တၢ်ကဲထီၣ်သးအကလုာ်

တၢ်မၤသံနါစိၤတၢ်

တၢ်ကဲထီၣ်သးမုၢ်နံၤမုၢ်သီ

လါအ့ဖြ့ၣ် ၈သီ, ၂၀၂၂နံၣ်

တၢ်ကဲထီၣ်သးတၢ်လီၢ်တၢ်ကျဲ (သဝီ, ကရူၢ်, ကီၢ်ဆၣ်, ကီၢ်ရ့ၣ်)

ကွံဆၢဖီသ၀ီ, မီခံကရူၢ်, ကီးတရံးကီၢ်ဆၣ်, ဒူပျာ်ယာ်ကီၢ်ရ့ၣ်

ၦၤလၢအတူၢ်ဘၣ်တၢ်တဂၤအဂ့ၢ်အကျိၤ

မံၤ

စီၤဘီခီၣ်

စီၤတၤသူ

သးနံၣ်

၅၀

၃၂

မုၣ်/ ခွါ

ခွါ

ခွါ

ကလုာ်

ကညီ

ကညီ

ဟံၣ်ဖိဃီဖိ အိၣ် / တအိၣ်   

အိၣ်

အိၣ်

တၢ်ဖံးတၢ်မၤ

တသ့ၣ်ညါ

တသ့ၣ်ညါ

တၢ်ဘူၣ်တၢ်ဘါ

တသ့ၣ်ညါ (ဖျါလီၤဂာ်လၢ ဘူးဒး)

တသ့ၣ်ညါ (ဖျါလီၤဂာ်လၢ ဘူးဒး)

တၢ်ဟံမူဒါ/ လီၢ်လၤ

သ၀ီဖိ

သ၀ီဖိ

အိၣ်ဆိးဒူသဝီ

မီဖိကျိသ၀ီ, မီခံကရူၢ်

မီဖိကျိသ၀ီ, မီခံကရူၢ်

ၦၤလၢအမၤအၢပယွဲတၢ်တဂၤအဂ့ၢ်အကျိၤ

မံၤ                   

လီၢ်လၤ

သုးကျိၤ§ သုးရ့ၣ် § သုးတြိၤ

အိၣ်သူၣ်လီၤသးလီၢ်ကျဲ §သုးကလၢၤ

အခိၣ်အမံၤဒီးလီၢ်လၤ

တသ့ၣ်ညါ

တသ့ၣ်ညါ

SAC ခီၣ်ချ့သုးရ့ၣ်နီၣ်ဂံၢ် (ခမရ)-၅၆၀, ၅၆၁, ၅၈၅, ၅၅၉

တသ့ၣ်ညါ

သုးခိၣ် မၠ့ၣ်ကၠီၤ

၁. ၡဲပၠးၦၤနဟံးန့ၢ်တၢ်ကဲထီၣ်သးတခါအံၤ တဆီဘၣ်တဆီတက့ၢ်.

KHRG ပှၤမၤတၢ်ဖိ မၤတၢ်ထံၣ်လိာ်သံကွၢ်ဒီး ပှၤထံၣ်ထွဲတၢ်တဂၤ လၢလီတဲစိတၢ်ဆဲးကျိးအပူၤန့ၣ်လီၤ.

၂. ကွဲးနီၣ်ၦၤလၢဟ့ၣ်တၢ်ဂ့ၢ်အံၤတဂၤစုာ်စုာ်သ့ၣ်ညါ တၢ်ဂ့ၢ်အံၤအမ့ၢ်အတီလၢကျဲဒ်လဲၣ်.

ပှၤလၢတၢ်ထံၣ်လိာ်သံကွၢ်အီၤတဂၤအံၤ ထံၣ်ထွဲတၢ်ကဲထီၣ်သးလၢအနီၢ်ကစၢ်ဒီး သ့ၣ်ညါလိာ်အသးဒီး ပှၤတူၢ်ဘၣ်တၢ်စ့ၢ်ကီး န့ၣ်လီၤ.

ပာ်ဖျါတၢ်ကဲထီၣ်သးအဂ့ၢ်အကျိၤလၢလၢၦဲၤၦဲၤတက့ၢ်.

ဖဲလါအ့ဖြ့ၣ် ၈သီ, ၂၀၂၂နံၣ်န့ၣ်, သ၀ီဖိခံဂၤလၢ မီဖိကျိသ၀ီ, မီခံကရူၢ်, ဘၣ်တၢ်ခးသံအီၤလၢ ထံကီၢ်တၢ်ပၢတၢ်ပြးကီၣ်ကး ကရၢ (SAC) အသုး ဖဲကွံဆၢဖီသ၀ီ, မီခံကရူၢ်, ကီးတရံးကီၢ်ဆၣ်န့ၣ်လီၤ. သ၀ီဖိတဂၤသံ၀ဲတဘျီဃီဒီး မ့မ့ၢ်အဂၤတဂၤတခီ သံ၀ဲခီဖျိတၢ်တဟ့ၣ်အခွဲးလၢကဒိးန့ၢ်တၢ်ကူစါတဘျီဃီဘၣ်အဃိလီၤ. လီၢ်က၀ီၤသ၀ီဖိတဖၣ် တသ့ၣ်ညါ၀ဲ SAC အသုးရ့ၣ် သုးထံးဘၣ်မ့ၢ်လၢ သုးတဖၣ်ဟဲဆီတလဲအသးဖဲတယံာ်ဒံးဘၣ်အဃိန့ၣ်လီၤ. ကညီတၢ်ကစီၣ်သန့ (KIC) ပာ်ဖျါ၀ဲလၢ, သုးဖိ တဖၣ်အံၤ အိၣ်၀ဲလၢ SAC ခီၣ်ချ့သုးရ့ၣ်နီၣ်ဂံၢ် (ခမရ)-၅၆၀, ၅၆၁, ၅၈၅, ၅၅၉ လၢအဘၣ်တၢ်တီခိၣ်ရိၤမဲအီၤလၢ သုးခိၣ် မၠ့ၣ်ကၠီၤအဖီလာ်န့ၣ်လီၤ.[2]

(ဖဲလါမးရှး ၂၁သီ, ၂၀၂၂နံၣ်န့ၣ်, ကညီဒီကလုာ်တၢ်ထူၣ်ဖျဲးသုးမုၢ်ဒိၣ် (KNLA) ထီၣ်ဒုး၀ဲ SAC သုးကလၢၤဖဲ မီခံသ၀ီန့ၣ်လီၤ) သ၀ီဖိလၢ မီဖိကျိဒီး မီခံတဖၣ်ဃ့ၢ်ထီၣ်ပာ်စၢၤတချုးဒံးလၢ တၢ်လဲၤထီၣ်ဒုး SAC သုးကလၢၤဘၣ် (ဖဲလါမးရှး ၂၁သီ, ၂၀၂၂နံၣ်) န့ၣ်လီၤ. (SAC သုးက့ၤထီၣ်ဒုးန့ၢ်က့ၤသုးကလၢၤအံၤ ဖဲလါအ့ဖြ့ၣ် ၆သီန့ၣ်လီၤ.) တချုးလၢလါအ့ဖြ့ၣ် ၆သီဘၣ်န့ၣ် သ၀ီဖိတဖၣ်နၢ်ဟူဆိ၀ဲလၢ (KNLA သုး ဒုးသ့ၣ်ညါအ၀ဲသ့ၣ်) SAC သုးကက့ၤထီၣ်ဒုးကဒါက့ၤအသုးကလၢၤ, ဒီးအ၀ဲသ့ၣ် ထံၣ်စ့ၢ်ကီး၀ဲ SAC သုးဆှၢအါထီၣ်အသုးဒီး ဟူးဂဲၤအါထီၣ်လၢလီၢ်က၀ီၤသ၀ီပူၤန့ၣ်လီၤ. (လၢတၢ်န့ၣ်အဃိ, သ၀ီဖိလၢအ ဃ့ၢ်အိၣ်ကမှံတ့ၢ်လံတဖၣ် တဟဲက့ၤနုာ်ဆူသ၀ီပူၤဘၣ်. သ၀ီဖိစှၤဂၤလၢအအိၣ်တ့ၢ်ဒံးဖဲသ၀ီပူၤတဖၣ်စ့ၢ်ကီး ဃ့ၢ်ထီၣ်ကွံာ်၀ဲ ဆူလီၢ်က၀ီၤအဂၤန့ၣ်လီၤ.) သ၀ီဖိလၢမီဖိကျိတနီၤ လဲၤဃ့ၢ်အိၣ်ကဒုဆိ၀ဲဖဲ ကွံဆၢဖီသ၀ီအဃၢၤ (မီခံကရူၢ်) န့ၣ်လီၤ.

မီဖိကျိသ၀ီဖိခံဂၤ (ဘီခီၣ်, သးနံၣ်အိၣ် ၅၀ဃၣ်ဃၣ်, ဒီးအဖိဒိၣ်ခွါ စီၤတၤသူ, သးနံၣ် ၃၂နံၣ်ဃၣ်ဃၣ်) မ့ၢ်စ့ၢ်ကီးသ၀ီဖိလၢ အဃ့ၢ်မှံဟးဖျိးတဖၣ် ဒီးအ၀ဲသ့ၣ်အိၣ်ကဒု၀ဲဖဲ ကွံဆၢဖီသ၀ီ တတီၤဖိလံန့ၣ်လီၤ. ဖဲတၢ်ကဲထီၣ်သးတနံၤန့ၣ်, အ၀ဲသ့ၣ်က့ၤ၀ဲ ဆူမီဖိကျိသ၀ီဒီး က့ၤဒိး၀ဲသိလ့ၣ်လိၣ်ထဲးတခိၣ် ဒ်သိးကက့ၤဟံးန့ၢ် ဃီၤသၣ်ဒီးတကွံသၣ်တဖၣ်လၢ ကတီၣ်ထီၣ်တၢ်လုၢ် တၢ်ပာ် (ဒ်ပှၤဘူးဒးဖိအလုၢ်အလၢ်အသိး) န့ၣ်လီၤ. သ၀ီဖိပိာ်မုၣ်တနီၤ ပၣ်ဃုာ်ဒီး အ၀ဲသ့ၣ်အမါ, အဖိတဖၣ်က့ၤဃုာစ့ၢ်ကီး ဒီးအ၀ဲသ့ၣ်ဖဲန့ၣ်လီၤ. ဖဲအ၀ဲသ့ၣ်က့ၤဟံးန့ၢ်တၢ်သူတၢ်သၣ်တဖၣ်၀ံၤန့ၣ်, က့ၤကဒါက့ၤ၀ဲဆူကွံဆၢဖီသ၀ီန့ၣ်လီၤ. ဖဲန့ၣ်အခါ, SAC သုးဖိ ၃၀ ဂၤဃၣ်ဃၣ်ဟဲတုၤဆိ၀ဲဖဲကွံဆၢဖီသ၀ီပူၤ လၢအ၀ဲသ့ၣ်အမဲာ်ညါ (ဒီးအိၣ်၀ဲဖဲသ၀ီခိၣ်ထိး, ဖဲအကွၢ်စိ၀ဲပှၤနုာ် လီၤဟးထီၣ်လၢသ၀ီပူၤဖျါ၀ဲအလီၢ်) န့ၣ်လီၤ. ဖဲသ၀ီဖိတဖၣ်အံၤ ဟဲက့ၤတုၤဖဲသ၀ီအခိၣ်ထိး ဖဲ ဂီၤခီ ၁၀နၣ်ရံၣ်ဃၣ်ဃၣ်န့ၣ် KNLA သုးဖိခံဂၤဟဲဒိးဒီးသိလ့ၣ်ယီၢ်ဖဲကျဲအံၤဒီးလဲၤတလၢကွံာ်အ၀ဲသ့ၣ်န့ၣ်လီၤ. SAC သုးဖိတဖၣ်ထံၣ်စိ၀ဲ (သိလ့ၣ်ကဟၣ် တဖၣ်လၢကျဲပူၤ) တဘျီဃီ ခးစိတံၢ်၀ဲကျိအဃိ ဘၣ်၀ဲကမျၢၢ်ခံဂၤန့ၣ်လီၤ. (ညီနုၢ် SAC သုးဖိမ့ခး၀ဲ KNLA သုးဖိဘၣ်ဆၣ်, ပှၤဘၣ်ဒိအပူၤလီၢ်တဖၣ် ပာ်ဖျါ၀ဲလၢ SAC သုးပညိၣ်ခး၀ဲကမျၢၢ်တဖၣ် တီတီန့ၣ်လီၤ.)

ပှၤတူၢ်ဘၣ်တၢ်အကျါတဂၤလၢအမ့ၢ် စီၤတၤသူန့ၣ် နီ၀ဲသိလ့ၣ်လိၣ်ထဲးဒီး မ့မ့ၢ်အမါဒီးသ၀ီဖိအဂၤ (ဃုာ်ဒီး စီၤဘီခီၣ်)န့ၣ် ဒိး၀ဲလၢလိၣ်ထဲးဒၢအလီၢ်ခံ (ဖဲပှၤတီၣ်တၢ်ဖိတၢ်လံၤတဖၣ်အလီၢ်) န့ၣ်လီၤ. သ၀ီဖိပိာ်ခွါခံဂၤလၢ လိၣ်ထဲးအပူၤ, စီၤတၤသူဒီး စီၤဘီခီၣ် ဘၣ်၀ဲဒီးကျိ ချံလၢ SAC သုးခး၀ဲန့ၣ်လီၤ. စီၤတၤသူသံ၀ဲတဘျီဃီဖဲအသးနါပှၢ်ဘၣ်ဒီးကျိချံ ခံထံၣ်န့ၣ်လီၤ. အ၀ဲလီၤတဲာ်ကွံာ်လၢ လိၣ်ထဲးအလိၤ ဖဲအနီ၀ဲအခါန့ၣ်လီၤ. ဖဲန့ၣ်၀ံၤ လိၣ်ထဲးတခိၣ်အံၤ လဲၤတိသဂၢၢ်ဘၣ်ဒီးသ့ၣ်ထူၣ်အဃိ အိၣ်ပတုာ်ကွံာ်၀ဲန့ၣ်လီၤ. အမါလဲၤစံၣ်လီၤလီၤ လိၣ်ထဲးပူၤဒီးကိးအီၤဘၣ်ဆၣ် အသးသမူတအိၣ်လၢၤဘၣ်. ပှၤတူၢ်ဘၣ်တၢ် အဂၤတဂၤ လၢအမ့ၢ် အဖါတံၢ် (စီၤဘီခီၣ်) န့ၣ်, ဘၣ်၀ဲဒီးကျိချံတထံၣ်ဖဲအဟၢဖၢဘၣ်ဆၣ် တသံတဘျီဃီဘၣ်. ကွံဆၢဖီ သ၀ီဖိတဖၣ်ထံၣ်၀ဲပှဲၤမဲာ်ပှဲၤနါ ဖဲ SAC သုးဖိတဖၣ်လဲၤတွံၢ်န့ၢ်၀ဲသ၀ီဖိခံဂၤအံၤအနီၢ်ခိဖဲတၢ်ကဲထီၣ်သးအလီၢ်န့ၣ် (အဃိ သ၀ီဖိတဖၣ်လဲၤဟံးန့ၢ်၀ဲတသ့ဘၣ်). ဖဲန့ၣ် စီၤဘီခီၣ်အသးသမူအိၣ်ဒံးန့ၣ်လီၤ.

စီၤဟ---(သ၀ီဖိလၢအထံၣ်ထွဲတၢ်ကဲထီၣ်သးတဂၤ) ဃ့၀ဲလၢ SAC သုးဖိကဟ့ၣ်လီၤ သ၀ီဖိလၢအဘၣ်ဒိတဂၤ-စီၤဘီခီၣ် အနီၢ်ခိ ဆူသ၀ီဖိအအိၣ် မ့ၢ်လၢအအိၣ်မူဒံးအဃိန့ၣ်လီၤ. စီၤဟ--- မုၢ်လၢ်၀ဲလၢ ကဆှၢ၀ဲ စီၤဘီခီၣ်ဆူတၢ်ဆါဟံၣ်လၢ ကီၢ် ကၠီၣ်တဲၣ်တကပၤ ဒ်သိးကဂုာ်န့ၢ်အသးသမူအဂီၢ်န့ၣ်လီၤ. ဒ်လဲၣ်ဂ့ၤ, SAC သုးတဟ့ၣ်အီၤတၢ်ပျဲဘၣ်. သ၀ီဖိဖဲန့ၣ်တဖၣ် တဲ အါတၢ်တဘူၣ်လၢၤနီတမံၤဘၣ် မ့ၢ်လၢအပျံၤတၢ်ဖဲအထံၣ် SAC သုးအတၢ်မၤသံဆှုၣ်မဲာ်ကဲၤမဲာ်အံၤန့ၣ်လီၤ. ကအိၣ်တတီၤဖိ (ဘၣ်ဒိဒီးကျိ၀ံၤတခီနၣ်ရံၣ်ဃၣ်ဃၣ်) ဒီး စီၤဘီခီၣ် အသးသမူဟးထီၣ်ကွံာ်၀ဲစ့ၢ်ကီးန့ၣ်လီၤ. သ၀ီဖိဖၣ် တဲဘၣ် SAC သုးလၢ ပှၤသံခံဂၤအံၤမ့ၢ်ဒၣ်သ၀ီဖိနီၢ်နီၢ်အဃိ ဃ့၀ဲသ၀ီဖိခံဂၤအံၤအစိၣ်ဒ်သိးကခူၣ်လီၤကွံာ်၀ဲန့ၣ်လီၤ. လၢခံကတၢၢ် SAC သုးဖိဟ့ၣ် လီၤ ပှၤခံဂၤအံၤအစိၣ်ဆူအဟံၣ်ဖိဃီဖိအိၣ်လီၤတဲာ်တဖၣ်အအိၣ်ဒီး SAC သုးဖိတဖၣ်ဟးထီၣ်ကွံာ်လၢသ၀ီပူၤ၀ံၤ တၢ်ခူၣ် လီၤကွံာ်ပှၤသံခံဂၤအံၤဖဲအကစၢ်ဟံၣ်ဒၣ်၀ဲ (တနံၤဃီဖဲတၢ်ကဲထီၣ်သး) န့ၣ်လီၤ.

ပှၤတူၢ်ဘၣ်တၢ်ခံဂၤလၢာ်န့ၣ် အိၣ်ဒီးအဟံၣ်ဖိဃီဖိ ဒီးအ၀ဲသ့ၣ်ခံဂၤလၢာ်မ့ၢ် မီဖိကျိသ၀ီဖိန့ၣ်လီၤ. စီၤတၤသူပာ်လီၤတဲာ်ကွံာ်၀ဲ အမါ (လၢအအိၣ်ဒီးဟုးသးနွံလါ ဖဲတၢ်ကဲထီၣ်သးဆၢကတီၢ်) ဒီးအဖိမုၣ်ဖိ အသးနံၣ် ၇နံၣ်တဂၤန့ၣ်လီၤ. စီၤဘီခီၣ် ပာ်လီၤ တဲာ်ကွံာ်အမါဒီးအဖိမုၣ်သၢဂၤန့ၣ်လီၤ. စီၤဘီခီအဖိမုၣ်ဒိၣ်ကတၢၢ်တဂၤ အသးနံၣ်အိၣ်၀ဲ ၁၀နံၣ်န့ၣ်လီၤ. အဟံၣ်ဖိဃီဖိလၢ အအိၣ်လီၤတဲာ်တဖၣ်အံၤ ဘၣ်ဒိးသန့ၤထီၣ်အသးလၢအဘူးအတံၢ်တဖၣ် တၢ်ဆီၣ်ထွဲမၤစၢၤန့ၣ်လီၤ. (အ၀ဲသ့ၣ်တဒိးန့ၢ် စ့အီၣ်လိးတၢ်မၤစၢၤနီတမံၤဘၣ်).

သ၀ီဖိလၢအထံၣ်ထွဲတၢ်ကဲထီၣ်သးတဖၣ်တဲ၀ဲလၢ တၢ်ကဲထီၣ်သး၀ံၤအလီၢ်ခံ တၢ်ခးလိာ်သးကဲထီၣ်၀ဲလၢ SAC သုးဒီး KNLA သုးအဘၢၣ်စၢၤ တစိၢ်ဖိ ဖဲကွံဆၢဖီသ၀ီပူၤ (လၢမီဖိကျိသ၀ီဖိတဖၣ်လဲၤဃ့ၢ်အိၣ်ကဒု၀ဲ ခီဖျိတၢ်ဒုးကဲထီၣ်ဒီး သုးတၢ် ဟူးတၢ်ဂဲၤအိၣ်လၢအသ၀ီပူၤအဃိ) န့ၣ်လီၤ. တၢ်ခးလိာ်သးအံၤ၀ံၤ, SAC သုးဖိတဖၣ်ကိးပတုာ်၀ဲသ၀ီဖိလၢအလ့ၢ်လိၤဖဲကျဲ အံၤဒီးပာ်၀ဲလၢအ၀ဲသ့ၣ်သုးဖိအကျါန့ၣ်လီၤ. (တၢ်သူပှၤသ၀ီဖိတဖၣ်ဒ် ပှၤကညီတၢ်ဒီသဒၢစုက၀ဲၤအသိး). ဖဲတၢ်ခးလိာ်သး အကတီၢ်, SAC သုးခး၀ဲကျိဖးဒိၣ် (တသ့ၣ်ညါ အကလုာ်လီၤတံၢ်လီၤဆဲး) ဆူကွံဆၢဖီသ၀ီပူၤန့ၣ်လီၤ.

စးထီၣ်လၢလါမးရှး ၂၀၂၂နံၣ်န့ၣ်, တၢ်ဒုးကဲထီၣ်ဖဲမီခံသ၀ီဟီၣ်က၀ီၤအံၤတလီၢ်လီၢ်ဘၣ်ဆၣ်, သ၀ီဖိပိာ်ခွါတနီၤအိၣ်ဒံး၀ဲဖဲ သ၀ီပူၤ, ဖဲအ၀ဲသ့ၣ်အဟံၣ်ဖိဃီဖိတဖၣ် လဲၤဃ့ၢ်အိၣ်၀ဲဆူသ၀ီအဂၤလံန့ၣ်လီၤ. တၢ်မၤသံသ၀ီဖိခံဂၤအံၤ၀ံၤအလီၢ်ခံ, သ၀ီဖိ လၢ မီခံကရူၢ်ခဲလၢာ်ဃၣ်ဃၣ် လဲၤဃ့ၢ်၀ဲဆူကီၢ်ကၠီၣ်တဲၣ်အကီၢ်ဆၢ မ့ၢ်လၢ တၢ်ဘံၣ်တၢ်ဘၢတၢ်လီၤဘၣ်ယိၣ် အိၣ်အါထီၣ် အဃိန့ၣ်လီၤ. (စးထီၣ်လၢ တၢ်ဟံးန့ၢ်ဆူၣ်ထံကီၢ်တၢ်စိတၢ်ကမီၤ၀ံၤအလီၢ်ခံ တၢ်ခးသံသ၀ီဖိလၢ သ၀ီတဖျၢၣ်အံၤအပူၤ ကဲထီၣ်သး အဆိကတၢၢ်တဘျီလီၤ). သ၀ီဖိလၢ မီဖိကျိတနီၤ လဲၤဃ့ၢ်အိၣ်ဆူ က---သ၀ီ (ကညီကၠီၣ်တဲၣ်သ၀ီတဖျၢၣ်) လၢကီၢ်ကၠီၣ်တဲၣ်အပူၤန့ၣ်လီၤ.

မီဖိကျိသ၀ီပူၤ ပှၤဟံၣ်အိၣ်၀ဲ ၆၇ဖျၢၣ်ဃၣ်ဃၣ် ဒီးကွံဆၢဖီသ၀ီအပူၤ ပှၤဟံၣ်အိၣ်၀ဲ အဖျၢၣ်တဆံဘျဲၣ်န့ၣ်လီၤ. (မီခံသ၀ီပူၤ ဟံၣ်ခိၣ်အိၣ်ပှဲၤဖျၢၣ်န့ၣ် တၢ်မၤလီၤတံၢ်အီၤတန့ၢ်ဘၣ်). ခဲအံၤသ၀ီသၢဖျၢၣ်အံၤအပူၤ ဟံၣ်ဒူၣ်ကိးဖျၢၣ်ဒဲးဃၣ်ဃၣ် ဃ့ၢ်ထီၣ် ကွံာ်လၢ သ၀ီပူၤလံန့ၣ်လီၤ. သ၀ီဖိတဖၣ် ဘၣ်ပာ်တ့ၢ်၀ဲအဆၣ်ဖိကီၢ်ဖိ, ဘုဟုဒီး ဟံၣ်ဃီတၢ်ပီးတၢ်လီတဖၣ် ဖဲအဃ့ၢ်မှံဟး ဖျိးဆၢကတီၢ်န့ၣ်လီၤ. သ၀ီဖိလၢမီခံကရူၢ်တဖၣ် ဘၣ်ဃ့ၢ်မှံဟးဖျိးတ့ၢ်လံခံလါဃၣ်ဃၣ်လံန့ၣ်လီၤ. တဘျီဘျီ, သ၀ီဖိလၢ အဃ့ၢ်မှံဟးဖျိးတဖၣ် ဟဲက့ၤနုာ်ခူသူၣ်ဆူသ၀ီပူၤ ဒ်သိးကဟံန့ၢ်အီၣ် အဟုသးဒီးလဲၤစိာ်၀ဲဆူ တၢ်ဃ့ၢ်အိၣ်ကမှံအလီၢ်န့ၣ်လီၤ. ဒ်လဲၣ်ဂ့ၤ, တၢ်အံၤမ့ၢ်တၢ်လီၤဘၣ်ယိၣ်ဒိၣ်မး မ့ၢ်လၢ SAC သုးတဖၣ် ညီနုၢ်ဟးဆှၣ်တၢ်လၢ သ၀ီခိၣ်ဃၢၤ ဒီးတၢ်ဒုးကဲထီၣ်၀ဲ သ့ကိးဆၢကတီၢ်ဒဲးလၢ SAC သုးဒီးလီၢ်က၀ီၤကညီသုးတဖၣ် (KNLA သုး, ကညီဘူးဒးတၢ်လဲၤထီၣ်လဲၤထီသုးမုၢ်ဒိၣ် (DKBA) ဒီး ကညီဒီကလုာ်ဂၢၤသးသုးမုၢ်ဒိၣ် (KNDO) တဖၣ်အဘၢၣ်စၢၤန့ၣ်လီၤ.

မ့ၢ်ၦၤလၢအတူၢ်ဘၣ်တၢ်ဖၣ် ဟ့ၣ်ၦၤတၢ်ခွဲးတၢ်ယာ်လၢပကသူတၢ်ဂ့ၢ်တၢ်ကျိၤတခါအံၤဧါ, ဟ့ၣ်ၦၤတၢ်ခွဲးတၢ်ယာ်လၢ ပက သူတၢ်ဂ့ၢ်အံၤလၢကျဲဒ်လဲၣ်.

ပှၤလၢတၢ်ထံၣ်လိာ်သံကွၢ်အီၤတဂၤအံၤ ဟ့ၣ်အခွဲးလၢပကသူတၢ်ဂ့ၢ်တၢ်ကျိၤအံၤန့ၣ်လီၤ.