ပာ်ဘၢတၢ်လၢအဝဲသ့ၣ်တၢ်ဟူးတၢ်ဂဲၤအဂီၢ် တဲဘၣ်အသုးခိၣ်လၢ င--- ဒီး အသကိး ကလဲၤဟံအကျီတဖၣ်လၢ ပျီပူၤန့ၣ် တတဲဘၣ်အဝဲသ့ၣ်တၢ်နီမံၤဘၣ်န့ၣ်လီၤ. ဝံၤအလီၢ်ခံ ဒုးယၤခိၣ် တူၢ်လိာ်လၢ ကဟံမူဒါခဲလၢာ်လၢ င--- တၢ်ကူစါယါဘျါသးအဂီၢ်န့ၣ်လီၤ. ဒုးယၤခိၣ်ဟ့ၣ်လီၤသံၣ်ကသီတၢ်လၢာ်ဘူၣ်လၢာ်စ့ၤအပှ့ၤ လၢတၢ် ကူစါယါဘျါသးအဂီၢ်သနာ်က့ အဟံၣ်ဖိဃီဖိတဖၣ် ဘၣ်ဆှၢတၢ်အီၣ်ကွၢ်ထွဲအီၤန့ၣ်လီၤ.

လၢတၢ်ဆါဟံၣ်န့ၣ် ပှၤပာ်လီၤဆီပှၤကညီလၢ ထဲဒၣ်ပိာ်ခွါန့ၣ် ကဘၣ်ကွၢ်ထွဲ ပိာ်ခွါပှၤဆါဒီး ထဲဒၣ်ပိာ်မုၣ်န့ၣ် ကဘၣ်ကွၢ်ထွဲ ပိာ်မုၣ်ပှၤဆါန့ၣ်လီၤ. လၢတၢ်န့ၣ်အဃိ င--- အကၠီလဲၤဟးလၢ အအိၣ်လၢတၢ်ဆါဟံၣ် သ့ကိးဆၢကတီၢ်ဒဲးန့ၣ်လီၤ. င--- အကၠီတဲဘၣ် KHRG လၢ “ဘၣ်ဃးတၢ်ကဲထီၣ်သးအံၤအဖီခိၣ် ယတဲတၢ်တဘၣ် မ့တမ့ၢ် ယမၤတၢ်တသ့နီမံၤဘၣ်. ကဲထီၣ်သးဝံၤလံဒီးပဘၣ်ပာ်ဒ်အံၤလီၤ. တၢ်အံၤ ယတထံၣ်လၢအဘၣ်ဘၣ်. ယသးအုး. ယကဘၣ်တဲဒ်လဲၣ်ယတသ့ၣ်ညါဘၣ်. ပမ့ၢ်တဲသကိးဘၣ်ဃးတၢ်ဂ့ၢ်အံၤန့ၣ် ပဘၣ်ဘၣ်ယိၣ်တၢ်လၢပဂီၢ်ဒီး သဝီဖိအဂၤတဖၣ် အတၢ်ဘံၣ်တၢ်ဘၢအဂီၢ်. မ့တမ့ၢ်ဘၣ်န့ၣ် SAC သုးတဖၣ် ကမၤကီမၤခဲပှၤ (ကဃိထံသ့ၣ်ညါ မ့တမ့ၢ် ကဟ့ၣ်သဝီဖိတဖၣ် တၢ်စံၣ်ညီၣ်.)”

SAC သုးဖိ ဟံတၢ်ဘံၣ်တၢ်ဘၢလၢ က--- သဝီဒီး ဝ့ၤစၤကျဲမုၢ်တဖၣ် ဆီတလဲအသးထီဘိအဃိ သုးရ့ၣ်ခိၣ်မ့ၢ်မတၤဂၤလဲၣ်န့ၣ် သ့ၣ်ညါဘၣ်အီၤကီန့ၣ်လီၤ. ဆၢကတီၢ်ခဲအံၤ SAC တဖၣ် တပာ်ဖျါထီၣ်အဝဲသ့ၣ်အမံၤအသၣ်ဒီး တမၤသကိးတၢ်ဒီး သဝီသးပှၢ်တဖၣ်လၢၤဘၣ်. သဝီဖိအိၣ်လၢ က--- သဝီတဖၣ်လဲၤမၤတၢ်လၢ အစံာ်လီၢ်ခုးလီၢ်တဘူၣ်လၢၤဘၣ်ဒီး တမၤဘၣ်တၢ် မုာ်မုာ်ခုၣ် ခုၣ်လၢၤဘၣ်. SAC သုးတဖၣ်ခးလီၤကျိဖးဒိၣ်ချံလၢ သဝီဖိအစံာ်လီၢ်ခုးလီၢ်ဖဲ ပှၤလဲၤခးအဝဲသ့ၣ်အဆၢကတီၢ်န့ၣ်လီၤ. ပှၤတူၢ် ဘၣ်တၢ် အကၠီလၢအမ့ၢ် ဝ--- ပာ်ဖျါထီၣ် ဘၣ်ဃးဒီးတၢ်အိၣ်သးအံၤလၢ “သဝီဖိတဖၣ်ပျံၤ SAC တၢ်ခးလီၤကျိဖးဒိၣ်ချံအဃိ အဝဲသ့ၣ်မၤတၢ်လၢ အစံာ်လီၢ်ခုးလီၢ်မုာ်မုာ်ခုၣ်ခုၣ်တဘူၣ်လၢၤဘၣ်. ကဟးကွၢ်ကျီၢ်အဂီၢ်ဒၣ်လဲာ်န့ၣ်ကီခဲဝဲ မ့ၢ်လၢ ကကွၢ်ထွဲကျီၢ် အဂီၢ် တၢ်လီၢ်လၢအဘံၣ်အဘၢတအိၣ်လၢၤဘၣ်. ဖဲ KNLA စုဘျၢသုးဖိ ခး SAC အဆၢကတီၢ် SAC ခးလီၤကျိဖးဒိၣ်ချံလၢ သဝီ ပူၤအဃိ သဝီဖိတဖၣ် ဘၣ်စံၣ်. တၢ်လၢပဘၣ်ဘၣ်ယိၣ်တၢ်ဒီး ပျံၤတၢ်အိၣ်ဖးအါညါ.” အတဲကဒီးဝဲလၢ “သုးဟံန့ၢ်ဆူၣ်တၢ်စိ တၢ်ကမီၤဝံၤ ပမၤတၢ်မုာ်မုာ်ခုၣ်ခုၣ်တသ့လၢၤဘၣ်. သဝီဖိအါတက့ၤ လဲၤပှ့ၤတၢ်အီၣ်ဒီး တၢ်အဂုၤအဂၤလၢ ကမးမိၣ်ဝ့ၢ် ဘၣ်ဆၣ် တၢ်တြီမၤတံာ်တာ်တၢ်ဟးထီၣ်က့ၤလီၤအဃိ ကီလၢကဟးထီၣ်က့ၤလီၤအဂီၢ်န့ၣ်လီၤ. သုးဟ့ၣ်သဝီဖိတဖၣ် တၢ်ပျဲလၢကဟး ထီၣ်က့ၤလီၤလၢထံကျဲ ခံလါတဘျီလီၤ. အဃိ တၢ်ဟးထီၣ်က့ၤလီၤလၢထံကျဲတန့ၢ်ဘၣ်အဆၢကတီၢ် သဝီဖိတဖၣ် ဘၣ်သူခိ ကျဲလၢ ကလဲၤပှ့ၤတၢ်အီၣ်ဒီး တၢ်အဂုၤအဂၤလၢ ဝ့ၢ်ပူၤလီၤ. ပဟးထီၣ်က့ၤလီၤဒ်သိးလၢ အပူၤကွံာ်တသ့လၢၤဘၣ်.”

က--- သဝီပူၤ ဟံဒူၣ်အိၣ် (၁၂၀) ဒူၣ်န့ၣ်လီၤ. သဝီဖိတဖၣ် မၤတၢ်လၢ စံာ်လီၢ်, ခုးလီၢ် ဒီး တၢ်သူၣ်တၢ်ဖျးကျီးလီၢ်တဖၣ်န့ၣ်လီၤ. သဝီဖိတနီၤ ဘုၣ်ကျီၢ်ဒီး အဂၤတနီၤဆါတၢ်အီၣ်တၢ်အီတဖၣ်လၢ အဝဲသ့ၣ်လဲၤပှ့ၤအီၤလၢ ဝ့ၢ်ပူၤန့ၣ်လီၤ. ဖဲသဝီဖိတဖၣ် မၤတၢ်လၢ တၢ်လုၢ်အီၣ်နီခိၣ်သးသမူဂီၢ်အဆၢကတီၢ် အဝဲသ့ၣ်ဘၣ်ပျံၤ SAC အတၢ်ထီဒါစ့ၢ်ကီးန့ၣ်လီၤ. သဝီဖိတဖၣ်ပာ်ဖျါထီၣ်ဝဲလၢ အဝဲသ့ၣ်အဲၣ်ဒိး SAC သုးတဖၣ်ပတုာ်အတၢ်ဟူးဂဲၤဟးဆှၣ်တၢ်ဖဲ ကညီကီၢ်စဲၣ်အပူၤန့ၣ်လီၤ. မ့ၢ်ဒ်န့ၣ်မး အဝဲသ့ၣ် ဟးထီၣ်က့ၤလီၤဒီး မၤတၢ်ဖံးတၢ်မၤလၢ တအိၣ်ဒီးတၢ်တြီမၤတံာ်တာ် ကသ့ဝဲန့ၣ်လီၤ.

မ့ၢ်ၦၤလၢအတူၢ်ဘၣ်တၢ်ဖၣ် ဟ့ၣ်ၦၤတၢ်ခွဲးတၢ်ယာ်လၢပကသူတၢ်ဂ့ၢ်တၢ်ကျိၤတခါအံၤဧါ, ဟ့ၣ်ၦၤတၢ်ခွဲးတၢ်ယာ်လၢ ပကသူ တၢ်ဂ့ၢ်အံၤလၢကျဲဒ်လဲၣ်.

ပှၤဟ့ၣ်တၢ်ဂ့ၢ်တၢ်ကျိၤဒီး ပှၤတူၢ်ဘၣ်တၢ်ဖိ ဟ့ၣ် KHRG အခွဲးလၢ ကသူတၢ်ဂ့ၢ်တၢ်ကျိၤအံၤန့ၣ်လီၤ.