English
ကညီကျိာ်
မြန်မာတၢ်ပာ်ဖျါအဖုၣ် တဘ့ၣ်အံၤ ပာ်ဖျါဝဲ တၢ်ကဲထီၣ်အသးဖဲဘံလ့ကီၢ်ဆၣ် ဒူသထူၣ်ကီၢ်ရ့ၣ် ဖဲလါအီကူးအတီၢ်ပူၤန့ၣ်လီၤ. စးထီၣ်ဖဲလါအီကူး ၉သီ, တုၤ ၁၁သီ ၂၀၂၁နံၣ်န့ၣ် ကီၢ်ပယီၤသုးခိးကီၢ်ဆၢ (BGF)သုးဒီး သုးကီၣ်ကးကရၢ (SAC)သုးတဖၣ် ဟးထီၣ်လၢ လ့က့ၣ်သုးကလၢၤဒီးလဲၤ၀ဲဆူ ယိၤကျါသုးကလၢၤ လၢတၢ်ထၢဖှိၣ်ဟီၣ်က၀ီၤတၢ်ဂ့ၢ်တၢ်ကျိၤဒီးတၢ်ထိၣ်ကွၢ် ယိၤကျါသုးကလၢၤတၢ်လီၢ်တၢ်ကျဲအဂီၢ်န့ၣ်လီၤ. တၢ်လီၢ်အံၤ မ့ၢ်ကညီဒီကလုာ်စၢဖှိၣ်ကရၢ (KNU)တၢ်ပၢဟီၣ်က၀ီၤဒီး မ့ၢ်တၢ် လီၢ်လၢ KNU တြီတံၢ်ဃာ် SAC ဒီး BGFသုးတၢ်ဟူးတၢ်ဂဲၤအဟီၣ်က၀ီၤန့ၣ်လီၤ. ခီဖျိလၢ SAC ဒီး BGFသုးတဖၣ် ဟူးဂဲၤ ၀ဲလၢ KNU တၢ်ပၢဟီၣ်က၀ီၤအပူၤ ဖဲလ့က့ၣ်ဒီးယိၤကျါသုးကလၢၤအဘၢၣ်စၢၤဟီၣ်က၀ီၤတဖၣ်အဃိ KNLA သုးတဖၣ် ဟူးဂဲၤ၀ဲလၢ တၢ်ဒီသဒၢလီၤက့ၤအဟီၣ်က၀ီၤတၢ်ဘံၣ်တၢ်ဘၢဂီၢ်အဃိ တၢ်ဒုးကဲထီၣ်၀ဲလၢ KNLA သုး ဒီး SAC BGF သုးတဖၣ်အဘၢၣ်စၢၤန့ၣ်လီၤ. ဖဲ SAC ဒီး BGF သုးတဖၣ် လဲၤထီၣ်ဆူယိၤကျါသုးကလၢၤအဆၢကတီၢ်န့ၣ် အ၀ဲသ့ၣ်မၢဆူၣ် သ၀ီဖိတဖၣ်လၢ ကကဲန့ၢ်ပှၤနဲၣ်ကျဲဒီးတကတီၢ်ဃီ သူ၀ဲသ၀ီဖိသ့ၣ်တဖၣ်အံၤ ဒ်ကတီၤတခါလၢ တၢ်ဒီသဒၢလီၤအနီၢ်ကစၢ် သးအဂီၢ် (၂)ဘျီန့ၣ်လီၤ. ဖဲ SAC ဒီး BGF သုးတဖၣ် နုာ်လီၤလၢပှၤတ၀ၢပူၤအခါ အ၀ဲသ့ၣ် အီၣ်ဟုၣ်ဒီးဟံးဆူၣ်ကွံာ်၀ဲ သ၀ီဖိတၢ်စုလီၢ်ခီၣ်ခိၣ်ဒ်အမ့ၢ် လီတဲစိ ဒီးဆၣ်ဖိကီၢ်ဖိလၢသ၀ီဖိဘုၣ်၀ဲတဖၣ်န့ၣ်လီၤ. ဖဲလါအီကူး ၂၃ သီ, ၂၀၂၁ နံၣ်န့ၣ် SAC ဒီး BGF သုးတဖၣ် ဟဲက့ၤလီၤလၢယိၤကျါသုးကလၢၤ ဒီးက့ၤဆူလ့က့ၣ်သုးကလၢၤအခါ အ၀ဲသ့ၣ် မၢဆူၣ်သ၀ီဖိတဂၤ လၢကကဲန့ၢ်အ၀ဲသ့ၣ်ပှၤနဲၣ်ကျဲဒီး တကတီၢ်ဃီ သူ၀ဲသ၀ီဖိသ့ၣ်တဂၤအံၤ ဒ်ကတီၤတခါလၢ တၢ်ဒီသဒၢလီၤအနီၢ်ကစၢ် သးအဂီၢ်န့ၣ်လီၤ.[1]
ဖဲလါအီကူး ၉ သီ, ၂၀၂၁ နံၣ်န့ၣ် ကီၢ်ပယီၤသုးကီၣ်ကးကရၢ (SAC)အသုး ပာ်ဖှိၣ်ထီၣ်သးဒီး သုးခိးကီၢ်ဆၢ (BGF)သုးတဖၣ် အသုးနီၣ်ဂံၢ်ခဲလၢာ် ကအိၣ် (၈၀) ဂၤဟးထီၣ်လၢလ့က့ၣ်သုးကလၢၤဒီး လဲၤထီၣ်၀ဲဆူ ယိၤကျါသုးကလၢၤ လၢအမ့ၢ် KNU တၢ်ပၢဟီၣ်က၀ီၤပူၤ လၢကထိၣ်ကွၢ်ယိၤကျါသုးကလၢၤဟီၣ်က၀ီၤ ဒီး မၤနီၣ်မၤဃါဟီၣ်က၀ီၤတၢ်အိၣ်သးအဂီၢ်န့ၣ်လီၤ. လီၢ်က၀ီၤသ၀ီဖိတဖၣ် တသ့ၣ်ညါ BGF သုးလၢအဟူးဂဲၤလၢဟီၣ်က၀ီၤပူၤတဖၣ် အသုးရ့ၣ်သုးဒ့နီၣ်ဂံၢ်ဘၣ် ဘၣ်ဆၣ် BGFသုးလၢအဟူးဂဲၤဖဲ လ့က့ၣ်ဒီးယိၤကျါသုးကလၢၤအဘၢၣ်စၢၤဟီၣ်က၀ီၤတဖၣ်မ့ၢ်၀ဲ သုးရ့ၣ် (၁၀၁၃) လၢအဘၣ်တၢ်တီ ခိၣ်ရိၣ်မဲအီၤလၢ သုးရ့ၣ်ခိၣ်မီၤလၣ်ကၠဲၤတဖုအံၤန့ၣ်လီၤ.
SAC ဒီး BGF သုးတဖၣ် တဟံးန့ၢ်စိတၢ်ပျဲလၢ KNU အိၣ်ဘၣ်ဆၣ် ဟူးဂဲၤဟး၀့ၤ၀ီၤလၢ KNU တၢ်ပၢဟီၣ်က၀ီၤ အပူၤန့ၣ်လီၤ. ဖဲအ၀ဲသ့ၣ်ဟး၀့ၤ၀ီၤအခါ လဲၤခီဘၣ်၀ဲသ၀ီတဖၣ် ဒ်အမ့ၢ် ရ--- စ--- တ--- ဒီး အ----သ၀ီတဖၣ်န့ၣ်လီၤ. လီၢ်က၀ီၤသ၀ီဖိတဖၣ် စံးဘၣ် KHRG လၢ လီၢ်က၀ီၤ ကညီဒီကလုာ်တၢ်ထူၣ်ဖျဲးသုးမုၢ်ဒိၣ် (KNLA) သုးတဖၣ် အိၣ်ကတဲၤကတီၤအသးထီဘိလၢ တၢ်ဒီသဒၢအ၀ဲသ့ၣ်တၢ်ပၢဟီၣ်က၀ီၤတၢ်ဘံၣ်တၢ်ဘၢအဂီၢ်န့ၣ်လီၤ. SAC ဒီး BGF သုးတဖၣ်စ့ၢ်ကီး သ့ၣ်ညါ၀ဲလၢ အ၀ဲသ့ၣ်မ့လဲၤနုာ်လီၤလၢ KNU တၢ်ပၢဟီၣ်က၀ီၤပူၤန့ၣ် KNLA သုး တဖၣ်ကခးအ၀ဲသ့ၣ် န့ၣ်လီၤ. SAC ဒီး BGF သုးတဖၣ် ဟဲတုၤဖဲ ရ---သ၀ီန့ၣ် အ၀ဲသ့ၣ်ဟဲဒီးသိလ့ၣ်န့ၣ်လီၤ. အခါဖဲန့ၣ် သ၀ီဖိတဖၣ် ဟ့ၣ်ပလီၢ် အ၀ဲသ့ၣ်လၢ တဘၣ်လဲၤဆူညါလၢၤတဂ့ၤ ဒီးကဟးထီၣ်ကွံာ်လၢသ၀ီပူၤ ဒ်သိးတၢ်ဒုးသုတကဲထီၣ်သးလၢသ၀ီပူၤတဂ့ၤအဂီၢ် န့ၣ်လီၤ. ဘၣ်ဆၣ် SAC ဒီး BGF သုးတဖၣ် တဒိကနၣ်သ၀ီဖိတဖၣ်အတၢ်ဟ့ၣ်ကူၣ်ဘၣ် ဒီးဖဲလါအီကူး ၁၀ ဒီး ၁၁သီအဘၢၣ်စၢၤန့ၣ် လဲၤ၀ဲဆူ ယိၤကျါသုးကလၢၤ လၢခီၣ်န့ၣ်လီၤ. သ၀ီဖိနီၢ်ဘ---ပာ်ဖျါထီၣ်၀ဲလၢ SAC ဒီး BGF သုးတဖၣ်တဲဆၢသ၀ီဖိလၢ "ပမူပဒါအိၣ်လၢ ပကဘၣ် လဲၤလီၤ.န" သ၀ီဖိအဂၤတဂၤ လၢအမ့ၢ် နီၢ် ၀---တခီ စံး၀ဲလၢ SAC ဒီး BGF သုးတဖၣ်တဲစ့ၢ်ကီးအ၀ဲသ့ၣ်လၢ "ပမ့သံဒၣ်လဲာ်န့ၣ် ပကဘၣ်လဲၤလီၤ"
ဖဲ SAC ဒီး BGF သုးတဖၣ်တချုးလဲၤတုၤဒံးဆူ တ---သ၀ီဒံးဘၣ်န့ၣ် လီၢ်က၀ီၤ KNLA သုးတဖၣ် ခး၀ဲ SAC ဒီး BGF သုးတဖၣ်အံၤလၢကျဲန့ၣ်လီၤ. တၢ်ခးလိာ်သးကဲထီၣ် လၢသ၀ီချၢဒီးကဲထီၣ်သး တစိၢ်ဖိအဃိ တၢ်ဘၣ်ဒိဘၣ်ထံးသ၀ီဖိတအိၣ် နီတမံၤဘၣ်န့ၣ်လီၤ. ဘၣ်ဆၣ် လီၢ်က၀ီၤသ၀ီဖိလၢအအိၣ်ဘူးဒီးတၢ်ကဲထီၣ်သးလီၢ် လီၤဆီဒၣ်တၢ် တ---သ၀ီဖိတဖၣ် နၢ်ဟူ ကျိသီၣ်အဃိ အ၀ဲသ့ၣ်ဘၣ်ဃ့ၢ်အိၣ်ခူသူၣ်လၢတၢ်ပျံၤတၢ်ဖုးအပူၤန့ၣ်လီၤ. နီၢ်ဘ--- စံး၀ဲလၢ "ပနၢ်ဟူ (ကျိသီၣ်) ဒီးပဃ့ၢ်လီၤ. ကျိသီၣ်အဃိ ပပျံၤဒီးပဃ့ၢ်လီၤ." အါန့ၢ်အန့ၣ် သုးတဖၣ် ခးလီၤကြီကျိဖးဒိၣ်အဃိ သ၀ီဖိအဘုဘၣ်ဒိအိၣ်န့ၣ်လီၤ. တၢ်ဒုးကဲထီၣ်လၢ လီၢ်က၀ီၤ KNLA သုး ဒီး SAC ပာ်ဖှိၣ်ထီၣ်သးဒီး BGF သုးတဖၣ်အဘၢၣ်စၢၤ တစိၢ်ဖိ (ကအိၣ် ၁၅မံးနံး) န့ၣ်လီၤ. တၢ်ဒုး၀ံၤအလီၢ်ခံ SAC ဒီး BGF သုးတဖၣ်လဲၤနုာ်လီၤလၢ တ---သ၀ီပူၤ ဒီးဖီၣ်န့ၢ် တ---သ၀ီဖိ လၢကျဲတဘျုးဂၤ ဖဲသ၀ီဖိတဖၣ် အိၣ်လၢစံာ်ပျီပူၤ ဃုအီၣ်ညၣ် ဒီး ကွၢ်ကျီၢကွၢ်ပနၢ်အခါန့ၣ်လီၤ. SAC ဒီး BGF သုးတဖၣ် မၢဆူၣ်သ၀ီဖိ တဖၣ်အံၤ ပိာ်အခံဒ်ကတီၤလၢတၢ်ဒီသဒၢလီၤသး ဒ်သိး KNLA သုးတဖၣ် သုးတခးလၢၤ အ၀ဲသ့ၣ်တဂ့ၤအဂီၢ်န့ၣ်လီၤ. သ၀ီဖိတဖၣ်အံၤ ပၣ်ဃုာ် ပိာ်ခွါ ပိာ်မုၣ် ဒီးဖိသၣ်တဖၣ်န့ၣ်လီၤ. SAC ဒီး BGF သုးတဖၣ် ပျၢ်ကွံာ်သ၀ီဖိတဖၣ်အံၤ ဖဲအ၀ဲသ့ၣ် လဲၤတုၤလၢ တ---သ၀ီ ခိၣ်ထိးအဆၢကတီၢ်န့ၣ်လီၤ.
တၢ်ဒုးကဲထီၣ်၀ံၤအလီၢ်ခံ SAC ဒီး BGF သုးတဖၣ်နုာ်လီၤလၢ တ---သ၀ီအခါ သ၀ီဖိတဖၣ် အိၣ်ခူသူၣ်ဒံးဒၣ်တၢ်လၢတၢ်ပူၤ ခီဖျိတၢ်ခးလိာ်သးကဲထီၣ်အဃိန့ၣ်လီၤ. SAC ဒီး BGF သုးတဖၣ်နုာ်လီၤဃုတၢ် (KNLAသုးဖိတဖၣ်) လၢသ၀ီပူၤ ဒီးဖဲအထံၣ် သ၀ီဖိတဖၣ် အိၣ်ခူသူၣ်လၢဟံၣ်ဖီလာ်အခါ အ၀ဲသ့ၣ်မၤပျံၤမၤဖုးသ၀ီဖိတဖၣ် ဒ်အမ့ၢ် ပညိၣ်ဃီၤကျိခိၣ်ဆူသ၀ီဖိ ဃုာ်ဒီး ဖိသၣ်တဖၣ်အအိၣ်န့ၣ်လီၤ. သုးဖိတဖၣ်အံၤ တဲပျံၤသ၀ီဖိလၢ KNLA သုးတဖၣ် မ့ဟဲခးအ၀ဲသ့ၣ်န့ၣ် အ၀ဲသ့ၣ်ကခး လီၤကျိ ဖးဒိၣ်လၢသ၀ီပူၤန့ၣ်လီၤ.
SAC ဒီး BGF သုးဖိ နုာ်လီၤဃိတၢ်လၢသ၀ီဖိအဟံၣ် (၂) ဖျၢၣ် လၢတ---သ၀ီမုၢ်နုာ်တကပၤ ဖဲဟံၣ်ကစၢ်ဃ့ၢ်အိၣ်ခူသူၣ်အခါ ဒီးအီၣ်ဟုၣ်သ၀ီဖိတၢ်ဖိတၢ်လံၤန့ၣ်လီၤ. ဖဲသုးဖိတဖၣ်နုာ်လီၤလၢဟံၣ်အဆိကတၢၢ်တဖျၢၣ်န့ၣ် ဟုၣ်တၢ်တချုးနီတမံၤဘၣ် မ့ၢ် လၢအနၢ်ဟူတၢ်သီၣ်လၢဟံၣ်အဂၤတဖျၢၣ်အဃိ (ဆိမိၣ်၀ဲလၢပှၤကွၢ်ဟုၣ်အီၤအဃိ)န့ၣ်လီၤ. ဘၣ်ဆၣ် ဖဲအ၀ဲသ့ၣ်လဲၤဃိတၢ် လၢဟံၣ်အဂၤတဖျၢၣ်န့ၣ် အီၣ်ဟုၣ်ကွံာ်သ၀ီဖိလီတဲစိတဖျၢၣ် ဒီး သဘျုၣ် ၃ ပီၢ် န့ၣ်လီၤ.
SAC ဒီး BGF သုးတဖၣ်အိၣ်ဖဲသီခါဖၠၢ် (ဖဲလါအီကူး ၁၀သီ)ဟါအခါ အ၀ဲသ့ၣ် ခးသ၀ီဖိဆီဒီးထိၣ်ဒ့ၣ်လၢအလဲၤဘူးဒီး သီခါ ဖၠၢ်တဖၣ် ဘၣ်ဆၣ် ခးအီၣ်၀ဲတချုးနီတဘ့ၣ်ဘၣ်န့ၣ်လီၤ. ဖဲ SAC ဒီး BGF သုးတဖၣ်အိၣ်ဖဲသီခါဖၠၢ် တဘျီအံၤန့ၣ် အ၀ဲသ့ၣ် ဖီၣ်အီၣ်သ၀ီဖိထိၣ်ဒ့ၣ်န့ၢ်အစှၤကတၢၢ်တဘ့ၣ်န့ၣ်လီၤ.
