English
ကညီကျိာ်
မြန်မာတၢ်ပာ်ဖျါအဖုၣ်တဘ့ၣ်အံၤ ပာ်ဖျါဝဲတၢ်ကဲထီၣ်အသးသ့ၣ်တဖၣ်ဖဲ သထူၣ်ကီၢ်ဆၣ်, ဒူသထူၣ်ကီၢ်ရ့ၣ် ဖဲလါမးရှး ၂၀၂၂ နံၣ် အပူၤန့ၣ်လီၤ. ဖဲလါအ့ဖြ့ၣ် ၁သီ, ၂၀၂၂နံၣ် ဂီၤခီ (၉း၃၀) မံးနံးအဆၢကတီၢ် ထံကီၢ်တၢ်ပၢတၢ်ပြးကီၣ်ကးကရၢ (SAC) သုးတဖၣ် ပ၁်တၢ်ကမၣ်လၢ သ၀ီဖိတဖၣ်အလိၤဒီးစံး၀ဲလၢ အ၀ဲသ့ၣ်တဖၣ်ဆီၣ်ထွဲမၤစၢၤပှၤခီၣ်ဆၢဒုးတၢ်ဖိတဖၣ်ဒီး မၤဒၢၣ်စ့ၢ်ကီးသ၀ီဖိအဂၤတဂၤန့ၣ်လီၤ. ဖဲလါအ့ ဖြ့ၣ် ၅သီ, ၂၀၂၂နံၣ်န့ၣ် လီၢ်က၀ီၤသ၀ီခိၣ်နၢ်တဂၤ ဟ့ၣ်စ့လၢသ၀ီဖိလၢဘၣ်တၢ်ဖီၣ်ဃ၁်အီၤတဖၣ်တၢ်ထူၣ်ဖျဲးအဂီၢ်၀ံၤ သ၀ီဖိဃုဂၤ ဘၣ် တၢ်ပျၢ်က့ၤအီၤန့ၣ်လီၤ. သန၁်က့ SACသုးတဖၣ် တဲပျံၤတဲဖုးအ၀ဲသ့ၣ် ကမၤသံအီၤအဃိ အ၀ဲသ့ၣ်ဘၣ်ဃ့ၢ်အိၣ်၀ဲလၢ ကီၢ်ကၠီၣ်တဲၣ်ပူၤ န့ၣ်လီၤ. သ၀ီဖိ နွံဂၤတဂၤန့ၣ် ဘၣ်တၢ်ပျၢ်လီၤက့ၤအီၤဖဲ လါမ့ၤ တၢတနွံ ၂၀၂၂နံၣ်လၢ တၢ်ဒုးဃ၁်အပူၤန့ၣ်လီၤ.[1]
ဖဲလါ မးရှး ၂၉ သီ, ဒီး ၃၁သီ ၂၀၂၂နံၣ် အဆၢကတီၢ် ကညီဒီကလု၁်တၢ်ထူၣ်ဖျဲးသုးမုၢ်ဒိၣ် (KNLA) ကမျၢၢ်တၢ်ဒီသဒၢသုး(PDF) ဒုးတၢ်ဖိတဖၣ် လဲၤကစီၤခး ထံကီၢ်တၢ်ပၢတၢပြးကရၢ (SAC) စုက၀ဲၤဒိၣ်သုး (လၢတသ့ၣ်ညါနီၢ်ဂံၢ်) ဖဲ ဟ--- ထံကမါ လ--- သ၀ီ, စွ့ၣ်ယီၣ်ပၠးကရူၢ်, သထူၣ်ကီၢ်ဆၣ်န့ၣ်လီၤ. ဖဲလါ အ့ဖြ့ၣ် ၁သီ ၂၀၂၂နံၣ်, ဂီၤခီ (၈း၀၀) အဆၢကတီၢ် SAC သုးသိၣ်လ့ၣ်ခံခိၣ်လၢအအိၣ်ပှဲၤဒီးသုးဖိလၢအပူၤန့ၣ် ဟဲတုၤဖဲတၢ်လီၢ်ဖဲန့ၣ်ဒီး တ့ထီၣ်တၢ်လီၢ်လၢ ကကွၢ်ဟုၣ်ကွၢ်စူၣ် တၢ်အဂီၢ် ဒီး ဟးဆှၣ်တၢ်လၢ လ--- သ၀ီအခိၣ်အဃၢၤန့ၣ်လီၤ.
