English
ကညီကျိာ်
မြန်မာတၢ်ပာ်ဖျါဖုၣ်တဘ့ၣ်အံၤ ပာ်ဖျါဝဲ တၢ်ခးလီၤနါစိၤကျိဖးဒိၣ် ဒီးဟီၣ်လာ်မ့ၣ်ပိၢ်တၢ်ကဲထီၣ်သးလၢ နိၣ်တကီကီၢ်ဆၣ်, ဒူပျာ်ယာ် ကီၢ်ရ့ၣ်ပူၤ စးထီၣ်ဖဲ လါယူၤ တုၤလၢ လါစဲးပတ့ဘၢၣ် ၂ဝ၂၂နံၣ်န့ၣ်လီၤ. ဖဲလါယူၤ ၁၆သီ, ၂၀၂၂ နံၣ်န့ၣ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ် (KNLA) ဒီး ကမျၢၢ်တၢ်ဒီသဒၢသုး (PDF) အသုးပာ်ဖှိၣ်သ့ၣ်တဖၣ်ထီၣ်ဒုးဝဲဒၣ် ပယီၤသုး (SAC) ဒီး ဒြိ ဖဲဆ့ၣ်ကၠံဝ့ၢ်အပူၤအဃိ ဖဲလါယူၤ ၁၆သီ ဒီး ၁၈သီ အဘၢၣ်စၢၤန့ၣ် ပယီၤသုးသ့ၣ်တဖၣ်ခးလီၤနါစိၤကျိဖးဒိၣ်လၢ မ---သဝီ, တခးခံကရူၢ်, နိၣ်တကီကီၣ်ဆၣ် အပူၤန့ၣ်လီၤ. ဒီးဖဲလါစဲးပတ့ဘၢၣ် ၇ သီ, ၂၀၂၂ နံၣ်န့ၣ် ဒူသဝီဖိအကျီၢ်တဖၣ် လဲၤယီၢ်ဘၣ် ဝဲ မ့ၣ်ပိၢ်လၢ ပယီၤသုးပာ်လီၤတ့ၢ်ဝဲဖဲအဘူးဒီး ခီၣ်သုးရ့ၣ် ခလရ (၂၈၃) လၢအအိၣ်သူၣ်လီၤအသးဖဲ တ---သဝီ, နိၣ်တကီ ကရူၢ်, နိၣ်တကီကီၢ်ဆၣ်အပူၤဒီး ဟီၣ်လာ်မ့ၣ်ပိၢ်န့ၣ်ပိၢ်ဖးထီၣ်ဝဲန့ၣ်လီၤ.[1]
တၢ်ခးလီၤနါစိၤကျိဖးဒိၣ်
ဖဲယူၤ ၁၆သီ, ၂၀၂၂နံၣ်, ဟါခီ ၆ နၣ်ရံၣ်အဆၢကတီၢ်န့ၣ် KNLA ဒီး PDF အသုးပာ်ဖှိၣ်သ့ၣ်တဖၣ်သူဝဲဒၣ် ဒြိ ဒီးထီၣ်ဒုးဝဲဒၣ် ပယီၤခီၣ်သုးရ့ၣ် ခလရ (၄၃၂) အသုးသ့ၣ်တဖၣ်လၢ ဆ့ၣ်ကၠံဝ့ၢ်, နိၣ်တကီကီၣ်ဆၣ်, ဒူပျာ်ယာ်ကီၣ်ရ့ၣ်အပူၤန့ၣ်လီၤ. တၢ်ဒုး ဝံၤအလီၢ်ခံ ပယီၤသုးသ့ၣ်တဖၣ်ခးလီၤကျိဖးဒိၣ် ၈၁ မမ ဆူ မ--သဝီ, တခးခံကရူၢ်, နိၣ်တကီကီၣ်ဆၣ်အပူၤ သၢသီန့ၣ်လီၤ. (SAC သ့ၣ်တဖၣ်တယာ်ဝဲလၢ ဒြိသ့ၣ်တဖၣ်အံၤ အိၣ်လၢသဝီပူၤအဃိခးလီၤကျိဖးဒိၣ်န့ၣ်လီၤ.) ဖဲလါယူၤ ၁၆သီ, ၂၀၂၂နံၣ် န့ၣ် ပယီၤသုးသ့ၣ်တဖၣ် စးထီၣ်ခးလီၤကျိဖးဒိၣ် လၢဟါခီ ၆ နၣ်ရံၣ်တုၤလၢ ဂီၤခီ ၁ နၣ်ရံၣ်န့ၣ်လီၤ. ဒီးခးလီၤကျိဖးဒိၣ် ခံဘျီ တဘျီ ဖဲလါယူၤ ၁၇ သီ, ၂၀၂၂ နံၣ် စးထီၣ်လၢဟါခီ ၆ နၣ်ရံၣ် တုၤလၢမုၢ်နၤခီ ၁၁ နၣ်ရံၣ်န့ၣ်လီၤ. ဒီးခးလီၤကဒီးကျိဖးဒိၣ် သၢဘျီတဘျီ ဖဲလါယူၤ ၁၈ သီ, ၂၀၂၂ နံၣ် စးထီၣ်လၢမုၢ်နၤခီ ၈ နၣ်ရံၣ် တုၤလၢဂီၤခီ ၁ နၣ်ရံၣ်န့ၣ်လီၤ. ပယီၤသုးသ့ၣ်တဖၣ် ခးလီၤကျိဖးဒိၣ်ဆူဒူသဝီပူၤ ဘၣ်ဆၣ်တဘၣ်ဒိဘၣ်ထံး ဒူသဝီဖိအဟံၣ်နီတဖျၢၣ်ဘၣ်. (ဖဲတၢ်ခးလီၤကျိဖးဒိၣ်အဆၢကတီၢ် သဝီဖိသ့ၣ်တဖၣ် တဟးထီၣ်ဃ့ၢ်ဆူတၢ်ချၢဘၣ်. ဒီးအဝဲသ့ၣ် ဃ့ၢ်အိၣ်ခူသူၣ်ဆူတၢ်ပူၤလၢအခူၣ်ဃာ်ဝဲ လၢဟီၣ်ခိၣ်ဖီလာ်န့ၣ် လီၤ.)
ဟီၣ်လာ်မ့ၣ်ပိၢ်တၢ်ကဲထီၣ်သး
ဖဲလါစဲးပတ့ဘၢၣ် ၇ သီ, ၂၀၂၂နံၣ်, ဂီၤခီ ၁၁ နၣ်ရံၣ်အဆၢကတီၢ် သဝီဖိလၢအအိၣ်ဆိးဖဲ တ--သဝီ, နိၣ်တကီကရူၢ်, နိၣ်တ ကီကီၢ်ဆၣ်, ဒူပျာ်ယာ်ကီၢ်ရ့ၣ်အပူၤအမံၤမ့ၢ် အူစ--- န့ၣ် ပျၢ်လီၤဝဲဒၣ် အကျီၢ်သ့ၣ်တဖၣ်လၢကလဲၤ ဃုအီၣ်နီၣ်ဖဲတၢ်လီၢ်လၢ အဘူးဒီး ခလရ (၂၈၃) န့ၣ်လီၤ. ဖဲန့ၣ်အဆၢကတီၢ်အကျီၢ်သ့ၣ်တဖၣ်လဲၤယီၢ်ဘၣ်ဝဲ ဟီၣ်လာ်မ့ၣ်ပိၢ်လၢပယီၤသုး ပာ်လီၤတ့ၢ် ဝဲအဃိ ပိၢ်ဖးထီၣ်ဝဲန့ၣ်လီၤ. (ပယီၤသုးသ့ၣ်တဖၣ် ဖဲအပာ်လီၤဝဲ မ့ၣ်ပိၢ်အဆၢကတီၢ် တဲပၠးဝဲသဝီဖိသ့ၣ်တဖၣ်အဃိ လီၢ်ကဝီၤ ဒူသဝီဖိသ့ၣ်တဖၣ်သ့ၣ်ညါဝဲလၢ မ့ၣ်ပိၢ်အံၤမ့ၢ်ဝဲ ပယီၤသုးအတၢ်န့ၣ်လီၤ.) ဟီၣ်လာ်မ့ၣ်ပိၢ် ပိၢ်ဖးထီၣ်အဃိ ကျီၢ်တဒုသံကွံာ်ဝဲ ဒီး ကျီၢ်အဂၤခံဒုဘၣ်ဒိဘၣ်ထံး စ့ၢ်ကီးန့ၣ်လီၤ. ကျီၢ်ကစၢ်လၢအကျီၢ်ဘၣ်ဒိဘၣ်ထံးခံဒုန့ၣ် ဘၣ်မၤသံဝဲဒီးဆါအီၣ်ကွံာ်ဝဲန့ၣ်လီၤ.
Footnotes:
[1] တၢ်ဂ့ၢ်တၢ်ကျိၤလၢ လံာ်ပာ်ဖျါတဘ့ၣ်အံၤအပူၤန့ၣ် တၢ်ဒိးန့ၢ်ဘၣ်အီၤဖဲ လါယူၤတုၤလၢ လါစဲးပထ့ဘၢၣ် ၂၀၂၂ နံၣ်အပူၤန့ၣ်လီၤ. ဘၣ်တၢ်ဆှၢဟ့ၣ်ထီၣ်အီၤ လၢ လီၢ်ကဝီၤၦၤမၤသကိးတၢ်တဂၤ ဖဲဒူပျာ်ယာ်ကီၢ်ရ့ၣ်အပူၤ လၢအဘၣ်တၢ်သိၣ်လိအီၤ လၢကညီဂ့ၢ်ဝီခွဲးယာ်ကရူၢ် KHRG လၢကမၤနီၣ်မၤဃါတၢ်မၤဘၣ် ဒိၦၤဟီၣ်ခိၣ်ဖိခွဲးယာ်အတၢ်အိၣ်သးတဖၣ်ဖဲလီၢ်ကဝီၤပူၤန့ၣ်လီၤ. ၦၤတူၢ်ဘၣ်တၢ်တဖၣ်အမံၤ, တၢ်ဂီၤဒီး အိၣ်ဆိးလီၢ်ကျဲလီၤတံၢ်လီၤဆဲးတဖၣ်န့ၣ် တၢ်မၤလီၤ ဘၢအီၤလၢအဝဲနီၢ်ကစၢ်တၢ်ဘံၣ်တၢ်ဘၢအဂီၢ်န့ၣ်လီၤ. တၢ်ဂ့ၢ်တၢ်ကျိၤလၢ တၢ်ကွဲးၡဲပၠးအါထီၣ်အီၤ ဖဲပနိကဝီၤအပူၤန့ၣ် မ့ၢ်ဝဲဒၣ် KHRG အတၢ်ကွဲးၡဲထီၣ် တၢ်ဂ့ၢ်တၢ်ကျိၤန့ၣ်လီၤ.
Print:
