တၢ်ပာ်ဖျါအဖုၣ်တဘ့ၣ်အံၤပာ်ဖျါဝဲတၢ်ကဲထီၣ်သးဖဲ ဒီၣ်ဖါခိၣ်ကီၢ်ဆၣ်, တီအူကီၢ်ရ့ၣ် အပူၤ ဖဲလါဒံၣ်စဲဘၢၣ် ၂၀၂၄ နံၣ်န့ၣ် လီၤ. ဖဲလါဒံၣ်စဲဘၢၣ် ၁၁ သီ, ၂၀၂၄ နံၣ်န့ၣ်, ထံကီၢ်တၢ်ပၢတၢ်ပြးကီၣ်ကးကရၢ (SAC) ပယီၤသုး အဒြိတဘ့ၣ်ဟဲကွံာ်လီၤမ့ၣ် ပိၢ် (၃) ဖျၢၣ် ဖဲအ---သဝီ, ဝ့ၢ်ထူကရူၢ်, ဒီၣ်ဖါခိၣ်ကီၢ်ဆၣ် ဒီးဘၣ်သံသဝီဖိတဂၤ, ဘၣ်ဒိကျီၢ်တဒု, ဟံၣ် (၂) ဖျၢၣ်ဒီးသ့ၣ်ထူၣ် တဖၣ်ဘၣ်ဟးဂီၤဝဲဒၣ်န့ၣ်လီၤ. ဖဲလါဒံၣ်စဲဘၢၣ် ၁၂ သီ, ၂၀၂၄ နံၣ်န့ၣ်, SAC သုးဖိလၢတၢ်တသ့ၣ်ညါအသုးရ့ၣ်သုးထံးဘၣ် တဖုပျဲလီၤဝဲဒြိ (၁) ဘ့ၣ်ဒီးတၢၤလီၤဝဲမ့ၣ်ပိၢ် (၂) ဖျၢၣ်ဖဲ ဘ--- သဝီ, ဝ့ၢ်ထူကရူၢ် ဒီးဘၣ်ဟးဂီၤဝဲသဝီဖိအဟံၣ် (၂) ဖျၢၣ်န့ၣ် လီၤ. လီၢ်ကဝီၤသဝီဖိသ့ၣ်တဖၣ်တသ့ၣ်ညါဝဲလၢဘၣ်မနုၤအဃိ SAC သုးအဒြိဘၣ်ဟဲကွံာ်လီၤတၢ်ဖဲအဝဲသ့ၣ်အသဝီပူၤလဲၣ် ဘၣ်န့ၣ်လီၤ.[1]
SAC ဒြိဟဲကွံာ်လီၤတၢ်ဒီးမ့ၣ်ပိၢ်ဖဲ ဝ့ၢ်ထူကရူၢ်, ဒီၣ်ဖါခိၣ်ကီၢ်ဆၣ်
တၢ်ကဲထီၣ်သးတၢတဘျီဖဲလါဒံၣ်စဲဘၢၣ် ၁၁ သီ, ၂၀၂၄ နံၣ်
ဖဲလါဒံၣ်စဲဘၢၣ် ၁၁ သီ, ၂၀၂၄ နံၣ်, ဂီၤခီ ၁၁ နၣ်ရံၣ် အဆၢကတီၢ်, ထံကီၢ်တၢ်ပၢတၢ်ပြးကီၣ်ကးကရၢ (SAC) သုးဖိတဖၣ် ပျဲ လီၤဝဲဒြိတဘ့ၣ်ဒီးဟဲကွံာ်လီၤတၢ်ဖဲ အ---သဝီ, ဝ့ၢ်ထူကရူၢ်, ဒီၣ်ဖါခိၣ်ကီၢ်ဆၣ်, တီအူကီၢ်ရ့ၣ်န့ၣ်လီၤ. အဝဲသ့ၣ် (SAC သုးဖိ) သူဝဲဒြိတဘ့ၣ်ဒီးကွံာ်လီၤဝဲမ့ၣ်ပိၢ် (၃) ဖျၢၣ် (တဖျၢၣ်ဝံၤတဖျၢၣ်) ဖဲသဝီပူၤန့ၣ်လီၤ. လီၢ်ကဝီၤသဝီဖိတဖၣ်နာ်ဝဲလၢ SAC သုးဖိ လၢအခးလီၤတၢ်ဒီးဒြိလၢဘျီဝဲအံၤန့ၣ်အိၣ်ဆိးဝဲဖဲသုးကလၢၤလၢအဘူးဒီး (ကျွဲပင်) တိၤလၢအိၣ်ဖဲ (စစ်တောင်းမြစ်) ထံ ကျိလၢအအိၣ်သူၣ်လီၤအသးဖဲ (ကျွဲရိုင်းပြင်)သဝီ, ဝ့ၢ်ထူကရူၢ် ပူၤန့ၣ်လီၤ.
မ့ၣ်ပိၢ်အကျါတဖျၢၣ်လီၤတဲာ်ဒီးပိၢ်ဖးထီၣ်ဝဲဖဲ အ---သဝီ ဘူးဒီးသဝီဖိတဂၤအဟံၣ်န့ၣ်လီၤ. မ့ၣ်ပိၢ်က့သ့ၣ်တဖၣ်ဘၣ်ဒိဒီးဘၣ် ဟးဂီၤဝဲသဝီဖိအဟံၣ် (၂) ဖျၢၣ်, ဃီၤတထူၣ်ဒီးသ့ၣ်ထူၣ်တဖၣ်န့ၣ်လီၤ. အဝဲသ့ၣ်အဟံၣ်ခိၣ်ဒုး, ဟံၣ်ဒါ, ဒီးဃီတဖၣ်ဘၣ်ဟး ဂီၤဝဲန့ၣ်လီၤ. ကျီၢ် (၁) ဒုဘၣ်ဒိစ့ၢ်ကီးလၢမ့ၣ်ပိၢ်အတၢ်ပိၢ်ဖးထီၣ်အံၤအဃိန့ၣ်လီၤ. ဟံၣ် (၂) ဖျၢၣ်အံၤအကစၢ်အမံၤမ့ၢ်ဝဲ အူဆ--- ဒီး အဖိဒိၣ်မုၣ်ဟံၣ်န့ၣ်လီၤ.
အူဆ--- ဘၣ်ဒိစ့ၢ်ကီးဒီးကျိဖးဒိၣ်အက့ဖဲအဝဲဘှီဂ့ၤထီၣ်က့ၤအလီၢ်ဆ့ၣ်နီၤ (ခး) ဒီးစီၤနီၢ်ခိၣ် (စပွဲ) ဖဲအဟံၣ်ဖီလာ်အဆၢက တီၢ်န့ၣ်လီၤ. အဝဲဘၣ်ဒိဝဲဒိၣ်ဒိၣ်မုၢ်မုၢ်ဖဲအကိာ်ဘိ, အစုထွဲဒီးအခီၣ်ကံၣ်ဒုၣ်လၢအစ့ၣ်တကပၤန့ၣ်လီၤ. ဖဲတၢ်ကဲထီၣ်သးဝံၤဘၣ် တၢ်ဆှၢအီၤဆူ (ဆွာ)တၢ်ဆါဟံၣ် လၢအဘၣ်တၢ်တီခိၣ်ရိၣ်မဲအီၤလၢ SAC ဖဲ (ဆွာ)ဝ့ၢ်ပူၤ, (ရေတာရှည်)ကီၢ်ဆၣ်, ပကိကီၢ်ခီ န့ၣ်လီၤ. လၢခံတနံၤဖဲဟါလီၤခီ ၇ နၣ်ရံၣ် အဆၢကတီၢ်အဝဲအသးသမူဟးထီၣ်ကွံာ် ဖဲတၢ်ဆါဟံၣ်အပူၤခီဖျိအဝဲဘၣ်ဒိဝဲနးမး အဃိန့ၣ်လီၤ. အူဆ--- မ့ၢ်ဝဲပယီၤကလုာ်ဒီးအဝဲမ့ၢ်ပယီၤသုးဖိလၢအိၣ်ဘှံးတ့ၢ်လၢပယီၤသုးတၢ်ဖံးတၢ်မၤပူၤလံန့ၣ်လီၤ. ဒ်အူ ဆ--- အဖိခွါပာ်ဖျါထီၣ်ဝဲဆူ KHRG အိၣ်အသိးဖဲအဝဲသံဝံၤအလီၢ်ခံအဟံၣ်ဖိဃီဖိတဒိးန့ၢ်ဘၣ်တၢ်အိၣ်ဘှံးကျိၣ်စ့လၢ SAC အအိၣ်လၢၤဘၣ်န့ၣ်လီၤ.
မ့ၣ်ပိၢ်အဂၤ (၂) ဖျၢၣ်န့ၣ်, လီၤတဲာ်ပိၢ်ဖးထီၣ်ဝဲဖဲသဝီချၢလၢအယံၤဒီးသဝီဖိအဟံၣ်န့ၣ်လီၤ. လၢတၢ်န့ၣ်အဃိ, ဟံၣ်ဃီတၢ်ဟး ဂူၥ်ဟးဂီၤမ့ၢ်ဂ့ၤ, သဝီဖိတၢ်ဘၣ်ဒိဘၣ်ထံးဒီးတၢ်သံတၢ်ပှၢ်မ့ၢ်ဂ့ၤတအိၣ်ဘၣ်န့ၣ်လီၤ.
ခီဖျိလၢ SAC ပယီၤသုးဖိအဒြိဟဲခးလီၤတၢ်အဃိ, ဘၣ်ဟးဂီၤသဝီဖိအဟံၣ်, ဘၣ်ဒိကျီၢ်တဒု, ဒီးဘၣ်သံဝဲသဝီဖိတဂၤန့ၣ်လီၤ. လၢတၢ်န့ၣ်အဃိသဝီဖိလၢအအိၣ်လၢသဝီပူၤသ့ၣ်တဖၣ်ဘၣ်ပျံၤတၢ်ဖုးတၢ်န့ၣ်လီၤ. လီၢ်ကဝီၤသဝီဖိတဖၣ်တသ့ၣ်ညါဝဲလၢဘၣ် မနုၤအဃိ SAC ပယီၤသုးဖိသ့ၣ်တဖၣ်ဟဲခးလီၤတၢ်ဒီးဒြိလၢအဝဲသ့ၣ်အသဝီပူၤလဲၣ်ဘၣ်န့ၣ်လီၤ. သဝီဖိသ့ၣ်တဖၣ် နာ်ဝဲလၢ တၢ်အံၤကဘၣ်မ့ၢ်ဟဲခီဖျိသးလၢ ကမျၢၢ်တၢ်ဒီသဒၢသုး PDF တဖၣ်အတၢ်ဟူးတၢ်ဂဲၤ ဖဲတၢ်လီၢ်ဖဲအံၤဒီးဟးထီၣ်ဟးလီၤလၢသ ဝီတဖျၢၣ်ဘၣ်တဖျၢၣ်အဃိန့ၣ်လီၤ.
SAC ပယီၤသုးဖိတဖၣ်အံၤသ့ၣ်ညါဝဲလၢ အူဆ--- လၢအမ့ၢ်သုးဖိလၢအအိၣ်ဘှံးတ့ၢ်တဂၤအံၤသံဝဲလၢဒြိတၢ်ဟဲတ့ၢ်လီၤတၢ်န့ၣ် လီၤ. သဝီဖိသ့ၣ်တဖၣ်စံးစ့ၢ်ကီးဝဲလၢ, SAC ပှၤဘၣ်မူဘၣ်ဒါတဖၣ်လဲၤဝဲဆူ, SAC တၢ်ဆါဟံၣ်ဖဲတၢ်မၤနီၣ်မၤဃါဝဲပှၤဆါသ့ၣ် တဖၣ်အိၣ်တၢ်အလီၢ်ဒီးဟံၣ်ဖိဃီဖိဝဲအံၤတဒိးန့ၢ်ဘၣ်တၢ်ဆီၣ်ထွဲမၤစၢၤလၢၤဘၣ်န့ၣ်လီၤ. သနာ်က့, SAC တဟံးထီၣ်မူဒါဒီး မၤ တၢ်လီၤတံၢ်လီၤဆဲးနီတမံၤလၢတၢ်ကဲထီၣ်သးတခါအံၤအဖီခိၣ်ဘၣ်န့ၣ်လီၤ. SAC တဃ့ဝံသးစူၤက့ၤဒၣ်လဲာ် အူဆ--- အဟံၣ် ဖိဃီဘၣ် ဒီး တဟ့ၣ်မၤစၢၤစ့ၢ်ကီးတၢ်နီတမံၤဘၣ်န့ၣ်လီၤ.
တၢ်ကဲထီၣ်သးခံဘျီတဘျီ ဖဲလါဒံၣ်စံဘၢၣ် ၁၂ သီ, ၂၀၂၄ နံၣ်
ဖဲလါဒံၣ်စဲဘၢၣ် ၁၂ သီ, ၂၀၂၄ နံၣ်, SAC ပယီၤသုးဖိလၢတၢ်တသ့ၣ်ညါအသုးရ့ၣ်သုးထံးအံၤဟဲကွံာ်လီၤတၢ်ဒီးဒြိဖဲ ဘ---သဝီ, ဝ့ၢ်ထူကရူၢ်, ဒီၣ်ဖါခိၣ်ကီၢ်ဆၣ် န့ၣ်လီၤ. အဝဲသ့ၣ်ဟဲတ့ၢ်လီၤဝဲမ့ၣ်ပိၢ်ဖးဒိၣ်တဖျၢၣ်လၢအသယၢၢ်ဃၢကအိၣ်ဝဲ ၁၀ ဆူ ၁၂ (ပီၣ်), ဒီးတ့ၢ်လီၤကဒီးအဆံးတဖျၢၣ်ဖဲသဝီပူၤန့ၣ်လီၤ. ခီဖျိဒြိဟဲခးလီၤတၢ်အဃိသဝီဖိအဟံၣ်ခံဖျၢၣ်ဘၣ်ဟးဂီၤကွံာ်ဝဲ, ဘၣ် ဆၣ်ဟံၣ်ကစၢ်န့ၣ်ခီဖျိဃ့ၢ်ထီၣ်ဆိကွံာ်အဃိတၢ်ဘၣ်ဒိဘၣ်ထံးတအိၣ်နီတမံၤဘၣ်န့ၣ်လီၤ. အဝဲသ့ၣ်ဃ့ၢ်ထီၣ်မုၢ်နံၤမုၢ်သီလီၤ တံၢ်လီၤဆဲးန့ၣ်တၢ်တသ့ၣ်ညါလီၤတံၢ်ဘၣ်မ့ၢ်လၢ KHRG ပျီပူၤပှၤမၤတၢ်ဖိတတဲသကိးဘၣ်တၢ်ဒီးအီၤဒံးဘၣ်အဃိန့ၣ်လီၤ. တၢ် ဂ့ၢ်တၢ်ကျိၤအံၤတၢ်ဒိးန့ၢ်အီၤခီဖျိလၢလီၢ်ကဝီၤသဝီဖိဖဲသဝီပူၤန့ၣ်လီၤ.
Footnotes:
[1] တၢ်ဂ့ၢ်တၢ်ကျိၤလၢ လံာ်ပာ်ဖျါတဘ့ၣ်အံၤအပူၤန့ၣ် တၢ်ဒိးန့ၢ်ဘၣ်အီၤဖဲ လါယနူၤအါရံၤ ၂၀၂၅ နံၣ် အပူၤန့ၣ်လီၤ. ဘၣ်တၢ်ဆှၢဟ့ၣ်ထီၣ်အီၤလၢ လီၢ်ကဝီၤ ၦၤမၤသကိးတၢ်တဂၤ ဖဲဘျံး-ဒ၀ဲၢ်ကီၢ်ရ့ၣ်အပူၤ လၢအဘၣ်တၢ်သိၣ်လိအီၤ လၢကညီဂ့ၢ်ဝီခွဲးယာ်ကရူၢ် KHRG လၢကမၤနီၣ်မၤဃါတၢ်မၤဘၣ်ဒိၦၤဟီၣ် ခိၣ်ဖိခွဲးယာ်အတၢ်အိၣ်သးတဖၣ်ဖဲလီၢ်ကဝီၤပူၤန့ၣ်လီၤ. ၦၤတူၢ်ဘၣ်တၢ်တဖၣ်အမံၤ, တၢ်ဂီၤဒီး အိၣ်ဆိးလီၢ်ကျဲ လီၤတံၢ်လီၤဆဲးတဖၣ်န့ၣ် တၢ်မၤလီၤဘၢ အီၤလၢအဝဲနီၢ်ကစၢ်တၢ်ဘံၣ်တၢ်ဘၢအဂီၢ်န့ၣ်လီၤ. တၢ်ဂ့ၢ်တၢ်ကျိၤလၢတၢ်ကွဲးၡဲပၠးအါထီၣ်အီၤဖဲပနိကဝီၤအပူၤန့ၣ် မ့ၢ်ဝဲဒၣ် KHRG အတၢ်ကွဲးၡဲထီၣ်တၢ်ဂ့ၢ် တၢ်ကျိၤန့ၣ်လီၤ.
Print:Print:
