English
ကညီကျိာ်
မြန်မာတၢ်ပာ်ဖျါအဖုၣ်တဘ့ၣ်အံၤပာ်ဖျါထီၣ်ဝဲ တၢ်ကဲထီၣ်သးလၢ ထီတထူၣ်ကီၢ်ဆၣ်, တီအူကီၢ်ရ့ၣ် ဖဲလါယနူၤအါရံၤဒီး လါဖ့ၤဘြူၤ အါရံၤ ၂၀၂၄ နံၣ် အတီၢ်ပူၤန့ၣ်လီၤ. ဖဲလါယနူၤအါရံၤ ၂၀၂၄ နံၣ်န့ၣ် ထံကီၢ်တၢ်ပၢတၢ်ပြးကီၣ် ကးကရၢ (SAC) ထံလီၢ်ကီၢ်ပူၤ ပှၤန့ၢ်စိန့ၢ်ကမီၤတဖၣ် ကိးတၢ်အိၣ်ဖှိၣ်တခါဒီး သဝီသးပှၢ်ဒီး သဝီပှၤဘၣ်မူဘၣ်ဒါလၢ SAC ပာ်ထီၣ်အီၤ တဖၣ်ဖဲ ဒ့လိာ်မုၢ်နုာ် ကရူၢ်ဒီး ကရူၢ်အဂၤတဖၣ်လၢအအိၣ်ဖဲ ထီတထူၣ်ကီၢ်ဆၣ်အပူၤန့ၣ်လီၤ. သဝီသးပှၢ်ဒီး သဝီပှၤဘၣ်မူဘၣ်ဒါတဖၣ် ဒိးန့ၢ်ဘၣ် တၢ်ကလုၢ်လၢ ကဘၣ်ထၢသုးလၢ အဝဲသ့ၣ်သဝီတဖၣ်အပူၤ လၢကကဲ SAC သုးအဂီၢ်ဒီး ကဘၣ်ထၢကျိၣ်စ့လၢ သဝီဖိလၢ တကဲသုးဘၣ်အအိၣ်န့ၣ်လီၤ. သဝီဖိတဖၣ်န့ၣ် ဘၣ်တၢ်မၢဆူၣ်အဝဲသ့ၣ်လၢ ကဖီၣ်တၢ်ဖးလၢ အဆၢတဲာ်န့ၢ်အဝဲသ့ၣ်တၢ်ဘူၣ် တၢ်တီၢ်အဂီၢ်န့ၣ်လီၤ. ဖဲလါယနူၤအါရံၤ ၂၀၂၃ နံၣ်န့ၣ် လၢ က--- သဝီ, ဒ့လိာ်မုၢ်နုာ်ကရူၢ်အပူၤ သဝီဖိ (၆) ဂၤ ဘၣ်တၢ်ထၢဆူၣ်အီၤလၢကကဲသုးဒီး ဖဲလါဖ့ၤဘြူၤအါရံၤန့ၣ် သဝီဖိအဂၤ (၄၀) အိၣ် လၢက--- သဝီပူၤတဖၣ် ဘၣ်ထၢဆူၣ် အဝဲသ့ၣ်လၢကကဲသုးအဂီၢ်န့ၣ်လီၤ. လီၢ်ကဝီၤသဝီဖိတဖၣ်ပျံၤလၢ SAC ကထၢန့ၢ်ဆူၣ်သုး မ့တမ့ၢ် ဖီၣ်အဝဲသ့ၣ်လၢ ကကဲသုးဖိအဃိ ဒ်သိးကဟးဆှဲး တၢ်ထၢဆူၣ်သုးအဂီၢ် သဝီဖိအါဂၤဃ့ၢ်ထီၣ်လၢအဝဲသ့ၣ်ဟီၣ်ကဝီၤအပူၤန့ၣ်လီၤ. [1]
SAC တၢ်ထၢဆူၣ်သုး ဒီး ဃ့န့ၢ်ဆူၣ်သဝီဖိကျိၣ်စ့
ဖဲလါယနူၤအါရံၤ ၂၀၂၄ နံၣ်န့ၣ် ထံကီၢ်တၢ်ပၢတၢ်ပြးကီၣ်ကးကရၢ (SAC) ပယီၤပဒိၣ်ထံလီၢ်ကီၢ်ပူၤ ပှၤန့ၢ်စိန့ၢ်ကမီၤတဖၣ် ကိးတၢ်အိၣ်ဖှိၣ်တခါဒီး သဝီသးပှၢ်ဒီး သဝီပှၤဘၣ်မူဘၣ်ဒါလၢ SAC ပာ်ထီၣ်အီၤတဖၣ်ဖဲ ဒ့လိာ်မုၢ်နုာ်ကရူၢ်ဒီး ကရူၢ်အဂၤ တဖၣ်လၢ အအိၣ်ဖဲ ထီတထူၣ်ကီၢ်ဆၣ်, တီအူကီၢ်ရ့ၣ်အပူၤန့ၣ်လီၤ. ဖဲအဝဲသ့ၣ် မၤတၢ်အိၣ်ဖှိၣ်လၢ တၢ်ပၢဆှၢရဲၣ်ကျဲၤဝဲၤကျိၤ အိၣ်ဖဲ တီအူဝ့ၢ်ပူၤအဆၢကတီၢ် SAC ပှၤန့ၢ်စိန့ၢ်ကမီၤတဖၣ် ဟ့ၣ်လီၤတၢ်ကလုၢ်ဆူ သဝီသးပှၢ်တဖၣ်ဒီး ပှၤဘၣ်မူဘၣ်ဒါ တဖၣ်လၢ ကထၢသုးဖိအသီလၢ အဝဲသ့ၣ်သဝီအပူၤလၢ SAC သုးအဂီၢ်န့ၣ်လီၤ. SAC သုးဖိတဖၣ်လဲၤတဘျီဃီ စ့ၢ်ကီးလၢ သဝီတနီၤဒ်အမ့ၢ် က--- သဝီ,ဘ--- သဝီဒီး စ--- သဝီလၢ အအိၣ်ဖဲဒ့လိာ်မုၢ်နုာ်ကရူၢ်, ထီတထူၣ်ကီၢ်ဆၣ်တဖၣ် ဒ်သိးကနဲၣ် လီၤသဝီသးပှၢ်တဖၣ်လၢ ကထၢဆူၣ်သဝီဖိတဖၣ်လၢ ကကဲသုးအဂီၢ်န့ၣ်လီၤ. အဒိ သဝီတဖျၢၣ်အပူၤ ဟံၣ်ဒူၣ်မ့ၢ်အိၣ်အဖျၢၣ် (၁၀၀) န့ၣ် လၢဟံၣ်ဒူၣ် အဖျၢၣ် (၁၀) အပူၤ ကဘၣ်ကဲသုးတဂၤဒီး ကဘၣ်ထၢ သုးခဲလၢာ်န့ၣ် ကဘၣ်အိၣ် အဂၤ (၁၀) န့ၣ်လီၤ. ဟံၣ်ဖိဃီဖိအဂၤတဖၣ်လၢ တကဲသုးလၢအအိၣ်တ့ၢ်ဒံးလၢ ဟံၣ်ဒူၣ် (၉၀) အကျါ ဟံၣ်ဒူၣ်တဖျၢၣ်စုာ်စုာ်န့ၣ် ကဘၣ် ဟ့ၣ် (၅၀,၀၀၀) ကၠး န့ၣ်လီၤ.
လၢဒ--- သဝီ, ဒ့လိာ်မုၢ်နုာ်ကရူၢ်, ထီတထူၣ်ကီၢ်ဆၣ်, တီအူကီၢ်ရ့ၣ်အပူၤန့ၣ် ဟံၣ်ဒူၣ်အိၣ် (၃၀၀) ဃၣ်ဃၣ်န့ၣ်လီၤ. ဖဲလါယနူၤအါရံၤ ၂၀၂၄ နံၣ်န့ၣ် SAC ပှၤန့ၢ်စိန့ၢ်ကမီၤတဖၣ် ဟ့ၣ်လီၤ ဒ--- သဝီသးပှၢ်လၢ အမ့ၢ် မီၤအ--- လၢ ကထၢဆူၣ်သဝီဖိအဂၤ(၃၀) လၢဟံၣ်ဒူၣ် (၃၀) အပူၤလၢကကဲ SAC သုးဖိအဂီၢ်န့ၣ်လီၤ. ဟံၣ်ဒူၣ်လၢအအိၣ်တ့ၢ်ဒံး (၂၇၀) ဖျၢၣ်အကျါ ဟံၣ်ဒူၣ် တဖျၢၣ်စုာ်စုာ်န့ၣ် ဘၣ်ဟ့ၣ်လီၤ (၅၀,၀၀၀) ကၠးန့ၣ်လီၤ.
ဖဲတၢ်အိၣ်ဖှိၣ်ဖဲတီအူဝ့ၢ်န့ၣ် ဒ--- သဝီသးပှၢ်လၢအမ့ၢ် မီၤအ--- တဲဘၣ် ထံလီၢ်ကီၢ်ပူၤ ပှၤန့ၢ်စိန့ၢ်ကမီၤတဖၣ်လၢ အမၤဒ် အဝဲသ့ၣ်ဟ့ၣ်လီၤတၢ်ကလုၢ်အသိး တသ့ဘၣ်န့ၣ်လီၤ. အဝဲတဲဘၣ် SAC ပှၤန့ၢ်စိန့ၢ်ကမီၤတဖၣ်လၢ အဝဲသ့ၣ်အနီၢ်ကစၢ်ဒၣ်ဝဲ ကဘၣ်ဃ့ဆူၣ်ကျိၣ်စ့ မ့တမ့ၢ် ဖီၣ်သဝီဖိလၢ ကကဲသုးဖိအသီအဂီၢ်န့ၣ်လီၤ. အဝဲလဲၤထီၣ်တၢ်အိၣ်ဖှိၣ်ဒီး SAC ပှၤန့ၢ်စိန့ၢ်ကမီၤ တဖၣ်ဝံၤအလီၢ်ခံအက့ၤက့ၤဆူသဝီၤပူၤအဆၢကတီၢ် အကိးတၢ်အိၣ်ဖှိၣ်ဒီး လီၢ်ကဝီၤသဝီဖိတဖၣ်န့ၣ်လီၤ. အတဲဘၣ် သဝီဖိတ ဖၣ်တၢ်လၢ SAC ပှၤန့ၢ်စိန့ၢ်ကမီၤတဖၣ်ဟ့ၣ်လီၤတၢ်ကလုၢ်ဘၣ်ဃးတၢ်လၢအဘၣ်မၤဒီး အဝဲဂ့ၢ်လိာ်ဝဲအဝဲသ့ၣ် တၢ်ကလုၢ်န့ၣ် လီၤ. အဝဲပာ်ဖျါထီၣ် သဝီဖိတဖၣ် တၢ်လၢ SAC ပှၤန့ၢ်စိန့ၢ်ကမီၤတဖၣ်တဲဘၣ်အီၤန့ၣ်လီၤ. “နမ့ၢ်အဲၣ်ဒိးထၢသုးဖိအသီ မ့တမ့ၢ် ဃ့ဆူၣ်စ့န့ၣ် နကစၢ်မၤအီၤန့ၣ်.” အတဲဘၣ် သဝီဖိတဖၣ်လၢ ဖဲအဝဲသ့ၣ်အိၣ်လၢသဝီပူၤ မ့တမ့ၢ် ဖဲအဟးထီၣ်က့ၤလီၤအဆၢ ကတီၢ် အကြၢးပလီၢ်သးန့ၣ်လီၤ.
ဖဲလါယနူၤအါရံၤ ၂၀၂၄ နံၣ်န့ၣ် SAC ဟ့ၣ်လီၤတၢ်ကလုၢ်အံၤအဃိ ပိာ်ခွါသးပှၢ်တဖၣ်လၢအအိၣ်ဖဲ ဒ--- သဝီပူၤတဖၣ် ဘၣ်ယိၣ်တၢ်ဒီး ပျံၤလၢ SAC ကဖီၣ်အဝဲသ့ၣ်ဒီး ကမၢဆူၣ်အဝဲသ့ၣ်လၢ ကကဲသုးအဂီၢ်န့ၣ်လီၤ. လီၢ်ကဝီၤသဝီပူၤ မိပါတဖၣ်စ့ၢ်ကီးအိၣ်ဒီး တၢ်ပျံၤတၢ်ဖုးလၢ SAC ဖီၣ်အဝဲသ့ၣ်အဖိမ့ၢ်ဝံၤ ကဘၣ်ဆီတလဲ ဒီးဖိသးလၢ SAC ဖီၣ်ဃာ်ဒီး အဟံၣ်ဖိဃီဖိ တဖၣ်လၢ ကနုာ်လီၤကဲသုးအဂီၢ်န့ၣ်လီၤ.
SAC အိၣ်ဒီးတၢ်ပၢတၢ်ပြးလၢအဂံၢ်ဆူၣ်ဖဲ က--- သဝီ, ဘ--- သဝီ, စ--- သဝီ ဒီး ဖ---- သဝီ တုၤလီၤလၢ ဒ--- သဝီ ဒီး ဒ့လိာ်မုၢ်နုာ်ကရူၢ်စ့ၢ်ကီးန့ၣ်လီၤ. လၢန့ၢ်အမဲာ်ညါ တၢ်အိၣ်ဖှိၣ်ဝံၤအလီၢ်ခံ တယံာ်တမီၣ်လၢၤဘၣ်န့ၣ် လီၢ်ကဝီၤသဝီဖိဖဲ သဝီ တဖၣ်အံၤအပူၤ လီၢ်တံၢ်လၢ ကဘၣ်ဖီၣ်တၢ်ဖးလၢ ကဘၣ်ကဲ မ့တမ့ၢ် တဘၣ်ကဲ တၢ်မၢဆူၣ်ကဲသုးဧါန့ၣ်လီၤ. ဒ်န့ၣ်အသိးတၢ်ကပာ်လီၤမျးကယာ်တဆံဖဲအံၤလီၤ. သဝီတဖျၢၣ်အပူၤဟံၣ်ခိၣ်မ့ၢ်အိၣ် (၁၀၀) ဖျၢၣ်န့ၣ် SAC ကထၢဆူၣ်သဝီဖိ (၁၀) ဂၤလၢကကဲသုးအဂီၢ်န့ၣ်လီၤ. ဟံၣ်ဒူၣ်အဖျၢၣ် (၁၀၀) အပူၤ ပှၤတဂၤလၢဟံၣ်ဒူၣ်တဖျၢၣ်စုာ်စုာ် ဖီၣ်ခိၣ်ဖးဒီး ဖီၣ်ဘၣ် ကးအဘ့ၣ်(၁၀) န့ၣ် ပာ်ဖျါထီၣ်လၢကဘၣ်ကဲသုးဒီး ကးအဘ့ၣ် (၉၀) န့ၣ် ပာ်ဖျါထီၣ်လၢ ကဘၣ်ကဲသုးအလီၢ် ကဘ့ၣ်ဟ့ၣ် လီၤစ့န့ၣ်လီၤ. သဝီဖိအဂၤ (၉၀) လၢဟံၣ်ဒူၣ်တဖျၢၣ်စုာ်စုာ်လၢ အတပၣ်ဃုာ်လၢ တၢ်မၢဆူၣ်ကဲသုးဘၣ်တဖၣ်န့ၣ် ကဘၣ် ဟ့ၣ်လီၤ (၅၀,၀၀၀) ကၠး န့ၣ်လီၤ.
ဖဲလါ ဖ့ၤဘြူၤအါရံၤ ၂၄ သီန့ၣ် SAC မၢဆူၣ် သဝီဖိတဖၣ်လၢ အအိၣ်ဖဲ က--- သဝီ, ဘ--- သဝီ, စ--- သဝီ ဒီး ဖ--- သဝီ လၢကဖီၣ်တၢ်ဖးလၢ ကမၤတၢ်ဆၢတဲာ်လၢ သဝီဖိဖဲလဲၣ်တဂၤ ကဘၣ်ကဲသုးအဂီၢ်န့ၣ်လီၤ. လီၢ်ကဝီၤသဝီဖိတဂၤလၢ အအိၣ်ဒ့ လိာ်မုၢ်နုာ်ကရူၢ်ပူၤ ပာ်ဖျါထီၣ်ဝဲလၢ သဝီဖိ (၆) ဂၤလၢအအိၣ် က--- သဝီပူၤ ဖီၣ်တၢ်ဖးဝံၤအလီၢ်ခံ လီၤဘၣ်လၢ ကဘၣ်ကဲ SAC သုးဖိန့ၣ်လီၤ. သဝီဖိတနီၤလၢ တဖီၣ်တၢ်ဖးတဖၣ်န့ၣ် ဘၣ်ဟ့ၣ်လီၤ SAC ကျိၣ်စ့ဒ်အဝဲသ့ၣ်ဃ့ဝဲအသိးန့ၣ်လီၤ. က--- သဝီပူၤ ဟံၣ်ဒူၣ်အိၣ် (၄၀၀) ဖျၢၣ် ဒီး ဘ--- သဝီပူၤ ဟံၣ်ဒူၣ်အိၣ် (၃၀၀) ဖျၢၣ် ဃၣ်ဃၣ်ဒီး စ--- သဝီပူၤ ဟံၣ်ဒူၣ်အိၣ် (၄၀၀) မ့တမ့ၢ် (၅၀၀) ဖျၢၣ် ဃၣ်ဃၣ်ဒီး ဖ--- သဝီပူၤန့ၣ် ဟံၣ်ဒူၣ်အိၣ်အါန့ၢ်ဒံး (၁၀၀) ဖျၢၣ်ဃၣ်ဃၣ်န့ၣ်လီၤ. ဖဲလါဖ့ၤဘြူၤအါရံၤ ၂၆ သီ, ၂၀၂၄ နံၣ်န့ၣ် သဝီဖိ (၄၀) ဂၤလၢ အအိၣ်က--- သဝီပူၤတဖၣ် ဖီၣ်တၢ်ဖးဒီးလီၤဘၣ်လၢ ကဘၣ်ကဲ SAC သုးဖိအဂီၢ်န့ၣ်လီၤ. ဟံၣ်ဒူၣ်အဂၤလၢအအိၣ်သဝီတဖၣ်အံၤအပူၤန့ၣ် ဘၣ်ဟ့ၣ်လီၤကျိၣ်စ့လၢ SAC အအိၣ်န့ၣ်လီၤ. သူၤသီကရူၢ်ခိၣ်လၢ အမံၤမ့ၢ် အူဆ--- မ့ၢ်ပှၤအခိၣ်သ့ၣ်တဂၤလၢ အရဲၣ်ကျဲၤတၢ်ဖီၣ်ဆူၣ်သုးလၢ သဝီတဖၣ်အံၤအပူၤန့ၣ်လီၤ. အဝဲမ့ၢ်ကရူၢ်ခိၣ်တဂၤလၢ SAC ပာ်ထီၣ်ဝဲန့ၣ်လီၤ. တၢ်ဖီၣ်တၢ်ဖးအံၤဘၣ်တၢ်မၤအီၤလၢ သီခါဖၠၢ်အိၣ်လၢ သဝီတဖျၢၣ်စုာ်စုာ်အပူၤန့ၣ်လီၤ. SAC သုးဖိတဖၣ် အိၣ်ခိးတၢ်ဒီးကျိလၢ တၢ်ဖီၣ်တၢ်ဖးအလီၢ်န့ၣ်လီၤ. သဝီဖိတဖၣ်ဖီၣ်ဘၣ်ကး လၢကဘၣ်ကဲသုးအဂီၢ်န့ၣ် SAC သုးဖိတဖၣ်မၢ အဝဲသ့ၣ်လဲၤဆ့ၣ်နီၤလၢ သုးသိလ့ၣ်လၢအအိၣ်ဘူးဖဲန့ၣ်လီၤ.
သဝီဖိတနီၤလၢအအိၣ်လၢ က--- သဝီ, ဘ--- သဝီ, ဒီး စ--- သဝီလၢ အတအဲၣ်ဒိးဖီၣ်တၢ်ဖး လၢကကဲသုးအဂီၢ်ဘၣ်အဃိ အဃ့ၢ်ထီၣ်လၢအဝဲသ့ၣ်သဝီန့ၣ် ဘၣ်တၢ်ပာ်ဖျါထီၣ်အီၤဆူ KHRG န့ၣ်လီၤ. လၢန့ၢ်အမဲာ်ညါ ဟ--- သဝီ, ဆ့ၣ်ပူၣ်တီၤကရူၢ်, ဒီၣ်ဖးခိၣ်ကီၢ်ဆၣ်အပူၤ သဝီဖိပိာ်ခွါအါဂၤလၢအအိၣ် (၁၈) နံၣ်အဖီခိၣ်န့ၣ် တအဲၣ်ဒိးဖီၣ်တၢ်ဖး လၢကကဲသုးအဂီၢ်ဘၣ်အဃိ ဃ့ၢ်ထီၣ်လၢအဝဲသ့ၣ်သဝီပူၤန့ၣ်လီၤ.
ဖဲလါဖ့ၤဘြူၤအါရံၤ ၁၀ သီ, ၂၀၂၄ နံၣ်န့ၣ် SAC ဘိးဘၣ်ရၤလီၤလၢ ပိာ်ခွါသးနံၣ် ၁၈ တုၤ ၃၅ နံၣ်ဒီး ပိာ်မုၣ် ၁၈ တုၤ ၂၇ နံၣ်နံၣ် ကဘၣ်ကဲသုးစးထီၣ် ဖဲလါအ့ဖြ့ၣ် ၂၀၂၄ နံၣ် ဘၣ်တၢ်ပာ်ပနီၣ်အီၣ်လၢ ထံကီၢ်တၢ်ဆဲးတၢ်လၤနံၣ်ထီၣ်သီဝံၤအလီၢ်ခံန့ၣ်လီၤ. လီၢ်သဝီဖိလၢ အအိၣ်ဒ့လိာ်မုၢ်နုာ်ကရူၢ်တဖၣ် သူၣ်ကိၢ်သးဂီၤဒိၣ်မးလၢ တၢ်ဘိးဘၣ်ရၤလီၤအံၤအဃိန့ၣ်လီၤ. လီၢ်ကဝီၤသဝီဖိတဂၤလၢအအိၣ်ဖဲဂ--- သဝီ, ဒ့လိာ်မုၢ်နုာ်ကရူၢ်ပာ်ဖျါထီၣ်ဝဲလၢ တၢ်မၤဘိးဘၣ်ရၤလီၤဝံၤအလီၢ်ခံ SAC သုးဖိတဖၣ်တဲဘၣ်သဝီဖိတနီၤလၢအအိၣ်လၢကရူၢ်ပူၤလၢ “နမ့ၢ်တဟ့ၣ်လီၤ သဝီဖိတဖၣ်လၢ ကကဲသုးအဂီၢ်ဘၣ်န့ၣ် ပကဖီၣ်သဝီဖိတဖၣ်. ပဖီၣ်သဝီဖိတဖၣ်မ့ၢ်တန့ၢ်ဘၣ်န့ၣ် ပမ့ၢ်ထံၣ်အဝဲသ့ၣ်ဒု ပကခးအီၤ.” လီၢ်ကဝီၤသဝီဖိတဖၣ် တဲဘၣ်စ့ၢ်ကီး KHRG လၢ SAC တဲဘၣ်အဝဲသ့ၣ်လၢ အကစးထီၣ်ထၢဆူၣ်သုး ဖဲလါမးရှး ၂၀၂၄ နံၣ် တၢ်ကိခါကၠိပျၢ်ဝံၤအလီၢ်ခံန့ၣ်လီၤ.
Footnotes:
[1] တၢ်ဂ့ၢ်တၢ်ကျိၤလၢ လံာ်ပာ်ဖျါတဘ့ၣ်အံၤအပူၤန့ၣ် တၢ်ဒိးန့ၢ်ဘၣ်အီၤဖဲ လါအီးကထိဘၢၣ် ၂၀၂၃နံၣ် အပူၤန့ၣ်လီၤ. ဘၣ်တၢ်ဆှၢဟ့ၣ်ထီၣ်အီၤလၢ လီၢ် ကဝီၤၦၤမၤသကိးတၢ်တဂၤ ဖဲမုၢ်တြီၢ်ကီၢ်ရ့ၣ်အပူၤ လၢအဘၣ်တၢ်သိၣ်လိအီၤ လၢကညီဂ့ၢ်ဝီခွဲးယာ်ကရူၢ် KHRG လၢကမၤနီၣ်မၤဃါ တၢ်မၤဘၣ်ဒိ ၦၤဟီၣ် ခိၣ်ဖိခွဲးယာ်အတၢ်အိၣ်သးတဖၣ်ဖဲလီၢ်ကဝီၤပူၤန့ၣ်လီၤ. ၦၤတူၢ်ဘၣ်တၢ်တဖၣ်အမံၤ, တၢ်ဂီၤဒီး အိၣ်ဆိးလီၢ်ကျဲ လီၤတံၢ်လီၤဆဲးတဖၣ်န့ၣ် တၢ်မၤလီၤ ဘၢအီၤလၢ အဝဲနီၢ်ကစၢ်တၢ်ဘံၣ်တၢ်ဘၢအဂီၢ်န့ၣ်လီၤ. တၢ်ဂ့ၢ်တၢ်ကျိၤလၢ တၢ်ကွဲးၡဲပၠးအါထီၣ်အီၤ ဖဲပနိကဝီၤအပူၤန့ၣ် မ့ၢ်ဝဲဒၣ် KHRG အတၢ်ကွဲးၡဲထီၣ် တၢ်ဂ့ၢ်တၢ်ကျိၤန့ၣ်လီၤ.
Print: