KHRG ဒိးန့ၢ်ဘၣ်ဝဲတၢ်ဂီၤသ့ၣ်တဖၣ်အံၤဖဲ လါအ့ဖြ့ၣ် ၂၀၂၃ နံၣ်န့ၣ်လီၤ. တၢ်ဂီၤအံၤပာ်ဖျါထီၣ်ဝဲ ပှၤသဝီဖိခံဂၤလၢအဘၣ်ဒိခီဖျိဟီၣ်လာ်မ့ၣ်ပိၢ် ပိၢ်ဖးထီၣ်အဃိန့ၣ်လီၤ. ဖဲလါအ့ဖြ့ၣ် ၆သီ, ၂၀၂၃ နံၣ် ကဘၣ်ဖဲ ဟါ ၃း၃၀ မံးနံး, နီၢ်က---- သးနံၣ် (၃၀) နံၣ်, ဒီး အဖိမုၣ် နီၢ်ခ--- သးနံၣ် (၁၂) နံၣ် လၢ ဂ---သဝီ, ဝ့ရီကရူၢ်, သထူၣ်ကီၢ်ဆၣ်, ယီၢ်ဘၣ်ဝဲဟီၣ်လာ်မ့ၣ်ပိၢ်ဖဲပှၢ်ပူၤဖဲအဝဲသ့ၣ်လဲၤဃုဒဲးအီၣ်တၢ်ဒိးတၢ်လၣ်ဆၢကတီၢ်န့ၣ်လီၤ. တၢ်ပိၢ်ဖးထီၣ်အံၤဘၣ်ဒိဝဲအဝဲသ့ၣ်ခံဂၤလၢာ်-  နီၢ်က---ဘၣ်ဒိဖဲအခံခိၣ် ဒီး အချၢဃံ, မ့ၢ်မ့ၢ် နီၢ်ခ---တခီဘၣ်ဒိဖဲအဟၢဖၢ ဒီးအခီၣ်န့ၣ်လီၤ. အဝဲသ့ၣ်ဒိးကူစါယါဘျါအသးဖဲတၢ်ဟ့ၣ်ကသံၣ်ဒၢးလၢအအိၣ်ဖဲ ဃ---သဝီ, လၢအဘၣ်တၢ်ပၢဆှၢအီၤလၢ ကညီဒီကလုာ်စၢဖှိၣ်ကရၢ (KNU) န့ၣ်လီၤ. ဟီၣ်လာ်မ့ၣ်ပိၢ်ဝဲအံၤမ့ၢ် ပယီၤသုး SAC ဒိးလီၤဧါ မ့တမ့ၢ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ် (KNLA) ဒိးလီၤဧါန့ၣ် တၢ်တသ့ၣ်ညါအီၤဘၣ်. (တၢ်ဂီၤ- လီၢ်ကဝီၤသဝီဖိ)

တၢ်ဂီၤတဖၣ်အံၤ ဘၣ်တၢ်ဒိန့ၢ်အီၤဖဲလါယနူၤအါရံၤ၁၃သီ, လၢ ဆ---သဝီ, သၤမိတီၤကရူၢ်, ဒီၣ်ဖါခိၣ်ကီၢ်ဆၣ်, တီအူကီၢ်ရ့ၣ်အပူၤန့ၣ်လီၤ. တၢ်ဂီၤသ့ၣ်တဖၣ်အံၤပာ်ဖျါထီၣ်ဝဲ ဒီၤခ့ၣ်ဝ့, သးနံၣ်အိၣ် ၆၈ နံၣ်တဂၤအနီၢ်ခိက့ၢ်ဂီၤ, ဒီးအဝဲဘၣ်သံလၢမ့ၢ်ပိၣ်အတၢ်ပိၢ်ဖးထီၣ်ဖဲ လါယနူၤအါရံၤ ၁၃သီ, ၂၀၂၃ နံၣ်န့ၣ်လီၤ. တၢ်ပိၣ်ဖးထီၣ်အံၤကဲထီၣ်အသးဖဲ သၤမိတီၤကျဲမုၢ်ဖီခိၣ် ဆ---သဝီအပူၤ, ဖဲအ၀ဲလဲၤဃုသ့ၣ်မုၣ်လၢတၢ်ခိၣ်တဃၢၤဒီးဟဲက့ၤ၀ဲအဆၢကတီၢ်န့ၣ်ယီၣ်ဘၣ်၀ဲဟီၣ်လာ်မ့ၢ်ပိၢ်န့ၣ်လီၤ.  အခီၣ်လ့ၢ်ခိၣ်ဖီလာ်လၢအစ့ၢ်တကပၤသဘှံးဝဲခဲလၢာ်, ဒီးအခီၣ်ထွဲ, အစု, ဒီးအမဲာ်သၣ်န့ၣ် ဘၣ်ဒိဝဲနးနးကလဲာ်န့ၣ်လီၤ. ဟီၣ်လာ်မ့ၣ်ပိၢ်ဝဲအံၤဘၣ်တၢ်ဒိးလီၤဃာ်အီၤလၢပယီၤသုးဖိတဖၣ်ဖဲတၢ်ခးလိာ်သးလၢဟီၣ်ကဝီၤပူၤ ဝံၤအလီၢ်ခံန့ၣ်လီၤ. (တၢ်ဂီၤ- လီၢ်ကဝီၤသဝီဖိ)

တၢ်ဂီၤသ့ၣ်တဖၣ်အံၤဘၣ်တၢ်ဒိန့ၢ်အီၤ ဖဲလါမးရှး ၁ သီ, ၂ဝ၂၃ နံၣ်, ဖဲထ--- သဝီ, ဃဲကါခိၣ်ကရူၢ်, လၢၢ်ဒိၣ်ကီၢ်ဆၣ်အပူၤန့ၣ်လီၤ. တၢ်ဂီၤသ့ၣ်တဖၣ်အံၤပာ်ဖျါထီၣ်ဝဲသဝီဖိခံဂၤအနီၢ်ခိက့ၢ်ဂီၤလၢအဘၣ်သံလၢဟီၣ်လာ်မ့ၣ်ပိၢ်အတၢ်ပိၢ်ဖးထီၣ်န့ၣ်လီၤ. ဖဲဂီၤခီ ၇နၣ်ရံၣ်, လါမးရှး ၁သီ, အနံၤန့ၣ် စီၤ ဒ---သးနံၣ်အိၣ်ဝဲ ၂၄ နံၣ် ဒီးနီၢ်န---သးနံၢ် ၁၉ နံၣ်, အိၣ်ဖဲထ---သဝီ ဘၣ်ဒိဝဲဒီးဟီၣ်လာ်မ့ၣ်ပိၢ် ဖဲအဝဲသ့ၣ်ခံဂၤလဲၤဟးဆူလၢၢ်ဒိၣ်လၢသိလ့ၣ်ယီၢ် ဒ်သိးကလဲၤပှ့ၤတၢ်ပီးတၢ်လီ လၢအတၢ်ဆါ တ် ပှ့ၤအဂီၢ်န့ၣ်လီၤ. အဝဲသ့ၣ်သံဝဲတဘျီဃီလၢတၢ်ပိၢ်ဖးထီၣ်အံၤအဃိလီၤ. သဝီဖိအဂၤတဂၤလၢအမ့ၢ် စီၤပ--- သးနံၣ်အိၣ်ဝဲ ၁၈ နံၣ်, လၢလဲၤပိာ်အဝဲသ့ၣ်အခံ ဒီးဒိးသိလ့ၣ်ယီၢ်လၢအဂၤတခိၣ်စ့ၢ်ကီးဘၣ်ဒိဝဲတဆံးတက့ၢ်န့ၣ်လီၤ. (တၢ်ဂီၤ- လီၢ်ကဝီၤသဝီဖိ)

KHRG  ဒိးန့ၢ်ဘၣ်ဝဲတၢ်ဂီၤအံၤလၢ လီၢ်ကဝီၤဆူၣ်ချ့ပှၤမၤတၢ်ဖိအအိၣ် ဖဲလါအီကူး ၆သီ, ၂၀၂၃ နံၣ်န့ၣ်လီၤ. တၢ်ဂီၤအံၤပာ်ဖျါထီၣ်ဝဲ စီၤမ--- သးနံၣ် (၄၅) နံၣ်တဂၤ ဒိးကူစါယါဘျါအတၢ်ပူၤလီၢ် ဖဲအဝဲဘၣ်ဒိဒီးဟီၣ်လာ်မ့ၣ်ပိၢ်တၢ်ပိၢ်ဖးထီၣ်ဝံၤအလီၢ်ခံန့ၣ်လီၤ. အဝဲဘၣ်တၢ်ကူစါယါဘျါအီၤလၢ ကညီဆူၣ်ချ့မၤစၢၤဝဲၤကျိၤ (KDHW) ဖဲလီၢ်မုာ်သီတၢ်ဆါဟံၣ်န့ၣ်လီၤ. ဖဲလါအီကူး ၄သီ, ၂၀၂၃ နံၣ်ဂီၤ ၆း၃၀ မံးနံးအဆၢကတီၢ် စီၤမ---လၢအအိၣ်လၢ ယ---သဝီ, သမၠ့ၣ်အ့ကိကရူၢ်, လၢၢ်ဒိၣ်ကီၢ်ဆၣ်တဂၤ ယီၢ်ဘၣ်ဝဲဟီၣ်လာ်မ့ၣ်ပိၢ်ဖဲအဝဲလဲၤဟးလၢ ရ---သဝီ ဆၢကတီၢ်န့ၣ်လီၤ. အခီၣ်စ့ၣ်တပၤအဃံဖျိးထီၣ် ဒီး အခီၣ်ထွဲတပၤ ဘၣ်ဒိစ့ၢ်ကီးန့ၣ်လီၤ. စီၤမ--- အိၣ်ဒီး အမါဒီး အဖိ (၅) ဂၤန့ၣ်လီၤ. ဟီၣ်လာ်မ့ၣ်ပိၢ်တဖျၢၣ်အံၤဘၣ်တၢ်ဒိးလီၤအီၤလၢ KNLA န့ၣ်လီၤ. (တၢ်ဂီၤ- KDHW)

တၢ်ဂီၤသ့ၣ်တဖၣ်အံၤပာ်ဖျါထီၣ်ဝဲသဝီဖိခံဂၤလၢအမ့ၢ် သ---သးနံၣ်, ၃၂နံၣ်ဒီး ဟ---သးနံ, ၅၅နံၣ်လၢအအိၣ်ဖဲ ဧ---သဝီ, အနီၣ်ဖဲၣ်ကါကရူၢ်, ဒွဲၣ်လိကီၢ်ဆၣ်အပူၤအံၤ ကူစါယါဘျါအသးဖဲအဝဲသ့ၣ်ယီၢ်ဘၣ်ဝဲမ့ၣ်ပိၢ်တဖျၢၣ်လၢတၢ်ဒိးလီၤလီၤအီၤဘူးဒီးအသဝီဝံၤအလီၢ်ခံန့ၣ်လီၤ.  