SAC ခးလီၤနါစိၤကျိဖးဒိၣ်ဖဲ ဒီၣ်ဖါခိၣ်ကီၢ်ဆၣ်အပူၤ

တၢ်ကဲထီၣ် (၁) - လါအီးကထိဘၢၣ် ၇ သီ, ၂၀၂၄ နံၣ်

ဖဲလါအီးကထိဘၢၣ် ၇ သီ, ၂၀၂၄ နံၣ်အနံၤ, ဟါလီၤခီ ၆း၄၅ အဆၢကတီၢ်, ထံကီၢ်တၢ်ပၢတၢ်ပြးကီၢ်ကးကရၢ (SAC) သုးဖိ လၢ အအိၣ်ဟဲလၢခီၣ်သုးရ့ၣ်(ခလရ) (နီၣ်ဂံၢ်-၃၉) အိၣ်ဆီလီၤအသးဖဲ အ--- သဝီ, သၣ်ဒီၣ်ကၠံကျဲမုၢ်, တီအူကီၢ်ရ့ၣ် သ့ၣ်တ ဖၣ် ခးလီၤဝဲကျိဖးဒိၣ် (၃) ဖျၢၣ်ဖဲ အ--- သဝီ, စ့းဖူတီၣ်ကရူၢ်, ဒီၣ်ဖါခိၣ်ကီၢ်ဆၣ်, တီအူကီၢ်ရ့ၣ်အပူၤန့ၣ်လီၤ. တၢ်ဒုးတၢ်ယၤကဲထီၣ် တ့ၢ်အသးဖဲသဝီပူၤမ့ၢ်ဂ့ၤ, တၢ်လီၢ်လၢအဘူးဒီးသဝီမ့ၢ်ဂ့ၤတအိၣ်ဘၣ်ဆၣ် SAC ခးလီၤနါစိၤကျိဖးဒိၣ် လၢသဝီပူၤန့ၣ်လီၤ. ကျိဖးဒိၣ်အကျါတဖျၢၣ်လီၤတဲာ်ပိၢ်ဖးထီၣ်ဖဲသဝီဖိလၢအမံၤမ့ၢ် စီၤဘ--- တဂၤအသဲးထူၣ်အကျါဖဲထံက မျၢတဖျၢၣ်အဃၢၤလၢ အအိၣ်ဘူးဒီးအဟံၣ်ဖဲသဝီပူၤန့ၣ်လီၤ. ကျိဖးဒိၣ်ပိၢ်ဖးထီၣ်အက့သ့ၣ်တဖၣ်ဖျိးဒီးဘၣ်ဟးဂီၤဝဲ စီၤဘ--- အသဲးထူၣ်, တခီးထူၣ်, သိလ့ၣ်ယီၢ်, ဟံၣ်ဒူၣ်ကပၤ ဒီး ဟံၣ်ခိၣ်ဒုးထးဝါသ့ၣ်တဖၣ်န့ၣ်လီၤ. ဖဲကျိဖးဒိၣ်လီၤတဲာ်ပိၢ်ဖးထီၣ်အ ဆၢကတီၢ်, ပှၤအိၣ်လၢဟံၣ် ပူၤ (၅) ဂၤပၣ်ဃုာ်ဒီး စီၤဘ--- လၢအသးနံၣ်အိၣ်ဝဲ (၄၇) နံၣ် တဂၤန့ၣ်လီၤ. ကျိဖးဒိၣ်အက့ တက့ဖျိးဘၣ်ဝဲ စီၤဘ--- အမဲာ်တူၢ်ခိၣ်လၢအထွဲတကပၤဒီးအိၣ်ထီတ့ၢ်ဃာ်လၢအညၣ်ကျါန့ၣ်လီၤ. စီၤဘ--- အဟံၣ်ဖိဃီဖိ လၢအဂၤသ့ၣ်တဖၣ် ထုးထီၣ်ကွံာ်ကျိဖးဒိၣ်အက့အံၤ ဒီး တၢ်တံာ်စုမ့ၣ်ဝံၤကူစါယါဘျါအီၤဖဲအဟံၣ်န့ၣ်လီၤ. စီၤဘ--- အံၤမ့ၢ်လၢ အဘၣ်ဒိအဃိ တၢ်ညၣ်ဂိၢ်ထီၣ်အီၤဒီး ဘၣ်အိၣ်မံနီၤဝဲလၢအလီၢ်မံပူၤန့ၣ်လီၤ. ဖဲလါယနူၤအါရံၤ ၂၀၂၅ နံၣ်န့ၣ်, အဝဲဘျါက့ၤဝဲလၢ တၢ်ညၣ်ဂိၢ် တၢ်ဆါန့ၣ်လီၤ.

တၢ်ကဲထီၣ်သး (၂) - လါအီးကထိဘၢၣ် ၈ သီ, ၂၀၂၄ နံၣ်အနံၤ

ဖဲလါအီးကထိဘၢၣ် ၈ သီ, ၂၀၂၄ နံၣ်အနံၤ, ဟါလီၤခီ ၇:၄၇ မံးနံးအဆၢကတီၢ်, SAC သုးဖိလၢအိၣ်ဆီလီၤအသးဖဲ ဆဲးသိမဲၣ်ဝ့ၢ်, ဒီၣ်ဖါခိၣ်ကီၢ်ဆၣ် သ့ၣ်တဖၣ်ခးလီၤဝဲကျိဖးဒိၣ် (၂) ဖျၢၣ်ဆူ ပရှီလိာ်ကရူၢ်, ဒီၣ်ဖါခိၣ်ကီၢ်ဆၣ် န့ၣ်လီၤ. ဖဲလါအီးကထိဘၢၣ် ၈ သီ, ၂၀၂၄ နံၣ်အနံၤန့ၣ်, တၢ်ဒုးတၢ်ယၤတကဲထီၣ်သးဖဲဟီၣ်ကဝီၤအံၤအပူၤဘၣ်ဆၣ် SAC သုးဖိတဖၣ် ခးလီၤနါစိၤကျိဖးဒိၣ်န့ၣ်လီၤ. ကျိဖးဒိၣ်တဖျၢၣ်လီၤတဲာ်ဝဲဖဲသဝီဖိခံဂၤလၢအမံၤမ့ၢ် အူဆ--- ဒီး ဒီၤဒ---အဟံၣ်ဘၢၣ်စၢၤ ဖဲဃ--- သဝီပူၤ, ပရှီလိာ်ကရူၢ် ဒီးပိၢ်ဖးထီၣ်ဝဲန့ၣ်လီၤ. ဒီၤဒ--- အံၤအသးနံၣ်အိၣ်ဝဲ (၂၅) နံၣ် ဒီးအပၢ် အူဆ--- အံၤအသးနံၣ်အိၣ် (၅၆) နံၣ်န့ၣ်လီၤ.

အူဆ--- ဒီး အမါဒီၤခ--- အံၤအိၣ်ဝဲလၢဟံၣ်ပူၤဖဲကျိဖးဒိၣ်လီၤတဲာ်ဘူးဒီးအဟံၣ်အဆၢကတီၢ်န့ၣ်လီၤ. လၢတၢ်ပိၢ်ဖးထီၣ်အံၤ အဃိ, ကျိဖးဒိၣ်အက့တက့ဖျိးဘၣ်ဒိဝဲ အူဆ--- အခီၣ်လ့ၢ်ခိၣ်လၢအထွဲတကပၤန့ၣ်လီၤ. အူဆ--- အံၤဒိးကူစါယါဘျါလၢ အဟံၣ်ဖိဃီဖိအအိၣ်ဖဲအဟံၣ်န့ၣ်လီၤ. ကျိဖးဒိၣ်အံၤဘၣ်ဒိဟးဂီၤစ့ၢ်ကီးဟံၣ်ခိၣ်ဒုး, တၢ်ပာ်ဆ့ကၤလီၢ်, တၢ်ဒူၣ်ကပၤအအူးခဲ, ဟံၣ်ဒူၣ်ကပၤအသ့ၣ်ဘၣ်, ဘူးဒးတၢ်ဘါအလီၢ်, တၢ်ဟးလီၢ်, ထိးကပိၤ, ထံပာ်ကီၤတၢၣ်, ထံပာ်ကီၤအဒၢ (လၢတၢ်သူအီၤလၢ လုၢ်ထံ  ဒီး ဆှုၣ်ကူတၢ်သိးအဂီၢ်), မ့ၤသပၢၤ ဒီးဟံၣ်ဃီတၢ်ပီးတၢ်လီအဂၤသ့ၣ်တဖၣ်န့ၣ်လီၤ.

ဒီၤဒ--- အဟံၣ်ဖိဃီဖိလွံၢ်ဂၤအိၣ်ဖဲဟံၣ်ပူၤဖဲကျိဖးဒိၣ်လီၤတဲာ်ဘူးဒီးအဟံၣ်အဆၢကတီၢ်န့ၣ်လီၤ. ကျိဖးဒိၣ်အက့ဘၣ်ဒိဝဲ ဒီၤဒ--- အကံၣ်ဒုၣ်န့ၣ်လီၤ. ကျိဖးဒိၣ်အက့ဘၣ်ဒိစ့ၢ်ကီးဝဲ ဒီၤဒ--- အဖိခွါခံဂၤလၢအမံၤမ့ၢ် ဂ--- သးနံၣ် (၆) နံၣ် ဒီး ဟ---သးနံၣ် (၁) နံၣ်ဘျဲၣ် န့ၣ်လီၤ. ကျိဖးဒိၣ်အက့တက့ဖျိးဘၣ်ဝဲ ဂ--- အဟၢဖၢဒီး အဟၢဖၢဘၣ်ဒိဝဲဒၣ်န့ၣ်လီၤ. ကျိဖးဒိၣ်အ က့ဘၣ်စ့ၢ်ကီးဝဲ ဟ--- အခိၣ်သၣ်ဃံလၢအထွဲတကပၤဒီးဘၣ်ဒိဝဲဒၣ်န့ၣ်လီၤ. ပှၤလၢအဘၣ်ဒိ (၃) ဂၤအံၤဘၣ်ဒိဝဲတဆံးတ က့ၢ်အဃိအဝဲသ့ၣ် ဒိးကူစါယါဘျါသးဖဲဟံၣ်န့ၣ်လီၤ. ဒီၤဒ--- အဟံၣ်စ့ၢ်ကီးဘၣ်ဟးဂီၤဝဲအဟံၣ်ခိၣ်ဒုး, ဟံၣ်ပဲတြီ, ကီၣ်ဒၢ (၁) ဖျၢၣ်, ဟံၣ်ဒူၣ်ကပၤ အအူးခဲ, ဆီကရၢၢ် (၂) ဖျၢၣ်, ဒီးဟံၣ်တၢ်ပီးတၢ်လီလၢအဂုာ်အဂၤတဖၣ်ဘၣ်ဟးဂီၤဝဲဒၣ်န့ၣ်လီၤ.

အသီတဂီၤဖဲတၢ်ကဲထီၣ်သးဝံၤလီၢ်ခံန့ၣ်, ဒီၤဒ--- အဟံၣ်ဖိဃီဖိဘၣ်လဲၤအိၣ်က့ၤဝဲလၢအဘူးအတံၢ်အဟံၣ်လၢ သဝီအဂၤတ ဖျၢၣ်လၢအမ့ၢ် ဧ--- သဝီ, ပရှီလိာ်ကရူၢ် ပူၤဒီးဒိးကူစါယါဘျါအသးဖဲအဘူးအတံၢ်အဟံၣ်န့ၣ်လီၤ. မ့မ့ၢ်အပၢ် အူဆ---ဒီး အမိၢ် ဒီၤခ--- န့ၣ်အိၣ်ဆိးဝဲဒၣ်ဖဲအကစၢ်အဟံၣ်ဖဲသဝီပူၤန့ၣ်လီၤ.

တၢ်ကဲထီၣ်သး (၃) - လါဒံၣ်စဲဘၢၣ် ၁၂-၂၀၂၄

ဖဲလါဒံၣ်စဲဘၢၣ် ၁၂ သီ, ၂၀၂၄ နံၣ်အနံၤ, ဂီၤ ၈း၃၉ မံးနံးအဆၢကတီၢ် SAC ပယီၤသုးဖိလၢအအိၣ်ဖဲ သုးကလၢၤလၢအအိၣ် ဆီလီၤအသးဖဲ ဆဲးခၠီးမဲၤ (၁၆ မံးလၥ်) သဝီလၢအဘၣ်တၢ်သ့ၣ်ညါစ့ၢ်ကီးအီၤဒ်အမ့ၢ် ယ့ၤပူၤစဲသဝီ, သၣ်ဒီၣ်ကၠံကျဲ, တီအူကီၢ် ရ့ၣ် ခးလီၤဝဲကျိဖးဒိၣ် (၂) ဖျၢၣ်ဆူ လ--- သဝီ, ပရှီလိၥ်ကရူၢ်, ဒီၣ်ဖါခိၣ်ကီၢ်ဆၣ် န့ၣ်လီၤ. ကျိဖးဒိၣ်တဖျၢၣ်လီၤတဲာ်ဘၣ်ဝဲ သဝီဖိအဟံၣ်တဖျၢၣ် ဒီးပိၢ်ဖးထီၣ်ဝဲန့ၣ်လီၤ. ဟံၣ်ကစၢ်အမံၤမ့ၢ်ဝဲအူသ---န့ၣ်လီၤ. ကျိဖးဒိၣ်ပိၢ်ဖးထီၣ်ဒီးဘၣ်ဟးဂီၤဝဲ အူသ--- အဟံၣ် ဒီးတၢ်ပီးတၢ်လီလၢအအိၣ်ဖဲဟံၣ်ပူၤဒ်အမ့ၢ် လီၢ်ဆ့ၣ်နီၤ, လီမ့ၢ်အူနီၣ်ဝံၣ်ကသုၣ်, သပၢၤဖီမ့ၤ ဒီး လီမ့ၢ်အူတၢ်ထုးထီၣ် ထံစဲးသ့ၣ်တဖၣ်န့ၣ်လီၤ.  ဖဲ SAC ခးလီၤကျိဖးဒိၣ်အဆၢကတီၢ်, အူသ--- ဒီးအမါန့ၣ်အိၣ်လၢအဟံၣ်မဲာ်ညါအဃိအဝဲသ့ၣ်တ ဘၣ်ဒိဘၣ်ထံးနီတမံၤဘၣ်န့ၣ်လီၤ.

ကျိဖးဒိၣ်အက့ဘၣ်ဟးဂီၤစ့ၢ်ကီးဝဲ မက--- အဟံၣ်ပဲတြီမဲာ်ထံကလၤန့ၣ်လီၤ. မက--- န့ၣ်မ့ၢ်ဝဲအူသ--- အဖိမုၣ်အဒိၣ်က တၢၢ်တဂၤန့ၣ်လီၤ. လၢန့ၣ်အမဲၣ်ညါကျိဖးဒိၣ်အက့ဘၣ်ဟးဂီၤစ့ၢ်ကီးဝဲ လ--- အဟံၣ်တၢ်ဒူၣ်ကပၤ, ဟံၣ်ခိၣ်ဒုး, ဒီးဟံၣ်ပဲတြီ မဲာ်ထံကလၤ န့ၣ်လီၤ. လ--- အံၤမ့ၢ်ဝဲ အူသ--- အဖိမုၣ်လၢအဆံးကတၢၢ်တဂၤန့ၣ်လီၤ. လ--- အဖိခွါလၢအသးနံၣ်အိၣ် (၈) နံၣ်လၢအမံၤမ့ၢ် မ--- တဂၤအံၤအိၣ်ဘူးဒီးဟံၣ်အဃိကျိဖးဒိၣ်အက့ဘၣ်အီၤဖဲအအကံၣ်ဒုၣ်လၢအထွဲတကပၤန့ၣ်လီၤ. သဝီဖိ လၢအဘၣ်ဒိတဂၤအံၤဒိးကူစါယါဘျါလၢအဟံၣ်ဖိဃီဖိအအိၣ်ဖဲအဟံၣ်ပူၤဒီးဘျါက့ၤဝဲဒၣ်န့ၣ်လီၤ. သဝီဖိသ့ၣ်တဖၣ်တနၢ်ဟူဝဲ ကျိဖးဒိၣ်ပိၢ်ဖးထီၣ်သီၣ်ဘၣ်အဃိအဝဲသ့ၣ်တသ့ၣ်ညါဝဲလၢမ့ၢ်အလီၤတဲာ်လၢတၢ်လီၢ်ဖဲလဲၣ်ဘၣ်န့ၣ်လီၤ.

SAC တၢ်ခးလီၤနါစိၤကျိဖးဒိၣ်အဃိဘၣ်သံဝဲသဝီဖိတဂၤဖဲ ထီတထူၣ်ကီၢ်ဆၣ်

ဖဲလါအီးကထိဘၢၣ် ၃၀ သီ, ၂၀၂၄ နံၣ်, ဖဲဟါ ၄ နၣ်ရံၣ်ဃၣ်ဃၣ်န့ၣ်, SAC ပယီၤသုးဖိလၢအအိၣ်ဖဲသုးကလၢၤလၢအအိၣ်ဘူး ဒီး န--- သဝီ, သၣ်ဒီၣ်ကၠံကျဲမုၢ်, တီအူကီၢ်ရ့ၣ် တဖၣ်ခးလီၤဝဲကျိဖးဒိၣ် (၃) ဖျၢၣ်ဆူ န--- သဝီ, ဒ့လိၥ်ကရူၢ်, ထီတထူၣ် ကီၢ်ဆၣ်, တီအူကီၢ်ရ့ၣ် ပူၤန့ၣ်လီၤ. ဖဲနံၤအဝဲန့ၣ်တၢ်ဒုးတၢ်ယၤတကဲထီၣ်နီတမံၤဘၣ်ဆၣ် SAC သုးဖိတဖၣ်ခးလီၤဝဲကျိဖးဒိၣ် ဆူသဝီပူၤန့ၣ်လီၤ. ဖဲတၢ်ခးလီၤကျိဖးဒိၣ်အဆၢကတီၢ်န့ၣ်, သဝီဖိလၢအမံၤမ့ၢ် မဝ--- တၢ်သ့ၣ်ညါစ့ၢ်ကီးအီၤဒ် ပ--- တဂၤအံၤ လုၢ်ထံဖဲ ထံကမျၢကပၤ, လၢအစီၤစုၤယံၤဒီးသဝီခၢၣ်သးတစဲးဒီးထံပူၤအံၤအိၣ်ဘူးဝဲဒီးသီခါဖၠၣ်န့ၣ်လီၤ. SAC အကျိဖးဒိၣ်လၢ အခးလီၤဝဲအကျါတဖျၢၣ်လီၤတဲာ်ပိၢ်ဖးထီၣ်ဖဲ မဝ--- လုၢ်ထံအလီၢ်လၢအစီၤစုၤကအိၣ်ဝဲ (၅) ပျၢ် (၄.၅ မံးထၢၣ်) န့ၣ်လီၤ. ကျိဖးဒိၣ်အက့ဘၣ်ဝဲ မဝ--- အကိာ်ဘိ, အခီၣ်ဒီးအမိၢ်ပှၢ်ဒီတဂၤအဃိအဝဲသံကွံၥ်ဝဲဖဲတၢ်ပျီပူၤန့ၣ်လီၤ. မဝ--- န့ၣ်, အသး နံၣ်အိၣ် (၃၀) နံၣ်, ဒီးမ့ၢ်မိၢ်တဂၤလၢအိၣ်ဒီးဖိခွါ (၃) ဂၤလၢအသးနံၣ်အိၣ် (၈) နံၣ်ဆူအဖီလာ်သ့ၣ်တဖၣ်န့ၣ်လီၤ. တချုးလၢတၢ်ကဲထီၣ်သးဒ်ဘၣ်အစီၤစုာ်အိၣ် ၁၉ သီန့ၣ်, အဝၤသံကွံာ်လၢသူၣ်တၢ်ဆါအဃိန့ၣ်လီၤ.  ဖဲအဝၤသံဝံၤအလီၢ်ခံပူၤ ကွံာ် ၂၀ သီန့ၣ်, မဝ-- စ့ၢ်ကီးသံကွံၥ်ဝဲလၢကျိဖးဒိၣ်ဘၣ်အီၤအဃိန့ၣ်လီၤ. လၢတၢ်န့ၣ်အဃိ, ဆၢကတီၢ်ခဲအံၤ မဝ---အဖိသၢဂၤ န့ၣ်, အဟံၣ်ဖိဃီဖိအဂၤသ့ၣ်တဖၣ်အံးထွဲကွၢ်ထွဲက့ၤဝဲလီၤ. ကျိဖးဒိၣ်အဂၤ (၂) ဖျၢၣ်န့ၣ်လီၤတဲာ်ဒီးပိၢ်ဖးထီၣ်ဝဲ ဖဲကီၢ်ပယီၤပဒိၣ် သ့ၣ်ပဟံၣ်အကျီးပူၤ, လၢအအိၣ်စီၤစုၤယံၤဒီးသဝီတစဲးဒီး ဘၣ်ဟးဂီၤဝဲသ့ၣ်ပဟံၣ်အထူၣ်တနီၤန့ၣ်လီၤ.

လါယနူၤအါရံၤ ၃ သီ, ၂၀၂၅ နံၣ် အတၢ်ပာ်ဖျါ

တုၤဃီၤဖဲ လါယနူၤအါရံၤ ၂၀၂၅ နံၣ်ဒၣ်လဲာ်န့ၣ်, SAC တဟ့ၣ်တၢ်တိစၢၤမၤစၢၤလၢပှၤဘၣ်ဒိဘၣ်ထံးတဖၣ်အဂီၢ်မ့ၢ်ဂ့ၤ, တၢ်ဟး ဂူာ်ဟးဂီၤမ့ၢ်ဂ့ၤလၢအဝဲသ့ၣ်ခးလီၤဘၣ်ဝဲသ့ၣ်တဖၣ်ဘၣ်န့ၣ်လီၤ. အဝဲသ့ၣ်တဃ့ဝံသးစူၤဝဲသဝီဖိဘၣ်ဃးတၢ်လၢအမၤတ့ၢ်ဝဲ သ့ၣ်တဖၣ်ဘၣ်န့ၣ်လီၤ.သဝီဖိလၢအအိၣ်ဖဲဒူသဝီလၢအဘၣ်တၢ်ခးလီၤအီၤသ့ၣ်တဖၣ်လိၣ်ဘၣ်စ့ၢ်ကီးတၢ်တြီတၢ်တြၢ်လၢတၢ်ကဲထီၣ်သးဒ်အံၤအဖီခိၣ်န့ၣ်လီၤ. လၢ SAC ခးလီၤကျိဖးဒိၣ်ဒ်အံၤအဃိဒူသဝီဖိတဖၣ်အိၣ်ဒီးတၢ်ဘၣ်ယိၣ်ဘၣ်ဘှီလၢအဝဲသ့ၣ်အ တၢ်ဘံၣ်တၢ်ဘၢအဂီၢ်န့ၣ်လီၤ. အဝဲသ့ၣ်အဲၣ်ဒိးဝဲလၢ KHRG ကပာ်ဖျါထီၣ်န့ၢ်အီၤတၢ်အိၣ်သးဒီးတဲန့ၢ်ခဲးတၢ်လၢအဝဲသ့ၣ်အဂီၢ်ဒ် သိး SAC ကပတုာ်ကွံာ်တၢ်ခးလီၤတၢ်လၢအဝဲသ့ၣ်အဒူသဝီပူၤန့ၣ်လီၤ.