တၢ်ဒွဲၣ်အူဟံၣ်ဃီဖဲဒ့လိမုၢ်နုာ်ကရူၢ်ပူၤ

ဖဲလါအီကူး ၂၀၂၃နံၣ်, ခံနွံတနွံန့ၣ်, ကမျၢၣ်တၢ်ဒီသဒၢသုး (PDF) အသုးပာ်ဖှိၣ် ဒီး ကညီတၢ်ထူၣ်ဖျဲးသုးမုၢ်ဒိၣ် (KNLA) မၤအါထီၣ်ဝဲသုးတၢ်ဟူးတၢ်ဂဲၤ ဖဲ ဒ့လိမုၢ်နုာ်ကရူၢ်, ထီတထူၣ်ကီၢ်ဆၣ်, တီအူကီၢ်ရ့ၣ်ပူၤန့ၣ်လီၤ.

ဒ်လီၢ်ကဝီၤသဝီဖိတဖၣ်ပာ်ဖျါထီၣ်ဝဲအသိး, မီၤကၠီၤထိ လၢအမ့ၢ်ဝဲ ထံကီၢ်တၢ်ပၢတၢ်ပြးကီၣ်ကးကရၢ (SAC), ခီၣ်သုးရ့ၣ် နီၣ်ဂံၢ်-၃၉, သုးဖိတဂၤ, အသုးခိၣ်မၢအက့ၤဆူအမိၢ်အပၢ်သဝီ ဖဲက---သဝီ, ဒ့လိမုၢ်နုာ်ကရူၢ်, ဒ်သိးဒီးကဃိထံသ့ၣ်ညါဝဲ KNLA ဒီး PDF အသုးတၢ်ဟူးတၢ်ဂဲၤတဖၣ် ဒ်ကမျၢၢ်ဖိတဂၤအသိးန့ၣ်လီၤ. KNLA ဒီး PDF သုးဖိတဖၣ်သ့ၣ်ညါဝဲဘၣ်ဃးဒီးတၢ်ဂ့ၢ်အံၤန့ၣ်လီၤ. ဖဲလါစဲးပထ့ဘၢၣ် ၁၂သီ, ၂၀၂၃နံၣ်န့ၣ်,  KNLA ဒီး PDF ဖီၣ်ဝဲဒၣ် မီၤကၠီၤထိအံၤဖဲလၢအဝဲအိၣ်ဝဲဒၣ်လၢအပၢ်ဟံၣ်ပူၤအဆၢ ကတီၢ်, ဒီးလဲၤစိာ်အီၤလၢသဝီအချၢ ဒီးမၤသံကွံာ်အီၤန့ၣ်လီၤ. မီၤကၠီၤထိအဟံၣ်ဖိဃီဖိ လဲၤဝဲဆူပယီၤသုး ခီၣ်သုးရ့ၣ် နီၣ်ဂံၢ်-၃၉ သုးကလၢၤတဘျီဃီဖဲလၢအဝဲသ့ၣ်သ့ၣ်ညါဝဲလၢအဖိခွါဘၣ်တၢ်မၤသံအီၤဝံၤအလီၢ်ခံဒီးဒုးသ့ၣ်ညါဝဲပယီၤသုးဘၣ်ဃးဒီးတၢ်ကဲထီၣ်သးအဂ့ၢ်အံၤန့ၣ် လီၤ. ဖဲလါစဲးပထ့ဘၢၣ် ၁၃သီ, ၂၀၂၃နံၣ်, မုၢ်ဂီၤခီ ၆နၣ်ရံၣ်အဆၢကတီၢ်, ပယီၤသုးပာ်ဖှိၣ်, ပၣ်ဃုာ် ဒီး ခီၣ်သုးရ့ၣ် နီၣ်ဂံၢ်-၃၉ အိၣ်ဖဲ လ့မဲာ်သဝီ, ဒ့လိမုၢ်နုာ်ကရူၢ်, လဲၤထီၣ်ဝဲဒီးသုးသိလ့ၣ် ၅ခိၣ်, ဒီးမျိာ်ဖးဒိၣ်သိလ့ၣ် ၂ခိၣ် ဆူ က---သဝီ, ခ---သဝီ, ဒီး ဂ---သဝီ ဖဲ ဒ့လိမုၢ်နုာ်ကရူၢ်ပူၤန့ၣ်လီၤ.

ဖဲလါစဲးပထ့ဘၢၣ် ၁၄သီ, ၂၀၂၃နံၣ်, မုၢ်ဂီၤခီ ၁၀နၣ်ရံၣ်အခိၣ်အဃၢၤန့ၣ်, ပယီၤသုးသ့ၣ်တဖၣ်အံၤ ဒွဲၣ်ဝဲဒၣ်သဝီဖိအဟံၣ် ၄ဖျၢၣ် ဖဲ ခ---သဝီန့ၣ်လီၤ. ဟံၣ်ကစၢ်သ့ၣ်တဖၣ်မ့ၢ်ဝဲဒၣ် စီၤ ဃ---, စီၤ င---, စီၤ စ---, ဒီး စီၤ ဆ--- တဖၣ်န့ၣ်လီၤ. တနံၤဃီအတီၢ်ပူၤ န့ၣ်, ပယီၤသုးသ့ၣ်တဖၣ်အံၤ ဒွဲၣ်အူဝဲဟံၣ် ၇ဖျၢၣ် ဖဲ ဂ---သဝီ န့ၣ်လီၤ. ဟံၣ်ကစၢ်သ့ၣ်တဖၣ်မ့ၢ်ဝဲဒၣ် ကိၤ ၡ---, ကိၤ ည---, ကိၤ တ---, ကိၤ ထ---, ကိၤ ထ---အဖိမုၣ်, ဒီၤ ဒ---, ဒီး ဒီၤ န---သ့ၣ်တဖၣ်န့ၣ်လီၤ. ဖဲပယီၤသုးတဖၣ်ဒွဲၣ်အူဝဲသဝီဖိဟံၣ်တဖၣ် ဖဲသဝီခံဖျၢၣ်အံၤဝံၤအလီၢ်ခံ, အဝဲသ့ၣ်အိၣ်ဝဲဒၣ်လၢ ခ---သဝီပူၤ သၢသီန့ၣ်လီၤ. လၢသၢနံၤတနံၤ, ဖဲ လါစဲးပထ့ဘၢၣ် ၁၆သီ, မုၢ်ဂီၤခီ ၆နၣ်ရံၣ်န့ၣ်, ပယီၤသုးတဖၣ်ဟးထီၣ်ကွံာ်ဝဲလၢသဝီပူၤ  ဒီးက့ၤဝဲဆူအသုးကလၢၤန့ၣ်လီၤ. ဖဲလါစဲးပထ့ဘၢၣ် ၁၆သီ, ၂၀၂၃နံၣ်, ဟါလီၤခီန့ၣ်, KNLA ဒီး PDF သုးတဖၣ် ဒွဲၣ်အူဝဲဒၣ် မီၤကၠီၤထိအပၢ်အဟံၣ်န့ၣ်လီၤ. တၢ်ဖ့ၣ်ဆၢတဖၣ်ဟဲဆူၣ်ထီၣ် ဝဲဒၣ်လၢ SAC ဒီး လီၢ်ကဝီၤပှၤဖီၣ်စုကဝဲၤပၢၢ်ဆၢတၢ်တဖၣ်အဘၢၣ်စၢၤ ဖဲဒ့လိမုၢ်နုာ်ကရူၢ် ဘၣ်ဃးဒီးတၢ်ဂ့ၢ်အံၤန့ၣ်လီၤ.

ဖဲလါအီးကထိဘၢၣ် ၂၀သီ, ၂၀၂၃နံၣ်န့ၣ်, SAC သုးပာ်ဖှိၣ်တဖၣ်, ပၣ်ဃုာ်ဒီးခီၣ်သုးရ့ၣ် နီၣ်ဂံၢ်-၃၉, လဲၤဝဲဆူ ပ---သဝီ, ဒ့လိမုၢ် နုာ်ကရူၢ်, တၢ်လီၢ်ဖဲအဝဲသ့ၣ်ဒွဲၣ်အူဝဲသဝီဖိအဟံၣ် ၃ဖျၢၣ်န့ၣ်လီၤ. ဟံၣ်ကစၢ်သ့ၣ်တဖၣ်မ့ၢ်ဝဲဒၣ် စီၤ ဖ---, စီၤ မ---, ဒီး စီၤ ယ---န့ၣ်လီၤ.

ဖဲလါနိၣ်ဝ့ဘၢၣ် ၁၂သီ, ၂၀၂၃နံၣ်, ဟါလီၤခီ ၁း၃၀မံးနံးန့ၣ်, KNLA ဒီး PDF သုးပာ်ဖှိၣ်တဖၣ် ထီၣ်ဒုးဝဲပယီၤသုးသ့ၣ်တဖၣ်အံၤ ဒီးခိးထုးအဝဲသ့ၣ်ဒီးမ့ၣ်ပိၢ်ထုးပျံၤ ဖဲက---သဝီ ဒီး ပ---သဝီအဘၢၣ်စၢၤ, ဒ့လိမုၢ်နုာ်ကရူၢ်, ဝံၤအလီၢ်ခံဒီးတၢ်ဒုးကဲထီၣ်ဝဲန့ၣ်လီၤ. ဖဲလါနိၣ်ဝ့ဘၢၣ် ၁၂သီ, ၂၀၂၃နံၣ်, ဟါလီၤခီန့ၣ်, ပယီၤသုးတဖၣ်ဒွဲၣ်အူဝဲ ဟံၣ် ၉ဖျၢၣ် ဖဲခ---သဝီ, ဒီး ဒွဲၣ်အူစ့ၢ်ကီး ဟံၣ် ၄ဖျၢၣ် ဖဲ က---သဝီ, ဒ့လိမုၢ်နုာ်ကရူၢ်ပူၤန့ၣ်လီၤ. ခ---သဝီဖိလၢအဟံၣ်အူထီၣ်တဖၣ်မ့ၢ်ဝဲ စီၤ ရ---, စီၤ လ---, စီၤ ဝ---, စီၤ သ---, မီၤ ဟ---, နီၢ် အ---, နီၢ် ဧ---, စီၤ ကခ---, ဒီး စီၤ ကဂ---,တဖၣ်န့ၣ်လီၤ. က---သဝီဖိလၢအဟံၣ်အူထီၣ်တဖၣ်မ့ၢ်ဝဲ ကဃ---, ကိၤ ကင---, ကိၤ ကစ---, ဒီး ကိၤ ကဆ---တဖၣ်န့ၣ်လီၤ.

တၢ်ဒုးကဲထီၣ်မ့ၢ်ဂ့ၤတကဲထီၣ်မ့ၢ်ဂ့ၤ, SAC သုးပာ်ဖှိၣ်တဖၣ်, ပၣ်ဃုာ်ဒီးခီၣ်သုးရ့ၣ် နီၣ်ဂံၢ်-၃၉, အိၣ်ဖဲလ့မဲာ်သဝီ, သုးဖိတဖၣ် ခးလီၤဝဲဒၣ်ကျိဖးဒိၣ်တဖၣ်လၢသဝီပူၤ ဒီး တၢ်လီၢ်အခိၣ်အဃၢၤခဲအံၤခဲအံၤ လၢတၢ်လီၢ်လၢအဝဲသ့ၣ်ဆိကမိၣ်ဝဲလၢ KNLA ဒီး PDF သုးတဖၣ်ကအိၣ်ဝဲဒၣ်န့ၣ်လီၤ. ဖဲလၢတၢ်ပာ်ဖျါအဆၢကတီၢ်အံၤ, SAC ကဘီယူၤဟဲခးလီၤတၢ်လၢဟီၣ်ကဝီၤအံၤ အပူၤစ့ၢ်ကီးန့ၣ်လီၤ.

တၢ်ခးလီၤနါစိၤကျိဖးဒိၣ် ဆူဒ့လိမုၢ်နုာ်ကရူၢ်ပူၤ

ဖဲလါအီးကထိဘၢၣ် ၁၉သီ, ၂၀၂၃နံၣ်, ဟါလီၤခီ ၁နၣ်ရံၣ် အဆၢကတီၢ်န့ၣ်, SACသုးပာ်ဖှိၣ်တဖၣ်, ပၣ်ဃုာ်ဒီးခီၣ်သုးရ့ၣ် နီၣ် ဂံၢ်-၃၉, အိၣ်ဖဲ လ့မဲာ်သဝီ, သုးဖိတဖၣ် ခးလီၤနါစိၤဝဲကျိဖးဒိၣ်ဆူ သဝီတဖၣ်လၢအအိၣ်ဖဲ ဒ့လိမုၢ်နုာ်ကရူၢ်ပူၤ, ထီတထူၣ်ကီၢ် ဆၣ်, တီအူကီၢ်ရ့ၣ်ပူၤန့ၣ်လီၤ. သဝီသ့ၣ်တဖၣ်န့ၣ်မ့ၢ်ဝဲ က---သဝီ, ခ---သဝီ, ဂ---သဝီ, ပ---သဝီ, ကည---သဝီ, ကတ---သဝီ, ကထ---သဝီ ဒီး ကဒ---သဝီသ့ၣ်တဖၣ်န့ၣ်လီၤ. ကျိဖးဒိၣ်ချံတဖျၢၣ်လီၤတဲာ်ဘၣ်ဝဲ အူကန---အကျးတဖျၢၣ် ဖဲ ဂ---သဝီန့ၣ်လီၤ. ကျိဖးဒိၣ်ချံတဖျၢၣ်န့ၣ်လီၤတဲာ်ပိၢ်ဖးထီၣ်ဒီး ကျးတဖျၢၣ်န့ၣ်ဟးဂီၤကွံာ်ဝဲဒၣ်န့ၣ်လီၤ.

ဖဲလါနိၣ်ဝ့ဘၢၣ် ၁၇သီ, ၂၀၂၃နံၣ်န့ၣ်, ပယီၤသုးတဖၣ်ခးလီၤနါစိၤဝဲကျိဖးဒိၣ်တဖၣ်ဆူ သဝီလၢအအိၣ်လၢ ဒ့လိမုၢ်နုာ်ကရူၢ်ပူၤ တဖၣ်န့ၣ်လီၤ. ကျိဖးဒိၣ်ချံလီၤတဲာ်ဝဲဒၣ်တဖျၢၣ် လၢစံာ်ပျီတဘ့ၣ်အပူၤ လၢအိၣ်အဘူးဒီး ကည---သဝီန့ၣ်လီၤ. ကျိဖးဒိၣ်ချံပိၢ် ဖးထီၣ်ဒီး အက့သ့ၣ်တဖၣ် ဘၣ်သံဝဲဒၣ် စီၤ ကပ---အကျီၢ်တဒုန့ၣ်လီၤ. ဖဲလါနိၣ်ဝ့ဘၢၣ် ၁၉သီ, ၂၀၂၃နံၣ်န့ၣ်, ပယီၤသုးတဖၣ် ခးလီၤနါစိၤကဒီးဝဲကျိဖးဒိၣ်တဖၣ်ဆူ သဝီလၢအအိၣ်လၢ ဒ့လိမုၢ်နုာ်ကရူၢ်ပူၤတဖၣ်န့ၣ်လီၤ. ကျိဖးဒိၣ်ချံတဖျၢၣ်လီၤတဲာ်ဘၣ်ဝဲ သဝီဖိတဂၤအဟံၣ်တဖျၢၣ် ဖဲ ပ---သဝီန့ၣ်လီၤ. ကျိဖးဒိၣ်ချံတဖျၢၣ်န့ၣ်လီၤတဲာ်ပိၢ်ဖးထီၣ်ဒီး ဘၣ်ဟးဂီၤဝဲဒၣ် ကဖ---အဟံၣ်ခိၣ် ဒုးန့ၣ်လီၤ. ကျိဖးဒိၣ်က့တဖၣ်ဘၣ်ဟးဂီၤစ့ၢ်ကီးဝဲဟံၣ်လၢအဂၤ ၃ဖျၢၣ်န့ၣ်လီၤ.

ဖဲလါနိၣ်ဝ့ဘၢၣ် ၂၇သီ, ၂၀၂၃နံၣ်န့ၣ်, ပယီၤသုးတဖၣ်ခးလီၤနါစိၤဝဲကျိဖးဒိၣ်တဖၣ်ဆူ သဝီလၢအအိၣ်လၢဒ့လိမုၢ်နုာ်ကရူၢ်ပူၤ တဖၣ်န့ၣ်လီၤ. ကျိဖးဒိၣ်ချံတဖျၢၣ်လီၤတဲာ်ဝဲဒၣ်လၢ သဝီဖိအိၣ်လၢ ကတ---သဝီတဂၤ အရီဘၢၣ်ကျီးပူၤန့ၣ်လီၤ. ကျိဖးဒိၣ်ချံ တဖျၢၣ်န့ၣ် လီၤတဲာ်ပိၢ်ဖးထီၣ်ဒီးဘၣ်ဟးဂီၤဝဲဒၣ်ရီဘၢၣ်ထူၣ်သ့ၣ်တဖၣ်န့ၣ်လီၤ.ပှၤဘၣ်ဒိဘၣ်ထံးတအိၣ်ဝဲနီတဂၤ ဘၣ်လၢသဝီ တဖျၢၣ်အံၤအပူၤန့ၣ်လီၤ.

ဖဲလါနိၣ်ဝ့ဘၢၣ် ၂၇သီ, ၂၀၂၃နံၣ်, ဟါလီၤခီ ၉း၀၄ မံးနံးအဆၢကတီၢ်, ပယီၤသုးအိၣ်လၢ လ့မဲာ်သုးကလၢၤ ဒီး ကိနံၣ်မဲာ်သုး ကလၢၤ, သုးဖိတဖၣ် ခးလီၤနါစိၤဝဲကျိဖးဒိၣ်တဖၣ် ဆူ ကထ---သဝီ, ဒ့လိမုၢ်နုာ်ကရူၢ်ပူၤန့ၣ်လီၤ. ကျိဖးဒိၣ်ချံတဖၣ်လီၤတဲာ်ပိၢ်ဖး ထီၣ်လၢ သဝီဖိတဂၤအရီဘၢၣ်ကျီးပူၤ ဒီး ဘၣ်ဟးဂီၤဝဲဒၣ်အရီဘၢၣ်ထူၣ်သ့ၣ်တဖၣ်န့ၣ်လီၤ. ကျိဖးဒိၣ်က့တဖၣ်ဘၣ်စ့ၢ်ကီးဝဲ သဝီဖိလၢအသးနံၣ်သအိၣ် ၃၄နံၣ် တဂၤ, နီၢ် ကမ--- အဟံၣ်န့ၣ်လီၤ. အနီၢ်ကစၢ်စ့ၢ်ကီးအစုနၢၣ်ခံဘၣ်ဒိဝဲဒီးကျိဖးဒိၣ်က့န့ၣ်လီၤ.

ကဘီယူၤဟဲခးလီၤတၢ်ဖဲ ဒ့လိမုၢ်နုာ်ကရူၢ်ပူၤ

ဖဲလါနိၣ်ဝ့ဘၢၣ် ၂၇သီ, ၂၀၂၃နံၣ်, ဟါလီၤခီ ၃း၁၇ မံးနံးအဆၢကတီၢ်, ပယီၤသုးဟဲခးလီၤတၢ်လၢကဘီယူၤဖဲ ကဒ---သဝီ, ဒ့လိမုၢ်နုာ်ကရူၢ်ပူၤန့ၣ်လီၤ. ကဘီယူၤခးလီၤတၢ်အဃိ သဝီဖိဘၣ်ဒိဝဲဒၣ် ၂ဂၤ, ဒီးဘၣ်ဒိဝဲနးနးကလဲာ်တဂၤန့ၣ်လီၤ. သဝီဖိအ ဟံၣ်တဖၣ်စ့ၢ်ကီးဘၣ်ဟးဂီၤဝဲဒၣ်ဒီးကဘီယူၤဟဲခးလီၤတၢ်တဘျီအံၤန့ၣ်လီၤ.