English
ကညီကျိာ်
မြန်မာ
Print:တၢ်ကဲထီၣ်အသးတၢ်ပာ်ဖျါဖုၣ်ကိာ်တဘ့ၣ်အံၤ ပာ်ဖျါဝဲတၢ်ကဲထီၣ်သးဖဲ ဒွဲၣ်လိဒီးဘုသိၣ်ကီၢ်ဆၣ်ႇ မုၢ်တြီၢ်ကီၢ် ရ့ၣ် ဖဲလါမးၡး ၂၈သီ တုၤလါအ့ဖြ့ၣ် ၅ သီႇ ၂ဝ၂၁ နံၣ်ပူၤန့ၣ်လီၤ. ခီဖျိလၢ ကီၢ်ပဒိၣ်သုးခးလီၤနါစိၤကျိ ဖးဒိၣ်ချံသ့ၣ်တဖၣ်လၢ တၢ်လီၢ်အါတီၢ်အဃိ တၢ်ဃ့ၢ်အိၣ်ကမှံအိၣ်ထီၣ်ဒီး ကျိချံမျိာ်သးလၢတပိၢ်ဖးထီၣ်တဖၣ် အိၣ်ဝဲဒၣ်စ့ၢ်ကီးန့ၣ်လီၤ. ဖဲလါဖ့ၤဘြူၤအါရံၤ ၂ဝ၂၁နံၣ် ပယီၤသုးဟံးန့ၢ်ဆူၣ်တၢ်စိတၢ်ကမီၤဝံၤလီၢ်ခံ တၢ်ဒုးကဲထီၣ်က့ၤသးလၢ ကီၢ်ပဒိၣ်သုးဒီးကညီဒီကလုာ်တၢ်ထူၣ်ဖျဲးသုးမုၢ်ဒိၣ်အဘၢၣ်စၢၤ ဒီးတၢ်ခးလီၤကျိချံမျိာ်သး တဖၣ်အိၣ်ထီၣ်န့ၣ်လီၤ. ခဲအံၤ လီၢ်ကဝီၤသဝီဖိတဖၣ်ဘၣ်ယိၣ်လၢ အဝဲသ့ၣ်တဖၣ်ဘံၣ်တၢ်ဘၢအဂီၢ်န့ၣ်လီၤ. မ့ၢ်လၢ ဟီၣ်ကဝီၤတဖၣ်ပူၤ ဟီၣ်လာ်မ့ၣ်ပိၢ်အသီတဖၣ် ဘၣ်တၢ်ဆဲလီၤအီၤအဃိ ကဲထီၣ်တၢ်လီၤပျံၤလီၤဖုး လၢလီၢ်ကဝီၤၦၤတဝၢတဖၣ်အဂီၢ်န့ၣ်လီၤ. ဖဲလါအ့ဖြ့ၣ် ၅သီႇ ၂ဝ၂၁နံၣ်အတီၢ်ပူၤ သဝီဖိတဂၤယီၢ်ဘၣ်မ့ၣ်ပိၢ် ဖဲနါကူနါကရူၢ်ႇ ဒွဲၣ်လိကီၢ်ဆၣ်ပူၤဒီး ဘၣ်ဒိဝဲဒၣ်န့ၣ်လီၤ.
ဒွဲၣ်လိ ဒီး ဘုသိၣ်ကီၢ်ဆၣ်
ဖဲလါမးၡး ၂၈ သီ ဒီး လါအ့ဖြ့ၣ် ၅ သီအဘၢၣ်စၢၤႇ ၂ဝ၂၁ နံၣ်န့ၣ်ႇ ကီၢ်ပဒိၣ်သုး ခီၣ်သုးရ့ၣ်နီၣ်ဂံၢ် (၁၉) ဒီး ခီၣ်ချ့သုးရ့ၣ် နီၣ်ဂံၢ် (၃၄၁), (၄၃၄) ဒီး (၃၄ဝ) တဖၣ် ခးလီၢ်နါစိၤကျိဖးဒိၣ်လၢ အဝဲသ့ၣ်အ သုးကလၢၤအခိၣ်အဃၢၤ ဒူသဝီတဖၣ်ပူၤန့ၣ်လီၤ. သုးရ့ၣ်သ့ၣ်တဖၣ်န့ၣ် အိၣ်သူၣ်လီၢ်အသးဘူးဒီး ဖၣ် ပူၣ်ဝ့ၢ်ႇ ဖဲဒွဲၣ်လိဒီးဘုသိၣ်ကီၢ်ဆၣ်ပူၤန့ၣ်လီၤ. ကီၢ်ပဒိၣ်သုးတဖၣ်အံၤခးလီၤကျိဖးဒိၣ်ချံ မ့ၢ်လၢအဝဲသ့ၣ်ဒိးန့ၢ်ဘၣ်တၢ်ကစီၣ်လၢ ကညီဒီကလုာ်တၢ်ထူၣ်ဖျဲးသုးမုၢ်ဒိၣ် (KNLA) အသုးတဖၣ် အိၣ်သူၣ်လီၤသးဘူး ဒီးအသုးကလၢၤတဖၣ်အဃိန့ၣ်လီၤ.
တၢ်လီၢ်လၢ ကျိဖးဒိၣ်ချံလၢအလီၤတဲာ်တဖၣ်-
- ကဝီၤဒ့ (၃), ကဝီၤဒ့ (၄) ဒီး ဖၣ်ပူၣ်ဝ့ၢ်လာ်ခီတပၤ
- ချၢၣ်ခိၣ်သဝီႇ မးထီကရူၢ်ႇ ဒွဲၣ်လိကီၢ်ဆၣ်
သဝီဖိတဂၤလၢ အအိၣ်ဖဲဖၣ်ပူၣ်ဝ့ၢ်ပူၤ ပာ်ဖျါထီၣ်ဝဲလၢ “ဖဲလါအ့ဖြ့ၣ်၃သီႇ ၂ဝ၂၁နံၣ်န့ၣ် ပယီၤသုးခး လီၤနါစိၤကျိဖးဒိၣ်ချံလၢ ၦၤတဝၢပူၤန့ၣ်လီၤ. ကျိဖးဒိၣ်ချံတဖျၢၣ် လီၤတဲာ်ဖဲယဟံၣ်ကပၤဒီး အပိၢ်ဖးထီၣ်လီၤ. ကျိဖးဒိၣ်ချံတနီၤလီၤတဲာ်လၢ သီခါဖၠၣ်ကရၢၢ်ပူၤ. တနီၤန့ၣ်တပိၢ်ဖးထီၣ်ဒံးဘၣ်.” န့ၣ်လီၤ. တၢ်ခးလီၤကျိဖးဒိၣ်ချံတဖၣ်အဃိ တၢ်သံတၢ်ၦၢ်ဒီးတၢ်ဘၣ်ဒိဘၣ်ထံးတဖၣ်တအိၣ်ဘၣ်သနာ်က့ လီၤကဝီၤသဝီ ဖိတဖၣ်ပျံၤတၢ်ဖုးတၢ်ဒီး ဘၣ်ယိၣ်တၢ်လၢအဝဲသ့ၣ်တဖၣ်ဘံၣ်တၢ်ဘၢအဂီၢ်န့ၣ်လီၤ. အဝဲသ့ၣ်ဘၣ်ယိၣ်လၢ ဆူညါတၢ်အိၣ်သးကနးထီၣ်ဝဲန့ၣ်လီၤ. ဘၣ်ဆၣ် အဝဲသ့ၣ်ကဘၣ်လဲၤဃ့ၢ်အိၣ်ဖဲလဲၣ်န့ၣ် တသ့ၣ်ညါဝဲဘၣ်. “ပနုာ်လီၤကွၢ်တၢ်ကစီၣ်တဖၣ်တန့ၢ်ဘၣ်အဃိ ပတသ့ၣ်ညါဘၣ်တၢ်အိၣ်သးလၢၦၤပာ်ဖျါထီၣ်အီၤန့ၣ်ဘၣ်. အဃိ ယအဲၣ်ဒိးသ့ၣ်ညါလၢ မ့ၢ်ယကဘၣ်လဲၤစံၣ်အိၣ်ဖဲလဲၣ်. တၢ်လီၢ်အဂ့ၤကတၢၢ်လၢ ကလဲၤစံၣ်အိၣ်အဂီၢ်န့ၣ်မ့ၢ်ဖဲလဲၣ်လိၣ်လဲၣ်.”
ဖဲလါအ့ဖြ့ၣ် ၄သီ ၂ဝ၂၁ နံၣ်န့ၣ် KNLA လဲၤဒုးကီၢ်ပဒိၣ်သုးကူစ့ၣ်သုးကလၢၤလၢ အအိၣ်သူၣ်လီၤသးဖဲ မးထီကရူၢ်ႇ ဒွဲၣ်လိကီၢ်ဆၣ်ပူၤန့ၣ်လီၤ. KNLA သုးဖိတဖၣ် တြီဃာ်ကီၢ်ပဒိၣ်သုးကျဲဒီးသ့ၣ်ဖျၢၣ်ဒီး ဆဲလီၤဟီၣ်လာ်မ့ၣ်ပိၢ်တဖၣ်န့ၣ်လီၤ. ကီၢ်ပဒိၣ်သုးမၤဆၢက့ၤ ခီဖျိခးလီၤနါစိၤကျိဖးဒိၣ်ချံဆူ သဝီလၢအအိၣ် ဘူးတဖၣ်အပူၤန့ၣ်လီၤ. ခဲအံၤ လီၢ်ကဝီၤသဝီဖိတဖၣ် ဘၣ်အိၣ်လၢတၢ်ပျံၤတၢ်ဖုးအပူၤ မ့ၢ်လၢတၢ်ခးလီၤကျိဖးဒိၣ်ချံဒီးတၢ်ဆဲလီၤဟီၣ်လာ်မ့ၣ်ပိၣ်အဃိန့ၣ်လီၤ. သဝီဖိတဖၣ် ဘၣ်ကွၢ်ဆၢၣ်မဲာ်စ့ၢ်ကီးဒီး တၢ်ဟးထီၣ်က့ၤလီၤတၢ်မၤဃံးန့ၣ်လီၤ. အဝဲသ့ၣ်ဟးထီၣ်က့ၤလီၤတဘူၣ်ဘၣ် မ့ၢ်လၢကီၢ်ပဒိၣ်သုးအတၢ်အိၣ်သူၣ် လီၤသးဒီး တၢ်ဆဲလီၤမ့ၣ်ပိၢ်တဖၣ်အတၢ်လီၤဘၣ်ယိၣ်အဃိန့ၣ်လီၤ.
ဖဲလါအ့ဖြ့ၣ် ၅သီႇ ၂ဝ၂၁ နံၣ်န့ၣ် ခီၣ်ချ့သုးရ့ၣ် နီၣ်ဂံၢ် (၃၄၁) ခးလီၤချိဖးဒိၣ်ချံဆူ က---သဝီႇ မးထီကရူၢ်ႇ ဒွဲၣ်လိကီၢ်ဆၣ်အဃိ လီၢ်ကဝီၤသဝီဖိတဖၣ် ဘၣ်လဲၤဃ့ၢ်အိၣ်ဆူ မ---သဝီႇ ကျီထၣ်ကရူၢ်ႇ ဒွဲၣ်လိကီၢ်ဆၣ်ပူၤ တဘျီဃီန့ၣ်လီၤ. ခီၣ်ချ့သုးရ့ၣ် နီၣ်ဂံၢ် (၃၄၁) သုးရ့ၣ်ခိၣ်ဟ့ၣ်လီၤတၢ်ကလုၢ်ဆူ ကရူၢ်ခိၣ်အအိၣ် လၢကတဲဖျါထီၣ် ၦၤဃ့ၢ်အိၣ်ကမှံတဖၣ်အိၣ်လၢအဝဲသ့ၣ်အဟံၣ်ဧါန့ၣ်လီၤ. လၢန့ၣ်အမဲာ်ညါ အဟ့ၣ်လီၤသဝီၤသးၦၢ်တၢ်ကလုၢ်လၢ အကတဲာ်ကတီၤန့ၢ်အီၤ စရီလီၤဆီခံခါန့ၣ်လီၤ. တခါန့ၣ်မ့ၢ်ဝဲ သဝီဖိလၢအတူၢ်လိာ်ၦၤဃ့ၢ်အိၣ်ကမှံတဖၣ်စရီ ဒီး အဂၤတခါမ့ၢ် ၦၤသဝီဖိလၢအတတူၢ်လိာ်ၦၤဃ့ၢ်အိၣ် ကမှံတဖၣ်စရီန့ၣ်လီၤ. သနာ်က့ သုးရ့ၣ်ခိၣ်အံၤ ဘၣ်မနုၤအဃိအလိၣ်ဘၣ်စရီအံၤလဲၣ်န့ၣ် တတဲဖျါဝဲ လီၤတံၢ်လီၤဆဲးဘၣ်.
ဖဲ လါအ့ဖြ့ၣ် ၅ သီႇ ၂ဝ၂၁နံၣ်န့ၣ် သဝီဖိတဂၤလၢအအိၣ်ဖဲဖၣ်ပူၣ်ဝ့ၢ် ယီၢ်ဘၣ်မ့ၣ်ပိၢ်အသီတဖျၢၣ် ဘၣ်တၢ်ဆဲလီၤအီဖဲ ငအ့စူၣ်ကျဲဖးဒ့လၢအအိၣ်ဖဲ နါကူနါသဝီႇ နါကူနါကရူၢ်ႇ ဒွဲၣ်လိကီၢ်ဆၣ်ပူၤန့ၣ်လီၤ. အဘၣ်ဒိဝံၤအလီၢ်ခံ ၦၤလဲၤကိးအီၤဆူ ခီၣ်ချ့သုးရ့ၣ်နီၢ်ဂံၢ် (၄၃၄) ကသံၣ်ဒၢး လၢကကူဆါယါဘျါအဂီၢ်န့ၣ်လီၤ. အဘၣ်ဒိနးထဲလဲၣ်န့ၣ် လီၢ်ကဝီၤသဝီဖိတဖၣ်တသ့ၣ်ညါဝဲဘၣ်. [ဘၣ်ဃးအတၢ်ဘၣ်ဒိဘၣ်ထံးနးထဲၣ်လဲၣ်အဂ့ၢ်န့ၣ် ကညီဂ့ၢ်ဝီခွဲးယာ်ကရူၢ် တဒိးန့ၢ်ဘၣ်တၢ်ဂ့ၢ်တၢ်ကျိၤဘၣ်.]
