တၢ်ကဲထီၣ်သးအကလုာ်

တၢ်ဟံးဆူၣ်ဟီၣ်ခိၣ်ကပံာ်

တၢ်ကဲထီၣ်သးမုၢ်နံၤမုၢ်သီ

၂ဝ၁၅ နံၣ် တၢ်ကိၢ်ခါ

တၢ်ကဲထီၣ်သးတၢ်လီၢ်တၢ်ကျဲ (သဝီႇ ကရူၢ်ႇ ကီၢ်ဆၣ်ႇ ကီၢ်ရ့ၣ်)

ဒ---သဝီႇ ခၠီပၠၣ်ကရူၢ်ႇ ကၠဲၣ်ထိၤကီၢ်ဆၣ်ႇ ဒူသထူၣ်ကီၢ်ရ့ၣ်

ၦၤလၢအတူၢ်ဘၣ်တၢ်တဂၤအဂ့ၢ်အကျိၤ

မံၤ

စီၤတ---

သးနံၣ်

၃၈ နံၣ်

မုၣ်ခွါ 

ခွါ

ကလုာ်

ကညီ

ဟံၣ်ဖိဃီဖိ အိၣ် / တအိၣ်

အိၣ်

 တၢ်ဖံးတၢ်မၤ

တၢ်သူၣ်တၢ်ဖျး

တၢ်ဘူၣ်တၢ်ဘါ

ဘူးဒး

အိၣ်ဆိးဒူသဝီ 

ဒ---သဝီ

ၦၤလၢအမၤအၢပယွဲတၢ်တဂၤအဂ့ၢ်အကျိၤ

မံၤ        

လီၢ်လၤ

ခီပနံၣ်

အိၣ်သူၣ်လီၤသးလီၢ်ကျဲ  

အူလၣ်မီၤ

ခီပနံၣ်ခိၣ်

စူၤပၤ၀ါခီပနံၣ်  (Super One company)

နီၤယိသဝီႇ ခၠီပၠၣ်ကရူၢ်ႇ ကၠဲၣ်ထိၤကီၢ်ဆၣ်ႇ ဒူသထူၣ်ကီၢ်ရ့ၣ်

၁. ၡဲပၠးၦၤနဟံးန့ၢ်တၢ်ကဲထီၣ်သးတခါအံၤ တဆီဘၣ်တဆီတက့ၢ်.

ယ ဒိးန့ၢ်ဘၣ်တၢ်ဂ့ၢ်တၢ်ကျိၤဘၣ်ဃးတၢ်ဟံးဆူၣ်န့ၢ်ဟီၣ်ခိၣ်ကပံာ်တခါအံၤလၢ ကၠဲးထိၣ်ကီၢ်ဆၣ် ခ့ၣ်အဲန်ယူၣ်ပၢၤကီၢ် တဂၤအအိၣ်န့ၣ်လီၤ. ဝံၤအလီၢ်ခံ ယလဲၤထံၣ်လိာ်တဲသကိးစ့ၢ်ကီးတၢ်ဒီး ဒ---သဝီသးၦၢ်ႇ  ခၠီပၠၣ်ကရူၢ်ခိၣ်ဒီး ၦၤတူၢ်ဘၣ် တၢ်တဖၣ်အကျါတဂၤလၢအမ့ၢ် စီၤတ---န့ၣ်လီၤ.

ကွဲးနီၣ်ၦၤလၢဟ့ၣ်တၢ်ဂ့ၢ်အံၤတဂၤစုာ်စုာ်သ့ၣ်ညါ တၢ်ဂ့ၢ်အံၤအမ့ၢ်အတီလၢကျဲဒ်လဲၣ်.

တၢ်ဂ့ၢ်တၢ်ကျိၤအံၤဘၣ်တၢ်ပာ်ဖျါထီၣ်အီၤလၢ ၦၤတူၢ်ဘၣ်တၢ်တဖၣ်အကျါတဂၤဒီး ဒ---သဝီသးၦၢ် လၢအပၣ်ဃုာ်စ့ၢ်ကီး လၢၦၤတီၣ်ဖျါထီၣ်တၢ်ဂ့ၢ်အကျါတဂၤစ့ၢ်ကီးန့ၣ်လီၤ. ကရူၢ်ခိၣ်စီၤအ--- တခီတပာ်ဖျါထီၣ် တၢ်ဂ့ၢ်တၢ်ကျိၤ လၢလၢၦဲၤၦဲၤဘၣ် မ့ၢ်လၢအဝဲဟံးထီၣ်ဖီၣ်ထီၣ်မူဒါအသီအဃိန့ၣ်လီၤ.

ပာ်ဖျါတၢ်ကဲထီၣ်သးအဂ့ၢ်အကျိၤလၢလၢၦဲၤၦဲၤတက့ၢ်.

ဖဲ ၂ဝ၁၅ နံၣ်န့ၣ် စူၤပၤဝါခီပနံၣ် (Super One Company-SOC) လၢအဘၣ်တၢ်တီခိၣ်ရိၣ်မဲအီၤလၢ အူလၣ်မီၤအံၤ ဟံးဆူၣ်န့ၢ်ဝဲ ၦၤသဝီဖိ လၢအအိၣ်လၢ ဒ---သဝီ အဟီၣ်ခိၣ် (၆၄) အ့ကၢၢ်န့ၣ်လီၤ. သဝီအံၤအိၣ်သူၣ်လီၤအသးလၢ ကရူၢ်လၢ ခ့ၣ်အဲန်ယူၣ် ဒီးပယီၤပဒိၣ်ခံဖုလၢာ် အတၢ်ပၢဃါဃုာ်လိာ်သးအဖီလာ်န့ၣ်လီၤ. ၦၤသဝီဖိခွံဂၤလၢ ဘၣ်တၢ်ဟံးန့ၢ်ဆူၣ်ကွံာ် အဟီၣ်ခိၣ်တဖၣ် တဒိးန့ၢ်ဘၣ် စ့အီၣ်လိးနီတမံၤဘၣ်အမဲာ်ညါ  ကွၢ်ဆၢၣ်မဲာ်ဘၣ်ဝဲဒီး တၢ်လုၢ်အီၣ်နီၢ်ခိသးသမူ အတၢ်ဂ့ၢ်ကီတဖၣ်နၣ်လီၤ.  စီၤတ---လၢ ဘၣ်တၢ်ဟံးဆူၣ်န့ၢ်အဟီၣ်ခိၣ် (၁၃) အ့ကၢၢ်တဂၤအံၤပာ်ဖျါထီၣ်ဝဲ တၢ်ဂ့ၢ်ဆူ KHRG အိၣ်ဒ်အံၤ- “ဖဲအဝဲသ့ၣ်ဟံးဆူၣ်န့ၢ် ယဟီၣ်ခိၣ်ဝံၤန့ၣ် သူၣ်လီၤဝဲဒၣ်ကထံပိာ် ကအိၣ်ဝဲလၢ (၄) အ့ကၢၢ်လံ. ဟီၣ်ခိၣ်လၢအိၣ်တ့ၢ်တဖၣ် ထံတလီၤသံးဒံးဘၣ်အဃိ တသူၣ်လီၤဝဲတၢ်နီတမံၤဒံးဘၣ်. ဘၣ်ဆၣ် ထံမ့လီၤသံးဒု အဝဲသ့ၣ်ကသူၣ်လီၤအါထီၣ်ထံပိာ် နၣ်လီၤ.”  ဖဲ၂ဝ၁၉ နံၣ်အံၤန့ၣ် ခီပနံၣ်အံၤသူၣ်လီၤအါထီၣ်ဝဲ ကထံပိာ်အဃိ  အဟီၣ်ခိၣ် စံာ်လီၢ် အိၣ်တ့ၢ်ထဲ ခံ အ့ကၢၢ်ဧိၤန့ၣ်လီၤ.

စီၤတ----အဟီၣ်ခိၣ်လီၢ်တဖၣ်အံၤ ဘၣ်တၢ်ဟံးဆူၣ်န့ၢ်အီၤလၢ ခီပနံၣ် တဖုဝံၤတဖု ခဲလၢာ်သၢဖုစးထီၣ်လၢ ၂ဝ၁၂ နံၣ်လံဒီး ရွ့ၣ်သၤလွ့ၤခီပနံၣ်ဟံးန့ၢ်ဆူၣ်အဟီၣ်ခိၣ် စးထီၣ် ၂ဝ၁၂နံၣ်တုၤ ၂ဝ၁၄ နံၣ်ႇ  AIG ဟံးန့ၢ်ဆူၣ်ဝဲစးထီၣ် ၂ဝ၁၄နံၣ် တုၤ ၂ဝ၁၅နံၣ် ဒီး SOC ဟံးန့ၢ်ဆူၣ်ဝဲ စးထီၣ်လၢ ၂ဝ၁၅ နံၣ်ဒီးတုၤခဲအံၤန့ၣ်လီၤ. နံၣ်လၢအပူၤကွံာ်တဖၣ် တချုးလၢတၢ်ဟံးဆူၣ်န့ၢ်အဟီၣ်ခိၣ်ဒံးဘၣ်အခါန့ၣ်ႇ လၢတနံၣ်အတီၢ်ပူၤ အဝဲမၤန့ၢ်ဝဲဘုအနာ် ၂ဝဝ တုၤ ၃ဝဝ အဘၢၣ်စၢၤ ညါအဃိ မၤစၢၤဘၣ်အဟံၣ်ဖိဃီဖိ န့ၢ်ဂ့ၤဂ့ၤန့ၣ်လီၤ. ဖဲ ၂ဝ၁၅ နံၣ်ႇ ၂ဝ၁၆ နံၣ်ဒီး ၂ဝ၁၇ နံၣ်န့ၣ် အဝဲဒိးန့ၢ်ဘၣ်ဒံးတၢ်ပျဲလၢ ကမၤအီၣ်တၢ်လၢအကျီးပူၤန့ၣ်လီၤ. ဖဲ ၂ဝ၁၈ နံၣ်န့ၣ် အဝဲတူၢ်လၢာ်အစ့ ၂ဝဝႇဝဝဝ ကၠး လၢကဒိးလဲသိလ့ၣ်ထဲၣ်တၢ်အဂီၢ်န့ၣ်လီၤ. ဘၣ်ဆၣ်ဖဲအထဲၣ်လီၤအဟီၣ်ခိၣ်အခါ SOC ခီပနံၣ်အၦၤမၤတၢ်ဖိတဂၤ ဟ့ၣ်အီၤတၢ်ကလုၢ်လၢကဘၣ်ပတုာ်အတၢ်မၤအီၣ်စံာ်လၢအနီၢ်ကစၢ်စံာ်ပျီပူၤအံၤန့ၣ်လီၤ. လၢတၢ်ဂ့ၢ်အံၤအဃိ တၢ်ဂ့ၢ်ကီလၢ အပိာ်ထဲွထီၣ်အခံတဖၣ်မ့ၢ်ဝဲ တၢ်တဒိးန့ၢ်ဘၣ်တၢ်အီၣ်တၢ်အီ လၢလၢၦဲၤၦဲၤလၢ အဟံၣ်ဖိဃီဖိအဂီၢ်ဘၣ် အမဲာ်ညါ ဘၣ်ကွၢ်ဆၢၣ်မဲာ်ဝဲဒၣ်ဒီး မုၢ်ကျိၤဝဲၤကွာ် အတၢ်ဂ့ၢ်ကီတဖၣ်န့ၣ်လီၤ.

ဒ်သိးကလုၢ်အီၣ်လုၢ်အီအဟံၣ်ဖိဃီဖိအဂီၢ် စီၤတ--- ဒိးလဲကွၢ်န့ၢ်ဝဲၦၤဂၤပနၢ်တဖၣ် စးထီၣ်လၢ လါအီကူးတုၤ လါစဲးပထ့ဘၢၣ် ၂ဝ၁၈ နံၣ်န့ၣ်လီၤ. လၢန့ၣ်အမဲာ်ညါ အဝဲဘၣ်ပတုာ်ကွံာ်စ့ၢ်ကီးတၢ်ဒိးလဲကွၢ် ပနၢ်တဖၣ်အံၤမ့ၢ်လၢ တၢ်တဟ့ၣ်အီၤအခွဲးလၢ ကလဲၤဒုးအီၣ်ပနၢ်တဖၣ်လၢ နီၣ်လၢဟီၣ်ခိၣ်လၢတၢ်ဟံးဆူၣ်န့ၢ်အီၤဝံၤတဖၣ်အပူၤဘၣ်န့ၣ်လီၤ. အဝဲပာ်ဖျါထီၣ်စ့ၢ်ကီးအတၢ်ဘၣ်ယိၣ်ဘၣ်ဘီ လၢခါဆူညါ အတၢ်အိၣ်မူအဂီၢ်ဒ်အံၤ- “ပအိၣ်ဒီးပဟံၣ်ဖိဃီဖိႇ ပအိၣ်ဒီးပဖိပလံၤႇ ပတၢ်ဖံးတၢ်မၤမ့ၢ်တအိၣ်ဘၣ်ဒု တၢ်အံၤကကဲထီၣ်တၢ် ဂ့ၢ်ကီလၢပဂီၢ်ဖးဒိၣ်ညါ.” န့ၣ်လီၤ. အဝဲ အမါအနီၢ်ကစၢ်စ့ၢ်ကီးဘၣ်လဲၤမၤတၢ်လၢ ၦၤဂၤအရီဘၢၢ်ကျီး ဒီး ၦၤကရၢၢ်ပူၤ ဒ်သိးအတၢ်ဟဲနုာ်ကအါထီၣ်အဂီၢ်န့ၣ်လီၤ.

စီၤတ--- ပတံထီၣ်အတၢ်ဂ့ၢ်အံၤဆူ လီၢ်ကဝီၤခိၣ်နၢ်တဖၣ်အအိၣ်န့ၣ်လီၤ. ဖဲ ၂ဝ၁၇ နံၣ် လါဒံၤစဲဘၢၣ် ၂၆ သီ အနံၤ န့ၣ် ဒ--- သဝီသးၦၢ်ဒီး ကရူၢ်ခိၣ် ဆှၢထီၣ်လံာ်တၢ်ကအုကစွါတဘ့ၣ်ဆူ ကီၢ်ခိၣ်အူထ့ၤကၠီၤအအိၣ် ဒီး တီၣ်ထီၣ် တၢ်ဂ့ၢ် ခွံခါဆူ ဒူသထူၣ်ကီၢ်ရ့ၣ် ခ့ၣ်အဲန်ယူၣ်ခိၣ်နၢ်တဖၣ်အအိၣ်ဒီး လီၢ်ကဝီၤပယီၤပဒိၣ် ၦၤဘၣ်မူဘၣ်ဒါတဖၣ် အအိၣ်န့ၣ်လီၤ. တုၤလၢလါနိၤဝ့ဘၢၣ် ၂ဝ၁၈နံၣ်ဒၣ်လဲာ် အဝဲသ့ၣ်တဒိးန့ၢ်ဘၣ်တၢ်စံးဆၢနီတမံၤ ဒံးဘၣ်ဒီး SOC သူဒံးဒၣ်ဟီၣ်ခိၣ်လၢအဟံးဆူၣ်န့ၢ်ဝဲတဖၣ်န့ၣ်လီၤ.

စီၤတ--- ဂုာ်ကျဲးစၢးဒီးမၤလၢာ်ကဒီးအစ့ ထီၣ်ဘးလၢ ၅ဝဝႇဝဝဝ ကၠးဃၣ်ဃၣ် ဒ်သိးကဒိးန့ၢ်က့ၤဝဲအဟီၣ်ခိၣ် လၢဘၣ်တၢ်ဟံးဆူၣ်န့ၢ်အီၤလၢ ၂ဝ၁၅ တဖၣ်အံၤအဂီၢ်န့ၣ်လီၤ. စ့လၢအမၤလၢာ်ဝဲတဖၣ် အါတက့ၢ်တၢ်သူအီၤလၢ တၢ်လဲၤတၢ်က့ၤႇ တၢ်အိၣ်တၢ်ဆိးအပှ့ၤကလံၤဒီး ဟ့ၣ်စ့ၢ်ကီးစ့ဆူလီၢ်ကဝီၤ ခ့ၣ်အဲန်ယူၣ်ဒီးပယီၤပဒိၣ်တဖၣ်လၢ အမၤ စၢၤအီၤ လၢတၢ်ဂ့ၢ်အကျိၤအကျဲတဖၣ်န့ၣ်လီၤ. တၢ်အံၤကဲထီၣ်တၢ်ဆိကမိၣ်တခါလၢ ၦၤလၢဘၣ်တၢ်ဟံးဆူၣ်န့ၢ် အဟီၣ်ခိၣ်တဖၣ် ဘၣ်ဟ့ၣ်ကျိၣ်စ့အါအါဂီၢ်ဂီၢ် ထဲအံၤညါန့ၣ်လီၤ. ၦၤလၢအတူၢ်ဘၣ်တၢ်တဖၣ် အါတက့ၢ်ဟ့ၣ်ဝဲ တန့ၢ်ဘၣ်. တနီၤနီၤ ဟ့ၣ်ဝဲတန့ၢ်ဘၣ်အဃိ တူၢ်ဃၣ်ကွံာ်အတၢ်မုၢ်လၢ်လၢ ကမၤန့ၢ်က့ၤအဟီၣ်ခိၣ်ဒ်စီၤတ--- မၤဝဲ အသိး ဖဲ ၂ဝ၁၈နံၣ် လါအီးကထိဘၢၣ်အခါန့ၣ်လီၤ. ဖဲ ၂ဝ၁၉ နံၣ်အပူၤ ကရူၢ်ခိၣ်သီတဂၤပာ်ဖျါထီၣ်ဝဲလၢ ခ့ၣ်အဲန်ယူၣ်ကဂုာ်ကျဲးစၢးဟ့ၣ်ကၣ်က့ၤဝဲ  ၦၤတူၢ်ဘၣ်တၢ်တဖၣ် လၢဟီၣ်ခိၣ်အသီတဖၣ်လၢ တၢ်လီၢ်အဂၤတတီၤန့ၣ်လီၤ.

တၢ်ဟံးဆူၣ်ဟီၣ်ခိၣ်ကပံာ်ဂ့ၢ်ဝီ ကီၢ်ပယီၤမုၢ်ထီၣ်ကလံၤထံးအပူၤ ကဲထီၣ်တၢ်ကီတၢ်ခဲဒီး မၤဘၣ်ဒိဝဲဟီၣ်ခိၣ်ကစၢ်လၢ အန့ၢ်ပၢဘၣ်ဟီၣ်ခိၣ်ကပံာ်လၢ အမိၢ်ပၢ်ဖံဖုဟ့ၣ်သါတ့ၢ်အဝဲသ့ၣ်တဖၣ် ဒီး ဟီၣ်ခိၣ်လၢဘၣ်တၢ်မၤနီၢ်ဃာ်အီၤဝံၤတဖၣ်န့ၣ်လီၤ. ၦၤတူၢ်ဘၣ်တၢ်ခွံဂၤအံၤ အိၣ်ဒီးခ့ၣ်အဲန်ယူၣ်အဟီၣ်ခိၣ်ကပံာ်လံာ်အုၣ်သးန့ၣ်လီၤ. ဘၣ်ဆၣ်လံာ်အုၣ်သး တဖၣ်အံၤ တဘၣ်တၢ်ပာ်ပနီၣ်အီၤလၢ ကီၢ်ပယီၤပဒိၣ်ဘၣ်အမဲာ်ညါ တၢ်ဒီသဒၢတၢ်ဟံးဆူၣ်န့ၢ်ဟီၣ်ခိၣ်ကပံာ်တဖၣ် စ့ၢ်ကီးစှၤဝဲ လီၤဆီဒၣ်တၢ်ႇ ဖဲတၢ်လီၢ်လၢဘၣ်တၢ်ပၢအီၤလၢပဒိၣ်ခံဖု လၢာ်တဖၣ်အပူၤန့ၣ်လီၤ. အါန့ၢ်အန့ၣ် ခ့ၣ်အဲန်ယူၣ်တကပၤစ့ၢ်ကီး ဖျါလၢတၢ်မၤလီၤတံၢ်ဝဲအနီၢ်ကစၢ်ဟီၣ်ခိၣ်ကပံာ်သနူဒ်သိးတၢ်ကပာ်ပနီၢ်အီၤအဂီၢ် တတုၤထီၣ်ထီၣ်ဘးဘၣ် မ့ၢ်လၢအဝဲသ့ၣ် အတၢ်မၤဂ့ၤထီၣ်တၢ်ဟ့ၣ်စ့အီၣ်လိးလၢ ဟီၣ်ခိၣ်လၢတၢ်ဟံးဆူၣ်န့ၢ်အီၤ တဖၣ်အဂီၢ်တအိၣ်ဘၣ်အမဲာ်ညါ အဝဲသ့ၣ်တိာ်ပာ်ဝဲလၢ ကဟ့ၣ်လီၤ ဟီၣ်ခိၣ်အသီတတီၤဆူ ၦၤတူၢ်ဘၣ်တၢ်တဖၣ် အအိၣ်န့ၣ်လီၤ. တၢ်ဘၣ်ယိၣ်အလီၢ်အဂၤတမံၤမ့ၢ်ဝဲ စီၤတ--- အဟီၣ်ခိၣ် ဘၣ်တၢ်ဟံးဆူၣ်န့ၢ်အီၤမ့ၢ်လၢ အပယီၤ ပဒိၣ်အဟီၣ်ခိၣ်ကပံာ်လံာ်အုၣ်သး လၢအဘၣ်တၢ်ပာ်ပနီၣ်အီၤလၢအမ့ၢ်လံာ်အုၣ်သးထဲတဘ့ၣ်ဧိၤလၢအဖိးသဲစးဒီး ထီဒါတၢ်ဟံးဆူၣ်ဟီၣ်ခိၣ်ကပံာ် လၢကီၢ်ပယီၤပူၤန့ၢ်အံၤတအိၣ် အဃိန့ၣ်လီၤ.

မ့ၢ်ၦၤလၢအတူၢ်ဘၣ်တၢ်ဖၣ် ဟ့ၣ်ၦၤတၢ်ခွဲးတၢ်ယာ်လၢပကသူတၢ်ဂ့ၢ်တၢ်ကျိၤတခါအံၤဧါႇ ဟ့ၣ်ၦၤတၢ်ခွဲး တၢ်ယာ်လၢပကသူတၢ် ဂ့ၢ်အံၤလၢကျဲဒ်လဲၣ်.

ၦၤတူၢ်ဘၣ်တၢ်ဟ့ၣ် ကညီဂ့ၢ်ဝီခွဲးယာ်ကရူၢ် အခွဲးလၢကသူဝဲတၢ်ဂ့ၢ်တၢ်ကျိၤအံၤန့ၣ်လီၤ.