တၢ်ကဲထီၣ်သးအကလုာ်

ပယီၤသုးခးလီၤကျိဖးဒိၣ်အဃိ သဝီဖိသံဝဲတဂၤ

တၢ်ကဲထီၣ်သးမုၢ်နံၤမုၢ်သီ

လါယူၤ ၃၀သီ, ၂၀၂၃နံၣ်

တၢ်ကဲထီၣ်သးတၢ်လီၢ်တၢ်ကျဲ (သဝီ, ကရူၢ်, ကီၢ်ဆၣ်, ကီၢ်ရ့ၣ်)

က---သဝီ, နိၣ်တကီကရူၢ်, နိၣ်တကီကီၢ်ဆၣ်, ဒူပျာ်ယာ်ကီၢ်ရ့ၣ်

ၦၤလၢအတူၢ်ဘၣ်တၢ်တဂၤအဂ့ၢ်အကျိၤ

မံၤ

စီၤ ခ---

သးနံၣ်

၄၄နံၣ်

မုၣ်/ ခွါ

ခွါ

ကလုာ်

ကညီ

ဟံၣ်ဖိဃီဖိ အိၣ် / တအိၣ်   

တအိၣ်

တၢ်ဖံးတၢ်မၤ

မၤအီၣ်ကျီး

တၢ်ဘူၣ်တၢ်ဘါ

ခရံာ်ဖိ

တၢ်ဟံမူဒါ/ လီၢ်လၤ

-

အိၣ်ဆိးဒူသဝီ

က---သဝီ, နိၣ်တကီကရူၢ်, နိၣ်တကီကီၢ်ဆၣ်, ဒူပျာ်ယာ်ကီၢ်ရ့ၣ်

ၦၤလၢအမၤအၢပယွဲတၢ်တဂၤအဂ့ၢ်အကျိၤ

မံၤ                    

လီၢ်လၤ

သုးကျိၤ/ သုးရ့ၣ် / သုးတြိၤ

အိၣ်သူၣ်လီၤသးလီၢ်ကျဲ /သုးကလၢၤ

အခိၣ်အမံၤဒီးလီၢ်လၤ

တသ့ၣ်ညါ

တသ့ၣ်ညါ

ခီၣ်သုးရ့ၣ် နီၣ်ဂံၢ် (ခလရ-၂၈၃)

သၢတၢၣ်သုးကလၢၤ, နိၣ်တကီကရူၢ်, နိၣ်တကီကီၢ်ဆၣ်

တသ့ၣ်ညါ

၁. ၡဲပၠးၦၤနဟံးန့ၢ်တၢ်ကဲထီၣ်သးတခါအံၤ တဆီဘၣ်တဆီတက့ၢ်.

KHRG ပျီပူၤပှၤမၤတၢ်ဖိဒိးန့ၢ်ဘၣ်တဂ့ၢ်တၢ်ကျိၤအံၤလၢ စီၤ ဒ---, လီၢ်ကဝီၤခိၣ်နၢ်တဂၤအအိၣ်, ဒီးဟံးန့ၢ်စ့ၢ်ကီးတၢ်ဂ့ၢ်တၢ်ကျိၤ လၢသဝီဖိတဖၣ်လၢအအိၣ်ဖဲတၢ်ကဲထီၣ်သးအလီၢ်န့ၣ်လီၤ.

၂. ကွဲးနီၣ်ၦၤလၢဟ့ၣ်တၢ်ဂ့ၢ်အံၤတဂၤစုာ်စုာ်သ့ၣ်ညါ တၢ်ဂ့ၢ်အံၤအမ့ၢ်အတီလၢကျဲဒ်လဲၣ်.

KHRG ပျီပူၤပှၤမၤတၢ်ဖိမၤတၢ်ထံၣ်လိာ်သံကွၢ်ဒိး စီၤဒ---, လီၢ်ကဝီၤခိၣ်နၢ် ဘၣ်ဃးဒီးတၢ်ကဲထီၣ်သးအံၤန့ၣ်လီၤ. KHRG ပျီပူၤ ပှၤ မၤတၢ်ဖိတဲသကီးတၢ်ဒီး က---သဝီဖိတဖၣ်စ့ၢ်ကီးန့ၣ်လီၤ.

ပာ်ဖျါတၢ်ကဲထီၣ်သးအဂ့ၢ်အကျိၤလၢလၢပှဲၤပှဲၤတက့ၢ်.

စးထီၣ်လၢ ၂၀၂၁နံၣ်န့ၣ်, သုးဟံးန့ၢ်ဆူၣ်တၢ်စိတၢ်ကမီၤဝံၤအလီၢ်ခံန့ၣ်, တၢ်ခးလိာ်သးကဲထီၣ်သးခဲအံၤခဲအံၤ လၢ ထံကီၢ်တၢ် ပၢတၢ်ပြးကီၣ်ကးကရၢ (SAC)သုး, ဒီးတၢ်ပၢၢ်ဆၢသုးပာ်ဖှိၣ်အဘၢၣ်စၢၤ ဖဲနိၣ်တကီကီၢ်ဆၣ်, ဒူပျာ်ယာ်ကီၢ်ရ့ၣ်ပူၤန့ၣ်လီၤ. ဖဲလါ ယနူၤအါရံၤ ၄သီ, ၂၀၂၃နံၣ်န့ၣ်, SAC ကဘီယူၤဟဲခးလီၤတၢ် ဒီးခးလီၤနါစိၤကျိဖးဒိၣ်ဖဲ နိၣ်တကီကရူၢ်, နိၣ်တကီကီၢ်ဆၣ်, ဒူပျာ်ယာ်ကီၢ်ရ့ၣ်ပူၤန့ၣ်လီၤ. တၢ်ကဲထီၣ်သးတဘျီအံၤ, တၢ်ဘၣ်ဒိဘၣ်ထံးဒီးတၢ်သံတၢ်ပှၢ်တအိၣ်နီတမံၤဘၣ်န့ၣ်လီၤ.

တၢ်ကဲထီၣ်သးအဂၤတခါဖဲ ၂၀၂၃နံၣ်, SAC ခးလီၤကျိဖးဒိၣ်တဖၣ်ဆူ က---သဝီအကျဲမုၢ်ပူၤ, နိၣ်တကီကရူၢ်, နိၣ်တကီကီၢ် ဆၣ်, ဒီးသဝီဖိအကျီၢ်သံဝဲဒၣ်တဒုန့ၣ်လီၤ. ဖဲအဝဲသ့ၣ်ခးလီၤကျိဖးဒိၣ်ဝံၤအလီၢ်ခံ, SAC သုးဖိတဖၣ်ဟဲနုာ်လီၤဆူသဝီပူၤ ဒီးမၤ ပျံၤမၤဖုးဒီးမၤဒၢၣ်မၤလီၤဝဲကျီးကစၢ် စီၤလ---, ခီဖျိအဝဲသ့ၣ်ပာ်ဒ့ၣ်ပာ်ကမၣ်အီၤလၢအတၢ်ဆဲးကျိးအိၣ်ဒီး PDF ဒီး KNLA သုး ဖိတဖၣ်န့ၣ်လီၤ. SAC သုးဖိ မၤဟးဂီၤဝဲ စီၤလ---အဟံၣ်ဃီတၢ်ပီးတၢ်လီတနီၤစ့ၢ်ကီးန့ၣ်လီၤ.

ဖဲလါယူၤ ၂၉သီ, ၂၀၂၃နံၣ်, မုၢ်ဟါလီၤ ၆နၣ်ရံၣ်, KNLA သုးရ့ၣ်နီၣ်ဂံၢ်-၁၇, သုးဒ့ နီၣ်ဂံၢ်-၂ ဒီး PDF သုးဖိတဖၣ်ထီၣ်ခးဝဲဒၣ် SAC ခီၣ်သုးရ့ၣ် နီၣ်ဂံၢ် (ခလရ-၂၈၃) အသုးကလၢၤ လၢဒြိ ဖဲအဘူးဒီး သၢတၢၣ်သဝီ, နိၣ်တကီကရူၢ်, နိၣ်တကီကီၢ်ဆၣ်, ဒူ ပျာ်ယာ်ကီၢ်ရ့ၣ်ပူၤန့ၣ်လီၤ. လၢတၢ်က့ၤမၤကၣ်ကဒါက့ၤတၢ်အဂီၢ်, SAC သုးခးလီၤနါစိၤကျိဖးဒိၣ်ဆူ က--- သဝီပူၤန့ၣ်လီၤ. သဝီဖိတနီၤနီၤဃ့ၢ်အိၣ်ကဒုဝဲလၢတပူၤတဖၣ်န့ၣ်လီၤ. SAC သုးခးလီၤကျိဖးဒိၣ်တုၤလၢ မုၢ်နၤခီ ၁၁နၣ်ရံၣ်န့ၣ်လီၤ. တၢ်ခးလီၤ ကျိဖးဒိၣ်တဘျီအံၤ သဝီဖိအဟံၣ်ဟးဂီၤဝဲ ၃ဖျၢၣ်န့ၣ်လီၤ. ဟံၣ်ဟးဂီၤဝဲဒိၣ်ဒိၣ်မုၢ်မုၢ် ၁ဖျၢၣ် ဒီးဟးဂီၤဝဲတက့တခီ ၂ဖျၢၣ်န့ၣ် လီၤ. စီးဒ---, လီၢ်ကဝီၤခိၣ်နၢ်တဂၤတဲပၠးဝဲ SAC သုးဖိတဖၣ်ခးလီၤနါစီၤကျိဖးဒိၣ်ဆူ က---သဝီပူၤန့ၣ်လီၤ. ကျိဖးဒိၣ်ချံလီၤ တဲာ်ဝဲ ၄ ဖျၢၣ်လၢသဝီပူၤန့ၣ်လီၤ. ကျိဖးဒိၣ်ချံလီၤတဲာ်ဝဲလၢသဝီဖိအဟံၣ်ကပၤတဖျၢၣ် ဘၣ်ဆၣ်ပှၤတဘၣ်ဒိနီတဂၤဘၣ် ခီဖျိ လၢဟံၣ်ကစၢ်တဖၣ်တအိၣ်လၢဟံၣ်ပူၤဘၣ်. ဘၣ်သ့ၣ်သ့ၣ်ဟံၣ်ကစၢ်မ့ၢ်အိၣ်လၢဟံၣ်ပူၤန့ၣ်, အဝဲသ့ၣ်ကသံဝဲဒၣ်န့ၣ်လီၤ. ကျိဖး ဒိၣ်ချံလီၤတဲာ်ဝဲလၢသဝီအကျဲပူၤတဖျၢၣ် ဒီးဟံၣ်လၢအအိၣ်ဘူးဒီးကျဲတဖၣ်ဘၣ်ဝဲဒၣ်ဒီးကျိဖးဒိၣ်အက့တဖၣ်န့ၣ်လီၤ. အဒိ, ဟံၣ်မဲာ်ထံကလာ်, ဟံၣ်ဒုၣ်ကပၤ, ဒီး ဟံၣ်ခိၣ်ဒုးတဖၣ်ဟးဝဲဝဲဒၣ်န့ၣ်လီၤ.

မၤကဒီးတဘျီ, ဖဲလါယူၤ ၃၀သီ, ၂၀၂၃နံၣ်, မုၢ်ဟါလီၤ ၈နၣ်ရံၣ်န့ၣ်, SAC သုးဖိတဖၣ်ခးလီၤကဒီးကျိဖးဒိၣ်ဆူ ဂ---သဝီ ဒီးသဝီဖိ, စီၤခ---သးနံၣ်အိၣ် ၄၄နံၣ်တဂၤသံဝဲဒၣ်န့ၣ်လီၤ. အခိၣ်သၣ်ဃံ ဒီးအစုဘၣ်ဒိဝဲဒီးကျိဖးဒိၣ်က့နးနးကလဲာ်လၢ ကျိ ဖးဒိၣ်က့ဖဲအဝဲမံလၢစုာ်ပူၤအဆၢကတီၢ်န့ၣ်လီၤ. သဝီဖိတဖၣ်တသ့ၣ်ညါလၢအဝဲဘၣ်ဒိဖဲဆၢကတီၢ်န့ၣ်ဘၣ်, ဘၣ်ဆၣ်သဝီဖိ တဂၤထံက့ၤအစိၣ်လၢမုၢ်ဂီၤခီ ဒီးတၢ်အံၤလီၤဂာ်လၢအဝဲသံဝဲဒၣ်တဘျီဃီဖဲအဘၣ်ဒီးကျိဖးဒိၣ်က့တဖၣ်န့ၣ်လီၤ. လီၢ်ကဝီၤခိၣ် နၢ်, စီၤဒ---တဲဝဲ ဖဲလါယူၤ ၃၀သီ, ၂၀၂၃နံၣ်န့ၣ်, SAC သုးဖိတဖၣ်ခးလီၤကျိဖးဒိၣ်ဆူ ဂ---သဝီ ဒီး မ---သဝီအဘၢၣ်စၢၤ န့ၣ်လီၤ. ခီဖျိလၢတၢ်ခးလီၤကျိဖးဒိၣ်အံၤအဃိ, သဝီဖိတဂၤသံဝဲဒၣ်န့ၣ်လီၤ. အခိၣ်သၣ်ဃံ ဒီးအစုဘၣ်ဝဲ ဒီကျိဖးဒိၣ်က့တဖၣ် ဒီးအဝဲသံတဘျီဃီန့ၣ်လီၤ.

ခီဖျိလၢတၢ်ခးလီၤကျိဖးဒိၣ် ဒီး SAC သုးတၢ်ဟူးတၢ်ဂဲၤတဖၣ်အဃိ, သဝီဖိတနီၤနီၤဃ့ၢ်ကွံာ်ဝဲဆူတၢ်လီၢ်အဂၤန့ၣ်လီၤ. ဘၣ် ဆၣ် သဝီဖိတနီၤနီၤ တသ့ၣ်ညါဝဲတၢ်အိၣ်သးဘၣ်အဃိ အဝဲသ့ၣ်အိၣ်ဒံးဒၣ်လၢသဝီပူၤ ဒီးအိၣ်ခိးကွၢ်ဝဲတၢ်အိၣ်သးန့ၣ်လီၤ. ခီဖျိလၢ SAC မၤဃံးထီၣ်တၢ်လဲၤထီၣ်က့ၤလီၤအဃိ တၢ်အံၤကီဒိၣ်မးလၢသဝီဖိတဖၣ် ကသုးလီၢ်သုးကျဲဆူတၢ်လီၢ်အဂၤန့ၣ် လီၤ. တကးဒံးဘၣ်, တၢ်အံၤကီဒိၣ်မးလၢသဝီဖိတဖၣ်ကမၤအီၣ်တၢ်လၢတၢ်လုၢ်အီၣ်နီၢ်ခိသးသမူအဂီၢ် ဖဲအဝဲသ့ၣ်သုးလီၢ်သုး ကျဲဆူတၢ်လီၢ်အဂၤ မ့ၢ်လၢအဝဲသ့ၣ်ကစးထီၣ်မၤတၢ်မၤလၢအသီတဖၣ်တသ့ဘၣ်န့ၣ်လီၤ. စီၤဒ--- တဲအါထီၣ်ဝဲ SAC သုးတၢ် ဟူးတၢ်ဂဲၤတဖၣ် ကဲထီၣ်ဝဲတၢ်ကိၢ်တၢ်ဂီၤ ဒီးတၢ်ပျံၤတၢ်ဖုးလၢသဝီဖိအဂီၢ်န့ၣ်လီၤ. သဝီဖိတဖၣ်ထံၣ်ဘၣ် တၢ်ကီတၢ်ခဲအါမး ခီဖျိလၢတၢ်သံတၢ်ပှၢ်ကဲထီၣ်သးတခါအံၤန့ၣ်လီၤ. တၢ်ကဲထီၣ်သးတခါအံၤ မၤဘၣ်ဒိဝဲသဝီဖိတဖၣ်အနီၢ်ခိဒီးနီၢ်သး ခံကပၤလၢာ် န့ၣ်လီၤ. ထီဘိန့ၣ်ပဆိကမိၣ်လၢတၢ်ခးလီၤကျိဖးဒိၣ်ကကဲထီၣ်သးဆၢကတီၢ်ဖဲလဲၣ်. ပတၢ်ပျံၤတၢ်ဖုးတဖၣ်အါ ထီၣ်ဝဲဒၣ်ကွ့ၢ် ကွ့ၢ်န့ၣ်လီၤ. ဒ်ကမျၢၢ်ဖိအသိး, ပအဲၣ်ဒိးလၢပကအိၣ်ဒီးတၢ်သဘျ့လၢ တၢ်လဲၤထီၣ်က့ၤလီၤ, တၢ်ဖံးတၢ်မၤ ဒီး တၢ်အိၣ်တၢ်ဆိး န့ၣ်လီၤ. ပအဲၣ်ဒိးအိၣ်မူလၢတၢ်ပျံၤတၢ်ဖုးတအိၣ်ဘၣ်န့ၣ်လီၤ. ပအဲၣ်ဒိးလၢပှၤဂ့ၢ်ဝီခွဲးယာ်တၢ်ကရၢကရိတဖၣ်, ဒီးဟီၣ်ခိၣ်ဒီ ဖျၢၣ်ခိၣ်နၢ်တဖၣ်ကဆိကမိၣ်န့ၢ်တၢ်လၢပဂီၢ် ဒီးအိၣ်ဒီးတၢ်တိာ်ကျဲၤဂ့ၤကတၢၢ်လၢကမျၢၢ်ဖိအဂီၢ်န့ၣ်လီၤ.

မ့ၢ်ၦၤလၢအတူၢ်ဘၣ်တၢ်ဖၣ် ဟ့ၣ်ၦၤတၢ်ခွဲးတၢ်ယာ်လၢပကသူတၢ်ဂ့ၢ်တၢ်ကျိၤတခါအံၤဧါ, ဟ့ၣ်ၦၤတၢ်ခွဲးတၢ်ယာ်လၢ ပကသူ တၢ်ဂ့ၢ်အံၤလၢကျဲဒ်လဲၣ်.

လီၢ်ကဝီၤခိၣ်နၢ်လၢတၢ်မၤတၢ်ထံၣ်လိာ်သံကွၢ်ဒီအီၤတဂၤအံၤ ဟ့ၣ်အခွဲးလၢတၢ်ကသူဝဲတၢ်ဂ့ၢ်တၢ်ကျိၤအံၤန့ၣ်လီၤ.