SAC ဒီး BGF သုးဖိတနီၤ မၢသ၀ီဖိ (၂) ဂၤ လဲၤပှ့ၤန့ၢ်အီၤသံး န့ၣ်လီၤ. သ၀ီဖိအကျါတဂၤန့ၣ် မ့ၢ်ဖိသၣ် အသးနံၣ်အိၣ်ထဲ (၈) နံၣ်န့ၣ်လီၤ. တုၤမ့ၢ် SAC ဒီး BGF သုးတဖၣ် မူၤထီၣ်သံးန့ၣ် သ၀ီဖိ လီၤဆီဒၣ်တၢ် ပိာ်မုၣ်တဖၣ် ပျံၤတၢ်ဒိၣ်ထီၣ် ဘၣ်ယိၣ်၀ဲ လၢ သုးတဖၣ်အံၤ ကမၤတပျုၢ်တပျီၤတၢ်အါထီၣ် ဒ်အမ့ၢ် သွံၣ်ထံးမုၣ်ခွါတၢ်မၤပယွဲ ဒီး တၢ်ခးလီၤကြီကျိဖးဒိၣ်တဖၣ် ဒ်လၢ အပူၤကွံာ် သ၀ီဖိကွၢ်ဆၢၣ်မဲာ်ဘၣ်၀ဲတဖၣ်န့ၣ်လီၤ. အဃိ မုၢ်နၤခီအဆၢကတီၢ် ပိာ်မုၣ်ဒီးဖိသၣ်တဖၣ် မံလၢအကစၢ်ဟံၣ်ဒၣ်၀ဲ တဘူၣ်လၢၤဘၣ် မ့ၢ်လၢ ပိာ်ခွါတဖၣ် စံၣ်ပီၤတၤ ဒီးဟံၣ်ဖိဃီဖိတနီၤ လဲၤမံၤဆူ သ၀ီချၢလၢစံာ်ဒဲပူၤန့ၣ်လီၤ. နီၢ် ၀---ပာ်ဖျါထီၣ် ၀ဲလၢ "မ့ၢ်… (လၢညါတၢ်မၤပယွဲသွံၣ်ထံးမုၣ်ခွါ)တခါအံၤကဲထီၣ်သးအါကတၢၢ်. မုၢ်နၤခီန့ၣ် သုးတဖၣ်မၢသ၀ီဖိလဲၤပှ့ၤ န့ၢ်အီၤသံး. ပဘၣ်ယိၣ်လၢ အ၀ဲသ့ၣ်မ့မူထီၣ်န့ၣ် ကဖီၣ်ဆူၣ်ဘၣ်ပိာ်မုၣ်တဖၣ် အဃိ ပမၢပိာ်မုၣ်ဖိတဖၣ် လဲၤမံလၢ သ၀ီမုၢ်နုာ် တကပာ် (လၢအယံာ်ဒီးသီခါဖၠၢ် သုးအိၣ်အလီၢ်). မ့မ့ၢ်ပိာ်ခွါတဖၣ် လဲၤစံၣ်မံလၢသ၀ီချၢ ဘၣ်ယိၣ်သုးတဖၣ် ကဖီၣ်မၢပီၤတၤ ဒီးလဲၤနဲၣ်ကျဲဘၣ်ဖုး. ပဘၣ်ယိၣ်လၢ ပယီၤသုးတဖၣ်အံၤ မ့မူၤထီၣ်န့ၣ် ကခးလီၤနါစိၤကျိဖးဒိၣ်လၢသ၀ီပူၤ." (ဒ်လၢအပူၤကွံာ် သ၀ီဖိတဖၣ်လဲၤခီဖျိဘၣ်ပယီၤသုးတၢ်မၤပယွဲတဖၣ်န့ၣ်လီၤ.)
အါန့ၢ်အန့ၣ် သ၀ီဖိတဖၣ် ဘၣ်ပျံၤစ့ၢ်ကီး ခိရိၣ်နၣ်-၁၉ တၢ်ဆါ တၢ်ဘၣ်ကူၣ်ဘၣ်ဂာ်သ့ၣ်တဖၣ် အဃိ သ၀ီဖိတနီၤ လဲၤအိၣ် လၢသ၀ီချၢ ဒ်သိးသုတထံၣ်လိာ်ဘၣ်သးဒီးပှၤအါအါဘၣ်အဂီၢ်န့ၣ်လီၤ. SAC ဒီး BGF သုးတဖၣ် မ့ၢ်ပှၤလၢတၢ်ချၢ ပှၤနီၣ် ဂံၢ်အါ ဒီးအ၀ဲသ့ၣ်အိၣ်ဟဲလၢ ၀့ၢ်ပူၤ ဒီးအ၀ဲသ့ၣ် ဟဲဟူးဂဲၤဟး၀့ၤ၀ီၤလၢပှၤတ၀ၢပူၤအဃိ သ၀ီဖိတဖၣ် ဘၣ်ယိၣ်လၢသုး တဖၣ်အံၤ ကဟဲစိာ်ဘၣ်ဖုးတၢ်ဆူးတၢ်ဆါလၢသ၀ီပူၤန့ၣ်လီၤ. နီၢ်၀---ပာ်ဖျါထီၣ်၀ဲလၢ ပယီၤသုးတဖၣ်တဲသ၀ီဖိဒ်အံၤ "ပှၤဂ့ၤ န့ၣ် မံလၢသ၀ီပူၤလီၤ. ပှၤမ့မံၤလၢသ၀ီချၢန့ၣ် မ့ၢ်အ၀ဲသ့ၣ်အဒုၣ်အဒါ (အ၀ဲသ့ၣ်မ့ထံၣ်ပှၤလၢသ၀ီချၢလၢမုၢ်နၤခီတဂၤလၢ်လၢ် န့ၣ် အ၀ဲသ့ၣ် ကခး၀ဲလီၤ)." အဃိ သ၀ီဖိလၢ အလဲၤအိၣ်လၢသ၀ီချၢ လၢတၢ်ဒီသဒၢ ခိရိနၣ်-၁၉ တၢ်ဆါတဖၣ် ဘၣ်ပျံၤကဒါ ပယီၤသုးတဖၣ်န့ၣ်လီၤ.
ဖဲလါအီကူး ၁၁ သီ, ၂၀၂၁ နံၣ် ဂီၤခီ ၉း၀၀ နၣ်ရံၣ်န့ၣ် SAC ဒီး BGF သုးတဖၣ် မၢတ---ဒူသ၀ီခိၣ်နၢ်ခၢၣ်စး ဟံၣ်တဖျၢၣ်တဂၤ ကလဲၤထံၣ်လိာ်သးဒီးအ၀ဲသ့ၣ်ဖဲသီခါဖၠၢ်န့ၣ်လီၤ. ၀ံၤအ၀ဲသ့ၣ် မၢသ၀ီဖိ ၁၅ ဂၤ ဃုာ်ဒီး ပိာ်မုၣ် ပိာ်ခွါ ဒီးပှၤ သးပှၢ်တဖၣ် ကလဲၤပိာ်အ၀ဲသ့ၣ်ခံဆူ ယိၤကျါသုးကလၢၤ ဒီးစံး၀ဲလၢ အ၀ဲသ့ၣ် တသ့ၣ်ညါကျဲဘၣ်န့ၣ်လီၤ. ပှၤသ့ၣ်ညါထွဲ တၢ်ဂ့ၢ် နီၢ် လ---ပာ်ဖျါထီၣ်၀ဲလၢ "သုးတဖၣ်တဲလၢအကလဲၤလၢ အ---သ၀ီ ဒီးတသ့ၣ်ညါကျဲဘၣ်. အဃိ အ၀ဲသ့ၣ်မၢသ၀ီဖိ လဲၤပိာ်အခံန့ၣ်လီၤ." မ့မ့ၢ်နီၢ် ဘ---တခီပာ်ဖျါထီၣ်၀ဲလၢ "သုးတဖၣ်န့ၣ်လဲၤလၢ အ---သ၀ီဘၣ်ဒါခီ ဘၣ်ဆၣ် အပျံၤတၢ် ...ဘၣ်ယိၣ်လၢ KNLA ကခးအ၀ဲသ့ၣ်အဃိ. KNLA သုးတဖၣ် အိၣ်ကတီၤအသးထီဘိလၢ ကက၀ီၤခးအ၀ဲသ့ၣ်အဂီၢ်လီၤ. အဃိ အ၀ဲသ့ၣ်မၢဆူၣ်သ၀ီဖိပိာ်မုၣ်တဖၣ်လဲၤဆှၢအီၤ ဒ်ကတီၤလၢတၢ်ဒီသဒၢလီၤသးအဂီၢ်န့ၣ်လီၤ."
