တၢ်ကဲထီၣ်သးတၢ်ပာ်ဖျါတဘ့ၣ်အံၤပာ်ဖျါထီၣ်ဝဲတၢ်ကဲထီၣ်သးသ့ၣ်တဖၣ်လၢမူကီၢ်ဆၣ်, ချၢၣ်လွံၢ်ထူၣ်ကီၢ်ရ့ၣ်အပူၤ ဖဲလါအီ ကူး၂၀၂၂နံၣ်န့ၣ်လီၤ. သဝီဖိသၢဂၤဘၣ်တၢ်ဖီၣ်န့ၢ်ဆူၣ်အီၤလၢ SAC အသုးသ့ၣ်တဖၣ်လၢတမ့ၢ်ဝဲတနံၤဃီဘၣ်န့ၣ်လီၤ. စးထီၣ် လၢတၢ်ဖီၣ်အဝဲသ့ၣ်အနံၤလံၤလံၤန့ၣ် မတၤတဂၤမးတထံၣ်အဝဲသ့ၣ်ဒီးနၢ်ဟူအဝဲသ့ၣ်အကစီၣ်ဘၣ်အဃိ သဝီဖိဒီးလီၢ်ကဝီၤ ခိၣ်နၢ်သ့ၣ်တဖၣ်တယးဝဲလၢ SAC သုးလၢဖီၣ်အဝဲသ့ၣ်တဖၣ်မၤသံအဝဲသ့ၣ်လံန့ၣ်လီၤ.[1]

 

 

(၁) တပတီၢ်- တၢ်ကဲထီၣ်သးအဂ့ၢ်လီၤတံၢ်လီၤဆဲး

တၢ်ကဲထီၣ်သးအကလုာ်

တၢ်ဖီၣ်န့ၢ်ဆူၣ်ဒီးဒုးဟါမၢ်န့ၢ်ဆူၣ်သ၀ီဖိ

တၢ်ကဲထီၣ်သးမုၢ်နံၤမုၢ်သီ

လါအီကူး ၂၀၂၂ နံၣ်

တၢ်ကဲထီၣ်သးတၢ်လီၢ်တၢ်ကျဲ (သဝီ, ကရူၢ်, ကီၢ်ဆၣ်, ကီၢ်ရ့ၣ်)

အ---သဝီ, ကိၤနံၤကရူၢ်, မူကီၢ်ဆၣ်, ချၢၣ်လွံၢ်ထူၣ်ကီၢ်ရ့ၣ်

ၦၤလၢအတူၢ်ဘၣ်တၢ်တဂၤအဂ့ၢ်အကျိၤ

မံၤ

စီၤမံၤထူ

စီၤမီၣ်ကၠ့င့

စီၤမီၣ်ကီကၠီ

သးနံၣ်

၅၀

၄၅

၂၉

မုၣ်/ ခွါ

ပိာ်ခွါ

ပိာ်ခွါ

ပိာ်ခွါ

ကလုာ်

ကညီ

ကညီ

ကညီ

ဟံၣ်ဖိဃီဖိ အိၣ် / တအိၣ်   

တအိၣ်

တအိၣ်

တအိၣ်

တၢ်ဖံးတၢ်မၤ

ထူစံာ်

ထူစံာ်

ထူစံာ်

တၢ်ဘူၣ်တၢ်ဘါ

ဘျၢထံခရံာ်ဖိ

မိၢ်လုပၢ်လၢ်

ဘျၢထံခရံာ်ဖိ

တၢ်ဟံမူဒါ/ လီၢ်လၤ

သဝီဖိ

သဝီဖိ

သဝီဖိ

အိၣ်ဆိးဒူသဝီ

အ---သဝီ, ကိၤနံၤကရူၢ်, မူကီၢ်ဆၣ်

ဘ---သဝီ, နိၣ်ညၣ်လၣ် ကရူၢ်, မူကီၢ်ဆၣ်

စ---သဝီ, ဝ့ၢ်စွဲကရူၢ်, မူကီၢ်ဆၣ်

ၦၤလၢအမၤအၢပယွဲတၢ်တဂၤအဂ့ၢ်အကျိၤ

မံၤ                    

လီၢ်လၤ

သုးကျိၤ/ သုးရ့ၣ် / သုးတြိၤ

အိၣ်သူၣ်လီၤသးလီၢ်ကျဲ သုးကလၢၤ

အခိၣ်အမံၤဒီးလီၢ်လၤ

တသ့ၣ်ညါ

တသ့ၣ်ညါ

 SAC ခီၣ်ချ့သုးရ့ၣ် ၆၀၃ ဒီး ၄၃၉

ကၠိပ့ၣ်စ့းသုးကလၢၤ

တသ့ၣ်ညါ

တသ့ၣ်ညါ

တသ့ၣ်ညါ

ကမျၢၢ်သုး

ကၠိပ့ၣ်စ့းသုးကလၢၤ

တသ့ၣ်ညါ

 

 (၂) တပတီၢ်- တၢ်ဂ့ၢ်တၢ်ကျိၤအကံၢ်အစီ

၁. ၡဲပၠးၦၤနဟံးန့ၢ်တၢ်ကဲထီၣ်သးတခါအံၤ တဆီဘၣ်တဆီတက့ၢ်.

KHRG ပျီပူၤပှၤထၢတၢ်ကစီၣ်အံၤနၢ်ဟူဘၣ်ဃးဒီးတၢ်ဖီၣ်, တၢ်ဒုးဃာ်, ဒီးတၢ်မၤသံဝဲသဝီဖိတဘျုးဂၤအဃိ အဝဲလဲၤထၢဝဲတၢ် ကစီၣ်လၢလီၢ်ကဝီၤသဝီဖိသ့ၣ်တဖၣ်အအိၣ်န့ၣ်လီၤ. ဖဲလၢပျီပူၤပှၤထၢတၢ်ကစီၣ်အံၤလဲၤမၤဝဲတၢ်ထံၣ်လိာ်သံကွၢ်သံဒိးအခါ အဝဲ သ့ၣ်ညါဘၣ်ဝဲလၢသဝီဖိလၢတၢ်ဖီၣ်အီၤသၢဂၤအံၤဘၣ်တၢ်မၤသံအီၤလံဧါတၢ်တမၤသံအီၤဒံးဘၣ်ဧါန့ၣ်တၢ်တသ့ၣ်ညါလီၤတံၢ်ဝဲဒံးဘၣ်.

 

ပျီပူၤပှၤထၢတၢ်ကစီၣ်အံၤနၢ်ဟူဝဲဘၣ်ဃးဒီးတၢ်မၤသံဝဲစီၤမံၤထူလၢသဝီဖိတဘျုးဂၤအအိၣ် ဒီးဒ်သိးအကမၤန့ၢ်ဘၣ်ဝဲတၢ်ဂ့ၢ်တၢ် ကျိၤလၢလၢပှဲၤပှဲၤအဂီၢ် အဝဲလဲၤထံၣ်လိာ်သံကွၢ်သံဒိးဝဲစီၤဒ---လၢအမ့ၢ်ဝဲစီၤမံၤထူအဖါတံၢ်ဒီးစီၤအ---လၢအမ့ၢ်ဝဲ စီၤမံၤထူအဒ့ ခွါ ဖဲလါစဲးပထဲဘၢၣ် ၉ သီ ၂၀၂၂ နံၣ် န့ၣ်လီၤ.

 

ပျီပူၤပှၤထၢတၢ်ကစီၣ်အံၤနၢ်ဟူဝဲတၢ်မၤသံစီၤမီၣ်ကၠ့င့လၢသဝီဖိလၢအအိၣ်လၢဘ---သဝီဒီးသဝီလၢတၢ်ကပိာ်ကပၤဖဲ န့ၣ်သ့ၣ် တဖၣ်အအိၣ်န့ၣ်လီၤ. လၢလီၢ်ခံပျီပူၤပှၤထၢတၢ်ကစီၣ်အံၤန့ၢ် ကတိၤထံၣ်လိာ်သံကွၢ်သံဒိးဘၣ်တၢ်ဒီး ပှၤတူၢ်ဘၣ်တၢ်အဒ့မုၣ် နီၢ်ယ---အ၀ၤလၢအမ့ၢ်ဝဲစီၤအဖ---ဖဲလါစဲးပထဲဘၢၣ် ၉ သီ ၂၀၂၂ နံၣ်န့ၣ်လီၤ.

 

ဖဲလါစဲးပထဲဘၢၣ် ၉ သီ ၂၀၂၂ နံၣ်န့ၣ် ပျီပူၤပှၤထၢတၢ်ကစီၣ်အံၤ ထံၣ်လိာ်သံကွၢ်သံဒိးဝဲစီၤမီၣ်ကီကၠီအတခွါ လၢအမ့ၢ်ဝဲ စီၤအဆ---ဘၣ်ဃးဒီးတၢ်ဖီၣ်ဝဲစီၤမီၣ်ကီကၠီဒီးအတၢ်ဟါမၢ်အဂ့ၢ်အကျိၤန့ၣ်လီၤ. ဘၣ်ဃးဒီးတၢ်ဂ့ၢ်အဝဲအံၤန့ၣ် ပျီပူၤပှၤထၢ တၢ် ကစီၣ်အံၤ ထံၣ်လိာ်သံကွၢ်သံဒိးစ့ၢ်ကီးဝဲစီၤအ---လၢအမ့ၢ်ဝဲဝ့ၢ်စွဲအကရူၢ်ခိၣ်န့ၣ်လီၤ.

၂. ကွဲးနီၣ်ၦၤလၢဟ့ၣ်တၢ်ဂ့ၢ်အံၤတဂၤစုာ်စုာ်သ့ၣ်ညါ တၢ်ဂ့ၢ်အံၤအမ့ၢ်အတီလၢကျဲဒ်လဲၣ်.

ပှၤတူၢ်ဘၣ်တၢ်သ့ၣ်တဖၣ်အဟံၣ်ဖိဃီဖိနၢ်ဟူဝဲဘၣ်ဃးဒီးတၢ်ဖီၣ်ဒုးဃာ်လၢသဝီဖိအဂုၤအဂၤလၢအထံၣ်ထွဲဝဲတၢ်ကဲထီၣ်သးသ့ၣ်တဖၣ်အအိၣ်န့ၣ်လီၤ. ဝ့ၢ်စွဲကရူၢ်ခိၣ်စ့ၢ်ကီးဒိးန့ၢ်ဘၣ်ဝဲတၢ်ကစီၣ်လၢသဝီဖိအဂၤသ့ၣ်တဖၣ်အအိၣ်န့ၣ်လီၤ.

 

 (၃) တပတီၢ်- ပာ်ဖျါတၢ်ကဲထီၣ်သးအဂ့ၢ်အကျိၤလၢလၢပှဲၤပှဲၤတက့ၢ်

ပာ်ဖျါတၢ်ကဲထီၣ်သးအဂ့ၢ်အကျိၤလၢလၢၤပှဲၤပှဲၤတက့ၢ်.

တၢ်ကဲထီၣ်သး - ၁

ဖဲလါအီကူး ၁၃ သီ ၂၀၂၂ နံၣ်န့ၣ်, ထံကီၢ်တၢ်ပၢတၢ်ပြးကီၣ်ကးကရၢ (SAC) ခီၣ်ချ့သုးရ့ၣ် ၄၃၉, ၆၀၃ ဒီး ကမျၢၢ်သုးလၢအ အိၣ်လၢကၠိပ့ၣ်စ့းသုးကလၢၤသ့ၣ်တဖၣ်ဖီၣ်ဝဲစီၤမံၤထူန့ၣ်လီၤ. ဘၣ်မနုၤဃိအဝဲသ့ၣ်ဖီၣ်ဝဲစီၤမံၤထူလဲၣ်န့ၣ်လီၢ်ကဝီၤဖိဖဲန့ၣ်သ့ၣ် တဖၣ်တသ့ၣ်ညါဝဲဘၣ်. စီၤမံၤထူအံၤအိၣ်ဝဲလၢန---ကဝီၤလၢအအိၣ်လၢအ---သဝီ, ကိၤနံၤကရူၢ်, မူကီၢ်ဆၣ်, ချၢၣ်လွံၢ်ထူၣ်ကီၢ် ရ့ၣ်အပူၤဒီးဘၣ်တၢ်ဖီၣ်အီၤလၢကျဲဖဲအဝဲလဲၤဆူတၢ်ဆါတၢ်ပှ့ၤအလီၢ်ဒ်သိးကလဲၤပှ့ၤတၢ်အခါန့ၣ်လီၤ. တၢ်ဆါတၢ်ပှ့ၤအလီၢ်အိၣ် ဘူးဒီး SAC အသုးကလၢၤအဃိ SAC အသုးလၢကၠိပ့ၣ်စ့းအသုးကလၢၤသ့ၣ်တဖၣ် ညီနုၢ်ဟးဝ့ၤဝီၤဆှၣ်ကွၢ်တၢ်လၢတၢ်ဆါတၢ် ပှ့ၤအလီၢ်ဒီးတၢ်ဆါတၢ်ပှ့ၤအလီၢ်ကပိာ်ကပၤန့ၣ်လီၤ.

 

စီၤမံၤထူအဟံၣ်ဖိဃီဖိစံးဝဲလၢစီၤမံၤထူန့ၣ်မ့ၢ်ဒၣ်ပတီၢ်မုၢ်သဝီဖိတဂၤဒီးအ ဝဲတပၣ်ဃုာ်ပာ်ဂီၢ်လၢတၢ်ကရၢကရိ အတၢ်ဖံးတၢ်မၤ လၢသဝီပူၤနီတမံၤဘၣ်. အဝဲတဘၣ်ထွဲစ့ၢ်ကီးဒီးလီၢ်ကဝီၤကလုာ်ဒူၣ်ဖီၣ် တၢ်စုကဝဲၤသ့ၣ်တဖၣ်ဘၣ်. အဝဲမ့ၢ်ဒၣ်ပှၤမၤအီၣ်စံာ်ဖိ မုၢ်ဆ့ၣ်မုၢ်ဂီၤတဂၤန့ၣ်လီၤ. ပှၤသဝီဖိဒီးကမျၢၢ်သုးလၢအအိၣ်လၢကၠိပ့ၣ်စ့း အသုးကလၢၤသ့ၣ်တဖၣ်သ့ၣ်ညါအီၤ ခဲလၢာ်ဃၣ်ဃၣ် န့ၣ်လီၤ.

 

စီၤမံၤထူအဒ့ခွါ, စီၤအ---, တထံၣ်ထွဲဝဲ SAC အသုးသ့ၣ်တဖၣ်ဖီၣ်အဝဲၢ်ခွါလၢအနီၢ်ကစၢ်ဘၣ်. ဘၣ်ဆၣ်သနာ်က့သဝီဖိလၢအ အိၣ်ဖဲအဟံၣ်ကပိာ်ကပၤသ့ၣ်တဖၣ်ထံၣ်ထွဲဝဲတၢ်ကဲထီၣ်သးဒီးတဲဘၣ်အီၤန့ၣ်လီၤ. စီၤအ---တဲဘၣ်အဖါတံၢ်ဘၣ်ဃးဒီးတၢ်ကဲ ထီၣ်သးဘၣ်ဆၣ်သနာ်က့ ဖဲ SAC အသုးက့ၤဖီၣ်ဝဲအဝဲၢ်ခွါအနံၤန့ၣ်အဝဲလဲၤလူၤက့ၤအဝဲၢ်ခွါတဘူၣ်ဘၣ်. SAC အသုးက့ၤဖီၣ်ဝဲ စီၤမံၤထူ၀ံၤလၢလီၢ်ခံတနံၤမးစီၤမံၤထူအဖါတံၢ်, စီၤဒ---, ဒီးအဘူးအတံၢ်လၢအဂၤသ့ၣ်တဖၣ်မၢဝဲစီၤမံၤထူအဒ့ခွါလၢကလဲၤဆူ ကၠိပ့ၣ်စ့းအသုးကလၢၤဒီးသံကွၢ်ဘၣ်ဃးအဝဲၢ်ခွါန့ၣ်လီၤ. စီၤမံၤထူအဒ့ခွါဘၣ်ယိာ်ဝဲလၢအမ့လဲၤတဂၤန့ၣ် SAC အသုးကမၤဆါ မၤတဒၢၣ်အီၤအဃိ အဝဲလဲၤကိးဃုာ်ဝဲဒီးပှၤသးပှၢ်လၢအသဝီတဂၤဒ်သိး SAC အသုးကဒုးနဲၣ်တၢ်ပာ်ကဲလၢအဝဲသ့ၣ်အဖီခိၣ်စဲး န့ၣ်လီၤ. ဖဲလၢအဝဲသ့ၣ်လဲၤတုၤလၢသုးကလၢၤဒီးသံကွၢ်ဝဲအဝဲၢ်ခွါအခါ SAC အသုးတဲအဝဲသ့ၣ်လၢအဝဲၢ်ခွါန့ၣ် ဘၣ်တၢ်ပျၢ်ကွံာ် အီၤလံန့ၣ်လီၤ. ဘၣ်ဆၣ်သနာ်က့ဖဲလၢအဝဲသ့ၣ်က့ၤတုၤလၢအဟံၣ်အခါတထံၣ်ဝဲအဝဲၢ်ခွါဘၣ်. ဖဲလါအီကူး ၁၇ သီ ၂၀၂၂ နံၣ် န့ၣ် သဝီဖိတနီၤထံၣ်ဝဲလၢ SAC အသုးလဲၤကိးဝဲပှၤခံဂၤဆူကၠိပ့ၣ်စ့းတၢ်သွၣ်ခိၣ်၀ံၤနၢ်ဟူဝဲကျိသီၣ်န့ၣ်လီၤ.  လၢတၢ်န့ၣ် အဃိ သဝီဖိသ့ၣ်တဖၣ်နာ်ဝဲဒၣ်လၢစီၤမံၤထူပၣ်ဃုာ်ဝဲဖဲန့ၣ်ဒီးဘၣ်တၢ်မၤသံအီၤလၢ SAC အသုးလံန့ၣ်လီၤ. ဘၣ်မနုၤအဃိတၢ်ဖီၣ်ဒီး မၤသံဝဲစီၤမံၤထူလဲၣ်န့ၣ်မတၤတဂၤမးတသ့ၣ်ညါဝဲဘၣ်. ဘၣ်မနုၤအဃိ SAC အသုးသ့ၣ်တဖၣ်ဘၣ်ဖီၣ်ဒီးမၤသံဝဲပှၤကညီဒ် သိးစီၤမံၤထူလၢအတမၤကမၣ်တၢ်နီတမံၤဘၣ်အံၤလဲၣ်န့ၣ်စီၤမံၤထူအဖါတံၢ်တနၢ်ပၢၢ်ဝဲဘၣ်ဒီးအသးတမံသးတမုာ်ဝဲဒၣ်ဘၣ်ဒိၣ်မးန့ၣ်လီၤ.

 

တၢ်ကဲထီၣ်သး - ၂

ဖဲလါအီကူး ၁၄ သီ ၂၀၂၂ နံၣ်န့ၣ် သဝီဖိလၢ ဘ---သဝီ, နိၣ်ညၣ်လၣ်ကရူၢ်, မူကီၢ်ဆၣ်, ချၢၣ်လွံၢ်ထူၣ်ကီၢ်ရ့ၣ်တဂၤ လၢအခိၣ် နူာ် တပှဲၤဘၣ်ဒီးအမံၤလၢစီၤမီၣ်ကၠ့င့န့ၣ် ဘၣ်တၢ်ဖီၣ်စ့ၢ်ကီးအီၤလၢ SAC အသုးလၢအဖီၣ်ဝဲ စီၤမံၤထူဒီးအိၣ်လၢကၠိပ့ၣ်စ့းအသုး ကလၢၤတဖုန့ၣ်လီၤ. စီၤမီၣ်ကၠ့င့အံၤဘၣ်တၢ်ဖီၣ်အီၤလၢကျဲဖဲလၢအဝဲလဲၤဝဲဒီးလ့ၣ်ယီၢ်ဆူ အ---သဝီဒ်သိအကလဲၤပှ့ၤဝဲမ့ၣ်ဘံး အခါန့ၣ်လီၤ. စးထီၣ်လၢန့ၣ်လံၤလံၤန့ၣ်ပှၤတထံၣ်လၢၤအီၤနီတဘျီဘၣ် ဒီးအဟံၣ်ဖိဃီဖိစံးဝဲလၢအမ့ဟးထီၣ်တၢ်ချၢန့ၣ် ညီနုၢ် န့ၣ်အဝဲဟးထီၣ်ဒၣ်တစိၢ်ဖိဒီးဟဲက့ၤလၢဟံၣ်န့ၣ်လီၤ. ဘၣ်ဆၣ်တဘျီညါအံၤအဝဲဟးထီၣ်ဒီးဟါမၢ်ဖးယံာ်လံအဃိ ဒူဖိသဝီဖိ သ့ၣ်တဖၣ်တယးဝဲလၢတၢ်မၤသံအီၤလံန့ၣ်လီၤ. ဖဲလၢပှၤသဝီဖိခံဂၤလၢအမ့ၢ်ဝဲ ယ---အမိဒီး နီၢ်ခ--- ဟဲက့ၤလၢအစံာ်ပျီ ပူၤအခါ န့ၣ်အဝဲသ့ၣ်ထံၣ်ဝဲ SAC အသုးသ့ၣ်တဖၣ်စၢတံၢ်ဒီးမၤဆါပယွဲဝဲပှၤတဂၤန့ၣ်လီၤ. ပှၤလၢတၢ်စၢတံၢ်ဒီးမၤဆါပယွဲအီၤ တဂၤ န့ၣ်အဝဲသ့ၣ်ကွၢ်ဝဲလီၤဂာ်လၢစီၤမီၣ်ကၠ့င့ဘၣ်ဆၣ်မ့ၢ်လၢအဝဲသ့ၣ်ပျံၤတၢ်အဃိအဝဲသ့ၣ်ကွၢ်ထံလီၤတံၢ်ဝဲတဘူၣ်ဘၣ်. အဝဲ သ့ၣ် ဟဲက့ၤဆူသဝီဒီးတဲပၠးဝဲပှၤသဝီဖိသ့ၣ်တဖၣ်လၢတၢ်လၢအဝဲသ့ၣ်ထံၣ်ဝဲန့ၣ်လီၤ. သဝီဖိသ့ၣ်တဖၣ်နာ်ဝဲလၢစီၤမီၣ်ကၠ့င့န့ၣ် ဘၣ် တၢ်မၤသံအီၤလၢကၠိပ့ၣ်စ့းတၢ်သွၣ်ခိၣ်ဖဲလါအီကူး ၁၄ သီအနံၤလံန့ၣ်လီၤ. စီၤမီၣ်ကၠ့င့အဒ့မုၣ်အ၀ၤတီၣ်ဖျါထီၣ်ဝဲ တၢ်ကဲ ထီၣ် သးအံၤဆူ KHRG ပျီပူၤပှၤထၢတၢ်ကစီၣ်ဖိအအိၣ်န့ၣ်လီၤ.

 

တၢ်ကဲထီၣ်သး - ၃

ဖဲလါအီကူး ၁၂ သီ ၂၀၂၂ နံၣ်န့ၣ်, စီၤမီၣ်ကီကၠီလၢအအိၣ်လၢစ---သဝီ, ဝ့ၢ်စွဲကရူၢ်, မူကီၢ်ဆၣ်, ချၢၣ်လွံၢ်ထူၣ်ကီၢ်ရ့ၣ်န့ၣ်လဲၤ ဟးဝဲဆူအ---သဝီဒီးသဝီဖိသ့ၣ်တဖၣ်နာ်ဝဲလၢတၢ်ဖီၣ်အီၤဖဲနံၤအဝဲန့ၤန့ၣ်လီၤ.

 

ဖဲလၢတၢ်မၤဝဲတၢ်ထံၣ်လိာ်သံကွၢ်သံဒိးအဆၢကတီၢ်န့ၣ် စီၤမီၣ်ကီကၠီဟါမၢ်ဝဲအိၣ်တလါလံန့ၣ်လီၤ. စီၤမီၣ်ကီကၠီအံၤအခိၣ်နူာ် တပှဲၤအါအါစ့ၢ်ကီးဘၣ် ဒီးအဝဲဟါမၢ်ဝဲတနံၤဃီဖဲ အလဲၤဆူအ---သဝီဒ်သိးအကလဲၤပှ့ၤတၢ်လၢတၢ်ဆါတၢ်ပှ့ၤအလီၢ်န့ၣ်လီၤ.  လီၢ်ကဝီၤသဝီဖိသ့ၣ်တဖၣ်နာ်ဝဲလၢဘၣ်တၢ်မၤသံအီၤလံန့ၣ်လီၤ. စီၤအ---လၢအမ့ၢ်ဝဲဝ့ၢ်စွဲကရူၢ်ခိၣ်န့ၣ်နာ်စ့ၢ်ကီးဝဲလၢ စီၤမီၣ်ကီ ကၠီအံၤတၢ်မၤသံအီၤလံခီဖျိလၢအဝဲဟါမၢ်အိၣ်တလါ ဘျဲၣ်လံန့ၣ်လီၤ. စီၤအဆ---လၢအမ့ၢ်ဝဲစီၤမီၣ်ကီကၠီအတခွါန့ၣ်တီၣ်ဖျါ ထီၣ်ဝဲတၢ်ကဲထီၣ်သးအဝဲအံၤအဂ့ၢ်တၢ်ကျိၤဒ်အဒိးန့ၢ်ဘၣ် ဝဲလၢသဝီဖိအဂုၤအဂၤလၢအအိၣ်ဖဲ အဟံၣ်ကပိာ်ကပၤသ့ၣ်တဖၣ် အအိၣ်န့ၣ်လီၤ. သဝီဖိတနီၤနာ်ဝဲလၢစီၤမီၣ်ကီကၠီအံၤတၢ်မၤ သံအီၤတပူၤဃီဒီးစီၤမံၤထူလၢကၠိပ့ၣ်စ့းတၢ်သွၣ်ခိၣ်ဖဲလါအီကူး ၁၇ သီအနံၤန့ၣ်လီၤ.

 

ခီဖျိလၢတၢ်ကဲထီၣ်သးသ့ၣ်တဖၣ်အံၤအဃိသဝီဖိသ့ၣ်တဖၣ်ပျံၤတၢ်ဖုးတၢ်ဒိၣ်ထီၣ်ဝဲန့ၣ်လီၤ. သဝီဖိဖဲလီၢ်ကဝီၤဖဲန့ၣ်သ့ၣ်တဖၣ် ပျံၤဝဲလၢကအိၣ်လၢသဝီပူၤအဃိအဝဲသ့ၣ်လဲၤဃ့ၢ်အိၣ်ကဒုဝဲလၢတၢ်လီၢ်လၢအဂၤန့ၣ်လီၤ. စးထီၣ်လၢတၢ်ဒုးကဲထီၣ်အသးဒီး တၢ်ထီၣ်ဒုးဝဲပယီၤသုးကလၢၤသ့ၣ်တဖၣ်လၢမူကီၢ်ဆၣ်အပူၤဖဲလါယူၤလံထီၣ် ၂၀၂၂ နံၣ်လံၤလံၤန့ၣ် သဝီဖိသ့ၣ်တဖၣ်ဘၣ်ဃ့ၢ် မှံဟးဖျိးသုးလီၢ်သုးကျဲတလီၢ်လီၢ်န့ၣ်လီၤ. သဝီဖိအါတက့ၢ်န့ၣ်လဲၤဃ့ၢ်အိၣ်ဝဲလၢအတၢ်သူၣ်တၢ်ဖျးအလီၢ်လၢသဝီချၢ ဒီးသဝီဖိ တနီၤန့ၣ်လဲၤဃ့ၢ်အိၣ်ဝဲဆူလ---အ၀့ၢ်ဒီးမ---အဝ့ၢ်လၢအအိၣ်လၢတီအူကီၢ်ရ့ၣ်အပူၤန့ၣ်လီၤ. သဝီဖိတနီၤတခီ ဟဲဃ့ၢ်ထီၣ်ဝဲ ဆူ ဘၣ်ကီဘၣ်ခဲဒဲကဝီၤလၢအအိၣ်လၢယိၤကီၢ်ဒီးကီၢ်ပယီၤအကီၢ်ဆၢန့ၣ်လီၤ.

 

လီၢ်ကဝီၤသဝီဖိတနီၤစံးဝဲလၢအဝဲသ့ၣ်ပျံၤဝဲလၢကထံၣ်ဒီး SAC အသုးသ့ၣ်တဖၣ်ခီဖျိလၢ SAC အသုးသ့ၣ်တဖၣ်န့ၣ်ဖီၣ်ဒီး မၤသံနါစိၤဝဲသဝီဖိန့ၣ်လီၤ. သဝီဖိသ့ၣ်တဖၣ်ဃ့ၢ်ထီၣ် လၢအသဝီပူၤ၀ံၤအလီၢ်ခံ SAC အသုးသ့ၣ်တဖၣ်လဲၤနုာ်လီၤလၢအသဝီပူၤ ဒီးဟံဝဲသဝီဖိသ့ၣ်တဖၣ်အတၢ်ဖိတၢ်လံၤပၣ်ဃုာ်ဝဲဒီး တၢ်အီၣ်တၢ်အီသ့ၣ်တဖၣ်န့ၣ်လီၤ. အခဲအံၤန့ၣ်ဒူဖိသဝီဖိသ့ၣ်တဖၣ် ဘၣ် ယိာ်ဘၣ်ဘှီဝဲဒၣ်လၢကဘၣ်ကွၢ်ဆၢၣ်မဲာ်ဝဲဒီးတၢ်အီၣ် တၢ်အီအတၢ်ဃံးတၢ်စ့ၤလၢနံၣ်လၢကဟဲအပူၤမ့ၢ်လၢ အဝဲသ့ၣ်ဘၣ်ဃ့ၢ်မှံ ဟးဖျိးဒီးဖံးအီၣ်မၤအီၣ်တၢ်တသ့လၢၤဘၣ်အဃိန့ၣ်လီၤ. (ဖဲလါစဲးပထဲဘၢၣ် ၂၀၂၂ နံၣ်အပူၤန့ၣ် သဝီဖိသ့ၣ်တဖၣ် ဘၣ်ဃ့ၢ်မှံ ဟးဖျိးဒံးဝဲန့ၣ်လီၤ.)

 

(၄) တပတီၢ်- တၢ်ဃ့န့ၢ်အခွဲး

မ့ၢ်ၦၤလၢအတူၢ်ဘၣ်တၢ်ဖၣ် ဟ့ၣ်ၦၤတၢ်ခွဲးတၢ်ယာ်လၢပကသူတၢ်ဂ့ၢ်တၢ်ကျိၤတခါအံၤဧါ, ဟ့ၣ်ၦၤတၢ်ခွဲးတၢ်ယာ်လၢ ပက သူတၢ်ဂ့ၢ်အံၤလၢကျဲဒ်လဲၣ်.

ပှၤတူၢ်ဘၣ်တၢ်အဟံၣ်ဖိဃီဖိဒီးပှၤလၢတၢ်ထံၣ်လိာ်သံကွၢ်သံဒိးအီၤအဂၤသ့ၣ်တဖၣ်ဟ့ၣ်ဝဲ KHRG အခွဲးလၢကသူဝဲတၢ်ဂ့ၢ်တၢ် ကျိၤလၢအဝဲသ့ၣ်ဟ့ၣ်ထီၣ်ဝဲသ့ၣ်တဖၣ်န့ၣ်လီၤ. ဘၣ်ဆၣ်သနာ်က့န့ၣ် လၢအဝဲသ့ၣ်တၢ်ဘံၣ်တၢ်ဘၢအဂီၢ် အဝဲသ့ၣ်အဲၣ်ဒိးဝဲလၢ တၢ်ကမၤလီၤဘၢအဝဲသ့ၣ်အမံၤန့ၣ်လီၤ.

Wed, 01 Feb 2023

Footnotes: 

[1] တၢ်ဂ့ၢ်တၢ်ကျိၤလၢ လံာ်ပာ်ဖျါတဘ့ၣ်အံၤအပူၤန့ၣ် တၢ်ဒိးန့ၢ်ဘၣ်အီၤဖဲ လါစဲးပထဲဘၢၣ် ၂၀၂၂ နံၣ် အပူၤန့ၣ်လီၤ. ဘၣ်တၢ်ဆှၢဟ့ၣ်ထီၣ်အီၤလၢလီၢ်က ဝီၤၦၤမၤသကိးတၢ်တဂၤ ဖဲ ချၢၣ်လွံၢ်ထူၣ်ကီၢ်ရ့ၣ် အပူၤ လၢအဘၣ်တၢ်သိၣ်လိအီၤ လၢကညီဂ့ၢ်ဝီခွဲးယာ်ကရူၢ် KHRG လၢကမၤနီၣ်မၤဃါတၢ်မၤဘၣ် ဒိၦၤဟီၣ်ခိၣ်ဖိခွဲးယာ်အတၢ်အိၣ်သးတဖၣ်ဖဲလီၢ်ကဝီၤပူၤန့ၣ်လီၤ. ၦၤတူၢ်ဘၣ်တၢ်တဖၣ်အမံၤ, တၢ်ဂီၤဒီးအိၣ်ဆိးလီၢ်ကျဲ လီၤတံၢ်လီၤဆဲးတဖၣ်န့ၣ်တၢ်မၤ လီၤဘၢအီၤလၢအဝဲနီၢ်ကစၢ်တၢ်ဘံၣ်တၢ်ဘၢအဂီၢ်န့ၣ်လီၤ. တၢ်ဂ့ၢ်တၢ်ကျိၤလၢ တၢ်ကွဲးၡဲပၠးအါထီၣ်အီၤ ဖဲပနိကဝီၤအပူၤန့ၣ် မ့ၢ်ဝဲဒၣ် KHRG အတၢ်ကွဲး ၡဲထီၣ်တၢ်ဂ့ၢ်တၢ်ကျိၤန့ၣ်လီၤ.

Print:Print:

ဆက်စပ်ဖတ်ရှုရန်

ခလယ်လွီထူခရိုင် မှုခင်းဖော်ပြသည့်မှတ်တမ်းလွှာ- မူးမြို့နယ်အတွင်း SAC စစ်သားများမှ အရပ်သားများအား အဓမ္မဖမ်းဆီး (၂၀၂၁ခုနှစ်၊ သြဂုတ်လ)
ခလယ်လွီထူးခရိုင် မှုခင်းဖော်ပြသည့်မှတ်တမ်းလွှာ - မူးမြို့နယ်တွင် SAC စစ်သားများမှ ရွာသားတစ်ဦးကို မတရားသတ်ဖြတ်ခဲ့ခြင်း (၂၀၂၂ခုနှစ်၊ စက်တင်ဘာလ)
ခလယ်လွီထူးခရိုင် မှုခင်းဖော်ပြသည့်မှတ်တမ်းလွှာ - ရွာသားများသည် SAC စစ်သားများ၏အဖမ်းဆီးခံရပြီးနောက် ပျောက်ဆုံးသွားခြင်း (၂၀၂၂ခုနှစ်၊ သြဂုတ်လ)