SAC ကဘီယူၤခးလီၤတၢ်ဖဲ ဆီထံးကီၢ်ဆၣ်ပူၤ

ဖဲလါနိၣ်ဝ့ဘၢၣ် ၁၇သီ, ၂၀၂၃ နံၣ်, ဂီၤခီ ၅ နၣ်ရံၣ်အဆၢကတီၢ်, တၢ်ဒုးကဲထီၣ်ဝဲလၢ ကညီဒီကလုာ်တၢ်ထူၣ်ဖျဲးသုးမုၢ်ဒိၣ် (KNLA)  ဒီး ထံကီၢ်တၢ်ပၢတၢ်ပြးကီၣ်ကးကရၢ (SAC) သုးတဖၣ်အဘၢၣ်စၢၤန့ၣ်လီၤ. ဖဲတၢ်ဒုးကဲထီၣ်စှၤနၣ်ရံၣ်ဝံၤအလီၢ်ခံ, က ဘၣ်ဖဲ ဂီၤခီ ၉း၁၀ မံးနံးအဆၢကတီၢ်န့ၣ်, SAC သုးကဘီယူၤ (၂) ဘ့ၣ် ဟဲးခးလီၤတၢ်န့ၣ်လီၤ. တၢတဘျီန့ၣ်, သုးကဘီယူၤ တဘ့ၣ် ကွံာ်လီၤဝဲ မ့ၣ်ပိၢ် (၃) ဖျၢၣ် လၢ က---သဝီ, ကျီသိခံကရူၢ်, ဆီထံးကီၢ်ဆၣ်ပူၤ, ဒီး ကွံာ်လီၤအါထီၣ်ကဒီးဝဲ မ့ၣ်ပိၢ် (၃) ဖျၢၣ် လၢဂ---သဝီ, ထံခ့လိာ်ကရူၢ်, ဆီထံးကီၢ်ဆၣ်ပူၤန့ၣ်လီၤ. မ့မ့ၢ်လၢသုးကဘီယူၤခံဘ့ၣ်တဘ့ၣ်တခီ, ခးလီၤဝဲကျိစဲး အီၤ လံၤကၢၤ ခဲလၢာ် (၄) ဘျီန့ၣ်လီၤ. လီၢ်ကဝီၤသဝီဖိတဂၤပာ်ဖျါထီၣ်ဝဲလၢ, တၢ်လီၢ်တဖၣ်အံၤန့ၣ် SAC ဆိကမိၣ်ဝဲလၢအဒုၣ်ဒါတ ဖၣ်ကအိၣ်ဝဲန့ၣ်လီၤ. ခီဖျိလၢသုးကဘီယူၤဟဲခးလီၤတၢ်အဃိ, သဝီဖိအိၣ်လၢ ဂ--- သဝီ, က--- သဝီ, ဒီး ခ--- သဝီ တဖၣ် ဘၣ်ဃ့ၢ်ဝဲ ဒီးအိၣ် ခူသူၣ်ဝဲလၢပှၢ်ပူၤန့ၣ်လီၤ. ဟံၣ်ဒူၣ်အိၣ်ဝဲ (၄၉) ဒူၣ် ဒီးပှၤနီၣ်ဂံၢ်ကအိၣ်လၢ (၂၀၀) ဂၤ လၢ က--- သဝီပူၤ, ဒီး ဟံၣ်ဒူၣ် (၂၀) ဒူၣ် ဒီးပှၤနီၣ် ဂံၢ်အိၣ်ဝဲ (၉၁) ဂၤ လၢခ--- သဝီပူၤန့ၣ်လီၤ. မ့မ့ၢ်ဟံၣ်ဒူၣ် ဒီးပှၤနီၣ်ဂံၢ်နီၣ်ဒွးလၢ ဂ--- သဝီ ပူၤ တခီတၢ်တသ့ၣ်ညါလီၤတံၢ်အီၤဘၣ်န့ၣ်လီၤ. ပှၤဃ့ၢ်မှံဟးဖျိး ဒီး အိၣ်ခူသူၣ်လၢပှၢ်ကျါအနီၣ်ဂံၢ်ကအိၣ်အါန့ၣ်ဒံး (၃၀၀) ဂၤန့ၣ် လီၤ.

SAC သုးဖိတဖၣ်ခးလီၤနါစိၤကျိဖးဒိၣ်ဖဲဆီထံးကီၢ်ဆၣ်ပူၤ

ဖဲတၢ်ဒုးကဲထီၣ် ဖဲလါနိၣ်ဝ့ဘၢၣ် ၁၇သီ, ၂၀၂၃ နံၣ်ဆၢကတီၢ်, SAC ခီၣ်ချ့သုးရ့ၣ် နီၣ်ဂံၢ်-၃၅၁, အိၣ်ဖဲ လၢၢ်ထီသိ သုးကလၢၤ ပူၤ, လၢဘၣ်တၢ်ပၢဆှၢအီၤလၢ သုးရ့ၣ်ခိၣ်ခံ အီၤဘိၤဘိၤ, သုးဖိတဖၣ်ခးလီၤဝဲ ကျိဖးဒိၣ် (၆၀) မမ (၆) ဖျၢၣ် ဒီးလီၤတဲာ်ဝဲလၢ ခ--- သဝီကပၤ ဒီး ကမျၢၢ်ဖိတဖၣ်ဘၣ်ဃ့ၢ်ကွံာ်ဝဲဆူပှၢ်ပူၤန့ၣ်လီၤ. ခီဖျိလၢ KNLA ဒီး SAC သုးဖိတဖၣ်အိၣ်ဒံးဝဲအဃိ, သဝီဖိ လၢအိၣ်လၢတၢ်လီၢ်ဖဲန့ၣ်သ့ၣ်တဖၣ် ဟဲက့ၤအိၣ်လၢသဝီပူၤတဘူၣ်ဒံးဘၣ်န့ၣ်လီၤ. ခီဖျိလၢတၢ်ဒုးတၢ်ယာ်အဃိ, တီၤဖုၣ်ကၠိ လၢ ဘၣ်တၢ်ပၢဆှၢအီၤလၢ ကညီကူၣ်သ့စဲးလၤဝဲၤကျိၤ, အိၣ်ဖဲ ခ--- သဝီတဖျၢၣ်အံၤ ဘၣ်တၢ်ပတုာ်ကွံာ်အီၤန့ၣ်လီၤ. အါဒၣ်တက့ၢ်, သဝီဖိတဖၣ်န့ၣ်မ့ၢ်ဝဲ ပှၤမၤအီၣ်စံာ်, ပှၤကျီဝၣ်, ဒီး ပှၤဒိးလဲအီၣ်တၢ်မၤဖိတဖၣ်န့ၣ်လီၤ. ခီဖျိလၢတၢ်ဒုးတၢ်ယာ်အဃိ, သဝီဖိတ ဖၣ်ဘၣ်သဂၢၢ် ဒီး တၢ်ကီတၢ်ခဲလၢအတၢ်လုၢ်အီၣ်နီၢ်ခိသးသမူ ဒီး တၢ်အီၣ်တၢ်အီအဂီၢ်န့ၣ်လီၤ.  ဆၢကတီၢ်ခဲအံၤ, ဒ်အမ့ၢ်ဝဲတၢ် ဃ့ထီဆၢကတီၢ်အသိး [လါဒံၣ်စဲဘၢၣ် ၂၀၂၃နံၣ်], သဝီဖိတဖၣ် ဃ့ၢ်အိၣ်ကဒုဝဲလၢ သ့ၣ်ခီၣ်ထံးလၢပှၢ်ပူၤသ့ဝဲ ဖဲအဝဲသ့ၣ်ဃ့ၢ်မှံ ဟးဖျိးအဆၢကတီၢ်န့ၣ်လီၤ.  အဝဲသ့ၣ်ဘၣ်သဂၢၢ်ဝဲဒီးတၢ်အိၣ်ဆူၣ်အိၣ်ချ့တၢ်ဂ့ၢ်ကီ ဒီးတၢ်ကီတၢ်ခဲလၢတၢ်ကကူစါဘျါအဂီၢ်, လီၤဆီဒၣ်တၢ်ပှၤဖိသၣ် ဒီးပိာ်မုၣ်လၢအသးပှၢ်တဖၣ်န့ၣ်လီၤ.

လါနိၣ်ဝ့ဘၢၣ် ၂၄သီ, ၂၀၂၃ နံၣ်, မုၢ်နၤခီ ၁၁း၁၉ မံးနံးဆၢကတီၢ်, SAC ခီၣ်ချ့သုးရ့ၣ် နီၣ်ဂံၢ်-၂၀, အိၣ်ဖဲ ညီၣ်လ့ပ့ၣ်ဝ့ၢ် သုးကလၢၤ, သုးဖိတဖၣ်ခးလီၤဝဲကျိဖးဒိၣ် (၁၂၀) မမ ကအိၣ်လၢ (၈) ဖျၢၣ် ဃၣ်ဃၣ်ဆူ ဃ--- သဝီ, သဖံၣ်လူၢ်ကရူၢ်, လၢ အအိၣ်လၢ ကညီဒီကလုာ်စၢဖှိၣ်ကရၢ (KNU) တၢ်ပၢဟီၣ်ကဝီၤပူၤန့ၣ်လီၤ. ကျိဖးဒိၣ်လီၤတဲာ်ပိၢ်ဖးထီၣ်ဝဲလၢ ဃ--- သဝီပူၤ (၃) ဖျၢၣ် န့ၣ်လီၤ. သဝီဖိအဟံၣ် ဟးဂီၤဝဲ (၃) ဖျၢၣ် ဒီးတၢ်ပီးတၢ်လီအိၣ်လၢဟံၣ်ပူၤတဖၣ်စ့ၢ်ကီးဟးဂီၤဝဲန့ၣ်လီၤ. ပှၤလၢအ ဟံၣ်ဟးဂီၤတဖၣ်မ့ၢ်ဝဲ, အူ င---, ဒီး မၣ် စ---, အူ ဆ---, ဒီး အူ ည--- ဒီး ဒီၤတ--- တဖၣ်န့ၣ်လီၤ. တၢ်ပီးတၢ်လီလၢအ ဟးဂီၤတဖၣ်မ့ၢ်ဝဲ တၢ်ထုးထီၣ်ထံစဲး, သိလ့ၣ်ယီၢ်, ဒီး ဟံၣ်ဃီတၢ်ပီးတၢ်လီတဖၣ်န့ၣ်လီၤ.

မၣ်စ--- အဖိခွါ, ဒီး အဖိမုၣ်တဖၣ် ဘၣ်ဒိဝဲနးနးကလဲာ်လၢကျိဖးဒိၣ်ချံပိၢ်ဖးထီၣ်အဃိန့ၣ်လီၤ. အူင--- ဒီး မၣ်စ--- အဖိ အိၣ် ဝဲ (၆) ဂၤ, ဘၣ်ဆၣ်ထဲဒၣ်အဖိခွါတဂၤ ဒီး အဖိမုၣ်တဂၤအိၣ်ဝဲလၢဟံၣ်ပူၤဖဲ လၢကျိဖးဒိၣ်ချံလီၤတဲာ်ပိၢ်ဖးထီၣ်ဆၢကတီၢ် န့ၣ်လီၤ. ကျိဖးဒိၣ်ချံလီၤတဲာ်ဝဲလၢ ဟံၣ်မဲာ်ညါ ဒီး ပှၤဘၣ်ဒိဝဲ (၃) ဂၤန့ၣ်လီၤ. အဖိမုၣ် လၢအသးနံၣ်အိၣ် (၁၈) နံၣ်တဂၤန့ၣ် အမံၤမ့ၢ်ဝဲ မၣ်ထ---, ဒီး အဟၢဖၢလၢအ စ့ၣ်တပၤန့ၣ်ဘၣ်ဒိဝဲဒီးကျိဖးဒိၣ်က့ ဒီး အိၣ်ဝဲဒၣ်လၢအသးသမူတၢ်လီၤဘၣ်ယိၣ်အ ပူၤန့ၣ်လီၤ. အဖိခွါသးနံၣ်အိၣ် (၇) နံၣ်, အမံၤ မ့ၢ်ဝဲ မီၤဒ--- ဘၣ်ဒိဝဲဒီး ကျိဖးဒိၣ်ချံအက့ဖဲအခိၣ်သၣ်ဃံလီၢ်ခံန့ၣ်လီၤ. မ့မ့ၢ်လၢ မၣ်စ--- တခီ, အကံၣ်ဒုၣ်ဘၣ်ဒိဝဲနးနးကလဲာ်န့ၣ်လီၤ.

ဝံၤအလီၢ်ခံတစိၢ်ဖိ ဒီး KNU ဂ့ၢ်ဂီၢ်အူတၢ်တိစၢၤမၤစၢၤကရၢ ဟဲတုၤလၢကမၤစၢၤအဝဲသ့ၣ်အဂီၢ်န့ၣ်လီၤ. ဟံၣ်ဖိဃီဖိလၢအဘၣ်ဒိ (၃) ဂၤအံၤဒိးန့ၢ်ဘၣ်ဝဲတၢ်ကူစါယါဘျါ ဖဲ KNU ဂ့ၢ်ဂီၢ်အူတၢ်ကူစါယါဘျါကသံၣ်ဒၢး ဖဲ န--- သဝီ, အ့ၣ်ဘလၣ်ကရူၢ် ပူၤန့ၣ် လီၤ. ဝံၤအလီၢ်ခံ, ကလုာ်ဒူၣ်တၢ်ကရၢကရိတဖု  ဒီး လီၢ်ကဝီၤခိၣ်နၢ်တဖၣ် လဲၤဆှၢဝဲ မၣ်ထ--- ဆူတၢ်ဆါဟံၣ်တဖျၢၣ်လၢအ အိၣ်လၢ ကၠီၣ်တဲၣ်ကီၢ်ဆၢန့ၣ်လီၤ. ဒ်ဟံၣ်ဖိဃီဖိတဖၣ်အံၤမ့ၢ်ဝဲပှၤမၤဒိးလဲတၢ်လၢတနံၤဂီၢ်အသိး, အဝဲသ့ၣ်ကျိၣ်စ့တၢ်ကီတၢ်ခဲ အိၣ်ထီၣ်ဝဲဖဲ SAC ခးလီၤကျိဖးဒိၣ်အံၤဝံၤအလီၢ်ခံန့ၣ်လီၤ. ခီဖျိလၢဟံၣ်ဖိဃီဖိဘၣ်ဒိဘၣ်ထံးဝဲသၢဂၤအဃိ, ဟံၣ်ဖိဃီဖိတဒူၣ် အံၤပျံၤတီၢ်တၢ် ဒီးခီဖျိ ဘၣ်ဝဲတၢ်ကီတၢ်ခဲတဖၣ်န့ၣ်လီၤ. ဆၢကတီၢ်ခဲအံၤ, မၣ်စ---, ဒီးအဖိခွါ မီၤဒ---, ထီၣ်ဝဲတၢ်ဆါဟံၣ်ဖဲ န--- တၢ်ဆါဟံၣ်, ဒီး ဒိးကူစါယါဘျါဝဲအသးဖဲန့ၣ် န့ၣ်လီၤ. [လါနိၣ်ဝ့ဘၢၣ် ၂၀၂၃နံၣ်]

စးထီၣ်လၢ ၂၀၂၁ နံၣ် သုးဟံးန့ၢ်ဆူၣ်ထံကီၢ်တၢ်စိတၢ်ကမီၤဝံၤအလီၢ်ခံန့ၣ်, SAC ပညိၣ်ခးလီၤဝဲကျိဖးဒိၣ်လၢသဝီပူၤ ထီဘိန့ၣ်လီၤ. လီၢ်ကဝီၤသဝီဖိတဖၣ်ပာ်ဖျါထီၣ်ဝဲ, SAC သုးဖိတဖၣ် ဆိကမိၣ်ဝဲလၢ ကမျၢၢ်တၢ်ဒီးသဒၢသုး [PDF] ဒီး KNLA သုးပာ်ဖှိၣ်တဖၣ် အိၣ်လၢသဝီပူၤအဃိ ဒီးအဝဲသ့ၣ်ခးလီၤနါစိၤဝဲကျိဖးဒိၣ်လၢသဝီပူၤန့ၣ်လီၤ. SAC ခးလီၤနါစိၤကျိဖးဒိၣ်အဃိ သဝီဖိတဖၣ်ဘၣ်ပျံၤတၢ်ဖုးတၢ်န့ၣ်လီၤ. ဟံၣ်ဖိဃီဖိအဒူၣ်ကအိၣ်ဝဲလၢ (၁၀၀)ဒူၣ်ဃၣ်ဃၣ်လၢ ဃ---သဝီပူၤ, ဒီး ဟံၣ်ဒူၣ်တ ဝာ်န့ၣ်ဃ့ၢ်အိၣ်ကမှံဝဲလၢသဝီလၢအဘူးတဖၣ် မ့တမ့ၢ် လဲၤအိၣ်ဝဲ လၢဝ့ၢ်ပူၤန့ၣ်လီၤ.

ဖဲလါဒံၤစဲဘၢၣ် ၄သီ, ၂၀၂၃ နံၣ်, SAC ခီၣ်သုးရ့ၣ် နီၣ်ဂံၢ်-၂၆၃, အိၣ်ဖဲ ပ့ၣ်စလိၣ်ဝ့ၢ်, ဆီထံးကီၢ်ဆၣ်, ချၢၣ်လွံၢ်ထူၣ်ကီၢ်ရ့ၣ်, သုးဖိတဖၣ်ခးလီၤဝဲကျိဖးဒိၣ် ဒီး ကျိဖးဒိၣ်ချံ (၄) ဖျၢၣ် လီၤတဲာ်ဝဲဖဲ ပ---သဝီ, သဖံၣ်လူၢ်ကရူၢ်, ဆီထံးကီၢ်ဆၣ်ပူၤန့ၣ်လီၤ. ဝံၤ ဒီး SAC ခီၣ်ချ့သုးရ့ၣ် (ခမရ-၂၀), အိၣ်သူၣ်လီၤအသးဖဲသုးကလၢၤလၢအအိၣ်ဖဲ ချၢၣ်လွံၢ်ထူၣ်ကီၢ်ရ့ၣ်ပူၤ, သုးဖိတဖၣ် ခးလီၤဝဲကျိဖးဒိၣ် (၇) ဖျၢၣ် ဆူဃ--- သဝီ, သဖံၣ်လူၢ်ကရူၢ် ပူၤန့ၣ်လီၤ.

ကျိဖးဒိၣ်ချံလီၤတဲာ်ဝဲလၢ ပ---သဝီပူၤ (၄) ဖျၢၣ်, ဒီး ဘၣ်ဟးဂီၤဝဲ စီၤယ--- ဒီး နီၢ်ရ---အဟံၣ်, ဒီး စီၤလ--- ဒီး နီၢ်ဝ--- အဟံၣ်တဖၣ်န့ၣ်လီၤ. ဟံၣ်ဟးဂီၤအကစၢ်အကျါတဂၤတဲဝဲ တချုးလၢ လါယူၤလံ ၂၀၂၃ နံၣ်ဘၣ်န့ၣ်, ကျိဖးဒိၣ်ချံတဖၣ်လီၤ တဲာ်လၢသဝီပူၤတဘျီလံန့ၣ်လီၤ. လၢတၢ်ဘူၣ်ဂ့ၤတီၢ်ဘၣ်အပူၤ, ပှၤတဘၣ်ဒိနီတဂၤဘၣ်န့ၣ်လီၤ. ကျိဖးဒိၣ်ချံ (၂) ဖျၢၣ်လီၤတဲာ် ဝဲလၢ သ--- သဝီ, ဖဲကၠိမဲာ်ညါကျဲမုၢ်ခိၣ် ဒီး ဘၣ်ဟးဂီၤဝဲကၠိတၢ်ပာ်ကီၤထံဒၢန့ၣ်လီၤ. ကျိဖးဒိၣ်ချံအဂၤတဖျၢၣ်လီၤတဲာ်ဝဲဖဲစံာ် ပျီပူၤအိၣ်ဘူးဒီး စီၤဟ--- အဟံၣ် ဒီးကျိဖးဒိၣ်က့တဖၣ်ဘၣ်ဝဲ စီၤဟ--- အဟံၣ်ဂီၤပၤဒူၣ်သ့ၣ်တဖၣ်န့ၣ်လီၤ.

ခီဖျိလၢ SAC ခးလီၤဝဲကျိဖးဒိၣ်ခဲအံၤခဲအံၤဖဲတၢ်လီၢ်အံၤ [ပ--- ဒီး ဃ---သဝီ]အဃိ, အါဒၣ်တၢ်တက့ၢ်သဝီဖိတဖၣ်တမံဝဲလၢအ ဟံၣ် ပူၤဘၣ်န့ၣ်လီၤ. အဝဲသ့ၣ်လဲၤမံဝဲလၢအဘူးတံၢ်အအိၣ် ဒီး တနီၤလဲၤမံဝဲလၢအစံာ်ဒဲတဖၣ် ဒ်သိးဒီးကဟးဆှဲးဝဲတၢ်ဘၣ်ဒိ ဘၣ်ထံးအဂီၢ်န့ၣ်လီၤ. ကမျၢၣ်ဖိတဖၣ် ဘၣ်ယိၣ်ဝဲလၢ ကျိဖးဒိၣ်တဖၣ်ကလီၤတဲာ်ဘၣ်အဝဲသ့ၣ်အဟံၣ် ဒီး ကဘၣ်ဒိအဝဲသ့ၣ် အဃိ အဝဲသ့ၣ်ဘၣ်အိၣ်ပှဲၤဒီး တၢ်ပျံၤတၢ်ဖုးန့ၣ်လီၤ.