လါအ့ဖြ့ၣ် ၄ သီ, ၂၀၂၄ နံၣ် တနံၤအံၤ ဒ်အမ့ၢ် ဟီၣ်ခိၣ်ဒီဖျၢၣ် တၢ်ဟ့ၣ်အါထီၣ်တၢ်သ့ၣ်ညါနၢ်ပၢၢ် ဘၣ်ဃး မ့ၣ်ပိၢ်ဒီး တၢ်ဆီၣ်ထွဲမၤစၢၤမ့ၣ်ပိၢ်တၢ်ဟူးတၢ်ဂဲၤအမုၢ်နံၤအံၤန့ၣ် ကညီဂ့ၢ်၀ီခွဲးယာ်ကရူၢ် (KHRG) အဲၣ်ဒိးပာ်ဖျါအါထီၣ်ဘၣ်ဃး လၢကီၢ်ပယီၤ မုၢ်ထီၣ်ကလံၤထံးအပူၤ သုးဖီၣ်စုကဝဲၤလၢ အစိးကါဝဲ ဟီၣ်လာ်မ့ၣ်ပိၢ်ဒီး တၢ်စုကဝဲၤ ပီးလီအဂုၤအဂၤ လၢအပိၢ်ဖး သ့သ့ၣ်တဖၣ် အတၢ်မၤဘၣ်ဒိဘၣ်ထံးအဂ့ၢ်အကျိၤ သ့ၣ်တဖၣ်န့ၣ်လီၤ.

သုးဖီၣ်စုက၀ဲၤ, လီၤဆီဒၣ်တၢ် ပယီၤသုးမီၤစိရိၤအသုးသ့ၣ်တဖၣ် အတၢ်သူ၀ဲဟီၣ်လာ်မ့ၣ်ပိၢ် အါအါဂီၢ်ဂီၢ်အံၤ ဒုးအိၣ်ထီၣ်၀ဲ တၢ်မၤပျံၤမၤဖုးဒိၣ်ဒိၣ်မုၢ်မုၢ် လၢဒူဖိသ၀ီဖိသ့ၣ်တဖၣ် အတၢ်အိၣ်မူဒီး တၢ်လုၢ်အီၣ် နီၢ်ခိသးသမူ အဂီၢ်န့ၣ်လီၤ. တနံၤအံၤ, KHRG ဃ့ထီၣ်၀ဲထံဂုၤကီၢ်ဂၤပှၤဘၣ်မူဘၣ်ဒါသ့ၣ်တဖၣ်ခဲလၢာ်လၢ ကပာ်ပနီၣ်၀ဲပှၤဂ့ၢ် ၀ီခွဲးယာ်တၢ်အိၣ်သး လၢအဟဲနးဒိၣ်ထီၣ်လၢကညီကီၢ်စဲာ်အပူၤအံၤ လၢက ဟံးထီၣ်ဖီၣ်ထီၣ်ဂ့ၢ်ဝီ တဲာ်တဲာ်ဖျုဖျု ဒ်သိး ကမၤပတုာ်ကွံာ် တၢ်မၤဆါပယွဲထံဖိကီၢ်ဖိကမျၢၢ်သ့ၣ်တဖၣ်အဂီၢ် ဒီးကဒီသဒၢထံဖိကီၢ်ဖိကမျၢၢ်သ့ၣ်တဖၣ် လၢဟီၣ် လာ်မ့ၣ်ပိၢ် ဒီးတၢ်စုက၀ဲၤပိးလီအဂုၤအဂၤလၢ အပိၢ်ဖးသ့သ့ၣ်တဖၣ် အတၢ်လီၤပျံၤလီၤဘၣ်ယိာ်အဂီၢ်န့ၣ်တက့ၢ်.

စးထီၣ်လၢပယီၤသုးမီၤစိရိၤဟံးန့ၢ်ဆူၣ်တၢ်စိတၢ်ကမီၤလၢ ၂၀၂၁ နံၣ် ဒီးတၢ်ဒုးတၢ်ယၤဟဲဆူၣ်ထီၣ်လံၤလံၤန့ၣ် ပယီၤသုး မီၤစိရိၤအသုး ဒီးသုးပၢၢ်ဆၢတၢ်အသုးသ့ၣ်တဖၣ် အတၢ်သူ၀ဲဟီၣ်လာ်မ့ၢ်ပိၢ် လၢကီၢ်ပယီၤမုၢ်ထီၣ်ကလံၤထံးအပူၤ လၢတၢ်ဒီသဒၢလီၤအသးအဂီၢ်မ့ၢ်ဂ့ၤ လၢတၢ်ထီၣ်ဒုးတၢ်အဂီၢ်မ့ၢ်ဂ့ၤ ဟဲအါထီၣ်၀ဲဒၣ်န့ၣ်လီၤ. သုးဖီစုက၀ဲၤသ့ၣ်တဖၣ် အတၢ်သူ၀ဲဟီၣ်လာ်မ့ၣ်ပိၢ် အါအါဂီၢ်ဂီၢ်လၢကညီကီၢ်စဲာ်အပူၤန့ၣ် တမ့ၢ်၀ဲတၢ်လၢအလီၤတိၢ်လီၤဆီဘၣ်. လၢတၢ်န့ၣ်အဃိ ဟီၣ်လာ်မ့ၣ်ပိၢ် အလီၢ်လံၤဒီးအသီခံကလုာ်လၢာ် ဒုးအိၣ်ထီၣ်၀ဲတၢ်လီၤပျံၤလီၤဘၣ်ယိာ်န့ၣ်လီၤ. စးထီၣ်လၢ လါဖ့ၣ်ဘြူၤအါရံၣ် ၂၀၂၁ နံၣ် တုၤလါနိၣ်၀့ဘၢၣ် ၂၀၂၃ နံၣ်န့ၣ် KHRG မၤနီၣ်မၤဃါ၀ဲ ဟီၣ်လာ်မ့ၣ်ပိၢ်ပိၢ်ဖးထီၣ်အဃိ လၢကီၢ်ပယီၤမုၢ်ထီၣ်ကလံၤထံးအပူၤန့ၣ် သ၀ီဖိအသံအိၣ်၀ဲ အစှၤကတၢၢ် ၂၁ ဂၤ ဒီးပှၤဘၣ်ဒိတခီအိၣ်၀ဲ ၆၀ ဂၤန့ၣ်လီၤ. ပှၤသံပှၤဘၣ်ဒိသ့ၣ်တဖၣ်အံၤအကျါန့ၣ် ပာ်ဃုာ်၀ဲဒီးဖိသၣ်သ့ၣ်တဖၣ်န့ၣ်လီၤ. ပှၤလၢအတူၢ်ဘၣ်တၢ်သ့ၣ်တဖၣ်အံၤ အါတက့ၢ်န့ၣ် လၢအတၢ်လုၢ်အီၣ်နီၢ်ခိသးသမူအဂီၢ် ဖဲလၢအဝဲသ့ၣ် လဲၤထီၣ်က့ၤလီၤအခါ ဘၣ်ဒိဘၣ်ထံးဝဲဒီး ဟီၣ်လာ်မ့ၣ်ပိၢ် သ့ၣ်တဖၣ်န့ၣ်လီၤ. ပှၤတူၢ်ဘၣ်တၢ်ဒီး အဟံၣ်ဖိဃီဖိသ့ၣ်တဖၣ် ဘၣ်ကွၢ်ဆၢၣ်မဲာ်၀ဲဒီး တၢ်တၤတၢ်အကလုာ်ကလုာ် ဒီးတၢ်လၢအ၀ဲသ့ၣ် ဘၣ်ကွၢ်ဆၢၣ်မဲာ်၀ဲ နီၢ်ခိတၢ်ဘၣ်ဒိဘၣ်ထံး, ဒ်န့ၣ်အသိး သးတၢ်ဆိကမိၣ်တဘၣ်လီၢ်ဘၣ်စး ခီဖျိတၢ်ဘၣ်ဒိဘၣ်ထံးသးအဃိ, ကကူစါ ယါဘျါသးအဂီၢ် ကသံၣ်ကသီပှ့ၤကလံၤဒိၣ်, ဒီးခီဖျိနီၢ်ခိက့ၢ်ဂီၤ တလၢပှဲၤလၢၤဘၣ်အဃိ တၢ်လုၢ်အီၣ် နီၢ်ခိသးသမူ အဂီၢ်အိၣ်ဒီး တၢ်တၤတၢ်သ့ၣ်တဖၣ်အဃိ ဘၣ်ကွၢ်ဆၢၣ်မဲာ်စ့ၢ်ကီးဒီး နီၢ်သးတၢ်ဘၣ်ဒိဘၣ်ထံးန့ၣ်လီၤ.  တဘျီ တခီၣ်န့ၣ် ခီဖျိပယီၤသုးမီၤစိရိၤ အသုးသ့ၣ်တဖၣ် ဒိးလီၤ၀ဲမ့ၣ်ပိၢ်လၢ ဒူဖိသ၀ီဖိသ့ၣ်တဖၣ် အဟံၣ်ကပိာ်ကပၤ ဒီးတၢ်သူၣ်ထီၣ် အဂုၤအဂၤ လၢအရ့ဒိၣ်ဒ်အမ့ၢ် တၢ်မၤလိကၠိ, တၢ်ဟ့ၣ်ကသံၣ်ဒၢး, ဒီးတၢ်ဘူၣ်တၢ်ဘါ တၢ်သူၣ်ထီၣ် သ့ၣ်တဖၣ် ကပိာ်ကပၤအဃိ ဒူဖိသ၀ီဖိလၢ အဘၣ်ဃ့ၢ်မှံဟးဖျိးသ့ၣ်တဖၣ်စ့ၢ်ကီး ဘၣ်ကွၢ်ဆၢၣ်မဲာ်၀ဲဒီး တၢ်ဘံၣ်တၢ်ဘၢ အတၢ်ဂ့ၢ်ကီ လၢကက့ၤကဒါဆူအဒူသ၀ီတၢ် အိၣ်တၢ်ဆိးအလီၢ် ဒ်သိးကက့ၤအိၣ်ကဒါက့ၤမ့ၢ်ဂ့ၤ က့ၤဖံးတၢ်မၤတၢ်လၢ အဂီၢ် သ့ၣ်တဖၣ်မ့ၢ်ဂ့ၤန့ၣ်လီၤ.

မ့ၣ်ပိၢ်ဒီးမျိာ်သၣ်လၢအတပိၢ်ဖးထီၣ်ဒံးဘၣ် လၢပယီၤသုးမီၤစိရိၤခးလီၤ၀ဲလၢကဘီယူၤဒုးသုးမ့ၢ်ဂ့ၤ, ကျိဖးဒိၣ်သ့ၣ်တ ဖၣ်မ့ၢ်ဂ့ၤန့ၣ် ဒုးကဲထီၣ်စ့ၢ်ကီး၀ဲ တၢ်ဘံၣ်တၢ်ဘၢအတၢ်ဘၣ်ယိာ်ဘၣ်ဘှီဖးဒိၣ်တခါ လၢဒူဖိသ၀ီဖိသ့ၣ်တဖၣ် အဂီၢ်န့ၣ်လီၤ. တၢ်စုက၀ဲၤပိးလီလၢတၢ်ခးလီၤအီၤဒီးတပိၢ်ဖးဘၣ်သ့ၣ်တဖၣ်န့ၣ် အိၣ်ထီဃာ်၀ဲလၢတၢ်ဆၢကတီၢ်ဖး ယံာ်ဖးထီအပူၤသ့၀ဲ ဒီးခီဖျိလၢမူခိၣ်စူၤကၢၢ်လာ်ဒီးထံဒိၣ်ဃိာ်ယွၤအဃိ အလီၢ်အိၣ်သုးဆီတလဲအသးသ့၀ဲန့ၣ်လီၤ. လၢန့ၣ်အမဲာ်ညါ, ဒုးယၤစုက၀ဲၤပိးလီလၢအပိၢ်ဖးသ့သ့ၣ်တဖၣ် မ့ၢ်အိၣ်လၢဒူသ၀ီလီၢ်က၀ီၤပူၤန့ၣ် ဖိဒံဖိသၣ်သ့ၣ်တဖၣ် မ့ၢ်ပှၤလၢအတူၢ်ဘၣ်တၢ်ညီဒိၣ်၀ဲ ခီဖျိလၢအ၀ဲသ့ၣ်တသ့ၣ်ညါပာ်သူၣ်ပာ်သးဘၣ်ဃးဒီး ဒုးယၤစုက၀ဲၤပီးလီ သ့ၣ်တဖၣ်အံၤ အတၢ်လီၤပျံၤ ဘၣ်အဃိန့ၣ်လီၤ. အဒိ, ဖဲလါယနူၤအါရံၣ် ၂၆ သီ ၂၀၂၃ နံၣ်န့ၣ်, ဖိသၣ်ခံဂၤလၢအအိၣ် လၢသၣ်ယၣ်ကိသ၀ီ, မီမးကရူၢ်, ကီးတရံးကီၢ်ဆၣ်, ဒူပျာ်ယာ်ကီၢ်ရ့ၣ်န့ၣ် လဲၤထံၣ်န့ၢ်၀ဲကျိဖးဒိၣ်ချံ လၢအလီၤတဲာ်ဒီးတ ပိၢ်ဘၣ်တဖျၢၣ်န့ၣ်လီၤ. အခီၣ်ထံးန့ၣ် ဖိသၣ်ခံဂၤအံၤဆိမိၣ်၀ဲဒၣ်လၢ ကဘီယူၤဟဲတ့ၢ်လီၤကျိချံတဖျၢၣ်အံၤအဃိ အ၀ဲသ့ၣ်ဟဲက့ၤစိာ်၀ဲဆူသ၀ီန့ၣ်လီၤ. ဖိသၣ်အကျါတဂၤန့ၣ်ထၢနုာ်၀ဲကျိချံ၀ဲန့ၣ်လၢအဖျီၣ်ခံထၢၣ်ပူၤ ဒီးဟဲက့ၤဒုးနဲၣ်ပၠး၀ဲ သ၀ီဖိတဂၤန့ၣ်လီၤ. ဖဲလၢအ၀ဲဒုးနဲၣ်ပၠး၀ဲကျိချံ၀ဲန့ၣ်လၢသ၀ီဖိတဂၤအခါ, မုၢ်ဂၢ်တဂၤထံၣ်၀ဲဖိသၣ်၀ဲန့ၣ် စိာ်ဃာ်ဒီး ကျိချံအဃိ အ၀ဲကိးပသူထီၣ်လၢအကလုၢ်ဖးဒိၣ် “နလဲၤမၤန့ၢ်ဖဲလဲၣ်” တဘျီဃီ ဖိသၣ်အ၀ဲန့ၣ်ဖုးဘၣ်အသး ဒီးကျိ ချံလၢအစိာ်ဃာ်၀ဲန့ၣ် လီၤတဲာ်ပိၢ်ဖးထီၣ်၀ဲန့ၣ်လီၤ. ကျိချံ၀ဲန့ၣ်ပိၢ်ဖးထီၣ်ဘၣ်၀ဲဖိသၣ်ခံဂၤလၢာ်ဒီး ဖိသၣ်အကျါ တဂၤန့ၣ် ဘၣ်ဒိ တယံာ်ဘၣ်ဒီး အသးသမူဟးထီၣ်ကွံာ်၀ဲန့ၣ်လီၤ.

ဟီၣ်လာ်မ့ၣ်ပိၢ်အံၤ အမၤသံမၤဘၣ်ဒိ၀ဲပှၤထံဖိကီၢ်ဖိကမျၢၢ်, လီၤဆီဒၣ်တၢ်ဖိ ဒံဖိသၣ်သ့ၣ်တဖၣ် လၢအကယၤကယၤ န့ၣ်လီၤ. ဟီၣ်လာ်မ့ၣ်ပိၢ်အံၤ ကဲထီၣ်စ့ၢ်ကီးဝဲ လီၢ်ကဝီၤ သဝီဖိ တၢ်လုၢ်အီၣ်နီၢ်ခိသးသမူ တၢ်ဘံၣ်တၢ်ဘၢ အတၢ်ဘၣ်ယိၣ် တကးဒ်ဘၣ်အမဲာ်ညါ လၢပှၤဃ့ၢ်အိၣ်ကမှံတဖၣ်စ့ၢ်ကီး ကက့ၤအိၣ်လၢ အတၢ်အိၣ်တၢ်ဆိးအလီၢ်စ့ၢ်ကီၤ ကဲထီၣ်ထဲ တၢ်ဘၣ်ယိၣ်ဘၣ်ဘှီန့ၣ်လီၤ. လၢတၢ်န့ၣ်အဃိ တၢ်သူ၀ဲမ့ၣ်ပိၢ်န့ၣ်မ့ၢ်၀ဲတၢ်မၤကမၣ် ဟီၣ်ခိၣ်ဒီဖျၢၣ် ပှၤဂ့ၢ်၀ီတၢ်လိၣ်ဘၣ် သဲစးတၢ်ဘျၢခိၣ်သ့ၣ်အကျါတထံၣ် လၢအမ့ၢ်၀ဲတၢ်ပဲာ်ဖးနီၤဖးလီၤဆီ၀ဲ ၀ဲထံဖိကီၢ်ဖိကမျၢၢ် ဒီးပှၤလၢအဒုးတၢ်သ့ၣ် တဖၣ်န့ၣ်လီၤ. KHRG တၢ်မၤနီၣ်မၤ ဃါပာ်ဖျါ၀ဲဒၣ်လၢ ပယီၤသုးမီၤစိရိၤအသုးသ့ၣ်တဖၣ် ဒိးလီၤ၀ဲဟီၣ် လာ်မ့ၣ်ပိၢ်သ့ၣ်တဖၣ် လၢသ၀ီပူၤဒီးသ၀ီခိၣ်ဃၢၤ ဒ်အမ့ၢ်စံၣ်ပျီပူၤ ဒီးကျဲမုၢ်ပူၤ လၢလီၢ်က၀ီၤဒူဖိသ၀ီဖိ သ့ၣ်တဖၣ် ဟးထီၣ်က့ၤလီၤ၀ဲကိးမုၢ်နံၤ ဒီးအ၀ဲသ့ၣ်တဖၣ်တဒုးသ့ၣ်ညါ ဒူဖိသ၀ီဖိသ့ၣ်တဖၣ် လၢအဒိးလီၤ မ့ၣ်ပိၢ်အလီၢ်ဘၣ်. တၢ်ကဲထီၣ်အသးလၢ တၢ်တီၣ်ဖျါထီၣ်အီၤတနီၤန့ၣ် ပယီၤသုး သ့ၣ်တဖၣ် ဒိးလီၤ၀ဲ ဟီၣ်လာ် မ့ၣ်ပိၢ်သ့ၣ်တဖၣ် လၢသ၀ီပူၤ ဒီးတၢ်ဟ့ၣ်ကသံၣ်ဒၢးသ့ၣ်တဖၣ် အပူၤန့ၣ်လီၤ. တၢ်အံၤပာ်ဖျါထီၣ်၀ဲဒၣ် ပယီၤသုးမီၤစိရိၤ အတၢ်အဲၣ်ဒိးမၤဆါပယွဲ၀ဲ ဒူဖိသ၀ီဖိလိၤလိၤန့ၣ်လီၤ. ထံလီၢ်ကီၢ်ပူၤတၢ်သဘံၣ်သဘုၣ်ဒီး တၢ်သူ၀ဲဟီၣ်လာ်မ့ၣ်ပိၢ်လၢ တၢ်လီၢ်သကုၤဆးဒးန့ၣ် မၤဘၣ်ဒိ၀ဲ ထံဖိကီၢ်ဖိကမျၢၢ်သ့ၣ်တဖၣ် အခွဲးအယာ်ခိၣ်သ့ၣ်အါမံၤ ပၣ််ဃုာ်၀ဲခွဲးယာ် လၢတၢ်ဟးထီၣ်က့ၤလီၤလၢတၢ်သဘျ့အပူၤ, တၢ်လုၢ်အီၣ်နီၢ်ခိသးသမူခွဲးယာ်, ဒီးတၢ်ဘံၣ်တၢ်ဘၢခွဲးယာ် သ့ၣ်တဖၣ် န့ၣ်လီၤ.

ပပာ်လုၢ်ပာ်ပှ့ၤ ဒီးပာ်ပနီၣ်၀ဲ လီၢ်က၀ီၤကမျၢၢ်တၢ်ကရၢကရိသ့ၣ်တဖၣ် ဒီးကရၢသဘျ့သ့ၣ်တဖၣ် အတၢ်ဂဲၤပျုၢ်ဂဲၤ ဆှးဒ်အမ့ၢ် တၢ်ဟ့ၣ်အါထီၣ်တၢ်သ့ၣ်ညါနၢ်ပၢၢ် ဘၣ်ဃးမ့ၣ်ပိၢ်ဒီး တၢ်တိစၢၤမၤစၢၤပှၤလၢ အတူၢ်ဘၣ်တၢ်သ့ၣ်တဖၣ် န့ၣ်လီၤ. တကတီၢ်ဃီ ပနာ်လၢတၢ်ဟံးထီၣ်ဖီၣ်ထီၣ်တၢ်ဟူးတၢ်ဂဲၤအါန့ၢ်အလီၢ်သ့၀ဲ လၢတၢ်ကဒီသဒၢ၀ဲဒူဖိသ၀ီဖိ သ့ၣ်တဖၣ် ဒီးတြီဃာ်၀ဲ တၢ်သူဟီၣ်လာ်မ့ၣ်ပိၢ် ဒီးတၢ်စုက၀ဲၤလၢအပိၢ်ဖးသ့သ့ၣ်တဖၣ်န့ၣ်လီၤ. KHRG တတူၢ်လိာ်၀ဲ တၢ်သူတၢ်စုက၀ဲၤ ဒ်န့ၤသ့ၣ်တဖၣ်ဘၣ် ဒီးနာ်၀ဲလၢတၢ်မၤကတၢၢ်ကွံာ် တၢ်သူဟီၣ်လာ်မ့ၣ်ပိၢ်န့ၣ် မ့ၢ်၀ဲတၢ်လၢအရ့ဒိၣ်လၢ တၢ်ကမၤလီၤတံၢ်၀ဲ ဒူဖိသ၀ီဖိသ့ၣ်တဖၣ် အတၢ်ဘံၣ်တၢ်ဘၢ ဒီးအတၢ်အိၣ်မူအဂီၢ်န့ၣ်လီၤ. လၢတၢ်န့ၣ်အဃိ, ဖဲလါအ့ဖြ့ၣ် ၄ သီ ၂၀၂၄ နံၣ် အနံၤအံၤန့ၣ်,  KHRG ဃ့ထီၣ်၀ဲလၢ,

• သုးဖီၣ်စုက၀ဲၤခဲလၢာ် ကဟးဆှဲး၀ဲတၢ်ဒိးလီၤအါထီၣ်ဟီၣ်လာ်မ့ၣ်ပိၢ်အသီသ့ၣ်တဖၣ်  လၢထံဖိကီၢ်ဖိကမျၢၢ် သ့ၣ်တဖၣ် အိၣ်တၢ်အလီၢ် ဒီးမၤနီၣ်ဃာ်ဟီၣ်လာ်မ့ၣ်ပိၢ်လၢတၢ်ဒိးလီၤဃာ်တ့ၢ်လံအီၤသ့ၣ်တဖၣ် ဒီးတၢ်ပနီၣ်ဖျိ ဖျိဖျါဖျါ ဒီးဒုးသ့ၣ်ညါဒူဖိသ၀ီဖိသ့ၣ်တဖၣ်လၢတၢ်ဒိးလီၤမ့ၣ်ပိၢ်အလီၢ်န့ၣ်လီၤ.
• လီၢ်က၀ီၤပှၤဘၣ်မူဘၣ်ဒါသ့ၣ်တဖၣ် ကသူ၀ဲကျိၤကျဲလၢအဘံၣ်ဘၢ ဒီးဆဲးမၤအါထီၣ်၀ဲတၢ် ထုးထီၣ်ကွံာ် ဟီၣ်လာ်မ့ၣ်ပိၢ်သ့ၣ်တဖၣ်, တၢ်စုက၀ဲၤလၢအတပိၢ်ဖးဒ်ဘၣ်သ့ၣ်တဖၣ်, ဒီးဒုးယၤပီးလီအဂုၤအဂၤ လၢအ ပိၢ်ဖးသ့သ့ၣ်တဖၣ်န့ၣ်လီၤ.
• ထံဂုၤကီၢ်ဂၤပှၤဟ့ၣ်ပှၤဂ့ၢ်၀ီတၢ်လိၣ်ဘၣ်ကရူၢ်ကရၢသ့ၣ်တဖၣ် ကမၤသကိးတၢ်ဒီးတၢ်ကရၢကရိ လၢအမၤ တၢ်လၢလီၢ်က၀ီၤပူၤသ့ၣ်တဖၣ် ဒ်သိးကဒုးအိၣ်ထီၣ်ဒီးမၤကဲထီၣ်လိာ်ထီၣ်၀ဲ ကျိၤကျဲလၢအဂ့ၤ ဒီးအကြၢး အဘၣ်သ့ၣ်တဖၣ် လၢတၢ်ကမၤစၢၤ၀ဲပှၤတူၢ်ဘၣ်ဒီး အဟံၣ်ဖိဃီဖိသ့ၣ်တဖၣ်န့ၣ်လီၤ.
• ဟီၣ်ခိၣ်ဒီဘ့ၣ်အပှၤတ၀ၢသ့ၣ်တဖၣ် ကဆီၣ်ထွဲမၤစၢၤ၀ဲ လီၢ်က၀ီၤတၢ်ကရၢကရိသ့ၣ်တဖၣ် လၢတၢ်မၤဆူၣ် ထီၣ်၀ဲ တၢ်ရဲၣ်တၢ်ကျဲၤဒ်အမ့ၢ် တၢ်ဟ့ၣ်အါထီၣ် တၢ်သ့ၣ်ညါနၢ်ပၢၢ်ဘၣ်ဃး မ့ၣ်ပိၢ်အတၢ်လီၤပျံၤ လီၤဆီဒၣ်တၢ် လၢဖိဒံဖိသၣ် သ့ၣ်တဖၣ်အဂီၢ် လၢကီၢ်ပယီၤမုၢ်ထီၣ်ကလံၤထံးအပူၤန့ၣ်လီၤ.
• ထံဂုၤကီၢ်ဂၤပှၤဘၣ်မူဘၣ်ဒါလၢအဘၣ်ထွဲသ့ၣ်တဖၣ်ခဲလၢာ် ကဟံးထီၣ်ဖီၣ်ထီၣ်ဟူးဂဲၤ၀ဲလၢအဆိအချ့ ဒ်သိးကဟံးထီၣ်၀ဲ ပယီၤသုးမီၤစိရိၤအခိၣ်အနၢ်သ့ၣ်တဖၣ် အဂ့ၢ်၀ီ ခီဖျိအ၀ဲသ့ၣ်ဟ့ၣ်လီၤတၢ်ကလုၢ် မ့တမ့ၢ် ဟ့ၣ်တၢ်အခွဲးလၢ တၢ်ကမၤဆါပယွဲ၀ဲဒူဖိသ၀ီဖိသ့ၣ်တဖၣ်လိၤလိၤအဃိန့ၣ်လီၤ.

တၢ်ဆဲးကျိး

စီၤနၤဒၣ်ဆူ, hsue@khrg.org
နီၢ်ဖီလါ, nawpawlah@khrg.org