အ---

အ---, လၢအသးနံၣ်အိၣ် ၂၆ နံၣ်, အံၤမ့ၢ်ပှၤလၢအလီၤဖးဒီးအမါဒီး အိၣ်ဆိးဝဲဖဲအဖါတံၢ်အဟံၣ်ဖဲ အအ--- သဝီ [လၢကီၢ်ပယီၤ သုးမီၤစိရိၤအတၢ်ပၢဆှၢဖီလာ်], မအူၤပ့ၤဝ့ၢ်, အ့ၣ်ယၣ်ဝတံၣ်ကီၢ်ခီန့ၣ်လီၤ. အဝဲမၤတၢ်ဒ်ပှၤမုၢ်ဆ့ၣ်မုၢ်ဂီၤတဂၤအသိး ဖဲတၢ်ထုး ထီၣ်သ့ၣ်ဘၣ်ပနံာ်တၢ်ကၤအလီၢ်တတီၤ လၢအအိၣ်စီၤစုၤယံၤဒီးအဖါတံၢ်အဟံၣ် ၁၅ မံးနံးန့ၣ်လီၤ.

ဖဲလါအီကူး ၂၀၂၅ နံၣ် [KHRG တသ့ၣ်ညါဝဲမုၢ်နံၤလီၤတံၢ်လီၤဆဲး], မုၢ်နၤခီ ၈:၃၀ မံးနံးအဆၢကတီၢ်, အ--- မၤဝဲအတၢ်မၤဝံၤ ဒီး ဟဲက့ၤဆူအဟံၣ်ဃုာ်ဒီးပှၤလၢအဖံးသကိးမၤသကိးတၢ်ခံဂၤန့ၣ်လီၤ. ဝံၤအလီၢ်ခံ, အ--- အံၤဟးဖးလိာ်အသးဒီး ပှၤလၢအဖံး သကိးမၤသကိးတၢ်ခံဂၤအံၤဒီး ဆဲးက့ၤဝဲဒီးအခီၣ်ဆူအဟံၣ်ထဲတဂၤဧိၤ လၢကျဲအဂၤတဘိန့ၣ်လီၤ. ဖဲအဝဲက့ၤဟးလၢအခီၣ်အ ဆၢကတီၢ်, သိလ့ၣ်လၢတၢ်တသ့ၣ်ညါအီၤဘၣ်တခိၣ် ဟဲပၢၢ်ထီၣ်လၢအမဲာ်ညါန့ၣ်လီၤ. ဝံၤအလီၢ်ခံ, ပှၤလၢအစိာ်ဒီးကျိဖုၣ်လွံၢ်ဂၤ မ့တမ့ၢ်ယဲၢ်ဂၤဟဲလီၤလၢသိလ့ၣ်ပူၤဒီး ဖီၣ်ထၢနုာ်န့ၢ်ဆူၣ်အီၤလၢသိလ့ၣ်အလီၢ်ခံန့ၣ်လီၤ. အဝဲတအဲၣ်ဒိးမၤထွဲဝဲဒ်အဝဲသ့ၣ်တဲဝဲ အသိးဘၣ်သနာ်က့, မ့ၢ်လၢအဝဲတအဲၣ်ဒိးလၢပှၤမၤဆူးမၤဆါအီၤဘၣ်အဃိ, အဝဲဘၣ်မၤထွဲဝဲန့ၣ်လီၤ.

မုၢ်ဆ့ၣ်ထီၣ်အသီတဂီၤ, အဝဲ [အ---] လဲၤတုၤဝဲဖဲ သုးရ့ၣ်နီၣ်ဂံၢ်-၂၇ တၢ်ထၢသုးအလီၢ်တတီၤ လၢအအိၣ်ဖဲမအူၤပ့ၤဝ့ၢ်န့ၣ်လီၤ. အဝဲဘၣ်အိၣ်ဝဲဖဲတၢ်လီၢ်ဖဲန့ၣ် (၁၂) သီလီၤ. ဝံၤအလီၢ်ခံ, ဘၣ်တၢ်ဆှၢအီၤဖဲ မိစွ့ၣ်[သုး]တၢ်မၤလိအလီၢ်, [န့ၤပၠံၤတီၤစၢဖှိၣ်ကရၢ ဟီၣ်ကဝီၤ] သၢလါဒီး ဘၣ်တၢ်ဆှၢကဒီးအီၤဖဲ န့ၤပၠံၤတီၤလၣ်ဝ့[သုး]တၢ်မၤလိအလီၢ်, [န့ၤပၠံၤတီၤစၢဖၠိၣ်ကရၢဟီၣ်ကဝီၤ], ခံနွံန့ၣ် လီၤ. အဝဲဘၣ်အိၣ်ဝဲဖဲ [ခီၣ်ချ့သုးရ့ၣ် (ခမရ)] နီၣ်ဂံၢ်-၃၀၆ [လၢအအိၣ်ဆီလီၤအသးဖဲရှါစ့ဘိၤသုးကလၢၤ, လၢအအိၣ်သူၣ် လီၤအသးဘူးဒီး အဆ---, ပၢၤထံးကရူၢ်, ထီတထူၣ်ကီၢ်ဆၣ်, တီအူကီၢ်ရ့ၣ်အပူၤ] တနွံန့ၣ်လီၤ. လၢန့ၣ်ဝံၤအလီၢ်ခံ, ဘၣ်တၢ်ဆှၢ အီၤဆူတၢ်မဲာ်ညါဖဲ ဘိၤမတံသုးကလၢၤ, လၢအအိၣ်လၢ SSPC [ထံကီၢ်တၢ်ဘံၣ်တၢ်ဘၢဒီးတၢ်မုာ်တၢ်ခုၣ်ခီမ့ရှၢ] အစုတီၤဖီလာ် လၢအအိၣ်သူၣ်လီၤအသးဘူးဒီး အဒ--- သဝီ, မီၤန့ၢ်ပှၤဝ့ၢ်, ထီတထူၣ်ကီၢ်ဆၣ်န့ၣ်လီၤ.

တၢ်ကဘၣ်ကဲသုးအဒူၣ်လၢ အ--- နုာ်လီၤပၣ်ဃုာ်ဝဲအံၤ အနီၣ်ဂံၢ်မ့ၢ်ဝဲ #အၡ--- ဒီးအသုးနီၣ်ဂံၢ်မ့ၢ်ဝဲ [ဘၣ်တၢ်ပာ်ဘၢဃာ်အီၤလၢ တၢ်ဘံၣ်တၢ်ဘၢအဂီၢ်] န့ၣ်လီၤ. တၢ်မၢဆူၣ်အီၤလၢကကဲဝဲ [ကီၢ်ပယီၤ]သုးအံၤ တၢ်ဆၢကတီၢ်ခဲလၢာ်ယံာ်ဝဲအါန့ၢ် (၅) လါန့ၣ် လီၤ.

ဘ---

ဖဲလါဖ့ၤဘြူၤအါရံၤ ၂၀၂၅ နံၣ်အပူၤ [KHRG တသ့ၣ်ညါဝဲမုၢ်နံၤမုၢ်သီလီၤတံၢ်လီၤဆဲး], ဘ---, လၢအသးနံၣ်အိၣ် ၂၅ နံၣ်, တဂၤ အံၤဖံးတၢ်မၤတၢ်လၢ တၢ်သူၣ်ထီၣ်ဘှီထီၣ်အတၢ်ဖံးတၢ်မၤဖဲ တဲၣ်ကိဝ့ၢ်, န့ၤပၠံၤဒီၤစၢဖှိၣ်ကရၢဟီၣ်ကဝီၤန့ၣ်လီၤ.  တဲၣ်ကိဝ့ၢ်ဒီး ဘ--- အသဝီ, အဘ--- သဝီ [လၢအအိၣ်လၢကီၢ်ပယီၤသုးမီၤစိရိၤအတၢ်ပၢဆှၢဖီလာ်], ညီၤကိစဲၣ်ကိကရူၢ်, ဘိၤဘၤသံၤရံၣ်ကီၢ် ဆၣ်, န့ၤပၠံၤတီၤ[စၢဖှိၣ်ကရၢဟီၣ်ကဝီၤ] အံၤအိၣ်စီၤစုၤယံၤဝဲကအိၣ်လၢတနၣ်ရံၣ်ကျဲ လၢသိလ့ၣ်အတၢ်လဲၤကျဲန့ၣ်လီၤ. ဖဲ ဘ--- မၤတၢ်အဆၢကတီၢ် လီၢ်ကဝီၤခိၣ်နၢ်သၢဂၤမၢဝဲအလဲၤပိာ်အဝဲသ့ၣ်အခံဒီး မၢအဆဲးလီၤလီၤအမံၤလၢလံာ်တီလံာ်မီတဘ့ၣ်အပူၤ [အဝဲတသ့ၣ်ညါဝဲလံာ်တီလံာ်မီတဘ့ၣ်အံၤအဂ့ၢ်အကျိၤဒီးအတၢ်ပညိၣ်ဘၣ်] န့ၣ်လီၤ. ခိၣ်နၢ်သၢဂၤအံၤမ့ၢ်ဝဲ ပှၤလၢအပၢဆှၢတၢ်ဖဲ အဘ--- သဝီတဂၤ, ပှၤလၢအပၢဆှၢတၢ်ဖဲ အဃ--- သဝီတဂၤ [လၢအအိၣ်လၢကီၢ်ပယီၤသုးမီၤစိရိၤအတၢ်တီခိၣ်ရိၣ်မဲအဖီလာ်], ညီၤကိစဲၣ်ကိကရူၢ်, ဒီးပှၤလၢအကဲဘၣ်တ့ၢ်သုးဖိ [ကီၢ်ပယီၤသုးဖိ] (KHRG တသ့ၣ်ညါအမံၤ) တဂၤန့ၣ်လီၤ. ခိၣ်နၢ်သၢဂၤအံၤစံး ဘၣ် ဘ--- လၢအဆဲးလီၤအမံၤလၢလံာ်တီလံာ်မီပူၤမ့ၢ်ဝံၤန့ၣ်, တယံာ်ဘၣ်တၢ်ကပျၢ်က့ၤအီၤန့ၣ်လီၤ. ဘ--- အံၤနာ်ဝဲ ဒီးလဲၤပိာ်ဝဲ ခိၣ်နၢ်သၢဂၤအံၤအခံဒီးအဝဲသ့ၣ်အသိလ့ၣ်န့ၣ်လီၤ. ဘၣ်ဆၣ်သနာ်က့အဝဲသ့ၣ်လီအီၣ်ဝဲအီၤ, [အဝဲနာ်ဝဲလၢအဝဲသ့ၣ်တဖၣ်လီ အီၣ်အီၤခီဖျိအဝဲသ့ၣ်] ထၢနုာ်န့ၢ်ဆူၣ်အီၤလၢသုးပူၤဒီး အဝဲသ့ၣ်မ့ၢ်ပှၤသ့ၣ်တဖၣ်လၢအပိာ်ဝဲ မ့အီၤလဲၤ အခံအဃိန့ၣ်လီၤ. အဝဲ သ့ၣ်လဲၤဆှၢဝဲ ဘ--- လၢ န့ၣ်ပၠံၤတီၤ[တၢ်ထၢသုးအလီၢ်] ဒီးသိလ့ၣ်န့ၣ်လီၤ.

ဘ--- ဘၣ်အိၣ်ဝဲဖဲတၢ်ထၢသုးအလီၢ် (၁၅) သီ လၢတၢ်ကမၤကွၢ်ဝဲအတၢ်အိၣ်ဆူၣ်အိၣ်ချ့အဂီၢ်န့ၣ်လီၤ. ဝံအလီၢ်ခံ ဘၣ်တၢ်ဆှၢ အီၤဆူ မိစွ့ၣ်[သုးတၢ်မၤလိအလီၢ်], န့ၤပၠံၤတီၤစၢဖှိၣ်ကရၢဟီၣ်ကဝီၤ လွံၢ်လါ [လၢကထီၣ်ဝဲဂံၢ်ခီၣ်ထံးသုးတၢ်မၤလိအဂီၢ်] န့ၣ်လီၤ. ပှၤလၢအသိၣ်လိဝဲဂံၢ်ခီၣ်ထံးသုးတၢ်မၤလိတဖၣ်မ့ၢ်ဝဲ သ့စီၤအူ (လၢအမ့ၢ်သုးစကီၤတဂၤ) ဒီး သုးခိၣ်ကျၢၢ်ဂီၢ်ဂ့ၢ်ကၠီၤစွ့ၣ် န့ၣ်လီၤ. [ဘ--- အံၤဘၣ်အိၣ်ဝဲဖဲ] ခမရ နီၣ်ဂံၢ်-၃၀၀ အသုးကလၢၤ, န့ၤပၠံၤတီၤ, [လၢကဒိးန့ၢ်ဘၣ်]အါထီၣ်ဝဲတၢ်မၤလိအဂီၢ်န့ၣ်လီၤ. ဖဲန့ၣ် ဝံၤအလီၢ်ခံ ဘၣ်တၢ်မၢဆူၣ်အီၤလၢကဟံးထီၣ်ဖီၣ်ထီၣ်ဝဲမူဒါ (၁၅) သီ ဖဲ ခမရ နီၣ်ဂံၢ်-၃၀၆, လၢအအိၣ်သူၣ်လီၤအသးဘူးဒီး အဆ--- သဝီ, ဝံၤဒီးဘၣ်တၢ်နဲၣ်လီၤအီၤလၢ ကဟံးထီၣ်ဖီၣ်ထီၣ်မူဒါဃိးလါဖဲ ဘိၤမတံသုးကလၢၤ လၢသုးဖိတၢ်မဲာ်ညါသ့ၣ်တ ဖၣ်အဂီၢ် န့ၣ်လီၤ.

ဝံၤအလီၢ်ခံ [မုၢ်နံၤမုၢ်သီလၢ KHRG တသ့ၣ်ညါဝဲဘၣ်တနံၤန့ၣ်], ဘ--- ဃ့ၢ်ပူၤဖျဲးထီၣ်ကွံာ်အသးလၢ ဘိၤမတံသုးကလၢၤ န့ၣ် လီၤ. [ဖဲအဝဲဃ့ၢ်ပူၤဖျဲးသးအဆၢကတီၢ်] အဝဲကူသိးဝဲဆ့ကူဆ့ကၤမုၢ်ဆ့ၣ်မုၢ်ဂီၤ [ဒ်သိးကမၤကျဲၣ်ကျီဃါဃုာ်လိာ်အသးဒီးသဝီဖိ သ့ၣ်တဖၣ်] ဒီးလဲၤဝဲဆူအိဝ့ၤသိလ့ၣ်ဒိးလဲ (သိလ့ၣ်လၢအခီၣ်ပၣ်အိၣ်သၢပၣ်) အလီၢ်တတီၤ [ဒီးဒိးထီၣ်ဝဲသိလ့ၣ်ဒိးလဲ] ဒီးက့ၤ ကွံာ်ဝဲဆူအသဝီန့ၣ်လီၤ. အဝဲအိၣ်ခူသူၣ်ဝဲခံလါလီၤ. လၢန့ၣ်ဝံၤအလီၢ်ခံ အဘ--- သဝီ ပှၤပၢဆှၢတၢ်တဂၤသ့ၣ်ညါချုးဝဲတၢ်လီၢ် လၢအအိၣ်ခူသူၣ်အလီၢ်ဒီး ဆှၢန့ၢ်ဝဲတၢ်ကစီၣ်ဆူကီၢ်ပယီၤသုးဖိအအိၣ်န့ၣ်လီၤ. လၢတၢ်န့ၣ်အဃိအဝဲသ့ၣ် [ကီၢ်ပယီၤသုးဖိတ ဖၣ်] ဟဲဝဲဖဲ [တၢ်လီၢ်လၢ ဘ--- အိၣ်အလီၢ်] ဖဲမုၢ်နံၤမုၢ်သီလၢတၢ်တသ့ၣ်ညါအီၤတနံၤ ဖဲဟါခီ ၇ နၣ်ရံၣ်အဆၢကတီၢ်ဒီး အဝဲ သ့ၣ်ဒိဝဲတီၢ်ဝဲအီၤ, စၢတံၢ်ဝဲအစုလၢအချၢဃံ, ဖီၣ်အီၤ, က့ၤကိးအီၤလၢ ခမရ နီၣ်ဂံၢ်-၃၀၆, ဒီးစံၣ်ညီၣ်အီၤလၢကဘၣ်မၤဝဲတၢ်မၤ လၢအနးသၢလါန့ၣ်လီၤ. ဝံၤအလီၢ်ခံ ဘၣ်တၢ်ဆှၢအီၤဆူ ဘိၤမတံ[သုးကလၢၤ] န့ၣ်လီၤ. [ဖဲန့ၣ်အဆၢကတီၢ်] သုးခိၣ်ဒိၣ်စိဟ့ဝ့ အီၤ မ့ၢ်ဝဲဘိၤမတံသုးကလၢၤ အသုးခိၣ်ယီၤန့ၣ်လီၤ. ဘ--- အိၣ်ဝဲဖဲ ဘိၤမတံသုးကလၢၤ တလါန့ၣ်လီၤ.

တၢ်ကဘၣ်ကဲသုးအဒူၣ်လၢ ဘ--- နုာ်လီၤပၣ်ဃုာ်ဝဲအံၤ အနီၣ်ဂံၢ်မ့ၢ်ဝဲ #အဂ--- ဒီးအသုးနီၣ်ဂံၢ်မ့ၢ်ဝဲ [ဘၣ်တၢ်ပာ်ဘၢဃာ်အီၤလၢ တၢ်ဘံၣ်တၢ်ဘံၣ်တၢ်ဘၢအဂီၢ်] န့ၣ်လီၤ. [ဘၣ်တၢ်မၢဆူၣ်အီၤလၢ] ကဘၣ်မၤလၢပှဲၤဝဲအမူအဒါတနံၣ်ဒီးခံလါန့ၣ်လီၤ. [တၢ်ဆၢ ကတီၢ်လၢ ဘ--- ပာ်ဖျါထီၣ်ဝဲသ့ၣ်တဖၣ်အံၤ တဘၣ်လိာ်ဖိးဒ့လိာ်အသးဘၣ်, ဘၣ်ဆၣ်လၢတၢ်ကမၤလီၤတံၢ်ဝဲတၢ်ဂ့ၢ်အံၤအဂီၢ် KHRG ဆဲးကျိးအီၤတန့ၢ်ဘၣ်န့ၣ်လီၤ.]

ဆ---

ဆ--- အံၤမ့ၢ်သဝီဖိတဂၤလၢအသးနံၣ်အိၣ် ၁၈ နံၣ် ဒီးမ့ၢ်ပှၤလၢဘၣ်တၢ်ထၢနုာ်န့ၢ်ဆူၣ်အီၤလၢသုးပူၤတဂၤန့ၣ်လီၤ. ဘၣ်ဃးဒီး ဆ--- အဂ့ၢ်အကျိၤအဂုာ်အဂၤန့ၣ် [KHRG] တဒိးန့ၢ်ဘၣ်ဝဲဘၣ်ခီဖျိ တၢ်တသ့ၣ်ညါဝဲတၢ်လီၢ်လၢအဝဲလဲၤဃ့ၢ်ဝဲအလီၢ်ဘၣ်န့ၣ် လီၤ.

တၢ်ဃ့ၢ်ပူၤဖျဲးထီၣ်ကွံာ်သးလၢ ဘိၤမတံသုးကလၢၤ

ဖဲလါယနူၤအါရံၤ ၂၈ သီ, ၂၀၂၆ နံၣ်အနံၤ, မုၢ်နၤခီ ၈ နၣ်ရံၣ်အဆၢကတီၢ်, အ---, ဘ---, ဒီး ဆ--- တဖၣ်ဃ့ၢ်ပူၤဖျဲးထီၣ်ကွံာ်အ သးလၢတၢ်မဲာ်ညါ ဘိၤမၤတံသုးကလၢၤ န့ၣ်လီၤ. အဝဲသ့ၣ်ဃ့ၢ်ထီၣ်ကွံာ်ဝဲခီဖျိ, ဖဲတၢ်ဖီၣ်န့ၢ်အဝဲသ့ၣ်အဆၢကတီၢ်, ပှၤလၢအလီၢ် အလၤဒိၣ် [ပှၤဟ့ၣ်တၢ်မၤလိ] တဖၣ်မၤဆူးမၤဆါအဝဲသ့ၣ်, ဆိၣ်အဝဲသ့ၣ်, ဒီးဒိတီၢ်အဝဲသ့ၣ်အဃိန့ၣ်လီၤ. အါန့ၢ်အန့ၣ် ဘၣ်တၢ် ထၢနုာ်န့ၢ်ဆူၣ်အဝဲသ့ၣ်လၢသုးပူၤ လၢအဝဲသ့ၣ်တအိၣ်ဒီးသးသဟီၣ်လၢကကဲသုးဘၣ်အဃိန့ၣ်လီၤ. အဝဲသ့ၣ်အဲၣ်ဒိးက့ၤဆူအ ဟံၣ်အဃီဒီး က့ၤအိၣ်ဒီးအဟံၣ်ဖိဃီဖိသ့ၣ်တဖၣ် လၢတၢ်မုာ်တၢ်ခုၣ်အပူၤန့ၣ်လီၤ. လၢအပူၤကွံာ်တချုးဒံးလၢသဝီဖိသၢဂၤအံၤ ဃ့ၢ်ပူၤဖျဲးထီၣ်ကွံာ်အသးဒံးဘၣ်န့ၣ် တၢ်ဂ့ၢ်လၢပှၤဃ့ၢ်ပူၤဖျဲးထီၣ်သးဒ်အံၤ ကဲထီၣ်တ့ၢ်အသးအိၣ်စ့ၢ်ကီးန့ၣ်လီၤ.

ဖဲ အ---, ဘ---, ဒီး ဆ--- ဃ့ၢ်ပူၤဖျဲးသးအဆၢကတီၢ် အဝဲသ့ၣ်တဖၣ်ဘၣ်ကွၢ်ဆၢၣ်မဲာ်တၢ်ကီတၢ်ကီတၢ်ခဲလၢကက့ၤဆူဟံၣ်ဒီး အဝဲသ့ၣ်ဘၣ်ယိၣ်စ့ၢ်ကီးဝဲလၢပှၤကဖီၣ်ချုးကဒါက့ၤအဝဲသ့ၣ် ခီဖျိကျဲမုၢ်ဖးဒိၣ်ဒီတဘိလၢကဘၣ်က့ၤဝဲန့ၣ် ကီၢ်ပယီၤသုးအတၢ် သမံသမိးတြဲၤအိၣ်ဝဲတဘျုးတီၤန့ၣ်လီၤ. [ကျဲမုၢ်ဖးဒိၣ်တဘိလၢအဝဲသ့ၣ်ဘၣ်လ့ၢ်လိၤဝဲအံၤ အိၣ်သူၣ်လီၤအသးလၢ] ပၢၤထံးက ရူၢ် ဒီး စယးကၠံတီၤခၠါကရူၢ်, ထီတထူၣ်ကီၢ်ဆၣ်အပူၤဒီး လၢကရူၢ်ခံဘ့ၣ်အံၤအပူၤန့ၣ်အိၣ်ဝဲဒီး SSPC အသုးကလၢၤတဖၣ်ဒီးအ တြဲၤသ့ၣ်တဖၣ်န့ၣ်လီၤ. လၢတၢ်န့ၣ်အဃိအဝဲသ့ၣ်က့ၤလၢကျဲအဂၤ [အဝဲသ့ၣ်တက့ၤလၢကျဲမုၢ်ဖးဒိၣ်လၢၤဘၣ်] န့ၣ်လီၤ. [ဆ--- တက့ၤတပူၤဃီဒီးပှၤလၢအဃ့ၢ်ပူၤဖျဲးသးအဂၤခံဂၤဘၣ်. မ့မ့ၢ်တခီအဝဲက့ၤလၢကျဲအဂၤတဘိန့ၣ်လီၤ.] ဖဲအဝဲသ့ၣ် [အ--- ဒီး ဘ---] ဟး လၢကျဲတဘိလၢအအိၣ်လၢစံာ်ပျီပူၤဒီး ဟးဃုကျဲလၢကက့ၤဝဲအဆၢကတီၢ် အဝဲသ့ၣ်ဘၣ်သဂၢၢ်လိာ်အသးဒီး KNU [ကညီဒီကလုာ်စၢဖှိၣ်ကရၢ] ဘံၣ်ဘၢခိၣ်နၢ်တဖၣ်န့ၣ်လီၤ. ဘံၣ်ဘၢခိၣ်နၢ်သ့ၣ်တဖၣ်အံၤ ဆိမိၣ်ဝဲလၢအဝဲသ့ၣ် [အ--- ဒီး ဘ---] လီအီၣ်တၢ်ဒီး တယးဝဲလၢအဝဲသ့ၣ်[မ့ၢ်ဝဲပယီၤသုးဖိတဖၣ်] န့ၣ်လီၤ. ဖဲပှၤသံကွၢ်အဝဲသ့ၣ်အဆၢကတီၢ် အဝဲသ့ၣ်ခံဂၤလၢာ်စံး ဆၢဝဲလၢအဝဲသ့ၣ်ဃ့ၢ်ပူၤဖျဲးထီၣ်အသးလၢ ဘိၤမတံသုးကလၢၤ န့ၣ်လီၤ.

အဝဲသ့ၣ်ခံဂၤ [အ--- ဒီး ဘ---] အံၤအိၣ်ကဒုဝဲဖဲ KNU အတၢ်ပၢဆှၢဟီၣ်ကဝီၤပူၤဒီး ဖဲလါဖ့ၤဘြူၤအါရံၤ ၁ သီ, ၂၀၂၆ နံၣ်အနံၤ န့ၣ် အဝဲသ့ၣ်ဒိးန့ၢ်ဘၣ်က့ၤဝဲတၢ်ဆဲးကျိးဆဲးကျၢဒီး အဟံၣ်ဖိဃီဖိသ့ၣ်တဖၣ်န့ၣ်လီၤ. KNU ခိးကွၢ်သမံသမိးဝဲပှၤလၢအဃ့ၢ်ပူၤ ဖျဲးထီၣ်ကွံာ်အသးခံဂၤအံၤ [ဒီးသ့ၣ်ညါဘၣ်ဝဲလၢပှၤသ့ၣ်တဖၣ်အံၤမ့ၢ်ဒၣ်ကမျၢၢ်ဖိအဃိ ဘၣ်တၢ်ဆှၢက့ၤအဝဲသ့ၣ်ဆူဟံၣ်] န့ၣ် လီၤ.