ပသးခုလၢ ပထုးထီၣ်ဘၣ်ကဒီးလံာ်တၢ်ကစီၣ်ပှဲၤထီၣ်ဝဲ ၂၃ ဝီတဝီန့ၣ်လီၤ. လံာ်တၢ်ကစီၣ်အံၤ ဘၣ်တၢ်ကွဲးအီၤတနံၣ်ခံဘျီ န့ၣ်လီၤ. လံာ်တၢ်ကစီၣ်လၢ အဘၣ်တၢ်ကွဲးအီၤခဲအံၤတဘ့ၣ်အံၤ ဘၣ်တၢ်ဟံးန့ၢ် တၢ်ဂ့ၢ်တၢ်ကျိၤ စးထီၣ်ဖဲလါမးရှး တုၤ လါအီကူး ၂ဝ၂၄ နံၣ် အပူၤန့ၣ်လီၤ. ဘၣ်ဆၣ်နကထံၣ်ဘၣ်တၢ်ဂ့ၢ်တၢ်ကျိၤ, တၢ်ကဲထီၣ်သးလၢအပူၤကွံာ်တနီၤ လၢဘၣ်တၢ်ကွဲးပာ်ဖျါအီၤအိၣ်ဝဲ မ့ၢ်လၢတၢ်ဂ့ၢ်တၢ်ကျိၤသ့ၣ်တဖၣ်အံၤ ဘၣ်တၢ်ဒိးန့ၢ်ဘၣ်အီၤလၢ ယဲၢ်လါအတီၢ်ပူၤအဆၢကတီၢ်ပူၤအဃိန့ၣ်လီၤ.

KHRG အလံာ်တၢ်ကစီၣ်တဘ့ၣ်အံၤ မ့ၢ်ဝဲဒၣ်တၢ်ကွဲးပာ်ဖှိၣ်တၢ်ကစီၣ်လၢအအိၣ်ဟဲလၢကညီကီၢ်ရ့ၣ်နွံဘ့ၣ်အပူၤဒီး လၢတၢ်ကွဲးတဖၣ်အကျါ တၢ်မၤဘၣ်ဒိပှၤဂ့ၢ်ဝီခွဲးယာ်တခါစုာ်စုာ် အတၢ်ဂ့ၢ်ကီသ့ၣ်တဖၣ် လၢကီၢ်ရ့ၣ်ကိးဘ့ၣ်ဒဲးအပူၤ အိၣ်ဝဲဒၣ်ဒီး အတၢ်လီၤပလိာ် လိာ်သး ဒီးတၢ်လီၤဆီလိာ်သး အိၣ်ဝဲအါမးအဂ့ၢ်န့ၣ် မ့ၢ်တၢ်လၢပကြၢးသ့ၣ်ညါဘၣ်စ့ၢ်ကီးန့ၣ်လီၤ.

လံာ်တၢ်ပာ်ဖျါတဘ့ၣ်အံၤအပူၤ ပာ်ဖျါထီၣ်ဝဲ ကီၢ်ပယီၤသုးကဘီယူၤဟဲခးလီၤတၢ်, တၢ်ခးလီၤကျိဖးဒိၣ်, အ့ရှၢၣ်မုၢ်ထီၣ်ကလံၤထံးထံကီၢ်ကရၢ (အၣ်စံၣ်ယၣ်) အတၢ်ဟူးတၢ်ဂဲၤ ဘၣ်ထွဲကီၢ်ပယီၤထံရူၢ်ကီၢ်သဲးဂ့ၢ်ဝီ, တၢ်ကူၣ်ဘၣ်ကူၣ်သ့ဒီးတၢ်အိၣ်ဆူၣ်အိၣ်ချ့တၢ်အိၣ်သး, SAC ဒီး သုးဖီၣ်စုကဝဲၤတဖၣ် အတၢ်ဖီၣ်န့ၢ်ဆူၣ်, မၤအၢမၤသီ, မၤသံမၤဝီ ဒီး မၤလီၤမၢ်ဆူၣ်ကမျၢၢ်, တၢ်မၤတရီတပါသွံၣ်ထံး မုၣ်ခွါ, သုးအတၢ်ဟူးတၢ်ဂဲၤ, တၢ်မၤဘၣ်ဒိဘၣ်ထံးကမျၢၢ်, ကျိချံမျိာ်သၣ်လီၢ်လံၤလၢအတပိၢ်ဖးထီၣ်ဒံးဘၣ် ဒီးဟီၣ်လာ်မ့ၣ်ပိၢ် ပိၢ်ဖးထီၣ်ဘၣ်သံသဝီဖိသ့ၣ်တဖၣ် အဂ့ၢ်န့ၣ်လီၤ.

လၢခံကတၢၢ် ပနာ်လၢပှၤဖးလံာ်ဖိသ့ၣ်တဖၣ် ကသ့ၣ်ညါအါထီၣ်ဘၣ်တၢ်မၤဘၣ်ဒိပှၤဂ့ၢ်ဝီခွဲးယာ် အတၢ်အိၣ်သးလၢ ကီၢ်ပယီၤမုၢ်ထီၣ်ကလံၤ ထံးအပူၤဒီး ပနာ်စ့ၢ်ကီးလၢပှၤဖးလံာ်ဖိသ့ၣ်တဖၣ် ကပလၢၢ်ဘၣ်ဝဲ သဝီဖိလၢအအိၣ်လၢကီၢ်ရ့ၣ်တဘ့ၣ်စုာ်စုာ်အပူၤအတၢ်တူၢ်ဘၣ်တဖၣ်န့ၣ်လီၤ.