စီၤဂ--- သးနံၣ်အိၣ် (၂၂) နံၣ်တဂၤ လၢအအိၣ် အ--- သ၀ီ, စွ့ၣ်ယီၣ်ပၠးကရူၢ် လဲၤအိၣ်လၢ ခုးလၢအအိၣ်ဘူး ဃု၁်ဒီး အမိအ ပါ, အတခွါ ဒီး သကိးခံဂၤန့ၣ်လီၤ. သ၀ီဖိတဂၤလၢအအိၣ် လ--- သ၀ီ ဆဲးကျိးအမိလၢ လီတဲစိဒီး ဒုးသ့ၣ်ညါ၀ဲလၢ SAC သုးတဖၣ်အတၢ်ဟဲထီၣ်အဂ့ၢ်န့ၣ်လီၤ. သန၁်က့ တချုးလၢ အ၀ဲသ့ၣ်ဟးထီၣ်လၢ အခုးပူၤဒံးဘၣ်န့ၣ် SAC သုးတဖၣ် က၀ီၤ ဃ၁်အ၀ဲသ့ၣ်လံန့ၣ်လီၤ. SAC သုးတဖၣ် သံဒိးသံကွၢ်သ၀ီဖိတဖၣ် ဘၣ်ဃး KNLA ဒီး PDF တၢ်ကစီၤခး အ၀ဲသ့ၣ်န့ၣ် လီၤ. SAC သုးတဖၣ်စံး၀ဲလၢ သ၀ီဖိတဖၣ်အံၤ အိၣ်ဖဲဟီၣ်က၀ီၤဖဲအံၤအဃိ ကဘၣ်သ့ၣ်ညါပှၤလၢ အလဲၤခးအ၀ဲသ့ၣ်တ ဖၣ်န့ၣ်လီၤ. SAC သုးတဖၣ် ပ၁်တၢ်ကမၣ်လၢ သ၀ီဖိတဖၣ်အလိၤဒီးစံး၀ဲလၢ အ၀ဲသ့ၣ်တဖၣ်ဆီၣ်ထွဲမၤစၢၤ ပှၤခီၣ်ဆၢဒုး တၢ်ဖိတဖၣ် လၢသ၀ီပူၤန့ၣ်လီၤ.
SAC သုးတဖၣ် ဖီၣ်ဃ၁်သ၀ီဖိတဖၣ်ဖဲန့ၣ် တစိၢ်တလီၢ်ဒီး မၢအ၀ဲသ့ၣ်ကြၤလီၤသးလၢ ဟီၣ်ခိၣ်လိၤန့ၣ်လီၤ. ဖဲစီၤဂ--- စံးဘၣ်အ၀ဲသ့ၣ်လၢ တသ့ၣ်ညါဘၣ်ဃး တၢ်ကစီၤခးတၢ်အဂ့ၢ်အံၤနီတမံၤဘၣ်အဆၢကတီၢ် SAC သုးရ့ၣ်ခိၣ် ထံးလီၤအခိၣ် ဒီးကျိဖုၣ်အခံသၢထံၣ်ဒီး ဘၣ်ဒိဘၣ်ထံးတစဲးန့ၣ်လီၤ. SAC သုးတဖၣ် စံး၀ဲစ့ၢ်ကီးလၢ PDF မ့ၢ်လဲၤခးအ၀ဲသ့ၣ်တဘျီကဒီး န့ၣ် ကဒွဲၣ်အူထီၣ်ကွံာ် အ--- သ၀ီန့ၣ်လီၤ. ဖဲတၢ်ကဲထီၣ်သးလီၢ်န့ၣ် SAC သုးကအိၣ် (၁၂) တုၤ (၁၃) ဂၤဃၣ်ဃၣ်ဒီး လၢခုးပူၤ အခိၣ်အဃၢၤန့ၣ် အိၣ်အါ၀ဲစ့ၢ်ကီးလီၤ.
လၢခံ SAC သုးတဖၣ် ဖီၣ်န့ၢ်ဒီးက့ၤကိး၀ဲ စီၤဂ--- အတခွါဒီး အသကိးန့ၣ်လီၤ. ၀ံၤအလီၢ်ခံ အ၀ဲသ့ၣ် ဟးဆှၣ်တၢ်ဖဲတၢ်လီၢ်ဖဲန့ၣ်ဒီး ထံၣ်၀ဲ သ၀ီဖိအဂၤလွံၢ်ဂၤဖီၣ်ညၣ်လၢ ဟ--- ကမါဒီး က့ၤဖီၣ်ဃု၁်အ၀ဲသ့ၣ်န့ၣ်လီၤ. စီၤ၀--- (မ့ၢ်ပှၤတဂၤလၢအီသံး အါဒီး အိၣ်ဒီးသးတၢ်အိၣ်ဆူၣ်အိၣ်ချ့တၢ်ဂ့ၢ်ကီ) စ့ၢ်ကီးဘၣ်တၢ်က့ၤဖီၣ်အီၤန့ၣ်လီၤ. စီၤဂ--- တခွါ အိၣ်လၢ တ--- သ၀ီ ဒီး သ၀ီဖိအဂၤလၢဘၣ်တၢ်ဖီၣ်အီၤတဖၣ် အိၣ်လၢ အ--- သ၀ီ စွ့ၣ်ယီၣ်ပၠးကရူၢ် က--- သ၀ီ မိကီကရူၢ်ဒီး စ--- သ၀ီ ဒူ၀ီကရူၢ်န့ၣ်လီၤ. SAC သုးတဖၣ် က့ၤဖီၣ်၀ဲသ၀ီဖိခဲလၢာ် နွံဂၤ ဃု၁်ဒီးအ၀ဲသ့ၣ် သိၣ်လ့ၣ်ယီၣ် သၢခိၣ်န့ၣ်လီၤ.
သ၀ီဖိလၢဘၣ်တၢ်ဖီၣ်န့ၢ်အီၤတဖၣ်
၁. စီၤန--- (၄၁နံၣ်) အိၣ် စ--- သ၀ီ ဒူ၀ီကရူၢ်
၂. စီၤင--- (၃၀နံၣ်) အိၣ် တ--- သ၀ီ စွ့ၣ်ယီၣ်ပၠးကရူၢ် (စီၤဂ--- တခွါ )
၃. စီၤမ--- (၂၈နံၣ်) အိၣ် အ--- သ၀ီ စွ့ၣ်ယီၣ်ပၠးကရူၢ်
၄. စီၤဘ--- (၂၂နံၣ်) အိၣ် က--- သ၀ီ မိကီကရူၢ်
၅. စီၤရ--- (၂၃နံၣ်) အိၣ် အ--- သ၀ီ စွ့ၣ်ယီၣ်ပၠးကရူၢ်
၆. စီၤပ--- (၃၃နံၣ်) အိၣ် အ--- သ၀ီ စွ့ၣ်ယီၣ်ပၠးကရူၢ်
၇. စီၤ၀--- (တသ့ၣ်ညါ) အိၣ် အ--- သ၀ီ စွ့ၣ်ယီၣ်ပၠးကရူၢ်
ဖဲစီၤဂ--- က့ၤတုၤလၢသ၀ီပူၤဒီအမိပါအဆၢကတီၢ် တဲဘၣ်၀ဲ ကရူၢ်ခိၣ်ဘၣ်ဃးတၢ်ကဲထီၣ်သးအဂ့ၢ်ဒီး SAC သုးတဖၣ်မၢလဲၤထုးထီၣ် သ၀ီဖိလၢဘၣ်တၢ်က့ၤဖီၣ်အီၤတဂၤန့ၣ် စ့ (၂၀ကလီၢ်) ကၠးန့ၣ်လီၤ. သန၁်က့ SAC သုးတဖၣ် တတဲဖျါ တၢ်လီၢ်လၢ အက့ၤဖီၣ် သ၀ီဖိတဖၣ်ဘၣ်. ဟံၣ်ဖိဃီဖိတဖၣ် လဲၤဃု အ၀ဲသ့ၣ်အဘူးအတံၢ်လၢ စုက၀ဲၤဒိၣ်သုးကလၢၤ နီၣ်ဂံၢ်(၉) သန၁်က့ တထံၣ်အ၀ဲသ့ၣ်ဖဲန့ၣ်ဘၣ်. အ၀ဲသ့ၣ် တယ၁်လၢ SAC သုးတဖၣ် ကက့ၤကိးအ၀ဲသ့ၣ်လၢ စုက၀ဲၤဒိၣ်သုးကလၢၤ နီၣ်ဂံၢ် (၃)န့ၣ်လီၤ. သ၀ီဖိတဖၣ် တၢ်က့ၤဖီၣ်အီၤတၢ်လီၢ်ဖဲလဲၣ်န့ၣ် တသ့ၣ်ညါဘၣ်ဒံးဘၣ် ဒီး သုးတဖၣ် တမၤတၢ်ဆဲးကျိးဒီး ပှၤလၢအဘၣ်တၢ်ဖီၣ်ဃ၁်အီၤတဖၣ်အဟံၣ်ဖိဃီဖိစ့ၢ်ကီးတအိၣ်ဘၣ်.
ဖဲနံၤအ၀ဲန့ၣ်အလီၢ်ခံ ဟံၣ်ဖိဃီဖိတဖၣ်သ့ၣ်ညါဘၣ်၀ဲလၢ သ၀ီဖိတဖၣ်ဘၣ်တၢ်က့ၤဖီၣ်အီၤဆူ SAC စုက၀ဲၤဒိၣ်သုးလၢ အအိၣ်ဆီလီၤသးဖဲ ၀ၣ်ပး သုးကလၢၤ, ကၠဲးကီၤလၢသထူၣ်၀့ၢ်န့ၣ်လီၤ. ဖဲ လါအ့ဖြ့ၣ် ၅သီ ၂၀၂၂နံၣ်န့ၣ် ခီဖျိလၢ လီၢ်က၀ီၤ ခိၣ်နၢ်တဂၤအတၢ်မၤစၢၤ (ဟ့ၣ် SAC သုးတဖၣ်လၢစ့ ဘၣ်ဆၣ် ဆံးအါလဲၣ်န့ၣ်တၢ်တသ့ၣ်ညါဘၣ်) အဃိ သ၀ီဖိဃုဂၤဘၣ် တၢ်ပျၢ်က့ၤအီၤန့ၣ်လီၤ. စီၤ၀--- အိၣ်တ့ၢ်လၢ တၢ်ဒုးဃ၁်ပူၤထဲတဂၤဧိၤမ့ၢ်လၢ ပှၤအုၣ်ခီၣ်အီၤတဘူၣ်နီတဂၤဘၣ်အဃိန့ၣ် လီၤ. တၢ်ချူးလၢတၢ်ပျၢ်က့ၤအ၀ဲသ့ၣ်အဆၢကတီၢ် SAC သုးတဖၣ်တဲဘၣ် သ၀ီဖိတဖၣ်န့ၣ် လၢ တအဲၣ်ဒိးထံၣ်အ၀ဲသ့ၣ် လၢသ၀ီပူၤလၢၤဘၣ်န့ၣ်လီၤ. မ့ၢ်ထံၣ်အ၀ဲသ့ၣ်န့ၣ် ကမၤသံ၀ဲန့ၣ်လီၤ. သ၀ီဖိလၢ ဘၣ်တၢ်ပျၢ်က့ၤအီၤတဖၣ် ပျံၤတၢ်ဒီးဃ့ၢ် အိၣ်လၢ ကီၢ်ကၠီၣ်တဲၣ်ပူၤန့ၣ်လီၤ. ဖဲလါမ့ၤ တၢတၢတနွံ ၂၀၂၂နံၣ်န့ၣ် စီၤ၀--- ဟးထီၣ်ဘၣ်လၢ တၢ်ဒုးဃ၁်ချၢန့ၣ်လီၤ. SAC သုးတဖၣ်တဲ၀ဲလၢ တၢ်တကဲဘျူးလၢအ၀ဲသ့ၣ်ဂီၢ်ဘၣ်အဃိ ဘၣ်တၢ်ပျၢ်က့ၤအီၤန့ၣ်လီၤ.
Footnotes:
[1] တၢ်ဂ့ၢ်တၢ်ကျိၤလၢ လံာ်ပာ်ဖျါတဘ့ၣ်အံၤအပူၤန့ၣ် တၢ်ဒိးန့ၢ်ဘၣ်အီၤဖဲ လါမးရှး ၂၀၂၂ နံၣ် အပူၤန့ၣ်လီၤ. ဘၣ်တၢ်ဆှၢဟ့ၣ်ထီၣ်အီၤလၢ လီၢ်ကဝီၤ ၦၤမၤသကိးတၢ်တဂၤ ဖဲ ဒူသထူၣ်ကီၢ်ရ့ၣ် အပူၤ လၢအဘၣ်တၢ်သိၣ်လိအီၤ လၢကညီဂ့ၢ်ဝီခွဲးယာ်ကရူၢ် KHRG လၢကမၤနီၣ်မၤဃါ တၢ်မၤဘၣ်ဒိၦၤ ဟီၣ်ခိၣ်ဖိခွဲးယာ်အတၢ်အိၣ်သးတဖၣ်ဖဲလီၢ်ကဝီၤပူၤန့ၣ်လီၤ. ၦၤတူၢ်ဘၣ်တၢ်တဖၣ်အမံၤ, တၢ်ဂီၤဒီး အိၣ်ဆိးလီၢ်ကျဲ လီၤတံၢ်လီၤဆဲးတဖၣ်န့ၣ် တၢ်မၤ လီၤဘၢအီၤလၢအဝဲနီၢ်ကစၢ်တၢ်ဘံၣ်တၢ်ဘၢအဂီၢ်န့ၣ်လီၤ. တၢ်ဂ့ၢ်တၢ်ကျိၤလၢ တၢ်ကွဲးၡဲပၠးအါထီၣ်အီၤ ဖဲ ပနိကဝီၤအပူၤန့ၣ် မ့ၢ်ဝဲဒၣ် KHRG အတၢ်ကွဲး ၡဲထီၣ်တၢ်ဂ့ၢ်တၢ်ကျိၤန့ၣ်လီၤ.
Print: