English
ကညီကျိာ်
မြန်မာတၢ်ပာ်ဖျါအဖုၣ်တဘ့ၣ်အံၤပာ်ဖျါဝဲ တၢ်ကဲထီၣ်အသးဖဲ ကြုၢ်တုကီၢ်ဆၣ်, ဒူပျာ်ယာ်ကီၢ်ရ့ၣ် ဖဲလါဒံၣ်စဲဘၢၣ် ၂၀၂၃ နံၣ်, အတီၢ် ပူၤန့ၣ်လီၤ. ဖဲလါဒံၣ်စဲဘၢၣ် ၂၈ သီ, ၂၀၂၃ နံၣ်န့ၣ်, ကမျၢၢ်တၢ်ဒီသဒၢသုး (PDF) သုးပာ်ဖှိၣ် ဒီး ကညီဒီကလုာ်တၢ်ထူၣ်ဖျဲးသုးမုၢ် ဒိၣ် (KNLA), ထီၣ်ခးဝဲ ထံကီၢ်တၢ်ပၢတၢ်ပြးကီၣ်ကးကရၢ (SAC) သုးမုၢ်လၢအအိၣ်ဖဲ တီၤကၠးအ့တိၤ, တီၤကၠးအ့ကရူၢ်, ကြုၢ်တု ကီၢ်ဆၣ် ပူၤန့ၣ်လီၤ. ဖဲတၢ်ဒုးဝံၤအလီၢ်ခံ, SAC ခးလီၤဝဲကျိဖးဒိၣ်တဖၣ်ဆူ အ---သဝီ, ရီၢ်ကဲကရူၢ်, ကြုၢ်တုကီၢ်ဆၣ် ဒီး ဘၣ်သံ ဝဲဖိသၣ်ပိာ်ခွါ လၢအသးနံၣ်အိၣ် (၁၁) နံၣ်တဂၤ ဒီး ဘၣ်ဒိဝဲသဝီဖိ (၂) ဂၤ အကျါ ပၣ်ဃုာ်ဒီး ဖိသၣ်ပိာ်မုၣ်လၢအသးနံၣ်အိၣ် (၁၃) နံၣ် တဂၤန့ၣ်လီၤ. လၢတနံၤဃီအတီၢ်ပူၤ, PDF ဒီး KNLA သုးပာ်ဖှိၣ်တဖုဃီန့ၣ် ထီၣ်ခးဝဲ SAC ပၢၤကီၢ်ရူ ဖဲ ဘ---သဝီ, တီၤကၠးအ့ကရူၢ် ပူၤန့ၣ်လီၤ. ဖဲတၢ်ဒုးကဲထီၣ်အဆၢကတီၢ်န့ၣ်, SAC ကဘီယူၤတဖၣ်ဟဲခးလီၤတၢ်ဖဲ ဘ---သဝီ ဒီး ဘၣ်ဟးဂီၤ ဝဲဟံၣ် (၂၂) ဖျၢၣ် ဒီး ကၠိ (၂) ဖျၢၣ်န့ၣ်လီၤ. ဖဲတနံၤဃီလၢဟါခီအဆၢကတီၢ်, ကဘၣ်ဖဲမုၢ်ဟါလီၤ ၉ နၣ်ရံၣ်န့ၣ်, SAC ခီၣ်ချ့ သုး ရ့ၣ် (LIB), နီၣ်ဂံၢ်-၅၄၅ သုးဖိတဖၣ် ခးလီၤဝဲကျိဖးဒိၣ်တဖၣ်ဆူ ဆ---သဝီ ကပိာ်ကပၤ, ရီၢ်ကဲကရူၢ် ပူၤန့ၣ်လီၤ. ကျိဖးဒိၣ်ချံ တဖၣ်လီၤတဲာ်ဝဲလၢ သီခါဖၠၣ်တဖျၢၣ် အဖီခိၣ် ဖဲ ဘ--- သဝီဖိတဖၣ်အိၣ်ကဒုဝဲအလီၢ်န့ၣ်လီၤ. ကျိဖးဒိၣ်ချံပိၢ်ဖးထီၣ်တဖၣ် ဘၣ်ဒိဝဲ သီခါတပါ ဒီး သီခါဖၠၣ် ပှၤမၤစၢၤတၢ်ဖိတဂၤန့ၣ်လီၤ. ဖဲတၢ်ကဲထီၣ်သးဝံၤအလီၢ်ခံ, ပှၤလီၢ်အိၣ်ကမှံဖိဖဲန့ၣ်တဖၣ် ဘၣ် ဃ့ၢ်ကဒီးဝဲဆူတၢ်လီၢ်အဂၤတဖၣ်န့ၣ်လီၤ.[1]
SAC ခးလီၤကျိဖးဒိၣ်ဆူ အ---သဝီပူၤ အဃိကဲထီၣ်ဝဲဖိသၣ်တၢ်ဘၣ်ဒိဘၣ်ထံး ဒီးတၢ်သံတၢ်ပှၢ်
ဖဲ လါဒံၤစဲဘၢၣ် ၂၈ သီ, ၂၀၂၃ နံၣ်န့ၣ်, ကမျၢၢ်တၢ်ဒီသဒၢသုး (PDF) သုးပာ်ဖှိၣ် ဒီး ကညီဒီကလုာ်တၢ်ထူၣ်ဖျဲးသုးမုၢ်ဒိၣ် (KNLA), ထီၣ်ခးဝဲ ထံကီၢ်တၢ်ပၢတၢ်ပြးကီၣ်ကးကရၢ (SAC) သုးမုၢ်လၢအအိၣ်ဖဲ တီၤကၠးအ့တိၤ, တီၤကၠးအ့ကရူၢ်, ကြုၢ်တုကီၢ် ဆၣ်ပူၤန့ၣ်လီၤ. ဖဲတၢ်ဒုးဝံၤအလီၢ်ခံ, SAC ခးလီၤဝဲကျိဖးဒိၣ်တဖၣ်ဆူ အ---သဝီ, ရီၢ်ကဲကရူၢ်, ကြုၢ်တုကီၢ်ဆၣ်ပူၤန့ၣ်လီၤ. ဖဲ ဟါခီ ၉ နၣ်ရံၣ်အဆၢကတီၢ်, ကျိဖးဒိၣ်ချံတဖၣ်လီၤတဲာ်ဝဲလၢ သဝီဖိတဂၤအတၢ်ဖီအီၣ်မ့ၤလီၢ် ဒီး ဘၣ်သံဝဲပှၤကၠိဖိသၢတီၤ လၢအသး နံၣ်အိၣ် (၁၁) နံၣ်, စီၤဒ---, ဒီး ဘၣ်ဒိစ့ၢ်ကီးဝဲ ဖိသၣ်ပိာ်မုၣ် (၁၃) နံၣ်တဂၤ, နါဃ---, ဒီး ပိာ်ခွါ (၁၉) နံၣ်, စီၤကက---, ဖဲလၢ အဝဲသ့ၣ်မံဝဲလၢဟံၣ်ပူၤအဆၢကတီၢ်န့ၣ်လီၤ. နါဃ--- အခီၣ်လၢစ့ၣ်တကပၤ ဒီး အချၢဃံ ဘၣ်ဒိဝဲ, ဒီး စီၤ ကက--- အစုဘၣ်ဒိဝဲ လၢကျိဖးဒိၣ်က့တဖၣ်န့ၣ်လီၤ. စီၤဒ--- အခီၣ်တဘှံး, အပှံာ်ဖျိးထီၣ်, ဒီးအမဲာ်သၣ် ဘၣ်ဒိဝဲဒီးကျိဖးဒိၣ်က့တဖၣ် နးနးကလဲာ်န့ၣ်လီၤ.
ဖဲတၢ်ကဲထီၣ်သးဝံၤအလီၢ်ခံ, ဒီၤ ဂ---, လၢအမ့ၢ်ဝဲပှၤတူၢ်ဘၣ်တၢ်အဟံၣ်ဖိဃီဖိတဂၤ, ဃ့ဝဲတၢ်မၤစၢၤလၢပှၤနီသိလ့ၣ်ဖိတဂၤအ အိၣ်လၢကလဲၤဆှၢအဝဲသ့ၣ်ဆူတၢ်ဆါဟံၣ်န့ၣ်လီၤ. တၢ်လဲၤဆှၢဆိအဝဲသ့ၣ်ဆူ ဟ--- တၢ်ဆါဟံၣ်, ဝၣ်ကးကရူၢ်, ကြုၢ်တုကီၢ် ဆၣ် လၢတၢ်ကူစါယါဘျါအဂီၢ်န့ၣ်လီၤ. ဖဲစီၤဒ--- တၢ်လဲၤဆှၢအီၤလၢ ဟ--- တၢ်ဆါဟံၣ် တုၤဝံၤအလီၢ်ခံ အမံးနံး ၃၀ န့ၣ်, အဝဲသံကွံာ်ဝဲ ဒၣ်န့ၣ်လီၤ. ပှၤနီသိလ့ၣ်ဖိက့ၤဆှၢကဒါက့ၤအစိၣ်ဆူအသဝီန့ၣ်လီၤ. ပှၤနီသိလ့ၣ်ဖိတဂၤအံၤဘၣ်ဟဲက့ၤကဒါက့ၤ ဆူ ဟ--- တၢ်ဆါဟံၣ် မ့ၢ်လၢ နါဃ--- ဒီး စီၤကက--- ဘၣ်ဒိနးအဃိ တၢ်ကူစါယါဘျါအဝဲသ့ၣ်ဖဲတၢ်ဆါဟံၣ်အံၤ တန့ၢ် ဘၣ်အဃိ ပှၤနီသိလ့ၣ်ဖိတဂၤအံၤဘၣ်လဲၤဆှၢကဒီးအဝဲသ့ၣ်ဆူ ဖၣ်အၣ်တၢ်ဆါဟံၣ် န့ၣ်လီၤ. ဒီၤဂ---တဲပၠးဝဲ KHRG လၢ “ပှၤဖိသၣ်တဂၤကိးယၤ ‘မုၢ်ဂၢ်ဧၢ...မုၢ်ဂၢ်ဧၢ...’ ဒီးစံးဝဲ ‘နလံၤဒီးနဖိဒိၣ်တဖၣ်ဘၣ်ဒိဝဲဒီးကျိဖးဒိၣ်န့ၣ်လီၤ.’ ယဃ့တၢ်မၤစၢၤလၢ ပှၤနီသိလ့ၣ်ဖိတဂၤအအိၣ် ဒီးအဝဲလဲၤဆှၢပဝဲဒၣ် ဆူဟ--- တၢ်ဆါဟံၣ် န့ၣ်လီၤ. ဖဲပလဲၤတုၤလၢတၢ်ဆါဟံၣ် ဆၢကတီၢ်, က သံၣ်ပှၤမၤတၢ်ဖိတဂၤ တဲယၤလၢ တၢ်ဖိသၣ်ပိာ်ခွါတဂၤအံၤန့ၣ်တၢ်ကူစါယါဘျါအီၤတန့ၢ်လၢၤဘၣ်. အသးနံၣ်အိၣ်ဒံးဒၣ်ထဲ (၁၁) နံၣ် ဒီး အခီၣ်လၢအစ့ၣ်တကပၤဘၣ်ဒိ, အဟၢဖၢဘၣ်ဒိ, ဒီးအမဲာ်သၣ်ဘၣ်ဒိဝဲဒၣ်န့ၣ်လီၤ. အဝဲတဲတၢ်တကဲလၢၤဘၣ်. အဝဲအိၣ်ဒၣ်ကျၢၢ်ကျာ်က့ၤအခိၣ်ဖဲယသံကွၢ်အီၤတၢ်အခါလီၤ. အဝဲသံတချုးလၢဖးဖီမုၢ်အဆၢကတီၢ်န့ၣ်လီၤ. ကသံၣ်ပှၤမၤတၢ်ဖိ တဂၤတဲဝဲလၢ တၢ်ကူစါယါဘျါပှၤဆါသ့ၣ်တဖၣ်ဖဲအံၤတန့ၢ်ဘၣ် ဒီးတၢ်ကြၢးလဲၤဆှၢအဝဲသ့ၣ်ဆူ ဃိၣ်သၢဖျၢၣ်တၢ်ဆါဟံၣ် န့ၣ်လီၤ. စီၤဒ--- အံၤသံဝဲဒၣ်ဖဲအမုၢ်ဂၢ်က့ၤဟံးန့ၢ်တၢ်ကူတၢ်သိးတဖၣ်လၢသဝီပူၤအဆၢကတီၢ်န့ၣ်လီၤ. ပှၤနီသိလ့ၣ်ဖိက့ၤဆှၢ ကဒါက့ၤအစိၣ်ဆူသဝီပူၤန့ၣ်လီၤ. ဝံၤအလီၢ်ခံ, ပှၤနီသိလ့ၣ်ဖိဟဲက့ၤပီၤစိၢ်န့ၢ်က့ၤပှၤဘၣ်ဒိလၢအဂၤခံဂၤအံၤ ဒီး လဲၤဆှၢအဝဲသ့ၣ် ဆူ ဖၣ်အၣ်တၢ်ဆါဟံၣ်န့ၣ်လီၤ.”
နါဃ--- ဘၣ်ကွဲးကါဝဲအခီၣ် ဒီး အချၢဃံလၢအဘၣ်ဒိအံၤန့ၣ်လီၤ. အဝဲသ့ၣ်ဟဲက့ၤလီၤဘၣ်လၢတၢ်ဆါဟံၣ်လံ ဘၣ်ဆၣ်အ ဝဲသ့ၣ်ဘၣ်လဲၤဒုးနဲၣ်ဒံးဒၣ်အသးလၢ ဖၣ်အၣ်တၢ်ဆါဟံၣ်န့ၣ်လီၤ. ပှၤတူၢ်ဘၣ်တၢ်သ့ၣ်တဖၣ်အိၣ်ဝဲဒီးအဖံ မ့ၢ်လၢအဝဲသ့ၣ် အမိၢ်အပၢ်လဲမၤတၢ်မၤလၢဝ့ၢ်ဘီကီးအဃိန့ၣ်လီၤ. ခီဖျိလၢတၢ်စူၤဒီးထံဒိၣ်အဃိ, ပှၤတူၢ်ဘၣ်တၢ်တဖၣ်အံၤအဖံဘၣ်ကွၢ်ဆၢၣ် မဲာ်ဝဲဒီးတၢ်လုၢ်အီၣ်နီၢ်ခိသးသမူအတၢ်ကီတၢ်ခဲတဖၣ်န့ၣ်လီၤ.
တၢ်ဒုးတၢ်ယာ် ဒီး SAC ကဘီယူၤခးလီၤတၢ်ဖဲ ဘ---သဝီပူၤ ဒီးကဲထီၣ်တၢ်ဟးဂူာ်ဟးဂီၤ
ဖဲတနံၤဃီအတီၢ်ပူၤ, PDF ဒီး KNLA သုးပာ်ဖှိၣ်တဖုလီၢ်လီၢ် ထီၣ်ခးဝဲ SAC ပၢၤကီၢ်အရူ ဖဲ ဘ--- သဝီ, တီၤကၠၤအ့ကရူၢ်, ကြုၢ် တုကီၢ်ဆၣ်, ဒူပျာ်ယာ်ကီၢ်ရ့ၣ်ပူၤန့ၣ်လီၤ. ဖဲတၢ်ဒုးကဲထီၣ်အဆၢကတီၢ်, SAC ကဘီယူၤဟဲခးလီၤတၢ်ဖဲ ဘ--- သဝီ, တီၤကၠးအ့ကရူၢ်, ကြုၢ်တုကီၢ်ဆၣ်ပူၤန့ၣ်လီၤ. ကဘီယူၤဟဲခးလီၤတၢ်အဃိ, ဟံၣ်အူအီၣ်ဝဲဒၣ် (၂၂) ဖျၢၣ် ဒီး ကၠိအတၢ်သူၣ်ထီၣ် အူအီၣ်ဝဲ (၁) ဖျၢၣ်, ဒီးကၠိတၢ်သူၣ်ထီၣ်ခံကထြၢတဖျၢၣ်စ့ၢ်ကီးလီၤပှီၢ်ဝဲဒၣ်န့ၣ်လီၤ.
SAC ခးလီၤကျိဖးဒိၣ်ဆူ ဆ---သဝီပူၤအဃိ ကဲထီၣ်ဝဲတၢ်ဘၣ်ဒိဘၣ်ထံးတဖၣ်
ဖဲတၢ်ထီၣ်မၤန့ၢ်ဝဲ ပၢၤကီၢ်ရူဝံၤအလီၢ်ခံ, ကဘၣ်ဖဲ ဟါခီ ၉ နၣ်ရံၣ်အဆၢကတီၢ်န့ၣ်, SAC ခီၣ်ချ့သုးရ့ၣ် (LIB) နီၣ်ဂံၢ်-၅၄၅ အိၣ် လၢ သုးပၢဆှၢဝဲၤလီၢ်ခိၣ်သ့ၣ် (MOC) နီၣ်ဂံၢ်-၁၂, တၢ်ပၢဖီလာ် လၢအိၣ်ဘူးဝဲဖဲ ကီးတရံးဝ့ၢ်, သုးဖိတဖၣ်ခးလီၤဝဲကျိဖးဒိၣ် ဆူ ဆ--- သဝီ, ရီၢ်ကဲကရူၢ်, ကြုၢ်တုကီၢ်ဆၣ် ပူၤန့ၣ်လီၤ. ကျိဖးဒိၣ်ချံလီၤတဲာ်ဝဲဆူ ဆ--- သဝီပူၤ ဒီးအကပိာ်ကပၤ ခဲလၢာ် (၁၀) ဖျၢၣ်န့ၣ်လီၤ. ကျိဖးဒိၣ်ချံလၢလီၤတဲာ်သ့ၣ်တဖၣ်အံၤ (၄) ဖျၢၣ်န့ၣ် လီၤတဲာ်ဝဲ ဆူသဝီပူၤ ဒီး လီၤတဲာ်ဝဲလၢသီခါဖၠၣ်ကရၢၢ်ချၢ (၁) ဖျၢၣ် ဒီး လီၤတဲာ်ဝဲလၢ သီခါဖၠၣ်ကရၢၢ်ပူၤ (၅) ဖျၢၣ်န့ၣ်လီၤ. ကျိဖးဒိၣ်ချံလၢလီၤတဲာ်လၢ သီခါဖၠၣ်ကျဲနုၤလီၤတဖျၢၣ်န့ၣ် ဘၣ်ဟး ဂီၤဝဲ ဖံဝါအဟံၣ်ဒွဲတဖျၢၣ် ဒီးသီခါဖၠၣ်တၢ်သူၣ်ထီၣ်တဖျၢၣ်န့ၣ်လီၤ. ခီဖျိလၢတၢ်ဒုးကဲထီၣ်အဃိ, သဝီဖိအဂၤ (၆၀) ဘျဲၣ်ဟဲ အိၣ်ကဒုဝဲဖဲ သီခါဖၠၣ်တဖျၢၣ် အံၤအပူၤန့ၣ်လီၤ. လၢပှၤဃ့ၢ်မှံဟးဖျိးသ့ၣ်တဖၣ်အကျါ ပၣ်ဃုာ်ဝဲဒီး ပှၤဖၢစၢ် ဒီး ပှၤတဆူၣ်တချ့ တဖၣ်လၢအဘၣ်ကလံၤ ဒီး ဆံၣ်ဆၢအိၣ်တဖၣ်န့ၣ်လီၤ. သီခါ ဒီး ပှၤသဝီဖိတဖၣ်ဟ့ၣ်ဆီၣ်ထွဲမၤစၢၤဝဲ တၢ်အီၣ်တၢ်အီ ဒီး တၢ် ကဆှဲကဆှီတၢ်ပီးတၢ်လီတဖၣ်ဆူ ပှၤဃ့ၢ်မှံဟးဖျိးတဖၣ်အံၤန့ၣ်လီၤ.
နဲၢ်တပါလၢအမံၤမ့ၢ်ဝဲ အူဧ--- စံးဘၣ်ဝဲ KHRG လၢ “ယနၢ်ဟူလၢအဝဲသ့ၣ်တခးပညိၣ်ပှၤဘၣ်. ဘၣ်ဆၣ်, လၢယတၢ်ထံၣ်န့ၣ်, အဝဲသ့ၣ်ခးပညိၣ်ပှၤလိၤလိၤလီၤ. အဝဲသ့ၣ်ခးလီၤကျိဖးဒိၣ်ချံ (၂) ဖျၢၣ် လၢပှၤဃ့ၢ်အိၣ်ကမှံအလီၢ်, အဃိယတနာ်န့ၢ်အဝဲသ့ၣ် ဘၣ်. အဝဲသ့ၣ်ခးလီၤစ့ၢ်ကီးဝဲကျိဖးဒိၣ်ချံ (၅) ဖျၢၣ် လၢသီခါဖၠၣ်ကရၢၢ်ပူၤန့ၣ်လီၤ.” နဲၢ်တပါဃီအံၤတဲအါထီၣ်ဝဲ “ဖဲတၢ်ခးလီၤကျိ ဖးဒိၣ်အဆၢကတီၢ်, ပှၤဃ့ၢ်မှံဟးဖျိးပၣ်ဃုာ် ဒီး ပှၤဖၢစၢ် ဒီး ပှၤတဆူၣ်တချ့တဖၣ် လၢအိၣ်ကဒုဝဲဖဲသီခါဖၠၣ် ပူၤအံၤလဲၤဃ့ၢ်အိၣ် ခူသူၣ်ဝဲလၢတၢ်သူၣ်ထီၣ်တဖျၢၣ်အဖီလာ်အဃိ အဝဲသ့ၣ်တဘၣ်ဒိနီတဂၤဘၣ်. မ့တမ့ၢ်ဘၣ်ဒု, ပှၤကဘၣ် ဒိသံလၢ (၆) ဂၤ မ့တမ့ၢ် (၇) ဂၤညါ, မ့ၢ်လၢကျိဖးဒိၣ်ချံလီၤတဲာ်ဝဲဒၣ် (၁) ဖျၢၣ်လၢအဝဲသ့ၣ်မံအလီၢ်အဃိန့ၣ်လီၤ.” ကျိဖးဒိၣ်က့ဘၣ်ဝဲ နဲၢ်လၢအ သးနံၣ်အိၣ် (၃၄) နံၣ်တပါ လၢအမံၤမ့ၢ်ဝဲ အူသ--- အစုထွဲတပၤ, ဒီး ဘၣ်ဒိစ့ၢ်ကီးဝဲ သီခါဖၠၣ်ပှၤမၤစၢၤ တၢ်ဖိ လၢအသးနံၣ်အိၣ် (၅၃) နံၣ် လၢအမံၤမ့ၢ်ဝဲ အူ က--- အခံကိၢ်လၢအစ့ၣ်တကပၤန့ၣ်လီၤ. တနာ်ဃီန့ၣ်, ဆ--- သဝီဖိ တဂၤလဲၤဆှၢဝဲပှၤတူၢ်ဘၣ် တၢ်တဖၣ်အံၤဆူ ဟ--- တၢ်ဆါဟံၣ်, ဝၣ်ကးကရူၢ်, ကြုၢ်တုကီၢ်ဆၣ် န့ၣ်လီၤ. ခီဖျိလၢကျိဖးဒိၣ် က့အိၣ်တီၢ်လၢအလိၤအဃိ, မုၢ်ဆ့ၣ်ထီၣ်တနံၤန့ၣ်, တၢ်လဲၤဆှၢခီက့ၤအဝဲသ့ၣ်ဆူ ဖၣ်အၣ်တၢ်ဆါဟံၣ် လၢတၢ်ကူစါယါဘျါအဂီၢ်န့ၣ်လီၤ. ပှၤတူၢ်ဘၣ်တၢ် တဖၣ်အံၤဟဲက့ၤလီၤဘၣ်လၢတၢ်ဆါဟံၣ် ဒီးဘျါက့ၤဝဲဒၣ်လံန့ၣ်လီၤ.
ဖဲတၢ်ခးလီၤကျိဖးဒိၣ် ဖဲလါဒံၣ်စဲဘၢၣ် ၂၈ သီ, ၂၀၂၃ နံၣ်ဝံၤအလီၢ်ခံ, ပှၤဃ့ၢ်မှံဟးဖျိးတဖၣ် အိၣ်ဖဲသီခါဖၠၣ်ဖဲ ဆ---သဝီပူၤတ ဘူၣ်လၢၤဘၣ်ဒီးအဝဲသ့ၣ်ဃ့ၢ်ကဒီးဝဲဆူတၢ်လီၢ်လၢအဂၤတဖၣ်န့ၣ်လီၤ. တနီၤန့ၣ်လဲၤဃ့ၢ်အိၣ်ဝဲလၢအဘူးတံၢ်တ ဖၣ်အအိၣ် ဒီး တနီၤလဲၤဃ့ၢ်အိၣ်ဝဲဖဲတၢ်လီၢ်လၢအဘူးတဖၣ်န့ၣ်လီၤ. တကးဒံးဘၣ်, ဖဲတၢ်ကဲထီၣ်သးဝံၤအလီၢ်ခံ, သီခါလၢအ အိၣ်ဖဲ ဆ--- သီခါဖၠၣ် တနီၤစ့ၢ်ကီး လဲၤဃ့ၢ်အိၣ်ဝဲဆူတၢ်လီၢ်အဂၤ မ့ၢ်လၢအဝဲသ့ၣ်အိၣ်ဖဲ ဖၠၣ်တဖျၢၣ်အံၤတဘူၣ်လၢၤဘၣ်အဃိ န့ၣ်လီၤ. နဲၢ်အူဧ--- စံးကဒီးဝဲလၢ “ယအဲၣ်ဒိးတဲလၢ တၢ်ခးလီၤကျိဖးဒိၣ်လၢသဝီပူၤ ဒီး တၢ်ဘူၣ်တၢ်ဘါ တၢ်သူၣ်ထီၣ်အလီၢ် ဒ်အံၤန့ၣ် တမ့ၢ်တၢ်လၢအဂ့ၤဘၣ်. တၢ်ခးပညိၣ်ကမျၢၢ်ဖိဒီး တၢ်ဘူၣ်တၢ်ဘါတၢ်သူၣ်ထီၣ်ဒ်အံၤန့ၣ်တမ့ၢ်တၢ်မၤလၢအဘၣ်ဘၣ်, အဃိယ အဲၣ်ဒိးဒုးညါထံဂုာ်ကီၢ်ဂၤတဖၣ်ဘၣ်ဃးဒီးတၢ်ဂ့ၢ်အဝဲအံၤန့ၣ်လီၤ.”
Footnotes:
[1] တၢ်ဂ့ၢ်တၢ်ကျိၤလၢ လံာ်ပာ်ဖျါတဘ့ၣ်အံၤအပူၤန့ၣ် တၢ်ဒိးန့ၢ်ဘၣ်အီၤဖဲ လါယနူၤအါရံၤ ၂၀၂၄ နံၣ် အပူၤန့ၣ်လီၤ. ဘၣ်တၢ်ဆှၢဟ့ၣ်ထီၣ်အီၤလၢ လီၢ်ကဝီၤၦၤ မၤသကိးတၢ်တဂၤ ဖဲဒူပျာ်ယာ်ကီၢ်ရ့ၣ်အပူၤ လၢအဘၣ်တၢ်သိၣ်လိအီၤ လၢကညီဂ့ၢ်ဝီခွဲးယာ်ကရူၢ် KHRG လၢကမၤနီၣ်မၤဃါတၢ်မၤဘၣ်ဒိၦၤဟီၣ်ခိၣ်ဖိခွဲး ယာ်အတၢ်အိၣ်သးတဖၣ်ဖဲလီၢ်ကဝီၤပူၤန့ၣ်လီၤ. ၦၤတူၢ်ဘၣ်တၢ်တဖၣ်အမံၤ, တၢ်ဂီၤဒီး အိၣ်ဆိးလီၢ်ကျဲလီၤတံၢ်လီၤဆဲးတဖၣ်န့ၣ် တၢ်မၤလီၤဘၢအီၤလၢအဝဲ နီၢ်ကစၢ်တၢ်ဘံၣ်တၢ်ဘၢအဂီၢ်န့ၣ်လီၤ. တၢ်ဂ့ၢ်တၢ်ကျိၤလၢ တၢ်ကွဲးၡဲပၠးအါထီၣ်အီၤဖဲပနိကဝီၤအပူၤန့ၣ် မ့ၢ်ဝဲဒၣ် KHRG အတၢ်ကွဲးၡဲထီၣ်တၢ်ဂ့ၢ်တၢ်ကျိၤန့ၣ် လီၤ.
Print:
