တၢ်ကဲထီၣ်သးအကလုာ်

[ဟီၣ်လာ်မ့ၣ်ပိၢ်] မ့ၣ်ပိၢ်တုၢ်ပျံၤတၢ်ကဲထီၣ်သး

တၢ်ကဲထီၣ်သးမုၢ်နံၤမုၢ်သီ

လါယူၤ ၈ သီ, ၂၀၂၅ နံၣ်အနံၤ

တၢ်ကဲထီၣ်သးတၢ်လီၢ်တၢ်ကျဲ (သဝီ, ကရူၢ်, ကီၢ်ဆၣ်, ကီၢ်ရ့ၣ်)

ဘဆ--- (ဘၣ်တၢ်သ့ၣ်ညါစ့ၢ်ကီးအီၤလၢ ဘဟ---) တၢ်လီၢ်, ဘဘ--- ကရူၢ်, ဖၣ်အၣ်ကီၢ် ဆၣ်, ဒူသထူၣ်ကီၢ်ရ့ၣ်

ၦၤလၢအတူၢ်ဘၣ်တၢ်တဖၣ်အဂ့ၢ်အကျိၤ

မံၤ

စီၤအ---

စီၤဘ---

သးနံၣ်

၄၀ နံၣ်

၃၇ နံၣ်

မုၣ်/ ခွါ

ခွါ

ခွါ

ကလုာ်

ကညီ

ကညီ

ဟံၣ်ဖိဃီဖိ အိၣ် / တအိၣ်   

ထီၣ်ပှၢ်

လီၤဖး

တၢ်ဖံးတၢ်မၤ

ထူစံာ်

သူၣ်တၢ်ဖျးတၢ်

တၢ်ဘူၣ်တၢ်ဘါ

ဘူးဒး

ဘူးဒး

တၢ်ဟံမူဒါ/ လီၢ်လၤ

[သဝီဖိ]

[သဝီဖိ]

အိၣ်ဆိးဒူသဝီ

အဘ--- သဝီ, ဘဃ--- (ဘၣ်တၢ်သ့ၣ်ညါစ့ၢ် ကီးအီၤလၢ ဆဘ---) ကရူၢ်, ဖၣ်အၣ်ကီၢ်ဆၣ်, ဒူသထူၣ်ကီၢ်ရ့ၣ်.

အဒ--- သဝီ, ဘဃ--- (ဘၣ်တၢ်သ့ၣ်ညါ စ့ၢ်ကီးအီၤလၢ ဆဘ---) ကရူၢ်, ဖၣ်အၣ် ကီၢ်ဆၣ်, ဒူသထူၣ်ကီၢ်ရ့ၣ်.

ၦၤလၢအမၤအၢပယွဲတၢ်တဂၤအဂ့ၢ်အကျိၤ

မံၤ                    

လီၢ်လၤ

သုးကျိၤ/ သုးရ့ၣ် / သုးတြိၤ

အိၣ်သူၣ်လီၤသးလီၢ်ကျဲ / သုးကလၢၤ

အခိၣ်အမံၤဒီးလီၢ်လၤ

[တသ့ၣ်ညါ]

[တသ့ၣ်ညါ]

DKBA [ကညီဘူးဒးသုးမုၢ်ဒိၣ်] သုး [တသ့ၣ်ညါ သုးကျိၤ/ သုးရ့ၣ်/ သုး တြိၤ]

ကၠၤအ့ပီၤတီၤမူၤသီခါဖၠၢ်, ကၠါကူၤတၢ်လီၢ်, မဲၣ်ကရီ ကရူၢ်, ဖၣ်အၣ်ကီၢ်ဆၣ်, ဒူသထူၣ်ကီၢ်ရ့ၣ်.

စီၤဘိၤဘံၣ်

၁. ၡဲပၠးၦၤနဟံးန့ၢ်တၢ်ကဲထီၣ်သးတခါအံၤ တဆီဘၣ်တဆီတက့ၢ်.

ဘဃ--- ကရူၢ်လီၢ်ကဝီၤခိၣ်နၢ် [လၢတၢ်ဘံၣ်တၢ်ဘၢအဂီၢ်ဘၣ်တၢ်မၤဘၢဃာ်လီၢ်လာ်တဂၤ] လၢအမံၤမ့ၢ် စီၤက--- နၢ်ဟူဝဲတၢ် ပိၢ်ဖးထီၣ်သီၣ်န့ၣ်လီၤ. လၢန့ၣ်ဝံၤအလီၢ်ခံ, အဝဲဃုသ့ၣ်ညါဝဲတၢ်ဂ့ၢ်တၢ်ကျိၤ [တၢ်ပိၢ်ဖးထီၣ်အဂ့ၢ်အကျိၤ] ဒီးအဝဲသ့ၣ်ညါဘၣ်လၢ သဝီဖိတဖၣ်ဘၣ်ဒိဒီးမ့ၣ်ပိၢ်တုၢ်ပျံၤန့ၣ်လီၤ. ဖဲလါယူၤ ၉ သီ, ၂၀၂၅ နံၣ်အနံၤ ဖဲအဝဲသ့ၣ်ညါဘၣ်ဝဲတၢ်ဂ့ၢ်တၢ်ကျိၤဝံၤအလီၢ်ခံအ ဝဲ [စီၤက---] ဒုးသ့ၣ်ညါယၤ [KHRG ပျီပူၤပှၤမၤတၢ်ဖိ] အဃိယ [KHRG ပျီပူၤပှၤမၤတၢ်ဖိ] လဲၤဆူ အဆ--- သဝီ လၢယကမၤ တၢ်ထံၣ်လိာ်သံကွၢ်ဒီးပှၤတူၢ်ဘၣ်တၢ်အကျါတဂၤ စီၤအ--- ဒီးယမၤနီၣ်မၤဃါဝဲတၢ်ကဲထီၣ်သးအဂ့ၢ်န့ၣ်လီၤ.

၂. ကွဲးနီၣ်ၦၤလၢဟ့ၣ်တၢ်ဂ့ၢ်အံၤတဂၤစုာ်စုာ်သ့ၣ်ညါ တၢ်ဂ့ၢ်အံၤအမ့ၢ်အတီလၢကျဲဒ်လဲၣ်.

ပဆၢတဲာ်လၢတၢ်ကဲထီၣ်သးအံၤမ့ၢ်ဝဲတၢ်ကဲထီၣ်သးနီၢ်ကီၢ်သ့ဝဲခီဖျိယ [KHRG ပျီပူၤပှၤမၤတၢ်ဖိ] မၤတၢ်ထံၣ်လိာ်သံကွၢ် ဒီး ပှၤ တူၢ်ဘၣ်တၢ်အကျါတဂၤ [စီၤအ---] ဒီးတၢ်ဂီၤတၢ်ဖီၣ်လၢတၢ်အုၣ်ကီၤအဂီၢ်အိၣ်စ့ၢ်ကီးန့ၣ်လီၤ. [ပျီပူၤပှၤမၤတၢ်ဖိတဂၤအံၤတဲ သကိးစ့ၢ်ကီးတၢ်ဒီး နီၢ်ဂ--- လၢအမ့ၢ်စီၤအ--- အမါန့ၣ်လီၤ].

ပာ်ဖျါတၢ်ကဲထီၣ်သးအဂ့ၢ်အကျိၤလၢလၢၦဲၤၦဲၤတက့ၢ်.

ဖဲလါယူၤ ၈ သီ, ၂၀၂၅ နံၣ်အနံၤန့ၣ်သဝီဖိခံဂၤလၢအအိၣ်လၢ ဘဃ--- (ဘၣ်တၢ်သ့ၣ်ညါစ့ၢ်ကီးအီၤလၢ ဆဘ---) ကရူၢ် ဘၣ်ဒိဒီးမ့ၣ်ပိၢ်တုၢ်ပျံၤဖဲ ဘဆ--- (ဘၣ်တၢ်သ့ၣ်ညါစ့ၢ်ကီးအီၤလၢ ဘဟ---) တၢ်လီၢ်, ဘဘ--- ကရူၢ်, ဖၣ်အၣ်ကီၢ်ဆၣ်, ဒူသထူၣ်ကီၢ်ရ့ၣ် အပူၤန့ၣ်လီၤ.

ဖဲတၢ်တနံၤန့ၣ်, သဝီဖိတဂၤလၢအမံၤမ့ၢ် စီၤအ--- (ဘၣ်တၢ်သ့ၣ်ညါစ့ၢ်ကီးအီၤလၢ စီၤဒ---) လၢအအိၣ်ဖဲ အဘ--- သဝီ, ဘဃ--- ကရူၢ်, လဲၤဒိးအီၣ်ညၣ်ဒီးကၠၤဖဲ အဆ--- သဝီ, ဘဃ--- ကရူၢ် န့ၣ်လီၤ. ဖဲအဝဲဒိးညၣ်ဝံၤအလီၢ်ခံအဝဲ [စီၤအ---] ထံၣ်လိာ်သးဒီး အသကိး စီၤဘ--- လၢအမ့ၢ်ပှၤတဂၤလၢအအိၣ်ဖဲ အဆ--- သဝီ [ဘၣ်ဆၣ်အဝဲအသဝီနီၢ်နီၢ်တခီမ့ၢ်ဝဲ အဒ--- သဝီ, ဘဃ--- ကရူၢ်] န့ၣ်လီၤ. ဝံၤအလီၢ်ခံအဝဲသ့ၣ်ဆၢတဲာ်လီၤအသးလၢကလဲၤဆူ ဘဘ--- သဝီ [ဘဘ--- ကရူၢ်] န့ၣ်လီၤ. ဖဲအဝဲသ့ၣ်စးထီၣ် လဲၤအဆၢကတီၢ်တၢ်ဘူးကခံးလံန့ၣ်လီၤ. စီၤအ--- နီဝဲသိလ့ၣ်ယီၢ်ဒီးအသကိး စီၤဘ--- ဒိးပိာ်အခံလၢတၢ်လီၢ်ခံန့ၣ်လီၤ. အဝဲ သ့ၣ်မူၤသံးတချုးလၢအဝဲသ့ၣ်လဲၤဆူ ဘဘ--- သဝီဒံးဘၣ်န့ၣ်လီၤ.

ဖဲအဝဲသ့ၣ်လဲၤတုၤဖဲ ဘဆ--- တၢ်လီၢ် [ဖဲအဝဲသ့ၣ်လဲၤလၢကျဲလၢကလဲၤဆူ ဘဘ--- သဝီ] အဆၢကတီၢ် အဝဲသ့ၣ်ပလဲၤ ဝဲလၢၢ် တဖျၢၣ်လၢအအိၣ်ဖဲကျဲမုၢ်ခၢၣ်သးန့ၣ်လီၤ. သိလ့ၣ်ယီၢ်အခီၣ်ပၣ်လီၢ်ခံဘၣ်ကွးဝဲမ့ၣ်ပိၢ်တုၢ်ပျံၤတဖျၢၣ်အပျံၤဒီးပိၢ်ဖးထီၣ် န့ၣ်လီၤ. [မ့ၣ်ပိၢ်တုၢ်ပျံၤတဖျၢၣ်အံၤ] ဘၣ်တၢ်ဒိးလီၤပာ်အီၤဖဲ [ကျဲမုၢ်တဘိအံၤ] အကပၤ, မ့မ့ၢ်လၢအဝဲသ့ၣ်ဟဲဝဲတပၤန့ၣ်မ့ၣ်ပိၢ် အံၤအိၣ်ဝဲလၢအစ့ၣ်တပၤန့ၣ်လီၤ. လၢတၢ်န့ၣ်အဃိမ့ၣ်ပိၢ်အက့သ့ၣ်တဖၣ်ဘၣ်ဝဲအဝဲသ့ၣ်အမိၢ်ပှၢ်အစ့ၣ်တကပၤန့ၣ်လီၤ. [ပှၤလၢအဟူးဂဲၤဖဲဟီၣ်ကဝီၤဖဲအံၤမ့ၢ်ဝဲထဲ DKBA သုးကရူၢ်တဖုဧိၤဒီး DKBA သုးဖိအတၢ်ဟူးတၢ်ဂဲၤလၢအအိၣ်ဖျါလၢ တၢ် ကဲထီၣ်သးတဘျီအံၤအ ဃိပှၤတူၢ်ဘၣ်တၢ်ဒီးလီၢ်ကဝီၤသဝီဖိသ့ၣ်တဖၣ် နာ်ဝဲလၢမ့ၣ်ပိၢ်တုၢ်ပျံၤတဖျၢၣ်အံၤဘၣ်တၢ်ဒိးလီၤပာ် အီၤလၢ DKBA န့ၣ်လီၤ.]

ပှၤလၢအနီသိလ့ၣ်ယီၢ် စီၤအ--- ဘၣ်တပျာ်ဝဲဒီးမ့ၣ်ပိၢ်အက့ဖဲအကိာ်ကျၢၢ်ခံန့ၣ်လီၤ. မ့ၣ်ပိၢ်အက့ခံက့ဘၣ်စ့ၢ်ကီးဝဲအ [စီၤအ---] အခီၣ်ကံၣ်ဒုၣ်အစ့ၣ်ဒီးမ့ၣ်ပိၢ်အက့တက့ဘၣ်စ့ၢ်ကီးဝဲအခီၣ်လ့ၢ်ခိၣ်ဖီလာ် [ခီၣ်လိာ်ဃံ] အဃံဒီးအထူၣ်န့ၣ်လီၤ. စီၤဘ--- အခီၣ်ဒီတပၤဒီးအချၢဃံဒီတဘ့ၣ်ဘၣ်ဒီးမ့ၣ်ပိၢ်အက့န့ၣ်လီၤ. တၢ်ကဲထီၣ်သးဝံၤအလီၢ်ခံ DKBA သုးဖိသ့ၣ်တဖၣ် ဆှၢအဝဲသ့ၣ် ဆူ အဃ--- တၢ်ဆါဟံၣ် ဘၣ်ဆၣ်လၢတၢ်ကူစါယါဘျါ [မ့တမ့ၢ်တၢ်ဟ့ၣ်ကၣ်အဘူးအလဲ] အဂီၢ်အဝဲသ့ၣ် [ပှၤတူၢ်ဘၣ်တၢ်] တဒိးန့ၢ် ဘၣ်ဝဲတၢ်ဆီၣ်ထွဲမၤစၢၤနီတမံၤလၢ DKBA အအိၣ်ဘၣ်န့ၣ်လီၤ. အဃ--- တၢ်ဆါဟံၣ်အံၤဘၣ်တၢ်တီခိၣ်ရိၣ်မဲအီၤလၢ SAC [ထံကီၢ်တၢ်ပၢတၢ်ပြးကီၣ်ကးကရၢ] ဒီး တၢ်ဆါဟံၣ်တဖျၢၣ်အံၤအိၣ်သူၣ်လီၤအသးဖဲ ဆဟ--- ကရူၢ်, ဖၣ်အၣ်ကီၢ်ဆၣ်, ဒူသထူၣ်ကီၢ်ရ့ၣ် အပူၤန့ၣ်လီၤ.

သဝီဖိအကျါပှၤလၢအဘၣ်ဒီး DKBA အမ့ၣ်ပိၢ်တုၢ်ပျံၤတဂၤ စီၤအ--- စံးဘၣ် KHRG လၢ “တၢ်ပိၢ်ဖးထီၣ်ဝံၤအလီၢ်ခံအဝဲသ့ၣ် [DKBA သုးဖိတဖၣ်] ဟဲဃီၤဆူပအိၣ်ဒီးဖဲအဝဲသ့ၣ်ကတီၢ်ပှၤဒီးတၢ်စုကဝဲၤ [ကျိ] အဆၢကတီၢ်ပတဲအဝဲသ့ၣ်လၢပတမ့ၢ်တၢ်နီ တမံၤဘၣ် [ပတဘၣ်ထွဲဘၣ်ဃးဒီးသုးကရူၢ်နီတဖုဘၣ်] ဒီးပဒဲဘံၣ်ထီၣ်ပစုဒီးပဃ့ကညာ်အဝဲသ့ၣ်န့ၣ်လီၤ. လၢန့ၣ်ဝံၤအလီၢ်ခံ အဝဲသ့ၣ်သမံသမိးပှၤ လီၤ. ဝံၤအလီၢ်ခံအဝဲသ့ၣ်အခိၣ်အနၢ်တဂၤကိးဃီၤလီတဲစိဆူအဝဲသ့ၣ် [DKBA သုးဖိလၢအလဲၤကွၢ်သ ဝီဖိတဖၣ်အံၤ] အအိၣ်လီၤ. ဖဲအဝဲ သ့ၣ်တဲတၢ်လၢလီတဲစိဝံၤအလီၢ်ခံအဝဲသ့ၣ်မၢပထီၣ်လၢသိလ့ၣ်အလီၢ်ခံလီၤ. သိလ့ၣ် အကလုာ်အံၤမ့ၢ် Vigo ဧါမနုၤဧါလဲၣ်န့ၣ် [သိလ့ၣ်လၢ အိၣ်ဒီးအခံလၢတၢ်ကတီတၢ်အဂီၢ်] ယတသ့ၣ်ညါဘၣ်. လၢတၢ်န့ၣ်အဃိပဘၣ်ဒိးသိလ့ၣ်လၢတၢ်လီၢ်ခံလီၤ. လၢန့ၣ်ဝံၤအလီၢ်ခံအဝဲသ့ၣ်လဲၤဆှၢပှၤဆူ အဃ--- တၢ်ဆါဟံၣ်လၢ ပကဒိးန့ၢ်ဘၣ် တၢ်ကူစါယါဘျါအဂီၢ်န့ၣ်လီၤ.” အဝဲစံးကဒီးဝဲ “လၢန့ၣ်ဝံၤအလီၢ်ခံကသံၣ်သရၣ်ဖွဲးကူစါ ယါဘျါပှၤဒ်သိး ကထုးထီၣ်မ့ၣ်ပိၢ်အက့ လၢပမိၢ်ပှၢ်အပူၤန့ၣ်လီၤ. ဝံၤဒီးယထံၣ်ကသံၣ်သရၣ်ထုးထီၣ်န့ၢ်ဝဲမ့ၣ်ပိၢ်အက့ဖိဆံးသ့ၣ်တဖၣ်လၢ စီၤဘ--- အချၢဃံန့ၣ်လီၤ. လၢန့ၣ်ဝံၤအလီၢ်ခံ စီၤဘ--- အတခွါလၢအိၣ်လၢ ဘမ--- သဝီ [ဆဟ--- ကရူၢ်, ဖၣ်အၣ်ကီၢ်ဆၣ်] တဂၤ ဟဲအိၣ်ပှၤ ဒီးပမံဖဲ အဟံၣ်တနၤလီၤ. မုၢ်ဆ့ၣ်ထီၣ်တဂီၤဒီးအတခွါဟဲက့ၤဆှၢက့ၤပှၤဆူပဟံၣ် ဒီးခီၣ်ပၣ်သၢပၣ်သိလ့ၣ်ယီၢ်လီၤ.”

စီၤအ--- [ဟဲက့ၤတုၤလံလၢအသဝီဒီး] အတၢ်ဘၣ်ဒိဘၣ်ထံးလၢအမ့ၢ်အကိာ်ကျၢၢ်ခံဒီးအခီၣ်ကံၣ်ဒုၣ်ဘျါကွံာ်ဝဲဒၣ်လံန့ၣ်လီၤ. [အဝဲတဘၣ်ဟ့ၣ်ဝဲတၢ်ကူစါယါဘျါသးအပှ့ၤနီတမံၤဘၣ်ခီဖျိဆူၣ်ချ့ပှၤမၤတၢ်ဖိလၢအအိၣ်ဖဲတၢ်ဆါဟံၣ်တဖၣ်သ့ၣ်ညါအီၤဒီးသးကညီၤဒိသူၣ်ဒိသးအီၤအဃိန့ၣ်လီၤ]. ဘၣ်ဆၣ်သနာ်က့, စီၤအ--- ဖံးတၢ်မၤတၢ်တလဲၤသးဘၣ်ဂ့ၢ်ဘၣ်ဝီဒ်သိးအပူၤကွံာ် ဘၣ် [အဝဲဘၣ်ဒိဘၣ်ထံး] ခီဖျိအခီၣ်လ့ၢ်ခိဖီလာ် [ခီၣ်လိာ်ဃံ] ဘၣ်ဒိစ့ၢ်ကီး [ဒီးအတၢ်ဘၣ်ဒိဘၣ်ထံးအံၤတဘျါဂ့ၤဂ့ၤဒံးဘၣ်] န့ၣ်လီၤ. အဝဲစံးဝဲလၢတဘျီတခီၣ်အဝဲဘၣ် [စၢထီၣ်] အခီၣ်ဒီးပျံၤဒီးဘိးထီၣ်ဆူတၢ်ဖးဖီ [ဒ်သိးကမၤလီၤမၢ်တၢ်ဆါ] ခီဖျိအ [ခီၣ်လိာ်ဃံ] တသံၣ်တီၤတုၤဒီးဆါအဃိန့ၣ်လီၤ. [ခီဖျိအဝဲဖံးတၢ်မၤတၢ်တန့ၢ်ဂ့ၤဂ့ၤဒ်လၢညါဘၣ်အဃိဘၣ်ဒိဝဲအဟံၣ်ဖိဃီ ဖိအတၢ်လုၢ်အီၣ်နီၢ်ခိသးသမူန့ၣ်လီၤ.] စီၤအ--- အံၤထီၣ်ပှၢ်လံဒီးအဖိခွါအိၣ် (၂) ဂၤန့ၣ်လီၤ. မ့မ့ၢ်လၢ စီၤဘ--- တခီလီၤ ဖးဒီးအမါဒီးအဖိမုၣ်အိၣ်တဂၤန့ၣ်လီၤ. အမါန့ၢ်ဝၤလၢအသီလံန့ၣ်လီၤ. [ဖဲအဝဲဒိးန့ၢ်ဘၣ်ဝဲတၢ်ကူစါယါဘျါတၢတပတီၢ်] ဝံၤအလီၢ်ခံ စီၤဘ--- အံၤက့ၤက့ၤဝဲဆူ အဒ--- သဝီလၢအမ့ၢ်တၢ်လီၢ်တတီၤလၢအမိၢ်အိၣ်အလီၢ် ဒ်သိးကကူစါယါဘျါကဒီး အသးန့ၣ်လီၤ. လၢတၢ်န့ၣ်အဃိ [KHRG] တသ့ၣ်ညါဘၣ်အတၢ်အိၣ်သးလၢၤဘၣ်န့ၣ်လီၤ.

ဘၣ်ဃးဒီးသဝီဖိလၢအတၢ်ကမၣ်တအိၣ်ခံဂၤဘၣ်ဒိဒီးမ့ၣ်ပိၢ်တုၢ်ပျံၤလၢ [လီၢ်ကဝီၤနာ်ဝဲလၢအမ့ၢ်] DKBA သုးဒိးလီၤပာ်ဝဲတ ဖျၢၣ်အံၤ, အဝဲသ့ၣ် [DKBA] တဟူးဂဲၤမၤတၢ်ဒီးတဟ့ၣ်ဝဲကသံၣ်ကသီတၢ်ကူစါယါဘျါအပှ့ၤနီတမံၤဘၣ်. စီၤအ--- အမါလၢ အမံၤမ့ၢ် နီၢ်ဂ--- စံးဝဲလၢ “ဖဲအဝဲသ့ၣ်ဘၣ်ဒီးမ့ၣ်ပိၢ်တုၢ်ပျံၤတဖျၢၣ်အံၤဝံၤအလီၢ်ခံ လၢခံတဂီၤန့ၣ် သိလ့ၣ်ယီၢ်တခိၣ်အံၤအိၣ်တ့ၢ် ဒံးဒၣ်လၢ တၢ်ကဲထီၣ်သးအလီၢ်လီၤ. သိလ့ၣ်ယီၢ်တခိၣ်အံၤအကလုာ်န့ၣ်မ့ၢ် WAVE Fi လီၤ. သိလ့ၣ်ယီၢ်ဒီတခိၣ် နၢလၢဘျါအ့ၣ် လီၤ. သိလ့ၣ်ယီၢ်တခိၣ်အံၤတဟးဂီၤဘၣ်. တၢ်နီအီၤသ့ဒံးဝဲလီၤ. ဘၣ်ဆၣ်သနာ်က့ သိလ့ၣ်ယီၢ်အဘ့ၣ်ဘၣ်ဝဲဒီးမ့ၣ်ပိၢ်အက့တ ဆံးတက့ၢ်လီၤ.”

DKBA သုးလၢအဘၣ်တၢ်တီခိၣ်ရိၣ်မဲအီၤလၢစီၤဘိၤဘံၣ်တဖုအံၤဘၣ်တၢ်ဆီၣ်ထွဲအီၤလၢသီခါလၢအအိၣ်လၢကၠၤအ့ပီၤတီၤမူၤ [ဖၠၢ်] တဂၤလၢအမံၤမ့ၢ်အူနၤဒၣ်သၤရၣ်န့ၣ်လီၤ. အဝဲသ့ၣ်ဒိးန့ၢ်ဘၣ်ဝဲကျိၣ်စ့ဒီးဟူးဂဲၤမၤတၢ်လၢမ့အီၤလဲၤသုးအစုဒုၣ်တီၤဖီလာ် န့ၣ်လီၤ. ဖဲသုးဟံးန့ၢ်ဆူၣ်ထံကီၢ်တၢ်စိတၢ်ကမီၤ [ဖဲ ၂၀၂၁ နံၣ်] န့ၣ်မ့အီၤလဲၤမ့ၢ်ဝဲပှၤအခိၣ်တဂၤ [ဒီးမ့ၢ်စ့ၢ်ကီးပယီၤသုးမီၤစိရိၤ အခိၣ်တဂၤ] န့ၣ်လီၤ. လၢတၢ်န့ၣ်အဃိအဝဲသ့ၣ် [DKBA] မၤဝဲတၢ်လၢ SAC နဲၣ်လီၤအဝဲသ့ၣ်ခဲလၢာ်ဒ်သိးကတီတံာ်ဃာ်ဝဲ KNU [ကညီဒီကလုာ်စၢဖှိၣ်ကရၢ] အတၢ်ပၢတၢ်ပြးဒီးအ [ကညီဒီကလုာ်တၢ်ထူၣ်ဖျဲးသုးမုၢ်ဒိၣ် (KNLA)] သုးတၢ်ဟူးတၢ်ဂဲၤလၢ အဟဲဒိၣ်ထီၣ်လဲၢ်ထီၣ်ကွ့ၢ်ကွ့ၢ်န့ၣ်လီၤ.

မ့ၢ်ၦၤလၢအတူၢ်ဘၣ်တၢ်ဖၣ် ဟ့ၣ်ၦၤတၢ်ခွဲးတၢ်ယာ်လၢပကသူတၢ်ဂ့ၢ်တၢ်ကျိၤတခါအံၤဧါ, ဟ့ၣ်ၦၤတၢ်ခွဲးတၢ်ယာ်လၢ ပက သူတၢ်ဂ့ၢ်အံၤလၢကျဲဒ်လဲၣ်.

တၢ်ဂ့ၢ်တၢ်ကျိၤအံၤပှၤတူၢ်ဘၣ်တၢ်အကျါတဂၤလၢအမ့ၢ် စီၤအ--- ဒီးအမါ နီၢ်ဂ--- ဟ့ၣ်အခွဲးလၢတၢ်ကသူအီၤဒ်သိးထံဂုာ်ကီၢ်ဂၤ ကသ့ၣ်ညါဘၣ်ဝဲလၢ SAC (ဒီးအသိၣ်မှံၤသုးလၢအအိၣ်လၢအစုဒုၣ်တီၤဖီလာ်တဖၣ်) မၤဘၣ်ဒိဒီးမၤပယွဲဝဲဟီၣ်ခိၣ်ဖိခွဲးအါထီၣ်  ကွ့ၢ်ကွ့ၢ်အဃိန့ၣ်လီၤ.