တၢ်ကဲထီၣ်သးအကလုာ်

ဟီၣ်လာ်မ့ၣ်ပိၢ်ပိၢ်ဖးထီၣ်

တၢ်ကဲထီၣ်သးမုၢ်နံၤမုၢ်သီ

လါစဲးပထ့ဘၢၣ် ၂၇သီ, ၂၀၂၁နံၣ်

တၢ်ကဲထီၣ်သးတၢ်လီၢ်တၢ်ကျဲ (သဝီ, ကရူၢ်, ကီၢ်ဆၣ်, ကီၢ်ရ့ၣ်)

က---သ၀ီ, မးထီကရူၢ်, ဒွဲၣ်လိကီၢ်ဆၣ်, မုၢ်တြီၢ်ကီၢ်ရ့ၣ်

ၦၤလၢအတူၢ်ဘၣ်တၢ်တဂၤအဂ့ၢ်အကျိၤ

မံၤ

စီၤဘ---

သးနံၣ်

၄၇

မုၣ်/ ခွါ

ခွါ

ကလုာ်

ကညီ

ဟံၣ်ဖိဃီဖိ အိၣ် / တအိၣ်   

အိၣ်

တၢ်ဖံးတၢ်မၤ

မုၢ်ဆ့ၣ်မုၢ်ဂီၤပှၤမၤတၢ်ဖိ

တၢ်ဘူၣ်တၢ်ဘါ

ဘါသီခါ

တၢ်ဟံမူဒါ/ လီၢ်လၤ

သ၀ီဖိ

အိၣ်ဆိးဒူသဝီ

က---သ၀ီ, မးထီကရူၢ်, ဒွဲၣ်လိကီၢ်ဆၣ်, မုၢ်တြီၢ်ကီၢ်ရ့ၣ်

၁. ၡဲပၠးၦၤနဟံးန့ၢ်တၢ်ကဲထီၣ်သးတခါအံၤ တဆီဘၣ်တဆီတက့ၢ်.

ကညီဂ့ၢ်၀ီခွဲးယာ်ကရူၢ် (KHRG) ပှၤမၤတၢ်ဖိ မၤတၢ်သံကွၢ်သံဒိးဒီး ပှၤတူၢ်ဘၣ်တၢ်အမါ လၢလီတဲစိဒီး အ၀ဲဟ့ၣ်ဒုးသ့ၣ်ညါ KHRG ဘၣ်ဃးဟီၣ်လာ်မ့ၣ်ပိၢ်ပိၢ်ဖးထီၣ်သးအဂ့ၢ်န့ၣ်လီၤ.

၂. ကွဲးနီၣ်ၦၤလၢဟ့ၣ်တၢ်ဂ့ၢ်အံၤတဂၤစုာ်စုာ်သ့ၣ်ညါ တၢ်ဂ့ၢ်အံၤအမ့ၢ်အတီလၢကျဲဒ်လဲၣ်.

ပှၤလၢအဟ့ၣ်တၢ်ဂ့ၢ်အခီၣ်ထံးခီၣ်ဘိမ့ၢ်၀ဲ ပှၤယီၢ်ဘၣ်မ့ၣ်ပိၢ်အမါန့ၣ်လီၤ.

ပာ်ဖျါတၢ်ကဲထီၣ်သးအဂ့ၢ်အကျိၤလၢလၢၦဲၤၦဲၤတက့ၢ်.

တၢ်ခးလီၤနါစိၤကျိဖးဒိၣ်ဒီး တၢ်ဒုးကဲထီၣ်သးလၢ ကညီဒီကလုၢ်တၢ်ထူၣ်ဖျဲးသုးမုၢ်ဒိၣ် (KNLA) ဒီး ကီၢ်ပယီၤသုး ကီၣ်ကး ကရၢ (SAC) ဒီး သုးခိးကီၢ်ဆၢ (BGF)သုးတဖၣ် အဘၢၣ်စၢၤကွ့ၢ်ကွ့ၢ်န့ၣ်လီၤ. လၢတၢ်န့ၣ်အဃိ သ၀ီဖိအိၣ်လၢ က--- သ၀ီ, မးထီကရူၢ်, ဒွဲၣ်လိကီၢ်ဆၣ်, မုၢ်တြီၢ်ကီၢ်ရ့ၣ်တဖၣ် ဘၣ်ဃ့ၢ်အိၣ်ကမှံ ယံာ်တ့ၢ်မး ကအိၣ်လၢ သၢလါတုၤလွံၢ်လါလံန့ၣ်လီၤ. ဖဲသ၀ီဖိအါဂၤဃ့ၢ်အိၣ်ကဒုဒံးလၢ သ၀ီအဂုၤအဂၤအဖၢမုၢ်အခါ သ၀ီဖိတနီၤ (ဟံၣ်ဒူၣ် လွံၢ်ဒူၣ်တုၤ ယဲၢ်ဒူၣ်) က့ၤအိၣ်လၢ က--- သ၀ီ မ့ၢ်လၢ အ၀ဲသ့ၣ်ကွၢ်ဆၢၣ်မဲာ်ဘၣ်ဒီး ကျိၣ်စ့တၢ်ဂ့ၢ်ကီ (လၢတၢ်လုၢ်အီၣ်နီၢ် ခိသးသမူအဂီၢ်) အဃိန့ၣ်လီၤ. 

စီၤဘ--- အသးနံၣ်အိၣ် ၄၇ နံၣ် ဒီး အဟံၣ်ဖိဃီဖိ စ့ၢ်ကီး က့ၤအိၣ်ဆူ က---သ၀ီန့ၣ်လီၤ. “ဖဲတၢ်လီၢ်လၢ ပလဲၤဃ့ၢ်အိၣ် ကမှံအလီၢ်န့ၣ် ပတၢ်ကီတၢ်ခဲအိၣ်. ဖဲပအိၣ်လၢ သ၀ီအဂၤတဖၣ်အဆၢကတီၢ် ပကျိၣ်ပစ့ (စ့တၢ်ဟဲနုာ်) တအိၣ်ဘၣ်. ပဘၣ်ပှ့ၤတၢ်ကိးမံၤဒဲး. အဃိပတအဲၣ်ဒိးအိၣ်လၢ သ၀ီအဂၤလၢၤဘၣ်. အဃိ ပဟဲက့ၤလၢ ပသ၀ီန့ၣ်လီၤ.” စီၤဘ---အမါ နီၢ်ဂ--- ပာ်ဖျါထီၣ်၀ဲဒ်အံၤန့ၣ်လီၤ. အ၀ဲသ့ၣ်ဟဲက့ၤအိၣ်လၢ က---သ၀ီန့ၢ်ဘၣ်ဆၣ် မ့ၢ်လၢ တၢ်ဒုးတၢ်ယၤ ကဲထီၣ်သး ဆူညါကွ့ၢ်ကွ့ၢ်ဒီး တၢ်ခးလီၤတပျုၢ်တပျီၤကြီကျိအိၣ်အဃိ တၢ်တြီဃးတၢ်လဲၤထီၣ်က့ၤလီၤလၢ ဟီၣ်က၀ီၤပူၤအိၣ်ဒံး၀ဲ အဖၢမုၢ်န့ၣ်လီၤ. စီၤဘ--- မ့ၢ် မုၢ်ဆ့ၣ်မုၢ်ဂီၤပှၤမၤတၢ်ဖိဒီး မၤတၢ်ဖံးတၢ်မၤအဂုၤအဂၤလၢ သ၀ီပူၤန့ၣ်လီၤ. စီၤဘ--- ဟဲက့ၤအိၣ်လၢ က--- သ၀ီပူၤ၀ံၤအလီၢ်ခံ အတၢ်ဖံးတၢ်မၤတအိၣ်နီတမံၤစ့ၢ်ကီးဘၣ်အဃိ အ၀ဲလဲၤဒိးလီၤကၠၤဒိးညၣ်လၢ ထံကျိပူၤကိးဟါဒဲး ဒီးလဲၤကွၢ်က့ၤအကၠၤလၢဂီၤကိးဂီၤဒဲး လၢအဟံၣ်ဖိဃီဖိကအီၣ်ဘၣ်၀ဲ ဒီးကဆါဘၣ်စ့ၢ်ကီး၀ဲအဂီၢ်န့ၣ် လီၤ.

ဖဲ လါစဲးပထ့ဘၢၣ် ၂၇သီ, ၂၀၂၁နံၣ် ဂီၤခီ ၇း၀၀ ဆၢကတီၢ် စီၤဘ--- ယီၢ်ဘၣ် ဟီၣ်လာ်မ့ၣ်ပိၢ်တဖျၢၣ် ဖဲအလဲၤကွၢ်က့ၤ အကၠၤလၢအဒိးလီၤဃာ်၀ဲ ဖဲဃိၣ်လိာ်ကျိပူၤ လၢအဘူးဒီးအသ၀ီန့ၣ်လီၤ. ဖဲသ၀ီဖိတဖၣ်နၢ်ဟူတၢ်ပိၢ်သီၣ်ထီၣ်တဘျီဃီ စီၤဘ--- အမါအဒီပုၢ်၀ဲၢ်ခွါဒီး သ၀ီဖိအဂၤတနီၤ လဲၤလၢတၢ်ကဲထီၣ်သးအလီၢ်ဒီး ထံၣ်လၢ စီၤဘ--- ဘၣ်ဒိ၀ဲန့ၣ်လီၤ. အမါအဒီပုၢ်၀ဲၢ်ခွါတဂၤအံၤ ဆှၢ၀ဲစီၤဘ--- တဘျီဃီဆူ SAC သုးတၢ်ဆါဟံၣ်လၢအအိၣ်ဖဲ ဖၣ်ပူၣ်၀့ၢ်ပူၤအံၤန့ၣ်လီၤ. 

မ့ၢ်လၢ တၢ်တြီဃးတၢ်လဲၤထီၣ်က့ၤလီၤအဃိ သ၀ီဖိတဖၣ် ဘၣ်ဒိးလဲချံလၢ ကဆှၢစီၤဘ--- စးထီၣ်လၢ က--- သ၀ီတုၤ ဖၣ်ပူၣ်တၢ်ဆါဟံၣ်လၢ တၢ်ကူစါယါဘျါသးအဂီၢ်န့ၣ်လီၤ. တၢ်လဲၤတၢ်က့ၤ စးထီၣ် က--- သ၀ီတုၤ ဖၣ်ပူၣ်၀့ၢ်န့ၣ် တံာ်တာ် ခံနၣ်ရံၣ်န့ၣ်ဒီးဘၣ်ဟ့ၣ် ချံလဲ ၅၀၀၀၀ ကၠးန့ၣ်လီၤ. ပှၤတူၢ်ဘၣ်တၢ်ဖိအမါ နီၢ်ဂ--- လဲၤအိၣ်ခိးအ၀ၤလၢ SAC သုးတၢ်ဆါဟံၣ်ဖဲဖၣ်ပူၣ်၀့ၢ်ပူၤတန့ၢ်ဘၣ် (မ့ၢ်လၢ တၢ်ဆါဟံၣ်ပူၤ တၢ်သိၣ်တၢ်သီအိၣ်လၢ ပိာ်ခွါကဘၣ်အိၣ်ခိးပိာ်ခွါဒီး ပိာ်မုၣ်ကဘၣ်အိၣ်ခိးပိာ်မုၣ်န့ၣ်လီၤ.) အဃိ ပှၤတူၢ်ဘၣ်တၢ် အမါဒီပုၢ်၀ဲပိာ်ခွါ ဘၣ်လဲၤအိၣ်ခိးအီၤန့ၣ်လီၤ.

ဟီၣ်လာ်မ့ၣ်ပိၢ်ပိၢ်ထီၣ်အဃိ စီၤဘ--- အခီၣ်ဘၣ်ဒိခံကပၤလၢာ်န့ၣ်လီၤ. တကးဒံးဘၣ် အဘၣ်ဒီၣ်တဲာ်ကွံာ်အခီၣ်ထွဲတက ပၤန့ၣ်လီၤ. စီၤဘ--- ဘၣ်အိၣ်လၢ ဖၣ်ပူၣ်တၢ်ဆါဟံၣ် ယဲၢ်သီန့ၣ်လီၤ. ဖဲအအိၣ်လၢ တၢ်ဆါဟံၣ်ဖဲန့ၣ်အဆၢကတီၢ် ကသံၣ်ကသီအတၢ်လၢာ်ဘူၣ်လၢာ်စ့ၤတအိၣ်အါအါဘၣ်သနာ်က့ မ့မ့ၢ် တၢ်လဲၤတၢ်က့ၤဒီး တၢ်အီၣ်တၢ်အီအပှ့ၤလၢာ်၀ဲန့ၣ်လီၤ.

ဖဲလါ အီးကထိဘၢၣ် ၁သီ, ၂၀၂၁နံၣ်န့ၣ် တၢ်ဆါဟံၣ်ဖဲဖၣ်ပူၣ် ဆှၢခီ စီၤဘ--- ဆူ ဖၣ်အၣ်တၢ်ဆါဟံၣ်လၢ ကကူစါယါဘျါသးဆူညါအဂီၢ်န့ၣ်လီၤ. ကလဲၤလၢ ကမးမိၢ်၀့ၢ်အဂီၢ် (ပှၤကးတံာ်ကျဲမ့ၢ်လၢတၢ်ဒုးကဲထီၣ်သးအဃိ) ကလဲၤလၢဖၣ်ပူၣ်ကျဲ အဂီၢ်တညီဘၣ်အဃိ အ၀ဲသ့ၣ်ဘၣ်လဲၤဆူကမးမိၢ်၀့ၢ်လၢချံန့ၣ်လီၤ. ၀ံၤအလီၢ်ခံ အ၀ဲဒိးထီၣ်က့ၤသိလ့ၣ် စးထီၣ်ဖဲ ကမး မိၢ်၀့ၢ်ဒီးလဲၤဆူ ဖၣ်အၣ်၀့ၢ်န့ၣ်လီၤ. ဖဲအအိၣ်လၢ ဖၣ်အၣ်တၢ်ဆါဟံၣ်အဆၢကတီၢ် ကသံၣ်ကသီတၢ်လၢာ်ဘူၣ် လၢာ်စ့ၤခဲ လၢာ်အိၣ်၀ဲ ၁၀၀၀၀ ကၠးတုၤ ၁၅၀၀၀ ကၠးလၢ ကသံၣ်ကသီအဂီၢ်န့ၣ်လီၤ. လၢန့ၣ်အမဲာ်ညါ တၢ်လၢာ်ဘူၣ်လၢာ်စ့ၤလၢ အဘၣ်ကွဲးအခီၣ်န့ၣ် လၢာ်၀ဲ ၁၀၀,၀၀၀ ကၠးန့ၣ်လီၤ. (စီၤဘ--- အကွဲးအခီၣ်လၢ ဖၣ်ပူၣ်၀့ၢ်ပူၤ အတဘၣ်လီၢ်ဘၣ်ဆးဘၣ် အဃိ အဘၣ်က့ၤကွဲးသးလၢ ဖၣ်အၣ်တၢ်ဆါဟံၣ်တဘျီကဒီးန့ၣ်လီၤ.) စီၤဘ--- ဘၣ်အိၣ်လၢ ဖၣ်အၣ်တၢ်ဆါဟံၣ် ၁၈ သီန့ၣ်လီၤ.

ဖဲလါအီးကထိဘၢၣ် ၁၈သီ, ၂၀၂၁နံၣ်န့ၣ် စီၤဘ--- စံၣ်လီၤဘၣ်လၢ ဖၣ်အၣ်တၢ်ဆါဟံၣ်ပူၤန့ၣ်လီၤ. ကသံၣ်သရၣ်တဲဘၣ်အီၤလၢ  ၁၅သီ၀ံၤအလီၢ်ခံ ကဟဲဒုးနဲၣ်ကဒါအသးလၢတၢ် ဆါဟံၣ်အသီတဘျီန့ၣ်လီၤ. အခဲအံၤန့ၣ် ပှၤတူၢ်ဘၣ်တၢ်ဒီး အဟံၣ်ဖိဃီဖိတဖၣ်အိၣ်လၢ ဖၣ်အၣ်၀့ၢ်ပူၤန့ၣ်လီၤ.

စီၤဘ--- ဒီးအဟံၣ်ဖိဃီဖိ တထီၣ်ဘၣ်တၢ်မၤလိဘၣ်ဃး မ့ၣ်ပိၣ်တၢ်လီၢ်ဘၣ်ယိၣ်တၢ်သ့ၣ်ညါနၢ်ပၢၢ်နီတဘျီဘၣ်. ထဲဒၣ် ပှၤဒုးသ့ၣ်ညါအ၀ဲသ့ၣ် ဘၣ်ဃးမ့ၣ်ပိၢ်ဖဲ လၢသုးဖီၣ်စုက၀ဲၤတဖၣ်တဲဘၣ်အ၀ဲသ့ၣ်လၢ ကဟးဆှဲးတၢ်လီၢ်လၢ ဘၣ်တၢ် တြီဃာ်အီၤသ့ၣ်တဖၣ်န့ၣ်လီၤ. သနာ်က့ၤ သုးဖီၣ်စုက၀ဲၤတဖၣ် တဒုးသ့ၣ်ညါသ၀ီဖိ တၢ်ပာ်လီၤမ့ၣ်ပိၢ်တဖၣ်အလီၢ် လီၤတံၢ်လီၤဆဲးဘၣ်န့ၣ်လီၤ. စီၤဘ--- ဒိးန့ၢ်ဘၣ်ကျိၣ်စ့တၢ်ဆီၣ်ထွဲမၤစၢၤတနီၤလၢ Red Cross Myanmar အိၣ်ဘၣ် ဆၣ် တမ့ၢ်တၢ်လၢအလၢလီၣ်လၢ အကသံၣ်သီပှ့ၤအဂီၢ်ဘၣ်. လၢခံ DanChurchAid (DCA) ဟ့ၣ်လီၤမၤစၢၤစ့ၢ်ကီး အီၤကျိၣ်စ့တၢ်ဆီၣ်ထွဲမၤစၢၤ လၢကဟ့ၣ်လီၤကသံၣ်ကသီပှ့ၤဒီး တၢ်အပှ့ၤကလံၤအဂုၤအဂၤတဖၣ် အဂီၢ်န့ၣ်လီၤ.

စီၤဘ--- ဒီးအမါန့ၣ် အဖိအိၣ်သၢဂၤဒီး အဘၣ်ကွၢ်ထွဲစ့ၢ်ကီး နီၢ်ဂ--- အမိန့ၣ်လီၤ. ခီဖျိလၢ အမါထံၣ်အ၀ၤ တူဘၣ်တၢ်ဒ်အံၤအဃိ အတူၢ်ဘၣ်တမုာ်ဘၣ်ဒီး ဘၣ်လၢ အဟံၣ်ဖိဃိဖိတၢ်အိၣ်မူခါဆူညါအဂီၢ်န့ၣ်လီၤ.

မ့ၢ်ၦၤလၢအတူၢ်ဘၣ်တၢ်ဖၣ် ဟ့ၣ်ၦၤတၢ်ခွဲးတၢ်ယာ်လၢပကသူတၢ်ဂ့ၢ်တၢ်ကျိၤတခါအံၤဧါ, ဟ့ၣ်ၦၤတၢ်ခွဲးတၢ်ယာ်လၢ ပက သူတၢ်ဂ့ၢ်အံၤလၢကျဲဒ်လဲၣ်.

ပှၤဟ့ၣ်တၢ်ဂ့ၢ်တၢ်ကျိၤလၢအမ့ၢ် ပှၤတူၢ်ဘၣ်တၢ်အမါနီၢ်ဂ---အံၤ ဟ့ၣ် KHRG တၢ်ပျဲလၢကသူတၢ်ဂ့ၢ်တၢ်ကျိၤတဖၣ်အံၤ န့ၣ်လီၤ.