SAC ဒီး BGF သုးတဖၣ်တဲသ၀ီဖိလၢ အ၀ဲသ့ၣ်လဲၤမ့တုၤလၢ ယိၤကျါသုးကလၢၤန့ၣ် ကပျဲလီၤကွံာ်သ၀ီဖိတဖၣ် တဘျီဃီ န့ၣ်လီၤ. ဘၣ်ဆၣ် အါဒၣ်တၢ်တက့ၢ်သ၀ီဖိလၢအသးပှၢ် တလဲၤဆှၢ SAC ဒီး BGF သုးတဖၣ်ဘၣ်သ့ဂ့ၤဂ့ၤလီၤ. နီၢ် ၀---စံး၀ဲ လၢ သ၀ီသးပှၢ်တဖၣ် ဂုာ်ကျဲးစၢးတဲခဲးန့ၢ်တၢ်လၢသ၀ီဖိတဖၣ်အဂီၢ် ဒ်သိးအသုတဘၣ်လဲၤဆှၢ SAC ဒီး BGF သုးတဖၣ်အံၤ တဂ့ၤအဂီၢ် ဒ်အံၤ "ပျၢ်လီၤကွံာ်သ၀ီဖိတဖၣ်အံၤတခီ အ၀ဲသ့ၣ်န့ၣ်မ့ၢ်ဒၣ်သ၀ီဖိ မုၢ်စ့ၣ်မုၢ်ဂီၤလီၤ. သုမ့တပျၢ်လီၤကွံာ်အ၀ဲသ့ၣ် ဘၣ်ဒု အကျီၢ်ပနၢ်ကလီၤဒိသံလီၤ." အဃိအါဒၣ်တၢ်တက့ၢ်သ၀ီဖိတဖၣ် က့ၤဘၣ်လၢဟံၣ် ဘၣ်ဆၣ် သ၀ီသးပှၢ်မုၣ် (၂)ဂၤ လဲၤဆှၢ၀ဲ SACဒီးBGF သုးတဖၣ်အံၤလၢသ၀ီဖိအဂၤတဖၣ်အလီၢ်န့ၣ်လီၤ. (တၢ်အံၤ ဖျါလၢ SAC ဒီး BGF သုးတဖၣ်သူပိာ် မုၣ်လၢတၢ်ဒီသဒၢလီၤသးအဂီၢ် မ့ၢ်လၢ ဖဲပိာ်မုၣ်တဖၣ် မ့ဟးလၢ SAC ဒီး BGF သုးတဖၣ်အကျါန့ၣ် KNLA သုးတဖၣ် တခး အ၀ဲသ့ၣ်ဘၣ်န့ၣ်လီၤ.) သ၀ီဖိပိာ်ခွါ (၂) ဂၤ လဲၤပိာ်စ့ၢ်ကီး သ၀ီသးပှၢ်မုၣ် (၂) ဂၤအံၤအခံ ဒ်သိးကဒီသဒၢသးပှၢ်မုၣ်အဂီၢ်န့ၣ် လီၤ. သ၀ီဖိ (၄)ဂၤအံၤ တဘၣ်ယိးတၢ်ဖိတၢ်လံၤဒ်ပီၤတၤအသိးနီတဂၤဘၣ် ဘၣ်ဆၣ် အ၀ဲသ့ၣ်ဘၣ်ဟးလၢခီၣ် လၢတၢ်စူၤ ကျါ ကျဲလီၤဘျၢၣ် ဒီးဘၣ်ခီထံကျိထံယိာ် လၢတၢ်ကီတၢ်ခဲအပူၤ ဒီတနံၤကျၢၤန့ၣ်လီၤ. SAC ဒီး BGF သုးတဖၣ်သူအ၀ဲသ့ၣ် ဒ်ကတီၤလၢတၢ်ဒီသဒၢလီၤသးအဂီၢ်အဃိ အ၀ဲသ့ၣ်အိၣ်လၢ တၢ်လီၤဘၣ်ယိၣ်လီၤပျံၤအပူၤန့ၣ်လီၤ.
တုၤမ့ၢ်အ၀ဲသ့ၣ်လဲၤတုၤလၢ အ---သ၀ီခိၣ်ထိးန့ၣ် SAC ဒီး BGF သုးတဖၣ် ပျၢ်လီၤကွံာ်၀ဲ တ---သ၀ီဖိ (၄) ဂၤအံၤန့ၣ်လီၤ. တုၤမ့ၢ်သ၀ီဖိတဖၣ် ဟးထီၣ်လၢ အ---သ၀ီ၀ံၤန့ၣ် SAC ဒီး BGF သုးတဖၣ် ခးလီၤကြီကျိဖးဒိၣ်လၢအသုးကလၢၤ လၢအ အိၣ်ဘူးဒီး အ---သ၀ီ ကပၤ၀း၀းန့ၣ်လီၤ.
ဖဲလါအီကူး ၂၃ သီ, ၂၀၂၁ နံၣ်န့ၣ် KHRG ဒိးန့ၣ်အါထီၣ်ဘၣ်တၢ်ဂ့ၢ်တၢ်ကျိၤလၢ SAC ဒီး BGF သုးတဖၣ် ဟဲက့ၤလၢယိၤကျါသုးကလၢၤ ဒီးကက့ၤဆူ လ့က့ၣ်သုးကလၢၤအခါ ဟဲက့ၤဘၣ်၀ဲသ၀ီတဖၣ်ဒ်အမ့ၢ် အ--- တ--- စ--- ဒီး ရ---သ၀ီ တဖၣ်န့ၣ်လီၤ. လီၢ်က၀ီၤသ၀ီဖိတဖၣ် ပာ်ဖျါထီၣ်၀ဲလၢ SAC ဒီး BGF သုးတဖၣ် ဖီၣ်ဃာ်၀ဲ အ---သ၀ီဖိတဂၤ ဒီး မၢအကဲန့ၢ်အီၤပှၤနဲၣ်ကျဲဖဲ အ--- ဒီး တ---သ၀ီအဘၢၣ်စၢၤ ဒ်ကတီၤတခါလၢကဒီသဒၢလီၤသးအဂီၢ်န့ၣ်လီၤ. သ၀ီဖိတဖၣ် စံး၀ဲလၢ SAC ဒီး BGF သုးတဖၣ်အံၤ ကဘၣ်က့ၤလၢလ့က့ၣ်သုးကလၢၤအဂီၢ်န့ၣ် အ၀ဲသ့ၣ် သ့ၣ်ညါကျဲလံန့ၣ်လီၤ. SAC ဒီး BGF သုးတဖၣ် ဖဲအ၀ဲသ့ၣ်ဟဲက့ၤတုၤဖဲ တ---သ၀ီ အဆၢကတီၢ်န့ၣ် ပျၢ်လီၤကွံာ် အ---သ၀ီဖိတဂၤအံၤ ဒီး ဟ့ၣ်အီၤစ့ ၅၀၀၀ ကၠး ဘၣ်ဆၣ် သ၀ီဖိတဂၤအံၤ တဟံစ့ဘၣ်ဒီးစံးဘၣ် SAC ဒီး BGF သုးတဖၣ်အံၤလၢ "သုတတီၢ်ယၤဘၣ်န့ၣ်ကဲလံ. သုတဘၣ်ဟ့ၣ်ယၤတၢ်နီတမံၤဘၣ်." ဖဲသ၀ီဖိတဂၤအံၤ ဟးလၢ SAC ဒီး BGF သုးတဖၣ်အကျါအခါ အ၀ဲအိၣ်လၢတၢ်ဘၣ် ယိၣ်အပူၤ ဒီးဘၣ်ယိၣ်စ့ၢ်ကီး၀ဲလၢ SAC ဒီး BGF သုးတဖၣ် ကမၤဆါပယွဲအီၤဒ်တၢ်မၤအၢ မၤနးပှၤသ၀ီဖိလၢ အကဲပီၤတၤ လၢအပူၤကွံာ်တဖၣ်အသိးန့ၣ်လီၤ.
Footnotes:
[1] တၢ်ဂ့ၢ်တၢ်ကျိၤလၢ လံာ်ပာ်ဖျါတဘ့ၣ်အံၤအပူၤန့ၣ် တၢ်ဒိးန့ၢ်ဘၣ်အီၤဖဲ လါအီကူး ၁၃သီ ၂၀၂၁နံၣ်အပူၤန့ၣ်လီၤ. ဘၣ်တၢ်ဆှၢဟ့ၣ်ထီၣ်အီၤလၢ လီၢ်ကဝီၤၦၤမၤသကိးတၢ်တဂၤ ဖဲ ဒူသထူၣ်ကီၢ်ရ့ၣ် အပူၤ လၢအဘၣ်တၢ်သိၣ်လိအီၤ လၢကညီဂ့ၢ်ဝီခွဲးယာ်ကရူၢ် KHRG လၢကမၤနီၣ်မၤဃါတၢ်မၤဘၣ်ဒိၦၤဟီၣ်ခိၣ်ဖိခွဲးယာ်အတၢ်အိၣ်သးတဖၣ်ဖဲလီၢ်ကဝီၤပူၤန့ၣ်လီၤ. ၦၤတူၢ်ဘၣ်တၢ်တဖၣ်အမံၤ, တၢ်ဂီၤဒီး အိၣ်ဆိးလီၢ်ကျဲ လီၤတံၢ်လီၤဆဲးတဖၣ်န့ၣ် တၢ်မၤလီၤဘၢအီၤလၢအဝဲနီၢ်ကစၢ်တၢ်ဘံၣ်တၢ်ဘၢအဂီၢ်န့ၣ်လီၤ. တၢ်ဂ့ၢ်တၢ်ကျိၤလၢ တၢ်ကွဲးၡဲပၠးအါထီၣ်အီၤ ဖဲ ပနိကဝီၤအပူၤန့ၣ် မ့ၢ်ဝဲဒၣ် KHRG အတၢ်ကွဲးၡဲထီၣ်တၢ်ဂ့ၢ်တၢ်ကျိၤန့ၣ်လီၤ.
Print: