တၢ်ကဲထီၣ်သးအကလုာ်

တၢ်မၤသံ

တၢ်ကဲထီၣ်သးမုၢ်နံၤမုၢ်သီ

လါဒံၣ်စ့ဘၢၣ် ၃၁သီ, ၂၀၂၂ နံၣ်

တၢ်ကဲထီၣ်သးတၢ်လီၢ်တၢ်ကျဲ (သဝီ, ကရူၢ်, ကီၢ်ဆၣ်, ကီၢ်ရ့ၣ်)

ထိဘိၤကၠံသုးကလၢၤ, အ---သ၀ီ, ပရှီလိာ်ဟီၣ်က၀ီၤ, ဒီၣ်ဖးခိၣ်ကီၢ်ဆၣ်, တီအူကီၢ်ရ့ၣ်

ၦၤလၢအတူၢ်ဘၣ်တၢ်တဂၤအဂ့ၢ်အကျိၤ

မံၤ

စီၤအီၤသူယၣ်သါ (တ့ၣ်တ့ၣ်)

သးနံၣ်

၃၄နံၣ်

မုၣ်/ ခွါ

ခွါ

ကလုာ်

ကညီ

ဟံၣ်ဖိဃီဖိ အိၣ် / တအိၣ်   

အိၣ်

တၢ်ဖံးတၢ်မၤ

ထူစံာ်

တၢ်ဘူၣ်တၢ်ဘါ

ခရံာ်ဖိ

တၢ်ဟံမူဒါ/ လီၢ်လၤ

သ၀ီဖိ

အိၣ်ဆိးဒူသဝီ

ဘ---က၀ီၤဒ့, လ့ၣ်သိၤ၀့ၢ်, ဒီၣ်ဖးခိၣ်ကီၢ်ဆၣ်, တီအူကီၢ်ရ့ၣ်

ၦၤလၢအမၤအၢပယွဲတၢ်တဂၤအဂ့ၢ်အကျိၤ

မံၤ                    

လီၢ်လၤ

သုးကျိၤ/ သုးရ့ၣ် / သုးတြိၤ

အိၣ်သူၣ်လီၤသးလီၢ်ကျဲ / သုးကလၢၤ

အခိၣ်အမံၤဒီးလီၢ်လၤ

တသ့ၣ်ညါ

တသ့ၣ်ညါ

SAC ခီၣ်ချ့သုးရ့ၣ်နီၣ်ဂံၢ်-၄၁၃

ထိၤဘိၤကၠံသုးကလၢၤ, အ---သ၀ီ, ပရှီလိာ်ဟီၣ်က၀ီၤ, ဒီၣ်ဖးခိၣ်ကီၢ် ဆၣ်, တီအူကီၢ်ရ့ၣ်

တသ့ၣ်ညါ

၁. ၡဲပၠးၦၤနဟံးန့ၢ်တၢ်ကဲထီၣ်သးတခါအံၤ တဆီဘၣ်တဆီတက့ၢ်.

ဖဲလါယနူၤအါရံၤ ၁သီ, ၂၀၂၃နံၣ်န့ၣ် (KHRG ပှၤမၤနီၣ်မၤဃါတၢ်ကစီၣ်တဂၤ) လဲၤမၤတၢ်ထံၣ်လိာ်သံကွၢ်ဒီး ပှၤတူၢ်ဘၣ် တၢ်အတခွါ, ဃုာ်ဒီးသ၀ီဖိတဂၤလၢ အ---သ၀ီ, လၢအအိၣ်ဘူးဖဲတၢ်ကဲထီၣ်သးဆၢကတီၢ်, ဒီးမၤစၢၤဘၣ်၀ဲ ပှၤတူၢ်ဘၣ် တၢ်န့ၣ်လီၤ. တနံၤဃီဖဲန့ၣ်, ယကတိၤသကိးဘၣ်တၢ်ဒီးပှၤတူၢ်ဘၣ်တၢ် အ၀ဲၢ်ခွါဘၣ်ဃး တၢ်ဂ့ၢ်အံၤ, ဒီးဖဲလါယနူၤအါရံၤ ၂၄သီန့ၣ် ယကတိၤဘၣ်တၢ်ဒီး ပှၤတူၢ်ဘၣ်တၢ်အမါန့ၣ်လီၤ.

၂. ကွဲးနီၣ်ၦၤလၢဟ့ၣ်တၢ်ဂ့ၢ်အံၤတဂၤစုာ်စုာ်သ့ၣ်ညါ တၢ်ဂ့ၢ်အံၤအမ့ၢ်အတီလၢကျဲဒ်လဲၣ်.

အ---သ၀ီဖိလၢအဟ့ၣ်ပှၤတၢ်ဂ့ၢ်တဖၣ်, မၤစၢၤဘၣ်၀ဲပှၤတူၢ်ဘၣ်တၢ် ဖဲတၢ်ခးအီၤ၀ံၤတဘျီဃီ ဒီးကတိၤဘၣ်တၢ်ဒီးအီၤ တချုးလၢအသးသမူဟးထီၣ်ဒံးဘၣ်န့ၣ်လီၤ. ပှၤအဂၤလၢအဟ့ၣ်လီၤတၢ်ဂ့ၢ်သ့ၣ်တဖၣ် မ့ၢ်၀ဲပှၤတူၢ်ဘၣ်တၢ်အဟံၣ်ဖိဃီဖိ လၢအသ့ၣ်ညါတၢ်အိၣ်သးအဂ့ၢ် တချုးဒံးလၢ ပှၤတူၢ်ဘၣ်တၢ်သံဒီး အသံ၀ံၤကတီၢ်န့ၣ်လီၤ.

ပာ်ဖျါတၢ်ကဲထီၣ်သးအဂ့ၢ်အကျိၤလၢလၢပှဲၤပှဲၤတက့ၢ်.

ဖဲလါဒံၣ်စ့ဘၢၣ် ၃၁သီ, ၂၀၂၂နံၣ် ဂီၤခီ ၇နၣ်ရံၣ်န့ၣ်, ကလံၤစိးသၣ်တီၣ်အ့ခၠါယ့ကရူၢ် ထီၣ်ဒုး၀ဲ (SAC) သုး အခီၣ်ချ့သုးရ့ၣ် နီၣ်ဂံၢ် (ခမရ-၄၁၃) ဖဲထိဘိၤကၠံသုးကလၢၤ, လၢအအိၣ်ဖဲ အ---သ၀ီအဃၢၤ, ပရှီလိာ်ဟီၣ်က၀ီၤ, ဒီၣ်ဖးခိၣ်ကီၢ်ဆၣ်, တီအူကီၢ်ရ့ၣ်န့ၣ်လီၤ. တၢ်ခးလိာ်သးယံာ်၀ဲ ၁၀မံးနံးန့ၣ်လီၤ. လၢတၢ်ခီၣ်ဆၢက့ၤအဂီၢ် SAC သုး (ခမရ-၄၁၃) အသုးဖိတ ဖၣ်ခးလီၤနါစိၤ၀ဲကျိချံမျိာ်သၣ်တဖၣ်လၢ အ---သ၀ီအခိၣ်ဃၢၤ၀း၀း ဒီးခးစ့ၢ်ကီးကျိဖိတဖၣ်န့ၣ်လီၤ. (သ၀ီဖိတၢ်ဘၣ်ဒိ ဘၣ်ထံး တအိၣ်ဘၣ်မ့ၢ်လၢ ကျိချံမျိာ်သၣ်တဖၣ် လီၤတဲာ်ဒီးပိၢ်ဖးထီၣ်၀ဲလၢ သ၀ီအချၢန့ၣ်လီၤ. ပှၤသ၀ီဖိတဘၣ်ဒီး ကျိနီ တဂၤဘၣ်).

ဖဲလါဒံၣ်စဲဘၢၣ် ၃၁သီ, ၂၀၂၂နံၣ် စီၤအီၤသူၤယၣ်သါ (တ့ၣ်တ့ၣ်) ဒီးအတခွါ တိာ်ပာ်အသးလၢကလဲၤဆူ ၀့ၢ်တီအူ ဒ်သိး ကပှ့ၤတၢ်အီၣ်တၢ်အီလၢအဟံၣ်ဖိဃီဖိကမၤလၤကပီၤနံၣ်ထီၣ်သီအဂီၢ်န့ၣ်လီၤ. စီၤအီၤသူၤယၣ်သါန့ၣ် အိၣ်ဆိး၀ဲဖဲ ဘ--- က၀ီၤဒ့, လ့ၣ်သိၤ၀့ၢ်, ဒီၣ်ဖးခိၣ်ကီၢ်ဆၣ်န့ၣ်လီၤ. အတခွါအိၣ်၀ဲဖဲ ခ---သ၀ီ လၢအဘူးဒီး အ---သ၀ီ, ပရှီလိာ် ဟီၣ်က၀ီၤ, ဒီၣ်ဖးခိၣ်ကီၢ်ဆၣ်န့ၣ်လီၤ. လၢကလဲၤသကိးဆူ တီအူ၀့ၢ်အဂီၢ် စီၤအီၤသူၤယၣ်သါအတခွါတဲပာ်အီၤလၢ ကလဲၤအိၣ်ခိးအီၤ ဖဲကျးဆါတၢ်တဖျၢၣ်လၢ ကျဲမုၢ်ကပၤ (ဖဲအတလၢထီၣ် ထိဘိၤကၠံသုးကလၢၤန့ၣ်လီၤ.) အ၀ဲသ့ၣ်ရဲၣ်ကျဲၤပာ်၀ဲ ဒ်သိးက ထံၣ်ဖှိၣ်လိာ်သးဖဲ ကျးဆါတၢ်တဖျၢၣ်န့ၣ်အပူၤ၀ံၤဒီး ကလဲၤသကိး၀ဲဆူ၀့ၢ်တီအူအပူၤန့ၣ်လီၤ.

ဖဲဂီၤခီ ၈း၃၀ မံးနံး (လါဒံၣ်စ့ဘၢၣ် ၃၁သီ, ၂၀၂၂နံၣ်) တၢ်ခးလိာ်သးကဲထီၣ်၀ံၤတနၣ်ရံၣ်ဃၣ်ဃၣ်န့ၣ်, စီၤအီၤသူၤယၣ်သါ လဲၤဒိး၀ဲ သိလ့ၣ်ယီၢ်တခိၣ် လၢကထံၣ်သဂၢၢ်ဒီးအတခွါလၢ ကျးဆါတၢ်တဖျၢၣ်န့ၣ်လီၤ. ဖဲအ၀ဲလဲၤလၢကျဲအခါ လဲၤခီဂာ် ဘၣ်၀ဲ (SAC) တၢ်သမံသမိးတြဲၤလၢအဘူးဒီးထိၤဘိၤကၠံသုးကလၢၤန့ၣ်လီၤ. (SAC) သုးဖိလၢ (ခမရ-၄၁၃) အိၣ်ခူသူၣ်၀ဲ ဖဲတၢ်သမံသမိးတြဲၤကပၤတချုးဖဲ အ၀ဲလဲၤတလၢထီၣ်ကွံာ်ဖဲန့ၣ်ဒံးဘၣ်န့ၣ်လီၤ. ဖဲစီၤအီၤသူၤယၣ်သါ လဲၤတလၢထီၣ်ကွံာ် တၢ်သမံသမိးတြဲၤ အဒ့ၣ်စၢၤကအိၣ် ၁၅ချံဃၣ်ဃၣ်န့ၣ် SAC သုးဖိ လၢ (ခမရ-၄၁၃) ခးအီၤလၢအလီၢ်ခံန့ၣ်လီၤ. အ၀ဲ ဘၣ်ဒိတဘျီဃီ ကိးပသူထီၣ်လၢတၢ်မၤစၢၤအဂီၢ်န့ၣ်လီၤ. ဖဲန့ၣ်အခါ, သ၀ီဖိတဂၤ လၢအအိၣ်ဟံၣ်ဘူးဖဲကျဲမုၢ်ကပၤန့ၣ် (ဘူးဒီးတၢ်ကဲထီၣ်သးအလီၢ်) က့ၤစိာ်နုာ်အီၤဆူအဟံၣ်ပူၤ, လၢတၢ်ပျံၤတၢ်ဖုးအပူၤ (ဘၣ်ယိၣ်၀ဲလၢ SAC သုးကထံၣ် ချုး အီၤအဃိ) န့ၣ်လီၤ. ဟံၣ်ကစၢ်တဂၤအံၤ သံကွၢ်စီၤအီၤသူၤယၣ်သါဘၣ်ဃးတၢ်ကဲထီၣ်သးအဂ့ၢ် ဒီးတဘျီဃီကိးဃီၤ၀ဲ လီတဲစိဆူ (နာရေးကူညီရေးအဖွဲ့) လၢလ့ၣ်သိၤ၀့ၢ်ပူၤ လၢကဟဲစိာ်ဆှၢလီၤ ပှၤတူၢ်ဘၣ်တၢ်ဆူတၢ်ဆါဟံၣ်အဂီၢ်န့ၣ်လီၤ. (ပှၤသ၀ီဖိလၢအထံၣ်ချုးအီၤတဂၤတဲ၀ဲအသိး), စီၤအီၤသူၤယၣ်သါ တသ့ၣ်ညါ၀ဲလၢ မုၢ်တဂီၤန့ၣ်တၢ်ခးလိာ်သး ကဲထီၣ်ဖဲ သုးကလၢၤ၀ဲန့ၣ်ဘၣ်လီၤ. သ၀ီဖိလၢအထံၣ်ထွဲတၢ်တဂၤန့ၣ် တဲဘၣ် KHRG လၢ စီၤအီၤသူၤယၣ်သါဘၣ်ဒိ၀ဲ နးမး မ့ၢ်လၢ ကျိချံဘၣ်၀ဲဖဲအလီၢ်ခံဒီး ဖျိသဂၢၢ်ထီၣ်ဆူ အဟၢဖၢန့ၣ်လီၤ. မ့ၢ်လၢတၢ်ဘၣ်ဒိနးအဃိ, (ဘၣ်တၢ်ခးအီၤ၀ံၤ) ၁၀မံးနံးဒီး အသးသမူဟးထီၣ်ကွံာ်၀ဲန့ၣ်လီၤ.

စီၤအီၤသူၤယၣ်သါအတခွါအိၣ်ခိးအီၤလၢကျးဆါတၢ်အခါ နၢ်ဟူ၀ဲကျိသီၣ် (ဖဲ SAC သုး ခမရ-၄၁၃ ခးအတခွါအခါ) န့ၣ်လီၤ. အ၀ဲဆိကမိၣ်၀ဲမ့ၢ်တၢ်မနုာ်ကဲထီၣ်အသးလဲၣ်, အဃိ အ၀ဲလဲၤဆူ အ---သ၀ီ ဒီးထံၣ်၀ဲလၢစီၤအီၤသူၤယၣ်သါ အသးသမူဟးထီၣ်လံန့ၣ်လီၤ.

ဖဲ (လါဒံၣ်စ့ဘၢၣ် ၃၁သီ, ၂၀၂၂နံၣ်) ဂီၤခီ ၉နၣ်ရံၣ်န့ၣ်, လ့ၣ်သိၤ၀့ၢ် ပှၤဂ့ၢ်၀ီတၢ်မၤစၢၤကရၢ (နာရေးကူညီရေးအဖွဲ့) အပှၤခံဂၤဟဲဃီၤ၀ဲဒီးသိလ့ၣ်ဖဲ စီၤအီၤသူၤယၣ်သါသံအလီၢ်ဒ်သိးကလဲၤစိာ်ဆှၢ၀ဲအစိၣ်ဆူၣ်အဟံၣ်လၢ လ့ၣ်သိၤ၀့ၢ်အပူၤ န့ၣ်လီၤ. ဖဲအ၀ဲသ့ၣ်ကတဲၤကတီၤသးလၢကလဲၤစိာ်ဆှၢပှၤစိၣ်အခါ, SAC သုးဖိဃိးဂၤ လၢ ခမရ-၄၁၃ ဒီး SAC ပၢၤကီၢ် သုးခံဂၤ လဲၤဃီၤ၀ဲဖဲတၢ်ကဲထီၣ်သးအလီၢ်န့ၣ်လီၤ. အ၀ဲသ့ၣ်တဟ့ၣ်အခွဲးလၢ တၢ်ကလဲၤစိာ်ဆှၢ စီၤအီၤသူၤယၣ်သါအစိၣ် ဆူလ့ၣ်သိၤ၀့ၢ်ဘၣ်. မ့မ့ၢ်တခီ, အ၀ဲသ့ၣ် ဃ့၀ဲလၢကလဲၤစိာ်ဆှၢပှၤအစိၣ်အံၤဆူ တီအူတၢ်ဆါဟံၣ်လၢ၀့ၢ်တီအူအပူၤန့ၣ် လီၤ. ဖဲတၢ်လဲၤစိာ်ဆှၢဃီၤစီၤအီၤသူၤယၣ်သါအစိၣ်လၢ တီအူတၢ်ဆါဟံၣ်န့ၣ်, ပၢၤကီၢ်သုးလၢ ပၢၤကီၢ်၀ဲၤဒၢး-၃ လၢတီအူ ၀့ၢ်ပူၤန့ၣ် မၢ၀ဲပှၤတူၢ်ဘၣ်တၢ်အဟံၣ်ဖိဃီဖိ ဒီးပှၤလၢအဟဲမၤစၢၤ တၢ်သံတၢ်ပှၢ်တၢ်ရဲၣ်တၢ်ကျဲၤတဖၣ် ကလဲၤစိာ် ပှၤအစိၣ် အံၤဆူ တၢ်ဆါဟံၣ်တၢ်ကွဲးကါပှၤသံအလီၢ် (ရင်ခွဲရုံ) ဒီးပၢၤကီၢ် မၢလီၤ၀ဲကသံၣ်သရၣ် (လၢတီအူတၢ်ဆါဟံၣ်) လၢကကွဲး ကါ စီၤအီၤသူၤယၣ်သါအနီၢ်ခိန့ၣ်လီၤ. ဖဲ (လါဒံၣ်စ့ဘၢၣ် ၃၁သီ, ၂၀၂၂နံၣ်) ဟါလီၤခီ ၄ နၣ်ရံၣ်န့ၣ်, ပၢၤကီၢ်တဲဘၣ် စီၤအီၤ သူၤယၣ်သါအတခွါလၢ ပှၤတူၢ်ဘၣ်တၢ်အဟံၣ်ဖိဃီဖိ မ့အဲၣ်ဒိးဟံန့ၢ်ပှၤအစိၣ်အံၤန့ၣ် အ၀ဲသ့ၣ်ကဘၣ်ဟ့ၣ် စ့ ၃၀၀,၀၀၀ ကၠးန့ၣ်လီၤ. စီၤအီၤသူၤယၣ်သါအဟံၣ်ဖိဃီဖိ ဟ့ၣ်လီၤစ့ ၃၀၀,၀၀၀ ကၠးဆူ ပၢၤကီၢ်အအိၣ်၀ံၤမးဒီး အ၀ဲသ့ၣ် က့ၤစိာ်ပှၤ အစိၣ်အံၤဆူအသ၀ီပူၤန့ၢ်၀ဲန့ၣ်လီၤ.

ဖဲလါဒံၣ်စ့ဘၢၣ် ၃၁သီ, ၂၀၂၂နံၣ် ဟါခီ ၇နၣ်ရံၣ်န့ၣ်, တၢ်က့ၤစိာ်စီၤအီၤသူၤယၣ်သါအစိၣ် ဆူအဟံၣ်လၢ ဘ---က၀ီၤဒ့, လ့ၣ်သိၤ၀့ၢ်ပူၤ န့ၣ်လီၤ. အဟံၣ်ဖိဃီဖိပာ်ဃာ်၀ဲအစိၣ်လၢဟံၣ်ပူၤတနၤမုၢ် (တချုးအခူၣ်လီၤဒံး၀ဲဘၣ်) န့ၣ်လီၤ. ဖဲ လါယနူၤ အါရံၤ ၁သီ, ၂၀၂၃နံၣ် ဂီၤခီ ၉နၣ်ရံၣ်န့ၣ်, တီအူပၢၤကီၢ်၀ဲၤဒၢး-၃ အခိၣ်တဂၤ ကိးဃီၤလီတဲစိဆူ ပှၤတူၢ်ဘၣ်တၢ်အဟံၣ်ဖိ ဃီဖိအအိၣ်ဒီး တဲ၀ဲလၢ အ၀ဲသ့ၣ်ကဘၣ် ဟ့ၣ်ကဒီးစ့ ၄၀၀,၀၀၀ ကၠး ဒ်သိးကဒိးန့ၢ်ဘၣ်က့ၤ စီၤအီၤသူၤယၣ်သါအသိလ့ၣ် ယီၢ်အဂီၢ်န့ၣ်လီၤ. ပၢၤကီၢ်၀ဲၤဒၢးခိၣ်တဲဘၣ်အီၤလၢ တၢ်အံၤမ့ၢ် တၢ်ဟ့ၣ်တၢ်ကမၣ် ခီဖျိလၢ စီၤအီၤသူၤယၣ်သါအသိလ့ၣ် ယီၢ်န့ၣ် အလံာ်လဲၢ်ဖိးသဲစးတအိၣ်ဘၣ် ဒီး အနီၢ်ကစၢ်စ့ၢ်ကီး အလံာ်တၢ်ပျဲလၢ ကနီသိလ့ၣ်ယီၢ်တအိၣ်စ့ၢ်ကီးဘၣ်အဃိန့ၣ် လီၤ. ဘၣ်ဃးဒီး တၢ်ဂ့ၢ်အံၤန့ၣ် စီၤအီၤသူၤယၣ်သါအ၀ဲၢ်ခွါတဲ၀ဲလၢ ကလဲၤဟံးန့ၢ်က့ၤသိလ့ၣ်ယီၢ်ဖဲလၢ တၢ်ခူၣ်လီၤက့ၤ အပုၢ်ခွါ၀ံၤမးန့ၣ်လီၤ. (ဖဲလါယနူၤအါရံၤ ၂၀၂၃နံၣ်အတီၢ်ပူၤန့ၣ် တၢ်တသ့ၣ်ညါဒံးလၢ အ၀ဲသ့ၣ်လဲၤဟံးန့ၢ်က့ၤသိလ့ၣ်ယီၢ်ဒံး ဘၣ်).

စီၤအီၤသူၤယၣ်သါဘၣ်တၢ်ခူၣ်လီၤအီၤဖဲ လ့ၣ်သိၤ၀့ၢ်တၢ်သွၣ်ခိၣ် ဖဲလါယနူၤအါရံၤ ၂သီ, ၂၀၂၃နံၣ်န့ၣ်လီၤ. အ၀ဲပာ်လီၤတဲာ် ကွံာ်အမါန့ၣ်လီၤ. အ၀ဲသ့ၣ်အဖိတအိၣ်နီတဂၤဘၣ်. ဒ်လဲၣ်ဂ့ၤ, အမါဘၣ်ယိၣ်တၢ်လၢ အတၢ်အိၣ်မူခါဆူညါတၢ်လုၢ်အီၣ် နီၢ်ခိသးသမူအဂီၢ် မ့ၢ်လၢအ၀ဲဒိးသန့ၤအသးလၢအ၀ၤဖီခိၣ်အဃိန့ၣ်လီၤ. လၢတၢ်ပျံၤဘၣ် တၢ်မၤအၢထီဒါ ဒိၣ်ဒိၣ်မုၢ်မုၢ်အ ဃိ, ပှၤတူၢ်ဘၣ်တၢ် အဟံၣ်ဖိဃီ ဖိတဟံးထီၣ်သဲးစးဂ့ၢ်၀ီလၢပှၤမၤကမၣ်တၢ်အဖီခိၣ်နီတမံၤဘၣ်န့ၣ်လီၤ.

မ့ၢ်ၦၤလၢအတူၢ်ဘၣ်တၢ်ဖၣ် ဟ့ၣ်ၦၤတၢ်ခွဲးတၢ်ယာ်လၢပကသူတၢ်ဂ့ၢ်တၢ်ကျိၤတခါအံၤဧါ, ဟ့ၣ်ၦၤတၢ်ခွဲးတၢ်ယာ်လၢ ပက သူတၢ်ဂ့ၢ်အံၤလၢကျဲဒ်လဲၣ်.

ပှၤတူၢ်ဘၣ်တၢ်အမါဒီး အတခွါဟ့ၣ်အခွဲးလၢ KHRG ကသူတၢ်ဂ့ၢ်တၢ်ကျိၤအံၤန့ၣ်လီၤ. လီၢ်က၀ီၤသ၀ီဖိလၢ အ---သ၀ီဒီး ပှၤတူၢ်ဘၣ်တၢ်အဟံၣ်ဖိဃီဖိ ဟ့ၣ်စ့ၢ်ကီးအခွဲးလၢ KHRG ကရၤလီၤတၢ်ဂ့ၢ်တၢ်ကျိၤလၢအဟ့ၣ်၀ဲတဖၣ်အံၤ န့ၣ်လီၤ.