ဖဲလါယူၤ ၂၀ သီ, ၂၀၂၁နံၣ်န့ၣ်, သ--- ယီၢ်ဘၣ်ဝဲဟီၣ်လာ်မ့ၣ်ပိၢ်ဖဲအဝဲဟဲက့ၤလၢအဃုးဆူအဟံၣ်အဆၢကတီၢ်န့ၣ်လီၤ. တၢ်ကဲထီၣ်သးအဂၤတခါ ဖဲလါယူၤ ၂၂သီ, ၂၀၂၁ နံၣ်န့ၣ်, ဟ--- ယီၢ်ဘၣ်ဝဲမ့ၣ်ပိၢ်ဖဲအဝဲလဲၤထဲးအီၣ်ကုၤလၢအသဝီချၢအခါန့ၣ်လီၤ. တၢ်ဂီၤလၢအဖီခိၣ်ခံဘ့ၣ်န့ၣ် ပာ်ဖျါထီၣ်ဝဲ ဟ--- ဒိးန့ၢ်ဘၣ် တၢ်ကူစါယါဘျါ ဖဲမီၣ်လမၠဲၣ်ကမျၢၢ်တၢ်ဆါဟံၣ်အပူၤ ဖဲလါယူၤ ၂၄သီ, ၂၀၂၁နံၣ်န့ၣ်လီၤ. တၢ်ဂီၤလၢတၢ်ဖီလာ်ခံဘ့ၣ်န့ၣ် ပာ်ဖျါထီၣ်ဝဲ သ--- ဒိးန့ၢ်ဘၣ်တၢ်ကူစါယါဘျါ ဖဲဖၣ်အၣ်ကမျၢၢ်တၢ် ဆါဟံၣ်ပူၤ ဖဲလါယူၤ ၂၀သီ, ၂၀၂၁နံၣ်န့ၣ်လီၤ. ဆၢကတီၢ်ဖဲန့ၣ်အဝဲသ့ၣ်ခံဂၤလၢာ်အခီၣ်လၢအထွဲတကပၤန့ၣ်ဘၣ်တၢ်ဒီၣ်တဲာ်ကွံာ်အီၤခီဖျိ လၢဘၣ်ဒိဝဲနးနးကလဲာ်န့ၣ်လီၤ. သဝီဖိတဖၣ်တသ့ၣ်ညါဝဲလၢမ့ၢ်မတဂၤဒိးလီၤဝဲဟီၣ်လာ်မ့ၣ်ပိၢ်ခံဖျၢၣ်အံၤလဲၣ်ဘၣ်န့ၣ်လီၤ. (တၢ်ဂီၤ- လီၢ်ကဝီၤသဝီဖိ)

တၢ်ဂီၤတဘ့ၣ်အံၤဘၣ်တၢ်ဒိန့ၢ်သဝီဖိလၢ ကဂ---သဝီ, လၢၢ်မုၢ်ပျီကရူၢ်, လူၤသီကီၢ်ဆၣ်, လၢအမံၤမ့ၢ် စီၤကဃ--- သးနံၣ် (၅၈) နံၣ် တဂၤအဂီၤ ဖဲလါမ့ၤ ၂၉သီ, ၂၀၂၂ နံၣ်န့ၣ်လီၤ. ဖဲလါမ့ၤ ၂၈သီ, ၂၀၂၂ နံၣ် ဂီၤ ၆ နၣ်ရံၣ်အဆၢကတီၢ် စီၤကဃ--- ယီၢ်ဘၣ်ဟီၣ်လာ်မ့ၣ်ပိၢ် ဖဲအလဲၤလၢအဃုးပူၤအခါန့ၣ်လီၤ. ဟီၣ်လာ်မ့ၣ်ပိၢ်အံၤဘၣ်တၢ်ဒိးလီၤအီၤလၢ SAC သုးဖိလၢအ အိၣ်ဖဲ ခီၣ်ချ့သုးရ့ၣ် (ခမရ- ၃၇) န့ၣ်လီၤ. စီၤကဃ--- အခီၣ်တူာ်ဖဲအဝဲဘၣ်ဒိဒီးဟီၣ်လာ်မ့ၣ်ပိၢ်လၢအပူၤကွံာ် ၂၀၂၁ နံၣ်အခါ, ဒီး အတၢ်ဘၣ်ဒိဒီးဟီၣ်လာ်မ့ၣ်ပိၢ်လၢဘျီဝဲအံၤမ့ၢ်ခံဘျီတဘျီ န့ၣ်လီၤ. ဖဲအတၢ်ဘၣ်ဒိအသီတဘျီအံၤန့ၣ် ဘၣ်ဝဲအခီၣ်တကပၤဃီလၢအဝဲဘၣ်ဒီၣ်တူာ် တကပၤန့ၣ် ဒီးဘၣ်တပျာ်စ့ၢ်ကီးအခီၣ်လၢအဂၤတကပၤ ဃုာ်ဒီးအစုစ့ၢ်ကီးန့ၣ်လီၤ. တၢ်ပိၢ်ဖးထီၣ်ဝဲအံၤ မၤဟးဂီၤကွံာ်အခီၣ်ဒီသဒၢတၢ်န့ၣ်လီၤ. လၢတၢ်ဘၣ်ဒိဘၣ်ထံးတခါအံၤအဃိ အဝဲဘၣ်ကွၢ်ဆၢၣ်မဲာ်ဒီးတၢ်လုၢ်အီၣ်နီၢ်ခိသးသမူတၢ်ဂ့ၢ်ကီန့ၣ်လီၤ. အပာ်ဖျါထီၣ်စ့ၢ်ကီးအတၢ်လိၣ်ဘၣ်လၢတၢ်ကရၢကရိလၢအမၤစၢၤပှၤလၢအဘၣ်ဒိဒီးဟီၣ်လာ်မ့ၣ်ပိၢ်အအိၣ်န့ၣ်လီၤ. တၢ်ဂီၤအံၤဒုးနဲၣ်ဖျါထီၣ်ဝဲ စီၤကဃ--- ဒိးကူစါယါဘျါအသးဖဲ တၢ်ဟ့ၣ်ကသံၣ်ဒၢး လၢအတၢ်ဘၣ်ဒိဘၣ် ထံးဒီးဟီၣ်လာ်မ့ၣ်ပိၢ်တၢ်ပိၢ်ဖးထီၣ်အဃိန့ၣ်လီၤ. (တၢ်ဂီၤ- KHRG)

တၢ်ဂီၤတဘ့ၣ်အံၤ ဘၣ်တၢ်ဒိန့ၢ်အီၤဖဲ လါယနူၤအါရံၤ ၂၄သီ, ၂၀၂၄ နံၣ် ဒီး ပာ်ဖျါထီၣ်ဝဲ စီၤကည--- ဒိးကူစါယါဘျါအသးဖဲ ကတ---တၢ်ဟ့ၣ်ကသံၣ်ဒၢး, လၢၢ်မုၢ်ပျီကရူၢ်, လူၤသီကီၢ်ဆၣ်အပူၤန့ၣ်လီၤ. ဖဲလါယနူၤအါရံၤ ၂၄ သီ, ၂၀၂၄ နံၣ်, ဂီၤ ၉း၄၅ မံးနံးန့ၣ်, စီၤကည--- လၢအမ့ၢ်ကသဝီ, လၢၢ်မုၢ်ပျီကရူၢ်, သဝီဖိတဂၤယီၢ်ဘၣ်ဟီၣ်လာ်မ့ၣ်ပိၢ်ဖဲ အဝဲလဲၤကွၢ်အစံာ်လၢ လူၢ်ကးဘၢခံဟီၣ်ကဝီၤန့ၣ်လီၤ. အခီၣ်စ့ၣ်တပၤလီၤ သဘှံးလၢဟီၣ်လာ်မ့ၣ်ပိၢ်တၢ်ပိၢ်ဖးထီၣ်အဃိန့ၣ်လီၤ.  အဝဲဘၣ်တၢ်လဲၤဆှၢအီၤ ဆူ ကတ---တၢ်ဟ့ၣ်ကသံၣ်ဒၢးတဘျီဃီ လၢတၢ်ကူစါယါဘျါသး အဂီၢ်န့ၣ်လီၤ. အဝဲမ့ၢ်ပှၤဆီဟံၣ်ဆီဃီဝံၤတဂၤ ဒီး အိၣ်ဒီးအဖိ (၂) ဂၤ ဒီး အခဲအံၤမ့ၢ်လၢအဘၣ်ဒိအဃိ အဟံၣ်ဖိဃီတဖၣ်ဘၣ်ကွၢ်ဆၢၣ်မဲာ်ဝဲဒီးတၢ်လုၢ်အီၣ်နီၢ်ခိသးသမူအတၢ်ဂ့ၢ်ကီန့ၣ်လီၤ. ဟီၣ်လာ်မ့ၣ်ပိၢ်အံၤဘၣ်တၢ်ဒိးလီၤပာ်အီၤလၢ SAC အသုးလၢတၢ်တသ့ၣ်ညါအသုးရ့ၣ်ဘၣ်တဖုန့ၣ်လီၤ. (တၢ်ဂီၤ- KHRG)

တၢ်ဂီၤတဘ့ၣ်အံၤဘၣ်တၢ်ဒိန့ၢ်အီၤဖဲ လါယနူၤအါရံၤ ၉သီ, ၂၀၂၄ နံၣ် ဖဲ ကန---သဝီ, ထီဝၣ်လီၤကရူၢ်, ကီးတရံးကီၢ်ဆၣ်န့ၣ်လီၤ. တၢ်ဂီၤအံၤပာ်ဖျါထီၣ် မီၤကပ---, လၢအမ့ၢ်ပှၤသဝီဖိတဂၤလၢ ကၠဲးဒိဝ့ၢ်, ကီးတရံးကီၢ် ဆၣ်,  လၢအဘၣ်ဒီၣ်တူာ်ကွံာ်အခီၣ်ထွဲတကပၤဖဲဟီၣ်လာ်မ့ၣ်ပိၢ် ပိၢ်ဖးထီၣ်ဝံၤအလီၢ်ခံန့ၣ်လီၤ. ဖဲလါဒံၣ်စဲဘၢၣ် ၇သီ, ၂၀၂၃ နံၣ်န့ၣ်, မီၤကပ--- ယီၢ်ဘၣ်ဟီၣ်လာ်မ့ၣ်ပိၢ်ဖဲ အဝဲအိၣ်လၢတၢ်ဃ့ၢ်မှံဟးဖျိးလီၢ်ဒီးဟဲက့ၤဃီၤ ဆူအဟံၣ်လၢအအိၣ်ဖဲ ကၠဲးဒိဝ့ၢ် အဆၢကတီၢ်န့ၣ်လီၤ. အဝဲဃ့ၢ်ထီၣ်လၢ ဝ့ၢ်ပူၤခီ ဖျိ SAC ခီၣ်ချ့သုးရ့ၣ် (ခမရ-၅၅၈) ခးလီၤကျိဖးဒိၣ်ဆူဝ့ၢ်ပူၤ ဖဲလါနိၣ်ဝ့ဘၢၣ် ၂၀၂၃ နံၣ်န့ၣ်လီၤ. အခီၣ်ခံပၤလၢာ်ဘၣ်ဒိနးနးကလဲာ်န့ၣ်လီၤ. တၢ်ကဲထီၣ်သးဝံၤအလီၢ်ခံဘၣ်တၢ်လဲၤဆှၢအီၤဆူ ကဖ---တၢ်ဆါဟံၣ်, လၢယိၤကီၢ်ပူၤ, လၢတၢ်ကူစါသးအဂီၢ်န့ၣ်လီၤ. လီၢ်ကဝီၤသဝီဖိတဖၣ်နာ်ဝဲလၢ ဟီၣ်လာ်မ့ၣ်ပိၢ်အံၤ ဘၣ်တၢ်ဒိးလီၤပာ်အီၤလၢ SAC ခီၣ်ချ့သုးရ့ၣ် (ခမရ-၅၅၈) န့ၣ်လီၤ. (တၢ်ဂီၤ- KHRG)