English
ကညီကျိာ်
မြန်မာတၢ်ပာ်ဖျါအဖုၣ်တဘ့ၣ်အံၤပာ်ဖျါဝဲတၢ်ကဲထီၣ်သးသ့ၣ်တဖၣ်ဖဲ ဒီၣ်ဖးခိၣ်ကီၢ်ဆၣ်, တီအူကီၢ်ရ့ၣ်ဖဲလါမးၡး ၂ဝ၂၂ နံၣ်န့ၣ်လီၤ. ဖဲလါမးၡးထီၣ်သီအဆၢကတီၢ်န့ၣ်, တၢ်ဒုးစဲးပြဲးသ့ၣ်တဖၣ်ကဲထီၣ်ဝဲလၢ ကညီဒီကလုာ်တၢ်ထူၣ်ဖျဲးသုးမုၢ်ဒိၣ် (KNLA) ဒီး ထံကီၢ်တၢ်ပၢတၢ်ပြးကီၣ်ကးကရၢ (SAC) အဘၢၣ်စၢၤန့ၣ်လီၤ. လၢတၢ်မၤဆၢက့ၤတၢ်အဂီၢ်, SAC ခးလီၤဝဲမျိာ်သၣ်ဆူ ဒူဖိ သဝီဖိသ့ၣ်တဖၣ်အိၣ်ဆိးအလီၢ်န့ၣ်လီၤ. ခီဖျိလၢတၢ်ခးလီၤမျိာ်သၣ်အဃိ ဒူဖိသဝီဖိသ့ၣ်တဖၣ် ဘၣ်ဃ့ၢ်ထီၣ်ကွံာ်ဝဲလၢ အဒူ သဝီပူၤလၢတၢ်ပျံၤတၢ်ဖုးအပူၤန့ၣ်လီၤ. လၢန့ၣ်အမဲာ်ညါ SAC ဒွဲၣ်အူစ့ၢ်ကီးဝဲ COVID-19 တၢ်သမံသမိးအလီၢ်တခါဒီး ဒူဖိ သဝီဖိအတၢ်ဖိတၢ်လံၤသ့ၣ်တဖၣ်, ပာ်ဃုာ်ဝဲဒီးတၢ်ဆါတၢ်ၦ့ၤအကျးတဖျၢၣ်န့ၣ်လီၤ. SAC အသုးဖိခးသံစ့ၢ်ကီးဝဲသဝီဖိတဂၤ လၢ အဟံၣ်ပူၤ ဒီးလဲၤတွံၢ်ဝဲအစိၣ်ဆူတၢ်လီၢ်လၢတၢ်ဒုးကဲထီၣ်ဖဲအပူၤကွံာ်အလီၢ်န့ၣ်လီၤ.[1]
တၢ်ပာ်ဖျါအဖုၣ်တဘ့ၣ်အံၤပာ်ဖျါဝဲတၢ်ကဲထီၣ်သးသ့ၣ်တဖၣ်ဖဲ ဒီၣ်ဖးခိၣ်ကီၢ်ဆၣ်, တီအူကီၢ်ရ့ၣ်ဖဲလါမးၡး ၂ဝ၂၂ နံၣ်န့ၣ်လီၤ. ဖဲလါမးၡးထီၣ်သီအဆၢကတီၢ်န့ၣ်, တၢ်ဒုးစဲးပြဲးသ့ၣ်တဖၣ်ကဲထီၣ်ဝဲလၢ ကညီဒီကလုာ်တၢ်ထူၣ်ဖျဲးသုးမုၢ်ဒိၣ် (KNLA) ဒီး ထံကီၢ်တၢ်ပၢတၢ်ပြးကီၣ်ကးကရၢ (SAC) အဘၢၣ်စၢၤန့ၣ်လီၤ. လၢတၢ်မၤဆၢက့ၤတၢ်အဂီၢ်, SAC ခးလီၤဝဲမျိာ်သၣ်ဆူ ဒူဖိ သဝီဖိသ့ၣ်တဖၣ်အိၣ်ဆိးအလီၢ်န့ၣ်လီၤ. ခီဖျိလၢတၢ်ခးလီၤမျိာ်သၣ်အဃိ ဒူဖိသဝီဖိသ့ၣ်တဖၣ် ဘၣ်ဃ့ၢ်ထီၣ်ကွံာ်ဝဲလၢ အဒူ သဝီလၢတၢ်ပျံၤတၢ်ဖုးအပူၤန့ၣ်လီၤ. လၢန့ၣ်အမဲာ်ညါ SAC ဒွဲၣ်အူစ့ၢ်ကီးဝဲ COVID-19 တၢ်သမံသမိးအလီၢ်တခါ ဒီးဒူဖိ သဝီဖိအတၢ်ဖိတၢ်လံၤသ့ၣ်တဖၣ်, ပာ်ဃုာ်ဝဲဒီးတၢ်ဆါတၢ်ၦ့ၤအကျးတဖျၢၣ်န့ၣ်လီၤ. SAC အသုးဖိခးသံစ့ၢ်ကီးဝဲသဝီဖိ တဂၤလၢအဟံၣ်ပူၤ ဒီးလဲၤတွံၢ်ဝဲအစိၣ်ဆူ တၢ်လီၢ်လၢတၢ်ဒုးကဲထီၣ်ဖဲအပူၤကွံာ် အလီၢ်န့ၣ်လီၤ.
ဖဲလါမးရှး ၇သီ, ၂ဝ၂၂နံၣ် ဟါခီ ၃း၁၅ မံးနံးအဆၢကတီၢ်န့ၣ် တၢ်ဒုးကဲထီၣ်ဝဲဒၣ်လၢ KNLA အသုးရ့ၣ် (၅) လၢအအိၣ် ဝဲလၢသုးက့ (၂) ဒီး SAC ခီၣ်ချ့သုးရ့ၣ်နီၣ်ဂံၢ် (ခမရ-၆ဝ၄) အဘၢၣ်စၢၤန့ၣ်လီၤ. တၢ်ဒုးအံၤကဲထီၣ်ဝဲဘူးဒီး အ---သဝီ လၢ အအိၣ် လၢခၠ့ၣ်သူၤစီကရူၢ်, ဒီၣ်ဖးခိၣ်ကီၢ်ဆၣ်, တီအူကီၢ်ရ့ၣ်အပူၤန့ၣ်လီၤ. SAC သုး (ခမရ-၆ဝ၄) အံၤ အိၣ်ဆီလီၤဝဲအသး ဖဲဒ့ၣ်ဒါခိၣ်သုးကလၢၤလၢအအိၣ်ဝဲဘူးဒီး အ---သဝီန့ၣ်လီၤ. (SAC သုး (ခမရ-၆ဝ၄) အံၤအိၣ်ဆီလီၤစ့ၢ်ကီးအသးဖဲ ဒ---သဝီ, ကျ့ၤခိၣ်ကရူၢ်, ဒီၣ်ဖးခိၣ်ကီၢ်ဆၣ်န့ၣ်လီၤ.) SAC သုး (ခမရ-၆ဝ၄) အံၤ ဘၣ်တၢ်တီခိၣ်ရိၤမဲအီၤလၢသုးရ့ၣ်ခိၣ်ဟ့စါထိ (လၢအဘၣ်ဟံးမူဒါ ဖဲဒ့ဒါခိၣ်သုးကလၢၤန့ၣ်လီၤ.) တၢ်ဒုးကဲထီၣ်ဝံၤအလီၢ်ခံ SAC သုး (ခမရ-၆ဝ၄) လၢအအိၣ်ဖဲ ဖဲဒ့ဒါခိၣ် သုးကလၢၤန့ၣ် ခးလီၤဝဲမျိာ်ချံဆူသဝီလၢအအိၣ်ဘူးသ့ၣ်တဖၣ်န့ၣ်လီၤ. လီၢ်ကဝီၤသဝီဖိသ့ၣ်တဖၣ်ပျံၤဝဲဒိၣ်မးလၢမျိာ်ချံသ့ၣ် တဖၣ်ကလီၤဘၣ်အဝဲသ့ၣ်န့ၣ်လီၤ. တၢ်ခးလီၤတၢ်တဘျီညါအံၤသဝီဖိသ့ၣ်တဖၣ်တဘၣ်ဒိဝဲနီတဂၤဘၣ်. ဘၣ်ဆၣ်သနာ်က့ သဝီဖိအတၢ်သူၣ်အီၣ်ဖျးအီၣ်အလီၢ် (မာ်အံးသၣ်, တယီ, ဒီးကၣ်ဖံၣ်) သ့ၣ်တဖၣ်ဘၣ်ဒိဟးဂီၤဝဲန့ၣ်လီၤ.
ဖဲလါမးၡး ၈သီ, ၂ဝ၂၂နံၣ် ဂီၤခီအဆၢကတီၢ်န့ၣ် SAC (ေထာက္ပို႔ေရးတပ္အဖြဲ႕အမွတ္-၉၃ဝ) အသုးလၢအအိၣ်ဝဲဖဲ ကလံၤထံးသုးဝဲၤလီၢ်ခိၣ်သ့ၣ်တဖၣ်န့ၣ် က့ၤကဒါဝဲဆူဝ့ၢ်တီအူဖဲလၢအဝဲသ့ၣ်ဆှၢဝဲ အတၢ်အီၣ်ဒီးစုကဝဲၤတၢ်ပီးတၢ်လီဆူ တၢ်ဘှဲကျိဒီးသီးယ့ၣ်ခးသုးကလၢၤ လၢအအိၣ်ဖဲဒီၣ်ဖးခိၣ်ကီၢ်ဆၣ်အပူၤဝံၤအလီၢ်ခံန့ၣ်လီၤ. ဖဲလၢအဝဲသ့ၣ်က့ၤဝဲအဆၢက တီၢ်န့ၣ် အဝဲသ့ၣ်ဘၣ်သဂၢၢ်ဝဲဒီးလီၢ်ကဝီၤ KNLA အသုးသ့ၣ်တဖၣ် ဒီးတၢ်ဒုးကဲထီၣ်ဝဲဖဲဂီၤခီ ၇း၄၅ မံးနံးအခိၣ်အဃၢၤ န့ၣ်လီၤ. လၢတၢ်ဒုးတဘျီအံၤအပူၤန့ၣ် SAC အသုးသံဝဲအါန့ၢ်ဒံး (၅) ဂၤဒီးအသိၣ်လ့ၣ်ဘၣ်ဒိဟးဂီၤဝဲတခိၣ်န့ၣ်လီၤ. တၢ်ဒုး အံၤကဲထီၣ်ဝဲဖဲ ဘ---သဝီ ဒီးစ---သဝီအဘၢၣ်စၢၤ, သခွဲပျိၢ်ကရူၢ်, ဒီၣ်ဖးခိၣ်ကီၢ်ဆၣ်အပူၤန့ၣ်လီၤ. တၢ်ဒုးကဲထီၣ်ဝံၤအလီၢ်ခံ SAC ခီၣ်ချ့သုးရ့ၣ်နီၣ်ဂံၢ် (၆ဝ၄) လၢအအိၣ်ဆီလီၤအသးဖဲ ဒ---သဝီ, ကျ့ၤခိၣ်ကရူၢ်, ဒီၣ်ဖးခိၣ်ကီၢ်ဆၣ် လၢအအိၣ်စီၤစုာ် ဒီးတၢ်လီၢ်လၢတၢ်ဒုးကဲထီၣ်အလီၢ် ၁ဝ မံးလာ် (၁၆.ဝ၉ ကံလိမံးထၢၣ်) ဃၣ်ဃၣ်န့ၣ် ခးတပျီၤနါစိၤဝဲကျိဖးဒိၣ် ကအိၣ်ဝဲ (၁၅) ဖျၢၣ်ဃၣ်ဃၣ်ဆူသဝီလၢအအိၣ်ဘူးဖဲန့ၣ်သ့ၣ်တဖၣ်န့ၣ်လီၤ. သဝီသ့ၣ်တဖၣ်ပာ်ဃုာ်ဝဲဒ---, စ---, အ---, ဒီးအ---သဝီသ့ၣ်တဖၣ်န့ၣ်လီၤ. တၢ်ခးလီၤတၢ်ဝဲအံၤမၤဟးဂီၤ ဝဲသဝီဖိအတၢ်သူၣ်အီၣ်ဖျးအီၣ်အလီၢ်သ့ၣ်တဖၣ်န့ၣ်လီၤ. တၢ်ပိၢ်ဖး ထီၣ်သ့ၣ်တဖၣ်မၤဟူးမၤဝးစ့ၢ်ကီးဝဲဒူဖိသဝီဖိ သ့ၣ်တဖၣ်အဟံၣ်အဃီ ဒီးဒူဖိသဝီဖိသ့ၣ်တဖၣ်ဘၣ်ဃ့ၢ်ထီၣ်ကွံာ်ဝဲလၢ သဝီ ပူၤလၢတၢ်ပျံၤတၢ်ဖုးအပူၤန့ၣ်လီၤ.
လီၢ်ကဝီၤဒူဖိသဝီဖိသ့ၣ်တဖၣ်စံးဝဲလၢ ဖဲလါမးၡး ၈သီ, ၂ဝ၂၂နံၣ် မုၢ်ဆါခီ ၁၂ နၣ်ရံၣ်အခိၣ်အဃၢၤန့ၣ် SAC သုး (ခမရ-၆ဝ၄) အသုးဖိတဂၤနုာ်လီၤဆူ ဘ---သဝီ အပူၤဝံၤလဲၤဝဲဆူသဝီဖိစီၤအီၣ်အီၣ်အဟံၣ်ဒီး ခးအီၤဒီးကျိ (၅) ထံၣ် (သဝီဖိ သ့ၣ်တဖၣ်ထံၣ်ဝဲကျိချံဘၣ်ဒိအလီၢ်ယဲၢ်ထံၣ်လၢအမိၢ်ၦၢ်အလိၤ) အဃိသံဝဲန့ၣ်လီၤ. စီၤအီၣ်အီၣ်န့ၣ် အသးနံၣ်ကအိၣ်ဝဲ (၃ဝ) အခိၣ်အဃၢၤဒီးအိၣ်ဝဲဒီးအဖိခွါတဂၤန့ၣ်လီၤ. ၦၤဟ့ၣ်တၢ်ကလုၢ်လၢတၢ်ကခးသံစီၤအီၣ်အီၣ်န့ၣ်မ့ၢ်ဝဲ သုးရ့ၣ်ခိၣ်ဟ့စါထိ န့ၣ်လီၤ. SAC သုးသ့ၣ်တဖၣ် ခးသံဝဲစီၤအီၣ်အီၣ်ဝံၤအလီၢ်ခံ, အဝဲသ့ၣ်ဟံးန့ၢ်ဝဲအလီတဲစိဒီးကျိၣ်စ့လၢ အထံၣ်ဝဲလၢအလိၤ န့ၣ်လီၤ. ဝံၤန့ၣ်အဝဲသ့ၣ်လဲၤတွံၢ်ဝဲစီၤအီၣ်အီၣ်အစိၣ် စးထီၣ်လၢ ထါသီဖိလံၤသဝီဆူတၢ်လီၢ်လၢတၢ်ဒုးကဲထီၣ်ဖဲနံၤဝဲန့ၣ် ဂီၤခီ (ဒ်သိးကမၤဖျါဝဲဒ်အဘၣ်တၢ်မၤသံအီၤလၢတၢ်ဒုးအပူၤအသိး) အလီၢ်န့ၣ်လီၤ. ဖဲလါမးၡး ၁၃ သီ, ၂ဝ၂၂နံၣ်န့ၣ် လီၢ်ကဝီၤဒူဖိ သဝီဖိသ့ၣ်တဖၣ်ထံၣ်ဝဲစီၤအီၣ်အီၣ်အစိၣ်လၢတၢ်လီၢ်ဝဲန့ၣ်န့ၣ်လီၤ. ဖဲလၢတၢ်ထံၣ်အီၤအဆၢကတီၢ် အစိၣ်န့ၣ်အုၣ်ကွံာ်လံန့ၣ် လီၤ.
ဖဲလါမးၡး ၉သီ, ၂ဝ၂၂နံၣ် ဟါခီ ၆း၃ဝ မံးနံးအဆၢကတီၢ်န့ၣ် SAC သုး (ခမရ-၆ဝ၄) အသုးဖိ (၂ဝ) ဂၤဃၣ်ဃၣ်လၢအ ဘၣ်တၢ်တီခိၣ်ရိၤမဲအီၤလၢသုးရ့ၣ်ခိၣ်ဟ့စါထိန့ၣ် လဲၤနုာ်လီၤဝဲဆူဒ---သဝီ, ကျ့ၤခိၣ်ကရူၢ်, ဒီၣ်ဖးခိၣ်ကီၢ်ဆၣ်အပူၤန့ၣ်လီၤ. အဝဲသ့ၣ်နုာ်လီၤလၢသဝီပူၤဝံၤအလီၢ်ခံခးဝဲကျိဖိကအိၣ်ဝဲအါန့ၢ်ဒံး အထံၣ် (၁ဝဝ) ဃၣ်ဃၣ်ဒီးခးဝဲကျိဖးဒိၣ် (၆) ထံၣ်ဆူ တၢ်သူၣ်တၢ်ဖျးအလီၢ်သ့ၣ်တဖၣ်လၢအအိၣ်လၢ ဒ---သဝီဒီး ဖ---သဝီအဘၢၣ်စၢၤ, ထံသးစီကရူၢ်, ဒီၣ်ဖးခိၣ်ကီၢ်ဆၣ်န့ၣ် လီၤ. သဝီဖိလၢအအိၣ်လၢသဝီဝဲန့ၣ်ခံဖျၢၣ်လၢာ်ဒီး တၢ်သူၣ်တၢ်ဖျးအလီၢ်သ့ၣ်တဖၣ် ဃ့ၢ်ထီၣ်ကွံာ်ဝဲခီဖျိလၢအဝဲသ့ၣ် ပျံၤတၢ် ဒိၣ်မးအဃိန့ၣ်လီၤ. ဖဲလၢအဝဲသ့ၣ်ခးတၢ်ဝံၤအလီၢ်ခံ ဟါလီၤခီ ၇း၃ဝမံးနံးအဆၢကတီၢ်န့ၣ် သုးရ့ၣ်ခိၣ်ဟ့စါထိ ဒီးအၦၤသုး ဖိ (၁၁) ဂၤ လဲၤဝဲဒ်သိးကထံၣ်လိာ်ဝဲအသးဒီး SAC ကဝီၤဒ့ (၃) အၦၤပၢဆှၢတၢ်လၢအအိၣ်ဖဲဒ---သဝီဘၣ်ဆၣ် ၦၤပၢဆှၢ တၢ်တအိၣ်လၢအဟံၣ်ဘၣ်. မ့မ့ၢ်ၦၤပၢဆှၢတၢ်အမါတခီ အိၣ်ဝဲဖဲအဟံၣ်န့ၣ်လီၤ. လၢတၢ်န့ၣ်အဃိအဝဲသ့ၣ် (သုးရ့ၣ်ခိၣ်ဒီး အသုးဖိသ့ၣ်တဖၣ်) ကတိၤသကိးတၢ်ဒီးၦၤပၢဆှၢတၢ်အမါဒီး သံကွၢ်အီၤဘၣ်ဃးဒီးကညီဒီကလုာ်စၢဖှိၣ်ကရၢ (KNU) ကရၢဖိသ့ၣ်တဖၣ်ဒီးအဟံၣ်ဖိဃီဖိလၢသဝီပူၤန့ၣ်လီၤ. ၦၤပၢဆှၢတၢ်အမါတဲအီၤလၢ အတသ့ၣ်ညါ (KNU) ကရၢဖိနီတဂၤ ဘၣ်. အန့ၣ်တဘျီ အဝဲသ့ၣ်နဲၣ်တံၢ်ဝဲၦၤပၢဆှၢတၢ်အမါအမဲာ်သၣ်ဒီးကျိဒီး မၢအဒုးနဲၣ်အဝဲသ့ၣ်လၢ (KNU) အကရၢဖိသ့ၣ် တဖၣ်အဟံၣ်န့ၣ်လီၤ. လၢတၢ်ပျံၤတၢ်ဖုးဒီးတၢ်တသ့ၣ်ညါတၢ်နီတမံၤဘၣ်အပူၤ ၦၤပၢဆှၢတၢ်အမါ ဒုးနဲၣ်ဝဲအဝဲသ့ၣ်လၢဟံၣ် တဖျၢၣ်န့ၣ်လီၤ. ဖဲန့ၣ်အလီၢ်ခံ SAC သုးတဖၣ် ဒွဲၣ်အူဒီးမၤဟးဂီၤဝဲ တၢ်အီၣ်တၢ်အီ, တၢ်ကူတၢ်သိး, ဟံၣ်ဃီတၢ်ပီးတၢ်လီ သ့ၣ်တဖၣ်, တပၢၤနီၣ်ဒိသ့ၣ်တဖၣ်, ခွးသ့ၣ်တဖၣ်, ဒီးတယီတံၢ်လၢတၢ်မၤဃ့ဃာ်အီၤ (၄၈ဝ) ကံလိ ဃၣ်ဃၣ်လၢဟံၣ် အဝဲ န့ၣ်အပူၤန့ၣ်လီၤ. (ၦၤဒူဖိသဝီဖိသ့ၣ်တဖၣ် ဆါဝဲတယီအဃ့လၢအဟံၣ်ဃီတၢ်ဟဲနုာ်အဂီၢ်န့ၣ်လီၤ.) အဝဲသ့ၣ်ဟံးန့ၢ်ကွံာ်စ့ၢ်ကီး ဝဲလီတဲစိတဖျၢၣ်လၢဟံၣ်အဝဲန့ၣ်အပူၤန့ၣ်လီၤ.
ဖဲလါမးၡး ၉သီ, ၂ဝ၂၂နံၣ် ဟါလီၤခီ ၈း၃ဝမံးနံးအဆၢကတီၢ်န့ၣ်, အဝဲသ့ၣ် SAC သုး (ခမရ-၆ဝ၄) ခးဝဲမျိာ်သၣ်ဒ်သိး ကမၢဝဲၦၤဒူဖိသဝီဖိသ့ၣ်တဖၣ်ဟးထီၣ်ကွံာ်လၢသဝီပူၤအဂီၢ်န့ၣ်လီၤ. အဝဲသ့ၣ်တဲဝဲၦၤသဝီဖိသ့ၣ်တဖၣ်လၢ တချုး လါမးၡး ၁ဝ သီ, ၂ဝ၂၂နံၣ်ဂီၤခီ ၁ဝးဝဝနၣ်ရံၣ်န့ၣ် ၦၤသဝီဖိတဖၣ်ကဘၣ်ဟးထီၣ်ကွံာ် ဒီးစိာ်ဃုာ်အတၢ်ဖိတၢ်လံၤတဖၣ်မ့ၢ်လၢ နံၤအဝဲ န့ၣ် ဂီၤခီ ၁ဝးဝဝ နၣ်ရံၣ်ဝံၤအလီၢ်ခံ အဝဲသ့ၣ်ကခးလီၤဝဲကျိဖးဒိၣ် ဆူဒ---သဝီ, အကဝီၤဒ့ (၃) အပူၤ ဒ်သိးကၡဲပျီဝဲ လီၢ်က ဝီၤဝဲန့ၣ်အဃိလီၤ. လါမးၡး ၁ဝသီ, ၂ဝ၂၂ နံၣ်ဂီၤခီဂီၤဂီၤန့ၣ် ၦၤသဝီဖိတနီၤ ဃ့ၢ်ထီၣ်ကွံာ်ဝဲဆူတၢ်လီၢ်အဂၤ ခီဖျိသိလ့ၣ်မ့ၢ်ဂ့ၤ, သိလ့ၣ်ယီၢ်မ့ၢ်ဂ့ၤန့ၣ်လီၤ. ၦၤတနီၤဃ့ၢ်ထီၣ်ကွံာ်ဝဲလၢအခီၣ်န့ၣ်လီၤ. နံၤအဝဲန့ၣ်တချုးလၢအဝဲသ့ၣ်ဃ့ၢ်ထီၣ်ဒံးဘၣ်န့ၣ် အဝဲ သ့ၣ်တဖီအီၣ်ဒၣ်လဲာ်ဂီၤတၢ်အီၣ်ဘၣ်န့ၣ်လီၤ.
လါမးၡး ၁၁သီ, ၂ဝ၂၂နံၣ် ဂီၤခီ ၁၁းဝဝနၣ်ရံၣ်အဆၢကတီၢ်န့ၣ် SAC သုး (ခမရ-၆ဝ၄) ဒွဲၣ်အူကွံာ်ဝဲသဝီဖိ တဂၤအတၢ် ဆါတၢ်ၦ့ၤအကျးလၢ ဘ---သဝီ, သခွဲပလိၢ်ကရူၢ်, ဒီၣ်ဖးခိၣ်ကီၢ်ဆၣ်န့ၣ်လီၤ. တၢ်ဆါတၢ်ၦ့ၤအကျးအံၤကလီၤလၢဝဲ အါန့ၢ်ဒံး ကီၢ်ပယီၤစ့ ၃,ဝဝဝ,ဝဝဝကၠးန့ၣ်လီၤ. တုၤမ့ၢ် SAC သုးဒွဲၣ်အူကွံာ်ဝဲတၢ်ဆါတၢ်ၦ့ၤကျး ဝံၤအလီၢ်ခံ ဘ---သဝီဖိသ့ၣ်တဖၣ် ဃ့ၢ်နုာ်အိၣ်ခူသူၣ်ဝဲဆူၦၢ်ပူၤ ဒ်သိးကဟးဆှဲးဝဲတၢ်မၤဆူၣ်မၤစိးအဂီၢ် မ့ၢ်လၢအဝဲသ့ၣ်ပျံၤဝဲ SAC သုးအတၢ်ဟူးတၢ်ဂဲၤ သ့ၣ် တဖၣ်ဒိၣ်မးအဃိန့ၣ်လီၤ. သဝီအဝဲအံၤအိၣ်ဘူးဝဲဒီးတၢ်လီၢ် လၢတၢ်ဒုးကဲထီၣ်ဖဲအပူၤကွံာ်စှၤသီ (လါမးရှး ၈သီ, ၂ဝ၂၂နံၣ်) လၢ KNLA ဒီး SAC အဘၢၣ်စၢၤန့ၣ်လီၤ. လၢန့ၣ်အမဲာ်ညါ, SAC အသုးဖိသ့ၣ်တဖၣ် မၤဃံးထီၣ်ဝဲသဝီဖိသ့ၣ်တဖၣ် အတၢ်လဲၤထီၣ်က့ၤလီၤ ခီဖျိတပျဲ ဟးထီၣ်ဝဲသဝီဖိလၢသဝီပူၤနီတဂၤဘၣ်န့ၣ်လီၤ. (ဒူဖိသဝီဖိတနီၤဃ့ၢ်ထီၣ်လံဝဲဖဲလၢတၢ်ဒုး ကဲထီၣ်အခါန့ၣ်လီၤ.) လၢလီၢ်ခံန့ၣ် SAC သုးဟ့ၣ်ဝဲအခွဲးလၢသဝီဖိသ့ၣ်တဖၣ်ကဟးထီၣ် ဘၣ်ဆၣ်ၦၤသဝီဖိလၢအအိၣ်လၢ သဝီပူၤ ဃ့ၢ်ထီၣ်ကွံာ်လံဝဲဘူးကလၢာ်ဃၣ်ဃၣ် ခီဖျိလၢတၢ်ခးလီၤတပျုာ်တပျီၤနါစိၤဝဲကျိဖးဒိၣ်ဘူးဒီးသဝီအဃိန့ၣ်လီၤ. လၢန့ၣ်အမဲာ်ညါ ဖဲလါမးၡး ၉သီ, ၂ဝ၂၂နံၣ်န့ၣ် SAC သုး (ခမရ-၆ဝ၄) အသုးဒွဲၣ်အူစ့ၢ်ကီးဝဲ COVID-19 တၢ်သမံသမိး အလီၢ်တခါလၢအဘူးဝဲဒီး ဘ---သဝီ, ကျ့ၤခိၣ်ကရူၢ်, ဒီၣ်ဖးခိၣ်ကီၢ်ဆၣ်န့ၣ်လီၤ.
Footnotes:
[1] တၢ်ဂ့ၢ်တၢ်ကျိၤလၢ လံာ်ပာ်ဖျါတဘ့ၣ်အံၤအပူၤန့ၣ် တၢ်ဒိးန့ၢ်ဘၣ်အီၤဖဲလါမးရှး ၂၀၂၂နံၣ်အပူၤန့ၣ်လီၤ. ဘၣ်တၢ်ဆှၢဟ့ၣ်ထီၣ်အီၤလၢ လီၢ်ကဝီၤၦၤမၤ သကိးတၢ်တဂၤ ဖဲတီအူကီၢ်ရ့ၣ်အပူၤ လၢအဘၣ်တၢ်သိၣ်လိအီၤ လၢကညီဂ့ၢ်ဝီခွဲးယာ်ကရူၢ် KHRG လၢကမၤနီၣ်မၤဃါ တၢ်မၤဘၣ်ဒိၦၤဟီၣ်ခိၣ်ဖိ ခွဲးယာ်အတၢ်အိၣ်သးတဖၣ်ဖဲလီၢ်ကဝီၤပူၤန့ၣ်လီၤ. ၦၤတူၢ်ဘၣ်တၢ်တဖၣ်အမံၤ, တၢ်ဂီၤဒီးအိၣ်ဆိးလီၢ်ကျဲ လီၤတံၢ်လီၤဆဲးတဖၣ်န့ၣ် တၢ်မၤလီၤဘၢအီၤ လၢအဝဲနီၢ်ကစၢ်တၢ်ဘံၣ်တၢ်ဘၢအဂီၢ်န့ၣ်လီၤ. တၢ်ဂ့ၢ်တၢ်ကျိၤလၢ တၢ်ကွဲးၡဲပၠးအါထီၣ်အီၤဖဲ ပနိကဝီၤအပူၤန့ၣ် မ့ၢ်ဝဲဒၣ် KHRG အတၢ်ကွဲးၡဲထီၣ် တၢ်ဂ့ၢ်တၢ်ကျိၤန့ၣ်လီၤ.
Print:
