တၢ်ဃ့ၢ်အိၣ်မှံဟးဖျိးအါထီၣ်လၢဒူပျာ်ယာ်ကီၢ်ရ့ၣ်အပူၤ
ဖဲလါစဲးပထ့ဘၢၣ် ၂ သီ, ၂၀၂၅ နံၣ်, ဖဲဂီၤခီ ၆ နၣ်ရံၣ်အကတီၢ် ကီၢ်ပယီၤသုးခးလီၤတၢ်လၢကျိဖးဒိၣ် ဖဲဘည--- သဝီ ဒီး အဂ--- သဝီပူၤဖဲနိၣ်ဖိကရူၢ်, ကီးတရံးကီၢ်ဆၣ်, ဒူပျာ်ယာ်ကီၢ်ရ့ၣ်အပူၤန့ၣ်လီၤ. လၢတၢ်န့ၢ်အဃိသဝီဖိလၢအိၣ်ဖဲ အဂ--- သဝီတဖၣ် ဘၣ်လဲၤဃ့ၢ်အိၣ်မှံကွံာ်ဝဲလၢ ထံဝၣ်ဘျီကရူၢ်ဒီး သဝီတဖၣ်လၢအအိၣ်ဖဲ တန့ဆါ (နဘူ) ကီၢ်ဆၣ်, ဖၣ်အၣ်ကီၢ်ရ့ၣ်အပူၤန့ၣ်လီၤ. သဝီဖိတနီၤဖဲလၢအဝဲသ့ၣ်ဃ့ၢ်အဆၢကတီၢ်တနီၤန့ၣ်စိာ်ဝဲချုးဒၣ်ထဲဟုသးတထၢၣ်ဧိၤဒီးတနီၤန့ၣ်စိာ်တၢ်တချုးဝဲနီတမံၤဘၣ် န့ၣ်လီၤ. ပှၤဒူၣ်ဖိထၢဖိအါန့ၢ်ဒ် (၃၀၀) ဖျၢၣ် ဘၣ်လဲၤဃ့ၢ်အိၣ်ကွံာ်ဝဲလၢ တန့ဆါ (နဘူ) ကီၢ်ဆၣ်အပူၤန့ၣ်လီၤ. [ခီဖျိ ကီၢ်ပယီၤ သုး အသုးဖိတဖၣ်ခးလီၤတၢ်အဃိ], ဖဲလါစဲးပထ့ဘၢၣ် ၂၀၂၅ နံၣ်, သဝီဖိတနီၤလၢအအိၣ်လၢ အဒ--- သဝီ ဒီး အူဟ--- သဝီ, ထံဝၣ်ဘျီကရူၢ်, တန့ဆါကီၢ်ဆၣ်တဖၣ်အဝဲသ့ၣ်ဘၣ်လဲၤဃ့ၢ်အိၣ်ကွံာ်ဝဲဆူသဝီအဂၤတဖျၢၣ်န့ၣ်လီၤ. သဝီဖိလၢဘၣ်ဃ့ၢ်အိၣ်မှံ ဟးဖျိးတဖၣ် အါတက့ၢ်လဲၤဃ့ၢ်အိၣ်ဝဲဖဲကရူၢ်လွံၢ်ဘ့ၣ်အပူၤလၢအအိၣ်ဖဲတန့ဆါကီၢ်ဆၣ်အပူၤန့ၣ်လီၤ.
ပှၤဃ့ၢ်မှံဟးဖျိးအနီၣ်ဂံၢ်နီၣ်ဒွးန့ၣ်သဝီသးပှၢ်တဖၣ်ဟ့ၣ်ထီၣ်ဝဲဒီးတၢ်တဘှီဘၣ်အီၤနီတမံၤဘၣ်ခီဖျိတနံၤဘၣ်တနံၤန့ၣ် ပှၤဟဲဃ့ၢ် အိၣ်ကဒုသ့ၣ်တဖၣ်အိၣ်အါထီၣ်ဝဲ ဒီးအဂၤတနီၤန့ၣ်လၢပျံၤတၢ်ဖုးအဃိဟးထီၣ်လဲၤဃ့ၢ်အိၣ်ကွံာ်ဝဲလၢ သဝီလၢအဂၤတဖၣ်အ ဃိန့ၣ်လီၤ. ဖဲတယံၥ်ဒံးဘၣ်အတီၢ်ပူၤ, [ဖဲလၢတၢ်ကွဲးအဆၢကတီၢ်], ကၠိဖိတနီၤလၢအအိၣ်လၢ အဂ--- သဝီ, အဒ---သဝီ, ဒီး အဟ--- သဝီတဖၣ် ဘၣ်လဲၤဖံးလိမၤလိတၢ်လၢ အမ--- သဝီ လၢအမ့ၢ်ကီၢ်ပယီၤပဒိၣ်ကၠိန့ၣ်လီၤ. ကၠိအဝဲန့ၣ်တူၢ်လိာ်ဝဲ ကၠိဖိ တုၤ (၉) တီၤ ဒီး ကၠိဖိကအိၣ်ဝဲ (၁၆၀) ဂၤဃၣ်ဃၣ်န့ၣ်လီၤ. သရၣ်/သရၣ်မုၣ်တဖၣ် အိၣ်ဟဲန့ၢ်လၢသဝီသၢဖျၢၣ်အပူၤဒီး ဟဲ သိၣ်လိသကိးဝဲ ကၠိဖိတဖၣ်န့ၣ်လီၤ.
ကီၢ်ပယီၤသုး အတၢ်ခးလီၤတၢ်လၢကဘီယူၤအဃိဒုးအိၣ်ထီၣ်ဝဲတၢ်ဟးဂူာ်ဟးဂီၤ
ဖဲလါစဲးပထ့ဘၢၣ် ၁၀ သီ, ၂၀၂၅ နံၣ်အနံၤ, ဖးဖီမုၢ် ၁ နၣ်ရံၣ်အဆၢကတီၢ်ကီၢ်ပယီၤသုးဟဲခးလီၤတၢ်လၢကဘီယူၤ ဖဲထံဝၣ်ဘျီ ကရူၢ်ဒီး မ့ၣ်ပိၢ်တဖျၢၣ်လီၤတဲာ်ဝဲလၢ သဝီဖိ စီၤရှ---အစံာ်ပျီပူၤဒီး ဘၣ်ဒိဟးဂီၤဝဲ အဘုထူၣ်သ့ၣ်တဖၣ်န့ၣ်လီၤ. စီၤရှ---- အစံာ် န့ၣ် တလဲၢ်ပသံးဘၣ် ဒီး လၢအစံာ်ပူၤ အဝဲသူၣ်လီၤဒၣ်ထဲဘုချံခံနာ်ဧိၤ ဖဲလၢတၢ်တနံၣ်ညါအံၤ [၂၀၂၅ နံၣ်] န့ၣ်လီၤ. စီၤရှ--- စံး ဝဲလၢ မ့ၣ်ပိၢ်လီၤတဲာ်ဘၣ်ဝဲဖဲ အစံာ်ပျီလၢဘုထူၣ်ဖိတဖၣ်မဲထီၣ်ဝဲဂ့ၤဂ့ၤတတီၤန့ၣ်ဒီး ဘၣ်ဟးဂီၤကွံာ်ဝဲဒၣ်န့ၣ်လီၤ. ခီဖျိလၢ တၢ်ဂ့ၢ်ဒ်အံၤဃိအဝဲစ့ၢ်ကီး အသးတမုာ်ဝဲဒၣ်ဘၣ်န့ၣ်လီၤ.
ဖဲလါနိၣ်ဝ့ဘၢၣ် ၁ သီ, ၂၀၂၅ နံၣ်, မုၢ်ဃ့ၢ်လီၤ ၁ နၣ်ရံၣ်အဆၢကတီၢ်, ကီၢ်ပယီၤသုး အကဘီယူၤ (Y-12) တဘ့ၣ် ဟဲတ့ၢ်လီၤ မ့ၣ်ပိၢ်ဖဲအအ ---သဝီပူၤ, ထံဖိကၠီကရူၢ်, တန့ဆါကီၢ်ဆၣ်, ဖၣ်အၣ်ကီၢ်ရ့ၣ်အပူၤန့ၣ်လီၤ. [ဖဲန့ၢ်အဆၢကတီၢ် သဝီပူၤတၢ်ဒုးတၢ် ယၤကဲထီၣ်အသး တအိၣ်ဘၣ်န့ၣ်လီၤ]. ကဘီယူၤအံၤဟဲတ့ၢ်လီၤတၢ်ခံဘျီန့ၣ်လီၤ. တ့ၢ်လီၤဝဲမ့ၣ်ပိၢ်ခဲလၢာ်ခွံဖျၢၣ်န့ၣ်လီၤ. လၢတၢ် န့ၣ်အဃိတၢ်ဆါတၢ်ပှ့ၤအကျးလွံၢ်ဖျၢၣ်လၢ အအိၣ်ဘူးဒီးကျဲဃၢၤန့ၣ် ဘၣ်အူထီၣ်ကွံာ်ဝဲဒၣ်န့ၣ်လီၤ. တကးဒ်ဘၣ်အမဲာ်ညါ မ့ၣ်ပိၢ်လီၤတဲာ်ပိၢ်ဖးထီၣ်ဒီးဘၣ်ဟးဂီၤဝဲ သီခါဖၠၢ်တဖျၢၣ်ဒီး ကၠိကျဲနုာ်လီၤတတီၤန့ၣ်လီၤ. ကဘီယူၤတ့ၢ်လီၤမ့ၣ်ပိၢ်ဝံၤအလီၢ်ခံ သဝီဖိတနီၤဃ့ၢ်ထီၣ်ကွံာ်ဝဲလၢသဝီပူၤန့ၣ်လီၤ.
ဖဲလါနိၣ်ဝ့ဘၢၣ် ၁၃ သီ, ၂၀၂၅ နံၣ်အနံၤန့ၣ်, ကီၢ်ပယီၤသုး ကဘီယူၤဟဲတ့ၢ်လီၤမ့ၣ်ပိၢ် ဖဲနိၣ်က့ၣ်ကရူၢ်, တန့ဆါကီၢ်ဆၣ်, ဖၣ်အၣ်ကီၢ်ရ့ၣ်အပူၤန့ၣ်လီၤ. ဖဲဖးဖီမုၢ် ၁၁ နၣ်ရံၣ်ဒီး ၅၄ မံးနံးအဆၢကတီၢ်, ကီၢ်ပယီၤသုးကဘီယူၤဟဲတ့ၢ်လီၤမ့ၣ်ပိၢ် တၢတဖျၢၣ်ဖဲ တၢ်လီၢ်တတီၤလၢအအိၣ်ဘူးဒီး အဘ--- တလးကူ [တၢ်ဘါလီၢ်] အဖၠၢ်, လၢအအိၣ်လၢထံကျိဃၢၤဒီး အိၣ်ဘူး စ့ၢ်ကီးဒီး တံအ--- အရီဘၢၣ်ကျီး ဖဲအဘ--- သဝီဃၢၤ, နိၣ်က့ၣ်ကရူၢ်ပူၤန့ၣ်လီၤ. မ့ၣ်ပိၢ်အက့အခီသ့ၣ်တဖၣ် ဖျိးဘၣ်ဟးဂီၤဝဲ တံအ--- ရီဘၢၣ်ထူၣ်တဖၣ်န့ၣ်လီၤ. မ့ၣ်ပိၢ်အက့စှၤက့ ဖျိးဘၣ်တုၤဝဲလၢဖၠၢ်အကရၢၢ်ပူၤ ဘၣ်ဆၣ်တၢ်ဘၣ်ဒိဘၣ်ထံးပှၤ တအိၣ်ဝဲဘၣ်န့ၣ်လီၤ. မ့ၣ်ပိၢ် ခံဖျၢၣ်တဖျၢၣ်န့ၣ် လီၤဘၣ်ဝဲလၢ အဘ---သဝီပူၤဒီး ဘၣ်ဟးဂီၤဝဲ စီၤဘ--- အဟံၣ်န့ၣ်လီၤ. မ့ၣ်ပိၢ်အဝဲန့ၣ်လီၤတဲာ်အိၣ်ထီလၢဃီၤတထူၣ်အလိာ်ဝံၤဒီး ပိၢ်ထီၣ်ဝဲဒၣ်န့ၣ်လီၤ. မ့ၣ်ပိၢ်အက့အခီတဖၣ်ဖျိးဘၣ်ဟးဂီၤဝဲ စီၤဘ--- အဟံၣ်ဒီး ဘၣ်ဟးဂီၤစ့ၢ်ကီးဝဲ ဟံၣ်အဂၤဃိးဖျၢၣ်လၢ အအိၣ်ဘူးန့ၣ်လီၤ. တီၤဖုၣ်ကၠိအိၣ် တဖျၢၣ်ဖဲ အဘ---သဝီပူၤ, ဒီး တူာ်လိာ်ဝဲတုၤလွံၢ်တီၤ ဘၣ်ဆၣ်သနာ်က့ ကၠိန့ၣ်ဘၣ်တၢ်ပတုၤကွံာ် [စးထီၣ်ဖဲလါနိၣ်ဝ့ဘၢၣ် ၁ သီ, ၂၀၂၅ နံၣ်အနံၤပူၤ, ခီဖျိလၢကဘီယူၤဟဲခးလီၤတၢ်အဃိန့ၣ်လီၤ]. စီၤဘ--- အဖိမုၣ်စံးဝဲ, ဖဲကဘီယူၤဟဲတ့ၢ်လီၤတၢ်န့ၣ် အဝဲသ့ၣ် [ဟံၣ်ဖိဃီဖိ] တအိၣ်လၢအဟံၣ်ဘၣ်န့ၣ်လီၤ. အဝဲသ့ၣ်လဲၤဃ့ၢ်အိၣ်တ့ၢ်လံလၢ အခၠ--- သဝီ, ဖဲထိၣ်ကီးကိကရူၢ်, တန့ဆါကီၢ်ဆၣ်, ဖဲလါနိၣ်ဝ့ဘၢၣ် ၁ သီ, ၂၀၂၅ နံၣ်အနံၤ, ဖဲလၢကီၢ်ပယီၤသုး အကဘီယူၤ (Y-12) ဟဲတ့ၢ်လီၤမ့ၢ်ပိၢ်ခံဖျၢၣ် ဖဲနိၣ်က့ၣ်ကရူၢ်ပူၤ ဝံၤအလီၢ်ခံန့ၣ်လီၤ.
တနံၤဃီအတီၢ်ပူၤ, ဖဲလါနိၣ်ဝ့ဘၢၣ် ၁၃ သီ, ၂၀၂၅ နံၣ်အနံၤ, မုၢ်ထူၣ်အဆၢကတီၢ်, [ကီၢ်ပယီသုး] အကဘီယူၤဒုးသုးတဘ့ၣ် ဟဲတ့ၢ်လီၤမ့ၣ်ပိၢ်သၢဖျၢၣ် လၢ အဆ --- သဝီ, နိၣ်က့ၣ်ကရူၢ်ပူၤန့ၣ်လီၤ. မ့ၣ်ပိၢ်အံၤလီၤဘၣ်ဝဲလၢ သီခါဖၠၢ်အကရၢၢ်ပူၤဖဲအဆ--- သဝီပူၤဒီး ဘၣ်ဟးဂူာ်ဟးဂီၤဝဲ သီခါဖၠၢ် ဒီး သီခါဖၠၢ်အတၢ်သူၣ်ထီၣ်အဂၤယဲၢ်ဖျၢၣ် ဖဲအဘူးန့ၣ်လီၤ. ကဘီယူၤဟဲတ့ၢ်လီၤမ့ၣ်ပိၢ် အဃိဒူၣ်ဖိထၢဖိလၢအအိၣ်ဒီး ဖိဆံး ဒီး ပှၤသူၣ်ခ့သးပှၢ်သ့ၣ်တဖၣ်န့ၣ် ဘၣ်လဲၤဃ့ၢ်အိၣ်ကွံာ်ဝဲလၢ သဝီအဂၤတဖျၢၣ် လၢကရူၢ် အဂၤတဘ့ၣ်န့ၣ်လီၤ. သဝီတဖၣ်လၢအအိၣ်လၢ နိၣ်က့ၣ်အရူၢ်ပူၤန့ၣ် အိၣ်လီၤတဲာ်ကွံာ်ဒၣ်ထဲ ပှၤသးစၢ်ပိာ်မုၣ်ပိာ်ခွါသ့ၣ်တဖၣ်ဒီး အဝဲသ့ၣ် ဘၣ်အိၣ်ဝဲလၢ တၢ်ပျံၤတၢ်ဖုးအပူၤန့ၣ်လီၤ. ကၠိစ့ၢ်ကီး ဘၣ်တၢ်ပတုာ်ကွံာ်ဝဲန့ၣ်လီၤ [ဖဲတၢ်ကွဲးထီၣ်အဆၢကတီၢ်].
ကီၢ်ပယီၤသုးခးလီၤကျိဖးဒိၣ်အဃိ ဘၣ်ဟးဂူာ်ဟးဂီၤသဝီဖိဟံၣ်ဃီ ဒီး အတၢ်ပီးတၢ်လီတဖၣ်
ဖဲလါဒံၣ်စဲဘၢၣ် ၇ သီ, ၂၀၂၅ နံၣ်အနံၤ, ဂီၤခီ ၉ နၣ်ရံၣ်အဆၢကတီၢ်ကီၢ်ပယီၤသုး အသုးဖိတဖၣ်လၢ အအိၣ်ဆီလီၤအသးဖဲ သ့ၣ်ကၢ်လီၤတီၢ်တၢ်လူၢ်ခိၣ်တဖၣ် ခးလီၤတၢ်လၢကျိဖးဒိၣ် ၈၁ မမတဖျၢၣ်ဒီး လီၤတဲာ်ဝဲလၢ အဒ---သဝီပူၤ, ထံဝၣ်ဘျီကရူၢ်, တန့ဆါကီၢ်ဆၣ်ပူၤန့ၣ်လီၤ. ကျိဖးဒိၣ်ချံဝဲန့ၣ်လီၤတဲာ်ဝဲလၢ နီၢ်ဆ--- အဟံၣ်မဲာ်ညါဒီး ဘၣ်ဟးဂီၤဝဲနီၢ်ဆ--- အဟံၣ်ခိၣ်ထးဝါ ဒီး တဒိလာ်ဒါတဖၣ်, နီၢ်ဒ--- အဟံၣ်ခိၣ်ဒုး ဒီး သိလ့ၣ်ယီၢ်သၢခိၣ် အပၣ်ရံးသ့ၣ်တဖၣ်န့ၣ်လီၤ. နီၢ်ဒ--- စံးဝဲလၢ, အဝဲသ့ၣ် [နီၢ်ဆ--- ဒီး နီၢ်ဒ--- ] အိၣ်လၢဟံၣ်ဖီလာ် ဃုာ်ဒီးပှၤအဂၤတဆံဂၤ ဖဲလၢတၢ်ကဲထီၣ်သးအဆၢကတီၢ်န့ၣ်ဒီး လၢတၢ်ဆိၣ်ဂ့ၤ အပူၤ ပှၤတဘၣ်ဒိဝဲနီတဂၤဘၣ်န့ၣ်လီၤ. တချုးဒ်လၢ ကီၢ်ပယီၤသုး ခးလီၤဝဲကျိဖးဒိၣ်ဒ်ဘၣ်အဆၢကတီၢ်, ကရူၢ်ခိၣ်ခံ [လၢအ အိၣ်လၢ အဒ--- သဝီ] ထံၣ်ဝဲဒြိတဘ့ၣ်ဒီး ဟ့ၣ်ပလီၢ်သဝီဖိသ့ၣ်တဖၣ်လၢ ကအိၣ်လၢတၢ်ပလီၢ်ပဒီသးအပူၤန့ၣ်လီၤ. တၢ်န့ၣ်ဝံၤ အလီၢ်ခံ, နီၢ်ဆ--- ဒီး အဖိခံဂၤ လဲၤအိၣ်ပလဲာ်အသး လၢတၢ်လီၢ်အဂၤတတီၤဝံၤဒီး ကျိဖးဒိၣ်လီၤတဲာ်ဝဲဖဲအဟံၣ်မဲာ်ညါန့ၣ်လီၤ. မ့တမ့ၢ် ဘၣ်ဖုးလၢ [နီၢ်ဆ---ဒီး နီၢ်ဒ---] အဟံၣ်ဖိဃီဖိတဖၣ် သုးပလဲာ်ဆိကွံာ်အသးချုးဆၢချုးကတီၢ်ဘၣ်န့ၣ် အဝဲသ့ၣ်က ဘၣ်ဒိဝဲဒၣ်န့ၣ်လီၤ. သဝီဖိလၢအအိၣ်လၢ အဒ--- သဝီတဖၣ် ပျံၤတၢ်ဖုးတၢ်ဒီး ဘၣ်အိၣ်လၢတၢ်ပလီၢ်ပဒီအပူၤန့ၣ်လီၤ. ဖဲတၢ်ကဲ ထီၣ်သးအနံၤန့ၣ်, သဝီဖိတဖၣ် မၤဝဲခရံာ်အိၣ်ဖျဲၣ် အတၢ်ရဲၣ်တၢ်ကျဲၤဒီး ဘူၣ်သကိးဘါသကိးတၢ် ဘၣ်ဆၣ်တချုးလၢ တၢ်ဘါပျၢ်ဒ်ဘၣ်န့ၣ် ဘၣ်ဃ့ၢ်ပြံပြါကွံာ်ဝဲအသးန့ၣ်လီၤ. တၢ်ကဲထီၣ်သးဝံၤအလီၢ်ခံဖိဒံဖိသၣ်ဒီး သူၣ်က့သးပှၢ်လၢဟးတသ့ဘၣ် သ့ၣ်တဖၣ် ဘၣ်ဃ့ၢ် [ကရီ] ကွံာ်ဝဲလၢတၢ်လီၢ်ဂၤတတီၤန့ၣ်လီၤ.