တၢ်ဒုးတၢ်ယၤ, တၢ်မၤသံမၤဝီ ဒီးတၢ်ဖီၣ်န့ၢ်ဆူၣ်တၢ်ဖဲ ဝ့ၢ်ထူကရူၢ်ပူၤ

ဖဲလါယနူၤအါရံၤ ၂ သီ, ၂၀၂၅ နံၣ်အနံၤန့ၣ် SAC [ထံကီၢ်တၢ်ပၢတၢ်ပြးကီၣ်ကးကရၢ] အသုးလၢသုးဂံၢ်ဘါကအိၣ်ပှၤအဂၤ (၈၀) ဘျဲၣ် လၢ်တၢ်တသ့ၣ်ညါအသုးရ့ၣ်သုးထံးအနီၣ်ဂံၢ်ဘၣ်တဖု ဟဲထီၣ်ဝဲဆူ ဖဲဝ့ၢ်ထူကရူၢ်, ဒီၣ်ဖါခိၣ်ကီၢ်ဆၣ်, တီအူကီၢ်ရ့ၣ်ပူၤ လၢကမၤဝဲသုးတၢ်ဟူးတၢ်ဂဲၤန့ၣ်လီၤ. လီၢ်ကဝီၤသဝီဖိတဖၣ်စံးဝဲလၢ SAC သုးဖိတဖၣ်အံၤ ပာ်ဖှိၣ်ထီၣ်သးဒီး လီၢ်ကဝီၤသုးရ့ၣ် တဖၣ်လၢအအိၣ်ဆီလီၤသးဖဲဒီၣ်ဖါခိၣ်ကီၢ်ဆၣ်ပူၤန့ၣ်လီၤ. ဖဲအဝဲသ့ၣ် [SAC] လဲၤထီၣ်က့ၤလီၤဖဲလီၢ်ကဝီၤပူၤအခါ ဘၣ်သဂၢၢ် လိာ်သးဒီး ကမျၢၢ်တၢ်ဒီသဒၢသုး [PDF] သုးတဖၣ်လၢအမ့ၢ် ပဝၤနံၤ (ခိၣ်ဖၢၣ်ဂီၤ) အသုးကျိၤ [ လၢအဟူးဂဲၤဖဲ တီအူကီၢ်ရ့ၣ်ပူၤ လၢအအိၣ်လၢ ကညီဒီကလုာ်တၢ်ထူၣ်ဖျဲးသုးမုၢ်ဒိၣ် (KNLA) သုးက့ နီၣ်ဂံၢ် (၂) အတၢ်တီခိၣ်ရိၣ်မဲအဖီလာ်] တဒူၣ်န့ၣ်လီၤ. ဖဲန့ၣ်ဒီး တၢ်ဒုးစဲးပြဲးကဲထီၣ်ဝဲလၢ SAC သုး ဒီး PDF သုး ပဝၤနံၤ အသုးကျိၤအဘၢၣ်စၢၤ ဖဲအ--- သဝီဃၢၤ, ဝ့ၢ်ထူကရူၢ်ပူၤ န့ၣ်လီၤ. တၢ်ဒုးကဲထီၣ်ဝဲထဲတစိၢ်ဖိ [စှၤန့ၢ်ဒံး အမံးနံး ၃၀] န့ၣ်လီၤ. ဖဲတၢ်ခးလိာ်သးကဲထီၣ်ဝဲဝံၤအလီၢ်ခံ, ဖဲလါယနူၤအါရံၤ ၂ သီ, ၂၀၂၅ နံၣ်အနံၤန့ၣ်, SAC သုးဖိတဖၣ် လဲၤဖီၣ်ဝဲ အ--- သဝီသးပှၢ် လၢအမံၤမ့ၢ် အူဘ--- ဖဲအဟံၣ်န့ၣ် လီၤ. အဝဲသ့ၣ်လဲၤ ထုးထီၣ်အီၤလၢအဟံၣ်ပူၤ ဒီးမၤသံကွံာ်အီၤလီၤ. ဝံၤဒီး, အဝဲသ့ၣ်ဟဲက့ၤစိာ်ဝဲအသံစိၣ်ဆူအဟံၣ်န့ၣ်လီၤ. လီၢ်ကဝီၤသဝီဖိတဖၣ် ထံၣ်ထွဲဝဲတၢ်ကဲထီၣ်သးလၢ SAC သုးဖိတဖၣ်မၤသံဝဲ သဝီသးပှၢ်အံၤန့ၣ်လီၤ. SAC သုးဖိတဖၣ် ဖီၣ်န့ၢ်စ့ၢ်ကီးဝဲအ--- သဝီဖိ အဂၤတနီၤန့ၣ်လီၤ. ဘၣ်ဆၣ်သနာ်က့ KHRG တဒိးန့ၢ်ဘၣ်တၢ်ဂ့ၢ်တၢ်ကျိၤလၢသဝီဖိလၢ အဘၣ်တၢ်ဖီၣ်န့ၢ်အီၤတဖၣ် အမံၤအသၣ်ဘၣ်န့ၣ်လီၤ.

ဖဲလါယနူၤအါရံၤ ၃ သီ, ၂၀၂၅ နံၣ်အနံၤန့ၣ် တၢ်ဒုးကဲထီၣ်ဝဲသးအသီတဘျီ လၢ SAC သုးဖိတဖၣ်ဒီး PDF သုးလၢအမ့ၢ်ဝဲ ပဝၤနံၤသုးကျိၤ ဖဲအဘူးဝဲဒီး စ--- သဝီ, ဖဲဝ့ၢ်ထူကရူၢ်ပူၤန့ၣ်လီၤ. ဖဲတၢ်တနံၤန့ၣ် တၢ်ဒုးအံၤကဲထီၣ်သးဖးယံာ်ညါ (တဘျုးနၣ် ရံၣ်) န့ၣ်လီၤ. လၢတၢ်န့ၣ်အဃိ, PDF သုးဖိတနီၤအကျိချံလၢာ်ကွံာ်ဝဲ ဒီးအဝဲသ့ၣ်ပှၤခဲလၢာ် သုးဖိ (၇) ဂၤ လဲၤဃ့ၢ်အိၣ်ခူသူၣ်ဝဲ ဆူ အ--- တိၤတၢ်လီၢ် လၢအဘူးဒီး အ--- သဝီန့ၣ်လီၤ. SAC သုးဖိတဖၣ် ဖီၣ်န့ၢ်ဝဲ PDF သုးဖိ (၇) ဂၤလၢအအိၣ်ခူသူၣ်ဖဲ အ--- တိၤအံၤ ဒီးမၤသံကွံာ်အဝဲသ့ၣ်ခဲလၢာ်န့ၣ်လီၤ. PDF သုးဖိအဂၤတဖၣ်ဘၣ်ဒိဝဲဖဲတၢ်ဒုးအံၤအခါအိၣ်ဝဲန့ၣ်လီၤ.

SAC သုးဖိတဖၣ်ဖီၣ်န့ၢ်စ့ၢ်ကီးဝဲ စ--- သဝီဖိအဂၤတဖၣ်န့ၣ်လီၤ. SAC သုးအံၤ ဖီၣ်ဝဲ စ--- ဒီး အ--- သဝီဖိခဲလၢာ် (၆) ဂၤ ဖဲလါယနူၤအါရံၤ ၂ သီ ဒီး ၃ သီ, ၂၀၂၅ နံၣ်အနံၤန့ၣ်လီၤ. လီၢ်ကဝီၤသဝီဖိတဖၣ် ပာ်ဖျါထီၣ်ဝဲလၢ, SAC သုးအံၤမၤသံကွံာ်ဝဲ သဝီဖိ (၄) ဂၤလၢအဖီၣ်န့ၢ်ဝဲအကျါတဖၣ်န့ၣ်လီၤ [ဘၣ်ထွဲဒီးသဝီဖိလၢအဘၣ်တၢ်မၤသံအီၤသ့ၣ်တဖၣ်အဂ့ၢ်အကျိၤန့ၣ် တဒိးန့ၢ်ဘၣ်အါထီၣ်တၢ်ဂ့ၢ်တၢ်ကျိၤဘၣ်န့ၣ်လီၤ]. လီၢ်ကဝီၤသဝီဖိတဖၣ် တဲဖျါဝဲလၢ အဝဲသ့ၣ်ထံၣ်ဘၣ်ဝဲတၢ်ဂီၤမူလၢ (Facebook) အပူၤ လၢ SAC သုးမၤသံဝဲ PDF သုးဖိ ဒီးသဝီဖိလၢအဖီၣ်န့ၢ်ဝဲတဖၣ်လၢကျဲဒ်လဲၣ်န့ၣ်လီၤ. ဖဲတၢ်ဂီၤမူပူၤန့ၣ်, SAC သုးဖိတဖၣ်ကူးတရံးဝဲ PDF သုးဖိဒီးသဝီဖိတနီၤအကိာ်ဘိ ဒီး ခးသံဝဲအသ့ၣ်တနီၤန့ၣ်လီၤ.

တၢ်ဒွဲၣ်အူဟံၣ်ဃီတဖၣ် ဒီး တၢ်ဃ့ၢ်အိၣ်ကမှံဖဲဝ့ၢ်ထူကရူၢ်ပူၤ

ဖဲလါယနူၤအါရံၤ ၄ သီ ဒီး ၅ သီ, ၂၀၂၅ နံၣ်အနံၤန့ၣ် SAC သုးဖိတဖၣ် ဒွဲၣ်အူဝဲဟံၣ်အါအါဂီၢ်ဂီၢ် [အါန့ၢ်ဒံးဟံၣ်အဖျၢၣ် ၃၀] ဖဲစ--- သဝီန့ၣ်လီၤ. ဖဲလါယနူၤအါရံၤ ၇ သီ, ၂၀၂၅ နံၣ်အနံၤန့ၣ် SAC သုးဖိတဖၣ်ဆှၢအါထီၣ်ဝဲအသုးဖိလၢအအိၣ်ဟဲလၢ ယ့ၤတၤရှ့ၤ ကီၢ်ဆၣ်, ပကိကီၢ်ခီပူၤဒီးကါအခိၣ်တဆံ (၁၀) ဆူအ---, စ---, ဒ--- ဒီး ဧ--- သဝီတဖၣ်ဖဲ ဝ့ၢ်ထူကရူၢ်ပူၤန့ၣ်လီၤ. ခဲအံၤ (ဖဲလါယနူၤအါရံၤ ၂၀၂၅ နံၣ်) အပူၤန့ၣ်, SAC သုးဖိကအိၣ်ဝဲအါန့ၢ်ပှၤ (၅၀၀) ဂၤ ထူကရူၢ်ပူၤန့ၣ်လီၤ.

ခီဖျိလၢ SAC သုးအတၢ်ဟူးတၢ်ဂဲၤလၢအမ့ၢ် တၢ်ဆှၢအါထီၣ်သုးဖိနီၣ်ဂံၢ်, တၢ်ဒွဲၣ်အူသဝီဖိအဟံၣ်တဖၣ် ဒီး တၢ်မၤသံမၤဝီသဝီဖိ တဖၣ်အဃိ, လီၢ်ကဝီၤသဝီဖိတနီၤဃ့ၢ်ကွံာ်ဆူခူပူၤဝ့ၢ်ပူၤ, တနီၤဃ့ၢ်ဝဲဆူပှၢ်ပူၤ ဒီးတနီၤတခီဃ့ၢ်အိၣ်ဝဲဆူ သဝီအဂၤတဖၣ်အပူၤ န့ၣ်လီၤ. သဝီဖိလၢအဃ့ၢ်အိၣ်ကမှံတဖၣ်ဖဲအသ့ၣ်ဃ့ၢ်ထီၣ်အခါ အဝဲသ့ၣ်စိာ်ဝဲတၢ်ဖိတၢ်လံၤ [ဒ်အမ့ၢ် တၢ်အီၣ်တၢ်အီ, တၢ်ကူတၢ် ကၤ, မ့တမ့ၢ် ဟံၣ်ဃီတၢ်ပီးတၢ်လီတဖၣ်] တန့ၢ်နီတမံၤဘၣ်န့ၣ်လီၤ. သဝီဖိတဖၣ်အံၤအါတက့ၢ်အိၣ်ဟဲဝဲလၢသဝီ (၇) ဖျၢၣ်လၢအမ့ၢ် အ---, စ---, ဧ---, ဒ---, ဂ---, ဟ--- ဒီး သဝီလၢတၢ်တသ့ၣ်ညါဘၣ်အမံၤတဖျၢၣ်  ဖဲဝ့ၢ်ထူကရူၢ်ပူၤန့ၣ်လီၤ. သဝီဖိအါဂၤလၢအအိၣ်ဝဲလၢသဝီသ့ၣ်တဖၣ်အံၤန့ၣ်ဃ့ၢ်အိၣ်ဝဲဆူ ထ--- သဝီ, ယ--- သဝီ ဒီး သဝီအဂၤတနီၤ [တၢ်တသ့ၣ်ညါ အမံၤ] ဖဲဝ့ၢ်ထူကရူၢ်ပူၤန့ၣ်လီၤ. ပှၢ်ဃ့ၢ်အိၣ်ကမှံအနီၣ်ဂံၢ်ကအိၣ်ဝဲပှၤအဂၤတကထိ (၁,၀၀၀) ဃၣ်ဃၣ်လၢအဃ့ၢ်အိၣ်ဝဲဖဲ ထ--- သဝီန့ၣ်လီၤ. သဝီဖိတဖၣ်လၢအဃ့ၢ်ထီၣ်ဆူပှၢ်ကျါ, ဝ့ၢ်ပူၤ ဒီးသဝီအဂၤတဖၣ်န့ၣ် တၢ်တသ့ၣ်ညါဘၣ်ပှၤနီၣ်ဂံၢ်နီၣ်ဒွးအိၣ် ပှၤအဂၤထဲလဲၣ်ဘၣ်န့ၣ်လီၤ. စီၤက---, လအမ့ၢ်ပှၤလီၢ်ကဝီၤဖိတဂၤလၢအဝဲမုာ်သးမၤကလီမၤတၢ်လၢတၢ်ကွၢ်ထွဲပှၤဃ့ၢ်အိၣ်ကမှံ တဖၣ်ပာ်ဖျါထီၣ်ဝဲလၢ, အဝဲသ့ၣ်တဖၣ်လိၣ်ဘၣ်ဝဲ တၢ်အီၣ်တၢ်အီ ဒီး တၢ်ကူတၢ်ကၤတဖၣ်န့ၣ်လီၤ. အဝဲသ့ၣ်တဖၣ်ဃ့ထီၣ်ဝဲ ဂ့ၢ်ဂီၢ်အူတၢ်ဆီၣ်ထွဲမၤစၢၤဆူ တၢ်ဆီၣ်ထွဲမၤစၢၤတၢ်ကရၢကရိတဖၣ်အအိၣ်န့ၣ်လီၤ. [စီၤက--- ပာ်ဖျါထီၣ်ဝဲလၢ] တၢ်ဆၢကတီၢ် ကတံာ်တာ်ဒံးဝဲလၢပှၤဃ့ၢ်အိၣ်ကမှံသ့ၣ်တဖၣ်ကက့ၤဘၣ်က့ၤဆူအဒူသဝီပူၤကန့ၢ်အဂီၢ် [ခီဖျိလၢတကီၢ်ခါတၢ်ဘံၣ်တၢ်ဘၢအ တၢ်အိၣ်သးဖဲ လါယနူၤအါရံၤ ၂၀၂၅ နံၣ်] န့ၣ်လီၤ. ဖျိလၢတကီၢ်ခါတၢ်ဘံၣ်တၢ်ဘၢအတၢ်အိၣ်သးအဖီခိၣ်, ဖျါဝဲလၢသဝီဖိဖဲ ဝ့ၢ်ထူကရူၢ်ပူၤတဖၣ် ကဘၣ်ဃ့ၢ်အါထီၣ်အိၣ်ဒံးဝဲကွ့ၢ်ကွ့ၢ်န့ၣ်လီၤ.

တၢ်ဂ့ၢ်တၢ်ကျိၤအံၤ ဘၣ်တၢ်ဟ့ၣ်လီၤအီၤလၢ သဝီဖိခံဂၤလၢအအိၣ်ဖဲ ဝ့ၢ်ထူကရူၢ်ပူၤ, သဝီဖိအဂၤခံဂၤလၢအအိၣ်လၢ ပစီလိာ် ကရူၢ်, ဒီးပှၤလီၢ်ကဝီၤဖိတဂၤလၢအကွၢ်ထွဲဝဲသဝီဖိလၢအဘၣ်ဃ့ၢ်အိၣ်ကမှံလၢလီၢ်ကဝီၤပူၤတဖၣ်န့ၣ်လီၤ. [KHRG ပှၤမၤနီၣ်မၤ ဃါတၢ်ဖိ ဂုာ်ဆဲးကျိးမၤလီၢ်တံၢ်အါထီၣ်စ့ၢ်ကီးဝဲတၢ်ဒုးကဲထီၣ်သးအံၤအဂ့ၢ်ဒီးPDFခိၣ်နၢ်တဂၤလၢ အအိၣ်လၢသုးရ့ၣ်လၢတၢ် တသ့ၣ်ညါအီၤဘၣ်တဖု လၢအဟူးဂဲၤဖဲတီအူကီၢ်ရ့ၣ်အပူၤန့ၣ်လီၤ.]